ᓴᖅᑭᖅᑕᐅᕕᖓᑕ ᐅᓪᓗᖓ: ᒫᑦᓯ 31, 2025
ᒪᑐᕕᔅᓴᖓᑕ ᐅᓪᓗᖓ ᖃᑦᑎᒥᓗ: ᐄᐳᓗ 11, 2025 4:00ᒨᖅᑲᑦ ᐅᓐᓄᓴᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ
ᑐᓂᓗᒋᑦ ᑐᔅᓯᕋᐅᑏᑦ ᐃᕐᖐᓈᖅᑕᐅᑎᒃᑯᑦ ᐅᕗᖓ: procurement@qia.ca
ᑐᑭᓯᒋᐊᕐᕕᓴᓪᓗᐊᑕᖅ: ᐄᐊᓐ ᒪᒃᑖᓄᑦ, ᐱᖁᑎᓕᕆᔨ, procurement@qia.ca
ᑐᑭᓯᒋᐊᕈᑎᖃᕐᓂᕐᒧᑦ ᑭᓪᓕᖓ: ᑐᔅᓯᕋᖅᑐᑦ ᓇᔅᓯᐅᔾᔨᖃᑦᑕᕆᐊᓖᑦ ᐊᐱᖅᑯᑎᖏᓐᓂᒃ ᐊᐱᖅᑯᑎᔅᓴᖃᖅᑲᑕ ᑐᑭᓯᒋᐊᕐᕕᓴᓪᓗᐊᑕᐅᔪᒧᑦ ᐄᐳᓗ 8, 2025 ᑐᖔᓂ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ
ᑐᔅᓯᕋᐅᓯᐅᖁᔨᔾᔪᑎ ᓇᐃᓪᓕᑎᕐᓯᒪᓪᓗᒋᑦ
ᐱᔾᔪᑎᖓ ᑖᔅᓱᒪ ᑐᔅᓯᕋᐅᓯᐅᖁᔨᔾᔪᑎᐅᑉ ᕿᓄᔾᔪᑎᖃᖅᑐᑎᒃ ᐱᔨᑦᑎᕋᖅᑐᔅᓴᓂᑦ ᓂᐅᕕᕈᒪᓪᓗᑎᒃ ᓱᓇᒃᑯᑖᓂᑦ ᕿᑭᖅᑕᓂᒃᑯᑦ ᓇᐅᑦᑎᕐᓱᖅᑎᖃᕐᓂᕐᒧᑦ ᐱᓕᕆᐊᖓᓐᓄᑦ 13ᓂᑦ ᓄᓇᓕᓐᓂᑦ ᕿᑭᖅᑕᓂ ᓄᓇᕗᒻᒥ.
ᕿᑭᖅᑕᓂᒃᑯᑦ ᓯᓚᑖᓂᑦ ᐱᔨᑦᑎᕋᖅᑐᔅᓴᓂᑦ ᖃᐅᔨᓇᓱᒻᒪᑕ ᑲᒪᒋᔭᖃᕋᔭᖅᑐᓂᑦ ᐊᑐᓕᖅᑎᑦᑎᕙᓪᓕᐊᒐᔭᖅᑐᓂᓪᓗ ᓂᐅᕕᕐᓂᕐᒥᒃ ᖃᒧᑕᐅᔭᕐᒥᑦ ᐱᓲᑎᑲᓪᓚᒥᓪᓗ ᐊᑐᖅᑕᐅᔭᕆᐊᓕᓐᓂᑦ ᐊᐅᓚᓂᖃᑦᑎᐊᖃᑦᑕᖁᓪᓗᒋᑦ ᕿᑭᖅᑕᓂ ᓇᐅᑦᑎᕐᓱᖅᑏᑦ ᓇᐅᑦᑎᕐᓱᖅᑎᖃᕐᓂᕐᒧᑦ ᐱᓕᕆᖓᓐᓂᑦ. ᖃᐅᔨᒪᑦᑎᐊᕈᒪᓪᓗᑎᒃ ᓇᐅᑦᑎᕐᓱᖅᑏᑦ ᓱᓇᒃᑯᑖᖃᑦᑎᐊᕋᓗᐊᕐᒪᖔᑕ ᐃᖅᑲᓇᐃᔮᕆᕙᑦᑕᖏᓐᓂᒃ ᐃᖅᑲᓇᐃᔮᖃᖃᑦᑕᓂᐊᖅᑎᓪᓗᒋᑦ; ᖃᒧᑕᐅᔭᐃᑦ ᐱᓲᑎᑲᓪᓚᐃᓪᓗ ᐊᑑᑎᖃᓪᓚᕆᒻᒪᑕ ᐊᑦᑕᓇᑎᑐᒥᒃ ᐊᒻᒪᓗ ᑲᔪᓯᑎᑦᑎᑦᑎᐊᖃᑦᑕᖁᓪᓗᒋᑦ ᐱᓕᕆᐊᖏᓐᓂᒃ ᐅᑭᐅᖅᑕᖅᑐᒥ. ᑖᒃᑯᓂᖓ ᓱᓇᒃᑯᑖᓂᑦ ᓄᓇᓕᓐᓅᕈᔾᔨᓂᐊᖅᑲᑕ ᐸᕐᓇᑕᐅᓯᒪᒋᐊᖃᕐᓂᐊᒥᒻᒪᑦ, ᐋᖅᑭᓱᖅᑕᐅᓯᒪᓗᓂᓗ ᐊᒻᒪᓗ ᐱᓕᕆᐊᖅ ᑲᒪᒋᔭᐅᔭᕆᐊᖃᕐᓂᐊᒥᒻᒪᑦ ᑕᐃᒫᒃ ᖃᐅᔨᒪᓇᑦᑎᐊᓂᐊᕐᖓᑦ ᓱᓇᒃᑯᑖᑦ ᑭᓱᑐᐃᓐᓇᐃᓪᓗ ᓂᐅᕕᐊᖑᖁᓪᓗᒋᑦ ᐊᒻᒪᓗ ᐊᑐᐃᓐᓇᐅᓕᖁᓪᓗᒋᑦ ᐅᒥᐊᕐᔪᐊᒃᑯᑦ ᐅᓯᔭᐅᔭᕆᐊᖃᕐᐸᑦᑐᓄᑦ ᓈᒻᒪᓈᕐᓯᒪᒋᐊᖃᕐᐸᒻᒪᑕ ᐅᑭᐅᖅᑕᖅᑐᒧᑦ ᐅᓯᔭᐅᓂᐊᖅᑐᑦ.
ᓂᕈᐊᖅᑕᖅ ᑐᔅᓯᕋᐅᓯᐅᕐᓯᒪᔪᖅ ᑲᒪᒋᔭᖃᕆᐊᖃᕋᔭᕐᖓᑦ ᓂᐅᕕᕐᓂᕐᒥᒃ ᓱᓇᒃᑯᑖᓂᑦ ᐊᒻᒪᓗ ᐊᑐᖅᑕᐅᔭᕆᐊᓕᓐᓂᑦ ᐊᑐᓂᑦ ᓇᐅᑦᑎᕐᓱᖅᑎᖃᕐᕕᑎᓐᓄᑦ ᕿᑭᖅᑕᓂ ᓄᓇᓕᓐᓂᑦ, ᓈᒻᒪᓈᕐᓯᒪᑦᑎᐊᕐᓗᑎᒃ ᑕᐃᒫᒃ ᓱᓇᒃᑯᑖᖏᑦ ᐅᓯᔭᐅᖃᓯᐅᑎᒍᓐᓇᓛᕐᖓᑕ ᐅᒥᐊᕐᔪᐊᒃᑯᑦ ᐊᕐᕌᒍᑕᒫᑦ ᐅᒥᐊᕐᔪᐊᖃᕐᐸᒻᒪᑦ ᐊᑐᓂᑦ ᓄᓇᓕᓐᓄᑦ.
ᑐᔅᓯᕋᖅᑐᑦ ᐃᓕᙵᔭᕆᐊᓖᑦ ᐱᔨᑦᑎᕋᐅᑎᖃᕐᓂᕐᒥᒃ ᐊᐅᓚᑦᑎᓂᕐᒥᓪᓗ ᐱᓕᕆᐊᓂᑦ ᑕᐃᒫᒃ ᑲᒪᒋᔭᐅᓲᓂᑦ ᐊᒻᒪᓗ ᐱᔭᕆᐊᑐᓂᖏᓐᓂᒃ. ᓂᕈᐊᖅᑕᖅ ᑐᔅᓯᕋᐅᓯᐅᕐᓯᒪᔪᖅ ᑕᑯᖅᑯᔾᔨᒋᐊᓕᒃ ᑕᐃᒫᒃ ᐃᖅᑲᓇᐃᔮᖃᓚᐅᕐᓯᒪᓂᖓᓂᒃ ᓄᓇᕗᒻᒥ, ᐊᐅᓚᑦᑎᓂᕐᒥᒃ ᓂᐅᕕᕐᓂᕐᒥᒃ ᐅᑭᐅᖅᑕᖅᑐᒥ ᐊᒻᒪᓗ ᑲᒪᒋᔭᖃᕐᓂᕐᒥᒃ ᐅᒥᐊᕐᔪᐊᒃᑰᖅᑐᔅᓴᓂᑦ ᐋᖅᑭᓯᒪᓂᐅᔭᕆᐊᖃᓲᓂᑦ.
ᑕᐃᒃᑯᐊ ᑐᔅᓯᕋᐅᓯᐅᖅᑐᑦ ᓇᔅᓯᐅᔾᔨᖃᑦᑕᕆᐊᓖᑦ ᑐᔅᓯᕋᐅᑎᖏᓐᓂᒃ ᐅᕗᖓ procuement@qia.ca ᐄᐳᓗ 11, 2025 ᑐᖔᓂ, 4:00ᒨᓚᐅᙱᓐᓂᖓᓂ ᐅᓐᓄᓴᒃᑯᑦ ᑲᓇᓐᓇᐅᑉ ᓯᕿᙳᔭᖓ ᒪᓕᑦᑐᒍ. ᐊᐱᖅᑯᑎᔅᓴᖃᕈᔅᓯ, ᐊᑏ ᑎᑎᕋᕐᕕᐅᖃᑦᑕᓂᐊᖅᑯᖅ ᐄᐊᓐ ᒪᒃᑖᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ ᐱᖁᑎᓕᕆᔨ ᐅᕗᖓ procurement@qia.ca.
