ᓄᓘᔮᕆᓂᕐᒥ ᑐᖏᓕᐊᓂ ᐱᓕᕆᐊᔅᓴᑦ ᒥᔅᓵᓄᑦ ᒥᓂᔅᑕᐅᑉ ᑐᑭᑖᕈᑎᖓ: ᕿᑭᖅᑕᓂᒃᑯᑦ ᖁᔭᓐᓇᒦᖅᑐᑦ ᐃᓄᓕᒫᓂᑦ ᐃᓚᒋᔭᐅᖃᑦᑕᓚᐅᖅᑐᓂᑦ ᕿᒥᕐᕈᑎᓪᓗᒋᑦ
ᐃᖃᓗᐃᑦ, ᓄᓇᕗᑦ, ᓄᕕᐱᕆ 17, 2022 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᑐᓴᖅᑎᑕᐅᓚᐅᕐᖓᑕ ᓂᕈᐊᖅᑕᐅᓯᒪᔫᑉ ᒥᓂᔅᑕ ᑖᓐ ᕙᓐᑖᓪ ᑐᑭᑖᕈᑎᖓᓂᒃ ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑏᑦ (ᐹᕕᓐᓛᓐ) ᑐᖏᓕᐊᓂ ᐱᓕᕆᐊᔅᓴᓂᒥᑦ ᑐᔅᓯᕋᐅᑎᒋᓯᒪᔭᖓᓄᑦ. ᕿᑭᖅᑕᓂᒃᑯᑦ ᐅᑉᐱᕈᓱᑦᑐᑦ ᒥᓂᔅᑕᐅᑉ ᑐᑭᑖᕈᑎᖓ ᓈᒻᒪᓴᕐᓂᕐᒧᑦ ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔩᑦ (NIRB) ᐊᑐᓕᖁᔨᔾᔪᑎᒋᓯᒪᔭᖓᓐᓂᒃ ᐊᖏᖅᑕᐅᖁᓇᒋᑦ ᑐᖏᓕᐊᓂ ᐱᓕᕆᐊᔅᓴᑦ ᑐᔅᓯᕋᐅᑏᑦ ᐃᓱᒪᑐᑦᑎᐊᖅᑐᓂ ᐃᓱᒪᑖᕈᑎᒋᓚᐅᕆᐊᔅᓴᖏᓐᓂᒃ ᐃᓱᒪᒋᓪᓗᒋᑦ ᐊᒥᓱᕐᔪᐊᕌᓗᐃᑦ ᐃᓱᒫᓘᑕᐅᓯᒪᔪᑦ ᑐᔅᓯᕋᐅᑎᒨᖓᔪᑦ.
ᕿᑭᖅᑕᓂᒃᑯᑦ ᐃᓕᓴᕐᓯᒍᑎᓖᑦ ᑐᓂᓯᒪᑦᑎᐊᓚᐅᕐᓂᖏᓐᓂᒃ ᐃᓄᐃᑦ ᓯᕗᓪᓕᐅᑎᒍᒪᓯᒪᔭᖏᓐᓂᒃ ᓴᓂᕐᕙᐃᓯᒪᓚᐅᕐᖓᑕ ᑐᑭᓯᓯᒪᔾᔪᑎᔅᓴᓂᑦ ᑭᐅᔾᔪᑎᓂᓪᓗ ᑐᓂᓯᓯᒪᓂᐊᕐᖓᑕ ᐊᕙᑎᓕᕆᔨᒃᑯᑦ ᕿᒥᕐᕈᓂᖏᓐᓂ. ᕿᑭᖅᑕᓂᒃᑯᑦ ᐃᓕᓴᕐᓯᔪᑦ ᐊᒥᓱᓂᑦ ᐃᓕᒍᑎᖃᕐᓂᖏᓐᓂᒃ ᐊᒻᒪᓗ ᓂᕆᐅᑦᑐᑎᒃ ᑲᔪᓯᑎᑦᑎᓂᐊᕐᓂᖏᓐᓂᒃ ᐃᖅᑲᓇᐃᔭᖃᑎᖃᖃᑦᑕᓂᕐᒥᒃ ᐃᓄᓐᓂᑦ ᐊᑑᑎᕕᐅᔪᓂᑦ ᓄᓇᓕᓐᓂᑦ ᓯᕗᒧᐊᑦᑎᑦᑎᕙᓪᓕᐊᓂᕐᒧᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐅᑉᐱᕆᔭᖏᓐᓂᓪᓗ. ᐊᕙᑎᓕᕆᔨᒃᑯᑦ ᐱᓕᕆᓂᕆᕙᑦᑕᖓ ᐊᑑᑎᖃᓪᓚᕆᑦᑐᐊᓘᒻᒪᑦ ᕿᒥᕐᕈᖃᑦᑕᓂᕐᒥᒃ ᐆᒪᓂᓖᑦ ᓇᔪᒐᖏᑕᓗ ᐊᕙᑖᓂᒃ ᐊᒻᒪᓗ ᓄᓇᓖᑦ−ᒪᑭᒪᓇᓱᐊᕈᑎᖏᑦ ᐊᑑᑎᕕᐅᓂᐅᓴᑎᓪᓗᒋᑦ ᐱᓕᕆᐊᔅᓴᓄᑦ ᑐᔅᓯᕋᐅᑕᐅᕙᑦᑐᓄᑦ ᐊᑐᖅᑎᑦᑎᒋᐊᒃᑲᓐᓂᕈᑕᐅᖃᑦᑕᓂᐊᖅᑐᒥᒃ ᐃᓄᓐᓂᑦ ᐃᓚᒋᔭᐅᑎᑦᑎᓗᑎᒃ ᐊᒻᒪᓗ ᑭᐅᔪᓐᓇᑎᑦᑎᖃᑦᑕᓂᕐᒥᒃ.
ᑎᓴᒪᓂᑦ−ᐊᕐᕌᒍᓂᑦ ᐊᕙᑎᓕᕆᔨᒃᑯᑦ ᕿᒥᕐᕈᓂᕆᓚᐅᖅᑕᖓ ᐱᔭᕇᕐᖓᑦ ᓇᓗᓇᕈᓐᓃᔪᒻᒪᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᑎᒍᒥᐊᖅᑏᑦ ᐃᑲᔪᕐᓰᔪᙱᒻᒪᑕ ᑐᖏᓕᐊᓂ ᐱᓕᕆᐊᔅᓴᓂᑦ ᑐᔅᓯᕋᐅᑎᓂᑦ ᑕᐃᒫᒃ ᑐᓂᔭᐅᓯᒪᑎᓪᓗᒋᑦ ᐊᒻᒪᓗ ᐃᓄᐃᑦ ᐊᒻᒪᓗ ᐊᕙᑎᒧᑦ ᐃᓱᒫᓘᑕᐅᔪᑦ ᑲᒪᒋᔭᐅᓯᒪᑦᑎᐊᔪᙱᒻᒪᑕ ᐃᓱᒪᒋᔭᐅᓯᒪᑦᑎᐊᔪᙱᒻᒪᑕᓗ ᑐᔅᓯᕋᐅᑎᓂᑦ. ᐃᓄᓕᒫᓄᑦ ᓴᖅᑭᔮᖅᑐᑦ ᑎᑎᕋᖅᑕᐅᓯᒪᔪᑦ ᐱᔭᕇᔪᒻᒪᑕ ᓱᓕ ᐊᒥᓱᓂᑦ ᐊᐱᖅᑯᑎᔅᓴᖃᐅᖅᑎᓪᓗᒋᑦ ᑖᓐᓇ ᐱᓕᕆᐊᔅᓴᖅ ᑕᐃᒫᒃ ᑐᔅᓯᕋᐅᑕᐅᓯᒪᑎᓪᓗᒍ ᑲᒪᒋᔭᐅᑦᑎᐊᕈᓐᓇᕐᓂᐊᕋᓗᐊᕐᒪᖔᖅ ᑲᒪᒋᔭᖃᕐᓗᑎᒃ ᐃᓄᓐᓄᑦ ᐃᓱᒫᓘᑕᐅᓯᒪᔪᓂᑦ ᐊᒻᒪᓗ ᐸᓚᕐᔫᒥᑎᑦᑎᓂᐊᕋᓗᐊᕐᒪᖔᑕ ᐊᕙᑎᒧᑦ ᐊᑑᑎᓂᖃᕐᐸᓪᓕᐊᔪᓂᑦ
“ᐃᓄᐃᑦ ᐅᖃᖃᑦᑕᕐᓯᒪᒻᒪᑕ ᐊᒥᓱᐊᖅᑎᖅᑐᑎᒃ ᐊᑭᕋᖅᑐᖏᓐᓂᕋᖅᑐᑎᒃ ᐅᔭᕋᓐᓂᐊᓂᕐᒥᒃ ᐊᒻᒪᓗ ᐱᕙᓪᓕᐊᑎᑦᑎᓂᕐᒥᒃ ᓄᓇᖏᓐᓂᒃ. ᐃᓄᐃᑦ ᓱᓕ ᐃᓱᒫᓘᑎᖃᕐᖓᑕ ᑐᔅᓯᕋᐅᒻᒥᑦ ᑕᐃᒫᒃ ᑐᓂᔭᐅᓯᒪᔪᒥᒃ ᐊᒻᒪᓗ ᖃᓄᖅ ᓈᒻᒪᖏᑦᑐᒥᒃ ᐊᑑᑎᓂᖃᕐᓂᐊᕐᓂᖓᓂᒃ ᓄᓇᓄᑦ, ᐃᒪᕐᓄᑦ, ᐆᒪᔪᓄᑦ, ᐊᒻᒪᓗ ᐃᓄᐃᑦ ᐃᓅᓯᖓᓄᑦ.”, ᐅᖃᖅᑐᖅ ᓕᕙᐃ ᐹᓇᐹᓯ, ᕿᑭᖅᑕᓂᒃᑯᓐᓂ ᓯᕗᓕᖅᑎᓂᑦ ᑲᑎᒪᔨᐅᖃᑕᖅ ᐊᒻᒪᓗ ᓄᓘᔮᕆᓂᕐᒥᒃ ᑲᒪᒋᔭᖓᓐᓂᒃ ᓯᕗᓕᕐᓯᔪᖅ.
ᕿᑭᖅᑕᓂᒃᑯᑦ ᑲᑎᒪᔨᖏᑦ ᓱᓕ ᐊᖏᕐᓯᒪᔪᑦ ᐊᕙᑎᒥᒃ ᐱᕙᓪᓕᐊᔪᓕᕿᓂᕐᒧᑦ ᕿᑭᖅᑕᓂ ᐊᒻᒪᓗ ᑐᙵᓱᑦᑎᑦᑎᖃᑦᑕᓂᐊᖅᑐᑎᒃ ᓯᕗᓂᔅᓴᑎᓐᓂ ᑐᔅᓯᕋᐅᑎᐅᖃᑦᑕᓂᐊᖅᑐᓂᑦ ᐹᕕᓐᓛᓐᑯᓐᓂᑦ ᓯᕗᓪᓕᐅᔾᔨᓯᒪᑎᓪᓗᒋᑦ ᐃᓄᓐᓂᑦ ᐃᓚᒋᔭᐅᑎᑦᑎᖃᑦᑕᓂᕐᒥᒃ ᓯᕗᕐᖓᒍᑦ ᐸᕐᓇᐅᓯᐅᖅᑎᓪᓗᒋᑦ, ᐊᒻᒪᓗ ᓈᒻᒪᑦᑐᓂᑦ ᐃᓄᐃᑦ ᐃᓱᒪᒋᓯᒪᔭᖏᓐᓄᑦ ᑕᑯᓐᓇᙳᐊᖅᑐᒋᑦ ᓯᕗᓂᔅᓴᑎᓐᓅᖓᔪᓂᑦ.
ᕿᑭᖅᑕᓂᒃᑯᑦ ᓱᓕ ᐃᑲᔪᕐᓰᔪᑦ ᒫᓐᓇ ᐱᓕᕆᔪᓐᓇᖅᑎᑕᐅᔪᓂᑦ ᐱᓕᕆᐊᓂᑦ ᐃᓄᐃᑦ ᓄᓇᖁᑎᖏᓐᓂᑦ, ᐊᒻᒪᓗ ᓱᓕ ᐊᑐᓕᖅᑎᑦᑎᕙᓪᓕᐊᓪᓗᑎᒃ ᐊᖏᖃᑎᒋᓯᒪᔭᑦᑎᓐᓂᒃ ᐹᕕᓐᓛᓐᑯᓐᓄᑦ ᐊᑐᖅᑎᑦᑎᔪᓂᑦ ᓯᕗᓪᓕᐅᔾᔨᔪᓂᓪᓗ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐃᓚᐅᕕᒋᔪᒪᓯᒪᔭᖏᓐᓂᓪᓗ.
ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:
ᑭᐅᕋᓐ ᕙᓚᕋᑎ
ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
(ᐅ) 867.975.8398 ᐅᖓᓯᑦᑐᒥ ᐊᑭᖃᙱᑐᒃᑯᓘᓐᓃᑦ 1.800.667.2742
