ᐸᐃᕆᕕᓐᓄᑦ ᐃᑲᔫᑏᑦ
ᐃᑲᔪᖃᑦᑕᕐᓂᖅ ᐃᓄᓐᓂᑦ ᕿᑐᕐᖓᕇᓂᑦ ᐊᑭᓖᖃᑦᑕᓂᕐᒧᑦ ᐸᐃᕆᔭᐅᔾᔪᑎᓄᑦ
ᕿᑭᖅᑕᓂᒃᑯᑦ ᐸᐃᕆᕕᓐᓄᑦ ᐃᑲᔫᑎᖏᑦ ᐱᒋᐊᖅᑎᑕᐅᔪᔪᑦ ᐅᑐᐱᕆ 2017ᖑᑎᓪᓗᒍ ᑖᔅᓱᒪ ᐊᑖᓂ ᐃᑲᔫᓯᐊᔅᓴᓂᑦ ᑮᓇᐅᔭᓂᑦ ᐱᓕᕆᐊᕐᒥ. ᑖᓐᓇ ᐱᓕᕆᐊᖅ ᐃᑲᔫᑎᖃᕐᐸᑦᑐᖅ ᕿᑭᖅᑕᓂ ᐃᓄᖏᓐᓄᑦ ᕿᑐᕐᖓᓕᓐᓄᑦ ᕿᑐᕐᖓᖏᑦ ᓚᐃᓴᓕᓐᓄᑦ ᐸᐃᕆᕕᓕᐊᖃᑦᑕᑎᓪᓗᒋᑦ ᕿᑭᖅᑕᓂ ᓄᓇᓕᓐᓂᑦ ᐊᑭᓖᖃᑦᑕᓂᕐᒧᑦ ᐸᐃᕆᕕᓐᓄᑦ ᐊᑭᓕᐅᑎᒋᒋᐊᖃᕐᐸᑦᑕᖏᓐᓂᒃ.
ᑖᒃᑯᐊ ᐃᑲᔫᑏᑦ ᐱᕙᓪᓕᐊᒍᑎᖃᕐᓯᒪᔪᖅ ᑲᑭᕙᒃ ᑲᑐᔾᔨᖃᑎᒌᑦ ᒫᓐᓇ ᐱᓕᕆᐊᕆᕙᑦᑕᖓᓐᓂᒃ. ᑕᐃᒪᙵᑦ 1990 ᓄᙳᖏᓐᓂ ᐱᒋᐊᓚᐅᕐᓯᒪᒻᒪᑕ, ᑲᑭᕙᒃᑯᑦ ᐊᐅᓚᑦᑎᖃᑦᑕᕐᓯᒪᒻᒪᑕ ᕿᑐᕐᖓᓕᓐᓄᑦ ᐃᑲᔫᑎᓂᑦ ᑮᓇᐅᔭᖅᑖᕐᓯᒪᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᓪᓚᓄᑦ ᐃᓄᓐᓄᓪᓗ ᐸᐃᕆᔨᖃᖃᑦᑕᓂᕐᒧᑦ ᐱᓇᓱᐊᕈᑕᐅᕙᑦᑐᒥ.
ᕿᑭᖅᑕᓂᒃᑯᑦ ᐃᑲᔫᑎᖏᑦ ᖄᒃᑲᓐᓂᐊᒍᑦ ᐃᓚᓕᐅᑎᕙᑦᑐᑦ ᑲᑭᕙᒃᑯᑦ ᐃᑲᔫᑎᒋᕙᑦᑕᖏᓐᓄᑦ $19 ᖃᐅᑕᒫᑦ, ᐃᓄᓐᓄᑦ ᕿᑐᕐᖓᓕᓐᓄᑦ $29ᓂᑦ ᖃᐅᑕᒫᑦ ᐸᐃᕆᕕᒻᒧᑦ ᐊᑭᓕᐅᑎᖃᕐᐸᑦᑐᑦ. ᕿᑭᖅᑕᓂᒃᑯᑦ ᐸᐃᕆᕕᓐᓄᑦ ᐃᑲᔫᑎᖏᑦ ᐊᑐᐃᓐᓇᐅᓂᐊᖅᑐᑦ ᒫᑦᓯ 2022ᒧᑦ ᑎᑭᓪᓗᒍ.
ᑖᓐᓇ ᐊᖅᑯᑎᒋᓪᓗᒍ ᐱᓕᕆᐊᖅ ᕿᑭᖅᑕᓂᒃᑯᑦ ᐃᑲᔪᕐᓯᒪᔪᑦ ᑕᒫᓂ 200ᖏᓐᓃᑦᑐᓂᑦ ᐃᓄᓐᓂᑦ ᓱᕈᓯᕐᓂᑦ ᐸᐃᕆᕕᒻᒦᐸᑦᑐᓂᑦ. ᕿᑐᕐᖓᓖᑦ ᕿᑭᖅᑕᓂ ᓄᓇᓖᑦ ᐃᑲᔫᓯᐊᕐᑖᐸᑦᑐᑦ $2,500ᓂᑦ ᐊᑐᓂᑦ ᓱᕈᓯᕐᓄᑦ, ᐊᕐᕌᒍᑕᒫᑦ ᓚᐃᓴᓕᓐᓂᑦ ᐸᐃᕆᕕᒻᒦᖃᑦᑕᕈᓐᓇᖁᓪᓗᒋᑦ. ᑖᒃᑯᐊ ᐊᑑᑎᖃᕐᐸᑦᑐᓂᑦ ᖃᓂᒋᔭᖓᓃᑦᑐᑦ $500,000 ᐊᕐᕌᒍᑕᒫᑦ ᐸᐃᕆᕕᒻᒦᑎᑦᑎᖃᑦᑕᕈᓐᓇᖁᓪᓗᒋᑦ.
ᑐᑭᓯᒃᑲᓐᓂᕈᒪᒍᔅᓯ ᐅᕝᕙᓘᓐᓃᑦ ᑐᔅᓯᕋᐅᓯᐅᕈᑦ ᐱᔪᒪᒍᔅᓯᐅᒃ:
ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᑎᑦᑎᓂᕐᒧᑦ ᐊᑐᖃᑦᑕᕋᔅᓴᐃᑦ
ᐱᔪᓐᓇᕐᓯᑎᑦᑎᒋᐊᒃᑲᓂᕐᓂᖅ ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᑎᑦᑎᖃᑦᑕᓂᕐᒥᒃ
2018ᖑᑎᓪᓗᒍ, ᕿᑭᖅᑕᓂᒃᑯᑦ ᐱᓕᕆᖃᑎᖃᔪᔪᑦ ᐅᖃᓕᒫᒐᓕᐅᖅᑎᓂᑦ Inhabit Media −ᑯᓐᓂᑦ ᓴᓇᓂᐊᕐᖓᑕ ᓱᕈᓯᓛᕐᓄᑦ ᐃᓕᓐᓂᐊᕆᐅᕐᓴᐅᑎᓂᑦ ᓲᕐᓗ ᐊᒡᒐᒻᒧᑦ ᐊᐅᓚᑕᒐᐃᑦ, ᐋᖅᑭᔅᓱᒐᐃᑦ, ᐅᖃᓕᒫᒐᐃᑦ, ᐊᒻᒪᓗ ᐅᖃᓕᒫᕆᐅᕐᓴᐅᑏᑦ ᐱᔾᔪᑎᓖᑦ ᐃᓄᐃᑦ ᐃᓅᓯᖏᓐᓂᑦ ᐃᓕᖅᑯᓯᖓᓐᓂᓪᓗ.
ᑲᑐᔾᔨᖃᑎᖃᖅᑐᑎᒃ ᓄᓇᕗᑦ ᒐᕙᒪᒃᑯᖏᓐᓂᑦ ᐃᓕᓐᓂᐊᕐᓂᓕᕆᔨᒃᑯᓐᓂᑦ ᑖᒃᑯᐊ ᐊᑐᖃᑦᑕᕋᔅᓴᐃᑦ ᑐᓂᔭᐅᔪᔪᑦ 55ᓄᑦ ᐸᐃᕆᕕᓐᓄᑦ ᓄᓇᕗᒻᒦᑦᑐᓄᑦ. ᕿᑭᖅᑕᓂᒃᑯᑦ ᐃᓱᒪᔪᑦ ᑕᒫᓂ ᐅᖓᑖᓃᑦᑐᑦ 1,000 ᕿᑭᖅᑕᓂ ᓱᕈᓯᖏᑦ ᐱᕚᓪᓕᕈᑎᖃᕐᐸᓪᓕᐊᓂᖏᓐᓂᒃ ᑖᒃᑯᓂᖓ ᐃᓕᓐᓂᐊᕆᐅᕐᓴᐅᑎᓂᑦ. ᑖᓐᓇ ᐱᓕᕆᐊᖅ ᑲᔪᓯᑎᑕᐅᔪᓐᓇᕐᓯᒪᔪᖅ ᕿᑭᖅᑕᓂᒃᑯᑦ ᐃᑲᔫᓯᐊᔅᓴᓂᑦ ᑮᓇᐅᔭᓂᑦ ᐊᑐᖅᑐᑎᒃ. ᐅᖃᓕᒫᒐᑦ ᐱᔭᔅᓴᐅᕗᑦ ᑖᒃᑯᑎᒎᓇ Inhabit Media
ᐃᐱᑎᑭ
ᐱᔪᓐᓇᕐᓯᑎᑦᑎᒋᐊᒃᑲᓂᕐᓂᖅ ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᑎᑦᑎᖃᑦᑕᓂᕐᒥᒃ ᕿᑭᖅᑕᓂ ᓄᓇᓕᓐᓂᑦ
2018ᖑᑎᓪᓗᒍ, ᕿᑭᖅᑕᓂᒃᑯᑦ ᓴᖅᑭᑎᑦᑎᔪᔪᑦ ᓄᑖᕐᒥᒃ ᐱᓕᕆᐊᕐᒥᑦ, ᐃᐱᑎᑭ, ᑐᕌᖓᔪᖅ ᐱᔨᑦᑎᕋᐅᑎᖃᕐᓂᕐᒥᒃ ᐃᓕᖅᑯᓯᕐᒨᖓᔪᓂᑦ ᐅᖃᐅᓯᕐᒨᖓᔪᓂᓪᓗ ᓱᕈᓯᓛᕐᓂᑦ ᐃᓕᓐᓂᐊᕆᐅᕐᓴᑎᓂᑦ.
ᐃᐱᑎᑭ ᐱᓕᕆᐊᖅ ᒪᑯᓂᖓ ᑲᒪᒋᔭᖃᕐᓯᒪᔪᑦ:
- ᐱᓇᓱᐊᕈᑎᔅᓴᐃᑦ ᐃᑲᔫᑎᖃᕐᓂᐊᕐᖓᑕ ᐃᓄᑐᖃᐃᑦ ᐃᓚᒋᔭᐅᖃᑦᑕᖁᓪᓗᒋᑦ ᐸᐃᕆᕕᓐᓂᑦ
- ᕿᑐᕐᖓᕇᓄᑦ ᐅᖃᓕᒫᖃᑦᑕᕈᑎᔅᓴᐃᑦ ᓈᒪᔪᑦ
- ᐸᐃᕆᕕᓐᓂᑦ ᑲᑎᒪᑎᑦᑎᓂᖅ ᐊᒻᒪᓗ ᐃᓕᓐᓂᐊᑎᑦᑎᓂᖅ
- ᐋᖅᑭᓱᖅᑕᐅᓯᒪᔪᒥᒃ ᐃᓕᓐᓂᐊᑎᑦᑎᓂᖅ ᐸᐃᕆᕕᓐᓂᑦ ᑲᑎᒪᔨᓂᑦ
ᑐᑭᓯᒃᑲᓐᓂᕈᒪᒍᔅᓯ, ᑐᑭᓯᒋᐊᕐᓗᓯ ᐅᕗᖓ: makigiaqta.com
ᓱᐳᕋᐅᑦᔅ ᐅᓪᓗᖅᓯᐅᕆᐊᖅᑐᕐᕕᒃ ᓱᕈᓯᕐᓄᑦ
ᕿᑭᖅᑕᓃᒃᑯᑦ ᐅᐱᒍᓱᒃᖢᑎᑦ ᑮᓇᐅᔭᖃᖅᑎᑦᓯᕙᒃᑐᑦ ᓯᐳᕋᐅᑦᔅᒥ ᐅᓪᓗᖅᓯᐅᕆᐊᖅᑐᕐᕕᖕᒥ ᓱᕈᓯᕐᓄᑦ. ᑖᓐᓇ ᐱᓕᕆᐊᖅ ᐸᐃᕆᖃᑦᑕᖅᑐᑦ, ᐱᙳᐊᖅᑎᑕᐅᕙᒃᑐᑦ ᐊᒻᒪᓗ ᐃᓕᓐᓂᐊᖅᑎᑕᐅᓪᓗᑎᒃ ᓱᕈᓯᕐᓂ ᐊᕐᕌᒍᓕᖕᓄᑦ 5ᒥᑦ 9ᒧᑦ, ᐃᑲᔪᖅᑎᖃᖅᖢᑎᒃ (ᐊᕐᕌᒍᓕᖕᓂᑦ 10ᒥᑦ 12ᒧᑦ) ᐊᒻᒪᓗ ᐃᖅᑲᓇᐃᔭᖅᑎᖃᖅᖢᑎᒃ (ᐊᕐᕌᒍᓕᖕᓂᑦ 13ᒥᑦ 18ᒧᑦ). ᓯᐳᕋᐅᑦᔅ ᐊᕐᕌᒍᑕᒫᑦ ᐊᐅᓚᑕᐅᕙᒃᑐᖅ ᓯᑕᒪᓄᑦ ᐱᖓᓲᔪᖅᑑᔪᓄᓪᓗ ᐱᓇᓱᐊᕈᓯᓂ ᔪᓚᐃᒥ ᐊᒡᒌᓯᒧᑦ.
ᐱᔾᔪᑎᓪᓗᐊᑕᖓ ᑖᔅᓱᒪᐅᑉ ᐱᓕᕆᐊᑉ ᐃᓄᖕᓂ ᐃᓅᓱᒃᑐᓂ ᓯᕗᒃᑲᖅᑎᐅᓂᕐᒧᑦ ᐃᓕᓐᓂᐊᖅᑎᑕᐅᓪᓗᑎᒃ, ᑲᑐᔾᔨᖃᑎᒌᖕᓂᕐᒥᒃ ᐊᒻᒪᓗ ᐱᔭᒃᓴᒥᒃ ᐋᖅᑭᒃᓯᔪᓐᓇᕐᓂᕐᒥᒃ ᓴᖅᑭᑎᑦᓯᓂᕐᒥᓗ. ᐊᑐᖅᖢᑎᒃ ᐃᓄᐃᑦ ᐱᐅᓯᑐᖃᖏᓐᓂᒃ ᐃᓚᐅᑎᑦᓯᖃᑦᑕᕐᓂᕐᒥᒃ ᐃᓕᓐᓂᐊᕐᓂᕐᒧᑦ ᖃᐅᔨᓴᖅᑐᓕᕆᓂᕐᒥᒃ ᐊᒻᒪᓗ ᓴᓇᙳᐊᕐᓂᕐᒥᓗ, ᓱᕈᓰᑦ ᐃᓅᓱᒃᑐᓪᓗ ᐃᓚᐅᕙᒃᖢᑎᒃ ᐊᔾᔨᒌᙱᑦᑐᓂᒃ ᐱᓕᕆᐊᒃᓴᓂ, ᐱᖃᓯᐅᑎᓪᓗᒋᑦ ᐅᑯᐊ:
- ᓴᓇᙳᐊᕐᓂᖅ
- ᐱᙳᐊᕐᓂᖅ ᑲᑎᒻᒪᓪᓗᑎᒃ
- ᖃᐅᔨᓴᖅᑐᓕᕆᓂᕐᒥᒃ ᐱᓕᕆᐊᒃᓴᓂ
- ᓄᓇᓕᐊᕐᓂᖅ − ᐊᒻᒨᒪᔾᔨᐊᕐᓂᖅ, ᐃᖃᓪᓕᐊᕐᓂᖅ, ᐊᓯᖏᓪᓗ ᓯᓚᒥ ᖃᓄᐃᓕᐅᕈᑎᓂ
- ᐃᒐᑎᑦᓯᓂᖅ ᐊᒻᒪᓗ ᓴᓗᒻᒪᖅᓴᐃᑎᑕᐅᓪᓗᑎᒃ ᐃᓕᓐᓂᐊᖅᑎᑦᓯᒐᓱᒃᖢᑎᒃ ᐃᑲᔪᖃᑕᐅᒋᐊᖃᕐᓂᕐᒥᒃ
ᓯᐳᕋᐅᑦᔅ ᐱᒋᐊᖅᑕᐅᓚᐅᖅᓯᒪᔪᖅ 1996ᒥ ᐊᒻᒪᓗ ᐊᕐᕌᒍᑕᒫᑦ ᓴᖅᑭᑎᑕᐅᕙᒃᖢᓂ ᐃᖃᓗᓐᓂ. 50ᓂ ᓱᕈᓯᕐᓂ ᐃᓅᓱᒃᑐᓂᓗ ᐃᓚᐅᔪᖃᕈᓐᓇᖅᑐᖅ ᐃᓕᓐᓂᐊᖅᑎᑕᐅᓪᓗᑎᒃ ᐊᐅᔭᒃᑯᑦ ᐃᓕᖅᑯᓯᕐᒥ ᖃᓄᐃᓕᐅᖅᑎᑦᓯᕙᒃᖢᑎᒃ ᐊᕐᕌᒍᑕᒫᑦ. ᕿᑭᖅᑕᓃᒃᑯᑦ ᓄᓇᓕᖕᓂ ᐃᑲᔪᖅᖢᑎᒃ ᑕᐃᒪᓐᓇᐃᑦᑐᓂ ᐱᓕᕆᐊᒃᓴᓂ ᓴᖅᑭᑎᑦᓯᕙᖕᒥᔪᑦ ᕿᑭᖅᑕᓂ ᓄᓇᓕᖕᓂ.
ᕿᑭᖅᑕᓃᒃᑯᑦ ᖁᔭᓐᓇᒦᖅᓯᒪᔪᑦ ᐊᒃᓱᐋᒃᑯᓐᓂ ᐃᑲᔪᖅᓯᒪᓂᖏᓐᓂᒃ ᖃᐅᔨᓴᖅᑐᓕᕆᓂᕐᒧᑦ ᐱᓕᕆᐊᖑᔪᓂᒃ ᓯᐳᕋᐅᑦᓯᓄᑦ ᐅᓪᓗᖅᓯᐅᕆᐊᖅᑐᕐᕕᖕᒧᑦ
ᑐᑭᓯᒍᒪᒍᕕᑦ ᖃᓄᖅ ᐱᓇᓱᖃᑕᐅᔪᓐᓇᕐᒪᖔᖅᐲᑦ, ᖃᐅᔨᒋᐊᕐᕕᒋᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ.
ᐱᒋᐊᕈᑎᑦᑎᐊᕙᐃᑦ ᐱᓕᕆᐊᖅ
ᓴᓇᓂᖅ ᐃᓄᒃᑎᑑᖓᔪᓂᑦ ᐅᖃᓕᒫᒐᕐᓂᑦ
ᕿᑭᖅᑕᓂᒃᑯᑦ ᐱᓕᕆᖃᑎᖃᖃᑦᑕᕐᓯᒪᒻᒪᑕ ᐅᖃᓕᒫᒐᓕᐅᖅᑎᓂᑦ Inhabit Media ᖁᓕᐸᓗᓐᓂᑦ ᐊᕐᕌᒍᓂᑦ ᐱᒋᐊᕈᙱᑦᑎᐊᕙᑦᑎᒍᑦ ᑖᒃᑯᐊ ᓴᓇᖃᑦᑕᓲᑦ ᐃᓄᒃᑎᑑᖓᔪᓂᑦ ᓱᕈᓯᕐᓯᐅᑎᓂᑦ ᐅᖃᓕᒫᒐᕐᓂᑦ. ᐃᑲᔪᕐᓯᒪᔪᑦ ᐃᓱᒪᒋᓯᒪᔭᑦᑎᓐᓂᒃ ᐊᒻᒪᓗ ᐃᑲᔪᕐᓯᒪᓪᓗᑎᒃ ᐅᕙᑦᑎᓐᓂᒃ ᐃᓱᒪᑖᕆᓯᒪᔭᕗᑦ ᐱᓪᓚᑦᑖᕈᖅᑎᑕᐅᖃᑦᑕᖅᑐᑎᒃ.
ᐅᖃᓕᒫᒐᓕᐊᖑᕙᑦᑐᑦ ᑕᕝᕘᓇ ᑐᓂᔭᐅᕙᑦᑐᑦ ᐃᓕᓴᕕᓐᓄᑦ ᐸᐃᕆᕕᓐᓄᓪᓗ ᕿᑭᖅᑕᓂ ᓄᓇᓕᓐᓄᑦ. ᑖᒃᑯᐊ ᐱᔭᔅᓴᐅᖃᑦᑕᕐᒥᔪᑦ ᐊᑭᖃᕋᑎᒃ ᖃᕋᓴᐅᔭᒃᑯᑦ ᐅᕙᙵᑦ ᑐᑭᓯᒋᐊᕈᑎᖃᕐᕕᒻᒥᑦ ᓄᓇᕗᒥ ᒪᕐᕉᓐᓂᒃ ᐅᖃᐅᓯᓕᓐᓂᑦ ᐃᓕᓐᓂᐊᕐᓂᓕᕆᓂᕐᒧᑦ ᑲᑐᔾᔨᖃᑎᒌᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓ..
- ᐆᒪᔪᑦ − ᐅᑭᐅᖅᑕᖅᑑᑉ ᐆᒪᔪᖏᓐᓂᒃ ᐃᓕᑦᑎᓗᓯ, ᓴᐃᒪᓐ ᐊᕙ, ᐋᓇ ᔩᒡᓗ ᐊᒻᒪ ᓯᑎᐊᕙᓂ ᒪᒃᑖᓄᑦ
- ᐆᒪᔪᑦ − ᐅᑭᐅᖅᑕᖅᑑᑉ ᐆᒪᔪᖏᓐᓂᒃ ᐃᓕᑦᑎᓗᓯ, ᓴᐃᒪᓐ ᐊᕙ, ᓯᒡᓗᒃ ᐊᕿᐊᕈᖅ, ᐋᓇ ᔩᒡᓗ, ᐊᒻᒪ ᓯᑎᐊᕙᓂ ᒪᒃᑖᓄᑦ
- ᓄᓇᒥ ᐱᓱᔪᖕᓂᖅ, ᐅᓖᐱᑲ Hᐊᐃᓐᓄ ᐊᒻᒪᓗ ᐋᓇ ᔩᒡᓗ
- ᖃᓗᐸᓕᒃ, ᐃᓚᐃᓴ ᕿᓚᕝᕙᖅ
- ᓯᑰᑉ ᐊᑖᓂ, ᕋᐃᑦᓱᓪ ᐊ. ᕿᑦᓱᐊᓕᒃ
- ᐃᓄᒃᓯᐅᑏᑦ/ᐃᓄᐃᑦ ᐃᒋᕐᕈᑎᖏᑦ, ᐅᖃᓕᒫᒐᓕᐅᖅᑏᑦ Inhabit Media
- ᓯᖅᑯᓖᑦ ᑕᕆᐅᕐᒥᐅᑕᑦ, ᐅᖃᓕᒫᒐᓕᐅᖅᑏᑦ Inhabit Media
- ᐊᓈᓇᑦᑎᐊᖅ ᐊᕿᒡᒋᖅ, ᖃᐅᓐᓇᖅ ᒥᑭᒐᖅ ᐊᒻᒪ ᔫᐋᓐ ᓱᐊᑦᔅ
- ᐅᑲᓕᖅ ᕿᒻᒥᓛᑦ ᐅᖃᓕᒫᒐᓕᐅᖅᑏᑦ Inhabit Media
- ᓇᓪᓕᓇᕐᓂᕐᐹᑯᓗᒃ, ᓯᓖᓇ ᑲᓪᓗᒃ
- ᐅᖃᕆᐅᖅᓴᐅᑏᑦ, ᓈᑎᐊ ᒪᐃᒃ
- ᐃᖃᓗᒐᓱᐊᖃᒋᓪᓗᒍ ᐊᓈᓇᑦᓯᐊᖅ, ᓲᓴᓐ ᐊᕕᙵᖅ ᐊᒻᒪ ᒥᐅᕋᓐ ᒡᓯᑑᓚ
- ᐊᒪᕉᑉ ᐃᓕᓐᓂᐊᕈᑎᖓ, ᕋᐃᑦᓱᓪ ᐊᒻᒪ ᓵᓐ ᕿᑦᓱᐊᓕᒃ−ᑎᓐᓯᓕ
- ᐅᑲᓕᖅ ᑲᓪᓚᓗ ᐃᖃᓪᓕᐊᖅᑑᒃ, ᓈᑎᐊ ᒪᐃᒃ
- ᓂᒪᒃᑐᖅ (ᓂᒪᔭᓐᓂᖅ), ᐅᖃᓕᒫᒐᓕᐅᖅᑏᑦ Inhabit Media
- ᐃᓕᓴᐱ ᓇᐅᔮᕋᖓᓗ, ᓈᓐᓯ ᒪᐃᒃ
- ᐊᕐᕙᒐᓱᐊᕈᓯᕗᑦ, ᔪᐊᓇᓯ ᖄᐱᒃ
- ᐳᑐᒍᒃᑯᒃ ᑯᓪᓗᒃᑯᒃ ᖃᓗᐸᓕᒡᓗ, ᕉᔅᓕᓐ ᐋᑯᓗᔾᔪᒃ ᐊᒻᒪ ᑖᓂ ᑯᕆᔅᑕᕗ
- ᐃᑉᐱᓐᓂᐊᓂᒃᑲ, ᐅᖃᓕᒫᒐᓕᐅᖅᑏᑦ Inhabit Media
- ᑎᕆᒐᓂᐊᑉ ᐊᕐᓇᖓ, ᐲᑐᕆᔅ ᑎᐊᕐ
ᐃᓕᓐᓂᐊᕈᓯᐊᔅᓴᑦ
ᐊᕐᕌᒍᑕᒫᑦ ᕿᑭᖅᑕᓂᒃᑯᑦ ᑐᓂᓯᖃᑦᑕᓲᖑᒻᒪᑕ ᐅᖓᑖᓃᑦᑐᓂᑦ $200,000 ᐊᕐᕌᒍᑕᒫᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓂᑦ ᕿᑭᖅᑕᓂ ᐃᓕᓐᓂᐊᖅᑎᓄᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖃᑦᑕᖅᑐᓄᑦ. ᐃᓕᓐᓂᐊᖅᑎᓄᑦᑮᓇᐅᔭᑦᐃᑲᔫᑏᑦᑐᓂᔭᐅᓲᖑᕗᑦᐱᓇᓱᐊᖅᑳᖅᑐᑦᐊᖏᖅᑕᐅᖃᑦᑕᖅᑐᑎᑦ. ᕿᑭᖅᑕᓂᒃᑯᑦ ᑐᔅᓯᕋᐅᓯᐅᖁᔨᒐᔪᓲᑦ ᐊᐅᔭᐅᓱᖓᓕᕋᐃᒻᒪᑦ, ᐊᒻᒪᓗ ᒪᓕᑦᑐᒋᑦ ᐊᒥᓲᓂᕆᕙᑦᑕᖏᑦ ᑐᔅᓯᕋᒃᑲᓐᓂᖃᑦᑕᖅᑐᑦ, ᑐᖏᓕᐊᓂ ᑐᔅᓯᕋᐅᓯᐅᖁᔨᔾᔪᑎᖃᒃᑲᓂᕐᐸᒻᒥᔪᑦ ᔮᓐᓄᐊᓕᐅᓕᖅᑎᓪᓗᒍ. ᐃᓘᓐᓇᑎᒃ ᑐᔅᓯᕋᐅᑏᑦ ᑐᓂᔭᐅᖃᑦᑕᕆᐊᖃᓲᑦ ᖃᕋᓴᐅᔭᒃᑰᖅᑎᑕᐅᓗᑎᒃ.
ᕿᑭᖅᑕᓂᒃᑯᓐᓂ ᔮᓐ ᐊᒪᕈᐊᓕᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ
ᐊᕐᕌᒍᑕᒫᑦ ᕿᑭᖅᑕᓂᒃᑯᑦ ᑐᓂᓯᕙᑦᑐᑦ $5,000ᓂᑦ ᔮᓐ ᐊᒪᕈᐊᓕᒃ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓂᑦ. ᒪᓕᒐᕆᕙᑦᑕᖏᑦ ᕿᑭᖅᑕᓂᒃᑯᓐᓂᑦ ᐊᒻᒪᓗ ᔮᓐ ᐊᒪᕈᐊᓕᒃ ᐃᓕᓐᓂᐊᕈᓯᐊᔅᓴᓂᑦ:
- ᕿᑭᖅᑕᓂ ᐃᓄᖏᑦ ᐊᑎᓕᐅᖅᑕᐅᓯᒪᔪᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ (ᓄᓇᕗᑦ ᑐᙵᕕᒃᑯᑦ ᑎᒥᖓᑦ) ᓄᓇᕗᑦ ᐊᖏᖃᑎᒌᒍᑎᑎᒍᑦ
- ᓄᓇᖃᕐᓯᒪᓗᑎᒃ ᕿᑭᖅᑕᓂ ᖁᓕᓂᑦ ᒪᕐᕉᓂᓪᓗ ᑕᖅᑭᓂᑦ ᐅᖓᑖᓂᓘᓐᓃᑦ
- ᐊᑎᓕᐅᖅᑕᐅᓯᒪᓗᑎᒃ ᐃᓕᓐᓂᐊᖅᑎᐅᓂᐊᕐᓂᖏᓐᓂᒃ ᓯᓚᑦᑐᓴᕐᕕᒻᒥ ᐃᓕᓐᓂᐊᕈᒻᒥᑦ
ᑐᑭᓯᒋᐊᒃᑲᓐᓂᕈᒪᒍᕕᑦ ᕿᑭᖅᑕᓂᒃᑯᑦ ᔮᓐ ᐊᒪᕈᐊᓕᒃ ᐃᓕᓐᓂᐊᓂᕐᒧᑦ ᐃᑲᔪᓯᐊᔅᓴᐃᑦ ᒥᔅᓵᓄᑦ ᑎᑎᕋᕐᓗᑎᑦ ᐃᕐᖐᓈᖅᑕᐅᑎᒃᑯᑦ scholarship@qia.ca ᑕᑯᓂᐊᕐᓗᑎᓪᓘᓐᓃᑦ ᐅᕗᖓ ᕿᑭᖅᑕᓂᒃᑯᓐᓂ ᑐᔅᓯᕋᐅᑏᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓂᑦ
ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ
ᓄᓇᕗᑦ ᑐᙵᕕᒃᑯᑦ ᑎᒥᖓᑦ (NTI) ᐊᑐᓕᖅᑎᑦᑎᓯᒪᒻᒪᑕ ᔫᓯᐅᑉ ᐱᔪᒥᓇᕐᓯᑎᑦᑎᓯᒪᓂᖓᓂᒃ ᐃᓄᓐᓄᑦ ᑲᔪᓯᑎᑕᐅᖁᓪᓗᒍ ᐃᑲᔫᖃᖃᑦᑕᖅᑐᑎᒃ ᒪᕐᕉᓐᓄᒃ ᐊᕐᕌᒍᑕᒫᑦ $5,000ᓂᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᓂᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᐸᑦᑐᓄᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᐸᑦᑐᓂᑦ, ᐃᓄᑦᑎᑐᑦ ᐅᖃᐅᓯᕐᒥᒃ, ᐅᕝᕙᓘᓐᓃᑦ ᓯᕗᓂᔅᓴᑎᓐᓄᑦ ᑲᔪᓯᑎᑦᑎᕙᓪᓕᐊᓂᕐᒥᒃ ᐃᓄᐃᑦ ᐱᔪᓐᓇᐅᑎᖏᓐᓂᒃ.
ᑐᑭᓯᒋᐊᒃᑲᓐᓂᕈᒪᒍᕕᑦ ᓄᓇᕗᑦ ᑐᙵᕕᒃᑯᑎᒍᑦ ᔫᓯ ᐊᒪᐅᔭᖅ ᑯᓱᒐᖅ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᐃᑦ ᒥᔅᓵᓄᑦ ᑕᑯᓂᐊᕈᓐᓇᖅᑐᑎᑦ ᓄᓇᕗᑦ ᑐᙵᕕᒃᑯᑦ ᑎᒥᖓᑦᑕ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂᒃ.
ᕿᑭᖅᑖᓗᒃ ᑯᐊᐳᕇᓴᒃᑯᑦ ᓘᑎ ᐸᓪᓗᖅ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ
ᑖᒃᑯᐊ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ ᐋᖅᑭᓱᖅᑕᐅᓯᒪᔪᑦ ᐃᑲᔪᖃᑦᑕᕈᒪᓪᓗᑎᒃ ᐃᓕᓐᓂᐊᖅᑎᓂᑦ ᐃᓕᓐᓂᐊᕐᓂᖏᓐᓂ ᐅᓪᓗᓕᒫᖅ ᐃᓕᓐᓂᐊᕈᑎᒋᖃᑦᑕᓂᐊᖅᑕᖏᓐᓂᒃ ᓇᓗᓇᐃᒃᑯᑕᖅᑖᕈᑎᒋᔪᓐᓇᖅᑕᖏᓐᓂᒃ ᒪᕐᕉᓐᓂᒃ ᐊᕐᕌᒎᓐᓂᒃ ᐅᕝᕙᓘᓐᓃᑦ ᐊᑕᐅᓯᕐᒥᑦ ᐊᕐᕌᒍᒥ ᐃᓕᓐᓂᐊᕈᒻᒥ− ᐃᓕᓴᕆᔭᐅᓯᒪᔪᒥ, ᓇᓗᓇᐃᒃᑯᑕᓕᒻᒥ ᐃᓕᓐᓂᐊᑎᑦᑎᕕᐅᓂᖓᓂᒃ ᑲᓇᑕᒥ. ᓯᕗᓪᓕᐅᔾᔨᖃᑦᑕᓂᐊᖅᑐᑦ ᐱᖃᑕᐅᖃᑦᑕᕈᓐᓇᖅᑐᓂᑦ ᐃᓕᓐᓂᐊᖅᑎᓂᑦ ᐃᓕᓐᓂᐊᕐᓂᐅᓴᔪᓂᑦ ᒐᕙᒪᓕᕆᓂᕐᒥ ᐃᓕᓐᓂᐊᓂᕐᒥ, ᐃᖃᓗᓕᕆᓂᕐᒥ ᐊᒻᒪᓗ ᐊᕙᑎᓕᕆᓂᕐᒥ ᐃᓕᓐᓂᐊᕈᑎᓂᑦ.
ᑐᑭᓯᑦᑎᐊᕈᒪᒍᕕᑦ ᕿᑭᖅᑖᓗᒃ ᑯᐊᐳᕇᓴᒃᑯᓐᓂ ᓘᑎ ᐸᓪᓗᖅ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ ᒥᔅᓵᓄᑦ ᑕᑯᓂᐊᕆᑦ ᕿᑭᖅᑖᓗᒃ ᑯᐊᐳᕇᓴᒃᑯᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂ.
ᕿᑭᖅᑖᓗᒃ ᑯᐊᐳᕇᓴᒃᑯᓐᓂᑦ ᑎᒥᖁᑎᖏᓐᓂᓪᓗ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᑦ
ᐊᕐᕌᒍᑕᒫᑦ, ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᒻᒪᓗ ᑎᒥᖁᑎᕗᑦ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᖅᑕᖃᕐᐸᒻᒪᑕ ᐃᓕᓐᓂᐊᕈᑎᖏᓐᓂᒃ ᑲᒪᑦᑎᐊᐸᑦᑐᓄᑦ ᐃᓄᓐᓄᑦ ᐃᓕᓐᓂᐊᖅᑎᓄᑦ ᐅᓪᓗᓕᒫᖅ ᐃᓕᓐᓂᐊᕈᑎᒋᖃᑦᑕᓂᐊᖅᑕᖏᓐᓂᒃ ᓇᓗᓇᐃᒃᑯᑕᖅᑖᕈᑎᒋᔪᓐᓇᖅᑕᖏᓐᓂᒃ ᒪᕐᕉᓐᓂᒃ ᐊᕐᕌᒎᓐᓂᒃ ᐅᕝᕙᓘᓐᓃᑦ ᐊᑕᐅᓯᕐᒥᑦ ᐊᕐᕌᒍᒥ ᐃᓕᓐᓂᐊᕈᒻᒥ ᐃᓕᓴᕆᔭᐅᓯᒪᔪᒥ ᓇᓗᓇᐃᒃᑯᑕᓕᒻᒥ ᐃᓕᓐᓂᐊᑎᑦᑎᕕᐅᓂᖓᓂᒃ ᑲᓇᑕᒥ. ᓯᕗᓪᓕᐅᔾᔨᖃᑦᑕᓂᐊᖅᑐᑦ ᐃᓕᓐᓂᐊᖅᑎᓂᑦ ᐃᓕᓐᓂᐊᖅᑐᓂᑦ ᑮᓇᐅᔭᓕᕆᓂᕐᒥ, ᑮᓇᐅᔭᓕᕆᓂᕐᒧᑦ, ᐊᓪᓚᕝᕕᓕᕆᓂᕐᒥᑦ, ᓇᒻᒥᓂᖁᑎᒥᒃ ᐊᐅᓚᑦᑎᓂᕐᒥᒃ, ᐃᓪᓗᓕᐅᕐᓂᕐᒥ, ᓴᓇᔪᓕᕆᓂᕐᒥ, ᓂᐅᕕᕐᕕᓕᕆᓂᕐᒥ, ᐱᓕᕆᕕᓕᕆᓂᕐᒥᒃ, ᐊᕙᑎᓕᕆᓂᕐᒥᒃ ᐅᕝᕙᓘᓐᓃᑦ ᐱᓕᕆᐊᕐᒥ ᐊᐅᓚᑦᑎᓂᕐᒥᒃ.
ᑐᑭᓯᑦᑎᐊᕈᒪᒍᕕᑦ ᕿᑭᖅᑖᓗᒃ ᑯᐊᐳᕇᓴᒃᑯᑦ ᓘᑎ ᐸᓪᓗᖅ ᐃᓕᓐᓂᐊᓂᕐᒧᑦ ᐃᑲᔫᓯᐊᔅᓴᐃᑦ ᒥᔅᓵᓄᑦ ᑕᑯᓂᐊᕆᑦ ᕿᑭᖅᑖᓗᒃ ᑯᐊᐳᕇᓴᒃᑯᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓐᓂᒃ.
