ᐃᖃᓗᐃᑦ, ᓄᓇᕗᑦ – ᒪᔾᔨ 18, 2019 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᖁᕕᐊᓱᒃᖢᑎᒃ ᓴᖅᑭᑎᑦᑎᕗᑦ “ᐅᖃᐅᓯᕆᓯᒪᔭᕗᑦ: ᐅᖃᐅᓯᕆᖃᑦᑕᖅᓯᒪᔭᕗᑦ.  ᐃᓄᐃᑦ ᐃᓱᒪᒋᔭᖏᑦ ᖃᓄᖅ ᐅᖅᓱᐊᓗᓐᓂᐊᕐᓂᖅ ᒑᓯᒃᓴᖅᓯᐅᕐᓂᕐᓗ ᐱᕙᓪᓕᐊᑎᑕᐅᓂᖏᑦ ᐊᒃᑐᐃᒍᓐᓇᕐᒪᑦ ᐃᓅᓯᑦᑎᓐᓂ.”  ᑖᓐᓇ ᐅᓂᒃᑳᓕᐊᖅ ᓴᖅᑭᑎᑦᑎᔪᖅ ᖃᐅᔨᔭᐅᓯᒪᔪᓂᒃ ᖃᐅᔨᓴᖅᑕᐅᓚᐅᖅᑐᓂᒃ ᑐᑭᒧᐊᒍᑎᒃᓴᓂ ᐊᕙᑎᒥᒃ ᖃᐅᔨᓴᕐᓂᕐᒧᑦ ᐅᖅᓱᐊᓗᓐᓂᐊᕐᓂᖅ ᒑᓯᒃᓴᖅᓯᐅᕐᓂᖅ ᐱᓪᓗᒍᑦ ᕿᑭᖅᑖᓘᑉ ᐃᑭᖓᓂ ᐊᒻᒪ ᓴᓐᓂᕈᑎᐅᑉ ᐃᒪᖓᓂ.  

ᑕᒪᑐᒪᓂᑦ ᐱᓇᓱᐊᕈᓯᕐᒥ ᕿᑭᖅᑕᓃᒃᑯᑦ ᓴᖅᑭᑎᑦᑎᓂᐊᖅᑐᑦ ᐱᓕᕆᐊᕆᓯᒪᔭᖏᑕ ᒥᒃᓵᓄᑦ ᓄᓇᕗᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ.

“ᑖᓐᓇ ᐅᓂᒃᑳᓕᐊᖅ ᐃᓄᓐᓂᓐᖔᖅᑐᑦ” ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ, ᐸᐅᓗᓯ ᐊᕿᐊᕈᖅ, “ᐱᒻᒪᕆᐅᓚᐅᕐᒪᑦ ᐅᕙᑦᑎᓐᓄᑦ ᐳᓚᕋᖅᑕᐅᓂᖏᑦ ᐊᒃᑐᖅᑕᐅᓯᒪᔪᓂᒃ ᓄᓇᓕᓐᓄᑦ ᐃᓚᐅᑦᑎᐊᖁᔨᓪᓗᑕ ᖃᓄᖅ ᐅᖅᓱᐊᓗᓐᓂᐊᕐᓂᖅ ᒑᓯᒃᓴᖅᓯᐅᕐᓂᕐᓗ ᐃᓅᓯᕐᓂᑦ ᐊᒃᑐᐃᔪᓐᓇᕐᓂᖓᓂᒃ ᐊᒻᒪᓗ ᐊᕙᑎᒥᒃ.”   

2017ᒥᑦ, ᕿᑭᖅᑕᓃᒃᑯᑦ ᐃᓚᒋᔭᐅᓯᒪᖕᒪᑕ ᑲᑎᒪᔨᕋᓛᓂ ᑐᑭᒧᐊᒍᑎᒃᓴᓕᐅᖅᐸᓪᓕᐊᓚᐅᖅᑐᓂᒃ ᐊᕙᑎᒥᒃ ᖃᐅᔨᓴᕐᓂᕐᒧᑦ.  ᑐᕌᒐᓪᓗᐊᕆᓚᐅᖅᑕᕗᑦ ᓄᐊᓴᐃᓗᑕ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐃᓄᓐᓂᑦ, ᐱᖃᓯᐅᑎᓯᒪᓂᐊᖅᑐᓂᒃ ᑭᖑᓪᓕᖅᐹᒃᑯᑦ ᐊᑐᓕᖁᔭᐅᓯᒪᓂᐊᖅᑐᓄᑦ ᑐᑭᒧᐊᒍᑎᒃᓴᓂ ᐊᕙᑎᒥᒃ ᖃᐅᔨᓴᕐᓂᕐᒧᑦ.

2016ᒥ ᒐᕙᒪᑐᖃᒃᑯᑦ ᓄᖅᑲᖓᑎᑦᑎᒋᐊᓚᐅᕐᒪᑕ ᐅᖅᓱᐊᓗᓐᓂᐊᕐᓂᕐᒥᒃ ᒑᓯᒃᓴᖅᓯᐅᕐᓂᕐᒥᓗ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐃᒪᖅᐸᓯᖏᓐᓂᑦ.  ᑖᓐᓇ ᑐᑭᑖᕈᑎᒋᔭᐅᓚᐅᖅᑐᖅ ᑕᐃᔅᓱᒪᓂ ᕿᒥᕐᕈᔭᐅᒃᑲᓐᓂᕐᓂᐊᖅᑐᖅ ᒐᕙᒪᑐᖃᒃᑯᓐᓄᑦ 2021ᖑᓕᖅᐸᑦ.

ᑖᓐᓇ ᐱᔾᔪᑎᖃᖅᑐᖅ ᑐᑭᒧᐊᒍᑎᒃᓴᓕᐅᕐᓂᕐᒥᒃ ᐊᕙᑎᒥᒃ ᖃᐅᔨᓴᕐᓂᕐᒧᑦ ᑐᑭᓯᒃᑲᓐᓂᕈᒪᓪᓗᑎᒃ ᖃᓄᐃᑦᑐᓂᒃ ᐅᓗᕆᐊᓇᖅᑐᖃᕈᓐᓇᕐᒪᖔᑦ, ᐃᑲᔫᓯᐊᒃᓴᖃᕈᓐᓇᕐᒪᖔᑦ, ᐊᒻᒪᓗ ᐊᐅᓚᑦᑎᔾᔪᑎᒃᓴᐅᓇᔭᖅᑐᓂᒃ ᑐᑭᒧᐊᒍᑎᒃᓴᓂᑦ ᐃᒪᖅᐸᓯᕐᒥ ᐅᖅᓱᐊᓗᓐᓂᐊᕐᓂᐅᑉ ᒑᓯᒃᓴᖅᓯᐅᕐᓂᐅᑉᓗ ᒥᒃᓵᓄᑦ ᕿᑭᖅᑖᓘᑉ ᐃᑭᖓᓂ ᐊᒻᒪ ᓴᓐᓂᕈᑎᐅᑉ ᐃᒪᖓᓂᓗ.

ᑖᒃᑯᐊ ᐊᐱᖅᑯᑎᒋᔭᐅᔪᑦ ᑭᐅᔭᐅᑦᑎᐊᕈᓐᓇᖁᓪᓗᒋᑦ, ᕿᑭᖅᑕᓃᒃᑯᑦ ᓴᖅᑭᑎᑦᑎᓚᐅᖅᑐᑦ ᐱᖓᓲᔪᖅᑑᔪᓂᑦ ᐃᓄᐃᑦ ᖃᐅᔨᒪᔭᑐᖃᓕᕆᓂᕐᒧᑦ ᑲᑎᒪᔨᕋᓛᓂᒃ, ᐊᐅᓱᐃᑦᑐᒥ, ᐃᒃᐱᐊᕐᔪᖕᒥ, ᒥᑦᑎᒪᑕᓕᖕᒥ, ᑲᖏᖅᑐᒑᐱᖕᒥ, ᕿᑭᖅᑕᕐᔪᐊᕐᒥ ᐊᒻᒪᓗ ᐸᓐᓂᖅᑑᒥᓗ.  ᑖᒃᑯᐊ ᑲᑎᒪᔨᕋᓛᑦ ᐅᖃᐅᓯᖃᓚᐅᖅᑐᖅ ᓂᕿᒃᓴᖃᑦᑎᐊᕆᐊᖃᕐᓂᕐᒥᒃ, ᐊᖓᓇᓱᖃᑦᑕᕐᓂᕐᒥᒃ, ᐊᒻᒪᓗ ᐃᓄᒃᑕᓂ ᓂᕿᓂᒃ ᒥᓇᖅᓯᖃᑦᑕᕐᓂᕐᒥᓗ ᖃᐅᔨᓴᖅᑕᐅᓯᒪᔪᕕᓂᕐᓂ.  

ᑖᒃᑯᐊ ᑲᑎᒪᔨᕋᓛᑦ ᐊᖅᑯᑎᒋᔭᐅᓪᓗᑎᒃ, ᐊᒻᒪᓗ ᐃᓛᒃᑰᖓᔪᓂᒃ ᖃᐅᔨᓴᖅᑕᐅᓯᒪᔪᓂᒃ ᒪᕐᕉᓂ ᐊᕐᕌᒍᑦ ᐃᓗᐊᓂ, ᕿᑭᖅᑕᓃᒃᑯᑦ ᓄᐊᓴᐃᓚᐅᕐᒪᑕ ᑐᑭᓯᒋᐊᕈᑎᒃᓴᓂ ᐊᒃᑐᐃᒍᑕᐅᑐᐃᓐᓇᕆᐊᖃᖅᑐᓄᑦ ᐅᖅᓱᐊᓗᓐᓂᐊᕐᓂᕐᒥᑦ ᒑᓯᒃᓴᖅᓯᐅᕐᓂᕐᒥᓪᓗ ᕿᑭᖅᑖᓘᑉ ᐃᑭᖓᓂ ᐊᒻᒪ ᓴᓐᓂᕈᑎᐅᑉ ᐃᒪᖓᓂᓗ, ᓯᑕᒪᓂᒃ ᐱᔾᔪᑎᖃᖅᖢᑎᒃ: ᐅᒪᔪᐃᑦ, ᐅᒪᔪᐃᓪᓗ ᓇᔪᒐᖃᕐᕕᖏᑦ, ᐃᓄᐃᑦ ᐃᓕᖅᑯᓯᐊᑦ ᐊᓯᔾᔨᕐᓂᖓ, ᐃᓄᐃᑦ ᓂᕿᒃᓴᖃᑦᑎᐊᕆᐊᖃᕐᓂᖏᑦ ᐊᒻᒪᓗ ᐃᑲᔫᓯᐊᒃᓴᓂ ᐱᕕᓴᓂᓗ ᐃᓄᖕᓄᑦ.

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:

ᓰᒪ ᓴᕼᐋᕐ ᓯᐊᕋᕼᐃ, ᑐᑭᒧᐊᖅᑎᑦᑎᔨ ᑐᓴᐅᒪᖃᑦᑕᐅᑎᓂᕐᒥ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

867.975.8413

1.800.667.2742