ᐃᖃᓗᐃᑦ, ᓄᓇᕗᑦ, ᕖᕝᕗᐊᓕ  15, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᐱᒋᐊᕈᑎᖓ ᐃᑲᔪᕈᒪᓪᓗᑎᒃ ᐱᔭᕆᐊᑐᓗᐊᖁᓇᒍ ᓂᕿᒃᓴᖃᑦᑎᐊᖏᓐᓇᕐᓂᕐᒥᒃ ᐊᒻᒪᓗ ᐃᑲᔪᕈᒪᓪᓗᑎᒃ ᐊᓂᑦᑕᐃᓕᑲᐃᓐᓇᕆᐊᓕᖕᓂᑦ ᓄᓇᓕᖕᓂ ᐊᒃᑐᖅᑕᐅᓯᒪᔪᓄᑦ ᓄᕙᓐᓇᕐᔪᐊᖅ-19ᒧᑦ ᑲᔪᓯᕗᖅ ᓂᕿᑖᕈᑎᒃᓴᖃᖅᑎᑦᑎᓪᓗᑎᒃ ᐃᒃᐱᐊᕐᔪᖕᒥᐅᓄᑦ.

ᕿᑭᖅᑕᓃᒃᑯᑦ, ᑲᑐᔾᔨᖃᑎᖃᖅᖢᑎᒃ ᐅᑭᐅᖅᑕᖅᑐᒥᒃ ᑯᐊᐸᒃᑯᓐᓂ, ᐸᔪᖅᑎᕆᖃᑦᑕᕐᓂᐊᖅᑐᑦ ᓂᕿᑖᕈᑎᒃᓴᓂᒃ ᐊᑭᖕᓂᑦ $250ᓂ ᐃᓄᖕᓄᑦ ᐃᒃᐱᐊᕐᔪᖕᒥᐅᓄᑦ ᐱᒋᐊᕐᓗᑎᒃ ᕖᕝᕗᐊᓕ 15^th, 2022.

ᐊᐃᑉᐸᖓ ᓂᐅᕕᕈᑎᑦ ᐸᔪᖅᑎᕆᕙᓪᓕᐊᓛᖅᑐᑦ $250ᓂ ᐊᑭᓕᖕᓂᑦ   ᒫᑦᓯ 7, 2022ᒥ ᐱᒋᐊᕐᓗᒍ.

“ᐊᓯᔾᔨᖅᐸᓪᓕᐊᖏᓐᓇᖅᑎᓪᓗᒍ ᖃᓄᐃᑉᐸᓪᓕᐊᓂᕆᔭᖓ ᐊᒻᒪ ᓯᐊᒻᒪᒃᐸᓪᓕᐊᓂᖓ ᓄᕙᓐᓇᕐᔪᐊᖅ-19 ᓄᓇᕗᒥ, ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᐱᓕᕆᖕᒪᑕ ᐃᓄᐃᑦ ᕿᑭᖅᑕᓂᒥᐅᑦ ᐃᑲᔫᑎᒃᓴᖃᑦᑎᐊᖁᓪᓗᒋᑦ ᐱᔭᕆᐊᖃᖅᑕᖏᓐᓂᒃ ᐱᔪᓐᓇᕐᓂᐊᕐᒪᑕ ᐊᒻᒪᓗ  ᒪᓕᓪᓗᑎᒃ ᐃᓄᓕᒫᓄᑦ ᐋᓐᓂᐊᖅᑕᐃᓕᓂᕐᒧᑦ ᐊᑐᖁᔭᐅᓯᒪᔪᓂᑦ,  ᐅᖃᖅᑐᖅ ᕿᑭᖅᑕᓃᒃᑯᑦ ᐊᖓᔪᖅᑳᖓ ᐅᓛᔪᒃ ᐊᑭᓱᒃ.

“ᓄᕙᓐᓇᕐᔪᐊᖅᑖᖅᑐᒥᒃ ᓇᓗᓇᐃᖅᓯᓯᒪᔪᖃᖅᑎᓪᓗᒍ ᐃᒃᐱᐊᕐᔪᖕᒥ, ᕿᑭᖅᑕᓃᒃᑯᑦ ᓄᓇᖃᖅᑎᒌᓂᒃ ᐃᓱᒫᓗᓗᐊᖁᔨᙱᑦᑐᑦ.  ᕿᑭᖅᑕᓃᒃᑯᑦ ᖁᕕᐊᓱᒃᖢᑎᒃ ᐸᔪᖅᑎᕆᓛᕐᒪᑕ ᓂᐅᕕᕈᑎᓂᒃ ᐊᑐᓂ ᐃᓚᒌᓄᑦ ᐃᑲᔫᑕᐅᓗᑎᒃ ᐊᒃᓱᕈᓐᓇᖅᑐᒃᑰᖅᑎᓪᓗᑕ.  ᑲᑐᔾᔨᑦᑎᐊᕐᓗᑕ, ᐃᓐᓇᕗᑦ, ᐃᓅᓱᒃᑐᕗᑦ ᐊᒻᒪ ᑎᒥᒥᒍᑦ ᐊᒃᑐᖅᑕᐅᓴᕋᐃᑦᑐᓪᓗ ᐊᑦᑕᕐᓇᖅᑐᒦᑎᑕᐅᑦᑕᐃᓕᓗᑎᒃ.” ᐅᖃᖅᑐᖅ ᕿᑭᖅᑕᓃᒃᑯᑦ ᑲᑎᒪᔨᖓ ᐃᒃᐱᐊᕐᔪᖕᒧᑦ ᔨᐊᕆᒥ ᑑᕐᖔᓗᒃ.

ᐃᓄᐃᑦ ᐃᓚᒌᑦ ᐊᒥᓱᑦ ᑕᕝᕙᓂ ᐃᒡᓗᒥᒃ ᓇᔪᖅᑐᑦ ᖃᐅᔨᒋᐊᖁᔭᐅᕗᑦ ᕿᑭᖅᑕᓃᒃᑯᑦ ᓄᓇᓕᖕᓂ ᑐᓴᐅᒪᑎᑦᑎᔨᖓᓄᑦ ᓇᓗᓇᐃᔭᕐᕕᐅᓂᐊᕐᒪᑕ ᖄᖓᒍᑦ ᐃᑲᔫᑕᐅᒃᑲᓐᓂᕈᓐᓇᖅᑐᓂᒃ.

ᑮᓇᐅᔭᐃᑦ ᕿᑭᖅᑕᓃᒃᑯᑦ ᓄᕙᓐᓇᕐᔪᐊᖅ-19ᒧᑦ ᐊᑐᖅᑐᑦ ᒐᕙᒪᑐᖃᒃᑯᑦ ᐃᓄᓕᕆᔨᑐᖃᒃᑯᑦ ᓄᓇᖃᖅᑐᑐᖃᓄᑦ ᓄᓇᓕᖏᓐᓄᑦ ᐃᑲᔫᑎᖏᓐᓂᙶᖅᑐᑦ.

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:
ᑭᐊᕆᓐ ᕙᓚᕼᐊᑎ
ᑐᑭᒧᐊᒃᑎᑦᑎᔨ, ᑐᓴᐅᒪᖃᑦᑕᐅᑎᓕᕆᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑖ) 867.975.8398 ᐊᑭᖃᙱᑦᑐᒧᓪᓘᓐᓃᑦ1.800.667.2742
kflaherty@qia.ca