ᐃᖃᓗᐃᑦ, ᓄᓇᕗᑦ – ᐊᒡᒌᓯ 7, 2024 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᒪᑐᐃᖓᑎᑦᑎᓕᕐᒥᔪᑦ ᑐᒃᓯᕋᐅᑎᓕᐅᕈᒪᔪᓄᑦ 2024-2025ᒧᓪᓗ ᐃᓕᓐᓂᐊᕐᓇᐅᑉ ᐊᕐᕌᒍᖓᓂᑦ. ᐃᓕᓐᓂᐊᖅᑏᑦ ᑐᒃᓯᕋᐅᑎᓕᐅᕈᓐᓇᖅᓯᔪᑦ ᐊᑐᕐᓗᒍ ᐋᖅᑭᒋᐊᖅᑕᐅᓯᒪᓕᖅᑐᒥᒃ, ᐱᔭᕆᐊᑭᓪᓕᑎᑕᐅᓯᒪᔪᒥᒃ ᑕᑕᑎᒐᒃᓴᒥᒃ ᑕᒪᐃᓐᓄᑦ ᕿᑭᖅᑕᓃᒃᑯᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᖏᓐᓄᑦ ᐊᒻᒪᓗ ᔮᓐ ᐊᒪᕈᐊᓕᒃ ᐃᓕᓐᓂᐊᕆᐊᒃᑲᓐᓂᕈᑎᒃᓴᖓᓄᑦ. ᑖᓐᓇ 8ᒋᓪᓗᓂᐅᒃ ᐊᕐᕌᒎᓕᕐᒪᑦ ᕿᑭᖅᑕᓃᒃᑯᑦ ᒪᓂᒪᑎᑦᑎᓂᖏᓐᓄᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᓂᒃ ᐊᑭᓕᖕᒥᒃ $205,000ᑖᓚᓂ.
80ᓂᒃ ᕿᑭᖅᑕᓃᒃᑯᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᖏᑦ, ᐊᑐᓂ ᐊᑭᖃᖅᑐᓂᒃ $2,500, ᑐᓂᔭᐅᕙᒃᑐᑦ ᑕᐃᒃᑯᓄᖓ ᓯᕗᓪᓕᐅᔪᓄᑦ ᑕᑕᑎᖅᓯᒪᔪᓂᒃ ᐃᓕᓐᓂᐊᖅᑎᓂᑦ ᕿᑭᖅᑕᓂ ᓄᓇᓕᖏᓐᓂᑦ ᐃᓕᓐᓂᐊᕆᐊᕐᓂᐊᖅᑐᓄᑦ ᓯᓚᑦᑐᖅᓴᕐᕕᖕᓄᑦ. ᑖᓐᓇ ᔮᓐ ᐊᒪᕈᐊᓕᒃ ᐃᓕᓐᓂᐊᕆᐊᒃᑲᓐᓂᕈᑎᒃᓴᖓ ᐊᑭᖃᖅᑐᖅ $5000ᑖᓚ, ᐅᐱᒋᔭᐅᓪᓗᓂ ᐱᓕᕆᐊᕆᓯᒪᔭᖏᑦ ᔮᓐ ᐊᒪᕈᐊᓕᐅᑉ ᐃᓅᓯᖃᑦᑎᐊᕐᓂᖅᓴᐅᖁᓪᓗᒋᑦ ᓄᓇᕗᒥᐅᑦ. ᐃᓕᓐᓂᐊᖅᑎᑦ ᐃᓕᓐᓂᐊᕐᓂᐊᖅᑐᓂᒃ ᖃᑭᒪᑎᑦᑎᔪᒥᒃ ᐃᓄᐃᑦ ᐅᖃᐅᓯᖓᓂᒃ ᐊᒻᒪᓗ ᐃᓕᖅᑯᓯᖓᓂᒃ ᓯᕗᓪᓕᐅᔾᔭᐅᓂᐊᖅᑐᑦ ᐃᓱᒪᒋᔭᐅᖅᑳᕐᓗᑎᒃ.
ᑐᒃᓯᕋᐅᑎᓕᐅᕈᒪᒍᕕᑦ ᑭᓪᓕᖃᖅᑐᑦ ᓯᑕᒻᒥᕐᒥ, ᐊᒡᒌᓯ 29, 2024ᒥ. ᑐᓂᓯᓂᐊᕈᕕᑦ ᑐᒃᓯᕋᐅᑎᒥᒃ, ᐅᑯᐊ ᐊᑖᓃᑦᑐᓕᒫᑦ ᐱᖃᓯᐅᔾᔭᐅᔭᕆᐊᓖᑦ..
ᒪᓕᒐᒃᓴᑦ ᑕᒪᐃᓐᓄᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᓄᑦ:
- ᑐᒃᓯᕋᖅᑐᑦ ᓄᓇᕗᑦ ᑐᙵᕕᒃᑯᓐᓂᑦ ᐃᓚᓕᐅᑎᓯᒪᓂᕐᒧᑦ ᓇᓗᓇᐃᒃᑯᑕᖃᕆᐊᓖᑦ ᐊᒻᒪᓗ ᐊᑎᓕᐅᖅᓯᒪᓗᓂ ᕿᑭᖅᑖᓗᖕᒥ
- ᑐᒃᓯᕋᖅᑐᑦ ᓄᓇᓕᖕᒥᐅᑕᐅᔭᕆᐊᓕᒃ ᓇᓕᑐᐃᓐᓇᖓᓂᑦ 13ᓂᑦ ᓄᓇᓕᐅᔪᓂᑦ ᕿᑭᖅᑖᓗᖕᒥ ᐃᓕᓐᓂᐊᕆᐊᓚᐅᖅᑎᓐᓇᒋᑦ ᓯᓚᑦᑐᖅᓴᕐᕕᖕᒧᑦ
- ᑐᒃᓯᕋᖅᑐᑦ ᓇᓗᓇᐃᒃᑯᑕᒥᒃ ᓱᓕᔪᒥᒃ ᑐᓂᓯᓗᑎᒃ ᐊᑎᓕᐅᖅᓯᒪᓂᖏᓐᓄᑦ ᐃᓕᓐᓂᐊᒐᒃᓴᒥ ᓯᓚᑦᑐᖅᓴᕐᕕᖕᒥ
- ᐃᖅᑲᓇᐃᔭᕈᓐᓇᐅᑎᐅᑉ ᓈᓴᐅᑎᖓ
ᐊᓯᖏᑦ ᒪᓕᒃᑕᐅᔭᕆᐊᓖᑦ ᔮᓐ ᐊᒪᕈᐊᓕᒃ ᐃᓕᓐᓂᐊᕆᐊᒃᑲᓐᓂᕈᑎᒃᓴᖓᓄᑦ:
- ᑐᒃᓯᕋᖅᑐᑦ ᐊᑎᓕᐅᖅᓯᒪᔭᕆᐊᓖᑦ ᐃᓕᓐᓂᐊᕐᓂᐊᖅᑕᒥᓂᒃ ᓯᓚᑦᑐᖅᓴᕐᕕᖕᒥᑦ, ᐱᓗᐊᖅᑐᒥᒃ ᐃᓕᓐᓂᐊᕐᓂᕐᒥᒃ ᖃᑭᒪᑎᑦᑎᓂᐊᖅᑐᒥᒃ ᐃᓄᐃᑦ ᐅᖃᐅᓯᖓᓂᒃ ᐊᒻᒪᓗ ᐃᓕᖅᑯᓯᖓᓂᒃ ᓯᑎᐱᕆᒥᑦ ᔭᓐᓄᐊᕆᒧᑦ ᐃᓕᓐᓂᐊᕐᓂᕐᒥᒃ
- 500ᓂ−ᑎᑎᖅᑲᓕᖕᒥᑦ ᐅᓂᒃᑳᓕᐅᕐᓗᑎᒃ ᖃᓄᖅ ᐃᒃᐱᒋᔭᖃᕐᒪᖔᖅᐲᑦ ᐱᔪᒪᔭᑎᓪᓗᒍ ᓴᖅᑭᓯᒪᓂᖏᓐᓂᑦ ᔮᓐ ᐊᒪᕈᐊᓕᒃ ᐱᔾᔪᑎᒋᓪᓗᒍ ᐊᒻᒪ ᓄᓇᕗᑦ ᐊᖏᕈᑎᖓᓗ
- ᐃᖅᑲᓇᐃᔮᕆᓯᒪᔭᕐᓂᑦ ᓇᓕᖅᑲᓂᒃ
- ᐊᔾᔨᖏᓐᓂᒃ ᐃᓕᓐᓂᐊᕐᓂᕐᒧᑦ ᓇᓗᓇᐃᔭᐅᑎᐅᔪᓂᒃ ᐃᓕᓐᓂᐊᖅᑕᐅᓯᒪᔪᓂᑦ ᓈᓴᐅᑎᑖᕈᑕᐅᓯᒪᔪᓄᑦ
- ᒪᕐᕉᓂᒃ ᑎᑎᖅᑲᓂᒃ ᐃᓕᓴᐃᔨᒥᙶᖅᓯᒪᔪᓂᑦ, ᐃᓕᓴᐃᔨᒻᒪᕆᖕᒥᙶᖅᑐᒥᑦ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᖕᓂᑦ
- ᑐᒃᓯᕋᖅᑐᑦ ᖃᐅᑕᒫᖅᓯᐅᑎᒥᒃ ᐃᓕᓐᓂᐊᕆᐊᖃᖅᑐᑦ ᐊᒻᒪᓗ ᐃᓕᓐᓂᐊᕈᑎᖏᓐᓂᒃ ᖄᖏᖅᓯᑦᑎᐊᖃᑦᑕᕐᓗᓂ, ᑐᓂᔭᐅᓂᐊᖅᐸᑦ ᑖᓐᓇ ᐃᓕᓐᓂᐊᕆᐊᒃᑲᓐᓂᕈᑎᒃᓴᖅ
ᖃᕆᓴᐅᔭᒃᑰᖅᑐᖅ ᑕᑕᑎᒐᒃᓴᖅ ᐱᔭᐅᔪᓐᓇᖅᑐᑦ ᐅᕙᙵᑦ:: https://www.qia.ca/scholarship-application/
ᐃᑲᔪᖅᑕᐅᒋᐊᖃᕈᕕᑦ ᑕᑕᑎᖅᓯᓂᕐᒥᒃ ᕿᑭᖅᑕᓃᒃᑯᑦ ᐃᓕᓐᓂᐊᕆᐊᒃᑲᓐᓂᕈᑎᒃᓴᖏᓐᓂᑦ ᑐᒃᓯᕋᐅᑎᖓᓂᒃ, ᖃᐅᔨᒋᐊᕐᓗᒍ ᕿᑭᖅᑕᓃᒃᑯᑦ ᓄᓇᓕᖕᓂ ᑐᓴᐅᒪᑎᑦᑎᔨᖓ.
ᑐᑭᓯᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒃᓴᖅ:
ᑭᐊᕋᓐ ᕙᓚᕋᑎ,
ᑐᑭᒧᐊᒃᑎᑦᑎᔨ, ᑐᑭᒧᐊᒍᑎᒃᓴᓂ ᑐᓴᐅᒪᖃᑦᑕᐅᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
(ᐅᖄᓚᐅᑖ) 867.975.8398 (ᐊᑭᖃᙱᑦᑐᖅ) 1.800.667.2742
kflaherty@qia.ca
