ᐃᖃᓗᐃᑦ, ᓄᓇᕗᑦ – ᐊᒡᒌᓯ 10, 2023 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᑎᒍᓯᖃᑦᑕᓕᕐᒥᔪᑦ ᑐᒃᓯᕋᐅᑎᓂᒃ 2023-2024ᒧᓪᓗ ᐊᕐᕌᒍᖓᓂ ᑐᒃᓯᕋᐅᑎᓕᐅᕈᒪᔪᓄᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᖅᑖᕋᓱᐊᕐᓂᕐᒥᒃ.  ᐃᓕᓐᓂᐊᖅᑏᑦ ᑕᑕᑎᖅᓯᔪᓐᓇᖅᑐᑦ ᖃᕆᓴᐅᔭᒃᑯᑦ ᒪᕐᕉᑎᓪᓗᒋᑦ  ᕿᑭᖅᑦᑕᓃᒃᑯᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᖏᑦ.

ᑖᓐᓇ ᐊᕐᕌᒍ 7ᕙᒋᔭᐅᓕᕐᒪᑦ ᕿᑭᖅᑕᓃᒃᑯᑦ ᐊᕙᒃᑯᑎᖃᖅᓯᒪᓂᖏᓐᓄᑦ  $200,000ᑖᓚᓂ ᐃᓕᓐᓂᐊᕆᐊᒃᑲᓐᓂᕈᑎᒃᓴᓂ ᐃᓚᒋᖃᑕᐅᓪᓗᒍ ᑖᓐᓇ ᐃᓕᓐᓂᐊᕆᐊᒃᑲᓐᓂᕈᑎᒃᓴᐅᔪᖅ ᔮᓐ ᐊᒪᕈᐊᓕᒃ ᐃᓕᓐᓂᐊᕆᐊᒃᑲᓐᓂᕈᑎᒃᓴᖓ $5,000ᑖᓚᐅᔪᒥᒃ.  ᑖᒃᑯᐊ 80ᑎᐅᔪᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᑦ ᐊᑐᓂ ᐃᓕᓐᓂᐊᖅᑎ ᑐᓂᔭᐅᒐᔭᖅᑐᖅ $2,500.00ᑖᓚᓂ/ᐊᕐᕌᒍᒥ, ᑐᓂᔭᐅᕙᒃᖢᑎᒃ ᓯᕗᓪᓕᖅᐹᖑᔪᓄᑦ ᑕᑕᑎᖅᓯᔪᓂᒃ ᑐᕌᖓᓪᓗᓂ ᐃᓄᖕᓄᑦ ᕿᑭᖅᑕᓂᒥᐅᓄᑦ ᐃᓕᓐᓂᐊᕆᐊᒃᑲᓐᓂᕐᓂᐊᖅᑐᓄᑦ ᓯᓚᑦᑐᖅᓴᕐᕕᖕᓄᑦ.

ᑖᓐᓇ $5,000ᑖᓚ ᔮᓐ ᐊᒪᕈᐊᓕᒃ ᐃᓕᓐᓂᐊᕆᐊᒃᑲᓐᓂᕈᑎᒃᓴᖓ ᓴᖅᑭᓯᒪᔪᖅ ᐅᐱᒋᔭᐅᓪᓗᓂ ᔮᓐ ᐊᒪᕈᐊᓕᐅᑉ ᐱᓕᕆᐊᕆᖃᑦᑕᖅᓯᒪᔭᖏᓐᓂᒃ ᐃᓄᐃᑦ ᐱᐅᓂᖅᓴᒥᒃ ᐃᓅᓯᖃᖁᔨᓪᓗᓂ ᓄᓇᕘᒥ.  ᕿᑭᖅᑕᓃᒃᑯᑦ ᕿᒥᕐᕈᓛᖅᑐᑦ ᓯᕗᓪᓕᐅᑎᑦᑎᓗᑎᓪᓗ ᑐᒃᓯᕋᐅᑎᓂᒃ ᐃᓕᓐᓂᐊᕐᓂᐊᕐᓂᐊᖅᑐᓄᑦ ᖃᑭᒪᑎᑦᑎᓂᐊᖅᑐᒥᒃ ᐃᓄᐃᑦ ᐅᖃᐅᓯᖓᓂᒃ ᐃᓕᖅᑯᓯᖓᓂᓗ.

“ᕿᑭᖅᑕᓃᒃᑯᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᖏᑦ ᐃᑲᔪᕐᒪᑕ ᐊᒥᓲᓂᖅᓴᓂᒃ ᐃᓄᖕᓂᒃ ᕿᑭᖅᑕᓂᒥᐅᓂᒃ ᓯᓚᑦᑐᖅᓴᕐᕕᖕᓄᑦ ᐃᓕᓐᓂᐊᕆᐊᒃᑲᓐᓂᖅᑐᓄᑦ,” ᐅᖃᖅᑐᖅ ᐊᖓᔪᖅᑳᖅ ᐅᓛᔪᒃ ᐊᑭᓱᒃ, “ᑖᒃᑯᐊ ᐃᓕᓐᓂᐊᕆᐊᒃᑲᓐᓂᕈᑎᒃᓴᑦ ᐱᕕᖃᖅᑎᑦᑎᖕᒪᑕ ᐃᓄᖕᓂᑦ ᕿᑭᖅᑕᓂᒥᐅᓂᒃ ᐃᑲᔪᖅᑕᐅᓂᖏᓐᓄᑦ ᐊᑐᖅᑕᐅᔪᓐᓇᖅᖢᑎᒃ  ᓱᕐᓗ ᐃᓕᓐᓂᐊᕐᓂᖏᓐᓄᑦ ᑐᕌᖓᔪᓂᒃ.”

ᑐᒃᓯᕋᐅᑎᓕᐅᕐᓂᖅ ᑭᓪᓕᖃᖅᑐᖅ ᑎᓴᒻᒥᕐᒥᒃ, ᐊᒡᒌᓯ 31, 2023ᒥ.

ᖃᕆᓴᐅᔭᒃᑯᑦ ᑕᑕᑎᓯᔪᓐᓇᖅᑐᑎᑦ ᕿᑭᖅᑕᓃᒃᑯᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᖏᓐᓄᑦ, ᐃᓕᓐᓂᐊᖅᑏᑦ ᐃᓚᐃᓐᓇᖓᓂᒃ ᑐᒃᓯᕋᐅᑎᓕᐅᕈᓐᓇᖅᑐᑦ ᐅᕝᕙᓘᓐᓃᑦ ᑕᒪᒃᑮᖕᓂ ᐆᒃᑐᕈᓐᓇᖅᖢᑎᒃ.  ᖃᐅᔨᒪᓂᐊᖅᐳᑎᑦ, ᑕᑕᑎᖅᓯᒪᔭᐃᑦ ᑐᓂᓂᐊᕈᕕᐅᒃ ᑕᐃᒃᑯᐊ ᐸᐃᑉᐹᓕᒫᑦ ᑐᓂᔭᐅᖃᓯᐅᑎᒋᐊᓖᑦ ᑐᓂᔭᐅᖃᑕᐅᓗᑎᒃ.

ᒪᓕᒐᒃᓴᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᖅᑖᕐᓂᕐᒧᑦ:

• ᑐᒃᓯᕋᖅᑐᑦ ᓄᓇᕗᑦ ᑐᙵᕕᒃᑯᓐᓂᑦ ᐃᓚᐅᔾᔪᑎᖃᕆᐊᓖᑦ ᓈᓴᐅᑎᒥᒃ ᐊᒻᒪᓗ ᐃᓅᓗᑎᑦ ᓄᓇᕗᑦ ᐊᖏᕈᑎᖓ ᒪᓕᓪᓗᒍ ᐊᒻᒪᓗ ᕿᑭᖅᑖᓗᖕᒥᐅᑕᓗᑎ
• ᐃᓕᓐᓂᐊᖅᑏᑦ 13ᖑᔪᓂᑦ ᓄᓇᓕᖕᓂᙶᖅᓯᒪᒋᐊᓕᒃ ᕿᑭᖅᑖᓗᖕᒥ
• ᓇᓗᓇᐃᒃᑯᑕᖃᕐᓂᕐᒥᒃ ᐊᖏᖅᑕᐅᓯᒪᓂᕐᓄᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕐᓂᐊᕐᓂᕐᓄᑦ
• ᐃᖅᑲᓇᐃᔭᕈᓐᓇᐅᑎᒥᒃ ᓈᓴᐅᑎᖃᕐᓗᑎᒃ

ᓱᓕ ᒪᓕᒃᑕᐅᔭᕆᐊᓖᑦ ᔮᓐ ᐊᒪᕈᐊᓕᒃ ᐃᓕᓐᓂᐊᕆᐊᒃᑲᓐᓂᕈᑎᒃᓴᖓᓄᑦ

• ᐃᓕᓐᓂᐊᖅᑎ ᐊᑎᓕᐅᖅᓯᒪᔭᕆᐊᓖᒃ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕐᓂᐊᖅᑕᒥᓂᒃ, ᐱᓗᐊᖅᑐᒥᒃ ᐃᓕᓐᓂᐊᕐᓂᕐᒥᒃ ᖃᑭᒪᑎᑦᑎᓂᐊᖅᑐᒥᒃ ᐃᓄᐃᑦ ᐅᖃᐅᓯᖓᓂᒃ ᐃᓕᖅᑯᓯᖓᓂᓗ ᓯᑎᐱᕆᒥᑦ ᔭᓐᓄᐊᕆᒧᑦ ᐃᓕᓐᓂᐊᕐᓂᕐᒧᑦ
• 500ᓂ-ᐅᖃᐅᓯᓕᖕᒥ ᐅᓂᒃᑳᓕᐅᕐᓗᑎᒃ ᖃᓄᖅ ᐱᔪᒪᓂᖅᑖᓚᐅᕐᒪᖔᖅᐲᑦ ᐱᔾᔪᑎᒋᓪᓗᒍ ᔮᓐ ᐊᒪᕈᐊᓕᒃ ᐱᓕᕆᐊᕆᓯᒪᔭᖏᓐᓂᑦ ᐊᒻᒪᓄ ᓄᓇᕗᒥ ᐊᖏᕈᑎᖓᓂᑦ
• ᐃᖅᑲᓇᐃᔮᕆᓯᒪᔭᕐᓂᑦ/ᐃᓕᓐᓂᐊᖅᓯᒪᔭᕐᓂᓪᓘᓐᓃᑦ ᓇᓕᖅᑲᓂᒃ
• ᐃᓕᓐᓂᐊᕐᓂᕐᒧᑦ ᐸᐃᑉᐹᓂᒃ
• ᒪᕐᕉᓂᒃ ᑎᑎᖅᑲᓂᒃ ᐃᓕᓴᐃᔨᒥᑦ, ᐃᖅᑲᓇᐃᔭᕐᕕᖕᒥᓘᓐᓃᑦ ᐃᖅᑲᓇᐃᔮᖃᕐᕕᒋᔭᕐᓂᑦ
• ᐃᓕᓐᓂᐊᖅᑏᑦ ᖃᐅᑕᒫᑦ ᐃᓕᓐᓂᐊᕆᐊᖃᖅᑐᑦ ᐊᒻᒪᓗ ᐱᔭᕇᕈᑎᖃᑦᑎᐊᕐᓗᑎᓪᓗ ᐃᓕᓐᓂᐊᖅᑕᒥᓂᒃ ᐃᓕᓐᓂᐊᕆᐊᒃᑲᓐᓂᕈᑎᒃᓴᖅᑖᕐᓂᐊᖅᐸᑦ

ᖃᕆᓴᐅᔭᒃᑯᑦ ᑕᑕᑎᖅᓯᒍᒪᒍᕕᑦ ᐅᓇ ᓇᕿᓪᓗᒍ: https://www.qia.ca/scholarship-application/

ᐃᓕᓐᓂᐊᖅᑏᑦ ᐃᑲᔪᖅᑕᐅᒋᐊᖃᖅᐸᑕ ᑕᑕᑎᖅᓯᓂᕐᒥᒃ ᕿᑭᖅᑕᓃᒃᑯᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᓄᑦ ᑕᑕᑎᒐᒃᓴᖓᓂᒃ, ᕿᑭᖅᑕᓃᒃᑯᑦ ᓄᓇᓕᖕᓂ ᑐᓴᐅᒪᑎᑦᑎᔨᖏᑦ ᐊᓪᓚᕝᕕᖏᓐᓅᕐᓗᑎᑦ ᐃᑲᔪᕈᓐᓇᖅᑐᑦ.

ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:

ᕕᐅᓪ ᕼᐋᑉᑭᓐᔅ,
ᐊᐅᓚᑦᑎᔨ, ᑐᓴᐅᒪᖃᑦᑕᐅᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 ᐅᕝᕙᓘᓐᓃᑦ
1.800.667.2742