ᑎᑎᕋᖅᑐᖃᐃᓐᓇᓕᕐᖓᑦ ᐃᕐᖐᓐᓈᖅᑕᐅᑎᒃᑯᑦ, ᕙᐃᔅᐳᒃᑯᓪᓗ ᐊᒻᒪᓗ ᐅᖄᓚᕕᐅᖃᑦᑕᖅᖢᑕ ᕿᑭᖅᑕᓂ ᓄᓇᓕᖕᓂᑦ ᑐᑭᓯᒍᒪᔪᓂᒃ ᖃᓄᖅ ᐱᓇᓱᖃᑕᐅᔪᓐᓇᕐᒪᖔᑖᒃ ᐃᖅᑲᓇᐃᔮᒃᓴᓂ ᓄᓘᔮᑦ ᐱᓕᕆᐊᖓᓂᑦ.

ᑕᕝᕙ ᑭᐅᔾᔪᑎᕗᑦ:

ᐃᓄᐃᑦ ᕿᑭᖅᑕᓂ ᓄᓇᓕᖏᓐᓃᑦᑐᑦ ᐱᓇᓱᖃᑕᐅᔪᓐᓇᖅᑐᑦ ᐃᖅᑲᓇᐃᔮᒃᓴᓂ ᐸᕕᓐᓛᓐᑯᓐᓂᑦ ᐊᒻᒪᓗ ᐊᓯᖏᓐᓂᑦ ᐃᖅᑲᓇᐃᔭᕐᕕᐅᔪᓐᓇᖅᑐᓂᒃ ᕿᑭᖅᑕᓂ ᓄᓇᓕᖕᓂᑦ ᐊᑎᓕᐅᖃᑕᐅᓗᑎᑦ ᕿᑭᖅᑕᓃᒃᑯᑦ ᐃᓄᖕᓂᑦ ᐃᖅᑲᓇᐃᔭᕈᓐᓇᖅᑐᓂᒃ ᖃᕆᓴᐅᔭᓃᑦᑐᒥᒃ, ᑐᑦᑕᕐᕕᖕᒥᑦ.

ᑐᑦᑕᕐᕕᒃ, ᐋᖅᑭᒃᓯᑲᐅᑎᒋᔪᓐᓇᖅᑐᖅ ᐃᖅᑲᓇᐃᔮᕆᔭᐅᓯᒪᓂᑯᓂᑦ ᓇᓕᖅᑲᓕᐅᕈᓐᓇᕐᓗᑎᒃ ᑭᓇᑐᐃᓐᓇᕐᒧᑦ ᐊᒻᒪᓗ ᐃᖅᑲᓇᐃᔮᒃᓴᓂᒃ ᒪᓂᒪᔪᓂᒃ ᓇᓗᓇᐃᕐᕕᐅᔪᓐᓇᕐᓗᑎᒃ ᕿᑭᖅᑕᓂ ᓄᓇᓕᖕᓂ.  ᐃᓄᐃᑦ ᐊᑎᓕᐅᖅᓯᒪᔪᑦ ᑐᑦᑕᕐᕕᒃᑯᑎᒍᑦ ᐃᓚᒋᔭᐅᖃᑕᐅᔪᓐᓇᖅᑐᑦ ᐃᓕᓐᓂᐊᕐᓂᕐᒥᒃ, ᐱᓕᒻᒪᒃᓴᕐᓂᕐᒥᓗ, ᐃᖅᑲᓇᐃᔭᓯᓐᓈᕐᓗᑎᒃ ᐃᓕᓐᓂᐊᕐᓂᕐᓂ ᐊᒻᒪᓗ ᓯᓚᑦᑐᖅᓴᕐᕕᖕᓂ ᐃᓕᓐᓂᐊᒐᒃᓴᓂᑦ.

ᐊᑎᓕᐅᕈᒪᒍᕕᑦ ᑐᑦᑕᕐᕕᒃᑯᑦ ᐃᕐᖐᓐᓈᖅᑕᐅᑎᒃᑯᑦ ᓇᒃᓯᐅᑎᓗᑎᑦ ᐅᕗᖓ tuttarvik@qia.ca

ᐃᑲᔪᖅᑕᐅᒋᐊᖃᕈᕕᑦ ᑐᑭᓯᒋᐊᕐᕕᐅᔪᓐᓇᖅᑐᑦ ᖃᐅᔨᒋᐊᕐᕕᐅᓗᑎᒃ ᕿᑭᖅᑕᓃᒃᑯᑦ ᓄᓇᓕᖕᓂ ᑐᓴᐅᒪᑎᑦᑎᔨᖏᓐᓄᑦ.  ᓱᓕ, ᖃᐅᔨᒪᓂᐊᖅᑯᑎᑦ ᑖᒃᑯᐊ ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᐳᓚᕋᕐᒪᑕ ᕿᑭᖅᑕᓂ ᓄᓇᓕᖕᓄᑦ ᓄᐊᓴᐃᒋᐊᖅᑐᖅᖢᑎᒃ ᑐᑭᓯᒋᐊᕈᑎᓂᒃ ᐊᒻᒪᓗ ᐃᑲᔪᕆᐊᖅᓯᒪᓪᓗᑎᒃ ᑕᑕᑎᖅᓯᔪᒪᔪᓂᒃ ᑐᑦᑕᕐᕕᖕᒧᑦ.