ᐃᖅᑲᓇᐃᔭᖅᑎᓄᑦ / ᓯᓚᑎᑦᑎᓃᑦᑐᓄᓪᓗ ᑐᕌᖓᓪᓗᓂ ᐃᖅᑲᓇᐃᔮᔅᓴᖅ

 ᐃᖅᑲᓇᐃᔮᖅ: ᓇᐅᑦᓯᕐᑐᖅᑎ ᖃᐅᔨᓴᕐᑎᒻᒪᕆᐅᓪᓗᓂᓗ

ᐊᑯᓂᐅᓂᖓ: ᐃᓱᓕᕝᕕᑦᓴᐅᑎᓕᒃ ᒫᔾᔨ 31, 2028

ᓄᓇᖓ: ᐃᖃᓗᐃᑦ, ᓄᓇᕗᑦ

ᒪᑐᐃᖓᔪᖅ: ᓄᓇᕗᒥᐅᓄᑦ ᐃᓄᐃᑦ ᓯᕗᓪᓕᐅᔾᔭᐅᓂᐊᕐᑐᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓂᑦ (ᕿᑭᖅᑕᓃᒃᑯᑦ) ᕿᓂᕐᖓᑕ ᐃᖅᑲᓇᐃᔭᖃᑦᑕᓕᓂᐅᔪᒥᑦ ᓇᐅᑦᓯᕐᑐᕐᑎᐅᓂᖕᒥᑦ ᖃᐅᔨᓴᕐᑎᒻᒪᕆᐅᓂᖕᒥᓪᓗ ᐊᐅᓚᑦᑎᔨᐅᓂᐊᕐᑐᒥᑦ ᐋᖅᑭᑦᓱᕐᑕᐅᓂᖏᓐᓂ ᓇᐅᑦᓯᕐᑐᕈᑏᑦ, ᖃᐅᔨᓴᐅᑏᑦ, ᑭᐅᔭᕆᐊᓕᓐᓄᑦ ᑭᐅᔪᓐᓇᕐᓗᓂ, ᐊᒻᒪ ᓇᐅᑦᓯᖅᑐᕈᑏᑦ (MEAL) ᐋᖅᑭᑦᓱᕐᓯᒪᓂᖏᓐᓂᑦ ᐃᖅᑲᓇᐃᔭᕐᕕᖓᓂ ᐃᓄᓕᕆᔨᒃᑯᑦ ᐊᑐᐊᒐᖏᓐᓂᑦ ᐃᑲᔫᑎᑦᓴᓄᑦ ᐱᔭᑦᓴᓄᓪᓗ.

ᑐᑭᒧᐊᕐᑎᑦᓯᔨᖃᕐᓗᓂ ᐃᓄᓕᕆᔨᒃᑯᑦ ᐊᑐᐊᒐᓕᕆᓂᖕᒧᑦ ᑐᑭᒧᐊᕐᑎᑦᓯᔨᖓᓂᑦ, ᓇᐅᑦᓯᖅᑐᖅᑎ ᖃᐅᔨᓴᕐᑎᒻᒪᕆᐅᓪᓗᓂᓗ ᑲᒪᔨᐅᓂᐊᕐᑐᖅ ᐋᖅᑭᑦᓱᕐᑕᐅᓂᖏᓐᓂᑦ ᓇᐅᑦᓯᖅᑐᕈᑏᑦ ᖃᐅᔨᓴᕈᑏᓪᓗ ᑐᓐᖓᕕᖏᑦ ᐊᒻᒪ ᐱᔭᕐᓂᖏᑦᑐᓂᑦ ᐃᑲᔪᕐᐸᓪᓗᓂ ᐋᖅᑭᑦᓱᕐᓯᒪᓂᓕᒫᖓᓂᑦ ᐊᑐᓕᕐᑎᑦᓯᕙᓪᓕᐊᑎᓪᓗᒋᑦ.  ᖃᐅᔨᒪᔪᒻᒪᕆᒃ ᓯᕗᓕᕐᑎᐅᕙᓐᓂᐊᕐᑐᖅ ᐋᖅᑭᑦᓱᕐᑕᐅᓂᖓᓂ, ᓇᐅᑦᓯᖅᑐᕐᓗᓂ, ᐊᒻᒪ ᖃᐅᔨᓴᕆᐊᓕᓐᓂᑦ ᐊᓪᓚᕝᕕᐅᑉ ᐃᓗᐊᓂ ᑮᓇᐅᔭᖃᕐᑎᑕᐅᕙᑦᑐᑦ ᐊᒻᒪ ᓯᓚᑎᑦᑎᓐᓂᑦ ᐱᖓᔪᒋᔭᑦᑎᓐᓂᑦ ᑮᓇᐅᔭᕐᑖᕈᑎᒋᕙᑦᑕᕗᑦ, ᐊᒻᒪ ᑲᑎᖅᓱᐃᕙᓪᓗᓂ ᑎᑎᖅᑲᓂᑦ ᐅᓂᒃᑳᓕᐅᕐᐸᓪᓗᓂᓗ ᑐᑭᓕᓐᓂᑦ; ᐃᓚᓕᐅᑎᓗᒋᑦ ᐃᑲᔪᕐᐸᓪᓗᓂ ᓇᓗᓇᐃᕐᓯᓂᖕᒥᑦ ᐃᖅᑲᓇᐃᔮᖑᕙᓪᓕᐊᔪᑦ ᖃᓄᐃᓕᖓᓕᕐᒪᖔᑕ, ᓴᖅᑭᖅᑐᑦ ᐊᒻᒪ ᑐᕌᒐᖏᑦ.  ᑐᓐᖓᕕᖏᑦ ᐋᖅᑭᐅᒪᓂᐊᕐᑐᑦ ᐅᓂᒃᑳᖑᒋᐊᓕᓕᒫᑦ ᐅᓂᒃᑳᖑᑦᓯᐊᕋᓗᕐᒪᖔᑕ ᖃᐅᔨᒪᔨᑕᐅᓗᓂ, ᐃᓚᓕᐅᑎᓗᒋᑦ ᐅᓂᒃᑳᖑᑦᓴᐃᓐᓇᕆᐊᓖᑦ ᑕᖅᑭᑦ ᐱᖓᓱᑦ ᓈᔭᕋᐃᒻᒪᑕ ᐊᒻᒪ ᐊᕐᕌᒍᑕᒫᑦ ᐅᓂᒃᑳᖑᒋᐊᓖᑦ, ᑕᕝᕙᑦᓴᐃᓐᓇᕐᓗ ᑐᑦᓯᕌᖑᔪᓂᑦ.

ᓇᐅᑦᓯᖅᑐᖅᑎ ᖃᐅᔨᓴᕐᑎᒻᒪᕆᓪᓗ ᐅᖃᐅᔾᔨᒋᐊᕆᕙᓪᓗᓂ ᐃᑲᔪᕐᐸᓪᓗᓂᓗ ᑐᓴᕋᑦᓴᓂᑦ ᑲᑎᖅᓱᕆᐊᓕᓐᓂᑦ ᑕᐃᒫᑦᓯᐊᖅ ᐱᓂᕐᓗᑦᑕᐃᓕᒋᐊᖃᕐᓂᒃᑯᑦ ᑐᓴᕋᑦᓴᓂᓪᓗ ᑲᑎᖅᓱᐃᓂᖕᒧᑦ ᐱᑦᑎᐊᕆᐊᖃᕐᓂᖕᒧᑦ ᒪᓕᒐᑦ ᑲᔪᓯᑎᑕᐅᑦᓯᐊᕋᓗᐊᕐᒪᖔᑕ ᐊᒻᒪ ᑲᒪᒋᔭᖃᕐᓗᓂ ᖃᐅᔨᒪᑎᑦᓯᖃᑦᑕᕐᓗᓂ ᐃᖅᑲᓇᐃᔭᕐᕕᖓᑕ ᐊᐅᓚᓂᖓᓄᑦ ᐸᕐᓇᐅᑎᓂᑦ ᑲᑎᖅᓱᐃᓂᒃᑯᑦ ᐊᒻᒪ ᐅᓂᒃᑳᓕᐅᕐᓂᒃᑯᑦ ᖃᓄᐃᓕᖓᓕᕐᒪᖔᑕ ᐱᔭᑦᓴᕐᑖᒥᓂᖏᑦ.

ᐃᖅᑲᓇᐃᔮᖅᑖᖅᑐᖅ ᐊᔪᓐᖏᑦᓯᐊᕆᐊᓕᒃ ᐅᖃᓕᒪᓕᒻᒪᓪᓗᓂ ᑎᑎᕋᓕᒻᒪᓪᓗᓂᓗ ᑐᓴᕐᑕᐅᒋᐊᓕᓐᓂᑦ.  ᐃᓂᖓᓃᑦᑐᖅ ᐃᑲᔪᕐᑎᐅᖃᑎᒌᓐᓂᒃᑯᑦ ᐃᖅᑲᓇᐃᔭᖃᑎᖃᕈᓐᓇᕐᑐᖅ ᕿᑭᖅᑕᓃᒃᑯᑦ ᐃᖅᑲᓇᐃᔭᕐᕕᖏᓐᓂᑦ ᐊᒻᒪ ᐃᖅᑲᓇᐃᔭᖃᑎᒌᓂᑦ ᑕᐃᒫᑦᓯᐊᖅ ᑲᑎᖅᓱᕆᐊᓖᑦ ᐊᒻᒪ ᐊᔾᔨᒌᒥᑦ ᒪᓕᑦᑎᒌᑦᓯᐊᕋᓗᕐᒪᖔᑕ ᐃᖅᑲᓇᐃᔭᕐᕖᑦ, ᐊᓪᓚᕝᕕᒻᒥ ᑐᓴᕋᑦᓴᑦ ᕿᑭᖅᑕᓃᒃᑯᑦ ᓇᐅᑦᓯᖅᑐᕐᓂᖕᒧᑦ ᖃᐅᔨᓴᕐᑎᒻᒪᕆᓐᓄᓪᓗ ᑐᓐᖓᕕᐅᔪᓂᑦ ᐊᒻᒪ ᐊᐅᓚᓂᖏᓐᓄᑦ ᐸᕐᓇᐅᑎᖏᓐᓂᑦ.  ᐱᖃᓯᐅᑎᓗᒋᑦ ᑲᑎᖅᓱᐃᓂᖅ ᑐᓴᕋᑦᓴᓂᑦ ᐊᕐᕌᒍᑕᒫᑦ ᐅᓂᒃᑳᖑᒋᐊᓕᓐᓂᑦ ᖃᓄᑎᒋ ᐃᑉᐱᓐᓂᕈᑕᐅᓯᒪᒻᒪᖔᑕ ᐊᑑᑎᖃᑦᓯᐊᕐᒪᖔᑕᓗ ᐃᑲᔫᑎᒋᕙᑦᑕᕗᑦ.  ᑖᑦᓱᒪ ᐃᓂᖓ ᑲᑐᔾᔨᖃᑎᖃᕐᐸᓪᓗᓂ ᐊᓯᖏᓐᓂᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ ᐊᒡᒍᕐᓯᒪᔪᓂ, ᓄᓇᕗᒥ ᐊᒻᒪ ᑲᓇᑕᒥ ᓇᓗᓇᐃᕐᑐᕆᐊᓕᓐᓄᑦ, ᑕᐃᒫᑦᓯᐊᕋᓗᐊᕐᒪᖔᑕᓗ, ᐋᖅᑭᐅᒪᐃᓐᓇᕆᐊᓖᑦ ᐊᒻᒪ ᒫᓐᓇᓂᓴᕐᓄᑦ ᐱᓕᕆᐊᖑᒋᐊᓖᑦ ᓇᓗᓇᐃᒃᑯᑎᖏᑦ ᖃᐅᔨᓴᕐᐸᓪᓗᒋᑦ ᐊᒻᒪ ᑐᓴᕋᑦᓴᑦ ᐅᓂᒃᑳᖑᒋᐊᓖᑦ ᓇᑭᑦ ᑮᓇᐅᔭᕐᑖᕈᑕᐅᓯᒪᒻᒪᖔᑕ ᐃᓄᓐᓅᖓᔪᑦ ᓇᓗᓇᐃᕐᑐᖅᐸᓪᓗᒋᑦ.

ᐃᖅᑲᓇᐃᔮᕐᑖᖅᑐᖅ ᐊᔪᓐᖏᑦᓯᐊᕆᐊᓕᒃ ᐃᓅᖃᑎᒥᓂᖕ ᐅᖃᖃᑎᖃᕈᓐᓇᕐᓂᖕᒧᑦ ᑐᓴᐅᒪᖃᑎᒌᓐᓂᖕᒥᓪᓗ, ᐃᑲᔪᖅᑎᐅᖃᑎᒌᓐᓂᖕᒥᑦ ᖃᓄᖅᑑᕈᓐᓇᕐᓗᓂᓗ ᐊᑲᐃᓪᓕᐅᕈᑎᓄᑦ, ᐃᓱᒪᖅᓴᖅᓯᐅᕈᓐᓇᕐᓗᓂ ᓈᓚᑦᓯᐊᕈᓐᓇᕐᓗᓂᓗ ᐊᒻᒪ ᐅᓂᒃᑳᖃᕈᓐᓇᕐᓗᓂ ᐅᖃᐅᓯᒃᑯᑦ ᐱᔭᕐᓂᖏᑦᑐᓂᑦ ᑐᓴᕋᑦᓴᓂᑦ ᑲᑎᒪᔨᕋᓛᓄᑦ ᑎᒥᐅᔪᓄᓪᓗ.   ᐃᖅᑲᓇᐃᔮᖅᑖᕋᓱᐊᕐᑐᑦ ᓴᖅᑮᒋᐊᓕᒃ ᐃᖅᑲᓇᐃᔭᖃᑦᑕᓕᓂᐅᓂᕐᒥᓂᖕ ᐱᔭᑦᓴᓂᑦ ᐊᐅᓚᑦᑎᔨᐅᓂᖕᒧᑦ, ᐅᓂᒃᑳᓕᐅᕈᓐᓇᕐᓗᓂ ᑎᑎᖅᑲᒃᑯᑦ ᐊᒻᒪ ᑐᑭᓯᐅᒪᑦᑎᐊᕐᓗᓂ ᐃᑲᔫᑕᐅᕙᑦᑐᑦ ᓇᐅᑦᓯᖅᑐᖅᑕᐅᓂᖏᓐᓂᑦ ᖃᐅᔨᓴᕐᑕᐅᓂᖏᓐᓄᓪᓗ ᐱᖅᑯᓯᓂᑦ, ᑲᑎᖅᓱᖅᓯᒪᔪᓂᑦ ᑐᓴᕋᑦᓴᓂᑦ ᕿᒥᕐᕈᖃᑦᑕᓕᓂᐅᓗᓂ, ᐃᓅᖃᑎᒌᓂᑦ ᑭᓪᓕᓯᓂᐊᕐᓂᒃᑯᑦ ᖃᐅᔨᓴᕈᓯᓂᑦ, ᖃᐅᔨᓴᕆᐊᓖᓪᓗ ᐃᓱᒪᒃᑯᑦ ᒥᑦᓴᐅᓴᒋᐊᓕᓐᓂᑦ ᐱᖅᑯᓯᐅᔪᓂᓗ.  ᐃᖅᑲᓇᐃᔮᖃᖃᑦᑕᓕᓂᐅᓗᓂ ᐃᑲᔫᑎᑦᓴᓄᑦ ᐱᓕᕆᐊᑦᓴᑦ ᐋᖅᑭᑦᓱᕐᑕᐅᓂᖏᓐᓂᑦ ᐊᒻᒪ ᓇᐅᑦᓯᖅᑐᕐᓂᖕᒧᑦ ᖃᐅᔨᓴᕐᓂᖕᒧᓪᓗ ᑐᓐᖓᕕᖏᓐᓂᑦ ᒐᕙᒪᑐᖃᒃᑯᓐᓂ, ᐳᕌᕕᓐᓯᓂ/ᐊᒡᒍᕐᓯᒪᔪᓂ, ᒐᕙᒪᒃᑯᑦ ᐱᔭᑦᓴᕆᕙᑦᑕᖏᓐᓂᑦ ᐊᒻᒪ ᖃᐅᔨᒪᓂᖃᑦᓯᐊᕐᓗᓂ ᐊᕐᖕᓇᓂᑦ ᐊᖑᑏᓪᓗ ᐃᓕᖅᑯᓯᖃᑎᒌᖏᑦᑐᓂᑦ (GBA+).

ᐊᕐᕌᒍᓂᑦ ᐱᖓᓱᓂᑦ ᐃᖅᑲᓇᐃᔭᖃᑦᑕᓕᓂᐅᓗᓂ ᐃᑲᔫᑎᑦᓴᑦ ᓇᐅᑦᓯᖅᑐᖅᑕᐅᓂᖏᓐᓂᑦ ᖃᐅᔨᓴᕐᑕᐅᓂᖏᓐᓂᓪᓗ ᖃᐅᔨᒪᑦᓴᐃᓐᓇᕆᐊᓕᒃ, ᐃᖅᑲᓇᐃᔭᖃᑎᖃᖃᑦᑕᓕᓂᐅᓗᓂᓗ ᐃᓄᓐᓂᑦ, ᓄᓇᕗᑦ ᓄᓇᖏᓐᓂ, ᐅᕝᕙᓘᓐᓃᑦ ᐊᓯᖏᓐᓂᑦ ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᓐᓂᑦ.   ᐃᖅᑲᓇᐃᔮᖃᖃᑦᑕᓕᓂᐅᓗᓂ ᖃᐅᔨᒪᓇᓱᐊᕆᐊᓕᓐᓂᑦ ᓇᒦᓕᕐᒪᖔᑕ ᐊᒻᒪ ᐊᐅᓚᑦᑎᓕᒻᒪᓪᓗᓂ ᐊᔾᔨᒌᖏᑦᑐᕈᓘᔭᓂᑦ ᑲᑎᖅᓱᖅᑕᐅᓯᒪᔪᓂᑦ ᑎᑎᖅᑲᓂᑦ, ᐊᒻᒪ ᐊᑐᓕᒻᒪᓪᓗᓂ ᑲᑎᖅᓱᐃᔾᔪᑎᓂᑦ ᖃᕆᓴᐅᔭᒃᑯᑦ SPSS ᐅᕝᕙᓘᓐᓃᑦ ᐊᓯᖏᓐᓂᑦ ᖃᕆᓴᐅᔭᐅᑉ ᐃᓱᒪᔪᓐᓇᐅᑎᖏᓐᓂᑦ ᖃᐅᔨᒪᖁᒍᒥᓇᕐᑐᖅ.  ᐃᖅᑲᓇᐃᔮᖃᖃᑦᑕᓕᓂᐅᓗᓂ ᓄᓇᖅᑲᑎᒌᑦ ᖃᓄᐃᓐᖏᑦᓯᐊᕐᓂᖕᒧᑦ ᐱᔭᑦᓴᖏᓂᑦ ᐅᕝᕙᓘᓐᓃᑦ ᐃᓕᖅᑯᓯᓕᕆᓂᖕᒧᑦ ᐃᑲᔫᑎᑦᓴᓂᑦ, ᐊᒻᒪ ᖃᐅᔨᒪᓂᖃᕐᓗᓂ ᐋᓐᓂᐊᓕᕈᑕᐅᓲᓂᑦ ᐊᒻᒪ ᓄᓇᐃᕐᑕᐅᓂᒃᑯᑦ ᐃᓕᖅᑯᓯᑦᑎᓐᓂᑦ ᐊᓐᓇᐃᑎᑕᐅᓇᓱᓐᓂᒥᓂᑦᑎᓐᓂᑦ ᐃᑉᐱᓐᓂᕈᑎᒋᓯᒪᓪᓚᕆᑦᑕᖏᓐᓂᑦ ᐃᓄᐃᑦ ᓄᓇᓕᓐᓂ ᐃᑲᔪᕐᓂᖃᓪᓚᕆᒃᑲᔭᕐᑐᖅ.

ᑖᑦᓱᒪ ᐃᓂᖓᓃᑦᑐᖅ ᐸᐃᑉᐹᖁᑎᖃᕋᔪᒋᐊᓕᒃ ᓯᓚᑦᑐᖅᓴᕐᕕᔾᔪᐊᒥ ᐃᓕᓐᓂᐊᕇᕐᓯᒪᔪᑦ ᓇᓗᓇᐃᒃᑯᑎᖓᓂᑦ ᐃᑲᔫᑎᐅᕙᑦᑐᑦ ᖃᐅᔨᓴᕐᑕᐅᓂᖏᓐᓄᑦ, ᐃᓄᓕᕆᓂᖕᒥᑦ ᑭᓪᓕᓯᓂᐊᕐᓂᖕᒥᑦ, ᐋᓐᓂᐊᖅᑐᓕᕆᓂᖕᒥᑦ ᐊᐅᓚᑦᑎᓂᖕᒥᑦ ᐅᕝᕙᓘᓐᓃᑦ ᐊᔾᔨᐸᓗᖏᓐᓂᑦ.  ᖁᑦᓯᓂᕐᐹᒥᑦ ᐱᔭᕇᕐᓯᓯᒪᓂᖓ ᓯᓚᑦᑐᖅᓴᕐᕕᔾᔪᐊᒥ ᐃᑲᔪᕐᓂᖃᕈᓐᓇᕐᑐᖅ.  ᑲᑎᑕᐅᓯᒪᔪᑦ ᐃᓕᓐᓂᐊᕐᓯᒪᔭᖏᑦ ᐊᒻᒪ ᐃᖅᑲᓇᐃᔮᖃᖃᑦᑕᓕᓂᐅᓂᖓ ᓈᒻᒪᒋᔭᐅᔪᓐᓇᕐᒥᔪᖅ.  ᒪᓕᒐᕐᓂᑦ ᓯᖁᒥᑦᓯᓚᐅᕐᓯᒪᓐᖏᒃᑲᓗᐊᕐᒪᖔᑦ ᖃᐅᔨᓴᕐᑕᐅᓯᒪᒋᐊᓕᒃ ᓈᒻᒪᒋᔭᐅᓗᓂ.

ᐃᖅᑲᓇᐃᔮᖓᑕ ᑮᓇᐅᔭᐅᔾᔭᑦᓵᖏᑦ ᐱᒋᐊᕐᕕᓕᒃ $84,604 ᐊᕐᕌᒍᑕᒫᑦ, ᐃᓚᓕᐅᑎᓗᒋᑦ ᓄᓇᕗᒥ ᐅᑭᐅᖅᑕᖅᑐᒥᐅᑕᐅᓂᖕᒧᑦ ᐃᑲᔫᓯᐊᑦ $27,600 ᐊᕐᕌᒍᑕᒫᑦ.  ᐃᓪᓗᖃᕐᑎᑕᐅᓐᖏᑦᑐᖅ.

ᐃᖅᑲᓇᐃᔮᖅᑖᕋᓱᐊᕈᑏᑦ ᑐᓂᔭᐅᖃᑦᑕᕈᓐᓇᖅᑐᑦ ᓱᒃᑲᔪᒃᑯᑦ, ᐃᕐᖐᓈᖅᑕᐅᑎᒃᑯᑦ, ᓇᒻᒥᓂᖅ ᐋᓪᓗᒋᑦ, ᐅᕝᕙᓘᓐᓃᑦ ᑎᑎᖅᑲᓂᐊᕐᕕᒃᑯᑦ ᑐᔫᑎᒋᓗᒋᑦ ᐅᕗᖓ:

 ᐃᖅᑲᓇᐃᔭᕐᑐᓕᕆᔨᒃᑯᓐᓄᑦ                     ᐅᖄᓚᐅᑖ: (867) 975-8400

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ               ᓱᒃᑲᔪᒃᑰᕈᑖ: (867) 979-3238

ᐃᒡᓗᕗᑦ ᐃᓪᓗᖓᓄᑦ, ᖄᖅᑎᖓᓂ 2ᒥ

ᑎᑎᖅᑲᓂᐊᕐᕕᒃ 1340,                              ᐃᕐᖐᓈᖅᑕᐅᑖ: Resumes@qia.ca

ᐃᖃᓗᐃᑦ, ᓄᓇᕗᑦ X0A 0H0

ᒪᑐᕕᔅᓴᓕᒃ:    ᑕᓪᓕᒥᕐᒥ ᔫᓂ 21, 2024, 5:00ᒨᖅᑲᑦ ᐅᓐᓄᓴᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ