ᓄᓇᓕᖕᒥᐅᑦ ᐊᖑᓇᓱᒃᐸᖕᒪᑕ ᐊᔾᔨᒌᑦᑐᓂᒡᓗ ᐊᖑᓂᒃᐸᒃᖢᑎᒃ ᑕᕆᐅᕐᒥᐅᑕᓂᒃ, ᐅᑯᐊᖑᓪᓗᑎᒃ ᓇᑦᑏᑦ (ᓇᑦᑎᖅ, ᐅᒡᔪᒃ, ᖃᐃᕈᓖᓪᓗ), ᕿᓚᓗᒐᑦ , ᖃᑯᖅᑖᑦ, ᐊᕐᕖᓪᓗ, ᓇᓄᐃᓪᓗ ᐊᖑᓇᓱᒃᑕᐅᕙᖕᒥᔪᑦ. ᓄᓇᓖᑦ ᐅᖃᐅᓯᖃᓚᐅᕐᒪᑕ ᑖᒃᑯᐊ ᐱᒻᒪᕆᐊᓗᖕᒥ ᓇᔪᕐᕕᖃᕐᒪᑕ, ᓄᒃᑕᕐᕕᖃᐅᖅᖢᑎᒡᓗ, ᕿᑐᕐᖑᐃᕐᕕᖃᖅᖢᑎᓘ ᓂᕆᔭᖅᑐᕐᕕᖃᖅᖢᑎᒡᓗ, ᐱᒻᒪᕆᐊᓘᒋᔭᐅᓪᓗᑎᒡᓗ ᓇᔪᖅᑕᖏᑦ ᐊᖑᓇᓱᖕᓂᕐᒧᑦ ᓂᕿᓕᕆᕕᐅᖃᑦᑕᕐᓂᖏᓐᓂᒃ, ᐊᐅᓪᓛᕐᕕᐅᖃᑦᑕᕐᓂᖏᓐᓂᒃ ᕿᖕᓂᕕᐅᖃᑦᑕᕐᓂᖏᓐᓂᒡᓗ ᐊᖑᑕᐅᔪᓂᒃ.

ᓄᓇᓕᖕᒥᐅᓂᒃ ᑐᓴᖅᑎᑕᐅᓚᐅᖅᑐᒍᑦ ᐊᖑᓇᓱᖃᑦᑕᕐᓂᖅ ᑕᕆᐅᕐᒥᐅᑕᓂᒃ ᐃᓄᖕᓄᑦ ᐃᓅᓯᕆᔭᐅᓪᓚᕆᖕᒪᑦ. ᐆᒪᔪᑦ ᐊᐃᕖᑦ, ᐊᔾᔨᒌᖏᑦᑐᑦ ᓇᑦᑏᑦ, ᕿᓚᓗᒐᑦ, ᖃᑯᖅᑖᓪᓗ, ᐊᓯᖏᓪᓗ ᐃᖃᓗᕐᔪᐊᑦ ᐱᒻᒪᕆᐊᓗᖕᒪᑕ ᓂᕿᒋᔭᐅᓂᖏᓐᓄᑦ. ᐊᖑᓇᓱᒃᐸᖕᒪᑕ ᐊᕐᕌᒍᓕᒫᑦ ᐃᓗᐊᓂ ᓂᕿᑖᕋᓱᑐᐃᓐᓇᕋᑎᒃ, ᓂᕐᔪᑎᒥᖔᖅᑐᑦ ᐊᓐᓄᕌᓴᓕᐊᕆᔭᐅᕙᖕᒪᑕ, ᑭᓱᖑᖅᑎᑕᐅᕙᒃᑎᓪᓗᑎᒡᓗ , ᐊᑑᑎᓪᓗᑎᒡᓗ ᐊᓯᖏᓐᓄᑦ ᐊᑐᕈᓐᓇᕐᓂᖏᑦ.

ᐃᓅᓯᓗᒃᑖᓐᓄᑦ ᐊᖑᓇᓱᖃᑦᑕᕐᓂᐊᖅᑐᒃᓴᐅᔪᖓ ᑕᒫᓂ ᓄᓇᑦᑎᓐᓂ. ᓵᖃᐃᒻᒪ- ᕿᑐᕐᖓᒃᑲᓗ, ᐃᓕᑉᐸᓪᓕᐊᖏᓐᓇᕐᒥᖕᒪᑕ ᐅᕙᓐᓂᒃ ᐊᖑᓇᓱᖕᓂᕐᒥ ᐃᓚᐅᓪᓗᑎᒃ ᐊᕌᒍᓕᒫᑉ ᐃᓗᐊᓂ, 150ᓗᐊᓂᒃ ᓇᑦᑎᖅᐸᒃᑐᒃᓴᐅᒐᒪ, ᓄᓇᖃᖅᑲᑎᕗᑦ ᓂᕿᑖᖅᑎᓐᓇᓱᒃᑭᓪᓗᒋᑦ ᑳᒃᑯᑦ ᐃᓐᓇᖁᑎᑦᑎᓐᓄᓪᓗ ᑐᓂᓯᕙᒃᑭᓪᓗᖓ. (I22, 29-ᒪᐃ-19)

ᓄᓇᓕᖕᒥᐅᑦ ᐅᖃᓚᐅᖅᑐᑦ ᐊᖑᓇᓱᒍᓐᓇᑦᑎᐊᖅᐸᖕᓂᖏᓐᓂᒃ ᑕᕆᐅᕐᒥᐅᑕᓂᒃ, ᖃᐅᔨᒪᓪᓗᑎᒡᓗ ᓂᕐᔪᑏᑦ ᐃᓕᖅᑯᓯᖏᓐᓂᒃ, ᖃᐅᔨᒪᓂᖅ ᐊᔪᖏᑦᑎᐊᕐᓂᕐᓗ ᐱᒻᒪᕆᐊᓘᕗᖅ, ᐊᖑᓇᓱᒍᓐᓇᕐᓂᕐᒥᒃ (ᓲᕐᓗ ᐊᐃᕝᕙᒐᓱᖕᓂᖅ ᐊᓐᓇᐃᑦᑕᐃᓕᒪᓪᓗᒍ ᐃᒫᓂ). ᖃᐅᔨᒪᓃᑦ ᑐᓂᔭᐅᓯᒪᖕᒪᑕ ᓯᕗᓕᑦᑎᓐᓂ ᐃᓕᓴᐃᔨᒥᑦ ᐃᓕᓐᓂᐊᖅᑐᒧᑦ, ᓯᕗᓕᖃᑎᒌᓂᒃ ᓯᕗᓕᖃᑎᒌᓄᑦ. ᐃᓄᐃᑦ ᐊᖑᓇᓱᒋᐅᖅᐸᖕᒪᑕ ᐅᑭᐅᑭᑦᑐᑯᓘᓪᓗᑎᒃ, ᑕᕆᐅᕐᒥᓪᓗ ᐊᖑᓇᓱᖕᓃᑦ ᐃᓚᒌᓄᑦ ᐃᓕᓐᓂᐊᕈᑕᐅᔭᒃᑯᓪᓗᑎᒃ ᐊᐅᓛᖅᓯᒪᑐᐃᓐᓇᕋᓗᐊᖅᑎᓪᓗᒋᑦ.

ᐅᓪᓗᒦᓛᒃ ᐱᒻᒪᕆᑐᐊᖑᖅᑰᔨᓕᕐᒪᑦ ᐊᖑᓇᓱᒃᑎᑐᖃᕐᓄᑦ ᐃᓐᓇᕐᓄᓪᓘᓐᓃᑦ, ᓲᖃᐃᒻᒪ ᑖᒃᑯᐊᑐᐊᐸᓗᐃᑦ ᓂᕿᑐᖅᑎᐅᖅᑰᔨᓕᕐᒪᑕ. ᒪᒃᑯᑦᑐᑦ ᓂᕆᔪᓐᓇᖅᑑᒐᓗᐊᑦ, ᑭᓯᐊᓂ ᐊᖑᓇᓱᒃᑎᑐᐊᐸᓗᐃᑦ ᓇᑦᑎᕋᓱᒋᐊᖅᐸᓕᕐᒪᑕ. ᐅᐱᕐᖓᒃᑖᒃᑯᑦ ᐊᐅᔭᒃᑯᓪᓗ ᐅᔾᔨᕐᓚᖅᑖᒐᓗᐊᖅ ᐅᓄᖅᑐᑦ ᐊᐅᓪᓚᖃᑦᑕᕐᓂᖏᓐᓂᒃ. ᐃᓄᒋᐊᖕᓂᖅᓴᐃᑦ ᐊᐅᓚᖃᑦᑕᓕᖅᑐᑦ…ᐅᖅᑰᓯᓕᖅᑎᓪᓗᒍ ᐊᖑᓇᓱᖕᓂᖅᓴᐅᕙᖕᒪᑕ, ᐊᖑᓇᓱᑦᑎᐊᕐᓇᕐᓂᖅᓴᐅᖕᒪᑦ ᐅᖅᑰᓯᕙᓪᓕᐊᓕᖅᑎᓪᓗᒍ. (P23, 28-Apr-19)

ᐃᓄᐃᑦ ᐊᐱᖅᓱᖅᑕᐅᔪᑦ ᐅᖃᓚᐅᕐᒪᑕ ᓇᒥ ᐊᖑᓇᓱᒡᕕᑦᑎᐊᕙᖃᖅᐸᖕᒪᖔᑕ ᓇᒥᓪᓗ ᓂᕐᔪᑏᑦ ᐅᓄᕐᓂᖅᓴᐅᕙᖕᒪᖔᑕ (ᓲᕐᓗ ᐃᒃᐱᑦᑐᕐᔪᐊᓂ ᐊᓯᖏᓐᓂᓪᓗ) ᐱᒻᒪᕆᐅᒋᔭᐅᔪᓪᓗ ᐆᒪᔪᓄᑦ ᐃᓂᒋᔭᐅᕙᒃᑐᑦ ᐅᖃᐅᓯᕆᔭᐅᓚᐅᕆᓪᓗᑎᒃ ᓂᕐᔪᑏᑦ ᐃᓚᖏᑦ ᐅᓄᖏᓐᓂᖅᓴᐅᓂᕋᖅᑕᐅᓯᒪᓕᖅᑐᑦ ᓯᕗᓂᕆᓚᐅᖅᑕᑦᑎᓐᓂᒃ.

ᓄᓇᓯ ᐃᒫᓂᓪᓗ ᐱᓕᕆᕕᐅᕙᒃᑯᑦ, ᐊᖑᓇᓱᖕᓂᖅ ᑕᕆᐅᕐᒥ ᐃᓄᖕᓄᑦ ᑲᑎᔾᔪᑎᐅᕙᖕᒪᑦ. ᕿᓚᓗᒃᑭᕆᒍᑎᒃ, ᓇᑦᑎᕋᓱᒃᑯᑎᒃ ᐊᐃᕝᕙᒐᓱᖕᓂᕐᓘᓐᓃᑦ, ᐃᓄᐃᑦ ᐊᐅᓪᓚᖅᓯᒪᒐᔪᖕᒪᑕ ᓄᓇᒥ ᐃᒫᓄᓘᓐᓃᑦ ᐃᓚᒌᒃᖢᑎᒃ ᐱᖃᓐᓇᕆᔭᕇᒃᖢᑎᒡᓗ. ᑐᓴᐅᒪᑦᑎᐊᖅᑐᒍᑦ ᓂᕿᖏᓐᓂᒃ ᑐᓐᓯᖃᑦᑕᕐᓂᖏᓐᓄᑦ ᐊᖑᓂᒃᑳᖓᒥᒃ ᑕᒪᓐᓇᓗ ᐱᒻᒪᕆᐅᓪᓗᓂ ᐃᓄᐃᑦ ᐃᓕᖅᑯᓯᖏᓐᓄᑦ.

(ᐊᕐᕙᒐᓱᖕᓂᖅ) ᖁᕕᐊᒋᔭᐅᓛᕆᓯᒪᔭᕋ ᐃᓅᓯᓕᒫᓐᓂᒃ…ᐊᖏᔪᐊᓘᖕᒪᑕ ᐊᕐᕖᑦ…ᐄ, ᓄᓇᓕᓗᒃᑖᕗᑦ – ᐊᖑᓂᖃᑕᐅᓚᐅᖅᑐᑦ. ᓇᒃᓯᐅᔾᔨᒻᒪᕆᒃᖢᑎᒡᓗ ᓂᕿᖏᓐᓂᒃ…ᐄ. ᐄ,ᐊᖑᓇᓱᖃᑕᐅᔪᓕᒫᑦ, ᖃᐅᔨᒪᔭᕐᒥᖕᓂᒃ ᑐᓂᓯᔪᓐᓇᖁᓪᓗᒋᑦ ᒪᒃᑯᒃᑐᓄᑦ ᑭᖑᕚᒃᓴᑦᑎᓐᓄᓪᓗ. (A04, 03 ᓄᕕᐱᕆ 2020, ᖃᓪᓗᓈᑎᑑᓕᖅᑕᐅᓯᒪᔪᖅ)

ᐱᒻᒪᕆᐳᔪᑦ ᑕᕆᐅᕐᒥ ᐊᖑᓇᓱᒡᕖᑦ

ᒥᑦᑎᒪᑕᓕᖕᒥᐅᓄᑦ, ᑕᕆᐅᕐᒥ ᐊᖑᓇᓱᖕᓂᖅ ᐱᒻᒪᕆᐅᒋᔭᐅᕗᖅ ᑕᓯᐅᔭᕐᒥ ᒥᑦᑎᒪᑕᓕᐅᑉ ᓄᓇᖓᑕ ᖃᓂᒋᔮᓂ ᕿᑭᖅᑖᓘᓪᓗ ᑐᓄᕕᐊᓂ. ᐱᓗᐊᖅᑐᒥ ᑲᖏᖅᖢᕈᓗᖕᒥ, ᕿᕐᖑᐊᓂ ᓯᓈᓂᓗ. ᕿᓚᓗᒐᑦ ᑲᑎᓯᒪᓂᖅᓴᐅᕙᖕᒪᑕ ᑲᖏᖅᖢᕈᓗᖕᒥ ᕿᕐᖑᐊᓂᓗ, ᐃᓗᕕᕕᖃᕐᕕᐳᑉ ᓄᓇᖓᑕ ᖃᓂᒋᔮᓃᑦᑐᑦ.

ᐃᒃᐱᐊᕐᔪᖕᒥᐅᑦ ᑲᖏᖅᑐᒑᐱᖕᒥᐅᓪᓗ ᐊᖑᓇᓱᒡᕕᖏᑦ ᓄᓘᔮᓕᕆᕕᐅᑉ ᖃᓂᒋᔮᓃᒻᒪᑕ, ᕿᕐᖑᐊᓂ, ᑕᓯᐅᔭᕐᒥ, ᐃᓪᓗᐊᑕ ᓯᓪᓗᐊᓂ, ᒥᑦᑎᒪᑕᓕᖕᓂ, ᕿᑭᖅᑖᓘᑉ ᐃᒪᖓᓂ ᒥᑦᑎᒪᑕᓕᐅᓪᓗ ᖃᓂᒋᔮᓂ, ᓯᒡᔭᖅᐸᓯᖏᓐᓂᒃ, ᐃᒃᐱᑭᑦᑐᕐᔪᐊᓂᓪᓗ.

ᐃᒡᓗᓕᒃ ᓴᓂᕋᔭᕐᓗ ᓇᓗᐃᓇᐃᖅᓯᓚᐅᖅᑐᑦ ᑕᕆᐅᒥ ᐊᖑᓇᓱᒡᕕᖏᑦ ᐱᒻᒪᕆᐅᖕᒪᑕ ᐃᒪᕆᔭᖏᓐᓂᒃ, ᐃᒃᐱᑭᑦᑐᕐᔪᐊᓂ ᐃᓚᒋᔭᐅᓪᓗᓂ, ᐊᒻᒪᓗ ᑕᒪᐃᓐᓂ ᐃᒡᓗᓕᐅᑉ ᓴᓂᕋᔭᐅᓪᓗ ᖃᓂᒋ

ᔮᓃᑦᑐᑦ ᕿᑭᖅᑖᓘᑉ ᐅᐊᖕᓇᖓᓂ.

ᓄᓘᔮᓕᕆᓂᕐᒧᑦ ᐊᒃᑐᖅᑕᐅᔾᔪᑎᐅᑐᐃᓐᓇᕆᐊᓖᑦ ᑕᕆᐅᕐᒥ ᐊᖑᓇᓱᖃᑦᑕᕐᓂᕐᒧᑦ

ᐃᓄᐃᑦ ᐊᐱᖅᓱᖅᑕᐅᑎᓪᓗᒋᑦ ᓄᓘᔮᓕᕆᓂᕐᒥᒃ ᖃᓄᕐᓗ ᐊᒃᑐᐃᑐᐃᓐᓇᕆᐊᖃᕐᓂᖏᓐᓂᒃ ᐊᖑᓇᓱᒍᓐᓇᕐᓂᕐᒧᑦ ᑕᕆᐅᕐᒥᐅᓂᒃ, ᐃᓄᐃᑦ ᐅᖃᓚᐅᖅᑐᑦ ᐃᓱᒫᓘᑎᖃᕐᓂᕋᖅᖢᑎᒃ ᓂᐱᕈᓘᔭᓄᑦ ᐸᒡᕕᓴᒃᑕᐅᓂᐊᕋᓱᒋᓐᓛᓪᓗᑎᒃ (ᐅᒥᐊᕐᔪᐊᓄᑦ ᓄᓇᓯᐅᑎᑯᑖᓄᓪᓗ) ᐅᔭᕋᒃᓯᐅᕐᕕᓕᕆᓂᕐᒧᓪᓗ. ᐃᓄᐃᑦ ᓂᕆᐅᒃᑐᑦ ᓂᕐᔪᑎᑦ ᐃᓕᖅᑯᓯᕆᕙᒃᑕᖏᑦ ᐊᓯᔾᔨᖅᑕᐅᓂᐊᕋᓱᒋᔭᐅᓪᓗᑎᒃ ᓄᓇᒥ ᑕᕆᐅᕐᒥᓗ (ᓲᕐᓗ, ᐊᐃᕖᑦ ᓱᕐᔪᒋᐊᔭᓕᕐᓂᖏᓐᓂᒃ, ᓇᒧᖓᖅᐸᖕᓂᖏᓐᓂᒃ ᐃᕐᓂᐅᕐᕕᖏᓪᓗ ᐸᒡᕕᓴᒃᑕᐅᑐᐃᓐᓇᕆᐊᓖᑦ) ᓄᓘᔮᓕᕆᓂᖅ ᐱᓕᕆᔭᐅᕙᓪᓕᐊᑎᓪᓗᒍ.

ᑕᕆᐅᕐᒥᐅᑦ ᓂᐱᓂᒃ ᐱᐅᒃᓴᖏᒻᒪᑕ ᑕᒪᓐᓇᓗ ᑐᓴᖅᑕᐅᖏᓐᓇᖅᖢᓂ ᒥᑦᑎᒪᑕᓕᖕᒥᐅᓄᑦ ᐅᒥᐊᕐᔪᐊᑉ ᓂᐱᖏᓐᓄᑦ ᑕᕆᐅᕐᒥᐅᑕᑦ (ᐆᒪᔪᑦ) ᕿᒫᓕᕐᒪᑕ. ᐃᒃᐱᖕᓂᐊᖅᑎᐊᖅᑐᐊᓘᖕᒪᑕ (C15 2020a, ᐃᓄᒃᑎᑑᓕᖅᑕᐅᓯᒪᔪᖅ)

ᐃᓄᐃᑦ ᐃᓱᒫᓘᑎᖃᕐᒪᑕ ᑕᕆᐅᕐᒥᐅᑦ ᐃᓂᒋᕙᒃᑕᕋᓗᐊᖏᑦ ᐱᑕᖃᕈᓐᓃᓕᕐᒪᑕ ᓄᓘᔮᓕᕆᓂᕐᒧᑦ. ᑐᕙᖅ, ᐱᒻᒪᕆᐊᓗᒃ ᐊᐃᕕᕐᓄᑦ, ᐊᐅᒃᓵᓕᔪᓐᓇᕐᒪᑦ ᐅᒥᐊᕐᔪᐊᓄᑦ ᑐᕙᐃᔭᖅᑕᐅᓗᐊᕈᓂ, ᐊᒻᒪ ᑕᐃᒪᐃᒃᑲᓗᐊᖅᑎᓪᓗᒍ, ᓂᕐᔪᑏᑦ ᓱᕈᕐᓄᑦ ᖃᓄᐃᔾᔪᑎᖃᕈᓐᓇᕐᒪᑕ, ᐳᔪᕐᓗᖕᓄᑦ ᐅᖅᓱᐊᓗᒡᓘᓐᓃᑦ ᑯᕕᓐᓂᖅᐸᑦ, ᐃᒪᑦᑎᐊᕙᑦ ᓱᕈᖅᐸᓪᓕᐊᓂᖏᓐᓄᑦ, ᓯᑯᑦ, ᐊᒻᒫᒪᔪᓪᓗ, ᐊᓯᖏᓪᓗ ᑕᕆᐅᕐᒥᐅᑕᑦ ᐆᒪᔪᖏᑦ.

… ᓲᖃᐃᒻᒪ ᐅᓄᕐᓂᖅᓴᓂᒃ ᐅᒥᐊᕐᔪᐊᖅᑕᖃᖃᑦᑕᓕᕐᒪᑦ ᑕᑯᖃᑦᑕᖏᓐᓂᖅᓴᐅᓕᖅᑐᒍᑦ ᕿᓚᓗᒐᕐᓂᒃ ᐊᕐᕌᒍᑕᒫᑦ…ᑐᖔᓂ ᐊᕐᕌᒎᒃ ᒪᕐᕉᒃ ᐃᓗᐊᓂ ᐃᓄᖕᒥ ᓈᓴᐃᔪᖃᓚᐅᕐᒪᑕ ᕿᓚᓗᒐᕐᓂᒃ. ᐅᖃᓚᐅᖅᑐᖅ 12,000ᓗᐊᓂᒃ ᕿᓚᓗᒐᖅᑕᖃᓚᐅᖅᑐᖅ. ᑕᒪᑐᒪᓂᓕ ᐊᕐᕌᒍᒥ 200ᖏᓐᓃᓪᓗᐊᖅᑰᔨᓚᐅᖅᑐᑦ…ᑕᐃᒪᐃᓐᓂᖓᓄᑦ, ᕿᓚᓗᒃᑭᕿᔪᖃᓚᐅᖏᑦᑐ. ᐄ, ᒪᒃᑖᖅᑐᕈᒪᕙᒃᑑᒐᓗᐊᑦ. ᕿᓚᓗᒃᑭᐊᕈᕕᑦ, ᕿᓚᓗᒐᕐᓗᑎᒃ, ᐃᒍᓇᖅᓰᔪᒪᕙᖕᒥᖕᒪᑕ ᐅᑭᐅᒧᑦ, ᑕᐃᒪᒍᓐᓇᐃᔾᔨᔪᒍᑦ ᕿᓚᓗᒐᖃᙱᓗᐊᓕᕐᒪᑦ ᐊᖏᕐᕋᐅᔾᔨᒐᒃᓴᓂᒡᓘᓐᓃᑦ (P09, 05-ᕖᕝᕗᐊᕆ-19)

ᐃᓱᒫᓘᑎᖃᖅᑐᖅ ᐅᒥᐊᕐᔪᐊᑦ ᐅᓄᖅᓯᒋᐊᖅᑕᐅᒃᐸᑕ ᐅᓯᑲᖅᑕᖅᑏᑦ ᐊᒃᑐᐃᓂᖃᓪᓚᕆᖕᓂᐊᕐᒪᖕ ᑕᕆᐅᕐᒥᐅᓂᒃ ᐃᓱᒫᓘᑎᒋᔭᖓ…ᐊᓯᐊᓄᐊᖅᑲᑐᐃᓐᓇᕆᐊᖃᕐᓂᖏᓐᓂᒃ ᓄᓇᖏᑕ, ᑕᐃᑯᙵᕋᓱᒋᐊᖃᓕᕐᓗᑎᒃ, ᓲᖃᐃᒻᒪᓗ ᓂᐱᐊᓗᒃᑕᖃᐅᓕᕐᒪᑦ ᐅᒥᐊᕐᔪᐊᑦ ᐅᑎᖅᑕᕋᕐᓂᖏᓐᓄᑦ, ᐊᒃᑐᖅᑕᐅᔾᔪᑎᒋᒍᓂᔾᔪᒃ, ᐄ ᐊᓯᐊᓄᐊᖅᐸᓪᓕᐊᓂᐊᖅᑐᑦ… (A10 2020, ᐃᓄᒃᑎᑑᓕᖅᑕᐅᓯᒪᔪᖅ)

ᓄᓘᔮᓕᕆᓂᖅ ᐱᔾᔪᑎᒋᓪᓗᒍ, ᓄᓇᓕᖕᒥᐅ ᓂᕆᐅᒃᑐᑦ ᓂᕐᔪᑎᖃᖏᓐᓂᖅᓴᐅᓂᐊᕋᓱᒋᔭᐅᓪᓗᓂ ᓲᕐᓗ ᐊᐃᕖᑦ, ᓇᑦᑏᑦ, ᓇᓄᐃᑦ, ᕿᓚᓗᒐᑦ ᐊᖑᓇᓱᒡᕕᐅᒐᔪᒃᑐᓂᒃ (ᕿᕐᖑᐊᓂ ᓲᕐᓗ), ᑐᓴᓚᐅᕋᑦᑕ ᑕᐃᒪᐃᓕᖅᐸᑦ ᖃᐅᔨᒪᓃᑦ ᐊᓯᐅᕙᓪᓕᐊᓂᐊᕐᒥᖕᒪᑕ, ᐊᒃᑐᖅᑕᐅᔾᔪᑎᐅᒻᒪᕆᒡᓗᓂ ᓂᕿᑖᕈᑎᒋᕙᒃᑕᑦᑎᓐᓄᑦ.