ᐅᐱᕐᖔᒃᑯᑦ ᑲᑎᒪᓂᕗᑦ ᐃᒃᐱᐊᕐᔪᖕᒥ ᐊᑑᑎᖃᑦᓯᐊᖅᑲᐅᔪᖅ;  ᑲᑎᒪᔨᕗᑦ ᖃᑦᓯᑲᓪᓚᖕᓂᑦ ᐱᒻᒪᕆᐅᔪᓂᒃ ᐃᓱᒪᓕᐅᕈᑎᖃᖅᑐᑎᒃ.

ᐃᓚᖓᑦ ᖁᕕᐊᓇᒻᒪᕆᒃᑐᖅ ᓴᖅᑭᑎᑕᐅᓂᖓ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦᑕ ᐃᓕᓐᓂᐊᒃᑲᓐᓂᕈᒪᔪᓄᑦ ᐃᑲᔫᑎᒃᓴᑦ.

ᑖᒃᑯᐊ ᑲᑎᒪᔩᑦ ᐃᓱᒪᓕᐅᕈᑎᖃᖅᑐᑦ ᑮᓇᐅᔭᐃᕈᑎᖃᒃᑲᓐᓂᕐᓂᐊᕐᓂᕐᒥᓂᒃ $200,000 ᖁᑦᓯᖕᓂᖅᓴᓂᒃ ᐃᓕᓐᓂᐊᕐᓂᕐᒧᑦ ᕿᑭᖅᑕᓂ ᐃᓕᓐᓂᐊᖅᑎᓄᑦ.   ᑖᓐᓇ ᐃᓚᒋᐊᕈᑕᐅᔪᖅ ᓴᖅᑭᓯᒪᑎᐊᓂᒃᑕᑦᑎᓐᓄᑦ $5,000 ᔮᓐ ᐊᒪᕈᐊᓕᒃ ᐃᓕᓐᓂᐊᕐᓂᕐᒧᑦ ᐃᑲᔫᑎᓄᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᒃᐱᕈᓱᖕᒪᑕ ᑕᒪᓐᓇ ᐃᓕᓐᓂᐊᓂᖅ ᓯᕗᒻᒧᐊᒍᑕᐅᑦᓯᐊᕈᓐᓇᕐᓂᖓᓂᒃ ᐊᒻᒪ ᐊᔪᕈᓐᓃᕈᑕᐅᔪᓐᓇᓂᖓ ᒪᒃᑯᒃᑐᓄᑦ ᐃᓄᖕᓄᑦ ᐊᒻᒪ ᓯᓚᑦᑐᖅᓴᕐᕕᖕᓄᑦ ᐅᕝᕙᓘᓐᓃᑦ ᓯᓚᑦᑐᖅᓴᕐᕕᒡᔪᐊᓅᕈᒪᔪᓄᑦ ᒪᑐᐃᖅᓯᔪᖅ ᒪᒃᑯᒃᑐᓄᑦ ᐃᓄᖕᓄᑦ ᐱᓕᕆᐊᖃᑦᓯᐊᕐᓂᖅᓴᐅᒍᒪᔪᓄᑦ.  ᐃᓕᓐᓂᐊᕐᓂᒃ ᐱᔪᓐᓇᐅᑎᑖᖅᑎᑦᓯᕙᖕᒪᑦ ᒪᒃᑯᒃᑐᖁᑎᑦᑎᓐᓂᒃ ᓯᕗᓕᖅᑎᐅᑦᓯᐊᕐᓂᖅᓴᐅᓕᖅᑐᑎᒃ.  ᑕᒡᕙᓂ ᓄᑖᒥ ᐃᓕᓐᓂᐊᒃᑲᓐᓂᕈᑎᒃᓴᓂᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᓪᓗᕆᐊᖅᑐᑦ ᑕᐃᑯᖓᑦᓯᐊᖅ ᐃᑲᔪᒃᑲᓐᓂᕈᑎᒃᓴᓄᑦ ᐃᓕᓐᓂᐊᖅᑎᓄᑦ.

ᑖᒃᑯᐊ $200,000 ᐊᑐᓂ ᐊᕐᕌᒍᓄᑦ ᐊᕕᒃᓯᒪᓂᐊᖅᑐᑦ ᑕᒡᕗᖓ $2,500 ᐊᑕᐅᓯᖅ ᐃᓕᓐᓂᐊᖅᑎ ᐊᑐᓂ ᐃᓕᓐᓂᐊᕐᓇᐅᔪᓄᑦ.  ᑖᓐᓇ ᑐᑭᖃᖅᑐᖅ 80 ᐃᓕᓐᓂᐊᖅᑏᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓕᓐᓂᐊᒃᑲᓐᓂᕈᑎᒃᓴᖁᑎᖏᓐᓂᒃ ᐊᑐᓂ ᐊᕐᕌᒍᓄᑦ.  ᑖᓐᓇ  ᓄᑖᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓕᓐᓂᐊᒃᑲᓐᓂᕈᑎᒃᓴᖓᑦ ᐱᔭᐅᔪᓐᓇᖅᑐᖅ ᐃᓄᖕᓄᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᕐᓂᖏᑦ ᑎᑎᖅᑕᐅᓯᒪᔪᑦ ᖁᑦᓯᖕᓂᖅᓴᓂ ᐃᓕᓐᓂᐊᕐᕕᖕᓂ.

ᐃᓕᓐᓂᐊᖅᑏᑦ ᑐᒃᓯᕋᖅᑐᑦ ᑖᑦᓱᒥᖓ ᐃᓕᓐᓂᐊᒃᑲᓐᓂᕈᑎᒃᓴᒥᒃ ᐱᖃᕆᐊᓕᒃ ᓄᓇᕗᑦ ᑐᓐᖓᕕᒃ ᑎᒥᖓᑦᑕ ᓈᓴᐅᑎᖃᕐᕕᖏᓐᓂᒃ ᐃᓚᐅᔾᔪᑎᓂᒃ ᐊᒻᒪ ᐃᓅᓗᓂ ᐊᑖᒍ ᓄᓇᕗᒥ ᐊᖏᕈᑏᑦ ᕿᑭᖅᑕᓂ.  ᑐᒃᓯᕋᐅᑏᑦ ᐊᒻᒪ ᐃᓕᓐᓂᐊᒃᑲᓐᓂᕈᑎᒃᓴᓄᑦ ᑐᑭᒧᐊᒍᑏᑦ ᐱᔭᐅᔪᓐᓇᖅᑐᑦ ᐃᑭᐊᖅᑭᕕᖕᒥ ᖃᕆᓴᐅᔭᒃᑯᑦ.

ᐊᓯᖓᑦᑕᐅᖅ ᖁᕕᐊᓇᖅᑐᖅ ᐃᓱᒪᓕᐅᕈᑕᐅᓚᐅᖅᑐᖅ ᑲᑎᒪᔩᑦ ᑲᑎᒪᓂᖏᓐᓂᒃ ᐱᔾᔪᑎᖃᖅᑐᖅ ᓄᑖᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦᑕ ᐱᓕᕆᐊᒃᓴᖓᑦ.  ᐋᖅᑭᒃᓱᐃᓂᐊᖅᑐᒍᑦ ᐃᓚᒋᐊᕈᑎᒃᓴᓂᒃ 1-ᒥᓕᔭᓂᒃ ᐃᑲᔫᑎᓄᑦ ᐱᓕᕆᐊᓄᑦ, ᖁᔭᓐᓇᒦᒃ ᑖᓐᓇ ᓄᑖᖅ  ᑮᓇᐅᔭᓕᐅᕈᑎᖃᕐᓂᕐᒧᑦ ᐊᑐᐊᒐᐅᓕᖅᑐᖅ.

ᐅᐱᕐᖔᖑᖅᑲᐅᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᖅᑲᓇᐃᔭᖅᑎᖏᑦ ᐃᖏᕐᕋᓚᐅᖅᑐᑦ ᐃᓘᓐᓇᖏᓐᓄᑦ 13 ᓄᓇᓕᖕᓄᑦ ᐅᖃᐅᓯᕆᒋᐊᖅᑐᖅᑐᒍ ᑖᓐᓇ ᓄᑖᖅ ᐱᓕᕆᖑᓂᐊᖅᑐᖅ.  ᓄᓇᓖᑦ ᐋᔩᖃᑎᒋᔭᐅᑎᓪᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᐱᕆᓚᐅᖅᑐᑦ ᓄᓇᓕᖕᒥᐅᓂᒃ ᐃᓚᐅᖁᓪᓗᒋᑦ ᖃᓄᐃᑦᑑᒐᔭᕐᓂᖏᓐᓂᒃ ᐱᓕᕆᐅᐊᒃᓴᑦ ᐅᕝᕙᓘᓐᓃᑦ ᑭᓐᖒᒪᔭᐅᔪᑦ ᓄᑖᑦ ᐱᓕᕆᐊᒃᓴᑦ ᐃᑲᔫᑏᑦ.

ᐃᒃᐱᐊᕐᔪᖕᒥ ᑖᒃᑯᐊ ᑲᑎᒪᔩᑦ ᕿᒥᕐᕈᔪᓐᓇᖅᓯᓚᐅᖅᑐᑦ ᐅᓂᒃᑳᓂ ᑕᒪᒃᑯᓂᖓ ᐋᔩᖃᑎᒌᒍᑕᐅᓚᐅᖅᑐᓂᒃ ᐊᒻᒪ ᐃᓱᒪᓕᐅᕈᑎᒋᓪᓗᒋᑦ ᐱᓕᕆᐊᒃᓴᓄᑦ ᓯᕗᓪᓕᐅᔾᔭᐅᓂᐊᖅᑐᓄᑦ ᐊᕐᕌᒎᓂᐊᖅᑑᖕᓄᑦ ᒪᕐᕉᖕᓄᑦ.  ᑕᒪᒃᑯᐊ ᑐᓴᖅᑕᐅᔪᑦ ᓄᓇᓕᖕᓂᑦ ᓂᐱᖃᑦᓯᐊᓚᐅᖅᑐᑦ ᐊᒻᒪ ᓇᓗᓇᐃᖅᓯᒪᑦᓯᐊᖅᑐᑎᒃ.  ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑲᑎᒪᔨᖏᑦ ᓂᕈᐊᓚᐅᖅᑐᑦ ᒪᕐᕉᖕᓂᑦ ᐊᑐᖅᑕᐅᓂᐊᖅᑐᓂᒃ ᓴᖅᑭᑦᑕᐃᓐᓇᓚᐅᖅᑐᓂᒃ ᓄᓇᓕᓕᒫᓂ;  ᐃᓕᖅᑯᓯᓕᕆᓂᕐᒧᑦ ᐱᓕᕆᐊᒃᓴᑦ ᐊᒻᒪ ᐸᐃᕆᕕᓕᕆᓂᖅ ᐊᒻᒪ ᐃᓕᓐᓂᐊᕐᓂᐊᓕᓵᖅᑐᓂᒃ ᐱᓕᒻᒪᒃᓴᐃᓂᖅ.

ᒫᓐᓇ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᖅᑲᓇᐃᔭᖅᑎᖏᑦ ᐱᓕᕆᐊᖃᕐᓂᐊᖅᑐᑦ ᐋᖅᑭᒃᓱᐃᓗᑎᒃ ᑖᒃᑯᓂᖓ ᒪᕐᕉᖕᓂᑦ ᐱᓕᕆᐊᖑᓂᐊᖅᑑᖕᓂᑦ ᓴᖅᑭᑎᑕᐅᔪᓐᓇᖅᓯᖁᓪᓗᒋᑦ ᐱᓕᕆᐊᒃᓴᑦ ᐃᑲᔫᑏᑦ ᕿᑭᖅᑕᓂ ᐃᓄᖕᓄᑦ.

ᐊᓯᐊᑦᑕᖅ ᑐᓴᕈᒥᓇᖅᑐᖅ ᐃᓚᖃᖅᑐᑦ ᑲᑎᒪᔨᑦ ᐃᓱᒪᓕᐅᕈᑎᖃᓚᐅᕐᓂᖏᑦ ᐊᖏᕈᑎᖃᖅᑐᑎᒃ $100,000 ᐊᔾᔨᒌᓐᖏᑦᑐᓄᑦ ᓄᓇᓕᖕᓂ ᐱᒋᐊᖅᑎᑕᐅᔪᓄᑦ ᕿᑭᖅᑕᓂ ᐊᕐᕌᒎᓂᐊᖅᑐᓄᑦ ᑕᓪᒪᓄᑦ ᐊᖅᑯᑎᒋᓗᒋᑦ ᐃᑲᔫᑏᑦ, ᐊᐃᑦᑑᑏᓪᓗ ᐱᓕᕆᐊᑦ.

ᑖᒃᑯᐊ ᑮᓇᐅᔭᐃᑦ ᐱᖏᐊᖅᑎᑦᓯᒍᑕᐅᓂᐊᖅᑐᑦ ᖃᑦᓯᑲᓪᓚᖕᓂᓄᑦ ᕿᑭᖅᑕᓂ ᓄᓇᓕᖕᓄᑦ ᐃᓚᐅᓪᓗᓂ ᐃᒃᐱᐊᕐᔪᒃ.

ᑖᒃᑯᐊ ᐊᖏᕈᑕᐅᔪᑦ ᐱᓕᕆᐊᒃᓴᑦ ᐃᓚᖃᖅᑐᑦ:

• $10,000 ᐊᑐᓂ ᐊᕐᕌᒍᓄᑦ ᑕᓪᒪᓄᑦ ᐊᕐᕌᒎᓂᐊᖅᑐᓄᑦ ᐊᕐᕌᒍᑕᒫᑦ ᓄᓇᕗᒥ ᕿᒧᒃᓯᐅᔾᔪᐊᕐᓂᕐᒧᑦ
• $10,000 ᐊᑐᓂ ᐊᕐᕌᒍᓄᑦ ᑕᓪᒪᓄᑦ ᐊᕐᕌᒎᓂᐊᖅᑐᓄᑦ ᐊᕐᕌᒍᑕᒫᑦ ᐊᕐᕙᒐᓱᐊᕐᓂᕐᒧᑦ ᕿᑭᖅᑕᓂ
• $2,000 ᓄᓇᖃᖅᑳᖅᓯᒪᔪᑦ ᓯᕗᒻᒧᐊᒋᐊᕈᑎᖏᓐᓂᒃ ᐱᓕᕆᐊᓂᒃ ᐃᒃᐱᐊᕐᔪᖕᒧᑦ

 

ᑖᒃᑯᐊ ᑮᓇᐅᔭᐃᑦ ᓄᓇᕗᒥ ᕿᒧᒃᓯᐅᔾᔪᐊᓂᕐᒧᑦ ᐃᑲᔫᑎᓂᐊᖅᑐᑦ ᐅᑎᖅᐸᓪᓕᐊᓂᖏᓐᓄᑦ ᐊᒻᒪ ᐋᖅᑭᐅᒪᑎᑕᐅᓂᖏᓐᓄᑦ ᕿᒧᒃᓯᐅᔾᔪᐊᕐᓂᖅ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦᑕ ᐃᖅᑲᓇᐃᔭᖅᑎᖏᑦ ᐱᓕᕆᐊᖃᖅᑐᑦ ᒪᓕᒃᑕᐅᔪᒃᓴᓂᒃ ᑖᒃᑯᐊ ᑮᓇᐅᔭᑦ ᑎᓂᐅᖅᑲᖅᑕᐅᔾᔪᑎᒃᓴᖏᑦ ᐊᕐᕌᒍᑕᒫᑦ ᐊᕐᕙᒐᓱᐊᕐᓂᕐᒧᑦ ᑕᒪᒃᑯᐊ ᕿᑭᖅᑕᓂ ᓄᓇᓕᐅᔪ ᐃᓚᐅᔪᑦ ᐊᖑᓚᓱᐊᕐᓂᕐᒧᑦ ᐊᑐᕈᓐᓇᖁᓪᓗᒋᑦ ᑖᒃᑯᓂᖓ ᑮᓇᐅᔭᓂᒃ.

ᓄᓇᖃᖅᑳᖅᓯᒪᔪᑦ ᓯᕗᒻᒧᐊᒋᐊᕈᑎᖏᓐᓂᒃ ᐱᓕᕆᐊᖅ ᐃᒃᐱᐊᕐᔪᖕᒥ ᐱᓕᕆᐊᖑᔪᖅ ᐃᓕᓐᓂᐊᕐᓂᐊᓕᓵᖅᑐᓂᒃ ᐱᓕᒪᒃᓴᐃᓪᓗᑎᒃ ᐃᑲᔫᑎᔪᓂᒃ ᖁᒡᕙᕆᐊᖅᑐᒋᑦ ᓱᕈᓯᐅᑉ ᐱᕙᓪᓕᐊᓂᖓ ᐊᒻᒪ ᐃᓕᓐᓂᐊᕐᕕᖕᓄᑦ ᐸᕐᓇᒃᑕᐅᓪᓗᑎᒃ ᑐᕌᖓᔪᑦ ᐊᓪᓚᓄᑦ, ᐃᓄᖕᓄᑦ ᐊᒻᒪ ᐊᓪᓚᖓᔪᐃᑦ ᕿᑐᓐᖓᖏᓐᓄᑦ.  ᑖᓐᓇ ᐱᒋᐊᖅᑎᑕᐅᔪᖅ ᒪᓕᖅᓯᐊᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐱᓕᕆᐊᕆᓂᐊᖅᓯᒪᔭᖓᓂᒃ ᐃᓕᓐᓂᐊᓂᐊᓕᓵᖅᑐᓂᒃ ᐱᓕᒻᒪᒃᓴᐃᓂᕐᒧᑦ.

ᐃᒃᐱᐊᕐᔪᖕᒦᑦᑎᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓂᕆᕕᒡᔪᐊᖅᑎᑦᓯᓚᐅᖅᑐᑦ ᐊᒻᒪ ᑐᑭᓯᒋᐊᖅᑎᑦᓯᓂᖃᖅᑐᑎᒃ ᐱᓕᕆᐊᑎᓐᓂᒃ ᐃᑲᔫᑎᓂᒃ ᓄᓇᓕᐅᔪᓄᑦ.  ᑕᒪᓐᓇ ᓂᕆᕕᒡᔪᐊᕐᓂᖅ ᐃᓚᖃᓚᐅᖅᑐᖅ ᐃᓕᑕᕆᔭᐅᔪᓐᓇᖅᑐᑎᒃ ᐃᓐᓇᒻᒪᕆᐅᔪᑦ ᐃᒃᐱᐊᕐᔪᖕᒥ ᐃᑲᔫᑎᓯᒪᒻᒪᕆᒃᑐᑦ ᓄᓇᓕᖕᓄᑦ.