ᒥᓂᔅᑕ ᑲᓇᑕᒥᐅᓄᑦ−ᓄᓇᖃᖅᑐᑐᖃᕐᓄᑦ ᐃᓄᓕᕆᔨᑐᖃᒃᑯᓐᓂᑦ ᒪᒥᐊᑉᐳᖅ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ
ᐋᒡᒌᓯ 14, 2019 — ᐃᖃᓗᐃᑦ, ᓄᓇᕗᑦ — ᑲᓇᑕᒥᐅᓄᑦ−ᓄᓇᖃᖅᑐᑐᖃᕐᓄᑦ ᐃᓄᓕᕆᔨᑐᖃᒃᑯᑦ ᐊᒻᒪᓗ ᐅᑭᐅᖅᑕᖅᑐᒥᐅᓕᕆᔩᑦ ᑲᓇᑕᒥ
ᑲᓇᑕ ᑲᒪᒋᔭᖃᕐᖓᑦ ᐱᔭᕆᐊᑐᓂᖏᓐᓂᒃ ᐅᕙᒍᑦ ᐊᑐᕐᕕᒋᓯᒪᔭᖏᓐᓂᒃ ᐊᒻᒪᓗ ᐃᓕᓴᕐᓯᒍᑎᖃᖅᑐᑎᒃ ᐱᔭᕆᐊᑐᔪᓂᑦ ᓱᓕᔪᓂᑦ ᑕᐃᔅᓱᒪᓂᓴᕐᓂᑦ.
ᐅᓪᓗᒥ, ᐱᔾᔪᑎᒋᓪᓗᒍ ᓴᐃᒻᒪᖃᑎᒌᖕᓂᖅ − ᑖᓐᓇ ᐃᒫᒃ ᑐᑭᓕᒃ ᑕᐃᔅᓱᒪᓂ ᐊᑭᕋᖅᑑᑎᔪᒥᓃᑦ ᑲᑎᓲᖑᒻᒪᑕ, ᑲᑎᓪᓗᑎᒃ ᐃᓱᒪᒋᔪᓐᓇᐃᖅᑎᒌᓲᖑᒻᒪᑕ − ᒥᓂᔅᑕ ᑲᓇᑕᒥᐅᓄᑦ−ᓄᓇᖃᖅᑐᑐᖃᕐᓄᑦ ᐃᓄᓕᕆᔨᑐᖃᒃᑯᓐᓂ ᐃᓕᓴᕆᔭᐅᓯᒪᔪᒥᒃ ᒪᒥᐊᒍᑎᖃᖅᑲᐅᒻᒪᑦ ᐱᔾᔪᑎᒋᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᒐᕙᒪᒃᑯᑦ ᐱᓂᐊᕈᑎᒋᓯᒪᔭᖏᑦ ᐱᔾᔪᑎᒋᓪᓗᒋᑦ ᕿᑭᖅᑕᓂ ᓄᓇᓕᓐᓂᑦ ᐊᑯᓐᓂᖏᓐᓂ 1950 ᐊᒻᒪᓗ 1975.
ᐃᓄᐃᑦ−ᑲᓇᑕᒥᐅᑦ ᐱᓕᕆᖃᑎᒌᓯᒪᓂᖏᑦ, ᐊᑯᓂᐅᓗᐊᖅᑐᐊᓗᒃ, ᐃᓚᖃᕐᓯᒪᒻᒪᑦ ᓈᒻᒪᖏᑦᑐᒥᒃ, ᐊᔾᔨᒋᔭᐅᑎᑕᐅᙱᓂᕐᒥᒃ, ᐋᓐᓂᓇᖅᑐᓂᓪᓗ ᑲᒪᒋᔭᐅᓯᒪᓂᖏᓐᓂᒃ. ᑖᒃᑯᐊ ᐊᕐᕌᒍᐃᑦ ᐊᑐᖅᑎᓪᓗᒋᑦ, ᒐᕙᒪᒃᑯᖏᑦ ᐊᑐᐊᒐᖏᑦ ᐃᓚᖃᕐᓯᒪᒻᒪᑕ ᐊᐅᓪᓛᕈᒪᙱᑦᑑᒐᓗᐊᓂᒃ ᐊᐅᓪᓛᑎᑦᑎᓪᓗᑎᒃ ᐊᒻᒪᓗ ᐃᓚᒌᓂᑦ ᐊᕕᑎᑦᑎᓪᓗᑎᒃ ᕿᑭᖅᑕᓂ ᓄᓇᓕᓐᓂᑦ ᐃᓄᓐᓂᑦ, ᕿᒻᒦᔭᐃᓂᕐᒥᒃ (ᕿᒧᔅᓯᕐᓂᑦ), ᐊᑑᑎᖃᕐᓯᒪᓪᓚᕆᑦᑐᐊᓘᑎᓪᓗᒋᑦ ᐃᓕᖅᑯᓯᖓᓐᓄᑦ, ᐊᓐᓇᐅᒪᒍᑎᐅᓪᓗᑎᒃ ᐊᒻᒪᓗ ᓄᓇᖅᑲᑎᒌᓄᑦ ᐃᓅᓯᖏᓐᓄᑦ ᐊᕐᕌᒍᒐᓵᓗᓐᓂᑦ, ᐊᒻᒪᓗ ᐊᓯᖏᓐᓂᒃ ᐊᐅᓚᑦᑎᒍᑎᖃᖅᑐᑎᒃ. ᑕᒪᒃᑯᐊ ᐱᓂᐊᕈᑕᐅᓯᒪᔪᑦ ᐃᑎᔪᒥᒃ ᐊᑯᓂᐊᓗᓪᓗ ᐊᑑᑎᔪᓂᑦ ᐊᑑᑎᑎᑦᑎᓯᒪᓪᓗᓂ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ.
ᒐᕙᒪᒃᑯᑦ ᐃᓕᓴᕐᓯᔪᑦ ᐱᒻᒪᕆᐊᓗᓐᓂᒃ ᐃᖅᑲᓇᐃᔮᕆᓯᒪᔭᖏᓐᓂᒃ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ (ᑭᓪᓕᓯᓂᐊᖅᑏᑦ, ᐱᓇᓱᐊᕈᑕᐅᓯᒪᔪᖅ ᓯᕗᓕᕐᓯᓪᓗᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ, ᑕᐃᔅᓱᒪᓂᓴᕐᓂᑦ ᑕᑯᔭᐅᑎᑦᑎᓪᓗᑎᒃ ᐱᔭᕇᕈᑎᖏᓐᓂᒃ ᐅᓂᒃᑳᓕᐊᕆᓯᒪᔭᖏᓐᓂᒃ, ᑲᔪᓯᑎᑦᑎᓂᖅ ᓴᐃᒻᒪᖃᑎᒌᓐᓂᕐᒥᒃ. ᑲᓇᑕᐅᑉ ᒐᕙᒪᒃᑯᖏᑦ ᑎᓕᐅᕆᕗᑦ ᐃᓘᓐᓇᑎᒃ ᑲᓇᑕᒥᐅᑦ ᐅᖃᓕᒫᖁᓪᓗᒋᑦ ᖃᐅᔨᒍᑎᒋᓯᒪᔭᖏᓐᓂᒃ ᑕᕝᕙᓃᑦᑐᓂᑦ ᐅᓂᒃᑳᓂᑦ.
ᓯᕗᒧᐊᒍᓐᓇᓂᐊᕐᖓᑕ, ᒥᓂᔅᑕ ᐱᐊᓇᑦ ᓇᓗᓇᐃᕐᓯᔪᖅ ᑲᓇᑕ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᑭᓯᓯᒪᖃᑎᒌᑦᑐᑎᒃ ᐊᖏᖃᑎᒌᓯᒪᒻᒪᑕ ᐃᖅᑲᓇᐃᔭᖃᑎᒌᓐᓂᐊᖅᑐᑎᒃ ᑲᑐᔾᔨᖃᑎᒌᓪᓗᑎᒃ ᐋᖅᑭᔅᓱᐃᓗᑎᒃ ᓯᕕᑐᔪᒨᖓᔪᓂᑦ−ᐊᑐᕐᓂᐊᖅᑐᓂᑦ ᐊᒻᒪᓗ ᑭᐅᔾᔪᑕᐅᕙᓪᓕᐊᖏᓐᓇᓂᐊᖅᑐᓂᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᖃᐅᔨᒍᑎᒋᓯᒪᔭᖏᓐᓄᑦ. ᑖᒃᑯᐊ ᐱᖃᓯᐅᔾᔨᔪᑦ ᑮᓇᐅᔭᓂᑦ ᐊᑐᓕᖅᑎᑦᑎᒍᑎᔅᓴᓂᑦ ᐱᓕᕆᐊᔅᓴᓂᑦ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᑐᕌᖓᔪᓂᑦ ᐊᑐᖅᑎᑦᑎᒋᐊᒃᑲᓐᓂᕈᑎᔅᓴᓂᑦ ᐃᓄᐃᑦ ᐃᓕᖅᑯᓯᖓᓐᓂᒃ, ᒪᒥᓴᕐᓂᕐᒥᒃ ᐊᒻᒪᓗ ᒪᒥᒪᓴᕐᓂᕐᒥᒃ ᐅᓪᓗᒥ ᐃᓄᓐᓄᑦ ᐊᒻᒪᓗ ᓯᕗᓂᔅᓴᑎᓐᓂᓪᓗ ᑭᖑᕚᖑᓂᐊᖅᑐᓄᑦ. ᐅᓪᓗᒥ ᒪᒥᐊᓐᓂᖅ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᐃᑲᔪᖅᑎᒌᒍᑕᐅᓪᓗᓂ ᐱᓇᓱᐊᕈᑕᐅᒻᒪᑦ ᐃᓄᓐᓄᑦ ᑲᓇᑕᐅᓪᓗ ᒐᕙᒪᒃᑯᖏᓐᓄᑦ, ᑲᑐᔾᔨᖃᑎᖃᖅᑐᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ (ᕿᑭᖅᑕᓂᒃᑯᓐᓂᑦ) ᐊᒻᒪᓗ ᐃᓄᐃᑦ−ᑲᓇᑕᐅᓪᓗ ᑲᑐᔾᔨᖃᑎᒌᑦ ᑲᑎᒪᔨᕋᓛᖏᓐᓂᑦ. ᑕᑯᑎᑦᑎᒍᑕᐅᓪᓗᓂᓗ ᑲᓇᑕᐅᑉ ᒐᕙᒪᒃᑯᖏᑕ ᑲᑦᑐᖓᐃᕐᓯᒪᒍᑎᖃᓪᓚᕆᓐᓂᖏᓐᓂᒃ ᓄᑖᕈᖅᑎᑦᑎᒋᐊᕐᓂᕐᒥᒃ ᐃᓄᐃᑦ−ᑲᓇᑕᐅᓪᓗ ᐱᓕᕆᖃᑎᒌᓐᓂᕆᕙᑦᑕᖓᓐᓂᒃ ᒪᓕᑦᑐᒍ ᐃᓕᓴᕐᓯᓂᖓᑦ ᐱᔪᓐᓇᐅᑎᓂᑦ, ᓂᑲᒍᓱᓐᓂᕐᒥᒃ, ᐃᑲᔪᖅᑎᒌᓐᓂᕐᒥᒃ, ᐊᒻᒪᓗ ᑲᑐᔾᔨᖃᑎᒌᓐᓂᕐᒥᒃ.
ᐅᖃᐅᓯᐅᕋᑖᖅᑐᑦ
“ᑲᓇᑕ ᑖᒃᑯᑑᓪᓗᑎᒃ ᑐᑭᑖᕈᑎᖃᖃᑦᑕᕐᓯᒪᔪᑦ ᐃᓄᐃᑦ ᐃᓅᓯᖏᑕ ᒥᔅᓵᓅᖓᔪᓂᑦ, ᐃᓱᒪᒋᔭᖃᖅᑐᑎᒃ ᒐᕙᒪᒃᑯᑦ ᖃᐅᔨᒪᔭᕆᐊᔅᓴᖏᓐᓂᒃ ᑭᓱᑦ ᐱᐅᓂᕐᐹᖑᒻᒪᖔᑕ ᐃᓄᓐᓄᑦ. ᐃᓕᒍᑎᒋᓯᒪᔭᕗᑦ ᐊᒻᒪᓗ ᐃᓕᒍᑎᒋᓂᐊᖅᑕᕗᑦ ᑕᒪᒃᑯᐊ ᑕᒻᒪᕈᑕᐅᓪᓚᕆᖃᑦᑕᕐᓯᒪᔪᑦ. ᑲᑦᑐᖓᐃᕐᓯᒪᔪᒍᑦ ᖃᐅᔨᒪᒋᐊᑦᑎᐊᕈᒪᓪᓗᑕ ᓯᕗᓂᔅᓴᕗᑦ ᐊᔾᔨᒋᔾᔮᖏᒻᒪᒍ ᑕᐃᔅᓱᒪᓂᓴᕐᓂᑦ. ᒪᒥᐊᑉᐳᒍᑦ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᐊᖏᔪᐊᓗᒻᒥᒃ ᐊᑯᓂᐊᓗᓪᓗ ᐊᑑᑎᓯᒪᓂᖏᓐᓄᑦ ᐊᑐᖅᑕᐅᓯᒪᔪᑦ ᐃᓅᓯᖏᓐᓂ ᐊᒻᒪᓗ ᓄᓇᓕᖏᓐᓂ. ᐅᓪᓗᒥ ᓯᕗᓪᓕᕐᐹᒥ ᐊᓪᓗᕆᐊᕈᑎᒋᓂᐊᖅᑕᕗᑦ ᓯᕗᒧᑦ ᐱᕙᓪᓕᐊᑎᓪᓗᑕ ᑲᑎᓗᑕ ᓴᐃᒪᖃᑎᒌᖕᓂᕐᒥᒃ ᐊᑐᕐᓗᑕ.”
ᓂᕈᐊᖅᑕᐅᓯᒪᔪᖅ ᑭᐅᕈᓕᓐ ᐱᐊᓇᑦ, ᒪᓕᒐᓕᐅᖅᑎᕐᔪᐊᖅ
ᒥᓂᔅᑕ ᑲᓇᑕ−ᓄᓇᖃᖅᑐᑐᖃᕐᓄᑦ ᐃᓄᓕᕆᔨᑐᖃᒃᑯᓐᓂ
“ᑖᓐᓇ ᒪᒥᐊᓐᓂᖅ ᐊᖅᑯᑎᑖᖅᑎᑎᒻᒪᑦ ᑕᒪᒃᑮᓐᓄᑦ ᐃᓱᒪᒋᔭᐅᓯᒪᔪᓄᑦ ᐃᓚᒋᔭᐅᑎᑦᑎᓂᕐᒥᒃ ᑲᓇᑕᒥᐅᓂᑦ ᖁᕕᐊᓲᑎᖃᖅᑐᑎᒃ ᐃᓅᓯᖏᓐᓂᒃ ᓄᓇᖃᖅᑐᖁᑎᓕᒫᖏᑕ. ᐊᖅᑯᑎᒋᓯᒪᔭᖓᑦ ᓴᐃᒻᒪᖃᑎᒌᓐᓂᕐᒧᑦ ᐱᔭᕆᐊᑭᑦᑑᓯᒪᙱᒻᒪᑦ − ᐊᕐᕌᒍᒐᓴᐅᓯᒪᒻᒪᑕ, ᐊᒻᒪᓗ ᑐᓂᓯᒪᒋᐊᖃᕐᓯᒪᒻᒪᑕ ᐃᓄᒐᓴᐃᑦ ᐋᖅᑮᓇᓱᑦᑐᑎᒃ ᐃᓕᓴᕆᔭᐅᔾᔪᑎᒋᓛᖅᑕᖓᓂᒃ ᒫᓐᓇᐅᓕᖅᑐᖅ ᐊᐅᓚᑦᑎᔾᔪᓯᐅᕙᑦᑐᓂᑦ ᐊᑐᐊᒐᕐᓂᑦ ᐱᐅᓯᕆᔭᐅᓯᒪᔪᓂᓪᓗ ᕿᑭᖅᑕᓂ ᓄᓇᓕᓐᓂᑦ − ᐅᕙᒍᑦ ᐃᓅᓪᓗᑕ ᓄᓇᑦᑎᓐᓂᑦ. ᖁᕕᐊᓱᑉᐳᖓ ᐅᓪᓗᒥ ᐊᖏᕈᑎᖃᙱᓇᑦᑕ ᐅᒡᒍᐊᕈᑎᓂᑦ ᐅᖃᐅᓯᕐᓂᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ, ᑭᓯᐊᓂᓕ ᐱᓂᐊᕈᑕᐅᓪᓚᕆᓐᓂᐊᖅᑐᓂᑦ ᐊᒻᒪᓗ ᐱᕈᕐᐸᓪᓕᐊᑎᑦᑎᒍᑕᐅᓂᐊᖅᑐᓂᑦ ᐃᑲᔫᑎᖃᕐᓂᐊᖅᑐᓂᑦ ᐃᓄᓐᓄᑦ ᒪᒥᒍᑎᖃᕐᓂᕐᒥᒃ ᐊᒻᒪᓗ ᐋᖅᑮᒍᑕᐅᓂᐊᖅᑐᓂᑦ ᓯᕗᓂᔅᓴᖃᑦᑎᐊᓂᕐᓴᐅᖁᓪᓗᒋᑦ ᑭᖑᕚᕆᔭᐅᓂᐊᖅᑐᑦ ᓯᕗᓂᔅᓴᑎᓐᓂ.”
ᐸᐅᓗᓯ ᐊᕿᐊᕈᖅ,
ᐊᖏᔪᖅᑳᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ
ᑐᑭᓯᑎᑦᑎᒋᐊᕈᑏᑦ ᐊᑐᖅᑕᐅᓯᒪᔪᓂᑦ
- ᒐᕙᒪᒃᑯᑦ ᑎᓕᓯᓚᐅᕐᓯᒪᔪᑦ ᖁᑦᑎᓂᕐᐹᖏᓐᓂ ᑲᓇᑕᒥᐅᓂᑦ ᐸᓖᓯᒃᑯᓐᓂᑦ (ᐸᓖᓯᒃᑯᓐᓂᑦ) ᖃᐅᔨᓴᖁᓪᓗᒋᑦ ᑕᐃᒪᐃᓐᓂᕋᐃᒍᑕᐅᓯᒪᔪᓂᑦ ᕿᒻᒦᔭᐃᓂᐅᓚᐅᕐᓯᒪᔪᑦ ᐱᔾᔪᑎᒋᓪᓗᒋᑦ, ᐊᒻᒪᓗ ᑐᓴᖅᑎᑦᑎᖁᓪᓗᒋᑦ ᒪᓕᒐᓕᐅᕐᕕᔾᔪᐊᕐᒥ.
- ᕿᑭᖅᑕᓂᒃᑯᑦ ᐃᑉᐱᒍᓱᓚᐅᕐᓯᒪᔪᑦ ᐸᓖᓯᒃᑯᑦ ᐅᓂᒃᑳᖏᑦ ᓈᒻᒪᙱᒋᐊᔅᓴᖏᓐᓂᒃ ᐃᓄᐃᑦ ᓱᖅᑯᐃᒋᔭᖏᓐᓄᑦ ᑕᒪᑐᒪ ᒥᔅᓵᓄᑦ.
- ᑲᓇᑕᐅᑉ ᒐᕙᒪᒃᑯᖏᑦ ᐃᓄᓕᒫᓂᑦ ᖃᐅᔨᓴᕈᑕᐅᓂᐊᖅᑐᒥᒃ ᐋᖅᑮᓚᐅᕐᓯᒪᙱᒻᒪᑕ, ᕿᑭᖅᑕᓂᒃᑯᑦ ᐋᖅᑮᓚᐅᕐᓯᒪᔪᑦ ᐃᓛᒃᑰᖅᑐᓂᑦ ᓱᓕᔪᒥᒃ ᑭᓪᓕᓯᓂᐊᖅᑎᐅᓂᐊᖅᑐᓂᑦ ᓄᐊᑦᑎᓂᐊᖅᑐᓂᑦ ᓇᒻᒥᓂᖅ ᓱᖅᑯᐃᒋᔭᐅᔪᓂᑦ ᐊᑐᖅᑕᐅᓚᐅᕐᓯᒪᔪᓂᑦ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᐊᑯᓐᓂᖏᓐᓂ 1950 ᐊᒻᒪᓗ 1975.
- ᑕᒫᓂ 350ᖏᓐᓃᑦᑐᑦ ᐃᓄᐃᑦ ᐅᓂᒃᑳᖃᑦᑕᓚᐅᕐᓯᒪᔪᑦ ᐃᓄᓕᒫᓂᑦ ᓈᓚᖃᑦᑕᑎᓪᓗᒋᑦ ᓱᓕᔪᒥᒃ ᑭᓪᓕᓯᓇᓱᑦᑎᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᑕ ᐊᑐᐊᒐᖏᓐᓂᒃ ᐱᐅᓯᕆᕙᑦᑕᖏᓐᓂᓪᓗ.
- ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐱᔭᕇᕈᑎᖏᓐᓂ ᐅᓂᒃᑳᓂᑦ, ᑲᔪᓯᑎᑦᑎᓂᖅ ᓴᐃᒪᖃᑎᒌᖕᓂᕐᒥᒃ, ᑎᑎᕋᕐᓯᒪᔪᑦ ᐱᖓᓱᓂᑦ ᐊᕐᕌᒍᓂᑦ ᐊᐱᕐᓱᕈᑕᐅᓯᒪᔪᑦ, ᐅᓂᒃᑳᕈᑕᐅᓯᒪᔪᑦ, ᐊᒻᒪᓗ ᐃᑦᑕᕐᓂᓴᕐᓂᑦ ᖃᐅᔨᓴᕈᑕᐅᓯᒪᔪᑦ ᐊᑐᕐᓯᒪᔭᖏᓐᓂ ᕿᑭᖅᑕᓂ ᓄᓇᓖᑦ ᐃᓄᐃᑦ ᒫᓐᓇᐅᓕᖅᑐᖅ ᐊᐅᓚᑦᑎᔾᔪᓯᐅᓯᒪᔪᓂᑦ. ᐅᓂᒃᑳᑦ ᐱᖃᓯᐅᔾᔨᓯᒪᔪᑦ 25ᓂᑦ ᐊᑐᓕᖁᔨᔾᔪᑎᓕᐅᕈᑕᐅᓯᒪᔪᓂᑦ.
- ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᓴᖅᑭᑎᑦᑎᔪᔪᑦ ᐱᔭᕇᕈᑎᖏᓐᓂᒃ ᐅᓂᒃᑳᓂᑦ 2010ᖑᑎᓪᓗᒍ ᑎᑎᕋᕐᓯᒪᓪᓗᑎᒃ ᐊᑑᑎᓯᒪᓂᖏᑦ ᒐᕙᒪᒃᑯᑦ ᐱᓂᐊᕈᑎᒋᓯᒪᔭᖏᑦ ᐊᑯᓐᓂᖏᓐᓂ 1950 ᐊᒻᒪᓗ 1975.
- ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪᓗ ᕿᑭᖅᑕᓂᒃᑯᑦ ᓱᓕ ᐃᖅᑲᓇᐃᔭᖃᑎᒌᖃᑦᑕᓂᐊᖅᑐᑦ ᑲᒪᒋᔭᐅᔭᕆᐊᓖᑦ ᐱᔾᔪᑎᒋᓪᓗᒋᑦ ᐊᑎᓕᐅᕐᓯᒪᓕᖅᑲᑕ ᐊᖏᖃᑎᒌᒍᑎᓂᑦ.
ᑕᒪᑐᒪ ᒥᔅᓵᓅᖓᔪᑦ ᐅᖃᓕᒫᕋᔅᓴᐃᑦ
- ᑭᓪᓕᓯᓂᐊᖅᑏᑦ ᐱᔭᕇᕈᑎᖏᑦ ᐅᓂᒃᑳᑦ: ᑲᔪᓯᑎᑦᑎᓂᖅ ᓴᐃᒪᖃᑎᒌᖕᓂᕐᒥᒃ
- ᑲᒪᒋᔭᐅᒋᐊᕐᓂᐊᖅᑐᑦ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐅᓂᒃᑳᖏᓐᓃᑦᑐᑦ
- ᒪᒥᐊᒍᑎᖓᑦ ᑲᓇᑕᐅᑉ ᒐᕙᒪᒃᑯᖏᑕ ᐱᓂᐊᕈᑕᐅᓯᒪᔪᑦ ᐊᑯᓐᓂᖏᓐᓂ 1950 ᐊᒻᒪᓗ 1975 ᐱᔾᔪᑎᒋᓪᓗᒋᑦ ᕿᑭᖅᑕᓂ ᓄᓇᓕᓐᓂᑦ [Webpage to be created]
- ᐱᕙᓪᓕᐊᓯᒪᓂᖏᑦ
ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᓴᕋᔅᓴᓕᕆᔩᑦ ᑐᑭᓯᒋᐊᕐᕕᐅᔪᓐᓇᖅᑐᑦ:
ᒫᑎᐅ ᑎᓚᓐ−ᓖᑦ
ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᔾᔪᑎᓄᑦ
ᐊᓪᓚᕝᕕᖓᓂ ᓂᕈᐊᖅᑕᐅᓯᒪᔫᑉ ᑭᐅᕈᓕᓐ ᐱᐊᓇᑦ
ᒥᓂᔅᑕ ᑲᓇᑕᒥ−ᓄᓇᖃᖅᑐᑐᖃᕐᓄᑦ ᐃᓄᓕᕆᔨᑐᖃᒃᑯᓐᓂ
819-997-0002
ᓰᒪ ᓴHᐊ ᔨᐅᕋHᐃ
ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᔾᔪᑎᓄᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ
867-975-8413
ᑐᓴᕋᔅᓴᓕᕆᔩᑦ
ᑲᓇᑕᒥ−ᓄᓇᖃᖅᑐᑐᖃᕐᓄᑦ ᐃᓄᓕᕆᔨᑐᖃᒃᑯᓐᓂ ᐊᒻᒪᓗ ᐅᑭᐅᖅᑕᖅᑐᒥᐅᓅᖓᔪᓕᕆᔨᓂᑦ ᑲᓇᑕᒥ
819-934-2302
ᑐᓴᐅᒪᐃᓐᓇᖃᑦᑕᕆᔅᓯ
ᑐᓴᐅᒪᖃᑕᐅᒋᔅᓯ ᐅᖃᐅᓯᖏᓐᓂᒃ ᐱᔾᔪᑎᒋᓪᓗᒋ ᓄᓇᖃᖅᑐᑐᖃᐃᑦ ᑲᓇᑕᒥ:
ᑐᐃᑐ: GovCan – Indigenous
ᕙᐃᔅᐳᒃ: GovCan – Indigenous Peoples
ᐃᓐᓯᑕᒍᕋᒻ: @gcIndigenous
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
ᑐᐃᑐ: @Qikiqtani_Inuit
ᕙᐃᔅᐳᒃ: Qikiqtani Inuit Assoc.
ᐃᓐᓯᑕᒍᕋᒻ: @Qikiqtani_Inuit ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓ: www.qia.ca
![](https://www.qia.ca//wp-content/uploads/2019/08/qia_goc-logo-1.jpg)