ᐃᖃᓗᐃᑦ, ᓄᓇᕗᑦ − ᐋᒡᒌᓯ 9, 2022 ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᖁᕕᐊᓱᑉᐳᑦ ᓇᓗᓇᐃᕐᓯᔭᕆᐊᔅᓴᖅ ᑲᑦᑐᖓᐃᕈᑎᖃᕐᓯᒪᓕᕐᒥᒻᒪᑕ ᐊᖅᑯᑎᒋᓪᓗᒋᑦ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻᒧᑦ (TI NMCA) ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑏᑦ ᑕᑯᖅᑯᔾᔨᖃᑦᑕᓂᐊᕐᓂᖏᓐᓂᒃ ᐃᓄᐃᑦ ᖃᐅᔨᒪᔭᖏᓐᓂᒃ ᐃᒪᕕᐅᑉ ᒥᔅᓵᓄᑦ ᑕᒫᓂ ᐊᐅᔭᐅᓂᖓᓂ.

ᑎᓴᒪᑦ ᐅᒥᐊᑦ ᐊᐅᓪᓚᔪᔪᑦ ᐃᒃᐱᐊᕐᔪᒻᒥᑦ ᒥᑦᑎᒪᑕᓕᒻᒥᓪᓗ ᐋᒡᒋᓯ 6ᖑᑎᓪᓗᒍ, ᐊᐅᓱᐃᑦᑐᓕᐊᕐᐸᓪᓕᐊᓪᓗᑎᒃ ᓇᐅᑦᑎᕐᓱᕐᓂᐊᕐᖓᑕ ᐃᒫᓂ ᐊᑯᓐᓂᖓᓃᑦᑐᓂᑦ ᑖᒃᑯᐊ ᓄᓇᓖᑦ ᐊᒻᒪᓗ ᓇᐅᑦᑎᕐᓱᖅᑎᓄᑦ ᐅᒥᐊᕐᒥᑦ ᑕᑉᐸᐅᙵᐅᔾᔨᓗᑎᒃ ᐊᐅᓱᐃᑦᑐᕐᒧᑦ.

ᐅᒥᐊᕐᒥᑦ ᑕᑉᐸᐅᙵᐅᔾᔨᓂᖏᑦ ᑖᓐᓇ ᓇᓗᓇᐃᒃᑯᑕᐅᒻᒪᑦ ᐊᐅᓱᐃᑦᑐᕐᒥᐅᑦ ᓇᐅᑦᑎᕐᓱᖅᑎᖏᑦ ᓇᐅᑦᑎᕐᓱᖃᑦᑕᕈᓐᓇᕐᓂᐊᕐᖓᑕ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᐃᒫᓂ ᓴᐳᔾᔨᕕᒻᒥᑦ ᓇᐅᑦᑎᕐᓱᖃᑦᑕᕐᓗᑎᒃ ᐃᒫᓂ, ᓯᑰᑉ ᖃᓄᐃᑦᑑᓂᖏᓐᓂᒃ ᐊᒻᒪᓗ ᓂᕐᔪᑎᓂᑦ. ᓇᐅᑦᑎᕐᓱᕐᓂᖏᓐᓂ, ᓇᐅᑦᑎᕐᓱᖅᑏᑦ ᐊᖑᓂᑉᐸᑦᑐᑦ ᐃᒪᕐᒥᐅᑕᕐᓂᑦ ᐆᒪᔪᓂᑦ ᐊᒻᒪᓗ ᓂᕿᔅᓴᖅᑖᕆᔪᓐᓇᖅᑕᖏᓐᓂᒃ ᑕᒪᒃᑯᐊᓗ ᑐᓂᐅᖅᑲᖅᑕᐅᕙᑦᑐᑎᒃ ᓄᓇᖅᑲᑎᖏᓐᓄᑦ, ᐃᓛᓐᓂᒃᑯᑦ ᑕᐅᕐᓰᖃᑎᖃᓚᐅᕐᐸᑦᑐᑦ ᓴᓂᓪᓕᖏᓐᓂᒃ ᓄᓇᓕᓐᓂᑦ ᐊᖑᓂᔅᓯᒪᓪᓗᐊᑲᓪᓚᒐᐃᒻᒪᑕ ᐅᕝᕙᓘᓐᓃᑦ ᓄᓇᓖᑦ ᐊᓯᖏᑦ ᓂᕿᔅᓴᖃᙱᓗᐊᖅᑎᓪᓗᒋᑦ.

ᓂᐅᕆ ᐃᖃᓗᔾᔪᐊᖅ, ᓇᐅᑦᑎᕐᓱᖅᑎᓂᑦ ᑐᑭᒧᐊᑦᑎᑦᑎᔨ ᐃᒃᐱᐊᕐᔪᒻᒥᐅᓂᑦ ᓯᕗᓕᖅᑎᒋᔭᐅᓂᐊᖅᑐᖅ ᐃᑲᔪᖅᑎᖃᕐᓗᓂ ᐃᐅᕆᒃ ᐆᑦᑐᕙᒻᒥᒃ ᒥᑦᑎᒪᑕᓕᒻᒥᐅᒥᑦ ᐃᓚᖃᕐᓗᑎᒃ ᑎᓴᒪᐅᔪᖅᑐᓂᑦ ᐊᓯᖏᓐᓂᑦ ᓇᐅᑦᑎᕐᓱᖅᑎᓂᑦ ᐃᖅᑲᓇᐃᔭᖅᑎᐅᖃᑕᐅᔪᓂᑦ. ᑕᐃᒫᒃ ᐊᑐᖅᑕᐅᓚᐅᕐᓯᒪᙱᑦᑐᒥᒃ ᐊᑐᖅᑎᓪᓗᒋᑦ ᐱᔭᕇᕈᑎᖃᕐᓂᐊᖅᑐᑦ ᓄᓇᓕᓐᓂᑦ ᓂᕆᕕᔾᔪᐊᖃᑎᖃᕐᓗᑎᒃ ᐊᐅᓱᐃᑦᑐᕐᒥᐅᓂᑦ.

ᓇᐅᑦᑎᕐᓱᖅᑏᑦ ᑕᓪᓗᕈᑎᐅᑉ ᐃᒪᖓᓂ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᓂᑦ ᐊᑑᑎᕕᐅᔪᓂᑦ ᓄᓇᓕᓐᓂᑦ ᐅᑯᓇᙶᕐᓯᒪᒻᒪᑕ ᐊᐅᓱᐃᑦᑐᖅ, ᖃᐅᓱᐃᑦᑐᖅ, ᐃᒃᐱᐊᕐᔪᒃ, ᒥᑦᑎᒪᑕᓕᒃ ᐊᒻᒪᓗ ᑲᖏᖅᑐᒑᐱᒃ ᐊᑑᑎᖃᓪᓚᕆᑦᑐᑎᒃ ᐃᓚᒋᔭᐅᒻᒪᑕ ᑕᐃᒫᒃ ᖃᐅᔨᒪᔾᔪᑕᐅᑦᑎᐊᓂᐊᕐᖓᑕ ᐃᓄᓐᓄᑦ−ᑐᑭᒧᐊᑦᑎᑕᐅᔪᒥᒃ ᐊᕙᑎᑦᑎᓐᓂᒃ ᓇᐅᑦᑎᕐᓱᖅᑎᖃᖃᑦᑕᕐᓂᖏᓐᓂᒃ ᕿᑭᖅᑕᓂ. ᕿᑭᖅᑕᓂᒃᑯᑦ ᐃᓱᒪᒋᔭᖃᕐᓯᒪᒻᒪᑕ ᑲᔪᓯᑎᑦᑎᒐᔭᕆᐊᔅᓴᖅ ᐊᕐᕌᒍᑕᒫᑦ ᓇᐅᑦᑎᕐᓱᖅᑕᐅᖃᑦᑕᕐᓗᓂ ᐃᑲᔪᖅᑎᒌᓪᓗᑎᒃ ᓇᐅᑦᑎᕐᓱᖅᑎᓖᑦ ᓄᓇᓖᑦ ᑕᓪᓗᕈᑎᐅᑉ ᐃᒪᖓᑕ ᖃᓂᒋᔮᓂᒥᐅᑕᐃᑦ.

ᕿᑭᖅᑕᓂᒃᑯᑦ ᖃᓄᐃᙱᑎᐊᕐᓗᑎᒃ ᐃᖏᕐᕋᑦᑎᐊᖁᔨᕗᑦ ᓇᐅᑦᑎᕐᓱᖅᑎᓂᑦ ᐊᑑᑎᖃᓪᓚᑦᑖᖅᑐᒥᒃ ᓇᐅᑦᑎᕐᓱᕐᓂᖃᖅᑎᓪᓗᒋᑦ ᑕᓪᓗᕈᑎᐅᑉ ᐃᒪᖓᓂ.

ᑐᓴᕋᔅᓴᐅᑉ ᒥᔅᓵᓄᑦ ᑐᑭᓯᒋᐊᕈᒪᔪᓄᑦ, ᑐᑭᓯᒋᐊᕐᕕᐅᖃᑦᑕᕐᓕ:

ᐅᐃᓕᐊᒻ Hᐊᑉᑭᓐᔅ
ᑐᑭᒧᐊᑦᑎᑦᑎᔨᐅᓂᕐᒧᑦ ᑭᖑᕝᕕᐅᑎᓯᒪᑲᐃᓐᓇᖅᑐᖅ, ᑐᑭᒧᐊᒍᑎᔅᓴᓄᑦ ᑐᓴᐅᒪᖃᑦᑕᐅᑎᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(ᐅ) 867.975.8413 ᐊᑭᖃᙱᑐᒃᑯᓘᓐᓃᑦ ᐅᖓᓯᑦᑐᒥᑦ 1.800.667.2742
whopkins@qia.ca