ᐱᒋᐊᕈᑎ

ᐱᕙᓪᓕᐊᔪᓕᕆᓂᖅ ᐱᒻᒪᕆᐅᔪᒥᒃ ᖃᓄᖅᑑᕈᑎᐅᒋᔭᐅᖕᒪᑦ ᓇᓗᓇᐃᖅᓯᓂᕐᒥᒃ ᐊᒻᒪᓗ ᐊᑐᓕᖅᑎᑦᑎᓂᕐᒥᒃ ᐃᓄᖕᓄᑦ ᐊᑐᕐᓂᐊᖅᑕᖓᓂᒃ ᐊᒻᒪᓗ ᐱᔪᓐᓇᕐᓂᖃᕐᓂᕐᒥᒃ ᐱᕈᖅᑎᑦᑎᕙᓪᓕᐊᓂᐊᕐᓗᓂ ᐃᓄᐃᑦ ᑮᓇᐅᔭᓕᐅᕋᓱᐊᕈᑎᒃᓴᖏᓐᓂᒃ.[1] ᕿᑭᖅᑕ ᓃᒃᑯᑦ ᕿᓂᕐᒪᑕ ᖃᓄᖅᑑᕈᑎᓂᒃ ᖃᓄᖅ ᐊᐅᓚᑦᑎᔪᓐᓇᕐᒪᖔᑖᒃ ᐅᓗᕆᐊᕐᓇᕐᓂᕆᔭᖏᓐᓂᒃ ᓄᓇᕗᙵ ᑮᓇᐅᔭᓕᐅᕋᓱᐊᕐᕕᐅᔪᓂᒃ ᐅᓪᓗᒥ, ᑐᕌᖓᓂᖅᓴᐅᑎᓪᓗᒍ ᒫᓐᓇ ᐱᕈᒃᑲᓐᓂᕈᓐᓇᙱᑦᑐᓂᒃ ᐅᔭᕋᖅᑕᐅᔪᓐᓇᖅᑐᓄᑦ.  ᐃᓚᖓ ᐊᖏᓪᓕᒋᐊᕈᑎᒋᔭᐅᔪᓐᓇᖅᑐᖅ ᐃᓄᐃᑦ ᑮᓇᐅᔭᓕᐅᕋᓱᐊᕐᓂᖏᓐᓄᑦ ᐋᖅᑭᒋᐊᖅᓯᓗᑎᒃ ᐃᓄᐃᑦ ᐊᒃᑐᐊᖓᓂᕆᔭᖓᓂᑦ “ᐃᒫᓂᑦ ᒪᑭᒪᔾᔪᑎᒃᓴᓕᐅᕐᓂᕐᒧᑦ”[2] ᑐᕌᒐᖃᕐᓗᑎᒃ ᒪᑭᑕᐃᓐᓇᕈᓐᓇᕐᓂᐊᕐᓂᖓᓂᒃ, ᐊᑑᑎᖃᕐᓂᐊᖅᑐᓂᒃ ᐃᖅᑲᓇᐃᔮᒃᓴᖃᕐᓂᕐᖅ ᐊᒻᒪᓗ ᐊᓯᖏᑦ ᐊᒃᑐᐊᖓᔪᓂᒃ ᑮᓇᐅᔭᓕᐅᕋᓱᐊᕈᑎᒃᓴᓂᒃ ᐱᐅᓯᓂᐊᕐᒪᑦ ᐃᓄᐃᑦ ᐃᓅᓯᖃᑦᑎᐊᕐᓂᖅᓴᒦᓕᕐᓂᐊᕐᒪᑕ ᐅᓪᓗᒥ ᐊᒻᒪ ᑭᖑᕙᕇᓄᑦ ᓯᕗᓂᑦᑎᓐᓂ.

ᕿᑭᖅᑕᓃᒃᑯᑦ ᓇᓗᓇᐃᖅᓯᓯᒪᔪᑦ ᓄᓇᕗᒥ ᐃᖃᓗᓕᕆᓂᖅ ᐊᒥᓱᓂᒃ ᐱᕕᒃᓴᖃᖅᑎᑦᑎᔪᓇᕐᒪᑦ ᐃᑲᔪᖃᑕᐅᓗᓂ ᑮᓇᐅᔭᓕᐅᕋᓱᐊᕐᕕᐅᔪᓐᓇᖅᑐᓂᒃ.  ᓄᓇᕗᒥ,  ᐃᖃᓪᓕᕿᓂᖅ ᐱᒻᒪᕆᐅᔪᖅ ᑮᓇᐅᔭᓕᐅᕋᓱᐊᕐᕕᐅᓗᓂ ᐃᓄᖕᓄᑦ, ᐱᒻᒪᕆᐅᔪᒥᒡᓗ ᐃᓅᓯᕐᓅᖓᔪᓂᒃ-ᑮᓇᐅᔭᓕᐅᕋᓱᐊᕐᓂᕐᒧᓪᓗ ᐊᒃᑐᐃᔪᓐᓇᕐᒪᑦ – ᓱᕐᓗ ᐆᒃᑑᑎᒋᓗᒍ, ᑮᓇᐅᔭᓕᐅᕋᓱᐊᕐᓂᕐᒧᑦ ᐃᖃᓗᓕᕆᓂᕐᒧᑦ ᓚᐃᓴᓐᓯᑦ ᑎᒍᒥᐊᖅᑕᐅᓗᒃᑖᕐᓂᖏᑦ ᐃᓄᖕᓄᑦ-ᓇᖕᒥᓂᕆᔭᐅᔪᓄᑦ ᑲᒻᐸᓂᓄᑦ, ᐊᒻᒪᓗ ᐃᖃᓗᓕᕆᓂᖅ ᓴᖅᑭᑎᑦᑎᔪᒫᒃᓴᐅᑕᐅᓯᒪᒐᓗᐊᕐᒪᑦ ᓄᓇᓕᖕᓂᑦ  ᐃᓕᓐᓂᐊᖅᑎᑦᑎᓂᕐᒥᒃ ᐃᖅᑲᓇᐃᔮᒃᓴᖃᖅᑎᑦᑎᓂᕐᒥᓗ ᐃᓄᖕᓂ.  ᕿᑭᖅᑕᓃᒃᑯᑦ ᐱᕕᒃᓴᖃᕋᓱᒋᖕᒪᑕ ᐊᒻᒪᓗ ᐋᖅᑭᐅᒪᓪᓗᑎᒃ ᒐᕙᒪᑐᖃᒃᑯᑦ ᓇᓗᓇᐃᖅᓯᒪᔭᖏᓐᓂᒃ ᐱᓕᕆᐊᒃᓴᖏᓐᓂᒃ ᐃᒪᐅᓕᐅᕐᓗᑎᒃ (1) ᐃᖅᑲᓇᐃᔭᖃᑎᖃᑦᑎᐊᕋᓱᐊᕐᓂᕐᒥᒃ ᓄᓇᖃᖅᑳᖅᑐᑐᖃᓂᒃ; ᐊᒻᒪᓗ  (2) ᐅᓄᖅᓯᓗᒋᑦ ᓴᐳᔾᔭᐅᓯᒪᔪᑦ  30%ᑎᓄᑦ 2030ᖑᓚᐅᙱᓐᓂᖓᓄᑦ.

ᑭᓯᐊᓂ, ᐱᕙᓪᓕᐊᑎᑦᑎᓂᐊᕐᓗᓂ ᐅᐃᒍᒋᐊᖅᓯᓂᐊᕐᓗᓂᓘᓐᓃᑦ ᓄᓇᕗᒥ ᐃᖃᓗᓕᕆᓂᖏᑦ ᒪᑭᑕᐃᓐᓇᕈᓐᓇᕐᓂᐊᖅᑐᒥᒃ ᓄᓇᕘᑉ ᐱᕙᓪᓕᐊᓂᕆᔭᖓᓂᑦ ᐱᓕᕆᐊᖑᖅᑳᕆᐊᖃᖅᑐᖅ ᐃᓚᐃᓐᓈᖅᑕᐅᓂᖏᑦ ᓈᒻᒪᙱᑦᑐᒥᓪᓗ ᖃᓄᐃᓕᐅᖅᑕᐅᓂᕆᕙᒃᑕᖏᓪᓗ ᐃᓄᐃᑦ ᐃᖃᓗᓕᕆᓂᖅ ᐱᔾᔪᑎᒋᓪᓗᒍ, ᐱᖃᓯᐅᑎᓗᒋᑦ ᐋᖅᑭᒋᐊᖅᓯᓂᖅ ᐊᔾᔨᒌᑎᑕᐅᙱᓗᐊᕐᓂᖏᓐᓂᒃ ᓄᓇᕘᑉ ᐃᒪᖏᓐᓂᒃ ᐊᑭᒋᔭᐅᔪᒦᑦᑐᓄᑦ (ᐃᒪᓂᒃ ᕿᑭᖅᑖᓘᑉ ᐃᑭᕋᓴᖓᑕ ᐃᒪᕕᖓᓂᒃ ᑐᑭᓕᐅᖅᑕᐅᓯᒪᑎᓪᓗᒍ ᓄᓇᕗᑦ ᐊᖏᕈᑎᖓᓂᑦ). ᐅᓪᓗᒥᒧᑦ, ᐃᓄᐃᑦ ᐊᔾᔨᒌᓕᖅᑎᑕᐅᓯᒪᔪᓂᒃ ᑰᑕᓂᒃ ᑕᑯᓚᐅᖅᓯᒪᙱᑦᑐᑦ ᐊᑭᒋᔭᐅᔪᒦᑦᑐᓂᒃ ᐃᒪᓂᒃ ᐃᖃᓗᓕᕆᕕᐅᔪᒥᒃ ᐱᔾᔪᑎᒋᓪᒍ ᒐᕙᒪᑐᖃᒃᑯᑦ (ᐃᒪᕐᒥᐅᑕᓕᕆᔨᖏᑦ ᐊᒻᒪᓗ ᓯᔾᔭᒥᐅᑕᓕᕆᔨᖏᓪᓗᓱ (“ᐃᒪᕐᒥᐅᑕᓕᕆᔨᒃᑯᑦ”)) ᐱᓕᕆᑦᑎᐊᙱᓐᓂᖏᓐᓂᒃ ᑐᓂᐅᖅᑲᐃᓂᕐᒥᒃ ᐃᓚᐃᓐᓇᖅᓯᐅᙱᓪᓗᑎᒃ ᑮᓇᐅᔭᓕᐅᕋᓱᐊᕈᑕᐅᔪᓇᖅᑐᓂᒃ ᐃᖃᓗᓕᕆᓂᕐᒧᑦ ᓚᐃᓴᓂᓯᓂᑦ ᐃᒪᓂᒃ ᐊᑭᒋᔭᐅᔪᒦᑦᑐᓄᑦ ᑎᓕᐅᖅᑕᐅᓯᒪᑎᓪᓗᒍ ᐃᓚᖓ 15ᒥᑦ ᓄᓇᕗᑦ ᐊᖏᕈᑎᖓᓂᑦ.[3]  ᑕᒪᓐᓇ ᐱᔾᔪᑎᒋᓗᒍ ᐱᓕᕆᑦᑎᐊᙱᓐᓂᐅᔪᖅ, ᓄᓇᕗᒥᐅᑦ ᑎᒍᒥᐊᑐᐃᓐᓇᖅᑐᑦ 52%ᑎᓂᒃ ᑰᑕᓂᒃ ᐃᒪᓂᒃ ᐊᑭᒋᔭᑦᑎᓐᓃᑦᑐᓄᑦ, ᐃᓱᒪᒋᓪᓗᒋᑦ ᐊᓯᕗᑦ ᐊᑭᒋᔭᐅᔪᒦᑦᑐᓄᑦ ᐃᒪᖃᖅᑐᓂᒃ, ᑎᒍᒥᐊᖅᑎᓪᓗᒋᑦ 80% – 90%ᑎᓂᒃ (ᓱᕐᓗᑐᑦ ᐳᕆᑎᔅ ᑲᓚᒻᐱᐊ ᐅᕝᕙᓘᓐᓃᑦ ᓅᕙᐅᓐᓛᓐᒥ).

ᕿᑭᖅᑕᓃᒃᑯᑦ ᓯᕗᒧᐊᖅᑎᑦᑎᒐᓱᒃᑐᑦ ᐃᓄᐃᑦ ᕿᑭᖅᑕᓂᒥᐅᑦ ᐱᔪᓐᓇᐅᑎᖏᓐᓂᒃ ᐱᔪᒪᔭᖏᓐᓂᒃ ᐋᖅᑭᒃᓱᐃᓪᓗᑎᒃ ᐊᒥᓱᓂᒃ-ᖃᓄᐃᓕᐅᕈᑎᐅᓂᐊᖅᑐᓄᑦ ᑐᕌᒐᓕᐅᕐᓂᕐᒥᒃ ᐃᖃᓗᓕᕆᓂᕐᒥᒃ ᐋᖅᑮᖃᑎᖃᕈᓐᓇᖅᓯᓂᕐᒥᑦ ᑐᙵᕕᖃᕐᓗᑕ ᓴᐃᒻᒪᖃᑎᒌᖕᓂᕐᒥᒃ[4]. ᕿᑭᖅᑕᓃᒃᑯᑦ ᐊᒥᓱᓅᖓᔪᖤᒃ-ᖃᓄᐃᓕᐅᕈᑎᒋᔪᒪᔭᖏᓐᓂᒃ ᑐᕌᒐᖏᑦ ᐊᑖᓂ ᑎᑎᕋᖅᓯᒪᔪᑦ.

ᓇᐃᓈᖅᓯᒪᔪᑦ ᕿᑭᖅᑕᓃ$ᑯᑦ ᐊᒥᓱᓅᖓᔪᓂᒃ-ᐱᓕᕆᐊᖑᓂᐊᖅᑐᓂᒃ ᑐᕌᒐᖓ ᐃᖃᓗᓕᕆᓂᕐᒧᑦ ᐋᖅᑮᖃᑎᖃᕐᓂᕐᒥᒃ

ᐃᖃᓗᓕᕆᓂᕐᒧᑦ ᐋᖅᑮᖃᑎᖃᕐᓂᕐᒧᑦ ᐃᑲᔫᑎᒃᓴᓂᒃ ᐊᒻᒪᓗ ᐊᑐᕐᓗᒋᑦᐃᓗᓕᖃᕐᓗᓂᓗ ᕿᑭᖅᑕᓃᒃᑯᑦ 2022ᒥᑦ 2026ᒧᑦ ᑐᑭᒧᐊᒍᑎᒃᓴᐅᔪᓂᒃ ᐸᕐᓇᐅᑕᐅᓯᒪᔪᓄᑦ.  ᓯᕕᑐᔪᒥᒃ ᕿᒥᕐᕈᔭᐅᓚᐅᖅᖢᓂ ᐊᒻᒪᓗ ᑐᑭᓯᒋᐊᕆᐊᖅᖢᑎᒃ ᐃᓄᐃᑦ ᕿᑭᖅᑕᓂᒥᐅᓂᒃ ᐋᖅᑭᒃᓱᐃᓚᐅᖅᑐᑦ 2022-2026ᒧᑦ ᑐᑭᒧᐊᒍᑎᒃᓴᓂᒃ ᐸᕐᓇᐅᑎᓂᒃ ᐃᓗᓕᖃᖅᑐᓂᒃ ᑐᓴᓚᐅᖅᑕᑦᑎᓐᓂᑦ ᓄᓇᓕᖕᓂᑦ ᐊᒻᒪᓗ ᒪᓕᒐᒃᓴᐅᓗᓂ ᕿᑭᖅᑕᓃᒃᑯᑦ ᐱᓕᕆᐊᒃᓴᕆᓂᐊᖅᑕᖏᓐᓂᒃ, ᐱᖃᓯᐅᑎᓗᒋᑦ ᕿᑭᖅᑕᓃᒃᑯᑦ ᐱᓕᕆᐊᕆᓯᒪᔭᖏᑦ ᐃᖃᓗᓕᕆᓂᕐᒥᒃ ᐋᖅᑮᖃᑎᖃᕐᓂᕐᒧᑦ.  ᑖᒃᑯᐊ ᑐᑭᒧᐊᒍᑎᒃᓴᓄᑦ ᐸᕐᓇᐅᑎᑦ ᐃᓕᓴᖅᓯᓯᒪᖕᒪᑦ 10ᓂᒃ ᑐᕌᒐᕆᔭᐅᔪᒪᔪᓄᑦ ᐋᖅᑭᒃᓱᖅᑕᐅᓯᒪᓪᓗᑎᒃ ᐊᒻᒪᓗ ᐃᑲᔫᓯᐊᖅᑖᕐᕕᐅᔪᓐᓇᕐᓗᑎᓪᓗ ᐃᓄᖕᓄᑦ ᕿᑭᖅᑕᓂᒥᐅᓄᑦ, ᑖᒃᑯᐊᓗᒃᑖᕐᓗ ᓯᕗᒧᐊᕈᑎᒋᔭᐅᕙᓪᓕᐊᔪᑦ ᐊᖅᑯᑎᒋᓪᓗᒍ ᕿᑭᖅᑕᓃᒃᑯᑦ ᐃᖃᓗᓕᕆᓂᕐᒧᑦ  ᐋᖅᑮᖃᑎᖃᕐᓂᕐᒧᑦ ᐱᓕᕆᐊᒃᓴᐅᓂᐊᖅᑐᓄᑦ − ᐱᖃᓯᐅᑎᓗᒍ, ᐱᓗᐊᖅᑐᒥᒃ ᐅᑯᐊ ᑐᕌᒐᐃᑦ ᐃᒪᐃᓕᐅᖅᑕᐅᔪᒪᔪᑦ:

• ᐊᔾᔨᒌᙱᑦᑐᓂᒃ ᐃᓯᖅᑎᑦᑎᓂᖅ ᕿᑭᖅᑕᓃᒃᑯᑦ ᑮᓇᐅᔭᖏᑦ ᐃᓯᖅᐸᒃᑐᓂᒃ ᐱᐅᓯᒋᐊᕈᑕᐅᓗᑎᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᓇᖕᒥᓂᖅᓱᓕᕈᓐᓇᕐᓂᕐᒥᒃ.
• ᐊᐅᓚᑦᑎᓗᑎᒃ ᐋᖅᑭᐅᒪᑎᑦᑎᓗᑎᓪᓗ ᐃᓅᓯᕐᓅᖓᔪᓂᒃ ᐊᒻᒪᓗ ᐱᕙᓪᓕᐊᔪᓕᕆᓂᕐᒥᙶᖅᑐᓂᓪᓗ ᐃᑲᔫᓯᐊᖃᖅᑎᑦᑎᓂᕐᒥᒃ ᐃᓄᖕᓄᑦ ᐊᐅᓚᑕᐅᓂᐊᖅᑐᒥᒃ ᐱᕙᓪᓕᐊᔪᓕᕆᓂᕐᒥᒃ ᐱᓕᕆᐊᒃᓴᓂᒃ ᐊᒻᒪᓗ ᑲᑐᔾᔨᖃᑎᖃᕐᓂᕐᒥᒃ ᓄᓇᓕᖕᓂᑦ ᐊᑭᑐᔫᑎᓕᕆᓂᕐᒥᒃ;
• ᐋᔩᕋᕈᑎᖃᕐᓂᖅ ᐊᒻᒪᓗ ᐊᑐᓕᖅᑎᑦᑎᓂᕐᒥᒃ ᐊᖏᕈᑎᓂᒃ ᐊᒻᒪ ᐊᓯᖏᓐᓂᑦ ᑲᑐᔾᔨᖃᑎᖃᕐᓂᕐᒧᑦ ᐊᖏᕈᑎᓂᒃ ᓵᙵᔭᒃᓴᖃᕐᕕᖃᖅᑎᑕᐅᓯᒪᓗᑎᒃ ᐊᖏᓂᖅᐹᒃᑯᑦ ᐃᑲᔫᓯᐊᖃᖅᑎᑦᑎᔪᓐᓇᕐᓗᑎᒃ ᐃᓄᖕᓄᑦ.
• ᓴᙱᓕᖅᑎᒋᐊᕐᓗᒍ ᐃᓄᐃᑦ ᐊᐅᓚᑦᑎᓂᖏᓐᓂᒃ ᐅᓄᖅᓯᓗᑎᒃ ᐊᑐᖅᑕᐅᓗᑎᒃ ᓱᕐᓗ ᑐᑭᑖᕈᑎᒋᔭᐅᒋᐊᖃᖅᑐᓂᒃ ᐊᔭᐅᖅᑐᐃᔪᓐᓇᕐᓗᑎᒃ; ᐊᒻᒪᓗ
• ᕿᑭᖅᑕᓃᒃᑯᑦ ᓴᖅᑭᔮᒃᑲᓐᓂᕐᓂᖏᑦ ᓄᓇᓕᖕᓂ ᐊᑕᐅᓯᒃᑯᓪᓗ ᐅᓄᖅᓯᒋᐊᖅᑎᑦᑎᓂᕐᒥᒃ ᐱᕕᒃᓴᐅᒍᓐᓇᖅᑐᓄᑦ ᓄᓇᓕᖕᓂ ᑲᔪᓯᑎᑦᑎᓂᐊᕐᒪᑕ ᕿᑭᖅᑕᓃᒃᑯᑦ ᑐᑭᑖᕈᑎᒋᓯᒪᔭᖏᓐᓂᒃ.
• ᓴᐳᔾᔨᓯᒪᓂᕐᒥᒃ ᓄᐊᑕᐅᓯᒪᔪᓂᒃ ᐃᓄᐃᑦ ᖃᐅᔨᒪᔭᑐᖃᖏᑕ ᒥᒃᓵᓄᑦ
• ᐅᓄᖅᓯᒋᐊᕐᓗᒋᑦ ᐃᓄᐃᑦ ᐊᑐᐃᓐᓇᖃᕈᓐᓇᕐᓂᖏᓐᓄᑦ ᐸᐃᕆᕕᖕᓂ, ᐃᓕᓐᓂᐊᕐᓂᕐᒥᒃ, ᐱᓕᒻᒪᒃᓴᕐᓂᕐᒥᒃ ᐊᒻᒪᓗ ᐃᖅᑲᓇᐃᔮᒃᓴᓂᒃ ᓴᙱᓕᖅᑎᑦᑎᒍᑕᐅᓂᐊᖅᑐᒥᒃ ᐃᓄᐃᑦ ᓇᖕᒥᓂᖅᓱᓕᕈᓐᓇᕐᓂᖏᓐᓄᑦ;

ᐃᖃᓗᓕᕆᓂᖅ ᐱᕙᓪᓕᐊᑎᑕᐅᓯᒪᓗᐊᙱᒻᒪᑦ ᓄᓇᕗᒥ ᑮᓇᐅᔭᓕᐅᕈᑎᒋᔭᐅᔪᓐᓇᖅᑐᓄᑦ. ᐱᔾᔪᑎᒋᓪᓗᒍ ᕿᑭᖅᑕᓃᒃᑯᑦ ᑐᑭᒧᐊᒍᑎᒃᓴᓄᑦ ᐸᕐᓇᐅᑎᖏᑦ, ᐱᑕᖃᕐᒪᑦ ᐱᒻᒪᕆᐅᔪᓂᒃ ᐊᒻᒪᓗ ᐊᑑᑎᖃᕐᓂᐊᖅᑐᓂᓪᓗ ᐃᖅᑲᓇᐃᔮᒃᓴᓂ ᐃᓄᖕᓄᑦ ᐃᖃᓗᓕᕆᔪᒪᔪᓂᒃ ᓄᓇᕘᑉ ᐊᑭᒋᔭᖓᓃᑦᑐᓄᑦ ᐃᒪᓂᒃ.  ᑐᑭᓯᑦᑎᐊᒃᑲᓐᓂᕈᒪᓗᓂ ᖃᓄᐃᓕᐅᖅᑕᐅᓂᕆᓚᐅᖅᑕᖏᑦ ᐃᓄᐃᑦ ᒐᕙᒪᑐᖃᒃᑯᑦ ᐱᓕᕆᑦᑎᐊᓚᐅᙱᓐᓂᖏᓐᓄᑦ ᐅᓄᖅᓯᒋᐊᓚᐅᙱᓐᓂᖏᓐᓄᑦ ᐊᑐᐃᓐᓇᖃᕈᓐᓇᕐᓂᖏᓐᓂᒃ ᐃᓄᐃᑦ ᐃᖃᓗᓕᕆᓂᕐᒥᒃ,  ᕿᑭᖅᑕᓃᒃᑯᑦ ᖃᐅᔨᓴᓚᐅᕐᒪᑕ ᐱᕙᓪᓕᐊᔪᓕᕆᓂᐅᒃ ᒥᒃᓵᓄᑦ ᖃᐅᔨᓴᕋᓱᒃᖢᑎ ᖃᔅᓯᓂᒃ ᕿᑭᖅᑕᓂᒥᐅ ᐃᓄᐃᑦ ᔭᒐᐃᓯᒪᖕᒪᖔᑕᒃ 1993ᒥᑦ 2022ᒧᑦ.  ᑖᒃᑯᐊ ᖃᐅᔨᐅᔪᑦ ᕿᒥᕐᕈᓂᕐᒥᒃ ᓇᓗᓇᐃᖅᓯᓚᐅᕐᒪᑕ ᑐᕌᖅᑐᓂᒃ ᑐᕌᙱᑦᑐᓂᓪᓗ ᐱᕙᓪᓕᐊᔪᓕᕆᓂᕐᒥᙶᕋᔭᓚᐅᖅᑐᓂᒃ ᐃᑲᔫᓯᐊᒃᓴᓂᒃ ᐃᓄᖕᓄᑦ ᔭᒐᐃᓚᐅᕐᒪᑕ.  ᑖᒃᑯᐊ ᖃᐅᔨᓴᕈᑎᕕᓃᑦ ᐃᓱᒪᓇᖅᑐᑦ ᐃᓄᐃᑦ ᔭᒐᐃᓯᒪᓂᖏᓐᓂᒃ ᑮᓇᐅᔭᓕᐅᕐᕕᒋᔪᓐᓇᓚᐅᖅᑕᕋᓗᐊᖏᓐᓂᒃ:[5]

• ~$600 ᒥᓕᔭᓂᒃ ᑐᕌᖅᑎᑕᐅᓯᒪᔪᓂᒃ ᑮᓇᐅᔭᓕᐅᖅᑕᐅᔪᓂᑦ ᐃᑲᔫᓯᐊᒃᓴᖃᖅᑎᑦᑎᓂᕐᒥᒃ;[6] ᐊᒻᒪᓗ
• ~$450 ᒥᓕᔭᓐᓂᒃ ᐱᕕᒃᓴᐅᒐᔭᖅᑐᓄᑦ ᐱᕙᓪᓕᐊᔾᔪᑎᒃᓴᕆᔭᐅᔪᓐᓇᖅᑐᓄᑦ.[7]

ᑖᒃᑯᐊ ᐊᓯᐅᔨᔭᐅᓯᒪᔪᑦ ᑮᓇᐅᔭᓕᐅᕐᕕᐅᔪᓐᓇᓚᐅᖅᑐᑦ ᑲᔪᓰᓐᓇᕐᓂᐊᖅᑐᒃᓴᐅᔪᑦ ᓯᕗᓂᕐᒧᑦ ᐊᓯᔾᔨᖅᑐᖃᙱᑐᐊᖅᐸᑦ ᒐᕙᒪᑐᖃᒃᑯᑦ ᖃᓄᖅ ᑐᕌᒐᖃᕐᓂᐊᕐᒪᖔᑖᒃ ᐊᒻᒪᓗ ᑐᑭᑖᕈᑎᖃᖃᑦᑕᕐᓂᕆᔭᖏᓐᓂᒃ ᓄᓇᕘᑉ ᐊᑭᒋᔭᖓᓃᑦᑐᓂᒃ ᐃᒪᓂᒃ ᐃᖃᓗᓕᕆᓂᕐᒧᑦ ᑰᑕᐅᔪᓂᒃ  ᑕᐃᒪᐃᒻᒪᑦ, ᕿᑭᖅᑕᓃᒃᑯᑦ ᐱᓕᕆᖃᑎᖃᕐᒪᑕ ᒐᕙᒪᑐᖃᒃᑯᓐᓂᑦ ᑕᒪᓐᓇ ᐱᓕᕆᐊᖑᕙᓪᓕᐊᖁᓪᓗᒍ ᐊᖅᑯᑎᒋᓗᒍ ᐃᖃᓗᓕᕆᓂᕐᒧᑦ ᐋᖅᑮᖃᑎᖃᕐᓂᕐᒥᒃ ᑰᑕᐃᑦ ᑐᓂᐅᖅᑲᖅᑕᐅᓂᕆᕙᒃᑕᖏᓐᓂᒃ.  ᐅᓄᖅᓯᒋᐊᕐᓗᒋᑦ ᐃᓄᐃᑦ ᐃᓚᐅᓂᖏᑦ ᐃᖃᓗᓕᕆᓂᕐᒥᒃ. ᕿᑭᖅᑕᓃᒃᑯᑦ ᐃᖅᑲᓇᐃᔭᖃᑎᖃᕋᓱᐊᖅᑑᒐᓗᐊᑦ ᒐᕙᒪᑐᖃᒃᑯᓐᓂᑦ ᑕᒪᑐᒥᖓ ᐃᓚᐃᓐᓈᖅᑕᐅᓯᒪᓗᐊᕐᓂᕆᔭᑦᑎᓐᓂᒃ ᐃᖃᓗᓕᕆᓂᕐᒥᒃ ᐋᖅᑮᖃᑎᖃᕋᓱᐊᖅᑐᒍᑦ ᑰᑕᐃᑦ ᑐᓂᐅᖅᑲᖅᑕᐅᕙᖕᓂᖏᓐᓂᒃ.  ᐊᒥᓱᙳᕆᐊᕐᓗᒋᑦ ᐃᓄᐃᑦ ᐃᓚᐅᓂᖏᑦ ᐃᖃᓗᓕᕆᓂᕐᒥᒃ ᑮᓇᐅᔭᓕᐅᕐᕕᖃᖃᑕᐅᓗᑎᒃ ᕿᑭᖅᑕᓃᒃᑯᑦ ᓯᕗᒧᐊᕈᑎᒋᔪᓐᓇᖅᑕᖏᓐᓄᑦ ᐱᕙᓪᓕᐊᑎᑦᑎᓂᕐᒥᒃ ᐊᑕᐅᑦᓯᒃᑯᓪᓗ ᐊᖏᓪᓕᒋᐊᖅᑎᑦᓯᙱᓪᓗᑎᒃ ᐱᕈᒃᑲᓐᓂᕈᓐᓇᙱᑦᑐᓂᒃ ᐅᔭᕋᖅᑕᖃᑦᑕᖅᑐᓂᒃ.

ᕿᑭᖅᑕᓃᒃᑯᑦ ᓴᐳᔾᔨᕕᓕᕆᓂᕐᒧᑦ ᑐᑭᒧᐊᒍᑎᒃᓴᖏᑦ ᐱᒻᒪᕆᐅᓪᓗᑎᒃ ᑐᒃᓯᕋᐅᑎᒋᔭᐅᓯᒪᔪᑦ ᑲᔪᓯᑎᑕᐅᓂᐊᖅᐸᑦ ᓴᐃᒻᒪᖃᑎᒌᖕᓂᕐᒥᒃ ᐊᑐᕐᓗᒋᑦ ᕿᑭᖅᑕᓃ$ᑯᑦ ᑐᑭᒧᐊᒍᑎᒃᓴᖏᓐᓂᒃ ᓯᕗᓪᓕᐅᑎᑕᐅᔪᒪᔪᑦ ᒐᕙᓚᑐᖃᒃᑯᑦ ᓇᓗᓇᐃᖅᓯᒪᔭᖏᓐᓂᑦ ᓴᐳᔾᔨᒍᒪᓪᓗᑎᒃ ᓄᓇᓂᒃ ᐃᒪᓂᓗ. ᕿᑭᖅᑕᓃᒃᑯᑦ ᑐᒃᓯᕋᖅᑐᑦ ᑲᑎᑕᐅᓯᒪᓂᐊᖅᑐᒥᒃ ᐃᓄᖕᓄᑦ-ᐊᐅᓚᑕᐅᓂᐊᖅᑐᒥᒃ ᓴᐳᔾᔨᕕᓕᕆᓂᕐᒧᑦ ᑐᑭᒧᐊᒍᑎᒃᓴᖃᕐᓂᕐᒥᒃ ᐊᑐᕐᓗᑎᑦ ᐃᓘᓐᓇᖏᓐᓄᑦ ᒐᕙᒪᐅᔪᒧᑦ ᑐᕌᒐᖃᕐᓂᕐᒥᒃ ᐱᐅᓯᒋᐊᕋᓱᐊᕐᓂᐊᕐᓗᒍ ᐃᓄᐃᑦ ᐱᕙᓪᓕᐊᔪᓕᕆᓂᖏᓐᓂᒃ ᑕᓪᓕᒪᐅᓕᖓᔪᓂᒃ:  :

1. ᐃᓄᖕᓄᑦ-ᐊᐅᓚᑕᐅᓗᓂ ᐊᕕᒃᑐᖅᓯᒪᔪᑎᒎᖅᓯᒪᓂᐊᖅᑐᒥᒃ ᐊᑐᕐᓗᒋᑦ ᓄᓇᓖᑦ ᖃᓄᐃᓕᐅᕆᐊᕐᓗᑎᒃ ᐃᓄᐃᑦ ᐱᓕᕆᐊᒃᓴᕆᓂᐊᖅᑕᖏᓐᓂᒃ ᐊᒻᒪᓗ ᑲᑐᔾᔨᓗᑎᒃ ᐊᐅᓚᑦᑎᓂᕐᒥᒃ.
2. ᐅᐃᒋᐊᕐᓗᒋᑦ ᓇᐅᑦᑎᖅᓱᖅᑎᒃᑯᑦ ᓄᓇᓕᓕᒫᓄᑦ ᕿᑭᖅᑖᓗᖕᒥ ᐃᖅᑲᓇᐃᔭᖅᑎᑦᑎᒃᑲᓐᓂᖁᓪᓗᑕ ᐃᓄᖕᓂᑦ ᕿᑭᖅᑕᓂᒥᐅᓂᒃ ᓴᙱᓕᖅᑎᑕᐅᓂᐊᕐᒪᑦ ᐃᓄᐃᑦ ᓇᐅᑦᑎᖅᓱᕐᓂᖏᓐᓂᒃ ᐱᓕᕆᐊᒃᓴᓪᓗᐊᑕᐅᓂᐊᖅᑎᓪᓗᒍ ᐃᑲᔪᕐᓂᐊᖅᖢᓂᓗ ᐋᖅᑭᐅᒪᑎᑦᑎᓂᕐᒥᒃ ᐃᓄᐃᑦ ᐃᓕᖅᑯᓯᖓᓂᒃ, ᓄᓇᓖᑦ ᖃᓄᐃᙱᓐᓂᖅᓴᐅᓕᕐᓂᐊᕐᒪᑕ ᑲᑐᔾᔨᖃᑎᖃᕐᓗᑎᒃ ᐃᓄᖕᓄ-ᐊᐅᓚᑕᐅᓂᐊᖅᑐᒥᒃ ᓇᐅᑦᑎᖅᓱᕐᓂᕐᒥᒃ ᐊᒻᒪᓗ ᐅᓂᒃᑳᕆᔭᐅᓗᑎᒃ ᓄᓇᓕᖕᓂᑦ ᓇᓗᓇᐃᖅᑕᐅᔪᓄᑦ ᓯᕗᓪᓕᐅᔾᔭᐅᔪᒪᔪᓂᒃ.
3. ᐊᑭᑐᔫᑎᓂᒃ ᐃᑲᔪᖅᑕᐅᓂᖅ ᐱᒻᒪᕆᐅᔪᓂᒃ ᐊᑭᑐᔫᑎᑖᕈᑕᐅᒋᐊᓕᖕᓂᑦ ᓄᓇᕗᒥ − ᐱᖃᓯᐅᑎᓗᒋᑦ ᐊᔾᔨᒌᙱᑦᑐᓂᒃ ᐊᑐᖅᑕᐅᔪᓇᖅᑐᓂᒃ ᐃᓪᓗᓂᒃ ᐊᒻᒪᓗ ᐊᒃᑐᐊᖓᔪᓄᑦ ᐊᑭᑐᔫᑎᓂᒃ ᐃᑲᔪᕐᓂᐊᖅᑐᓄᑦ ᐃᓄᐃᑦ ᓇᐅᑦᑎᖅᓱᖅᑎᓂᒃ ᐊᒻᒪ ᐊᐅᓚᑦᑎᔾᔪᑎᓂᒃ.
4. ᑲᔪᓰᓐᓇᕐᓂᐊᖅᑐᒥᒃ ᐃᓄᖕᓄᑦ−ᐊᐅᓚᑕᐅᓂᐊᖅᑐᓄᑦ ᓴᐳᔾᔨᕕᓕᕐᓂᕐᒥᒃ ᐋᖅᑭᐅᒪᑎᑕᐅᖏᓐᓇᕐᓂᐊᖅᑐᒥᒃ ᑮᓇᐅᔭᖃᕐᓂᕐᒥᒃ ᐃᑲᔫᑕᐅᓗᑎᒃ ᐊᑯᓂᐅᓂᐊᖅᑐᒧᑦ ᐃᓄᖕᓄᑦ-ᐊᐅᓚᑕᐅᓂᐊᖅᑐᒥᒃ ᓴᐳᔾᔨᕕᓕᕿᓂᕐᒥᒃ ᐊᒻᒪᓗ ᓇᐅᑦᑎᖅᓱᕐᓂᕐᒧᑦ ᐱᓕᕆᐊᒃᓴᓄᑦ ᐊᑕᐅᑦᓯᒃᑯᓪᓗ ᑲᔪᖏᖅᓴᐃᓂᕐᒥᒃ ᒪᑭᒪᐃᓐᓇᕈᓐᓇᕐᓂᐊᖅᑐᓂᒃ ᐱᕙᓪᓕᐊᔾᔪᑎᒃᓴᖃᖅᑎᑦᑎᓂᕐᒥᒃ ᐊᒻᒪᓗ ᐃᖃᓗᓕᕆᓂᕐᒥᒃ ᐊᐅᓚᑦᑎᓂᕐᒧᑦ. .
5. ᐃᖃᓗᓕᕆᓂᕐᒧᑦ ᐋᖅᑮᖃᑎᖃᕐᓂᖅ, ᐱᖃᓯᐅᑎᓗᒍ ᐊᖅᑯᑎᒋᔭᐅᓗᓂᓗ ᕿᑭᖅᑕᓂ ᐃᖃᓗᓕᕆᓂᕐᒧᑦ ᐋᖅᑮᖃᑎᖃᕐᓂᕐᒧᑦ ᐊᖏᕈᑎᖓᓂᒃ ᒐᕙᒪᑐᖃᒃᑯᓪᓗ ᓴᖅᑭᑎᑦᑎᔪᓐᓇᕐᓗᑎᒃ ᐃᓘᓐᓇᐅᓂᐊᖅᑐᒥᒃ, ᐃᓚᐃᓐᓈᖅᑕᐅᓯᒪᙱᓪᓗᑎᒃ ᐊᒻᒪᓗ ᐋᖅᑭᐅᒪᐃᓐᓇᕐᓂᐊᖅᑐᒥᒃ ᐃᓚᐅᕝᕕᖃᕐᓗᑎᒃ ᐃᓄᐃᑦ ᕿᑭᖅᑕᓂᒥᐅᑦ ᐃᖃᓗᓕᕆᓂᕐᒥ.

ᕿᑭᖅᑕᓃᒃᑯᑦ ᑲᑎᒪᖃᑎᖃᖃᑦᑕᖅᑐᑦ ᐃᒪᕐᒥᐅᑕᓕᕆᔨᒃᑯᓐᓂᑦ ᐊᕙᑎᓕᕆᔨᒃᑯᓐᓂᑦ ᓯᓚᐅᑉ ᐊᓯᔾᔨᖅᐸᓪᓕᐊᔪᓕᕆᔨᖏᓐᓂᓗ ᐊᒻᒪᓗ ᑖᒃᑯᐊ ᑮᓇᐅᔭᖃᖅᑎᑦᑎᔪᓐᓇᖅᑐᑦ ᓯᕗᒃᑲᖅᑕᐅᔪᒥᒃ Enduring Earthᑯᓐᓄᑦ ᓴᖅᑭᑎᑦᑎᔪᓐᓇᕐᓗᑎᒃ ᕿᑭᖅᑕᓂ ᒪᑭᒪᔾᔪᑎᒃᓴᓕᕆᓂᕐᒧᑦ ᐊᖏᕈᑎᒥᒃ.

ᑎᓯᐱᕆ 2022ᒥ, ᑲᓇᑕᐅᑉ ᓯᕗᓕᖅᑎᖓ ᔭᔅᑎᓐ ᑐᕉᑑ ᑮᓇᐅᔭᖃᖅᑎᑦᑎᓚᐅᖅᑐᖅ ᑎᑭᓪᓗᒋᑦ $800 ᒥᓕᔭᓂᒃ ᐊᑐᐃᓐᓇᐅᑎᑕᖏᓐᓂᒃ ᑲᓇᑕᒥᐅᓄᑦ ᓄᓇᖃᖅᑳᖅᑐᑐᖃᓂᒃ−ᐊᐅᓚᑕᐅᔪᓄᑦ ᓴᐳᔾᔨᕕᓕᕆᓂᕐᒧᑦ ᐱᓕᕆᐊᓄᑦ, ᐱᖃᓯᐅᑎᓗᒋᑦ ᕿᑭᖅᑕᓃᒃᑯᑦ−ᒪᑭᒪᔾᔪᑎᒃᓴᓕᕆᓂᕐᒧᑦ ᐱᓕᕆᐊᖓ, ᓇᓗᓇᐃᖅᓯᒃᑲᓐᓂᖅᖢᑎᒃ ᒐᕙᒪᑐᖃᒃᑯᑦ ᐱᓕᕆᔪᒪᓂᖏᓐᓂᒃ ᓯᕗᒧᐊᕈᑎᖃᕐᓂᕐᒥᒃ ᑖᒃᑯᓂᖓ ᐱᓕᕆᐊᒃᓴᓂᒃ.   ᑭᖑᓂᐊᓂ, ᔫᓐ 2023ᒥ, ᒐᕙᒪᑐᖃᒃᑯᑦ ᐋᖅᑭᒃᓯᓚᐅᕐᒪᑕᑦ ᐱᓕᕆᐊᒃᓴᐅᓂᐊᖅᑐᓂᒃ ᐋᔩᕋᕈᑎᖃᖅᐸᓪᓕᐊᓗᑎᒃ ᕿᑭᖅᑕᓃᒃᑯᑦ ᒪᑭᒪᔾᔪᑎᒃᓴᓕᕆᓂᕐᒧᑦ ᐱᓕᕆᐊᒃᓴᖏᓐᓂᒃ, ᓇᓗᓇᐃᔭᖅᓯᒪᓪᓗᑎᒃ ᑮᓇᐅᔭᖅᑖᕐᓗᑎᓪᓗ ᑮᓇᐅᔭᖃᖅᑎᑦᑎᔨᐅᕙᒃᑐᓂᑦ.

ᐊᒃᑑᕙ 2023, ᕿᑭᖅᑕᓃᒃᑯᑦ ᐋᔩᕋᕈᑎᖃᓚᐅᕐᒪᑕ ᓴᖅᑭᑎᑦᑎᓪᓗᑎᒃ ᓯᕗᓪᓕᖅᐹᖅᓯᐅᑎᒥᒃ ᐊᖏᕈᑎᒥᒃ ᒪᑭᒪᔾᔪᑎᒃᓴᓕᕆᓂᕐᒧᑦ ᑐᕌᖓᓪᓗᓂ ᐊᒻᒪᓗ ᑐᕌᒐᖃᖅᖢᑎᒃ ᑭᖑᓪᓕᖅᐹᖅᓯᐅᑎᒥᒃ ᒪᑭᒪᔾᔪᑎᒃᓴᓕᕆᓂᕐᒧᑦ ᐊᖏᕈᑎᖃᕈᓐᓇᖅᓯᓗᑎᒃ ᔫᓐ 2024ᒥ.  ᑐᕌᒐᓪᓗᐊᕆᔭᐅᔪᖅ ᕿᑭᖅᑕᓃᒃᑯᑦ ᒪᑭᒪᔾᔪᑎᒃᓴᓕᕆᓂᕐᒧᑦ ᐱᓕᕆᐊᖓ ᓴᙱᓕᖅᑎᑦᑎᒃᑲᓐᓂᕈᒪᓪᓗᑎᒃ ᐃᓄᐃᑦ ᐊᐅᓚᑦᑎᓂᖏᓐᓂᒃ ᐊᒻᒪᓗ ᐸᖅᑭᓗᑎᒃ ᓄᓇᓂᒃ ᐃᒪᓂᓗ.  ᐊᑐᕐᓗᒍ ᕿᑭᖅᑕᓃᒃᑯᑦ ᒪᑭᒪᔾᔪᑎᒃᓴᓕᕆᓂᕐᒧᑦ ᐱᓕᕆᐊᖓ, ᕿᑭᖅᑕᓃ$ᑯᑦ ᑐᒃᓯᕋᖅᓯᒪᔪᑦ ᐃᓄᖕᓄᑦ ᐊᐅᓚᑕᐅᓗᓂ ᐋᖅᑭᒃᓱᖅᓯᒪᓗᓂ 998,4670 km², ᐊᑕᐅᑦᓯᒃᑯᓪᓗ 195,000 km² ᓄᑖᖑᓗᑎᒃ ᓴᐳᔾᔨᔭᐅᓯᒪᒐᔭᖅᑐᑦ, ᐊᒻᒪᓗ ᓴᙱᓐᓂᖅᓴᒥᓪᓗ ᒪᓕᒐᒃᓴᖃᕐᓗᑎᒃ ᓴᐳᔾᔨᕕᖕᓂ, ᑲᑎᓪᓗᒋᑦ ᓴᐳᔾᔭᐅᒐᔭᖅᑐᑦ 690,000 km² ᐅᖓᑖᓂ.

ᓯᕗᒧᐊᖁᓪᓗᒍ ᕿᑭᖅᑕᓃᒃᑯᑦ ᒪᑭᒪᔾᔪᑎᒃᓴᓕᕆᓂᕐᒧᑦ ᐱᓕᕆᐊᖓ, ᕿᑭᖅᑕᓃᒃᑯᑦ ᐋᔩᕋᕈᑎᖃᖅᐸᓪᓕᐊᓂᐊᖅᑐᑦ ᒪᑭᒪᔾᔪᑎᒃᓴᓕᕆᓂᕐᒧᑦ ᑮᓇᐅᔭᖃᖅᑎᑕᐅᓂᕐᒧᑦ, ᑲᑐᔾᔨᒍᑕᐅᓂᐊᖅᑐᒥᒃ (ᐱᖃᓯᐅᑎᓗᒋᑦ ᖃᓄᖅᑑᕈᑎᐅᔪᓂᒃ ᖃᓄᖅ ᑐᓐᓂᖅᑯᓯᖅᑕᐅᔪᑦ ᐊᐅᓚᑕᐅᓂᐊᕐᓂᖏᓐᓄᑦ) ᒐᕙᓚᑐᖃᒃᑯᓪᓗ, ᐊᒻᒪᓗᑦᑕᐅᖅ ᑐᓐᓂᖅᑯᓯᖅᑕᐅᔪᑦ ᑲᓇᑕᒥᐅᓂᑦ ᐊᒻᒪ ᓄᓇᕐᔪᐊᕐᒥᐅᓂᓗ ᑮᓇᐅᔭᖃᖅᑎᑦᑎᔨᐅᕙᒃᑐᓂᒃ.[8]

ᕿᑭᖅᑕᓃᒃᑯᑦ ᐃᖅᑲᖅᑐᐃᕝᕕᒃᑰᖅᑎᑦᑎᔪᑦ ᐃᒪᕐᒥᐅᑕᓕᕆᔨᒃᑯᑦ ᒫᓐᓇᓵᖑᓚᐅᖅᑐᒥᑦ ᑐᑭᑖᕈᑎᒋᔭᖓᓂᑦ ᓅᑦᑎᒍᒪᓪᓗᓂ ᐊᑑᑎᖃᕐᓂᐊᖅᑐᓂᒃ ᓄᓇᕘᑉ ᐊᑭᒋᔭᖓᓃᑦᑐᓄᑦ ᐃᒪᓄᑦ ᓚᐃᓴᓐᓯᓂᒃ ᖃᓪᓗᓈᓃᑦᑐᓄᑦ.  ᓯᑎᐱᕆ 2021ᒥ, ᕿᑭᖅᑕᓃᒃᑯᑦ ᐊᒻᒪ ᓄᓇᕗᑦ ᑐᙵᕕᒃᑯᓪᓗ ᑐᓂᓯᓚᐅᕐᒪᑕ ᐃᖅᑲᖅᑐᐃᕝᕕᖕᒧᑦ ᕿᒥᕐᕈᐃᖁᔨᓪᓗᑎᒃ ᒐᕙᒪᑐᖃᒃᑯᑦ ᐃᒪᕐᒥᐅᑕᓕᕆᔨᒃᑯᑦ ᒥᓂᔅᑕᖓ ᑐᑭᑖᕈᑎᒋᔭᖓᓂᑦ ᔪᓚᐃ 2021ᒥ.  ᑖᓐᓇ ᒥᓂᔅᑕᐅᑉ ᑐᑭᑖᕈᑎᒋᔭᖓ ᐊᖏᓚᐅᕐᒪᑦ ᓅᑕᐅᓗᑎᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᐃᖃᓗᓕᕆᓂᕐᒥᒃ ᓚᐃᓴᓐᓯᓂᒃ ᑎᒍᒥᐊᖅᑕᐅᔪᓂᑦ ᑲᓕᐅᕚᑐᒃᑯᓐᓄᑦ ᑲᑐᔾᔨᒍᑕᐅᔪᒥᒃ ᑖᒃᑯᓄᖓ ᐊᓪᓚᓄᑦ  FNC ᑰᑕᖏᓐᓄᑦ ᐊᒻᒪᓗ ᑖᒃᑯᐊ  Premium Brands Holding Corporation.

ᑖᒃᑯᐊ ᓚᐃᓴᓐᓰᑦ ᐱᒻᒪᕆᐋᓗᖕᒪᑦ ᐃᓄᖕᓄᑦ ᐱᔾᔪᑎᒋᓪᓗᒍ ᐱᖃᓯᐅᑎᓯᒪᖕᒪᑕ ᑮᓇᐅᔭᓕᐅᕐᕕᐅᔪᓐᓇᖅᑐᓂᒃ ᓚᐃᓴᓐᓯᓂᒃ ᓄᓇᕘᑉ ᐊᑭᒋᔭᖓᓃᑦᑐᓄᑦ ᐃᒪᓂᒃ ᑖᒃᑯᐊ ᐃᓄᐃᑦ ᐃᓚᐃᓐᓈᖅᖢᑎᒃ ᑐᓂᐅᖅᑲᓚᐅᕐᓂᖏᓐᓄᑦ ᐃᖃᓗᓕᕆᓂᕐᒨᖓᔪᓂᒃ (ᑕᑯᓗᒍ ᐱᒋᐊᕈᑎᖓᓂᒃ ᑎᑎᕋᖅᑕᐅᓯᒪᔪᑦ ᑐᑭᓯᒃᑲᓐᓂᕈᒪᒍᕕᑦ).  ᓄᓇᕘᑉ ᐊᑭᒋᔭᖓᓃᑦᑐᑦ ᐃᒪᓂᒃ ᓚᐃᓴᓐᓯᐅᔪᑦ ᓂᐅᕕᐊᒃᓴᐅᓗᐊᖃᑦᑕᙱᖦᖢᑎᒃ ᓅᑕᐅᓗᑎᓪᓘᓐᓃᑦ ᐊᓯᖏᓐᓄᑦ ᐱᔾᔪᑎᒋᓪᓗᒍ ᖃᔅᓰᓐᓇᐅᓂᖏᓐᓂᒃ ᑮᓇᐅᔭᓕᐅᕐᕕᐅᑦᓯᐊᕈᓐᓇᖅᑐᑦ, ᑕᐃᒪᐃᒻᒪᑦ ᐱᒻᒪᕆᐊᓗᒃᑯᑦ ᐱᕕᒃᓴᐅᖕᒪᑦ ᐃᒪᕐᒥᐅᑕᓕᕆᔨᒃᑯᑦ ᐊᑐᓕᖅᑎᑦᑎᓗᑎᒃ ᐃᓚᖓ 15.3.7ᒥᒃ ᓄᓇᕘᑉ ᐊᖏᕈᑎᖓᓂᒃ.  ᐊᑐᓕᖅᑎᑕᐅᑉᐸᑦ, ᐃᓛᒃᑯᑦ 15.3.7 ᑕᐃᒪ ᐊᑐᖅᑕᐅᔪᓇᖅᑐᖅ ᑲᔪᓯᑎᑦᑎᒋᐊᖃᕐᓂᖏᑦ ᐱᓂᐊᕐᓂᐅᔪᑦ ᓄᓇᕘᑉ ᐊᖏᕈᑎᖓᓂᒃ ᐊᒻᒪᓗ ᑲᔪᓯᑎᑦᑎᓗᑎᒃ ᐱᔾᔪᑎᒋᔭᐅᒋᐊᕐᖓᓚᐅᖅᑐᑦ ᐃᓚᖓ 15.3.7ᒥ ᐱᓕᕆᐊᖑᔪᓐᓇᕐᓂᐊᕐᒪᑕ ᐃᓚᐃᓐᓈᖅᑕᐅᓂᐅᔪᓂᒃ ᓄᓇᕘᑉ ᐊᑭᒋᔭᖓᓃᑦᑐᓂᒃ ᐃᒪᓂᒃ.

ᐊᒃᑑᕙ 16ᒥᑦ 18ᒧᑦ, 2023ᒥ. ᐃᖃᓗᓐᓂᑦ

 

 

ᐃᖅᑲᖅᑐᐃᕝᕕᒃ ᕿᒥᕐᕈᔭᐅᓂᖓᓄᑦ ᐊᐱᖅᑯᑏᑦ ᐊᒻᒪ ᑭᐅᔾᔪᑏᓪᓗ

1. ᑭᓲᕙ ᐃᖅᑲᖅᑐᐃᕝᕕᒃᑯᑦ ᕿᒥᕐᕈᖁᔨᓂᖅ?

ᐃᖅᑲᖅᑐᐃᕝᕕᒃᑯᑦ ᕿᒥᕐᕈᐃᖁᔨᓂᖅ ᕿᒥᕐᕈᓂᐅᕙᒃᑐᑦ ᓱᕐᓗᑐᑦ ᒪᓕᒐᑎᒎᖅᓯᒪᔪᓂᒃ ᐃᖅᑲᖅᑐᖅᑕᐅᔪᑎᑐᑦ ᑖᒃᑯᐊᓗ ᐃᓚᐅᔪᑦ ᐱᔪᒪᓂᖃᖅᓯᒪᔪᓂᒃ ᐅᕝᕙᓘᓐᓃᑦ ᐱᔪᓐᓇᐅᑎᖃᖅᑐᓂᒃ ᑐᑭᑖᕈᑎᒋᔭᐅᓂᐊᖅᑐᖅ ᐱᔾᔪᑎᒋᓪᓗᒍ ᐊᐅᓚᑦᑎᔪᓄᑦ (ᓱᕐᓗ ᒐᕙᒪᒃᑯᑦ ᑲᑎᒪᔨᖏᑦ, ᐋᖅᑮᖃᑎᖃᕈᓐᓇᐃᓕᓂᕐᒧᑦ ᐊᖏᖅᑎᑦᑎᔨᓂᒃ, ᐅᕝᕙᓘᓐᓃᑦ ᒥᓂᔅᑕ) ᑐᓂᓯᔪᓐᓇᕐᒪᑦ ᐃᖅᑲᖅᑐᐃᕝᕕᒃᑯᑦ ᕿᒥᕐᕈᐃᖁᔨᓗᓂᒃ ᑖᓐᓇ ᑐᑭᑖᕈᑎᒋᔭᐅᔪᖅ ᖃᓄᐃᓕᐅᓂᐊᕐᒪᖔᑦ.  ᐃᖅᑲᖅᑐᐃᕝᕕᒃ ᕿᒥᕐᕈᔪᓐᓇᖅᑐᑦ ᑐᑭᑖᕈᑎᒋᔭᐅᔪᒥᒃ ᓇᓗᓇᐃᖅᓯᓗᑎᒃ ᓈᒻᒪᓚᐅᙱᓐᓂᖓᓂᒃ, ᐃᓚᐃᓐᓈᖅᑕᐅᓯᒪᓂᖓᓗ.

2. ᑭᓱᓂᒃ ᐱᔪᒪᕙᑦ ᕿᑭᖅᑕᓃᒃᑯᑦ ᐃᖅᑲᖅᑐᐃᕝᕕᒃᑯᑦ ᕿᒥᕐᕈᔭᐅᓂᖓᓂᑦ?

ᑖᒃᑯᐊ ᓚᐃᓴᓐᓰᑦ ᓄᑕᐅᔪᑦ ᒥᓂᔅᑕᒧᑦ Clearwaterᑯᓐᓂᑦ FNCᑯᓐᓄᑦ ᐱᖃᓯᐅᑎᓯᒪᓚᐅᖅᑐᑦ ᑮᓇᐅᔭᓕᐅᕐᕕᐅᔪᓐᓇᖅᑐᓂᒃ ᓚᐃᓴᓐᓯᓂᒃ ᓄᓇᕘᑉ ᐊᑭᒋᔭᖓᓃᑦᑐᓄᑦ ᐃᒪᓂᒃ.

ᕿᑭᖅᑕᓃᒃᑯᑦ, ᐃᑲᔪᑕᐅᓪᓗᑎᒃ ᓄᓇᕗᑦ ᑐᙵᕕᒃᑯᓐᓂᑦ, ᐃᖅᑲᖅᑐᐃᕝᕕᒃᑰᖅᑎᑦᑎᔪᑦ ᑐᑭᑖᕈᑎᒋᔭᐅᓚᐅᖅᑐᖅ ᐱᔾᔪᑎᒋᓪᓗᒍ, ᐊᐃᕙᔾᔪᑎᖃᖅᖢᑎᒃ ᑖᓐᓇ ᒥᓂᔅᑕ ᒪᓕᓚᐅᙱᓐᓂᖓᓂᒃ ᐱᓕᕆᐊᖓᓂᒃ ᓄᓇᕗᑦ ᐊᖏᕈᑎᖓᓂᑦ.  ᕿᑭᖅᑕᓃᒃᑯᑦ, ᓄᓇᕗᑦ ᑐᙵᕕᒃᑯᓪᓗ ᐅᑯᓂᖓ ᐊᐃᕙᔾᔪᑎᖃᖅᑐᑦ:

• ᒥᓂᔅᑕ ᐊᑐᓕᖅᑎᑦᑎᓚᐅᙱᓐᓂᖓᓂᑦ ᐃᓚᖓ 15.3.7ᒥ ᐱᓗᐊᖅᑐᒥᒃ ᐃᓱᒪᒃᓴᖅᓯᐅᕈᑎᖃᓚᐅᙱᓐᓂᖓᓂᒃ ᖃᓄᖅ ᐊᒃᑐᐃᓂᐊᕐᒪᖔᑦ ᑖᒃᑯᐊ ᓚᐃᓴᓐᓰᑦ ᑐᓂᓯᑎᓪᓗᒍ ᐃᖃᓗᒐᓱᖕᓂᕐᒧᑦ ᓚᐃᓴᓐᓯᓂᒃ ᐊᒻᒪᓗ ᐃᓄᐃᑦ ᐱᕙᓪᓕᐊᓂᖏᓐᓄᑦ, ᐊᒻᒪᓗ ᑕᐃᒪᐃᓕᐅᖅᑎᓪᓗᒍ ᐱᓕᕆᓚᐅᖅᑐᖅ ᓈᒻᒪᙱᑦᑐᒃᑯᑦ, ᒪᓕᓚᐅᙱᓐᓂᖓᓂᒃ ᐃᒃᐱᒍᓱᒋᐊᖃᖅᑎᓪᓗᒋ ᒐᕙᒪᑐᖃᒃᑯᑦ[9]; ᐊᒻᒪᓗ
• ᒥᓂᔅᑕᐅ ᖃᓄᖅᑑᕈᑎᒋᓚᐅᖅᑕᖏᑦ ᑐᑭᑖᕈᑎᖃᖅᐸᓪᓕᐊᑎᓪᓗᒍ ᓈᒻᒪᓚᐅᙱᑦᑐᑦ ᐃᓚᐃᓐᓈᖅᓯᒪᓗᐊᖅᑐᖅ.

3. ᐊᔾᔨᒌᙱᑦᑐᓂᒃ ᐃᖃᓗᒐᓱᒃᑕᐅᔪᓐᓇᖅᑐᖃᖅᐹ ᐱᓕᕆᐊᖑᖃᑕᐅᓂᐊᖅᑐᓂᒃ ᐃᖅᑲᖅᑐᐃᕝᕕᒃᑯᑦ ᕿᒥᕐᕈᓂᐅᔪᒥᒃ?

ᑖᒃᑯᐊ ᐱᔾᔪᑎᒋᔭᐅᔪᑦ ᓚᐃᓴᓐᓯᐅᔪᓂᒃ ᖃᓕᒐᕐᓂᐊᕐᓂᕐᒧᑦ (ᖃᐅᔨᒪᔭᐅᖕᒥᔪᑦ ᑲᓛᖦᖡᑦ ᖃᓕᒐᖏᑦ) ᐊᒻᒪᓗ ᐅᑭᐅᖅᑕᖅᑑᑉ ᑭᖑᑉᐸᖏᑦ.

4. ᖃᓄᖅ ᐊᑯᓂᐅᑎᒋᔪᒥᒃ ᕿᑭᖅᑕᓃᒃᑯᑦ ᑎᒍᓯᒐᓱᒃᓯᒪᕙᑦ ᐊᓯᖏᓐᓂᒃ ᐃᖃᓗᒐᓱᕝᕕᒋᔪᓐᓇᖅᑕᖏᓐᓂᑦ?

ᕿᑭᖅᑕᓃᒃᑯᑦ ᐊᒻᒪ ᑎᒥᐅᔪᑦ ᐃᓚᐅᓯᒪᔪᑦ ᐊᒃᓱᕈᖅᖢᑎᒃ ᐊᖏᓪᓕᒋᐊᖅᓯᒐᓱᒃᖢᑎᒃ ᐃᓄᐃᑦ ᐱᔪᒪᔭᖏᓐᓂᒃ ᐃᖃᓗᒐᓱᖕᓂᕐᒧᑦ ᓯᕗᓂᐊᓗᐊᒍᓪᓘᓐᓃᑦ ᓄᓇᕗᒥ ᐊᖏᕈᑎᑖᓚᐅᖅᑎᓐᓇᑕ.

5. ᑭᓇᒃᑯᑦ ᐃᓚᐅᓂᐊᖅᐸᑦ ᐃᖅᑲᖅᑐᐃᕝᕕᒃᑯᑦ ᕿᒥᕐᕈᓂᐅᔪᒥᒃ

ᕿᑭᖅᑕᓃᒃᑯᑦ ᐃᖅᑲᖅᑐᐃᕝᕕᒃᑯᑦ ᕿᒥᕐᕈᐃᑎᑦᑎᔪᑦ ᐃᑲᔪᖅᑕᐅᓪᓗᑎᒃ ᓄᓇᕗᑦ ᑐᙵᕕᒃᑯᓐᓄᑦ.  ᕿᑭᖅᑕᓃᒃᑯᑦ ᑲᑐᔾᔨᖃᑎᖃᐃᓐᓇᖅᑐᑦ ᓄᓇᕗᑦ ᑐᙵᕕᒃᑯᓐᓂᑦ ᐊᒻᒪᓗ ᕿᑭᖅᑖᓗᒃ ᑯᐊᐸᕇᓴᒃᑯᓐᓂ ᓄᐊᓴᐃᔪᓐᓇᖅᖢᑎᒃ ᓱᓕᔪᓂᒃ ᓴᖅᑭᑕᐅᓂᐊᖅᑐᓄᑦ ᐃᖅᑲᖅᑐᐃᕝᕕᒃᑯᑦ ᕿᒥᕐᕈᓕᖅᐸᑕ.  ᕿᑭᖅᑕᓃᒃᑯᑦ ᓱᓕ ᐊᓯᖏᓐᓂᑦᑕᐅᖅ ᑎᒥᐅᔪᓂᒃ ᐃᖅᑲᓇᐃᔭᖃᑎᖃᖅᓯᒪᔪᖅ − ᓱᕐᓗ ᐅᑯᐊ ᑕᕆᐅᓕᕆᔨᒃᑯᑦ ᐅᑭᐅᖅᑕᖅᑐᒥ ᐊᒻᒪᓗ ᓄᓇᕗᑦ ᒐᕙᒪᒃᑯᑦ − ᐃᑲᔪᖃᑕᐅᖁᓪᓗᒋᑦ ᕿᑭᖅᑕᓃᒃᑯᑦ ᖃᓄᐃᓕᐅᕋᓱᒃᑕᖏᓐᓂᒃ ᐃᖅᑲᖅᑐᐃᕝᕕᒃᑯᑦ ᕿᒥᕐᕈᓂᐅᔪᒧᑦ ᐊᒃᑐᐊᖓᔪᓂᒃ.

6. ᖃᖓ ᕿᑭᖅᑕᓃᒃᑯᑦ ᑐᓴᓛᖅᐸᑦ ᐃᖅᑲᖅᑐᐃᕝᕕᒃᑯᑦ ᕿᒥᕐᕈᓂᐅᔫᑉ ᒥᒃᓵᓂᑦ ᓴᖅᑭᓚᐅᖅᑐᓄᑦ?

ᑐᑭᑖᕈᑕᐅᓂᐊᖅᑐᑦ ᓈᓚᒃᑕᐅᓚᐅᖅᑎᓪᓗᒍ ᐊᒃᑑᕙ 16ᒥᑦ 18ᒧᑦ, 2023ᒥ ᓴᖅᑭᑕᐅᔪᒃᓴᒫᖅ, ᐃᖃᓗᓐᓂ.  ᑖᒃᑯᐊ ᒐᕙᒪᑐᖃᒃᑯᑦ ᐃᖅᑲᖅᑐᐃᕝᕕᖏᑦ ᑐᑭᑖᕈᑎᓂᒃ ᓴᖅᑭᑎᑦᑎᕙᒃᑐᑦ 3ᓂᑦ 9ᓄᑦ ᑕᖅᑭᓄᑦ ᓈᓚᖕᓂᖅᑕᖃᓚᐅᖅᑎᓪᓗᒍ − ᑭᓯᐊᓂ ᐃᖅᑲᖅᑐᐃᕝᕕᒃ ᓴᖅᑭᑎᑦᑎᔪᓐᓇᖅᑐᑦ ᑐᑭᑖᕈᑎᒥᓂᒃ ᐱᔭᕇᑐᐊᖅᐸᑦ ᓈᓚᖕᓂᐅᔪᒥᒃ ᐅᕝᕙᓘᓐᓃᑦ ᐅᑕᖅᑭᑎᑦᑎᓗᑎᒃ ᐊᕐᕌᒍᓪᓗᐊᕐᒥ.

[1] ᐃᓄᐃᑦ ᐱᕙᓪᓕᐊᓂᖏᑦ ᐃᒫᒃ ᑐᑭᓕᒃ ᐱᓕᕆᐊᕆᔭᖏᑦ ᐃᓗᓕᖃᖅᑐᓄᑦ ᐊᒻᒪ ᐃᑲᔪᖅᑕᐅᔪᓄᓪᓗ ᐃᓄᐃᑦ ᐃᓕᖅᑯᓯᖓᓂᒃ, ᐅᖃᐅᓯᖓᓂᒃ, ᐃᓚᒌᓂᑦ ᐊᒻᒪᓗ ᓄᓇᓕᖕᓂᑦ ᐊᑭᑐᔫᑎᓂᒃ ᓴᖅᑭᑎᑦᑎᔾᔪᑕᐅᔪᓐᓇᖅᑐᓄᑦ ᐱᕙᓪᓕᐊᑎᑦᑎᓂᕐᒧᑦ ᐃᑲᔫᓯᐊᒃᓴᓄᑦ ᐃᓄᖕᓄᑦ.

[2] ᐃᒫᓂ ᐱᕙᓪᓕᐊᔾᔪᑎᒃᓴᖃᕐᓂᖅ ᐃᒫᒃ ᑐᑭᓕᒃ ᖃᓄᖅ ᑕᕆᐅᒃ ᐃᑲᔪᕈᓐᓇᕐᒪᖔᑦ ᐱᕙᓪᓕᐊᓂᕐᓂᒃ ᒪᑭᑕᐃᓐᓇᕈᓐᓇᕐᓂᐊᖅᑐᓄᑦ.

[3] ᑐᙵᕕᓕᐊᖑᔪᑦ ᐃᓚᖓ  15.3.7 ᓄᓇᕗᒥ ᐊᖏᕈᑎᖓᓂᒃ ᐱᔾᔪᑎᖃᖅᑐᑦ ᐃᓕᓴᖅᓯᓯᒪᒍᒪᓪᓗᑎᒃ ᑖᒃᑯᓂᖓ ᓄᓇᕗᒥ ᓄᓇᓕᖕᓂᑦ ᐱᐅᓂᖅᐹᒃᑯᑦ ᓇᖕᒥᓂᖅ ᐃᓂᒃᓴᓕᐅᕐᓗᑎᒃ ᐃᑲᔫᓯᐊᖅᑖᕐᕕᐅᔪᓐᓇᕐᓂᐊᕐᒪᑕ ᐃᓕᖅᑯᓯᑎᒍᑦ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᕐᒥᒃ ᐃᖃᓗᓕᕆᓂᕐᒥᒃ ᑖᒃᑯᓇᓂ ᐃᒪᓂᒃ ᖃᓂᑦᑑᓂᖏᓐᓂᒃ ᐃᖃᓗᓕᕆᕕᖕᓂ ᑭᓪᓕᖃᖅᑎᑕᐅᑎᓪᓗᒋ ᐊᓯᖏᓐᓂᒃ ᑮᓇᐅᓕᐊᕐᕕᐅᔪᓐᓇᖅᑐᓂᑦ ᐊᑐᐃᓐᓇᐅᔪᓂᒃ ᓄᓇᕗᒥ ᐃᓱᒪᒋᓪᓗᒋᑦ ᐊᓯᖏᑦ ᓄᓇᓕᐅᔪᑦ ᑲᓇᑕᒥ ᐱᕕᒃᓴᖃᑦᑎᐊᖅᑎᓪᓗᒋᓪᓕ. ᐃᓚᖓ 15.3.7 ᓄᓇᕗᑦ ᐊᖏᕈᑎᖓᓂ ᐅᖃᖅᓯᒪᔪᖅ ᑖᒃᑯᐊ ᒐᕙᒪᑐᖃᒃᑯᑦ ᐃᓱᒪᒃᓴᖅᓯᐅᖃᓯᐅᔾᔭᐅᖃᑦᑕᕐᓂᐊᖅᖢᑎᒃ ᐱᓪᓗᒋᑦ ᓚᐃᓴᓐᓯᓂ ᓄᓇᕘᑉ ᐊᑭᒋᔭᖓᓃᑦᑐᓂᒃ ᐃᒪᓂᒃ.

[4] ᓴᐃᒻᒪᖃᑎᒌᖕᓂᖅ ᑐᕌᒐᕆᔭᐅᔪᖅ ᐋᖅᑮᖃᑎᖃᕈᒪᓂᕐᒥᒃ ᐱᔾᔪᑎᒋᓪᓗᒋᑦ ᑕᐃᒃᑯᐊ ᑕᐃᔅᓱᒪᓂ ᖃᓄᐃᓕᐅᕐᓂᕐᓗᒃᓯᒪᔪᑦ ᑲᑎᒍᓐᓇᖅᓯᓗᑎᒃ, ᕿᑎᖓᓂᒃ ᑲᑎᓪᓗᑎᒃ, ᐊᒻᒪᓗ ᐋᖅᑮᖃᑎᖃᕐᓗᑎᒃ ᑕᒪᕐᒥᒃ ᓴᐃᒻᒪᕈᓐᓇᕐᓂᐊᕐᒪᑕ.

[5] ᑖᒃᑯᐊ ᓈᓴᐅᑏᑦ ᐋᖅᑭᒋᐊᖅᑕᐅᔪᑦ ᒪᓕᑦᑎᐊᕐᓂᐊᖅᐸᑦ 2023ᒨᖓᔪᓂᒃ ᐊᑭᒋᔭᐅᔪᓄᑦ.

[6] ᑐᕌᖅᑎᑕᐅᓯᒪᔪᓂᒃ ᐊᑭᒋᔭᐅᔪᑦ ᐊᒃᑐᐊᖓᔪᑦ ᑕᐃᔅᓱᒪᓂᓴᓂᙶᖅᑐᓂᒃ ᑐᓂᐅᖅᑲᐃᖃᑦᑕᖅᑎᓪᓗᒋᑦ ᑰᑕᓂᒃ.

[7] ᐱᖃᓯᐅᑎᓯᒪᔪᑦ ᐊᑭᓖᓂᖅ, ᓂᖏᖅᑕᐅᔪᑦ, ᐊᒻᒪ ᑮᓇᐅᔭᓕᐅᖅᑕᐅᔪᑦ.

[8] ᐱᓕᕆᐊᖏᑦᑎᒍᑦ, ᒐᕙᒪᑐᖃᒃᑯᑦ ᒥᑭᓐᓂᖅᐹᖑᔪᒥᒃ 1:4ᐊᔾᔨᒌᙱᑦᑐᓂᒃ ᑐᓂᔭᐅᓂᕐᒥᒃ ᑖᒃᑯᓇᙵᑦ ᑮᓇᐅᔭᖃᖅᑎᑦᑎᔨᐅᔪᓂᑦ ᓱᕐᓗ 1 ᑖᓚᒥᒃ ᑐᓂᓯᓗᑎᒃ 4 ᑖᓚᓂ ᑐᓂᓯᑎᓪᓗᒋᑦ ᒐᕙᓚᑐᖃᒃᑯᑦ ᐊᑐᕐᓂᐊᖅᑐᓄᑦ ᒪᑭᒪᔾᔪᑎᒃᓴᓕᕆᓂᕐᒧᑦ.

[9] ᒐᕙᒪᑐᖃᒃᑯᑦ ᐃᒃᐱᒍᓱᑦᑎᐊᕆᐊᖃᕐᓂᖏᑦ ᒪᓕᒐᕐᔪᐊᕐᒥ ᑐᙵᕕᒋᔭᐅᖃᑕᐅᒐᓗᐊᕐᒪᑦ ᐊᒃᑐᖅᑕᐅᓂᐅᓴᖃᑦᑕᖅᑐᑦ ᑖᒃᑯᐊ “ᒐᕙᒪᑐᖃᒃᑯᑦ” − ᐆᒃᑑᑎᒋᓗᒍ, ᑖᓐᓇ ᐃᒪᕐᒥᐅᑕᓕᕆᔨᒃᑯᑦ ᒥᓂᔅᑕᖓ – ᐱᓕᕆᐊᖃᕐᒪᑦ ᐃᓄᖕᓂᑦ ᓄᓇᖃᖅᑳᖅᑑᖃᑕᐅᓂᖏᓐᓄᑦ.  ᑖᒃᑯᐊ ᒐᕙᒪᑐᖃᒃᑦ ᒪᓕᓪᓗᑎᑦ ᐳᖅᑐᓛᒃᑯᑦ ᐃᖅᑲᓇᐃᔭᖃᑎᖃᕐᓂᐊᖅᐸᑕ ᑲᑐᔾᔨᖃᑎᖃᕐᓂᐊᖅᐸᑕᓘᓐᓃᑦ ᓄᓇᖃᖅᑳᖅᑐᑐᖃᓂᒃ “ᐱᐅᓂᖅᓴᒃᑯᑦ ᐊᑯᓂᐅᓂᐊᖅᑐᒧᓪᓗ ᐃᖅᑲᓇᐃᔭᖃᑎᒌᒍᓐᓇᕐᓗᑎᒃ ᓄᓇᖃᖅᑳᖅᑐᑐᖃᐃᑦ ᐊᒻᒪᓗ ᖃᓪᓗᓈᑦ.” ᐃᒪᐃᓕᐅᕆᐊᖃᙱᒻᒪᑕ ᒐᕙᒪᑐᖃᒃᑯᑦ ᓱᕐᓗ ᖃᓄᐃᓕᐅᕆᐊᕐᓗᑎᒃ, ᐱᖃᓯᐅᑎᓗᒋᑦ ᐊᑐᓕᖅᑎᑦᑎᑦᓯᐊᕆᐊᖃᕐᓂᖏᑦ ᒐᕙᒪᑐᖃᒃᑯᑦ ᐱᓂᐊᕐᓂᕋᖅᓯᒪᔭᖏᓐᓂᒃ.