ᐃᖃᓗᐃᑦ, ᓄᓇᕗᑦ − ᔮᓐᓄᐊᕆ 31, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᐱᒃᑯᒍᓱᑉᐳᑦ ᖁᕕᐊᓲᑎᖃᕆᐊᔅᓴᖅ ᐃᓄᒃᑎᑐᑦ ᐅᖃᐅᓯᓕᕆᓂᕐᒥᒃ ᑕᖅᑭᑎᓐᓂ ᑎᓴᒪᒋᓕᖅᑕᖓᓐᓂ ᐊᕐᕌᒍᒥ ᖃᓄᐃᑦᑐᑐᐃᓐᓇᑦᑎᐊᓂᑦ ᐊᑐᕐᓂᐊᖅᑐᑎᒃ ᐱᓇᓱᐊᕈᑎᖃᕐᓂᐊᖅᑐᑎᓪᓗ.

“ᐃᓄᒃᑎᑑᖃᑦᑕᕐᓂᖅ ᐃᓄᓐᓄᑦ ᑲᓲᒪᒍᑕᐅᑦᑎᐊᑲᓐᓂᖃᑦᑕᕐᖓᑦ ᐃᓕᖅᑯᓯᑦᑎᓐᓄᑦ ᐃᓅᕕᒋᓯᒪᔭᑦᑎᓄᓪᓗ − ᑕᑯᔾᔪᑎᒋᖃᑦᑕᕋᑦᑎᒍ ᑕᐃᔅᓱᒪᓂᓴᕐᓂᑦ ᓯᕗᓕᑦᑎᓃᙶᖅᑐᓂᑦ ᐊᒻᒪᓗ ᐃᓱᒪᔾᔪᓯᑦᑎᓐᓂᒃ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓᑦ ᐸᐅᓗᓯ ᐊᕿᐊᕈᖅ.

“ᑲᑐᔾᔨᖃᑎᒌᒃᑯᑦ ᐱᒃᑯᒍᓱᑉᐳᑦ ᖁᕕᐊᓲᑎᖃᕆᐊᔅᓴᖅ ᐅᖃᐅᓯᑦᑎᓐᓂᒃ ᐊᒻᒪᓗ ᑎᓕᐅᕆᓗᑎᒃ ᐃᓅᓱᑦᑐᓂᑦ ᐆᑦᑐᕋᖃᑦᑕᖁᓪᓗᒋᑦ ᐃᓕᓐᓂᐊᖃᑦᑕᖁᓪᓗᒋᓪᓗ ᐅᖃᕆᐅᕐᓴᖃᑦᑕᓂᕐᒥᒃ ᐅᖃᐅᓯᓪᓚᑦᑖᑦᑎᓐᓂᒃ.”

ᐃᓚᒋᔭᐅᓪᓗᓂ ᐃᓄᒃᑎᑐᑦ ᐅᖃᐅᓯᓕᕆᓂᕐᒧᑦ ᑕᖅᑭᑎᓐᓂ ᕿᑭᖅᑕᓂᒃᑯᑦ ᓴᖅᑭᑎᑦᑎᕗᑦ ᐃᑲᔪᕐᓯᕆᐊᕈᑎᖓᓐᓂᒃ ᐊᑐᖅᑕᐅᒋᐊᒃᑲᓐᓂᖁᓪᓗᒍ ᖁᕕᐊᓲᑕᐅᖁᓪᓗᒍᓗ ᐅᖃᐅᓯᕗᑦ.

ᐃᓄᒃᑎᑐᑦ ᐅᖃᐅᓯᓕᕆᓂᕐᒥ ᑕᖅᑭᑎᓐᓂ ᐊᑐᖅᑕᐅᓂᐊᖅᑐᑦ ᒪᑯᐊ:

ᑲᑐᔾᔨᖃᑎᒌᒃᑯᑦ ᐅᖃᓕᒫᒐᖁᑎᖏᓐᓂᒃ ᓴᖅᑭᔮᖅᑎᑦᑎᓂᖅ − ᕖᕝᕗᐊᓕ 3ᒥ – 28ᒧᑦ, 2020

ᖃᐅᑕᒫᑦ ᕖᕝᕗᐊᓕᒥ ᑲᑐᔾᔨᖃᑎᒌᒃᑯᑦ ᓴᖅᑭᑎᑦᑎᖃᑦᑕᓂᐊᖅᑐᑦ ᐊᔾᔨᒌᙱᑐᒡᒍᑎᓂᑦ ᐃᓄᒃᑎᑑᖓᔪᓂᑦ ᐅᖃᓕᒫᒐᕐᓂᑦ ᐅᖃᓕᒫᒐᓕᐊᖑᓯᒪᔪᓂᑦ ᐅᖃᓕᒫᒐᓕᐅᖅᑎᓄᑦ Inhabit Media ᐃᑲᔪᖅᑎᖃᖅᑐᑎᒃ ᕿᑭᖅᑕᓂᒃᑯᓐᓂᑦ ᑮᓇᐅᔭᓄᑦ ᑭᒃᑯᑐᐃᓐᓇᓕᒫᓄᑦ ᑐᓴᐅᒪᖃᑦᑕᐅᑎᒍᑕᐅᕙᑦᑐᓂᑦ ᖃᕋᓴᐅᔭᒃᑯᑦ (Facebook, Twitter, Instagram). ᐊᒻᒪᓗᑦᑕᐅᖅ, ᑕᑯᔭᔅᓴᐅᑎᑦᑎᓂᐊᕐᒥᔪᒍᑦ ᐊᑭᖃᙱᑦᑐᓂᑦ ᖃᕋᓴᐅᔭᒃᑯᑦ ᐱᔭᔅᓴᐅᓂᐊᖅᑐᓂᑦ ᑐᕌᕈᑎᖏᑎᒍᑦ ᐊᑐᓂᑦ ᐅᖃᓕᒫᒐᐃᑦ.

ᐅᖃᓕᒫᒐᕐᓂᑦ ᐊᑎᓕᐅᖅᑎᑦᑎᖃᑦᑕᕐᓂᖅ ᑎᑎᕋᕐᓯᒪᔪᓂᑦ − ᕖᕝᕗᐊᓕ 15ᒥ (12ᒥ ᐅᓐᓄᓴᒃᑯᑦ 3:00ᒧᑦ ᐅᓐᓄᓴᒃᑯᑦ) ᕗᕉᐱᓴ ᑐᔪᕐᒥᕕᒻᒥ; ᑰᔾᔨᓯ ᑲᑎᒪᕕᐊᓂ

ᑖᓐᓇ ᐊᑐᖅᑕᐅᓛᖅᑐᖅ ᑲᑐᔾᔨᖃᑎᖃᕐᓗᑎᒃ ᐅᖃᓕᒫᒐᓕᐅᖅᑎᓂᑦ Inhabit Media ᐊᒻᒪᓗ ᐅᖃᓕᒫᒐᓕᐅᕐᓯᒪᔪᓂᑦ ᐊᑎᓕᐅᖅᑎᑦᑎᖃᑦᑕᕐᓗᑎᒃ ᐃᓄᒃᑎᑑᖓᔪᓂᑦ ᐅᖃᓕᒫᒐᕐᓂᑦ.

ᐃᓄᒃᑎᑐᑦ ᐃᙱᐅᓯᐅᓕᐅᑎᑎᑦᑎᓂᖅ/ᐅᖃᓗᕋᐅᔭᐅᓕᐅᑎᑎᑦᑎᓂᖅ − ᕖᕝᕗᐊᓕ 3ᒥ 21ᒧᑦ, 2020 − ᓵᓚᔅᓴᖅᑐᖅ ᓇᓗᓇᐃᖅᑕᐅᓛᖅᑐᖅ ᕖᕝᕗᐊᓕ 28ᖑᓕᖅᑲᑦ.

ᐱᖃᑕᐅᔪᑦ ᑐᓂᓯᖃᑦᑕᖁᔭᐅᓂᐊᖅᑐᑦ ᓇᐃᓈᕐᓯᒪᔪᓂᑦ ᐃᙱᐅᓯᕐᓂᑦ ᐅᖃᓗᕋᐅᔭᐅᑎᓂᓪᓘᓐᓃᑦ (50ᓂᑦ ᐅᖃᐅᓯᖅᑕᓕᓐᓂᑦ ᑐᖔᓂᓘᓐᓃᑦ) ᑲᑐᔾᔨᖃᑎᒌᒃᑯᑦ ᑭᒃᑯᑐᐃᓇᕐᓄᑦ ᑐᓴᐅᒪᖃᑦᑕᐅᑎᕕᒋᕙᑦᑕᖏᑎᒍᑦ  (Facebook, Twitter, Instagram) ᐊᑐᕐᓗᑎᒃ ᓇᓗᓇᐃᒃᑯᑕᕐᒥᒃ ᐆᒥᖓ #QIAinuk20. ᓵᓚᔅᓴᖅᑐᑦ ᓵᓚᖃᕋᔭᖅᑐᑦ $400ᓂᑦ, ᑐᖏᓕᐊ $300ᓂᑦ, ᐊᒻᒪᓗ ᐱᖓᔪᐊᑦ $200ᓂᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᓯᐅᕋHᐃ,

ᐊᖏᔪᖅᑳᖅ ᑐᓴᐅᒪᖃᑦᑕᐅᑎᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

(867) 975.8413

ᐅᕝᕙᓘᓐᓃᑦ 1.800.667.2742