ᕿᑭᖅᑕᓃᒃᑯᑦ ᐊᖓᔪᖅᑳᖓ ᐲᔨᐊ ᐊᕿᐊᕈᖅ ᑐᓂᓯᖃᑕᐅᓚᐅᖅᑐᖅ ᓵᓚᖃᐅᓯᐊᓂ 2020ᒥ ᐅᑭᐅᖅᑕᖅᑐᒥ ᐱᔪᒐᕐᓴᐅᓯᐅᕈᑎᓂᑦ ᐊᑐᕚᒥ ᐅᓐᓄᒃ.

ᓯᑕᒪᐅᔪᖅᑑᔪᓂᒃ ᐃᓚᒌᖑᔪᑦ ᑲᓇᑕᐅᑉ ᐅᑭᐅᖅᑕᖅᑐᖓᓂᙶᖅᓯᒪᔪᓂ ᓵᓚᖃᐅᓯᐊᖅᑖᖅᑎᑕᐅᓚᐅᖅᑐᑦ ᑮᓇᐅᔭᓂᒃ  $2.ᒥᓕᔭᓂ ᐱᓕᕆᐊᕆᓯᒪᔭᖏᓐᓄᑦ ᐱᐅᓯᒐᓱᐊᖅᖢᒍ ᐃᓅᓯᕆᔭᐅᔪᑦ ᓄᓇᓕᖏᓐᓂ.  ᕿᑭᖅᑕᓃᒃᑯᑦ ᐅᐱᒍᓱᒻᒪᕆᒃᑐᑦ ᓵᓚᖃᐅᓯᐊᖅᑖᖅᑐᓂᒃ ᕿᑭᖅᑖᓗᖕᒥᙶᖅᑐᓄᑦ.

1ᒥᓕᔭᒥᒃ ᓵᓚᖃᐅᓯᐊᖅᑖᖅᑐᖅ:

ᓄᐊᑕᓐ ᑲᒻᐸᔅᑯᑦ, ᑖᓐᓇ ᐱᓕᕆᐊᖅ ᐃᓕᖅᑯᓯᕐᒥᙶᖅᓯᒪᔪᓂᒃ ᐃᑲᔪᖃᑦᑕᕐᓂᕐᒥᒃ ᐃᓕᓐᓂᐊᖅᑐᓂᒃ ᖁᕝᕙᐅᒪᓂᖅᓴᓂ ᐃᓕᓐᓂᐊᕐᕕᖕᒥ ᑕᐃᑯᖓ ᓯᓚᑦᑐᖅᓴᕐᕕᖕᓄᑦ  ᐊᒻᒪᓗ ᐃᖅᑲᓇᐃᔮᖅᑎᑦᓯᓂᕐᒥᒃ ᐃᖅᑲᓇᐃᔮᕆᔭᐅᔪᒪᔪᒃ ᐃᓅᓱᒃᑐᓂ ᓄᓇᕗᒥ ᓄᓇᑦᓯᐊᕐᒥᓗ, ᐊᖏᓂᖅᐹᖑᔪᒥᒃ ᓵᓚᖃᐅᓯᐊᖅᑖᓚᐅᖅᑐᑦ $1ᒥᓕᔭᓂᒃ.

ᐊᓯᖏᑦ ᓵᓚᖃᐅᓯᐊᖅᑖᖃᑕᐅᔪᑦ:

ᐃᓚᒋᓪᓗᒍ ᑖᓐᓇ $1 ᒥᓕᔭᓐ ᑖᓚ ᓵᓚᖃᐅᓯᐊᖅ, ᓯᑕᒪᓂ ᓵᓚᖃᐅᓯᐊᖅᑖᖅᑎᑦᓯᓚᐅᕐᒥᔪᑦ ᑖᒃᑯᐊ ᐊᑐᓂ $500,000ᑖᖅᑎᑕᐅᓪᓗᑎᒃ ᐊᒻᒪᓗ ᐱᖓᓱᓂ ᓵᓚᖃᐅᓯᐊᓂᒃ ᑐᓂᓯᓪᓗᑎᒃ ᐃᓅᓱᒃᑐᓂ ᐊᑐᓂ  ᑮᓇᐅᔭᓂᒃ ᑎᑭᓪᓗᒍ  $100,000ᓂ.

ᑲᒪᔩᑦ

ᑖᓐᓇ  ᑲᒪᔩᑦ ᐱᓕᕆᐊᖓ ᑐᕌᖓᔪᖅ ᖃᐅᔨᓴᕐᓂᕐᒥᒃ ᐱᔾᔪᑎᒋᔭᐅᕙᒃᑐᓂᒃ ᐃᓕᓐᓂᐊᕐᓂᕐᒥᒃ ᓄᖅᑲᖃᑦᑕᖅᑐᓄᑦ ᐊᒻᒪᓗ ᐃᖕᒥᓃᖅᑕᐃᓕᓂᕐᒧᑦ ᐱᖓᓱᓂ ᓄᓇᓕᖕᓂᑦ ᓄᓇᕗᒥ ᐱᓕᕆᑎᑕᐅᓪᓗᑎᒃ ᐃᓅᓱᒃᑐᑦ ᐃᓕᓐᓂᐊᕆᐊᓚᐅᙱᑎᓪᓗᒋᑦ ᐅᓪᓛᒃᑯᑦ ᐊᒻᒪᓗ ᐃᓕᓐᓂᐊᕌᓂᒃᓯᒪᓕᖅᑎᓪᓗᒋᑦ ᐅᓐᓄᒃᓴᒃᑯᑦ ᖃᐅᑕᒫᑦ.  ᓵᓚᖃᐅᓯᐊᖅᑖᓚᐅᖅᑐᑦ $450,000ᓂ, ᑖᓐᓇ ᑲᒪᔩᑦ ᐱᓕᕆᐊᖓ ᓂᕿᑦᓯᐊᕙᖃᖅᑎᑦᓯᕙᒃᑐᑦ, ᐅᐊᓴᐅᑎᓂ, ᐅᐊᓴᕐᕕᓂ ᐊᒻᒪᓗ ᐊᓐᓄᕌᓂ ᐅᐊᓴᕐᕕᓂ, ᐊᒻᒪᓗᑦᑕᐅᖅ ᐱᓕᕆᑎᑕᐅᕙᒃᖢᑎᒃ ᐃᓄᐃᑦ ᐃᓕᖅᑯᓯᖓᓂᙶᖅᑐᓂᒃ ᐅᖃᐅᓯᖓᓂᙶᖅᑐᓂᓗ.  ᓱᓕ ᓴᓇᙳᐊᖅᑕᐅᕙᒃᑐᑦ ᐃᓕᓐᓂᐊᖅᑎᑕᐅᓪᓗᑎᒃ ᓇᖕᒥᓂᖅ ᑐᑭᓯᓕᕈᓐᓇᕐᓂᕐᒥᒃ, ᐊᒻᒪᓗ ᑭᓇᐅᔭᓂᕐᒥᒃ ᖃᐅᔨᓴᓕᕈᓐᓇᕐᓂᕐᒥᒃ.  ᐃᓅᓱᒃᑐᑦ ᐃᓕᓐᓂᐊᖅᑎᑦᓯᖃᖃᑦᑕᖅᑐᑦ ᐊᒻᒪᓗ ᓄᓇᓕᖏᓐᓂᒃ ᐃᖅᑲᓇᐃᔮᒃᓴᖃᖅᑎᑕᐅᕙᒃᖢᑎᒃ.  ᓯᕗᒃᑲᖅᑎᒋᔭᐅᔪᖅ: ᓲᓴᓐ ᐊᒡᓘᑲᖅ, ᑎᑎᕋᖅᑎ, ᐱᕙᓪᓕᐊᑎᑦᓯᔨ, ᐊᒻᒪᓗ ᐱᙳᖅᑎᑦᓯᓯᓚᐅᖅᑐᖅ , ᐋᒃᑎᒃ ᕉᔅ ᑎᒥᖁᑎᖓᓂ.

ᓄᓇᕗᒥ ᒪᓕᒐᓕᕆᔨᐅᒋᐅᖅᓴᓂᕐᒧᑦ ᐃᓕᓐᓂᐊᕐᓂᖓ:

ᓄᓇᕗᒥ ᒪᓕᒐᓕᕆᔨᐅᓂᕐᒧᑦ ᐃᓕᓐᓂᐊᕐᓂᖓ ᓵᓚᖃᐅᓯᐊᖅᑖᖅᑎᑕᐅᓚᐅᕐᒥᔪᑦ ᑮᓇᐅᔭᓂ $140,000  ᓄᓇᕗᒦᑦᑐᒥᒃ ᒪᓕᒐᓕᕆᔨᐅᒋᐅᖅᓴᓂᕐᒧᑦ ᐃᓕᓐᓂᐊᕐᓂᕐᒥᒃ ᓄᓇᕗᒥᐅᓄᑦ.  ᑖᓐᓇ ᒪᓕᒐᓕᕆᔨᐅᒋᐅᖅᓴᓂᕐᒧᑦ ᐃᓕᓐᓂᐊᕐᓂᖓ ᐃᓕᓐᓂᐊᕌᓂᒃᑐᓂᒃ ᐱᕕᖃᖅᑎᑦᓯᔪᓐᓇᖅᑐᑦ ᐃᓕᓐᓂᐊᒃᑲᓐᓂᕐᓂᕐᒥᒃ ᐃᓄᐃᑦ ᒪᓕᒐᕆᓚᐅᖅᑕᖏᓐᓂᒃ ᐃᓚᐅᕙᒡᓗᑎᒃ ᐅᑭᐅᖅᑕᖅᑐᕐᒥᐅᑕᐅᖃᑎᒌᑦ ᑕᐅᖅᓰᖃᑦᑕᐅᑎᓗᑎᒃ ᓯᓚᑦᑐᖅᓴᕐᕕᖕᒥᑦ ᓛᑉᓛᓐᒥ ᓱᕐᓕ ᐃᓱᓕᐅᑦᓯᐊᕆᐅᖅᓴᓂᕐᒥᒃ, ᐃᓕᓐᓂᐊᖅᑏᑦ ᐃᑲᔪᕐᓂᖏᑦ ᐃᑲᔫᑎᓂᒃ, ᒪᓕᒐᑐᖃᕆᔭᐅᔪᓂᒃ ᐊᒻᒪᓗ ᐃᓕᖅᑯᓯᕐᒥᑦ ᖃᓄᐃᓕᐅᕈᑎᓂᒃ.  ᐃᓕᓐᓂᐊᖅᑏᑦ ᓄᓇᕗᒥ ᒪᓕᒐᓕᕆᔨᐅᒋᐅᖅᓴᓂᕐᒧᑦ ᐃᓕᓐᓂᐊᕐᓂᖓᓂ ᐃᓕᓐᓂᐊᕌᓂᓛᖅᑐᑦ ᓇᓗᓇᐃᒃᑯᑕᖅᑖᕐᓗᑎᒃ Juris Doctor degree, ᐊᒻᒪᓗ ᐱᔪᓐᓇᕐᓂᖃᕈᓐᓇᖅᓯᓂᐊᖅᖢᑎᒃ ᐊᔾᔨᐅᙱᑦᑐᓂ ᖃᐅᔨᒪᓂᖃᕐᓂᕐᒥᒃ ᐱᔪᓐᓇᕐᓂᖃᕐᓂᕐᒥᒃ ᐱᓯᒪᔭᐅᔭᕆᐊᓕᖕᓂᑦ ᒪᓕᒐᓕᕆᔨᐅᓂᐊᖅᐸᑕ ᓄᓇᕗᒥ.  ᓯᕗᒃᑲᖅᑎᒋᔭᐅᔪᖅ ᓯᑏᕙᓐ ᒫᓐᓯᐊᓪ, ᑐᑭᒧᐊᒃᑎᑦᓯᔨ; ᐋᔫ ᐲᑕ, ᐃᓕᖅᑯᓯᓕᕆᓂᕐᒧᑦ ᐅᖃᐅᔾᔨᔨ ᐅᖃᓪᓚᒃᑎᐅᓗᓂ.

ᕿᑭᖅᑖᓗᖕᒥ ᐃᓅᓱᒃᑐᐃᑦ ᓯᓚᒥ ᐃᓕᓐᓂᐊᖅᑎᑦᓯᓂᖏᑦ:

ᑮᓇᐅᔭᖏᑦ ᐊᑐᕐᓗᒋᑦ $100,000ᓂ ᓵᓚᖃᐅᓯᐊᖓ, ᑖᒃᑯᐊ ᕿᑭᖅᑖᓘᖕᒥ ᐃᓅᓱᒃᑐᑦ ᓯᓚᒥ ᐃᓕᓐᓂᐊᖅᑎᑦᓯᓂᖏᑦ ᐱᓕᕆᐊᖓ ᓱᕐᓗ ᓇᖕᒥᓂᕐᒥ ᐱᕈᕈᑎᖃᕐᓂᕐᒥᒃ, ᐱᔪᓐᓇᐅᑎᒋᔭᐅᔪᑦ ᐱᕙᓪᓕᐊᑎᑕᐅᓂᖏᑦ ᐊᒻᒪᓗ ᐃᓅᓯᕐᓂ ᐃᓕᖅᑯᓯᕐᒥᓗ ᐅᔾᔨᕈᓱᓕᕐᓂᖅ ᐃᓕᓐᓂᐊᖅᑎᑕᐅᓗᑎᒃ ᐃᓅᓱᒃᑐᑦ ᐃᓕᖅᑯᓯᕐᒥᙶᖅᑐᒥᒃ ᐱᓕᕆᐊᒃᓴᓂ ᐊᒻᒪᓗ ᓅᑎᑦᓯᓂᕐᒥᒃ ᓄᓇᒧᑦ.  ᐱᒋᐊᕈᑎᒋᔭᐅᖅᑳᓚᐅᕋᓗᐊᖅᑐᖅ ᕿᒧᒃᓯᖃᑦᑕᕐᓂᖅ.  ᓯᕗᒃᑲᖅᑎᖓ: ᕘᕆᑎᓂ  ᒫᓵᓐ, ᑭᒡᒐᖅᑐᐃᔨ. ,

ᐃᓕᓐᓂᐊᖅᑎᑦᓯᓂᖅ ᐱᐅᓯᐅᓚᐅᖅᑐᓂ:

ᐱᕕᖃᖅᑎᑦᓯᓪᓗᑎᒃ ᓄᓇᓕᖕᒥᐅᑦ ᐱᕙᓪᓕᐊᑎᑦᓯᔪᓐᓇᕐᓂᕐᒥᒃ ᐃᓕᖅᑯᓯᕐᒥᑦ ᐊᓇᓱᖕᓂᕐᒥᒃ, ᒥᖅᓱᕐᓂᕐᒥᒃ, ᕿᓚᐅᑎᓕᐅᕐᓂᕐᒥᒃ ᐊᒻᒪᓗ ᕿᓚᐅᔾᔭᖕᓂᕐᒥᒃ, ᐃᓕᓐᓂᐊᖅᑎᑦᓯᓂᖅ ᐱᐅᓯᐅᕙᓚᐅᖅᑐᓂᒃ ᑮᓇᐅᔭᖅᑖᖏᓐᓂᒃ $100,000ᓂ ᐊᑐᕐᓂᐊᖅᑐᖅ ᓴᐳᔾᔨᓗᒍ  ᖃᐅᔨᒪᔭᑐᖃᕆᔭᐅᔪᓂᒃ, ᑲᑎᑦᑎᕙᓪᓕᐊᓂᕐᒥᒃ ᐃᓐᓇᕐᓂᒃ ᐃᓅᓱᒃᑐᓂᓗ, ᓴᙱᓕᖅᑎᑦᓯᓂᕐᒥᒃ ᑭᓇᐅᓂᖏᓐᓂᒃ ᐃᓚᐅᔪᑦ, ᐊᒻᒪᓗ ᐱᓕᕆᐊᖑᓗᑎᒃ ᓄᓇᓕᖏᓐᓂᒃ, ᐱᖃᓯᐅᑎᓗᒍ ᐅᐃᕆᓴᐅᑎᓂᒃ ᐊᑐᕐᓂᕐᓗᖕᓂᕐᒥᒃ ᐊᒻᒪ ᐃᖕᒥᓃᖅᑕᐃᓕᓂᕐᒥᓗ.  ᓯᕗᒃᑲᖅᑎᒋᔭᐅᔪᑦ: ᓇᐃᑕᓐ ᒪᓐᓂᐊᐱᒃ, ᐸᓐᓂᖅᑑᕐᒥ ᐊᖑᓇᓱᒋᐊᕈᔾᔨᓂᕐᒥᒃ ᑲᒪᔨᖓ; ᓵᐃᓪ ᐸᐅᕐᖓᑦ, ᖃᒪᓂ’ᑐᐊᖅ ᐊᖑᓇᓱᒋᐊᖅᑎᑦᓯᓂᕐᒧᑦ ᑲᒪᔨᖓ.

ᐅᐱᒋᔭᐅᕗᓯ ᑭᓇᓕᒫᖅ ᐃᓚᒋᔭᐅᓚᐅᖅᑐᑦ!

ᐅᑭᐅᖅᑕᖅᑐᒥ ᓵᓚᖃᐅᓯᐊᒃᓴᖓ

ᐊᖏᓂᖅᐹᖑᖃᑕᐅᑎᓪᓗᒍ ᐊᕐᕌᒍᑕᒫᖅ ᓵᓚᖃᐅᓯᐊᖅᑖᖅᑎᑦᓯᓂᕐᒥᒃ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᑐᕌᖓᔪᖅ, ᑖᓐᓇ ᐅᑭᐅᖅᑕᖅᑐᒥ ᓵᓚᖃᐅᓯᐊᒃᓴᖅ ᑲᔪᓯᖏᖅᓴᐃᕙᒃᑐᖅ, ᐱᕕᖃᖅᑎᑦᓯᕙᒃᑐᖅ ᐊᒻᒪᓗ ᖁᕕᐊᓲᑎᖃᖅᖢᑎᒃ ᑲᔪᓯᑎᑦᓯᑦᓯᐊᖅᑐᓂᒃ ᐱᓕᕆᐊᓂᒃ ᐃᓄᖕᓂ ᐅᑭᐅᖅᑕᖅᑐᒥᐅᓂ.  ᑖᓐᓇ ᓵᓚᖃᐅᓯᐊᖅ ᐊᔾᔨᒌᙱᑦᑐᓂᒃ ᐃᓄᖕᓂᑦ ᐃᓕᑕᖅᓯᖃᑦᑕᖅᑐᑦ ᐊᒻᒪᓗ ᐱᓕᕆᐊᒃᓴᖃᖅᑎᑦᓯᓕᕈᓐᓇᓲᖑᓪᓗᑎᒃ ᐃᓕᓐᓂᐊᕐᓂᕐᒥᒃ, ᐃᒡᓗᓕᕆᓂᕐᒥᒃ, ᐋᓐᓂᐊᖃᖅᑕᐃᓕᓂᕐᒥᒃ, ᐱᖃᐃᔭᕐᓂᒃᑯᑦ ᑕᑯᒃᓴᐅᑎᑦᓯᓂᕐᒥᒃ, ᖃᐅᔨᒪᔭᑐᖃᓂᒃ, ᐅᖃᐅᓯᕐᓂ, ᐊᒻᒪᓗ ᖃᐅᔨᓴᖅᑐᓕᕆᓂᕐᒥᒃ.  ᐊᕐᕌᒍᑕᒫᑦ, ᑖᓐᓇᓵᓚᖃᐅᓯᐊᖅ ᑐᓂᓯᕙᒃᑐᖅ ᑎᑭᓪᓗᒍᑦ ᑮᓇᐅᔭᓂᒃ $3ᒥᓕᔭᓂᒃ: ᐊᑕᐅᓯᕐᒥ $1 ᒥᓕᔭᒥᒃ, ᐊᒻᒪᓗ ᑎᑭᓪᓗᒍ ᑎᓴᒪᓄᑦ ᓵᓚᖃᐅᓯᐊᓂ ᑮᓇᐅᔭᓂᒃ $500,000ᓂ ᐊᑐᓂ, ᐊᒻᒪᓗ 7ᓂ ᐃᓅᓱᒃᑐᓄᑦ ᑐᕌᖓᔪᓂᒃ ᓵᓚᖃᐅᓯᐊᓂᒃ ᑮᓇᐅᔭᓂᒃ $100,000ᓂ ᐊᑐᓂ.