ᒫᓐᓇ ᑐᓴᕐᑎᑦᑎᔾᔪᑕᐅᓗᓂ

ᐃᓄᓕᒫᓄᑦ ᑐᓴᕐᑎᑦᑎᔾᔪᑎᕗᑦ

ᐅᓪᓗᒥ: ᐋᒍᓯ 29, 2018

ᐃᒪᓐᓇᐅᖕᒪᑦ: ᑲᑎᒪᔨᒃᓴᓂᒃ ᐆᒃᑐᖁᔨᕗᒍᑦ: ᓄᓇᕗᑦᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ, ᑲᑭᕙᒃ ᑮᓇᐅᔭᒃᓴᓄᑦ ᐊᒻᒪᓗ ᐅᑎᕈᓐᓇᓐᖏᑦᑐᓄ ᒐᕙᒪᒃᑯᓄᑦ ᑮᓇᐅᔭᒃᓂᒃ ᖁᕙᓯᖕᓂᖅᓴᒧᑦ ᑲᑎᒪᔨᕋᓛᑦ, ᓄᓇᕗᒻᒥ ᐸᕐᓇᐃᔩᑦ, ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᕿᓂᖅᑐᑦ ᐱᓕᕆᔪᓐᓇᑦᓯᐊᖅᑐᓂᒃ ᐊᒻᒪᓗ ᐱᔪᓐᓇᑦᓯᐊᖅᑐᓂᒃ ᐃᓄᖕᓂᒃ ᐅᑯᓄᖓ ᑲᑎᒪᔨᒃᓴᑦ ᐃᓂᖏᓐᓄᑦ. ᐃᓱᒪᒋᔭᐅᔪᓐᓇᖅᑐᑎᑦ, ᓂᕈᐊᒐᒃᓴᐅᔪᒪᔪᑦ ᐱᓕᕆᖃᑕᐅᑦᓯᐊᖏᓐᓇᕐᓗᑎᒃ ᐊᒻᒪᓗ ᐃᓄᑦᑎᐊᕙᐅᓗᑎᒃ ᐊᖕᖏᖅᓯᒪᑦᑎᐊᖅᑐᑦ ᑭᒡᒐᖅᑐᐃᔪᒪᓪᓗᑎᒃ ᕿᑭᖅᑕᓂ ᐃᓄᓂᖏᓐᓂᒃ ᐊᒻᒪᓗ ᑐᑭᓯᐅᒪᑦᓯᐊᖅᑐᑦ ᓄᓇᕗᒻᒥ ᐊᕿᖃᑎᒌᒍᑎᓂᒃ ᐱᓯᒪᔪᓄᑦ ᐃᓂᖏᓐᓄᑦ ᐊᒻᒪᓗ ᑎᓕᔭᐅᓯᒪᓂᖏᑦ ᐃᓂᒋᔭᖏᑦᑕ.

• ᓄᓇᕗᑦᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ (4-ᐅᑭᐅᓄᑦ ᐊᑕᓗᑎᑦ)
  • ᐊᑖᒍᑦ ᐃᓚᖓ 5 ᓄᓇᕗᑦ ᐊᖕᖏᕈᑎᓂ, ᓄᓇᕗᑦᒥ ᐆᒪᔪᓕᕆᔨᕐᔪᐊᑦ ᑲᑎᒪᔨᖏᑦ ᐱᐅᖅᓱᐊᕆᐊᓕᑦ ᓂᕐᔪᑎᓂᒃ ᐊᒻᒪᓗ ᓂᕐᔪᑎᑦ ᐃᓂᖏᓐᓂᒃ ᐊᑯᓂ ᐃᑲᔫᑎᓂᐊᖅᑐᑦ ᑕᒪᐃᓐᓂᒃ ᓄᓇᕗᒻᒥ ᓄᓇᖃᖅᑐᓂᒃ ᑕᐃᒪᓗ ᐃᒃᐱᒋᑦᑎᐊᕐᓗᒋᑦ ᐃᓄᐃᑦ ᐊᖑᓇᓱᒍᓯᑐᖃᖏᑦ ᐱᔪᓐᓇᕐᓂᖏᑦ ᐊᒻᒪᓗ ᓯᕗᓪᓕᖅᐸᐅᑎᖁᔭᖏᑦ. ᑐᑭᓯᒋᐊᑲᓐᓂᕐᕕᒋᓗᒍ, ᐅᓇ ᒪᑐᐃᕐᓗᒍ nwmb.com ᐅᒡᕙᓘᓐᓃᑦ ᐅᖃᖃᑎᒋᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ.
• ᕿᑭᖅᑖᓗᒃ ᑯᐊᐳᕆᓴᓐ (3-ᐅᑭᐅᓄᑦ ᐊᑕᓗᑎᑦ)
  • ᕿᑭᖅᑖᓗᒃ ᑯᐊᐳᕆᓴᓐ ᓇᒦᓂᖁᑎᒋᔭᐅᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᑦ ᑮᓇᐅᔭᓕᐅᕋᓱᐊᖅᑐᖅ ᐱᕙᓪᓕᐊᑎᑦᑎᔨᐅᓪᓗᑎᒃ ᑯᐊᐳᕆᓴᓐ ᐃᖅᑲᓇᐃᔭᕐᑎᑦᑎᓗᓂ ᐊᒻᒪᓗ ᑮᓇᐅᔭᒃᓴᖃᕐᑎᑦᑎᓗᓂ ᐃᓄᖕᓂᒃ ᓄᓇᖓᓐᓂ.
• ᑲᑭᕙᒃ ᑮᓇᐅᔭᒃᓴᓄᑦ ᐊᒻᒪᓗ ᐅᑎᕈᓐᓇᓐᖏᑦᑐᓄ ᒐᕙᒪᒃᑯᓄᑦ ᑮᓇᐅᔭᒃᓂᒃ ᖁᕙᓯᖕᓂᖅᓴᒧᑦ ᑲᑎᒪᔨᕋᓛᑦ (3-ᐅᑭᐅᓄᑦ ᐊᑕᓗᑎᑦ)
  • ᐅᑯᐊ ᑲᑎᒪᔨᕋᓛᑦ ᑲᑎᒪᕙᒃᑐᑦ ᕿᒥᕐᕈᐊᕆᐊᖃᓕᕌᖓᒥᒃ ᐳᖅᑐᓂᖅᓴᐅᒧᐊᖅᑕᓂᒃ ᖃᐅᔨᓴᖅᑕᐅᖁᓪᓗᒋᑦ ᐊᖕᖏᖅᑕᐅᓯᒪᓐᖏᑦᑐᑦ ᑮᓇᐅᔭᒃᓴᐃᑦ ᑐᒃᓯᕋᕐᕕᐅᕙᒃᑐᑦ ᑲᑭᕙᒃ ᑲᑐᔾᔨᖃᑎᒌᖏᑦ ᖃᓄᕆᑦᑐᑐᐃᓐᓇᓄᑦ ᐱᓕᕆᑎᑦᑎᔾᔪᑎᒋᔭᖏᓐᓄᑦ ᐊᒻᒪᓗ ᐱᔨᑦᑎᕋᐅᑎᖏᓐᓄᑦ. ᐆᒃᑑᖅᑐᑦ ᐃᖅᑲᓇᐃᔭᖅᑎᐅᓐᖏᑦᑐ ᑭᓯᐊᓂ ᖃᑭᕙᒃᑯᓂ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂ, ᐅᒡᕙᓘᓐᓃᑦ ᓇᓕᐊᖕᓂᑐᐃᓐᓇᖅ ᑲᑐᔾᔨᖃᑎᒌᓂᑦ ᐅᒡᕙᓘᓐᓃᑦ ᑯᐊᐳᕆᓴᓐ ᐊᐅᓚᑕᐅᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ.
• ᓄᓇᕗᒻᒥ ᐸᕐᓇᐃᔩᑦ (3-ᐅᑭᐅᓄᑦ ᐊᑕᓗᑎᑦ)
  • ᐊᑖᒍᑦ ᐃᓚᖓ 11 ᓄᓇᕗᑦ ᐊᖕᖏᕈᑎᓂ, ᓄᓇᕗᒻᒥ ᐸᕐᓇᐃᔩᑦ ᐱᔭᒃᓴᖃᖅᑐᑦ ᐱᕙᓪᓕᐊᑎᑦᑎᓗᑎᒃ, ᐊᑐᓕᖅᑕᐅᑎᑦᑎᓗᑎᒃ, ᐊᒻᒪᓗ ᒥᐊᓂᕆᓗᑎᒃ ᓄᓇᐃᑦ ᐊᑐᖅᑕᐅᔪᒪᔪᑦ ᐸᕐᓇᐅᑎᖏᓐᓂᒃ ᐅᑯᐊ ᑐᑭᒧᐊᒍᑕᐅᔪ ᐊᒻᒪᓗ ᐊᑐᖅᑕᐅᕙᒃᑐᑦ ᐅᔭᕋᖕᓂᐊᕈᒪᔪᓄᑦ ᐊᒻᒪᓗ ᐱᕙᓪᓕᐊᑎᑦᑎᓂᕐᒧᑦ ᐃᓄᐃᑦ ᓄᓇᖁᑎᖏᓐᓂ. ᑐᑭᓯᒋᐊᑲᓐᓂᕐᕕᒋᓗᒍ, ᐅᓇ ᒪᑐᐃᕐᓗᒍ nunavut.ca ᐅᒡᕙᓘᓐᓃᑦ ᐅᖃᖃᑎᒋᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ.
• ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ (3-ᐅᑭᐅᓄᑦ ᐊᑕᓗᑎᑦ)
  • ᐅᑯᐊ ᐃᓄᐃᑦ ᐱᖁᑎᖏᓐᓂᒃ ᓇᐅᑦᓯᖅᑐᖅᑏᑦ ᐸᐸᑕᐅᓂᖏᓐᓄᑦ, ᐱᕚᓪᓕᕈᑎᒃᓴᖏᓐᓄᑦ ᐊᒻᒪᓗ ᓴᐳᒻᒥᓪᓗᒋᑦ ᐃᓄᐃᑦ ᐱᐅᓯᑐᖃᖏᑦ ᐱᖁᑎᑐᖃᖏᑦ ᐃᓕᖁᓯᕆᖃᑦᑕᖅᓯᒪᔭᖏᑦ ᐊᒻᒪᓗ ᐃᓕᓴᕐᓇᐅᑎᒋᔭᖏᓐᓂᒃ, ᖃᐅᔨᔭᐅᕙᒃᑐᓂᒃ ᐃᓄᖏᓐᓂᒃ ᓇᒥᕐᒥᐅᑕᐅᓐᓂᕐᒪᖔᑕ ᐊᒻᒪᓗ ᓄᓇᐃᑦ ᐊᑎᑐᖃᖏᓐᓂᒃ. ᑐᑭᓯᒋᐊᑲᓐᓂᕐᕕᒋᓗᒍ, ᐅᓇ ᒪᑐᐃᕐᓗᒍ ihti.ca ᐅᒡᕙᓘᓐᓃᑦ ᐅᖃᖃᑎᒋᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑕᒪᐃᓐᓄᑦ ᐃᓄᖕᓂᑦ ᐃᓚᐅᑦᓯᐊᖁᔨᕗᑦ ᐊᑐᓕᖅᑎᑕᐅᕙᓪᓕᐊᓂᖏᓐᓄᑦ ᓄᓇᕗᑦ ᐊᖕᖏᕈᑎᖏᑦ, ᓲᕐᓗ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑐᓕᖅᑕᐅᑎᑦᑎᓯᒪᕗᖅ ᒪᑐᐃᖓᑦᓯᐊᖅᖢᑎᒃ ᐊᒻᒪᓗ ᓵᑕᒃᓴᐅᒍᓐᓇᖅᖢᑎᒃ ᐱᕙᓪᓕᐊᓂᒃᑯᑦ ᐃᓱᒪᒋᓗᒋᑦ ᐊᔪᖏᑦᑎᐊᓂᐊᖅᑐᑦ ᑲᑎᒪᔨᖑᕋᓱᒃᑐᑦ. ᐊᑏ ᖃᐅᔨᒪᓂᐊᖅᐳᑎᑦ ᐸᓖᓯᒃᑯᓂᑦ ᖃᐅᔨᓴᖅᑕᐅᑎᓪᓗᑎᑦ ᑕᐃᒪᓐᓇᐃᔭᕆᐊᖃᖅᑐᑦ ᑕᒪᕐᓂᒃ ᑎᒃᑯᐊᖅᑕᐅᓂᐊᖅᑐᑦ/ᓂᕈᐊᒐᒃᓴᖑᕋᓱᒃᑐᑦ.

ᐊᑏ ᑐᓂᓯᓗᑎᑦ ᑎᑎᕋᖅᓯᒪᔪᓂᒃ ᐃᖅᑲᓇᐃᔮᖅᑖᕋᓲᑎᓂᒃ ᐊᒻᒪᓗ ᑎᑎᖃᒥᒃ, ᐃᓄᒃᑎᑐᑦ ᐅᒡᕙᓘᓐᓃᑦ ᖃᓪᓗᓈᑎᑐᑦ, ᑎᑎᕋᖅᓯᒪᓗᒍ ᓇᓕᐊᖕᓂᒃ ᒪᑐᐃᖓᔪᒥᒃ ᐃᓂᒥᒃ ᐆᒃᑐᕐᒪᖔᕐᐱᑦ, ᐊᒻᒪᓗ ᐅᖃᐅᓯᕆᓗᒋᑦ ᓴᕿᑎᓪᓗᒋᑦ ᓴᓇᓕᕆᔪᓐᓇᖅᑕᑎᑦ ᐊᒻᒪᓗ ᐱᓕᕆᐊᕆᓯᒪᔭᑎᑦ ᐅᕗᖓ:

Qikiqtani Inuit Association

P.O. Box 1340

Iqaluit, Nunavut X0A 0H0

Ph: (867) 975-8400

Fax: (867) 979-3238

Toll Free: 1-800-667-2742

Email: nominations@qia.ca

ᑐᑭᓯᒋᐊᑲᓐᓂᕈᓐᓇᖅᑐᑎᑦ ᑕᒪᒃᑯᓂᖓ ᓇᓪᓕᐊᖕᓂᑐᐃᓐᓇᖅ ᐱᕕᖃᖅᑎᑕᐅᕗᑎᑦ, ᐊᑏ ᐅᖃᖃᑎᒋᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᒡᕙᓘᓐᓃᑦ ᓄᓇᓕᕆᔨᕋᓛᑦ ᓄᓇᑦᓯᓂ.

ᐅᓇ ᓄᖃᕐᕕᒃᓴᖓ ᐆᒃᑑᑎᓂᒃ ᐱᔪᒪᔪᓐᓃᕐᓗᑎᒃ ᓯᑎᐱᕆ 14, 2018 ᑕᐃᑲᓂ 5:00 ᐅᓐᓄᓴᒃᑯᑦ ᑲᓇᖕᓇᖓᓂ 

ᑐᓴᒐᒃᓴᓕᕆᔨᒃᑯᓄᑦ ᖃᐅᔨᒋᐊᕈᓐᓇᖅᑐᑎᑦ, ᐅᓇ ᐅᖃᖃᑎᒋᓗᒍ:

ᓰᒪ ᓴᕼᐋ ᔨᕆᕼᐃ, ᑐᑭᒧᐊᒃᑎᖓ ᑐᓴᐅᑎᓕᕆᔨᒃᑯᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

(867) 975.8413

1.800.667.2742