ᐃᖃᓗᐃᑦ, ᓄᓇᕗᑦ ᐅᑐᐱᕆ 11, 2024 –ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓂᓯᓪᓚᑖᕐᓂᕋᐃᔪᑦ 2017ᒥ ᑮᓇᐅᔭᖅᑖᖅᑎᑦᑎᓂᐊᕐᓂᕋᓚᐅᖅᑕᖓᓂ ᓴᓇᔭᐅᕙᓪᓕᐊᖁᓪᓗᒍ ᓄᓇᕗᒻᒥ ᐃᓄᐃᑦ ᐃᑦᑕᕐᓂᓴᖏᓐᓂᒃ ᑕᑯᔭᒐᖃᕐᕕᖕᒥ ᓄᓇᕗᒻᒥ ᐃᓄᐃᒃ ᐱᖁᑎᖏᓐᓂᒃ ᐸᐸᑦᑎᔨᓄᑦ ᑕᒪᑐᒪᓂ ᐊᕐᕌᒍᒥ ᐱᒋᐊᖅᑕᐅᔪᒃᓴᒫᖑᓪᓗᓂ.
ᒫᔾᔨ 2023ᒥ, ᕿᑭᖅᑕᓃᒃᑯᑦ ᑐᓂᓯᓚᐅᕐᒪᑕ ᓯᕗᓪᓕᐹᖓᓂ $2.5 ᒥᓕᐊᓐᓂᒃ ᓄᓇᕗᒻᒥ ᐃᓄᐃᑦ ᐱᖁᑎᖏᓐᓂᒃ ᐸᐸᑦᑎᔨᓄᑦ. ᑐᓂᓯᒃᑲᓐᓂᕆᓪᓗᑎᒡᓗ ᐱᒋᐊᖅᑕᐅᓪᓚᑦᑖᖁᓕᖅᖢᒍ ᓄᓇᕗᒻᒥ ᐃᓄᐃᑦ ᐃᑦᑕᕐᓂᓴᖃᕐᕕᒃᓴᖓ.
ᐅᓪᓗᒥ ᑮᓇᐅᔭᑦ ᑲᑎᑕᐅᓯᒪᖏᑦᑐᑦ $2.5 ᒥᓕᐊᓐ ᐅᓂᒃᑳᖏᑦ ᕿᒥᕐᕈᔭᐅᓚᐅᖅᖢᑎᒃ ᐊᖏᖅᑕᐅᓚᐅᖅᖢᑎᒡᓗ, ᕿᑭᖅᑕᓃᒃᑯᑦ ᐅᖃᖅᑲᐅᔪᑦ ᐃᓄᐃᑦ ᐱᖁᑎᖏᓐᓂᒃ ᐸᐸᑦᑎᔩᑦ ᑐᓂᔭᐅᓪᓚᕆᖕᓂᐊᓕᖅᑐᑦ ᑭᖑᓪᓕᖅᐹᒥ ᓴᓂᕐᕙᒃᑕᐅᓯᒪᔪᖅ $1.5 ᒥᓕᐊᓐᓂᒃ, ᕿᑭᖅᑕᓃᒃᑯᑦ ᑐᓂᓯᓂᐊᕐᓂᕋᐃᓚᐅᖅᓯᒪᖕᒪᑕ $5ᒥᓕᐊᓐᓂᒃ.
“ᓄᓇᕗᒻᒥ ᐃᓄᐃᑦ ᐃᑦᑕᕐᓂᓴᖃᕐᕕᒃᓴᖓᑕ ᐱᙳᖅᑎᑕᐅᓂᖓ ᒪᓕᒃᓯᒪᑦᑎᐊᕐᒪᑦ ᓄᓇᑖᕐᓂᕐᒧᑦ ᐊᖏᕈᑎᖃᖅᑎᓪᓗᑕ ᐃᓛᒃᑯ 33 ᑕᑯᓪᓗᒍ ᐱᔪᒫᔭᐅᓚᐅᖅᓯᒪᖕᒪᑦ ᓄᓇᕗᒻᒧᑦ ᐊᖏᖃᑎᒌᒍᒥᒃ ᐃᓄᐃᑦ ᐱᖁᑎᖏᑦ ᓄᓇᖏᓐᓄᑦ ᐅᑎᖅᑎᑕᐅᓗᑎᒃ. ᖁᕕᐊᓱᓪᓚᕆᒃᑐᖓ ᕿᑭᖅᑕᓃᒃᑯᑦ ᐅᓪᓗᒥ ᓇᖏᖃᑎᒌᖕᒪᑕ ᐃᓄᐃᑦ ᐱᖁᑎᖏᓐᓂᒃ ᐸᐸᑦᑎᔨᒃᑯᓐᓂ ᑕᒪᓐᓇ ᐃᓄᐃᑦ ᐱᖁᑎᖏᑦ ᐅᑎᑦᑎᑕᐅᓪᓚᑦᑖᖁᓪᓗᒋᑦ ᐸᖅᑭᔭᐅᑦᑎᐊᖁᓪᓗᒋᓪᓗ ᐃᓕᖅᑯᓯᑦᑎᓐᓄᑦ, ᐱᖅᑯᓯᑦᑎᓐᓄᑦ ᐅᖃᐅᓯᒃᑎᓐᓄᓪᓗ ᓴᐳᔾᔭᐅᖕᒪᑕ ᑖᒃᑯᓄᖓ.” ᕿᑭᖅᑕᓃᒃᑯᑦ ᐊᖓᔪᖅᑳᖓ ᐅᓛᔪᒃ ᐊᑭᓱᒃ ᐅᖃᖅᑐᖅ.
“ᓄᓇᕗᑦ ᑲᓇᑕᓕᒫᒥ ᓄᓇᑐᐊᑦᑎᐊᖑᓕᕐᒪᑦ ᐃᑦᑕᕐᓂᓴᕐᓄᑦ ᑕᑯᔭᒐᖃᕐᕕᖃᖏᑦᑐᑑᓪᓗᓂ. ᑖᓐᓇ ᓇᑉᐸᖅᑕᐅᓂᐊᖅᑐᖅ ᐃᓄᖕᓄᑦ ᐱᒋᔭᐅᓂᖓᓂᒃ ᐅᖃᐅᔾᔨᖕᒪᑦ ᓇᖕᒥᓂᖅ ᐸᖅᑭᔨᐅᓂᐊᓕᕐᒪᑕ ᐊᑐᖅᓯᒪᔭᖏᓐᓂᒃ ᑕᑯᖅᑯᑎᔪᓐᓇᕐᓗᓂᔾᔪᒡᓗ ᐃᓱᒪᒋᔭᒥᖕᓂᒃ. ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐅᖃᐅᓯᖏᓐᓂᓪᓗ ᐃᓕᓐᓂᐊᖅᑎᑦᑎᓂᐊᓪᓚᕆᖕᒪᑦ ᑭᖑᕚᒃᓴᑦᑎᓐᓄᑦ ᑕᒪᓐᓇᓗ ᐱᓕᒻᒪᒃᓴᐅᑎᐅᓕᕈᓐᓇᑦᑎᐊᕐᓂᖓ ᐃᖅᑲᓇᐃᔭᓕᕈᑕᐅᔪᓐᓇᕐᓂᖓᓗ ᐅᐱᓐᓇᖅᑐᖅ ᐃᓅᓯᑐᖃᕐᒥᖕᓂᒃ ᐅᑎᑦᑏᕙᓪᓕᐊᓗᑎᒡᓗ ᐱᑖᒥᖕᓄᑦ. ᐃᓄᐃᑦ ᑲᑐᔾᔨᖃᑎᒌᒻᒪᕆᐅᓚᐅᖅᐳᑦ ᑕᒪᐃᓐᓂᒃ ᑲᑐᔾᔨᖃᑎᒌᒡᕖᑦ ᑕᒪᓐᓇ ᐱᙳᖅᑎᑕᐅᓪᓚᑦᑖᖁᓪᓗᒍ”, ᓴᑭᐊᓯ ᓴᐅᓪᓗᐊᐱᑦ, ᐃᓄᐃᑦ ᐱᖁᑎᖏᓐᓂᒃ ᐸᐸᑦᑎᔩᑦ ᐊᖓᔪᖅᑳᖓ.
ᑐᓴᕆᐊᒃᑲᓐᓂᕈᑎᒋᔪᒪᒍᕕᐅᒃ ᓄᓇᕗᒻᒥ ᐃᓄᐃᑦ ᐃᑦᑕᕐᓂᓴᖃᕐᕕᒃᓴᖓ ᐊᒻᒪᓗ ᐃᓄᐃᑦ ᐱᖁᑎᖏᓐᓂᒃ ᐸᐸᑦᑎᔨᒃᑯᑦ ᑕᑯᒋᐊᕈᒃ ᐃᑭᐊᖅᑎᕕᑦᑎᓐᓂ www.nunavutheritage.ca ᐊᒻᒪ www.ihti.ca
ᕿᑭᖅᑕᓃᒃᑯᑦ ᑲᑎᒪᔨᖏᑦ ᕿᓄᐊᖃᐃᓐᓇᕐᒪᑕ ᐃᓄᐃᑦ ᐱᖁᑎᕕᓂᖏᑦ ᐃᑦᑕᕐᓂᓴᑦ ᐅᑐᖅᑎᑕᐅᖁᓪᓗᒋᑦ ᑕᑯᔭᒐᖃᕐᕕᓕᐅᕐᓗᑎᒡᓗ ᐃᓂᒃᓴᖏᓐᓂᒃ ᓴᖅᑭᔮᕈᑎᑦᑎᐊᕙᐅᓂᖓ ᐃᓄᐃᑦ ᐃᓕᖅᑯᓯᑐᖃᖏᓐᓂᒃ ᐊᑐᕐᓗᒍ. ᕿᑭᖅᑕᓃᒃᑯᑦ ᐅᐱᓪᓚᕆᒃᑐᑦ ᐃᑲᔪᖃᑕᐅᖕᒪᑕ ᓴᖅᑭᑦᑏᓂᐊᓕᖅᑎᓪᓗᒋᑦ ᑕᑯᔭᒐᖃᕐᕕᒃᓴᒥᒃ.
ᐱᕙᓪᓕᐊᔪᒃᑰᖅᑐᓄᑦ ᑐᓴᕆᐊᕐᕕᒃᓴᖅ, ᑐᓴᕆᐊᕐᕕᒋᒍᑦ ᐅᓇ:
ᑭᐅᕆᓐ ᕕᓕᐅᕆᑎ
ᑐᑭᒧᐊᒃᑎᑦᑎᔨ, ᑐᓴᐅᒪᔪᓕᕆᓂᕐᒧᑦ ᖃᓄᖅᑑᕈᑎᓂᒃ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅ) 867.975.8398 ᐊᑭᖃᖏᑦᑐᒃᑯᓪᓘᓐᓃᑦ 1.800.667.2742
kflaherty@qia.ca
