ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᒫᓐᓇ ᑐᓂᓯᔭᐅᖃᑦᑕᕈᓐᓇᓯᒻᒥᔪᑦ ᑐᔅᓯᕋᐅᑎᓂᑦ 2018-2019ᒥ ᓯᓚᑦᑐᓴᕐᕕᒻᒥ ᐃᓕᓐᓂᐊᓂᕐᒧᑦ ᐃᓕᓐᓂᐊᕈᓯᐊᔅᓴᓄᑦ. ᑕᒫᓂ ᐊᕐᕌᒍᒥ ᑕᕝᕙᓂᔅᓴᐃᓐᓈᖅᑐᓂᑦ ᐊᑐᕋᔅᓴᐅᑎᐊᖅᑐᓂᑦ ᖃᕋᓴᐅᔭᒃᑯᑦ ᑐᔅᓯᕋᐅᑎᓂᑦ ᑎᑎᕋᕐᕕᔅᓴᓂᑦ ᐃᓘᓐᓇᖏᓐᓂᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖁᑎᒋᕙᑦᑕᑎᓐᓂᒃ.

ᐊᕐᕌᓂ, ᑲᑐᔾᔨᖃᑎᒌᒃᑯᑦ ᓴᖅᑭᑎᑦᑎᔪᒻᒪᑕ $200,000ᓂᑦ ᓄᑖᓂᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓂᑦ ᐃᓚᓕᐅᑎᓪᓗᑎᒃ ᒫᓐᓇ $5,000ᓄᑦ/ᐊᕐᕌᒍᑕᒫᑦ ᔮᓐ ᐊᒪᕈᐊᓕᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖁᑎᒋᕙᑦᑕᖏᓐᓄᑦ.

80 ᑲᑐᔾᔨᖃᑎᒌᖏᓐᓂ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ $2,500/ᐊᕐᕌᒍᒫᑦ, ᑐᓂᔭᐅᕙᒻᒪᑕ ᓯᕗᓪᓕᕐᐹᑐᐃᓐᓇᕐᓄᑦ−ᑐᔅᓯᕋᐅᓯᐅᕐᐸᑦᑐᓄᑦ ᐃᓕᓐᓂᐊᖅᑎᓄᑦ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᓄᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᙳᓱᑦᑐᓄᑦ.

$5,000 ᔮᓐ ᐊᒪᕈᐊᓕᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ ᐅᐱᒍᓲᑕᐅᕙᒻᒪᑕ ᐱᓇᓱᐊᕈᑎᒋᓯᒪᔭᖏᓐᓂᒃ ᔮᓐ ᐊᒪᕈᐅᓕᐅᑉ ᐃᓅᓯᖃᑦᑎᐊᖁᓪᓗᒋᑦ ᐃᓄᐃᑦ ᓄᓇᕗᒻᒥᐅᑕᐃᑦ. ᑲᑐᔾᔨᖃᑎᒌᖏᑦ ᓯᕗᓪᓕᐸᐅᑦᑎᐅᔾᔨᖃᑦᑕᓂᐊᖅᑐᑦ ᑐᔅᓯᕋᐅᑎᓂᑦ ᓯᓚᑦᑐᕐᓴᕕᒻᒥ ᐃᓕᓐᓂᐊᖅᑎᐅᓂᐊᖅᑐᓄᑦ ᐊᑐᖅᑎᑦᑎᒋᐊᒃᑲᓐᓂᕈᑕᐅᓂᐊᖅᑐᓄᑦ ᐃᓄᐃᑦ ᐅᖃᐅᓯᖓᓐᓂᒃ ᐃᓕᖅᑯᓯᖓᓐᓂᓪᓗ.

ᐊᑐᕐᓗᒍ ᖃᕋᓴᐅᔭᒃᑯᑦ ᑲᑐᔾᔨᖃᑎᒌᒃᑯᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓄᑦ ᑐᔅᓯᕋᐅᓯᐅᕈᑎᑖᖅᑲᐅᒃ, ᐃᓕᓐᓂᐊᖅᑏᑦ ᑐᔅᓯᕋᐅᓯᐅᖃᑦᑕᕈᓐᓇᖅᑐᑦ ᓇᓪᓕᐊᓐᓄᑐᐃᓐᓇᖅ ᐅᕝᕙᓘᓐᓃᑦ ᑕᒪᒃᑮᓐᓄᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓂᑦ. ᖃᐅᔨᒪᑦᑎᐊᓂᐊᖅᑯᓯ, ᑐᓂᓯᓂᐊᕈᔅᓯ ᑐᔅᓯᕋᐅᒻᒥᑦ ᐃᓘᓐᓇᑎᒃ ᐱᖃᓯᐅᑎᓯᒪᔭᕆᐊᓖᑦ ᐃᑲᔫᑎᓖᑦ ᑎᑎᖅᑲᐃᑦ ᐱᖃᓯᐅᔾᔭᐅᒋᐊᖃᕋᔭᕐᒥᒻᒪᑕ.

“ᐅᐱᒍᓱᑉᐳᖓ ᑲᑐᔾᔨᖃᑎᒌᖏᑕ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖁᑎᖏᓐᓂᒃ,” ᐅᖃᖅᑐᖅ ᑲᑐᔾᔨᖃᑎᒌᒃᑯᑦ ᐊᖓᔪᖅᑳᖓᑦ ᐸᐅᓗᓯ ᐊᕿᐊᕈᖅ, “ᑖᒃᑯᐊ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ ᐱᕈᕐᐸᓪᓕᐊᑎᑦᑎᒍᑕᐅᒻᒪᑕ ᓯᕗᓂᔅᓴᑎᓐᓂ ᐃᓄᓐᓄᑦ ᐱᔾᔪᑎᒋᓪᓗᒍ ᐃᓅᓱᑦᑐᓂᑦ ᐱᓕᕆᔪᓐᓇᕐᓯᑎᑦᑎᔾᔪᑎᖃᖃᑦᑕᕐᖓᑕ ᐊᑐᕆᐊᖃᖃᑦᑕᓂᐊᖅᑕᖏᓐᓂᒃ ᒪᑭᑕᑦᑎᐊᕈᑎᒋᓂᐊᖅᑐᒋᑦ ᓯᕗᓂᔅᓴᑎᓐᓂ.”

ᒪᑐᕕᔅᓴᓕᒃ ᑐᔅᓯᕋᐅᓯᐅᕐᓂᕐᒧᑦ ᑕᓪᓕᒥᕐᒥ, ᐋᒡᒋᓯ 17, 2018.

ᒪᓕᑦᑕᐅᖃᑦᑕᕆᐊᓖᑦ ᐃᓘᓐᓇᖏᓐᓄᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖅᑖᕋᓲᑎᓄᑦ:

• ᑐᔅᓯᕋᖅᑐᑦ ᐊᑐᖅᑐᒥᒃ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ ᐃᓚᒋᔭᐅᔾᔪᑎᖃᕆᐊᓖᑦ ᐊᒻᒪᓗ ᐃᓅᓗᑎᒃ ᓄᓇᕗᑦ ᐊᖏᖃᑎᒌᒍᑎᖏᑦ ᒪᓕᓪᓗᒋᑦ ᕿᑭᖅᑕᓂ ᓄᓇᓕᓐᓂᑦ ᓄᓇᖃᕐᓗᑎᒃ
• ᐃᓕᓐᓂᐊᖅᑏᑦ ᓄᓇᖃᓪᓚᑦᑖᕆᐊᓖᑦ ᓇᓕᑐᐃᓐᓇᖏᓐᓂ 13ᓂᑦ ᕿᑭᖅᑕᓂ ᓄᓇᓕᖏᓐᓂ − ᐊᖏᓚᐅᖃᑦᑕᕋᓗᐊᕐᒥᔪᑦ ᐃᓕᓐᓂᐊᖅᑎᓂᑦ ᐊᓯᖏᓐᓂᑦ ᓄᓇᓕᓐᓂᑦ ᐊᑎᓕᐅᖅᑕᐅᓯᒪᑎᓪᓗᒋᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑎᐅᓂᖏᓐᓂ
• ᐃᓕᓐᓂᐊᖅᑏᑦ ᑐᓂᓯᖃᑦᑕᕆᐊᓖᑦ ᖃᐅᔨᒪᔭᐅᔾᔪᑎᒋᓂᐊᖅᑕᖓᓂᒃ ᐊᑎᓕᐅᖅᑕᐅᓯᒪᓂᖓᓂᒃ ᐃᓕᓐᓂᐊᖅᑎᐅᖃᑕᐅᓂᐊᕐᓂᖓᓂᒃ ᓯᓚᑦᑐᓴᕐᕕᒻᒥ
• ᐃᖅᑲᓇᐃᔭᖅᑐᕐᓯᐅᑎᕕᑦ ᓈᓴᐅᑖ

ᒪᓕᑦᑕᐅᖃᑦᑕᕆᐊᓖᑦ ᐃᓚᒃᑲᓐᓂᖏᑦ ᔮᓐ ᐊᒪᕈᐊᓕᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓅᖓᔪᑦ:

• ᐃᓕᓐᓂᐊᖅᑏᑦ ᐊᑎᓕᐅᖅᑕᐅᓯᒪᔭᕆᐊᓖᑦ ᓯᓚᑦᑐᓴᕐᕕᒻᒥ, ᐃᓕᓐᓂᐊᕐᓂᐅᓴᓗᑎᓪᓗ ᐊᑐᖅᑎᑦᑎᒋᐊᒃᑲᓐᓂᕈᑕᐅᓂᐊᖅᑐᒥᒃ ᐃᓄᑦᑎᑐᑦ ᐅᖃᐅᓯᕐᒥᒃ ᐃᓕᖅᑯᓯᕐᒥᓪᓗ ᓯᑎᐱᕆᒥ ᔮᓐᓄᐊᓕᒥᓗ ᐃᓕᓐᓂᐊᕐᓇᐅᓛᖅᑑᓐᓂᒃ
• 500ᓂᑦ−ᐅᖃᐅᓯᖅᑕᓕᒻᒥᒃ ᑎᑎᕋᕐᓯᒪᓗᓂ ᐱᔾᔪᑎᖃᕐᓗᓂ ᖃᓄᖅ ᑲᔪᓯᑎᒍᒪᒐᔭᙳᐊᖅᑕᑎᑦ ᐱᓇᓱᐊᕈᑎᒋᒍᒪᓕᓚᐅᕐᒪᖔᕐᐱᒋᑦ ᔮᓐ ᐊᒪᕈᐊᓕᒃ ᐊᒻᒪᓗ ᓄᓇᕗᑦ ᐊᖏᖃᑎᒌᒍᑎᖏᑦ ᐱᔾᔪᑎᒋᓪᓗᒋᒃ
• ᒫᓐᓇᓕᓴᕐᒥᒃ ᐱᔪᒐᕐᓴᐅᑎᓐᓂᒃ
• ᓇᓕᖅᑲᖏᓐᓂᒃ ᒫᓐᓇᓕᓴᕐᓂᑦ ᐃᓕᓐᓂᐊᕈᑎᒥᓂᕐᐱᑦ ᓇᓕᖅᑲᖏᓐᓂᒃ
• ᒪᕐᕉᓐᓂᒃ ᑐᑭᓯᑎᑦᑎᒋᐊᕈᑏᓐᓂᒃ ᑎᑎᖅᑳᓐᓂᒃ ᐃᕝᕕᑦ ᐃᓕᓴᐃᔨᒥᓂᖓᓂᒃ, ᓯᓚᑦᑐᓴᕐᕕᒻᒥ ᐃᓕᓴᐃᔨᖓᓂᒃ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᒥᓂᕐᓂᑦ ᐃᓕᓐᓂᒃ ᖃᐅᔨᒪᑦᑎᐊᖅᑐᒥᒃ

ᐃᓕᓐᓂᐊᖅᑏᑦ ᐋᖅᑭᐅᒪᑎᑦᑎᑦᑎᐊᕆᐊᓖᑦ ᐃᓘᓐᓇᖏᓐᓂᒃ ᐃᓕᓐᓂᐊᕈᑎᖏᓐᓂᒃ ᐊᒻᒪᓗ ᖄᖐᓯᒪᓗᑎᒃ ᖁᕝᕙᓯᓐᓂᖏᓐᓂᒃ ᐊᑐᖅᑕᐅᒐᔪᑉᐸᑦᑐᓂᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᖅᑖᕈᓐᓇᕈᒪᓂᐊᖅᑲᑕ.

ᖃᕋᓴᐅᔭᒃᑯᑦ ᑐᔅᓯᕋᐅᓯᐅᕈᑦ ᑕᑯᔭᐅᔪᓐᓇᖅᑐᖅ ᐅᓇ ᑐᕌᕈᑎᖓ ᐊᑐᕐᓗᒍ:  https://www.qia.ca//iu/ᑐᔅᓯᕋᐅᑏᑦ-ᐃᓕᓐᓂᐊᓂᕐᒧᑦ-ᐃᑲᔫᓯᐊᔅ

ᐃᓕᓐᓂᐊᖅᑏᑦ ᐃᑲᔪᖅᑕᐅᔭᕆᐊᖃᖅᑲᑕ ᐱᔭᕇᕐᓯᓂᕐᒥᒃ ᑲᑐᔾᔨᖃᑎᒌᒃᑯᓐᓂ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓄᑦ ᑐᔅᓯᕋᐅᑎᓂᑦ, ᐅᖃᕐᕕᖃᕈᓐᓇᖅᑐᑦ ᑲᑐᔾᔨᖃᑎᒌᒃᑯᑦ ᓄᓇᓕᓐᓂᑦ ᑐᓴᐅᒪᑎᑦᑎᔨᖏᓐᓂᒃ.

ᑐᑭᓯᒋᐊᕈᒪᒍᔅᓯ ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ,
ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
867.975.8413 or 1.800.667.2742
szerehi@qia.ca