ᐃᖃᓗᐃᑦ, ᓄᓇᕗᑦ – ᔮᓐᓄᐊᕆ 5, 2022 –ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᒫᓐᓇᐅᔪᖅ ᐸᕐᓇᐸᓪᓕᐊᔪᑦ ᓄᕙᒡᔪᐊᕐᓇᖅ−19 ᐊᐃᑦᑑᑖᓘᖃᑦᑕᑎᓪᓗᒍ ᐃᑲᔪᖅᑐᐃᓂᐊᕋᒥᒃ ᑕᒪᐃᓐᓄᑦ ᐊᑦᑐᖅᑕᐅᓯᒪᔪᓄᑦ ᓄᓇᓕᖕᓄᑦ.

“ᐊᐃᑦᑑᑖᓘᖃᑦᑕᓕᕐᓂᖓ ᓄᕙᒡᔪᐊᕐᓇᖅ−19 ᐊᑐᖅᑕᐅᓚᐅᖅᓯᒪᙱᒻᒪᑦ ᐊᕕᑦᑐᖅᓯᒪᔪᖁᑎᑦᑎᓐᓂ,” ᐅᖃᖅᑐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓᑦ ᐅᓛᔪᖅ ᐊᑭᓱᒃ. “ᑕᒪᓐᓇ ᐊᒃᓲᓗᐊᖅᑐᐊᓗᒃ ᐊᒃᓱᕈᕐᓇᓕᖅᑎᑦᑎᓯᒪᕗᖅ ᑭᒃᑯᓕᒫᓂᑦ, ᐊᒻᒪᓗ ᓂᕆᐅᑉᐳᒍᑦ ᐱᔭᐅᔭᕆᐊᖃᓪᓚᕆᑦᑐᓂᑦ ᐃᑲᔪᖅᑐᐃᔾᔪᑎᒃᓴᓂᑦ ᑲᒪᒋᔭᖃᕐᓂᐊᕋᑦᑕ ᒫᓐᓇᒫᕈᓗᒃ ᐊᕕᑦᑐᖅᓯᒪᔪᖁᑎᑦᑎᓐᓄᑦ.”

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᐊᕐᓂᑦ ᐊᐅᓚᑦᑎᓕᕇᖅᑐᑦ ᐃᑲᔪᖅᑐᑎᑦ ᓂᕿᖃᑦᑎᐊᕐᓂᐊᕐᒪᑕ ᓄᓇᓕᐅᔪᑦ ᐸᖕᓂᖅᑑᖅ, ᓴᓂᕋᔭᒃ, ᕿᑭᖅᑕᕐᔪᐊᖅ, ᐊᒻᒪᓗ ᐃᒡᓗᓕᒃ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕆᐅᑦᑐᑦ ᓄᓇᓕᐅᔪᑦ ᓇᓕᐊᑐᐃᓐᓇᑦ ᓯᓚᑖᓃᑦᑐᑦ ᐃᖃᓗᐃᑦ ᐊᐃᑦᑐᐃᔪᖃᖃᑦᑕᖅᑐᑦ ᓄᕙᒡᔪᐊᕐᓇᖅ−19−ᒥᒃ ᐃᑲᔪᖅᑐᖅᑕᐅᓂᐊᕐᒪᑕ ᐅᑯᓂᖓ ᓂᕿᓂᑦ ᐊᔾᔨᒌᙱᑦᑐᓂᑦ ᑲᑎᖅᓱᖅᓯᒪᔪᓂᑦ, ᓂᕿᑖᕈᓐᓇᐅᑎᓂᑦ ᐅᕝᕙᓘᓐᓃᑦ ᑕᒪᒃᑮᓐᓂᒃ. ᑕᒪᒃᑯᐊ ᐃᑲᔪᖅᑐᐃᔾᔪᑎᒃᓴᑦ ᑲᒪᒋᔭᐅᓂᐊᖅᐳᑦ ᐱᓕᕆᖃᑎᖃᕐᓗᑕ ᐅᑭᐅᖅᑕᖅᑐᒥ ᑯᐊᐸᒃᑯᑦ ᑎᒥᖏᖕᓂᑦ.

ᐃᖃᓗᓐᓂ, ᓂᕿᑖᕈᓐᓇᐅᑏᑦ ᐅᑭᐅᖅᑕᖅᑐᒥ ᑯᐊᐸᒃᑯᑦ ᑎᒥᖓᓂᒃ ᐊᒻᒪᓗ ᓄᐊᑦᒫᑦ ᓂᐅᕕᕐᕕᒻᒥ ᑐᓂᐅᖅᑲᖅᑕᐅᒐᔭᖅᑐᑦ ᐃᓄᖕᓄᑦ ᐊᑐᓂ.

ᓇᓗᓇᐃᔭᑦᑎᐊᖅᓯᒪᓂᖏᑦ ᑕᒪᒃᑯᐊ ᓄᕙᒡᔪᐊᕐᓇᖅ−19 ᐊᐃᑦᑑᑖᓘᖃᑦᑕᑎᓪᓗᒍ ᐃᑲᔪᖅᑐᐃᔾᔪᑎᒃᓴᑦ ᐅᖃᐅᑕᐅᖃᑦᑕᓂᐊᖅᐳᑦ ᒪᓕᓪᓗᒋᑦ ᐊᑐᐃᓐᓇᐅᒪᓕᕐᓂᖏᑦ ᐊᑐᓂ ᓄᓇᓕᐅᔪᓂ. ᑕᑯᓂᐊᖃᑦᑕᕆᔅᓯ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᖃᕋᓴᐅᔭᒃᑯᑦ ᐃᓅᖃᑎᒌᒍᑎᖓᑎᒍᑦ, ᐃᑭᐊᖅᑭᕕᖓᑎᒍᑦ, ᐅᕝᕙᓘᓐᓃᑦ ᓈᓚᓪᓗᓯ ᓄᓇᓕᐅᔪᑦ ᓈᓚᐅᑎᖃᕐᕕᔅᓯᖕᓂᑦ ᐅᖃᐅᓯᐅᒃᑲᓐᓂᕋᔭᕐᓂᖏᑦᑕ ᒥᒃᓵᓅᖓᔪᓂᑦ.

ᑮᓇᐅᔭᖃᖅᑎᑕᐅᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᓄᕙᒡᔪᐊᕐᓇᖅ−19 ᐊᐃᑦᑑᑖᓘᖃᑦᑕᓕᖅᑎᓪᓗᒍ ᖃᓄᐃᓕᐅᕈᑎᖃᕆᐊᕐᓂᕐᒧᑦ ᐸᕐᓇᐅᑎᖓ ᑕᐃᑲᙶᖅᑐᑦ ᓄᓇᖃᖅᑳᖅᓯᒪᔪᑦ ᓄᓇᓖᑦ ᐃᑲᔪᖅᑐᖅᑕᐅᓂᖏᖕᓄᑦ ᑮᓇᐅᔭᖃᕐᕕᖓᓂ ᑐᓴᖅᑎᑕᐅᕋᑖᓚᐅᖅᓯᒪᔪᖅ ᒐᕙᒪᑐᖃᒃᑯᓐᓄᑦ ᐊᑐᐃᓐᓇᐅᒪᓂᖏᖕᓂᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒃᑲᕐᓗᒍ:

ᕕᐅᓪ ᕼᐊᑉᑭᓐᔅ, ᑐᑭᒧᐊᑦᑎᑦᑎᔨᐅᑲᐃᓐᓇᖅᑐᖅ ᑐᓴᐅᒪᖃᑦᑕᐅᑎᔪᓕᕆᔨᒃᑯᓐᓂ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
whopkins@qia.ca
867.975.8413 ᐅᕝᕙᓘᓐᓃᑦ
1.800.667.2742