ᐊᒥᓱᑦ ᖃᐅᔨᒪᓕᖅᑐᑦ ᓇᓗᓇᓐᖏᑦᑐᖅ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓵᓚᖃᓚᐅᕐᒪᑕ ᐊᖏᖃᑎᒌᒍᓐᓇᐃᓕᓂᕐᒧᑦ ᓈᓚᖕᓂᐅᓚᐅᖅᑐᒥᑦ ᐸᕕᓐᓛᓐ ᓴᕕᕋᔭᒃᓴᓂᒃ ᐅᔭᕋᕐᓂᐊᕐᕕᒃᑯᓐᓂᑦ, ᓄᓘᔮᑦ ᐅᔭᕋᕐᓂᐊᕐᕕᖕᒥ ᐊᐅᓚᑎᓪᓗᒋᑦ.

ᑖᒃᑯᐊ ᐊᖏᖃᑎᒌᒍᓐᓇᐃᓕᓂᕐᒧᑦ ᓈᓚᒃᑎᓕᒫᑦ ᐊᖏᓚᐅᕐᒪᑎᒃ, ᐅᖃᖅᖢᑎᒃ ᑖᒃᑯᐊ ᐸᕕᓐᓛᓐᑯᑦ ᑮᓇᐅᔭᓂᒃ ᐊᑮᑦᑐᖃᕐᓂᖏᓐᓄᑦ ᕿᑭᖅᑕᓃᒃᑯᓐᓄᑦ $7.3 ᒥᓕᔭᓂ ᑮᓇᐅᔭᓂ.

ᑖᒃᑯᐊ ᓈᓚᒃᑏᑦ ᐊᐱᕆᔭᐅᓚᐅᕐᒪᑕ ᑐᑭᑖᖁᔭᐅᓪᓗᑎᒃ ᑐᑭᓕᐅᖅᑕᐅᓯᒪᔪᒥᒃ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓂᒃ ᐱᕚᓪᓕᕈᑎᒃᓴᖏᓐᓂᒃ ᐊᖏᕈᑎᒥᒃ ᓄᓘᔮᑦ ᐱᓕᕆᐊᖓᓄᑦ.  ᓱᓕᓗ ᑐᑭᑖᕈᑎᖃᕆᐊᖃᓚᐅᕐᒥᔪᑦ ᖃᔅᓯᓂᒃ ᓯᕗᓂᐊᒍᑦ ᑮᓇᐅᔭᓂᒃ ᐸᕕᓐᓛᓐᑯᑦ ᐊᑭᓖᒋᐊᖃᓚᐅᖅᑕᖏᓐᓂᒃ ᕿᑭᖅᑕᓃᒃᑯᓐᓄᑦ ᒪᓕᒃᖢᒍ ᐊᑎᓕᐅᖅᑕᐅᓯᒪᔪᖅ ᐊᖏᖃᑎᒌᒍᑎᒋᔭᐅᔪᖅ.

ᑖᒃᑯᐊ $7.3 ᒥᓕᔭᓐ ᑮᓇᐅᔭᐃᑦ ᐃᓄᐃᑦ ᑮᓇᐅᔭᖁᑎᒋᖕᒪᒋᑦ, ᐋᔩᕋᕈᑕᐅᓯᒪᔪᓄᑦ ᐃᓄᐃᑦ ᐊᑦᑐᖅᑕᐅᓂᐊᕐᓂᖏᓐᓂᒃ ᐱᕚᓪᓕᕈᑎᒃᓴᖏᓐᓂ ᐊᖏᕈᑎᑎᒍᑦ.  ᑖᒃᑯᐊ ᑮᓇᐅᔭᐃᑦ ᐃᑲᔫᓯᐊᖅᑖᖑᓯᒪᔪᑦ ᕿᑭᖅᑕᓃᒃᑯᑦ ᐱᕙᒃᑕᖏᓐᓂᒃ ᐃᓄᐃᑦ ᓄᓇᖁᑎᖏᑦ ᐱᕙᓪᓕᐊᕝᕕᐅᑎᓪᓗᒋᑦ.

ᑕᐃᒪ, ᐊᒥᓲᔪᑦ ᐃᓄᐃᑦ ᐊᐱᖅᓱᓕᕐᒪᑕ ᕿᑭᖅᑕᓃᒃᑯᓐᓂᑦ ᑖᒃᑯᐊ ᑮᓇᐅᔭᐃᑦ ᑭᓱᓄᑦ ᐊᑐᖅᑕᐅᓂᐊᕐᒪᖔᑖᒃ.

ᑕᒪᑐᒪᓂᑦ ᐊᕐᕌᒍᒥ ᕿᑭᖅᑕᓃᒃᑯᑦ ᐱᕙᓪᓕᐊᑎᑦᑎᕙᓪᓕᐊᓚᐅᕐᒪᑕ ᒪᑐᐃᖓᑦᓯᐊᕐᓂᐊᖅᑐᒥᒃ ᑮᓇᐅᔭᐃᑦ ᓂᖏᖅᑕᐅᔪᓄᑦ ᐊᑐᐊᒐᕐᒥᒃ.

ᑖᓐᓇ ᐊᑐᐊᒐᖅ ᑐᑭᓯᓇᖅᓯᑎᑕᐅᓯᒪᔪᖅ ᑖᒃᑯᐊ ᓂᖏᖅᑕᐅᔪᑦ ᓄᓘᔮᑦ ᐱᓕᕆᐊᖓᓂᑦ ᑮᓇᐅᔭᐃᑦ ᖃᓄᐃᓕᖓᔭᐅᓂᐊᕐᓂᖏᓐᓄᑦ.

ᑖᓐᓇ ᓄᑖᖑᔪᖅ ᑮᓇᐅᔭᐃᑦ ᓂᖏᖅᑕᐅᔪᓄᑦ ᐊᑐᐊᒐᖓ ᒪᕐᕉᓂᒃ ᓴᖅᑭᑎᑦᑎᓚᐅᕐᖓᑦ ᑮᓇᐅᔭᖃᕐᕕᖕᓂᑦ ᕿᑭᖅᑕᓃᒃᑯᓐᓂ, ᑖᒃᑯᐊ ᑮᓇᐅᔭᐃᑦ ᑐᖅᑯᖅᑕᐅᓯᒪᓂᐊᖅᑐᑦ ᐊᒻᒪᓗ ᐃᑲᔫᓯᐊᒃᓴᓄᑦ ᑮᓇᐅᔭᓂᓗ: ᑖᒃᑯᐊ ᑮᓇᐅᔭᐃᑦ ᑐᖅᑯᖅᑕᐅᓯᒪᔪᑦ ᐋᖅᑭᐅᒪᓯᒪᔪᖅ ᑮᓇᐅᔭᓕᐅᕋᓱᐊᕐᕕᐅᒍᒪᓪᓗᑎᒃ ᐊᑐᖅᑕᐅᔪᒃᓴᒫᖑᓂᐊᖅᑐᓄᑦ ᑭᖑᕚᖑᓂᐊᖅᑐᓄᑦ ᐊᒻᒪᓗ ᑖᒃᑯᐊ ᐃᑲᔫᓯᐊᒃᓴᓄᑦ ᑮᓇᐅᔭᐃᑦ ᐊᑐᖅᑕᐅᓗᑎᒃ ᐱᓕᕆᐊᒃᓴᓂ ᑐᕌᖓᓂᐊᖅᑐᓄᑦ ᐃᓄᖕᓄᑦ.

ᑖᒃᑯᐊ $7.3 ᒥᓕᔭᓐ ᑮᓇᐅᔭᐃᑦ ᐊᑕᐅᓯᐊᖅᑕᐅᓯᒪᑐᐃᓐᓇᕐᓗᑎᒃ ᑐᓂᔭᐅᓂᐊᕐᒪᑕ ᕿᑭᖅᑕᓃᒃᑯᓐᓄᑦ ᐱᕙᓪᓕᐊᕝᕕᐅᔪᓂᓐᖔᖅᑐᓂᑦ ᕿᑭᖅᑖᓗᖕᒥ, ᕿᑐᕐᖏᐅᖅᑎᑕᐅᓂᐊᖅᑐᑦ ᐱᕈᖅᓴᔭᐅᓗᑎᒃᑕᕝᕙᓂ ᑐᖅᑯᓯᒪᔪᓂᒃ ᑮᓇᐅᔭᓂᒃ.  ᑖᒃᑯᐊ ᐊᕐᕌᒍᒥ ᕿᑐᕐᖏᐅᕐᓂᐅᔪᑦ ᑖᒃᑯᓇᓐᖓᑦ ᑮᓇᐅᔭᓂᑦ ᐱᕈᖅᑕᐅᓇᓱᒃᑐᓂᑦ ᐃᓕᔭᐅᖃᑦᑕᕐᓂᐊᖅᑐᑦ ᑕᕝᕗᖓ ᐃᑲᔫᓯᐊᒃᓴᓄᑦ ᑮᓇᐅᔭᖏᓐᓄᑦ ᐊᑐᖅᑕᐅᓂᐊᕐᓗᑎᒃ ᐱᓕᕆᐊᒃᓴᓄᑦ ᐃᓄᖕᓄᑦ.

ᐊᑐᓐᖏᓐᓂᖅᓴᐅᓇᓱᓪᓗᓂ ᑮᓇᐅᔭᓂᒃ ᑐᖅᑯᓯᒪᔪᓂᑦ, ᕿᑭᖅᑕᓃᒃᑯᑦ ᐱᕈᖅᓴᐃᓂᐊᕐᒪᑕ ᓯᕗᓂᒃᓴᒧᑦ.  ᓂᕆᐅᒋᔭᖃᖅᖢᑎᒃ ᒪᑭᒪᐃᓐᓇᕐᓂᐊᖅᑐᒥᒃ ᐃᑲᔫᑎᖃᖁᓪᓗᒍ ᐃᓄᖕᓄᑦ, ᑮᓇᐅᔭᐃᑦ ᑮᓇᐅᔭᖅᑖᕐᕕᐅᔪᓂᑦ ᐱᔭᐅᓯᒪᔪᑦ ᓄᖑᓯᒪᓕᕋᓗᐊᖅᑎᓪᓗᒋᑦ.  ᑖᓐᓇ ᐊᑐᐊᒐᖅ ᐃᑲᔪᕐᓂᐊᕐᒥᔪᖅ ᐃᓄᖕᓄᑦ ᐊᓯᖏᓐᓂᓐᖔᖅᑐᓂᒃ ᐊᑐᓐᖏᓐᓂᖅᓴᐅᓕᕈᓐᓇᖅᖢᑎᒃ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᖅᓴᐅᓗᑎᒃ ᐃᑲᔫᑎᐅᓂᐊᖅᑐᓄᑦ ᐃᓄᖕᓄᑦ ᐊᒻᒪᓗ ᐱᓕᕆᐊᒃᓴᓄᑦ ᐊᑐᖅᑕᐅᔪᓐᓇᕐᓗᑎᒃ.

ᑎᑎᖅᑲᑎᒍᑦ ᑐᑭᑖᕈᑎᒋᔭᖏᓐᓂᑦ, ᑖᒃᑯᐊ ᐊᖏᖃᑎᒌᒍᓐᓇᐃᓕᓂᕐᒧᑦ ᓈᓚᒃᑏᑦ ᓇᓗᓇᐃᖅᓯᓚᐅᕐᒪᑕ ᖃᓄᖅ ᐱᔾᔪᑎᖃᕐᒪᖔᑦ  ᑖᓐᓇ ᑮᓇᐅᔭᐃᑦ ᓂᖏᖅᑕᐅᔪᓄᑦ ᐊᑐᐊᒐᖓ ᓴᖅᑭᑎᑦᑎᓂᐊᖅᖢᑎᒃ ᑮᓇᐅᔭᓂᒃ ᒪᑭᒪᐃᓐᓇᕐᓂᐊᖅᑐᓂᒃ ᐊᒻᒪᓗ ᐱᓕᕆᐊᒃᓴᓄᑦ ᐃᓄᖕᓄᑦ.

“ᕿᑭᖅᑕᓃᒃᑯᑦ ᐃᑲᔫᓯᐊᒃᓴᓄᑦ ᑮᓇᐅᔭᐃᑦ ᐊᑐᖅᑕᐅᓂᐊᖅᑐᑦ ᐊᔾᔨᒌᓐᖏᑦᑐᓄᑦ ᐃᓅᓱᓕᕆᓂᕐᒧᑦ ᑐᕌᒐᔪᓂᒃ ᐱᓕᕆᐊᒃᓴᓄᑦ ᐃᓚᒋᓗᒍ ᐅᖃᐅᓯᓕᕆᓂᖅ ᐊᒻᒪ ᐃᓕᖅᑯᓯᓕᓂᐅᑉ ᒥᒃᓵᓄᑦ ᖃᓄᐃᓕᐅᕈᑎᒃᓴᓂ, ᐃᓅᓯᓕᕆᓂᕐᒧᑦ ᐃᓕᓐᓂᐊᒐᒃᓴᓂᒃ, ᓄᓇᓕᓐᓂ ᐊᒻᒪᓗ ᖃᕋᓴᐅᔭᒃᑰᓐᓇᐅᑎᓄᑦ ᐃᓄᓐᓂᓐᖔᖅᑐᓂᒃ ᐱᕙᓪᓕᐊᔪᓂ, ᐱᐅᓯᑐᖃᐅᑉ ᒥᒃᓵᓄᑦ ᐃᓕᓐᓂᐊᕐᓂᕐᒥᒃ, ᐃᓐᓇᕐᓄᑦ ᐃᓅᓱᒃᑐᓄᓪᓗ ᐱᓕᕆᐸᒃᓴᓂ ᐊᒻᒪᓗ ᓄᓇᓕᒻᒥᐅᑦ ᐊᖑᓇᓱᒋᐊᕐᓂᖏᓐᓄᑦ.” ᐅᖃᖅᑐᑦ ᑖᒃᑯᐊ ᓈᓚᒃᑏᑦ ᑐᑭᑖᕈᑎᒋᔭᖓᓂ. “ᖃᓄᖅ ᑖᒃᑯᐊ ᑮᓇᐅᔭᐃᑦ ᓯᕗᓂᐊᒍᑦ ᐊᑭᓕᖅᑕᐅᔪᑦ ᕿᑭᖅᑕᓃᒃᑯᓐᓄᑦ ᐃᑲᔫᓯᐊᒃᓴᓄᑦ ᑮᓇᐅᔭᖏᓐᓅᖅᑕᐅᖃᑦᑕᖅᑐᑦ ᐊᒻᒪᓗ ᓇᓗᓇᐃᖅᓯᓪᓗᑎᒃ ᑖᒃᑯᐊ ᑮᓇᐅᔭᐃᑦ ᐃᓄᖕᓄᑦ ᐱᕙᓪᓕᐅᑎᐅᓂᐊᖅᖢᑎᒃ.”

ᒪᐃᖑᑎᓪᓗᒍ, ᕿᑭᖅᑕᓃᒃᑯᑦ ᑲᑎᒪᔨᖏᑦ ᑲᔪᓯᑎᑦᑎᓚᐅᕐᒪᑕ ᐱᖁᔨᕗᖔᕈᑎᒥᒃ ᐊᖏᖅᑐᒥᒃ ᕿᑭᖅᑕᓃᒃᑯᑦ ᐃᑲᔫᓯᐊᒃᓴᓄᑦ ᑮᓇᐅᔭᖏᓐᓄᑦ ᐊᑐᐊᒐᖓᓂᑦ, ᐸᐃᑉᐹᓕᐊᖑᓪᓗᑎᒃ ᐊᑐᖅᑕᐅᓂᐊᖅᖢᓂ ᖃᓄᖅ ᕿᑭᖅᑕᓃᒃᑯᑦ ᐊᐅᓚᑦᑎᓂᐊᕐᓂᖏᓐᓄᑦ ᑖᒃᑯᓂᖓ ᑮᓇᐅᔭᓂᒃ ᐃᓄᐃᑦ ᐃᑲᔫᓯᐊᒃᓴᖏᓐᓄᑦ ᐊᒻᒪᓗ ᐱᓕᕆᐊᒃᓴᓄᑦ ᐊᑐᖅᑕᐅᓂᐊᖅᑐᓂᒃ ᒪᓕᓪᓗᒍ ᑮᓇᐅᔭᐃᑦ ᓂᖏᖅᑕᐅᔪᓄᑦ ᐊᑐᐊᒐᖓ.  ᑖᒃᑯᐊ ᐃᑲᔫᓯᐊᒃᓴᓄᑦ ᑮᓇᐅᔭᓂ ᐊᑐᐊᒐᖓ ᐃᒪᐃᓕᖓᔪᖅ ᑖᒃᑯᐊ ᕿᑭᖅᑕᓃᒃᑯᑦ ᓄᓇᓕᖕᓂ ᑐᑭᓯᒋᐊᕆᐊᖃᖅᑐᑦ ᑭᓱᓄᑦ ᑮᓇᐅᔭᐃᑦ ᐊᑐᕋᔭᕐᒪᖔᑖᒃ ᐊᒻᒪᓗ ᑖᒃᑯᐊ ᕿᑭᖅᑕᓃᒃᑯᑦ ᑲᑎᒪᔨᖏᑦ ᐱᓕᕆᐊᒃᓴᓪᓗᐊᑕᖃᖅᖢᑎᒃ ᖃᓄᐃᑦᑐᓂᒃ ᐱᓕᕆᐊᒃᓴᓄᑦ ᑮᓇᐅᔭᐃᑦ ᐊᑐᖅᑕᐅᓇᔭᕐᒪᖔᑖᒃ.

ᐅᐱᕐᖔᒥ ᕿᑭᖅᑕᓃᒃᑯᑦ ᓄᓇᓕᖕᓄᑦ ᑐᑭᓯᒋᐊᕆᐊᖃᑦᑕᓚᐅᕐᒪᑕ 13ᓄᑦ ᓄᓇᓕᖕᓄᑦ ᕿᑭᖅᑖᓗᖕᒥ. ᑖᒃᑯᐊ ᓄᓇᓕᖕᓄᑦ ᑐᑭᓯᒋᐊᕆᐊᕐᓂᐅᓚᐅᖅᑐᑦ ᑭᐅᔭᐅᑦᓯᐊᓚᐅᕐᒪᑕ ᐊᒻᒪᓗ ᕿᑭᖅᑕᓃᒃᑯᑦ ᑲᑎᒪᔨᖏᓐᓄᑦ ᑐᓂᔭᐅᓪᓗᑎᒃ ᖃᓄᐃᑦᑐᓄᑦ ᐱᓕᕆᐊᒃᓴᓄᑦ ᐊᑐᖁᔨᖕᒪᖔᑖᒃ ᑖᒃᑯᓂᖓ ᑮᓇᐅᔭᖅᑖᖑᔪᓂᑦ.  ᑭᖑᓪᓕᖅᐹᒥᓂᒃ ᑲᑎᒪᓚᐅᖅᑐᑦ ᐃᒃᐱᐊᕐᔪᖕᒥ, ᕿᑭᖅᑕᓃᒃᑯᑦ ᑲᑎᒪᔨᖏᑦ ᕿᒥᕐᕈᓚᐅᖅᑐᑦ ᐅᓂᒃᑳᓕᐊᒥᒃ ᑖᒃᑯᓇᓐᖓᓚᐅᖅᑐᓂᑦ ᓄᓇᓕᖕᓂᑦ ᑐᑭᓯᒋᐊᕆᐊᕐᓂᐅᓚᐅᖅᑐᓄᑦ  ᐊᒻᒪᓗ ᓂᕈᐊᖅᖠᖅᖢᑎᒃ ᑭᓱᓄᑦ ᐱᓕᕆᐊᒃᓴᖃᕐᓂᐊᕐᓂᖏᓐᓂᒃ ᐅᖃᐅᓯᐅᓪᓗᐊᑕᕆᔭᐅᓚᐅᖅᑐᓂᒃ ᑐᑭᓯᒋᐊᕆᐊᖃᑦᑕᖅᑎᓪᓗᒋᑦ: ᐃᓕᖅᑯᓯᓕᓂᐅᑉ ᒥᒃᓵᓄᑦ ᐱᓕᕆᐊᒃᓴᓄᑦ, ᐊᒻᒪᓗ, ᐸᐃᕆᕕᖕᓂ ᐊᒻᒪᓗ ᓱᕈᓯᓛᑦ ᐃᓕᓐᓂᐊᖅᑎᑕᐅᓂᖏᓐᓄᑦ.

ᑕᖅᑭᐅᓂᐊᖅᑐᓂᒃ ᐊᒡᒋᖅᑐᓄᑦ, ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᐱᕙᓪᓕᐊᑎᑦᑎᓂᐊᖅᑐᑦ ᓄᑖᓂᒃ ᐱᓕᕆᐊᒃᓴᓂ 13ᓄᑦ ᓄᓇᓕᖕᓄᑦ ᕿᑭᖅᑖᓗᖕᒥᑦ ᐊᑐᕐᓗᒋᑦ ᑖᒃᑯᐊ ᐅᖃᐅᓯᐅᓚᐅᖅᑐᑦ.

ᐊᕐᕌᒍᒥ ᓄᑖᕐᒥ ᐱᒋᐊᕐᓗᒍ ᕿᑭᖅᑕᓃᒃᑯᑦ ᑮᓇᐅᔭᓂᒃ ᐊᑐᕐᓂᐊᖅᑐᑦ  $1 ᒥᓕᔭᓂᒃ ᐃᑲᔫᓯᐊᒃᓴᓂᑦ ᑮᓇᐅᔭᖏᓐᓂᑦ ᐱᓕᕆᐊᒃᓴᓄᑦ ᕿᑭᖅᑖᓗᖕᒥ.  ᑖᒃᑯᐊ ᓈᓚᒃᑏᑦ ᕿᑭᖅᑕᓃᒃᑯᓐᓂ ᐃᑲᔪᕐᓂᖅᓴᐅᓚᐅᖅᑎᓪᓗᒋᑦ ᑮᓇᐅᔭᖅᑖᖅᖢᑎᓪᓗ ᑕᐃᒪ ᐊᕐᕌᒍᓛᖅᑐᒥ ᐱᒋᐊᕐᓗᒍ, ᐄᐳᓪ 1, 2018ᒥ, ᕿᑭᖅᑕᓃᒃᑯᑦ ᖁᕝᕙᓯᒋᐊᕈᓐᓇᖅᓛᖅᑐᑦ ᑮᓇᐅᔭᓂᒃ ᐊᑐᖅᑕᐅᔪᓐᓇᖅᑐᓄᑦ ᑕᒪᓐᓇᓗ ᐅᖃᐅᓯᕆᔭᐅᓛᖅᖢᓂ ᕿᑭᖅᑕᓃᒃᑯᓐᓄᑦ ᐅᑦᑐᐱᕆᒥ ᑲᑎᒪᔩᑦ ᑲᑎᒪᓕᖅᐸᑕ.

ᑖᒃᑯᐊ ᐱᓕᕆᐊᒃᓴᑦ ᕿᑭᖅᑕᓃᒃᑯᓐᓄᑦ ᓴᖅᑭᑕᐅᕙᑦᑐᑦ ᑮᓇᐅᔭᖅᑖᖃᑦᑕᖅᑐᑦ ᑮᓇᐅᔭᓂᒃ ᓂᖏᖅᑕᐅᔪᓄᑦ ᐊᑐᐊᒐᖓᓂᑦ ᑖᓐᓇ ᓴᖅᑮᓯᒪᓪᓗᑎᒃ ᑐᖅᑯᓯᒪᔪᓂᒃ ᑮᓇᐅᔭᓂᒃ ᐊᒻᒪᓗ ᐃᔪᓯᐊᒃᓴᓄᑦ ᑮᓇᐅᔭᓂᒃ.  ᑖᒃᑯᐊ ᑐᖅᓯᒪᔪᑦ ᑮᓇᐅᔭᐃᑦ ᐱᕈᖅᐸᓪᓕᐊᑎᓪᓗᒍ ᑖᒃᑯᐊ ᑮᓇᐅᔭᐃᑦ ᐊᖏᓂᖅᓴᒥᒃ ᑐᓂᔭᐅᖃᑦᑕᕐᓂᐊᖅᑐᑦ ᐊᑐᖅᑕᐅᔪᒃᓴᒫᖑᓗᑎᒃ ᐃᓄᖕᓄᑦ.