ᕖᕝᕗᐊᓕ 27, 2025 – ᐃᖃᓗᐃᑦ, ᓄᓇᕗᑦ – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA), ᑲᑐᔾᔨᖃᑎᖃᖅᑐᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᒻᒪᓗ ᐱᐅ ᐃᑲᔫᑎᔅᓴᓂᑦ ᐸᐸᑦᑎᔩᑦ, ᐊᑎᓕᐅᖅᑐᑦ ᓯᓈ ᐊᖏᖃᑎᒌᒍᑎᓂᑦ ᐅᓪᓗᒥ. ᑖᒃᑯᐊ ᓇᓗᓇᐃᒃᑯᑕᐅᕗᑦ ᐊᖏᖃᑎᒌᒍᑏᑦ ᐋᖅᑮᒻᒪᑕ ᑲᒪᒋᔭᐅᕙᓪᓕᐊᓂᐊᖅᑐᓂᒃ ᐋᖅᑭᔅᓱᐃᓂᕐᒧᑦ ᓄᑖᓂᒃ ᐊᒻᒪᓗ ᐋᖅᑭᒋᐊᖅᑕᐅᓯᒪᔪᓂᑦ ᐊᕙᑎᒥᒃ ᓴᐳᔾᔨᒍᑎᔅᓴᐃᑦ ᐊᒻᒪᓗ ᐃᓄᓐᓄᑦ ᐊᐅᓚᑕᐅᓂᐊᖅᑐᓂ ᐊᖏᓂᓕᒃ ᐅᖓᑖᓂ 795,253 km² ᕿᑭᖅᑕᓂ ᓄᓇᖓ ᐃᒪᕕᖓᓗ. ᑐᙵᕕᓕᐅᕈᑕᐅᕗᖅ ᕿᑭᖅᑕᓂᒃᑯᑦ ᐃᓱᒪᒋᓯᒪᔭᖏᓐᓄᑦ ᑕᒫᓂ ᕿᑭᖅᑕᓂ ᓴᐳᔾᔨᕕᖃᕐᓂᕐᒧᑦ.
ᓯᓈ ᐊᖏᖃᑎᒌᒍᑎᑎᒍᑦ, ᑲᓇᑕ ᐃᑲᔫᑎᖃᕐᓂᐊᖅᑐᑦ $200 ᒥᓕᐊᓐᓂᑦ ᒪᑯᓄᖓ ᑐᕌᖓᔪᓂᑦ ᓴᐳᔾᔨᕕᒃ, ᐃᓄᓐᓄᑦ ᐃᖅᑲᓇᐃᔮᔅᓴᓂᑦ, ᐊᒻᒪᓗ ᐃᓄᓐᓄᑦ−ᑐᑭᒧᐊᑦᑎᑕᐅᔪᓂᑦ ᐊᐅᓚᑦᑎᒍᑕᐅᓂᐊᖅᑐᓂᑦ ᑕᒫᓂ ᕿᑭᖅᑕᓂ ᐊᖏᖃᑎᒌᒍᑏᑦ ᐊᑐᓯᑉᐸᑕ. ᐊᒻᒪᓗᑦᑕᐅᖅ, ᐊᔪᕐᓴᖏᑦᑐᑦ ᐃᑲᔪᖅᑏᑦ, ᓯᕗᓕᕐᓯᓪᓗᑎᒃ ᑖᒃᑯᐊ Enduring Earth ᐱᓕᕆᖃᑎᒌᑦ ᐊᒻᒪᓗ ᐱᐅ ᐃᑲᔫᑎᔅᓴᓂᑦ ᐸᐸᑦᑎᔩᑦ, ᐃᑲᔫᑎᖃᕐᓂᐊᖅᑐᑦ $70 ᒥᓕᐊᓐᓂᑦ. ᑲᑎᑕᐅᑎᓪᓗᒋᑦ $118 ᒥᓕᐊᓐᑲᓂᕐᓂᒃ ᐃᓚᖃᕐᓗᑎᒃ ᐊᑭᓕᕐᓱᐃᒍᑕᐅᓂᐊᖅᑐᑦ ᐱᕈᕐᐸᓪᓕᐊᑎᑦᑎᒍᑎᖃᕐᓗᑎᒃ ᖁᓕᐅᓂᐊᖅᑐᓂᑦ (10) ᐊᕐᕌᒍᓂᑦ, ᑖᒃᑯᐊ ᑮᓇᐅᔭᐃᑦ ᐃᑲᔫᑎᖃᕈᒫᕐᓂᐊᖅᑐᑦ ᑕᒫᓂ ᖃᓂᒋᔭᖓᓃᑦᑐᓄᑦ 50ᓄᑦ ᓄᑖᓄᑦ ᐃᖅᑲᓇᐃᔮᔅᓴᓄᑦ ᐊᒻᒪᓗ ᓴᓇᔭᐅᓂᕆᓛᖅᑕᖏᓐᓄᑦ ᑎᓴᒪᓂᖑᓐᓃᑦ ᓄᑖᓂᑦ ᓇᐅᑦᑎᕐᓱᖅᑎᓄᑦ ᑐᖅᑲᑕᕐᕕᔅᓴᓂᑦ.
ᐊᑕᐅᑦᑎᒃᑯᑦ ᓯᓈ ᐊᖏᖃᑎᒌᒍᑎᓄᑦ, ᕿᑭᖅᑕᓂᒃᑯᑦ ᐃᖅᑲᓇᐃᔮᖃᕐᒥᔪᑦ ᐋᖅᑮᓂᐊᕐᖓᑕ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑎᓂᑦ (IIBA) ᕿᑭᖅᑕᓄᑦ ᓴᕐᕙᕐᔪᐊᒧᓪᓗ ᐊᒻᒪᓗ ᓯᕗᓪᓕᕐᐹᕐᓯᐅᑎᓂᑦ ᐊᖏᖃᑎᒌᒍᑕᐅᓪᓗᓂ. ᑖᒃᑯᐊ ᐊᖅᑯᑎᒋᓗᒋᑦ ᐊᖏᖃᑎᒌᒍᑏᑦ ᓯᕗᓪᓕᕐᐹᒥ, ᕿᑭᖅᑕᓂᒃᑯᑦ ᐃᑲᔪᖅᑎᒌᑦᑐᑎᒃ ᑲᑐᔾᔨᖃᑎᓖᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐋᖅᑮᓂᕐᒧᑦ ᒪᕐᕉᓐᓂᒃ ᐃᒪᕖᓐᓂᒃ ᓴᐳᑎᔭᐅᓯᒪᓪᓚᑦᑖᕐᓂᐊᖅᑑᓐᓂᒃ ᐊᒻᒪᓗ ᓄᓇᖓᓂ ᐃᓄᓐᓄᑦ ᓴᐳᑎᔭᐅᓯᒪᓪᓚᑦᑖᓂᐊᖅᑐᒥᒃ ᐊᒻᒪᓗ ᓴᐳᔾᔨᕕᒻᒥᒃ.
ᕿᑭᖅᑕᓂᒃᑯᑦ ᑲᔪᓯᓂᐊᖅᑐᑦ ᑲᑎᒪᖃᑎᖃᖃᑦᑕᕐᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐋᖅᑮᕙᓪᓕᐊᓗᑎᒃ ᑮᓇᐅᔭᓂᑦ ᓴᓇᔭᐅᓛᕐᖓᑦ ᐅᒥᐊᕐᓄᑦ ᑐᓚᑦᑕᕐᕕᔅᓴᖅ ᐃᒃᐱᐊᕐᔪᒻᒥ ᑲᔪᓯᑎᑦᑎᓂᕐᒧᑦ ᑲᑦᑐᖓᐃᕈᑕᐅᓯᒪᔪᒥᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᑕᓪᓗᕈᑎᐅᑉ ᐃᒪᖓᓂ ᐊᖏᖃᑎᒌᒍᑎᑎᒍᑦ IIBA. ᑖᓐᓇ ᑐᓚᑦᑕᕐᕕᒃ ᐋᖅᑭᐸᓪᓕᑎᑦᑎᓂᐊᕐᖓᑦ ᐱᓇᓱᐊᕋᔅᓴᓂᑦ ᐊᖑᓇᓱᖃᑦᑕᓂᕐᒧᑦ ᐊᒻᒪᓗ ᓯᔾᔭᕐᐸᓯᕐᒥ ᐃᖃᓗᒐᓱᖃᑦᑕᓂᕐᒥᒃ ᐃᒃᐱᐊᕐᔪᒻᒥᐅᓕᒫᓄᑦ, ᑕᒪᓐᓇ ᓂᕿᔅᓴᖃᑦᑎᐊᕈᑕᐅᒃᑲᓐᓂᖃᑦᑕᓛᕐᖓᑦ ᐊᒻᒪᓗ ᐊᑐᐃᓐᓇᖃᕐᓂᕐᓴᐅᓗᑎᒃ ᐃᓄᔅᓯᐅᑎᓂᑦ ᓂᕿᓂᑦ ᐊᒻᒪᓗ ᐱᖅᑯᓯᖅᑎᒍᑦ ᐃᓄᐃᑦ ᐊᖑᓇᓱᖃᑦᑕᕐᓗᑎᒃ ᓯᑯᓯᒪᑎᓐᓇᒍ. ᐊᑭᓕᕐᓱᐃᒍᑕᐅᓂᐊᖅᑐᖅ ᑐᓚᑦᑕᕐᕕᔅᓴᒧᑦ ᐊᑭᖃᕐᓂᐊᖅᑐᖅ $105.9 ᒥᓕᐊᓐᓂᑦ ᐊᕐᕕᓂᓕᓐᓂᑦ ᐊᑕᐅᓯᕐᒥᓪᓗ ᐊᕐᕌᒍᓂᑦ, ᐱᒋᐊᕐᓗᑎᒃ 2025ᒥ ᐊᒻᒪᓗ ᓂᕆᐅᒋᔭᐅᓪᓗᓂ ᐊᐅᓚᓂᖃᓕᓛᕆᐊᖓ 2031 ᖃᓂᒋᔭᖓᓂ.
“ᐊᑎᓕᐅᖅᑕᐅᑎᓪᓗᒋᑦ ᓯᓈ ᓯᕗᒧᐊᒍᑎᔅᓴᖃᕐᓂᐊᓕᕋᑦᑕ ᐊᒻᒪᓗ ᐱᓇᓱᐊᕋᔅᓴᖃᖅᑎᑦᑎᓂᐊᓕᕋᑦᑕ ᐃᓄᓐᓄᑦ ᑐᕌᖓᔪᓂᑦ, ᐃᓄᓐᓃᙶᖅᑐᓂᑦ. ᐃᑲᔪᖅᑎᒌᓪᓗᑕ ᐅᑯᐊ ᐃᓚᒋᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ, ᐊᔪᕐᓴᖏᑦᑐᑦ ᐃᑲᔪᖅᑏᑦ ᐊᒻᒪᓗ ᑲᑐᔾᔨᖃᑎᕗᑦ, ᓲᕐᓗ ᓄᓇᕗᑦ ᒐᕙᒪᒃᑯᖏᑦ, ᑕᑯᖅᑯᔾᔨᒐᑦᑕ ᓄᓇᖃᖅᑳᖅᑐᓄᑦ ᓯᕗᓕᕐᓯᒍᑕᐅᔪᒥᒃ ᐃᒪᓕᕆᓂᕐᒧᑦ ᓄᓇᓕᕆᓂᕐᒧᓪᓗ ᖃᓄᖅ ᑲᒪᒋᔭᐅᒋᐊᖃᕐᒪᖔᖅ.” ᐅᖃᖅᑐᖅ ᐅᓛᔪᒃ ᐊᑭᓱᒃ, ᐊᖏᔪᖅᑳᖓᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ
ᕿᑭᖅᑕᓂᒃᑯᑦ ᐃᖅᑲᓇᐃᔮᕆᓯᒪᔭᖏᑦ ᑕᒪᒃᑯᐊ ᐊᑭᓕᕐᓱᐃᒍᑕᐅᖁᓪᓗᒋᑦ ᑐᑭᒧᐊᒍᑎᓖᑦ ᕿᑭᖅᑕᓂ ᐃᓄᓐᓄᑦ ᓴᐳᑎᔾᔨᕕᓐᓄᑦ ᑭᓪᓕᓕᓐᓄᑦ ᐊᒻᒪᓗ ᓴᐳᔾᔨᕕᓐᓄᑦ ᐸᕐᓇᐅᑎᓂᑦ, ᑎᑎᕋᖅᑕᐅᓯᒪᔪᑦ ᐱᒋᐊᕈᑎᖃᕐᓯᒪᓪᓗᑎᒃ ᐃᓱᒪᒋᔭᖏᓐᓂᒃ ᐅᖃᐅᓯᖃᕐᓯᒪᓪᓗᑎᒃ ᕿᑭᖅᑕᓂ ᓄᓇᓕᓕᒫᑦ ᑕᒪᒃᑯᐊ ᐊᑐᓕᖅᑎᑕᐅᕙᓪᓕᐊᓂᐊᕐᖓᑕ ᒪᓕᑦᑐᒋᑦ ᓄᓇᓕᓐᓄᑦ ᓴᐳᔾᔨᕕᓐᓄᑦ ᐸᕐᓇᐅᑏᑦ ᐊᑐᓂᑦ ᕿᑭᖅᑕᓂ ᓄᓇᓕᓐᓄᑦ.
ᕿᑭᖅᑕᓂᒃᑯᑦ ᓱᓕ ᑲᑦᑐᖓᐃᕈᑎᖃᕐᓯᒪᔪᑦ ᓴᐳᔾᔨᒍᒪᓂᕐᒧᑦ ᓄᓇᖓᓂᒃ ᐃᒪᕕᖓᓂᓪᓗ ᕿᑭᖅᑕᓂ, ᑕᐃᒫᒃ ᐃᓄᓐᓄᑦ ᐃᖅᑲᓇᐃᔮᔅᓴᖃᖅᑎᑦᑎᓂᐊᕐᖓᑕ, ᐊᑐᕐᓗᑎᒃ ᐃᓄᓐᓄᑦ−ᑐᑭᒧᐊᑦᑎᑕᐅᔪᓂᑦ ᐊᐅᓚᑦᑎᓂᕐᒥᒃ, ᐊᒻᒪᓗ ᐊᒥᓱᕈᖅᑎᑦᑎᒋᐊᒃᑲᓂᕐᓗᑎᒃ ᐱᓇᓱᐊᕋᔅᓴᓂᑦ ᐃᑭᕐᒥ ᐃᖃᓗᒐᓱᖃᑦᑕᓂᕐᒥᒃ.
ᑐᓴᕋᔅᓴᐃᑦ ᒥᔅᓵᓄᑦ ᑐᑭᓯᒋᐊᕈᒪᔪᓄᑦ, ᑐᑭᓯᒋᐊᕐᕕᐅᖃᑦᑕᕐᓕ:
ᑭᐅᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ, ᑐᓴᐅᒪᖃᑦᑕᐅᑎᒍᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(ᐅ) 867.975.8398 ᐊᑭᖃᙱᑐᒃᑯᓘᓐᓃᑦ 1.800.667.2742
ᐱᕙᓪᓕᐊᓯᒪᓂᖓ ᑕᒪᑐᖓ:
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᓱᒪᒋᓯᒪᔭᖓ ᕿᑭᖅᑕᓂ ᓴᐳᔾᔨᕕᓕᕆᓂᕐᒧᑦ ᐃᓚᖃᕐᖓᑦ ᓈᒪᔪᓂᒃ ᐃᖅᑲᓇᐃᔭᖅᑎᖃᕐᓗᑎᒃ ᓇᐅᑦᑎᕐᓱᖅᑎᓂᑦ, ᑕᒪᑐᒧᖓ ᑐᕌᖓᔪᒥᒃ ᓴᐳᔾᔨᕕᒻᒧᑦ ᑐᖅᑲᑕᕐᕕᖃᕐᓗᑎᒃ, ᐊᒻᒪᓗ ᓄᓇᓕᓐᓂᑦ ᐊᐅᓚᑕᐅᓗᑎᒃ ᐊᑐᓂᑦ ᕿᑭᖅᑕᓂ 13ᓂᑦ ᓄᓇᓕᓐᓂᑦ, ᐃᓚᖃᕐᓗᓂ ᕿᑭᖅᑕᓂ−ᓄᓇᓕᓕᒫᓂᑦ ᐊᐅᓚᑦᑎᓂᕐᒧᑦ ᑎᒥᐅᔪᓂᑦ ᐊᒻᒪᓗ ᓴᐳᔾᔨᕕᒻᒧᑦ ᐃᖅᑲᓇᐃᔭᖅᑎᖃᕐᓗᑎᒃ, ᑕᑯᔪᓐᓇᖅᑕᓯ ᓄᕕᐱᕆ 2023ᒥ ᐊᖏᖃᑎᒌᒍᑏᑦ−ᓯᕗᓪᓕᐹᕐᓯᐅᑏᑦ ᓇᐃᓪᓕᑎᕐᓯᒪᓪᓗᑎᒃ ᑐᕌᕈᑎᖓ ᐊᑖᓃᑦᑐᖅ.
ᐅᖓᑖᓄᑦ ᓴᐳᔾᔨᕕᒻᒥᑦ ᐊᐅᓚᑦᑎᓂᐅᑉ ᓇᐅᑦᑎᕐᓱᖃᑦᑕᓂᐅᓪᓗ, ᓯᓈ ᐊᖏᖃᑎᒌᒍᑏᑦ ᖃᐅᔨᒪᒋᐊᑦᑎᐊᕈᑕᐅᓂᐊᖅᑐᑦ ᐃᓚᓕᐅᔾᔨᓯᒪᒐᓗᐊᕐᒪᖔᑕ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑕᒪᓐᓇ ᑐᑭᓯᒃᑲᓐᓂᕈᑕᐅᖃᑦᑕᓂᐊᕐᖓᑦ ᓂᕐᔪᑎᓂᑦ ᐊᒻᒪᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ ᐊᑑᑎᕕᐅᖃᑦᑕᕐᓂᖏᓐᓂᒃ, ᑖᒃᑯᐊ ᓇᐅᑦᑎᕐᓱᖅᑏᑦ ᓄᓇᓕᓐᓄᑦ ᐱᓇᓱᐊᕋᔅᓴᖃᖅᑎᑦᑎᓗᑎᒃ ᓂᕿᔅᓴᕐᓯᐅᖃᑦᑕᓂᕐᒥᒃ ᐊᒻᒪᓗ ᐃᓕᓐᓂᐊᖃᑦᑕᓂᕐᒥᒃ ᐱᖅᑯᓯᖅᑎᒍᑦ ᐃᓕᑦᑎᓯᒪᔭᖏᓐᓂᒃ.
ᐊᒻᒪᓗᑦᑕᐅᖅ, ᕿᑭᖅᑕᓂᒃᑯᑦ ᖃᐅᔨᒪᒋᐊᑦᑎᐊᔪᔪᑦ ᐱᔭᕇᕈᑎᖏᓐᓂᒃ ᒪᓕᒐᔅᓴᐅᖁᓪᓗᒍ ᓯᓈ ᐊᖏᖃᑎᒌᒍᑎᓂᑦ ᐱᖃᓯᐅᔾᔨᓯᒪᒐᓗᐊᕐᒪᖔᖅ ᕿᑭᖅᑕᓂ ᐃᖃᓗᓕᕆᓂᕐᒧᑦ ᐊᖏᖃᑎᒌᒍᑎᓂᑦ ᑖᒃᑯᓇᙵᑦ ᕿᑭᖅᑕᓂᒃᑯᓐᓂᑦ ᐊᒻᒪᓗ ᑲᓇᑕᒃᑯᓐᓂᑦ. ᑖᒃᑯᐊ ᐊᖏᖃᑎᒌᒍᑏᑦ ᐊᑐᐃᓐᓇᐅᓕᑐᐊᖅᑲᑕ ᐊᑐᓕᖅᑎᑕᐅᕙᓪᓕᐊᒍᓐᓇᕐᓯᓗᑎᒃ ᑮᓇᐅᔭᖃᖅᑎᑦᑎᒍᑕᐅᓂᐊᖅᑐᑦ ᑮᓇᐅᔭᓂᑦ ᓚᐃᓴᓄᑦ, ᐅᒥᐊᕐᔪᐊᓄᑦ, ᐊᒻᒪᓗ ᐃᖃᓗᒐᓲᑎᓄᑦ ᖃᓕᕋᓕᓐᓂᑦ ᐊᒻᒪᓗ ᑭᖑᑉᐸᓐᓂᒃ ᐃᒪᕕᒻᒥ ᖃᓂᒋᔭᖓᓂ ᕿᑭᖅᑕᓂ. ᓄᓇᕗᑦ ᐊᖏᖃᑎᒌᒍᑏᑦ ᓇᓗᓇᐃᕐᓯᓯᒪᒐᓗᐊᖅᑎᓪᓗᒋᑦ ᓄᓇᕗᑦ ᓈᒻᒪᑦᑐᓂᑦ ᐱᓇᓱᐊᕋᔅᓴᖃᖅᑎᑕᐅᓂᐊᕐᓂᖏᓐᓂᒃ, ᓄᓇᕗᑦ ᐊᑯᓂᐊᓗᒃ ᑭᒡᒐᑐᖅᑕᐅᑦᑎᐊᖃᑦᑕᕐᓯᒪᙱᒻᒪᑦ ᐃᑭᕐᒥ ᐃᖃᓗᒐᓱᖃᑦᑕᓂᕐᒥᒃ. ᑖᒃᑯᐊᓕ ᖃᓪᓗᓈᑦ ᓄᓇᖓᓐᓂ ᐊᐅᓚᑦᑎᕖᑦ ᐃᖃᓗᒐᓱᖃᑦᑕᕈᓐᓇᑎᓪᓗᒋᑦ 80%ᖏᓐᓂᑦ 90%ᖏᓐᓂᓪᓗ ᐃᑭᕐᒥ, ᓄᓇᕗᑦ ᐊᐅᓚᑦᑎᖃᑦᑕᕐᖓᑕ 52%ᒥᒃ ᑖᒃᑯᓇᙵᑦ ᐃᖃᓗᒐᓱᑦᑕᐅᖃᑦᑕᕈᓐᓇᖅᑐᓂᑦ. ᑖᒃᑯᐊ ᑮᓇᐅᔭᐃᑦ ᐃᑲᔫᑎᖃᕐᓂᐊᖅᑐᑦ ᐋᖅᑭᓯᒪᑎᑦᑎᓂᕐᒥᒃ ᑭᒡᒐᑐᖅᑕᐅᓂᕆᕙᑦᑕᖏᓐᓂᒃ, ᐊᐅᓚᓂᖃᖅᑎᑦᑎᓗᓂ ᕿᑭᖅᑕᓂ ᒪᑭᒪᓇᓱᐊᕈᑎᖃᕐᕕᒻᒥᑦ, ᐋᖅᑮᓗᑎᒃ ᐊᒥᓲᓂᕐᓴᓂᑦ ᐃᖅᑲᓇᐃᔮᔅᓴᓂᑦ ᐃᓄᓐᓄᑦ ᑐᕌᖓᔪᓂᑦ, ᐊᒻᒪᓗ ᑮᓇᐅᔭᓂᑦ ᐃᓵᑎᑦᑎᓂᕐᓴᐅᓕᕐᓗᓂ ᓄᓇᕗᒻᒥᐅᓄᑦ−ᓇᒻᒥᓂᕆᔭᐅᔪᓄᑦ ᑎᒥᐅᔪᓄᑦ ᐃᑲᔪᕐᓗᑎᒃ ᐋᖅᑭᐅᒪᑎᑦᑎᓂᕐᒥᒃ, ᐊᑐᖅᑕᐅᓕᖅᑭᑦᑖᒍᓐᓇᖅᑐᒥᒃ ᓂᕿᔅᓴᕐᓯᐅᕈᑎᖃᖃᑦᑕᓂᕐᒥᒃ.
ᓇᐃᓈᕐᓯᒪᓪᓗᒋᑦ ᑐᑭᓯᓯᒪᔾᔪᑎᔅᓴᐃᑦ ᓂᕆᐅᒋᔭᐅᔪᓄᑦ ᐱᕚᓪᓕᕈᑎᔅᓴᓄᑦ ᐊᖏᖃᑎᒌᒍᑏᑦ ᐊᑐᓯᕐᐸᑕ:
ᓯᓈ ᐊᖏᖃᑎᒌᒍᑏᑦ:
- ᐋᖅᑮᔪᔪᑦ ᓄᑖᓂᑦ ᐊᒻᒪᓗ ᐋᖅᑭᒋᐊᕐᓯᒪᔪᓂᑦ ᐊᕙᑎᒥᒃ ᓴᐳᔾᔨᕕᓐᓂᑦ ᐊᒻᒪᓗ ᐃᓄᓐᓄᑦ ᐊᐅᓚᑕᐅᓂᐊᖅᑐᓂ ᐊᖏᓂᓕᒃ ᐅᖓᑖᓂ 795.253 km²
- $200 ᒥᓕᐊᓐ ᐃᑲᔫᑎᐅᓪᓗᑎᒃ ᑲᓇᑕᒥ
- $70 ᒥᓕᐊᓐ ᐃᑲᔫᑕᐅᔪᔪᑦ ᐊᔪᕐᓴᖏᑦᑐᓂᑦ ᐃᑲᔪᖅᑎᓂᑦ, ᐊᒻᒪᓗ ᑖᒃᑯᓇᙵᑦ Enduring earth network ᐊᒻᒪᓗ ᐱᐅ ᐃᑲᔫᓯᐊᔅᓴᓂᑦ ᐸᐸᑦᑎᔨᓂᑦ
- $118 ᒥᓕᐊᓐ ᐃᓚᓕᐅᔾᔭᐅᓂᐊᖅᑐᑦ ᐊᑭᓕᕐᓱᐃᔾᔪᑎᖃᕐᓗᑎᒃ ᖁᓕᐅᓂᐊᖅᑐᓂᑦ (10) ᐊᕐᕌᒍᓂᑦ
ᕿᑭᖅᑕᓄᑦ ᓴᕐᕙᕐᔪᐊᒧᓪᓗ ᐊᖏᖃᑎᒌᒍᑏᑦ IIBA
- ᐃᑲᔪᕐᓗᒋᑦ ᑲᓇᑕ ᐋᖅᑮᓂᕐᒥᒃ ᒪᕐᕉᓐᓂᒃ ᐃᒪᕕᒻᒥ ᓴᐳᔾᔨᕕᐅᓂᐊᖅᑑᓐᓂᒃ ᑭᓪᓕᓖᓐᓂᒃ ᐊᒻᒪᓗ ᓄᓇᒥ ᐃᓄᓐᓄᑦ ᓴᐳᔾᔨᕕᐅᓪᓚᑦᑖᓂᐊᖅᑐᒥᒃ ᓴᐳᔾᔨᕕᐅᓂᐊᖅᑐᒥᓪᓗ
- $20 ᒥᓕᐊᓐ ᑐᕌᖓᔪᑦ ᓴᓇᔭᐅᔾᔪᑎᔅᓴᖏᓐᓄᑦ ᓇᐅᑦᑎᕐᓱᖅᑎᓄᑦ ᑐᖅᑲᑕᕐᕕᔅᓴᐅᑉ
- $34 ᒥᓕᐊᓐ ᑐᕌᖓᔪᑦ ᐃᑲᔪᕐᓱᐃᒍᑎᖃᕐᓂᕐᒧᑦ ᐃᓄᓐᓄᑦ ᐃᖅᑲᓇᐃᔮᔅᓴᓂᑦ, ᐃᓄᓐᓄᑦ ᑐᑭᒧᐊᑦᑎᑕᐅᔪᓂᑦ ᐊᐅᓚᑦᑎᓂᕐᒧᑦ, ᓄᓇᓕᓐᓂᑦ ᐱᓕᕆᐊᔅᓴᓄᑦ ᐃᑲᔫᑎᓄᑦ ᐊᒻᒪᓗ ᓯᔾᔭᕐᐸᓯᕐᒥ ᐃᖃᓗᒐᓱᖃᑦᑕᓂᕐᒧᑦ
ᑕᓪᓗᕈᑎᐅᑉ ᐃᒪᖓᓄᑦ ᐊᖏᖃᑎᒌᒍᑏᑦ IIBA:
- $105.9 ᒥᓕᐊᓐ ᓴᓇᔭᐅᓂᕆᓛᖅᑕᖓᓄᑦ ᐅᒥᐊᕐᓄᑦ ᑐᓚᑦᑕᕐᕕᔅᓴᐅᑉ ᐃᒃᐱᐊᕐᔪᒻᒥ
ᕿᑭᖅᑕᓂ ᐃᖃᓗᓕᕆᓂᖅ
ᑮᓇᐅᔭᒃᓴᑦ ᓚᐃᓴᓄᑦ, ᐅᒥᐊᕐᔪᐊᓄᑦ ᐊᒻᒪᓗ ᐃᖃᓗᒐᓲᑎᓄᑦ ᖃᓕᕋᓕᓐᓂᒃ ᑭᖑᑉᐸᓂᓪᓗ
ᑕᒪᕐᒥᒃ
- ᑕᒫᓂ ᐅᖓᑖᓂ $500 ᒥᓕᐊᓐ ᖁᓕᑦ (10) ᐊᕐᕌᒍᑦ ᑐᕌᖓᔪᑦ ᓴᐳᔾᔨᕕᓕᕆᓂᕐᒧᑦ ᕿᑭᖅᑕᓂ.
ᑕᑯᒋᐊᙳᐊᑕᕐᓯᓇᕐᓯᐅᒃ ᓄᕕᐱᕆ 2023ᖑᑎᓪᓗᒍ ᓇᐃᓪᓕᑎᕐᓯᒪᔪᑦ ᐊᖏᖃᑎᒌᒍᑏᑦ ᓯᕗᓪᓕᕐᐹᕐᓯᐅᑏᑦ ᐅᕙᓂ
