ᐊᑐᖅᑕᐅᓂᐊᖅᑐᖅ: ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ/ᐹᕕᓐᓛᓐ ᐋᖅᑭᒋᐊᒃᑲᐃᓂᕐᒧᑦ ᓈᓚᓐᓂᐅᔪᑦ ᐱᔾᔪᑎᒋᓪᓗᒍ ᓄᓘᔮᓕᕿᓂᖅ
ᐅᓪᓗᖓ/ᓇᒥ ᓈᓚᓐᓂᖃᕐᓂᐊᖅᑲᑦ: ᐄᐳᓗ 18ᒥ 20ᒧᑦ, 2017 ᕚᓐᑰᕙ, ᕗᕆᑎᔅ ᑲᓚᒻᐱᐊᒥ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᑲᑐᔾᔨᖃᑎᒌᖏᑦ) ᐋᖅᑭᒋᐊᒃᑲᐃᓂᕐᒧᑦ ᓈᓚᓐᓂᕐᓅᕐᓯᒪᓛᕐᖓᑕ ᐹᕕᓐᓛᓐ ᓴᕕᕋᔭᔅᓴᒥᒃ ᐅᔭᕋᓐᓂᐊᖅᑎᓂᑦ ᐱᖃᑎᖃᕐᓗᑎᒃ ᐄᐳᓗ 18ᒥ 20ᒧᑦ, 2017 ᕚᓐᑰᕙ, ᕗᕆᑎᔅ ᑲᓚᒻᐱᐊᒥ.
ᔪᓚᐃ 20, 2016ᖑᑎᓪᓗᒍ ᑲᑐᔾᔨᖃᑎᒌᒃᑯᑦ ᐋᖅᑭᒋᐊᒃᑲᐃᓇᓱᓯᓚᐅᕐᓯᒪᒻᒪᑕ ᐹᕕᓐᓛᓐᑯᓐᓂ. ᑖᓐᓇ ᐱᒋᐊᖅᑎᑦᑎᒍᑕᐅᓚᐅᕐᓯᒪᔪᖅ ᐊᖏᖃᑎᒌᒍᓐᓇᐃᓕᓂᖏᓐᓄᑦ ᐋᖅᑭᑦᑕᐅᑎᑦᑎᓂᕐᒧᑦ ᑎᑎᕋᖅᑕᐅᓯᒪᔪᑦ ᒪᓕᑦᑐᒋᑦ ᓯᑎᐱᕆ 6, 2013ᓕᓴᕐᓂᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐃᑲᔫᓯᐊᖅᑖᕈᑎᔅᓴᖏᓐᓄᓪᓗ ᐊᖏᕈᑎᓂᑦ (ᐊᖏᕈᑎᓂᑦ) ᑲᑐᔾᔨᖃᑎᒌᒃᑯᓐᓂ ᐹᕕᓐᓛᓐᑯᓐᓂᓪᓗ ᐱᔾᔪᑎᒋᓪᓗᒍ ᓄᓘᔮᓕᕆᓂᖅ.
ᑲᑐᔾᔨᖃᑎᒌᒃᑯᑦ ᐱᖁᔨᕗᖔᕈᑎᓕᐅᖁᔨᓯᒪᒻᒪᑕ ᐋᖅᑭᒋᐊᒃᑲᐃᓇᓱᓐᓂᒃᑯᑦ ᒪᕐᕉᓐᓂᒃ ᐱᔾᔪᑎᖏᓐᓂᒃ:
- ᐹᕕᓐᓛᓐᑯᑦ ᓱᕋᐃᓯᒪᒻᒪᑕ ᑲᒪᒋᔭᔅᓴᕆᓯᒪᔭᖓᓐᓂᒃ ᐊᑭᓖᔭᕆᐊᖃᕐᓂᕐᒥᒃ ᓯᕗᓂᐊᒍᑦ ᐊᑭᓕᐅᑎᒋᒋᐊᖃᕐᓯᒪᔭᖏᓐᓂᒃ ᑲᑐᔾᔨᖃᑎᒌᒃᑯᓐᓄᑦ
- ᑭᓱᒥᒃ “ᐱᓕᕆᒍᑎᖃᕈᒫᕐᓂᐊᕐᓯᒪᕙᑦ” ᓄᓘᔮᓕᕆᓂᕐᒥ ᐱᔾᔪᑎᒋᓪᓗᒋᑦ ᐃᓛᒃᑯᑦ 5ᒦᑦᑐᑦ ᐊᖏᕈᑎᓂᑦ
ᑭᐅᔾᔪᑏᑦ ᑐᑭᓯᒍᑕᐅᓂᐊᕐᖓᑕ ᑲᑐᔾᔨᖃᑎᒌᖏᑦ ᓱᓕ ᐊᑭᓕᕐᓱᖅᑕᐅᓂᐊᕐᒪᖔᑕ ᓯᕗᓂᐊᒍᑦ ᐊᑭᓕᐅᑕᐅᔭᕆᐊᖃᕐᓯᒪᔪᓂᑦ $1.25 ᒥᓕᐊᓐᓂᑦ ᑎᓴᒪᐅᓕᖅᑲᖓᔪᓂᑦ ᓴᓇᓂᖏᑦ ᓄᓘᔮᓕᕆᓂᕐᒥ ᑎᑭᐅᑎᓇᓱᓐᓂᖏᓐᓂ ᑎᑭᐅᑎᕕᒋᒋᐊᖃᕐᓯᒪᔭᖏᓐᓄᑦ, ᐅᕝᕙᓘᓐᓃᑦ ᑲᑐᔾᔨᖃᑎᒌᖏᑦ ᓂᖏᖅᑕᕈᑎᓂᑦ ᐊᑭᓕᖅᑕᐅᓂᐊᕐᒪᖔᑕ ᒪᓕᑦᑐᒋᑦ ᒫᓐᓇ ᓴᓇᓂᖏᓐᓄᑦ ᑮᓇᐅᔾᔭᒍᑎᒋᕙᓪᓕᐊᔭᖏᑦ.
ᑲᑐᔾᔨᖃᑎᒌᒃᑯᑦ ᓇᓗᓇᐃᕐᓯᓯᒪᒻᒪᑕ ᓯᕗᓂᐊᒍᑦ ᐊᑭᓕᐅᑕᐅᔭᕆᐊᖃᕐᓯᒪᔪᑦ ᓂᖏᕈᑎᔅᓴᖏᑦ ᐹᕕᓐᓛᓐᑯᓐᓂ ᐊᑭᓕᖅᑕᐅᔭᕆᐊᖃᕐᖓᑕ 2015 ᐃᓚᖓᓄᑦ ᐊᒻᒪᓗ 2016 ᐊᕐᕌᒍᓕᒫᕐᒧᑦ. ᑲᑐᔾᔨᖃᑎᒌᖏᑦ ᓇᓗᓇᐃᕐᓯᓯᒪᔪᑦ ᓯᕗᓂᐊᒍᑦ ᐊᑭᓕᐅᑕᐅᔭᕆᐊᖃᕐᓯᒪᔪᑦ ᓂᖏᕈᑎᔅᓴᐃᑦ ᓄᖅᑲᖅᑎᑕᐅᓴᕋᐃᓗᐊᕐᓂᕐᖓᑕ ᐹᕕᓐᓛᓐᑯᓐᓂ ᐱᓕᕆᐊᖓᒡᒎᖅ ᑎᑭᐅᑎᓯᒪᙱᒻᒪᑦ “ᐱᓕᕆᒍᑎᒋᔪᒫᕐᓂᐊᕐᓯᒪᔭᕋᓗᐊᖓᓐᓄᑦ”.
ᑲᑐᔾᔨᖃᑎᒌᖏᑦ ᐋᖅᑭᒋᐊᒃᑲᐃᔨᓄᑦ ᕿᓄᔾᔪᑎᖃᕐᓯᒪᔪᑦ ᑐᑭᓯᑎᑕᐅᔪᒪᓪᓗᑎᒃ ᐹᕕᓐᓛᓐᑯᑦ ᐊᑭᓕᐅᑎᒋᒋᐊᖃᕐᓯᒪᔭᖏᓐᓂᒃ, ᕿᓄᔾᔪᓯᖃᕐᓯᒪᓪᓗᑎᓪᓗ ᓈᓴᖅᑕᐅᖁᔨᓯᒪᓪᓗᑎᒃ ᐊᒥᓲᓂᖏᓐᓂᒃ ᐊᑭᓕᐅᑕᐅᔭᕆᐊᓕᓐᓂᑦ ᐊᒻᒪᓗ ᐊᑭᓖᖁᓗᒋᑦ ᑲᑐᔾᔨᖃᑎᒌᒃᑯᓐᓄᑦ.
ᐋᖅᑭᒋᐊᒃᑲᐃᔩᑦ ᐅᑯᐊᖑᒻᒪᑕ: ᑖᒪᔅ ᕋ. ᕗᔪ (ᑲᑐᔾᔨᖃᑎᒌᒃᑯᓐᓂᑦ ᑎᒃᑯᐊᖅᑕᐅᓯᒪᔪᖅ), ᔨᒻ ᒪᑳᑦᓂ (ᐹᕕᓐᓛᓐᑯᓐᓂ ᑎᒃᑯᐊᖅᑕᐅᓯᒪᔪᖅ) ᐊᒻᒪᓗ ᒨᕆ ᓯᒥᔅ (ᐋᖅᑭᒋᐊᒃᑲᐃᔨᓂᑦ ᐃᔅᓯᕙᐅᑕᖅ).
ᑕᑯᓐᓈᖅᑕᐅᔪᓐᓇᓛᕐᖓᑕ, ᓈᓚᓐᓂᐅᔪᑦ ᑕᕐᕆᔭᐅᑎᑎᒍᑦ ᑕᑯᓐᓈᕋᔅᓴᐅᓛᖅᑐᑦ ᐅᓇ ᖃᕋᓴᐅᔭᒃᑯᑦ ᑐᕌᕈᑖ ᐊᑐᕐᓗᒍ: www.webstream.ca/qia/
ᑲᑐᔾᔨᖃᑎᒌᒃᑯᑦ ᐹᕕᓐᓛᓐᑯᓪᓗ ᐋᖅᑮᓇᓱᓚᐅᕐᓯᒪᔫᒐᓗᐊᑦ ᓯᕗᓂᐊᒍᑦ ᐊᑭᓕᐅᑕᐅᔭᕆᐊᓕᓐᓂᑦ ᐊᑭᓕᔅᓴᖃᓕᕐᖓᑕ, ᑭᓯᐊᓂ ᐋᖅᑭᑦᑕᐅᑎᑦᑎᒍᓐᓇᓚᐅᙱᒻᒪᑕ. ᑲᑐᔾᔨᖃᑎᒌᒃᑯᑦ ᐅᑉᐱᕈᓱᑦᑐᑦ ᑕᐃᒫᒃ ᐋᖅᑭᒋᐊᒃᑲᐃᔭᕆᐊᖃᕐᓯᒪᒻᒪᑕ ᐋᖅᑭᓂᐊᕐᖓᑦ ᑮᓇᐅᔭᓄᑦ ᐊᑭᓕᔅᓴᖃᕐᕕᐅᓂᖓᑦ. ᑲᑐᔾᔨᖃᑎᒌᒃᑯᑦ ᐹᕕᓐᓛᓐᑯᓪᓗ ᓱᓕ ᐱᓕᕆᖃᑎᒌᑉᐸᑦᑐᑦ ᐊᓯᖏᓐᓂᒃ ᐱᔾᔪᑎᖃᖅᑐᑎᒃ ᐊᖏᕈᑎᓂᑦ ᑲᔪᓯᑎᑦᑎᕙᓪᓕᐊᓪᓗᑎᒃ.
ᑐᑭᓯᒋᐊᒃᑲᓐᓂᕈᒪᒍᔅᓯ ᑐᑭᓯᒋᐊᕐᕕᐅᖃᑦᑕᕐᓕ:
ᓰᒪ ᓴHᐊ ᔨᐅᕆHᐃ, ᐊᖏᔪᖅᑳᖅ ᑐᓴᐅᒪᖃᑦᑕᐅᑎᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
867.975.8413 or 1.800.667.2742
szerehi@qia.ca
