ᐃᖃᓗᐃᑦ, ᓄᓇᕗᑦ, ᔮᓄᐊᕆ 10, 2025 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ) ᐊᐅᓚᑦᓰᓇᖅᑐᑦ ᓄᓇᕗᒻᒥ ᐊᖑᓇᓱᑦᑎᓄᑦ ᐃᑲᔫᑎᓂᒃ ᑭᒡᒐᑐᐃᓪᓗᑎᒃ ᑐᙵᕕᒃᑯᓐᓂᒃ. ᐃᑲᔫᑎᑦ ᐅᑎᕐᕕᐅᔪᓐᓇᕈᑕᐅᔪᖅ ᐃᑲᔫᑎᓂᒃ ᕿᑭᖅᑕᓂ ᐃᓄᐃᑦ ᐊᑭᓖᒍᑎᒥᓂᖏᓐᓂᒃ ᓂᐅᕕᕈᑎᒥᓂᖏᓐᓅᖓᔪᓂᒃ ᐊᖑᓇᓲᑎᓂᒃ. ᕿᑭᖅᑕᓂ ᐃᓄᐃᑦ ᑐᑦᓯᕋᐅᓯᐅᕈᓐᓇᖅᑐᑦ ᑮᓇᐅᔭᓂᒃ ᒥᑭᔫᑎᓄᑦ ᐱᖁᑎᓄᑦ, ᐊᑦᑕᓇᐃᖅᓯᒪᒍᑎᓄᑦ ᐱᖁᑎᓄᑦ, ᐱᕐᕈᓗᐊᕿᓂᒃᑯᑦ ᐃᑲᔪᖅᑕᐅᒍᑎᑦ ᐊᒻᒪᓗ ᓇᓪᓕᐅᒃᑯᒪᔾᔨᕈᑎᓂᒃ.
ᐃᓚᖏᑦ ᐅᔾᔨᓇᖅᑐᑦ ᐃᓚᒋᐊᕈᑕᐅᔪᑦ ᓱᓇᒃᑯᑖᓄᑦ ᐃᓚᒋᔭᐅᓪᓗᑎᒃ ᐊᒥᓲᓂᖅᓴᑦ ᐃᖃᓗᒐᓱᓪᓗᓂ ᓱᓇᒃᑯᑖᑦ, ᓯᓚᒥᓯᐅᑏᑦ ᐱᖁᑏᑦ, ᐊᖑᓇᓲᑏᑦ ᓱᓇᒃᑯᑖᑦ ᐱᖁᑏᓪᓗ, ᖃᒧᑕᐅᔭᓄᑦ ᐃᓚᑦᓴᑦ, ᐅᒥᐊᕐᒧᑦ ᐃᓚᑦᓴᑦ ᑐᖅᑯᐃᕕᑦᓴᓪᓗ, ᑕᑯᒋᐊᕐᓗᒍ ᖃᐅᔨᒋᐊᒃᑲᓂᕐᕕᑦᓴᖅ ᐃᑭᐊᖅᑭᕕᑦᑎᓐᓂ ᑭᓱᓪᓚᑦᑖᖑᓕᕐᒪᖔᑕ ᐃᓚᒋᐊᕈᑕᐅᔪᑦ.
ᓂᐅᕕᖅᓯᒪᓂᕈᕕᑦ ᑖᒃᑯᓂᖓ ᐃᓚᒋᐊᕈᑕᐅᔪᓂᒃ ᐆᑦᑑᑉᐱᕆ 1, 2024-ᒥᓂᒃ, ᐊᒻᒪᓗ ᐱᓯᒪᒍᕕᒋᑦ ᓱᓕ ᓇᓕᖅᑲᖏᑦ, ᑐᑦᓯᕋᐅᓯᐅᕈᓐᓇᖅᑐᑎᑦ ᑮᓇᐅᔭᖅᑖᕈᑎᑦᓴᓂᒃ NHSP−ᑯᑦ ᐃᑲᔫᑎᑎᒍᑦ. ᑮᓇᐅᔭᑦ ᓱᓕ ᐊᑐᐃᓐᓇᐃᑦ ᑕᕝᕗᖓ ᑮᓇᐅᔭᓕᕆᓐᓇᐅᑉ ᐊᕐᕌᒍᐊᓄᑦ, ᑕᐃᒫᒃ ᑲᔪᖏᖅᓴᐃᕗᒍᑦ ᕿᑭᖅᑕᓂ ᐃᓄᐃᑦ ᑐᑦᓯᕋᖁᓪᓗᒋᑦ ᑐᖔᓂ ᒫᑦᓯ 31, 2025. ᑮᓇᐅᔭᑦ NHSP−ᑯᓐᓂ ᓄᑖᙳᕆᐊᕈᒫᕐᒥᔪᑦ ᐱᒋᐊᕐᓗᓂ ᐄᑉᕈ 1, 2025.
ᐱᔪᓐᓇᖅᑎᑕᐅᔪᑎᑦ NHSP ᒥᑭᔫᑎᓄᑦ ᐱᖁᑎᓄᑦ, ᐱᕐᕈᓗᓐᓂᒃᑯᑦ ᐃᑲᔫᑎᓂᒃ, ᐊᑦᑕᓇᐃᖅᓯᒪᒍᑎᓂᒃ ᐱᖁᑎᓂᒃ ᐅᕝᕙᓘᓐᓃᑦ ᓇᓪᓕᐅᒃᑯᒪᔾᔨᕈᑎᓂᒃ ᐅᑭᐅᖃᕈᕕᑦ 16-ᓂᒃ ᐅᖓᑖᓂᓗ, ᐊᖑᓇᓱᑦᑎᐅᓗᑎᑦ ᐱᖅᑯᓯᒃᑯᑦ ᐊᖑᓇᓱᖃᑦᑕᕈᕕᑦ, ᐊᒻᒪᓗ ᖄᖏᐅᑎᓯᒪᙱᒃᑯᕕᑦ ᑮᓇᐅᔭᓕᑕᐅᒍᑎᑦᓴᓄᑦ ᑮᓇᐅᔭᓕᕆᓐᓇᐅᑉ ᐊᕐᕌᒍᐊᓄᑦ ᑕᕝᕗᖓ.
ᑐᑭᓯᒋᐊᒃᑲᓐᓂᕈᓐᓇᖅᑐᑎᑦ, ᐅᕝᕙᓘᓐᓃᑦ ᐊᐅᓪᓚᑎᓪᓗᒍ ᑐᑦᓯᕋᐅᑏᑦ ᖃᕆᓴᐅᔭᒃᑯᑦ ᑎᑎᕋᕐᕕᑦᓴᖅ, ᑕᑯᒋᐊᕐᓗᒍ ᐃᑭᐊᖅᑭᕕᕗᑦ website. ᐃᑲᔪᖅᑕᐅᔭᕆᐊᖃᕈᕕᑦ ᑕᑕᑎᕆᑎᓪᓗᑎᑦ ᑐᑦᓯᕋᐅᒻᒥᒃ, ᐅᕝᕙᓘᓐᓃᑦ ᐊᑐᐃᓐᓇᖃᙱᒃᑯᕕᑦ ᑕᑕᑎᕋᑦᓴᒥᒃ ᖃᕆᓴᐅᔭᒃᑯᑦ, ᖃᐅᔨᒋᐊᕐᕕᒋᓗᒍ ᓄᓇᑦᓯᓐᓂ ᑐᖅᑲᑕᕐᕕᒋᔭᓯ.
ᑐᑭᓯᒋᐊᒃᑲᓂᕐᕕᑦᓴᖅ, ᖃᐅᔨᒋᐊᕐᕕᒋᓗᒍ:
ᑭᐅᕋᓐ ᕙᓚᐅᕋᑎ
ᑐᑭᒧᐊᒃᑎᑦᑎᔨ, ᑐᑭᒧᐊᒍᑎᑦᓴᓄᑦ ᑐᓴᐅᒪᔾᔪᑎᓕᕆᔨ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ
(ᐅ) 867.975.8398 ᐅᕝᕙᓘᓐᓃᑦ ᐊᑭᖃᙱᑦᑐᒧᑦ 1.800.667.2742
kflaherty@qia.ca
