ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ
ᐊᑐᖅᑎᑦᑎᒋᐊᒃᑲᓂᕐᓂᖅ ᐃᓕᖅᑯᓯᖅᑎᒍᑦ ᐊᑐᖅᑕᐅᓲᓂᑦ
ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ (QCAP) ᑮᓇᐅᔭᖃᖅᑎᑦᑎᕙᑦᑐᑦ ᓄᓇᓕᓐᓃᑦᑐᓂᑦ ᐱᓕᕆᐊᔅᓴᐅᕙᑦᑐᓂᑦ ᑕᐃᒫᒃ ᓄᓇᓖᑦ ᐃᓚᒋᔭᐅᖃᑦᑕᕈᓐᓇᓂᐊᕐᖓᑕ ᐃᓕᓐᓂᐊᖃᑕᐅᖃᑦᑕᕈᓐᓇᓂᐊᕐᖓᑕᓗ ᐱᖅᑯᓯᑦᑎᓐᓂᒃ ᐃᓕᓯᒪᔭᐅᔪᓂᑦ, ᓲᕐᓗ ᒥᕐᓱᖃᑦᑕᓂᕐᒥᒃ, ᐊᖑᓇᓱᖃᑦᑕᓂᕐᒥᒃ, ᐊᐅᓪᓚᕐᓯᒪᓗᓂ ᐱᓕᕆᓂᐅᕙᑦᑐᓂᑦ. ᐃᑲᔫᑏᑦ ᐋᖅᑭᑦᑕᐅᔪᔪᑦ 2017ᖑᑎᓪᓗᒍ ᐊᒻᒪᓗ ᐊᐅᓚᓂᖃᕐᓂᐊᖅᑐᑎᒃ ᒫᑦᓯ 2022ᖑᓱᓐᓂᖓᓂ.
ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ ᑐᔅᓯᕋᐅᓯᐅᕈᑎᑎᒍᑦ ᑲᒪᒋᔭᐅᕙᑦᑐᑦ. ᓄᓇᓖᑦ ᐅᕝᕙᓘᓐᓃᑦ ᓄᓇᓕᓐᓂᑦ ᑲᑐᔾᔨᖃᑎᒌᑦ ᑐᓂᓯᕙᑦᑐᑦ ᑐᔅᓯᕋᐅᑎᓂᑦ ᐱᓕᕆᐊᕆᔪᒪᔭᖓᓄᑦ.
ᓄᓇᓖᑦ ᐊᖑᓇᓱᒃᑎᒃᓯᓂᖓᓄᑦ
ᓄᓇᕗᑦ ᐊᖑᓇᓱᒃᑎᓄᑦ ᐃᑲᔫᑎᒃᓴᓕᕆᔩᑦ
ᓄᓇᓖᑦ ᐊᖑᓇᓱᒃᑎᑦᓯᓂᖓᓂᒃ ᑮᓇᐅᔭᓕᖅᑕᐅᓯᒪᓂᖅ ᐃᑲᔫᑎᓂᓪᓗ ᑲᑐᔾᔨᖃᑎᒌᓄᑦ ᑲᑐᔾᔨᔪᓄᑦ ᐱᓇᓱᐊᖃᑕᐅᔪᒪᔪᓄᑦ ᓄᓇᓖᑦ ᐊᖑᓇᓱᒃᑎᑕᐅᓂᖏᓐᓄᑦ. ᑲᑐᔾᔨᖃᑎᒌᑦ ᑐᒃᓯᕋᕈᓐᓇᖅᑎᑕᐅᖃᑕᐅᔪᑦ ᑎᒥᓐᖑᖅᑎᑕᐅᓯᒪᔪᑦ ᓲᕐᓗ ᕼᐊᒻᓚᐃᑦ, ᓄᓇᓕᓐᓂ ᐊᖑᓇᓱᒃᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ (HTO), ᐊᕕᑦᑐᕐᓯᒪᓂᕐᓂ ᐆᒪᔪᓕᕆᔨᒃᑯᑦ ᑲᑎᒪᔨᖏᑦ (RWO) ᐅᕝᕙᓘᓐᓃᑦ ᑮᓇᐅᔭᓕᐅᕋᓱᐊᖅᑎᐅᖏᑦᑐᑦ ᑲᑐᔾᔨᖃᑎᒌᑦ. ᑎᒥᓐᖑᖅᑎᑕᐅᓯᒪᓐᖏᑦᑐᑦ ᐊᒻᒪᓗ ᑲᑎᒪᔨᐅᕕᓕᑐᐃᓐᓇᐃᑦ ᐊᖑᓇᓱᒃᑏᑦ ᑐᒃᓯᕋᕈᓐᓇᖅᑎᑕᐅᒻᒥᔪᑦ. ᓇᖕᒥᓂᖁᑕᐅᔪᑦ ᑐᒃᓯᕋᕈᓐᓇᖅᑎᑕᐅᓐᖏᑦᑐᑦ ᑮᓇᐅᔭᓕᑕᐅᔪᓐᓇᔾᔮᒐᑎᒃ ᑕᑉᕘᓇ. ᑮᓇᐅᔭᓕᑕᐅᔾᔪᑏᑦ ᓄᓇᓖᑦ ᐊᖏᑎᒋᓂᖏᑎᒍᑦ ᑐᓂᔭᐅᖃᑦᑕᓂᐊᖅᑐᑦ, ᖃᓄᐃᑦᑑᓂᖓᒍᑦ ᐊᖑᓇᓱᓐᓂᐅᔪᒪᔪᖅ, ᐊᒻᒪᓗ ᐊᖑᓇᓱᒃᑏᑦ ᐃᓚᐅᔪᑦ ᐅᓄᕐᓂᕆᓂᐊᖅᑕᖏᑎᒍᑦ.
ᑐᑭᓯᒃᑲᓐᓂᕈᒪᒍᔅᓯ ᑖᒃᑯᐊ ᒥᔅᓵᓄᑦ:
ᐊᖑᓇᓲᑎᒃᓴᓄᑦ ᐱᖁᑎᓄᑦ
ᓄᓇᕗᒻᒥ ᐊᖑᓇᓱᒃᑎᓄᑦ ᐃᑲᔫᑎᒃᓴᑦ
NHSP ᐊᖑᓇᓲᑎᓂᒃ ᐱᖁᑎᓂᒃ ᐃᑲᔫᑎ ᐃᓄᖕᓄᑦ ᓄᓇᕗᒻᒥ ᐃᑲᔪᖅᑕᐅᒋᐊᓕᓐᓄᑦ ᑮᓇᐅᔭᑎᒍᑦ ᐃᑲᔫᑎᓄᑦ ᐊᖑᓇᓲᑏᑦ ᐱᖁᑏᑦ ᓱᓇᒃᑯᑖᓪᓗ ᐅᓇᒻᒥᓇᕐᓂᕐᓴᐅᖁᓪᓗᒋᑦ ᓂᐅᕕᐊᕆᓗᒋᑦ ᐊᖑᓇᓱᖃᑕᐅᔪᓐᓇᕈᑎᒃᓴᑦ ᐱᖅᑯᓯᒃᑯᑦ. ᑐᒃᓯᕋᖅᑐᖅ ᐃᑲᔪᖅᑕᐅᔭᕆᐊᖃᕐᓂᖓ ᓇᓗᓇᐃᖅᑕᐅᓯᒪᔪᖅ ᑮᓇᐅᔭᑎᒍᑦ ᐃᑲᔪᖅᑕᐅᔭᕆᐊᖃᕐᓂᖓ ᓂᐅᕕᕈᓐᓇᖁᓪᓗᒍ ᐊᖑᓇᓲᑎᓂᒃ ᐱᖁᑎᑖᕆᐊᖃᕐᓂᖓᓂᒃ ᐃᑲᔫᑎᒃᓴᖓᓂᒃ ᐃᓚᒥᓄᑦ ᐊᒻᒪᓗ/ᐅᕝᕙᓘᓐᓃᑦ ᓄᓇᓕᖕᓄᑦ. ᐃᑲᔪᖅᑕᐅᔭᕆᐊᖃᕐᓂᕋᖅᑕᐅᒻᒥᔪᖅ ᐱᖁᑎᓂᒃ ᔭᒐᐃᓐᓂᕐᐸᑦ ᐱᔮᖅᑯᑕᐅᓐᖏᑦᑐᒥ ᐊᓯᖅᑯᑉᕕᖃᕋᓂ ᓯᓚ ᐱᔾᔪᑕᐅᓗᓂ ᐱᕐᕈᓗᑦᑐᒥᓂᕐᒧᑦ.
ᑮᓇᐅᔭᓕᑕᐅᔾᔪᑕᐅᔪᓐᓇᖅᑐᑦ ᐱᖓᓲᓕᖅᑲᖓᔪᑦ:
- ᑮᓇᐅᔭᑎᒍᑦ ᐃᑲᔪᖅᑕᐅᔾᔪᑎ ᓂᐅᕕᕐᓂᕐᒧᑦ ᐱᖁᑎᕋᓛᒥᒃ ᐊᖑᓇᓲᑎᒃᓴᒥᒃ;
- ᓇᓪᓕᐅᒃᑯᒫᑦ ᒥᑭᔪᓄᑦ ᐱᖁᑎᓄᑦ;
- ᑮᓇᐅᔭᑎᒍᑦ ᐃᑲᔪᖅᑕᐅᔾᔪᑎ ᓂᐅᕕᕐᓂᕐᒧᑦ ᐊᑦᑕᓇᐃᕐᓯᒪᒍᑎᒃᓴᒥᒃ ᐱᖁᑎᒥᒃ;
- ᓇᓪᓕᐅᒃᑯᒫᑦ ᐊᑦᑕᕐᓇᐃᔭᐃᒃᑯᑎᓄᑦ ᐱᖁᑎᓄᑦ;
- ᓇᓪᓕᐅᒃᑯᒫᑦ ᐊᖏᔪᓄᑦ ᐊᖑᓇᓱᒋᐊᕈᑎᓄᑦ; ᐊᒻᒪᓗ
- ᑮᓇᐅᔭᑎᒍᑦ ᐃᑲᔪᖅᑕᐅᔾᔪᑎ ᐱᕐᕈᓗᐊᕿᓂᕐᒧᑦ ᐃᑲᔫᑎᒥᒃ.
ᐃᓚᒌᒃᑐᓄᑦ ᑮᓇᐅᔭᑦ
ᐱᔪᓐᓇᕐᓯᑎᑦᑎᒋᐊᒃᑲᓂᕐᓂᖅ ᕿᑭᖅᑕᓂ ᓄᓇᓕᓐᓂᑦ
ᐃᓚᒌᒃᑐᓄᑦ ᓄᓇᓕᓐᓄᓪᓗ ᐱᕙᓪᓗᐊᔾᔪᑎᔅᓴᐃᑦ ᑮᓇᐅᔭᑦ ᑮᓇᐅᔭᓂᑦ ᐊᑭᓖᓯᒪᓲᑦ ᐱᔪᓐᓇᕐᓯᒋᐊᒃᑲᓐᓂᖁᓪᓗᒋᑦ ᐃᓄᐃᑦ ᓄᓇᓕᓐᓃᑦᑐᑦ ᐊᒻᒪᓗ ᐃᓚᒌᑦ ᐊᒻᒪᓗ ᐃᖅᑲᓇᐃᔮᔅᓴᓄᑦ ᐅᐸᓗᖓᐃᕐᓯᒪᖁᔨᓪᓗᑎᒃ.
ᐃᓚᒌᒃᑐᓄᑦ ᑮᓇᐅᔭᑦ ᐋᖅᑭᑦᑕᐅᔪᔪᑦ 2014ᖑᑎᓪᓗᒍ ᐃᓛᒃᑯᑦ 12 ᐊᖅᑯᑎᒋᓪᓗᒍ ᓄᓘᔮᓂᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᖃᑎᒌᒍᑎᑎᒍᑦ ᑖᒃᑯᓇᙵᑦ ᕿᑭᖅᑕᓂᒃᑯᓐᓂᑦ ᐊᒻᒪᓗ ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑏᑦ. 2018-2019ᖑᑎᓪᓗᒍ ᕿᑭᖅᑕᓂᒃᑯᑦ ᐋᔩᕋᕈᑎᖃᒃᑲᓐᓂᔪᔪᑦ ᐊᒥᓱᕈᖅᑎᑕᐅᒋᐊᒃᑲᓐᓂᖁᓪᓗᒋᑦ ᑮᓇᐅᔭᖃᖅᑎᑦᑎᒍᑕᐅᕙᑦᑐᑦ $1.1 ᒥᓕᐊᓐᓄᑦ ᐊᕐᕌᒍᑕᒫᑦ. ᕿᑭᖅᑕᓂᒃᑯᑦ ᐹᕕᓐᓛᓐᑯᓪᓗ ᐃᑲᔫᑎᖃᕐᐸᑦᑐᑦ ᑕᒪᕐᒥᒃ ᑕᐃᒪᓐᓇᓴᐃᓐᓇᕐᓂᑦ ᑖᒃᑯᓄᖓ ᑮᓇᐅᔭᓄᑦ ᑖᒃᑯᐊᓗ ᐋᖅᑭᓯᒪᓪᓗᑎᒃ ᑲᔪᓯᒍᒫᕐᓂᐊᖅᑐᑎᒃ 2030ᖑᕋᓱᓐᓂᖓᓂ.
ᐱᓕᕆᐊᑦ ᓂᕈᐊᖅᑕᐅᔪᑦ ᑮᓇᐅᔭᖃᖅᑎᑕᐅᓂᐊᕐᓂᕐᒧᑦ ᓴᖅᑭᔮᖅᑎᑦᑎᕙᑦᑐᑦ ᒪᑭᑕᒋᐊᒃᑲᓐᓂᖃᑦᑕᕈᓐᓇᕐᓂᖏᓐᓂᒃ ᓄᓇᓖᑦ, ᓴᙱᔫᓂᖏᓐᓂᒃ ᐃᓚᒌᑦ, ᐊᒻᒪᓗ ᐃᖅᑲᓇᐃᔮᔅᓴᓄᑦ ᐅᐸᓗᖓᐃᕐᓯᒪᖃᑦᑕᓂᕐᒥᒃ.
ᑐᑭᓯᒋᐊᕐᕕᐅᔪᓐᓇᖅᑐᑦ ᐹᕕᓐᓛᓐᑯᓐᓂᑦ ᐅᕝᕙᓘᓐᓃᑦ ᕿᑭᖅᑕᓂᒃᑯᓐᓂ ᓄᓇᔅᓯᓐᓂ ᑐᓴᐅᒪᑎᑦᑎᔨᓯ
ᐊᖑᓇᓱᒋᐊᖃᑦᑕᖁᔨᓪᓗᑎᒃ ᑮᓇᐅᔭᑦ
ᐃᑲᔪᕐᓂᖅ ᐱᖅᑯᓯᖅᑎᒍᑦ ᐊᖑᓇᓱᖃᑦᑕᓂᕐᒥᒃ
ᓄᓘᔮᓂᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᔅᓴᖏᓐᓄᓪᓗ ᐊᖏᖃᑎᒌᒍᑏᑦ, ᐊᖏᓇᓱᒋᐊᖃᑦᑕᖁᔨᓪᓗᑎᒃ ᑮᓇᐅᔭᑦ ᐋᖅᑭᑦᑕᐅᔪᒻᒪᑕ. ᑖᒃᑯᐊ ᑮᓇᐅᔭᑦ ᐅᖅᓴᒍᑎᔅᓴᖅᑖᑎᑦᑎᕙᑦᑐᑦ 300 ᓖᑕᓂᑦ ᒑᓯᒥᑦ ᐊᕐᕌᒍᑕᒫᑦ ᐃᓄᓐᓄᑦ ᑐᕌᖓᓪᓗᑎᒃ ᐅᑭᐅᓕᓐᓄᑦ 12ᓄᑦ ᐅᖓᑖᓄᓪᓗ ᒥᑦᑎᒪᑕᓕᒻᒥᐅᓄᑦ.
ᑐᑭᓯᒋᐊᕐᕕᔅᓴᐅᕗᑦ ᐹᕕᓐᓛᓐᑯᓐᓂ ᐅᕝᕙᓘᓐᓃᑦ ᕿᑭᖅᑕᓂᒃᑯᓐᓂᑦ ᓄᓇᔅᓯᓐᓂ ᑐᓴᐅᒪᑎᑦᑎᔩᑦ
ᕿᔅᓵᑦᑐᓄᑦ ᐃᓚᐃᖅᑐᓄᓪᓗ
ᐃᑲᔪᖃᑦᑕᕐᓂᖅ ᐃᓄᓐᓂᑦ ᐃᓚᒌᓂᑦ
ᕿᑭᖅᑕᓂᒃᑯᑦ ᐃᑲᔫᑎᖃᖃᑦᑕᕐᖓᑕ ᑭᒃᑯᑐᐃᓐᓇᕐᓄᑦ ᐅᖁᒪᐃᑦᑐᒃᑰᖅᑐᖃᖅᑎᓪᓗᒍ ᐊᒻᒪᓗ ᐃᓱᒫᓗᓇᖅᑐᒃᑰᖅᑐᖃᖅᑎᓪᓗᒍ ᐃᓚᒌᓂᑦ. ᕿᔅᓵᖅᑐᓄᑦ ᐃᓚᐃᖅᑐᓄᓪᓗ ᖃᖓᑦᑕᐅᑎᓄᑦ ᐃᑲᔫᑏᑦ ᐃᓚᒋᔭᐅᔪᓂᑦ ᐊᐅᓪᓚᕈᓐᓇᑎᑦᑎᕙᒻᒪᑕ ᐃᓚᖏᓐᓄᑦ ᓇᒻᒥᓂᖏᓐᓄᑦ ᓇᔫᑎᔭᖅᑐᖁᔨᓪᓗᑎᒃ.
ᑭᒃᑯᑦ ᑐᔅᓯᕋᖃᑦᑕᕈᓐᓇᖅᑲᑦ?
ᕿᑭᖅᑕᓂ ᐃᓄᖏᑦ ᐊᑎᓕᐅᖅᑕᐅᓯᒪᔪᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂ (NTI) ᓄᓇᕗᑦ ᐊᖏᖃᑎᒌᒍᑎᖏᑎᒍᑦ ᐃᓚᒋᔭᐅᔪᑦ ᐋᓐᓂᐊᔪᑦ ᐅᕝᕙᓘᓐᓃᑦ ᐃᓅᔪᓐᓃᖅᑐᒧᑦ.
ᑭᓇ ᐃᓚᒋᔭᐅᓂᕋᖅᑕᐅᒐᔭᖅᑲ ᐃᓚᒌᓄᑦ?
ᓂᖏᐅᖅ/ᐊᓈᓇᑦᓯᐊᖅ, ᐃᑦᑐᖅ/ᐊᑖᑕᑦᓯᐊᖅ, ᐊᓈᓇ, ᐊᑖᑕ, ᐸᓂᒃ, ᐃᕐᓂᖅ, ᐊᔭ/ᐊᑦᑕ, ᐊᖓ/ᐊᒃᑲᒃ, ᓇᔭ/ᓄᑲᖅ/ᐊᖏᔪ, ᐊᓂᒃ/ᐊᖏᔪ/ᓄᑲᖅ ᐊᒻᒪᓗ ᐃᕐᖓᑕᐃᑦ.
ᑮᓇᐅᔭᓄᑦ ᐃᑲᔫᑏᑦ ᑭᓱᒧᑦ ᐊᑐᖅᑕᐅᖃᑦᑕᕈᓐᓇᖅᑲᑦ?
ᐊᑐᖅᑕᐅᖃᑦᑕᕈᓐᓇᖅᑐᑦ ᖃᖓᑦᑕᐅᑎᓄᑦ ᑭᓪᓕᖃᕐᓗᒍ ᒪᕐᕉᓐᓄᒃ ᐃᓚᒋᔭᐅᔫᓐᓄᒃ ᑕᑯᔭᖅᑐᕈᒪᔪᓄᑦ ᐋᓐᓂᐊᓪᓚᕆᑦᑐᒥᒃ ᐃᓚᖓᓐᓂᒃ, ᐅᕝᕙᓘᓐᓃᑦ ᖃᖓᑦᑕᐅᑎᓄᑦ ᐃᓗᕕᖅᑕᐅᔪᖃᕐᓂᐅᓴᑎᓪᓗᒍ ᐃᓚᖓᓐᓂᒃ ᐊᓯᐊᓄ ᓄᓇᓕᓐᓃᑦᑐᓂᑦ ᓄᓇᕗᒥ.
ᖃᓄᖅ ᑐᑭᓯᒃᑲᓐᓂᕋᔭᖅᑯᑕ ᑕᒪᑐᒪ ᒥᔅᓵᓄᑦ?
ᐃᓚᐃᖅᑐᓄᑦ ᖃᖓᑦᑕᐅᑎᓄᑦ ᐃᑲᔫᑏᑦ
ᕿᑭᖅᑕᓂᒃᑯᑦ ᐃᓚᐃᖅᑐᓄᑦ ᖃᖓᑦᑕᐅᑎᓄᑦ ᐃᑲᔫᑎᖏᑦ ᑮᓇᐅᔭᑎᒍᑦ ᐃᑲᔫᑎᐅᕙᑦᑐᑦ ᖃᖓᑕᓲᒃᑯᑦ ᐊᐅᓪᓚᕈᓐᓇᕐᓯᑎᑦᑎᕙᑦᑐᑎᒃ ᒪᕐᕉᓐᓂᒃ ᐃᓚᒋᔭᐅᔫᓐᓂᒃ ᐃᓗᕕᖅᑕᐅᔪᖃᕆᐊᖃᕐᓂᐊᑎᓪᓗᒍ ᐃᓚᒋᔭᐅᔪᒥᒃ ᐅᕝᕙᓘᓐᓃᑦ ᐃᑲᔫᑎᖃᕐᐸᑦᑐᑎᒃ ᐊᑭᓕᐅᑎᔅᓴᓂᑦ ᑎᒥᖓᓂᒃ ᐃᓅᔪᓐᓃᖅᑑᑉ ᐅᓯᔭᐅᔾᔪᑎᔅᓴᒥᒃ.
ᕿᔅᓵᑦᑐᓄᑦ ᖃᖓᑦᑕᐅᑎᓄᑦ ᐃᑲᔫᑏᑦ
ᕿᑭᖅᑕᓂᒃᑯᑦ ᑮᓇᐅᔭᓂᑦ ᐃᑲᔫᑎᖃᓲᑦ ᖃᖓᑦᑕᐅᑎᓄᑦ ᐃᑲᔫᑎᓂᑦ ᒪᕐᕉᓐᓄᒃ ᐃᓚᒋᔭᐅᔫᓐᓄᒃ ᑕᑯᔭᖅᑐᕈᒪᑎᓪᓗᒋᑦ ᐋᓐᓂᐊᓪᓚᕆᑦᑐᒥᒃ ᐊᒻᒪᓗ ᖁᓚᕆᔭᐅᓕᖅᑐᒥᒃ ᐃᓅᓂᕆᐊᕆᐊᔅᓴᖓᓂᒃ.
ᐅᑎᖅᑎᑦᑎᓂᒃ ᑎᒥᐅᔪᓂᒃ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓚᙵᖅᑐᓄᑦ ᖃᖓᑦᑕᐅᑎᓄᑦ ᐃᑲᔫᑎᑎᒍᑦ ᐃᑲᔪᓲᖑᕗᑦ ᑎᒥᒥᑦ ᐅᑎᕐᑎᑎᓂᒃᑯᑦ ᐃᓅᔪᓐᓃᕐᑑᑉ ᓄᓇᓕᖓᓐᓄᑦ.
ᐱᓇᓱᐊᕋᔅᓴᓄᑦ ᑮᓇᐅᔭᑦ
2016ᖑᑎᓪᓗᒍ, ᕿᑭᖅᑕᓂᒃᑯᑦ ᐋᖅᑭᔅᓯᓚᐅᕐᓯᒪᒻᒪᑕ ᓄᑖᓂᑦ ᑮᓇᐅᔭᓄᑦ ᐃᓯᕐᐸᑦᑐᓄᑦ ᐊᑐᐊᒐᕐᓂᑦ ᑐᑭᒧᐊᒍᑕᐅᓂᐊᕐᖓᑕ ᖃᓄᖅ ᕿᑭᖅᑕᓂᒃᑯᓐᓄᑦ ᑮᓇᐅᔭᑦ ᐃᓯᕐᐸᑦᑐᑦ ᐱᕈᕐᐸᓪᓕᐊᑎᑦᑎᔾᔪᑕᐅᓂᐊᕐᒪᖔᑕ ᐊᒻᒪᓗ ᑐᓂᐅᖅᑲᖅᑕᐅᖃᑦᑕᓂᐊᕐᒪᖔᑕ. ᑮᓇᐅᔭᓄᑦ ᐃᓯᕐᐸᑦᑐᓄᑦ ᐊᑐᐊᒐᑦ ᐋᖅᑮᔪᒻᒪᑕ ᒪᕐᕉᓐᓂᒃ ᑮᓇᐅᔭᐅᓂᐊᖅᑐᓂᑦ, ᑐᖅᑯᖅᑕᐅᕙᓪᓕᐊᔪᑦ ᑮᓇᐅᔭᑦ ᐊᒻᒪᓗ ᐃᑲᔫᓯᐊᔅᓴᑦ ᑮᓇᐅᔭᑦ. ᐃᑲᔫᓯᐊᔅᓴᑦ ᑮᓇᐅᔭᑦ ᐱᓕᕆᐊᔅᓴᖃᖅᑎᑦᑎᒍᑕᐅᕙᑦᑐᖅ ᕿᑭᖅᑕᓂ ᐃᓄᖏᓐᓄᑦ.
ᐱᓇᓱᐊᕋᔅᓴᓄᑦ ᑮᓇᐅᔭᑦ ᐋᖅᑭᑦᑕᐅᔪᔪᑦ ᑕᐃᒫᒃ ᕿᑭᖅᑕᓂᒃᑯᑦ ᐃᑲᔪᖃᑦᑕᕈᓐᓇᓂᐊᕐᖓᑕ ᐱᓇᓱᐊᕈᑕᐅᕙᑦᑐᓂᑦ ᓯᓚᑖᒍᑦ ᐃᑲᔫᓯᐊᔅᓴᓂᑦ ᑮᓇᐅᔭᓂᑦ ᐱᓕᕆᐊᖑᕙᑦᑐᓂᑦ. ᐊᕐᕌᒍᑕᒫᑦ, ᑎᑭᓯᒪᔪᑦ 10 ᐳᓴᓐᑎᖏᓐᓄᑦ ᑮᓇᐅᔭᓂᑦ ᐱᔭᔅᓴᐅᖃᑦᑕᕐᖓᑕ ᐃᑲᔫᓯᐊᔅᓴᓂᑦ ᑮᓇᐅᔭᓂᑦ ᑖᒃᑯᐊ ᓴᓂᕐᕙᖅᑕᐅᕙᑦᑐᑦ ᐱᓇᓱᐊᕋᔅᓴᓄᑦ ᑮᓇᐅᔭᓄᑦ.
