ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐱᓇᓱᐊᕈᑎᖏᑦ ᐃᑲᔫᑎᒋᓪᓗᒋᑦ ᓂᕿᑖᕈᑎᔅᓴᓂᑦ ᓄᕙᕐᔪᐊᓇᖅᑐᖅᑕᖃᕐᓂᖓᓂ ᐊᑑᑎᕕᐅᓯᒪᒧᓄᑦ ᓄᓇᓕᓐᓄᑦ ᑲᔪᓯᔪᖅ ᓄᑖᓂᑦ ᓂᕿᓂᑦ ᑲᑎᑕᐅᓯᒪᔪᓂᑦ ᐊᒻᒪᓗ ᓂᐅᕕᐅᑎᔅᓴᓂᑦ ᐃᑲᔫᑎᓄᑦ ᑭᙵᕐᒥᐅᓄᑦ. ᕿᑭᖅᑕᓂ ᓄᓇᓖᑦ ᐃᓄᐃᑦ ᑭᙵᕐᒥᐅᑦ ᑖᒃᑯᓂᖓ ᐃᑲᔫᓯᐊᖅᑖᕈᓐᓇᖅᑐᑦ.

“ᓄᕙᕐᔪᐊᓇᖅᑐᖅᑕᖃᕐᓂᖓ ᓄᓇᕐᔪᐊᓕᒫᒥ ᕿᑭᖅᑕᓂ ᓄᓇᓕᐅᔪᓂᑦ ᐱᔭᕆᐊᑦᑐᓯᑎᑦᑎᓯᒪᒻᒪᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓᑦ ᐸᐅᓗᓯ ᐊᕿᐊᕈᖅ, “ᕿᑭᖅᑕᓂᒃᑯᑦ ᖁᔭᓕᔪᑦ ᒐᕙᒪᑐᖃᒃᑯᑦ ᓱᓕ ᐃᑲᔪᐃᓐᓇᓕᒫᕐᖓᑕ ᓄᓇᓕᐅᔪᓂᑦ ᐊᑑᑎᕕᐅᔪᓂᑦ ᓄᕙᕐᔪᐊᓇᖅᑐᒧᑦ, ᐊᒻᒪᓗ ᐅᑭᐅᖅᑕᖅᑐᒥ ᐃᓚᒌᔅᓴᒃᑯᑦ ᑲᔪᓯᔪᒥᒃ ᐃᑲᔫᑎᓄᑦ ᐊᖅᑯᑕᐅᖃᑦᑕᕐᖓᑕ ᐃᓚᒋᔭᐅᓪᓗᑎᒃ ᕿᑭᖅᑕᓂᒃᑯᓐᓄᑦ ᐊᑑᑎᕕᐅᔪᓄᑦ ᕿᑭᖅᑕᓂ ᓄᓇᓕᐅᔪᓄᑦ ᐃᓄᓐᓄᑦ.”

ᑖᒃᑯᐊ ᑮᓇᐅᔭᑦ ᐊᑐᐃᓐᓇᕈᖅᑎᑕᐅᓯᒪᔪᑦ ᕿᑭᖅᑕᓂᒃᑯᓐᓄᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇᖃᖅᑐᑐᖃᐃᑦ ᓄᓇᓕᖏᓐᓄᑦ ᐃᑲᔫᑎᑎᒍᑦ ᑮᓇᐅᔭᓂᑦ. ᑐᓂᐅᖅᑲᖅᑕᐅᓂᖏᑦ ᑖᒃᑯᐊ ᑮᓇᐅᔭᐃᑦ ᐃᑲᔫᑕᐅᕗᑦ ᐃᒫᒃ ᐋᖅᑭᓯᒪᓪᓗᑎᒃ ᓂᐅᕕᐅᑎᔅᓴᐅᓪᓗᑎᒃ ᐊᒻᒪᓗ ᓂᖀᑦ ᑲᑎᑕᐅᓯᒪᓪᓗᑎᒃ, ᑲᑐᔾᔨᖃᑎᖃᖅᑐᑎᒃ ᐅᑭᐅᖅᑕᖅᑐᒥ ᐃᓚᒌᔅᓴᒃᑯᑦ ᑯᐊᐸᒃᑯᖏᓐᓂᒃ.

ᐃᒫᒃ ᑕᕝᕙ ᐋᖅᑭᓯᒪᖃᑦᑕᖅᑐᑦ:

• ᐱᒋᐊᕐᓗᑎᒃ ᒪᐃ 24, ᕿᑭᖅᑕᓂᒃᑯᑦ ᐊᒻᒪᓗ ᐅᑭᐅᖅᑕᖅᑐᒥ ᑯᐊᐸᒃᑯᑦ ᑐᓂᓯᐅᖅᑲᐃᖃᑦᑕᓂᐊᖅᑐᑦ $250ᓂᑦ ᓂᕿᓂᑦ ᓂᐅᕕᐅᑎᔅᓴᓂᑦ ᐊᑐᓂᑦ ᐃᓄᓐᓄᑦ ᐃᓪᓗᒥᐅᖃᑎᒌᓄᑦ ᑭᙵᕐᓂᑦ.
• ᐱᓇᓱᐊᕈᓯᖓᓂ ᒪᐃ 31, ᕿᑭᖅᑕᓂᒃᑯᑦ ᐊᒻᒪᓗ ᐅᑭᐅᖅᑕᖅᑐᒥ ᑯᐊᐸᒃᑯᑦ ᐸᔪᑦᑎᕆᖃᑦᑕᓂᐊᖅᑐᑦ ᓂᕿᓂᑦ ᑲᑎᑕᐅᓯᒪᔪᓂᑦ ᐊᒻᒪᓗ $250ᓂᑦ ᓂᐅᕕᐅᑎᔅᓴᓂᑦ ᐊᖏᕐᕋᕆᔭᐅᔪᓄᑦ ᕿᑭᖅᑕᓂ ᓄᓇᓕᐅᔪᓄᑦ ᐃᓄᓐᓄᑦ.
• ᐱᓇᓱᐊᕈᓯᖓᓂ ᔫᓂ 28, ᐃᓚᒌᔅᓴᒃᑯᑦ ᕿᑭᖅᑕᓂᒃᑯᓪᓗ ᐸᔪᑦᑎᕆᓛᖅᑐᑦ ᓂᕿᓂᑦ ᑲᑎᑕᐅᓯᒪᔪᓂᑦ ᐊᒻᒪᓗ $250ᓂᑦ ᓂᐅᕕᐅᑎᔅᓴᓂᑦ ᐊᖏᕐᕋᕆᔭᐅᔪᓄᑦ ᕿᑭᖅᑕᓂ ᓄᓇᓕᐅᔪᓄᑦ ᐃᓄᓐᓄᑦ.

ᐃᓄᐃᑦ ᐊᑕᐅᑦᑎᒥ ᐃᓪᓗᒥᐅᖃᑎᒌᑦ ᐃᓚᒌᒐᓴᐃᑦ ᐅᖄᓚᖃᑦᑕᖁᔭᐅᕗᑦ ᕿᑭᖅᑕᓂᒃᑯᑦ ᑐᓴᐅᒪᑎᑦᑎᔨᖓᓐᓄᑦ ᑐᑭᓯᒋᐊᖃᑦᑕᕐᓗᑎᒃ ᐃᑲᔫᑎᔅᓴᑲᓐᓃᑦ ᒥᔅᓵᓄᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ ᑖᒃᑯᐊ ᐃᑲᔫᑏᑦ ᒥᔅᓵᓄᑦ, ᑎᑎᕋᕈᓐᓇᖅᑐᓯ ᖃᕋᓴᐅᔭᒃᑯᑦ: COVID-19@qia.ca ᐅᖄᓚᓗᑎᓪᓘᓐᓃᑦ: 1-867-975-8383.

ᐊᑏ ᖃᐅᔨᒋᐊᖃᑦᑕᕆᔅᓯ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓄᑦ ᐅᕗᖓ qia.ca ᑐᑭᓯᒋᐊᒃᑲᓂᕐᓗᓯ ᐊᒻᒪᓗ ᖃᐅᑕᒫᑦ ᑐᑭᓯᑎᑦᑎᒋᐊᕈᑕᐅᕙᑦᑐᓂᑦ.

ᒫᓐᓇᓕᓴᐅᓂᕐᓴᓂᑦ ᑐᓴᕋᔅᓴᓂᑦ ᑐᓴᖃᑦᑕᕈᓐᓇᕐᒥᔪᓯ ᑐᑭᓯᑎᑦᑎᒋᐊᕈᑕᐅᓯᒪᔪᓂᓪᓗ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖏᓐᓂ ᐅᑯᓇᓂ Facebook, Twitter ᐊᒻᒪᓗ Instagram.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ ᑖᓐᓇ:
ᐅᐃᓪ Hᐊᑉᑭᓐᔅ, ᑭᖑᕝᕕᐅᑎᓯᒪᑲᐃᓐᓇᖅᑐᖅ ᑐᑭᒧᐊᒃᑎᑦᑎᔨᖓᓐᓄᑦ ᑐᓴᐅᒪᖃᑦᑕᐅᑎᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 or
1.800.667.2742