2020ᒥ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᓴᖅᑭᑎᑦᑎᓚᐅᕐᒪᑕ ᕿᒻᒥᓂᒃ ᐊᑐᖅᑕᐅᑎᑦᑎᒋᐊᒃᑲᓐᓂᕐᓂᕐᒧᑦ ᐱᓕᕆᐊᕐᒥ ᐃᓚᒋᔭᐅᖃᑕᐅᔪᒥᒃ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᐱᒋᐊᕈᑎᒋᓯᒪᔭᖏᓐᓄᑦ.

ᐃᓚᒋᓪᓗᒍ ᕿᒻᒥᓂᒃ ᐊᑐᖅᑕᐅᑎᑦᑎᒋᐊᒃᑲᓐᓂᕐᓂᕐᒥᒃ, $100,000ᓂᒃ ᑐᓂᓯᖃᑦᑕᕐᓂᐊᖅᑐᑦ ᐊᕐᕌᒍᑕᒫᑦ ᓄᓇᕗᒥ ᐸᖓᒍᔾᔨᓂᒃᑯᓐᓄᑦ ᑖᓐᓇ ᐊᕐᕌᒍᑕᒫᖅ ᕿᒧᒃᓯᐅᕐᔪᐊᓂᐅᖃᑦᑕᖅᑐᖅ.  ᑖᓐᓇ ᐊᑐᖅᑕᐅᕙᒃᑐᑦ ᖁᕕᐊᓲᑎᖃᖅᖢᑎᒃ ᑕᐃᔅᓱᒪᓂ ᕿᒧᔅᓯᒃᑯᑦ ᐃᖏᕐᕋᖃᑦᑕᐅᓚᐅᖅᓯᒪᓂᖏᓐᓄᑦ ᐃᓅᓯᕆᔭᐅᓪᓗᓂ ᓄᓇᕗᒥ.

ᑕᕝᕙᓂ ᐊᕐᕌᒍᒥᒃ 14ᓂᒃ ᕿᒧᒃᓯᖃᑕᐅᓂᐊᖅᑐᓂᒃ ᑐᓂᓯᓚᐅᖅᑐᑦ $5000 ᐊᑐᓂ ᐃᑲᔫᑕᐅᓂᐊᖅᖢᑎᒃ ᑮᓇᐅᔭᓂᒃ ᐊᑐᖅᑕᐅᓚᐅᖅᑐᓂᒃ ᐸᕐᓇᒃᑎᓪᓗᒋᑦ ᓄᓇᕗᒥ ᐸᖓᒍᔾᔨᓂᕐᒧᑦ.  ᐃᓚᖓ ᕿᒧᒃᓯᖃᑕᐅᓂᐊᓚᐅᖅᑐᖅ ᑐᓂᔭᐅᖃᑕᐅᔪᖅ ᐋᓕᒃᔅ ᔫᓱᐊ ᐃᕙᓗ.

ᐋᓕᒃᔅ ᐃᒡᓗᓕᖕᒥᐅᑕᖅ ᐊᒻᒪᓗ 6ᓂ ᐊᕐᕌᒍᓂ ᕿᒧᒃᓯᖃᑦᑕᖅᓯᒪᓕᖅᑐᖅ.

ᐋᓕᒃᔅ ᐅᖃᓚᐅᖅᑐᖅ ᕿᑭᖅᑕᓃᒃᑯᓐᓄᑦ ᓯᕗᓪᓕᖅᐹᒥᒃ ᐱᒋᐊᓚᐅᖅᑐᑦ ᕿᒻᒥᑖᕐᓂᕐᒥᒃ 2016ᒥ ᐃᓐᓇᕐᒥ ᐃᓅᔪᓐᓃᖅᑐᖃᖅᑎᓪᓗᒍ  ᕿᒻᒥᖏᑦ ᑐᓂᓚᐅᖅᓯᒪᖕᒪᒋᑦ ᐋᓕᒃᔅᒧᑦ.  ᕿᒻᒥᓕᕆᔭᕆᐊᒃᓴᖅ ᖃᐅᔨᒪᓚᐅᙱᒃᑲᓗᐊᖅᑎᓪᓗᒍ, ᐋᓕᒃᔅ ᑲᔪᓯᑎᑦᑎᔪᒪᑐᐃᓐᓇᓚᐅᖅᑐᖅ ᐃᓕᒍᒪᓪᓗᓂ ᐃᓕᖅᑯᓯᒃᑯᑦ ᐱᐅᓯᐅᓚᐅᖅᓯᒪᔪᒥᒃ.

“ᑐᓵᖃᑦᑕᖅᓯᒪᔪᖓ ᐃᓐᓇᐃᑦ ᐅᓂᒃᑳᖃᑦᑕᖅᑎᓪᓗᒋᑦ, ᐊᒻᒪᓗ ᑕᐅᑐᒃᐸᒃᖢᒋᑦ ᕿᒻᒥᓕᕆᑎᓪᓗᒋᑦ.”

2016ᒥ ᐱᒋᐊᖅᑎᓪᓗᒍ ᖃᐅᔨᒪᓂᖃᑦᑎᐊᓚᐅᙱᑦᑐᖅ ᕿᒧᒃᓯᒋᐊᖅᓴᖅ, ᐊᓖᒃᔅ ᐅᓪᓗᒥ ᕿᑐᕐᖓᖏᓐᓂᒃ ᐊᐅᓪᓚᕈᔾᔨᖃᑦᑕᓚᐅᖅᑐᖅ ᕿᒧᒃᓯᒃᑯᑦ.

“ᓅᓯᒪᓗᓂ ᕿᒧᒃᓯᒃᑯᑦ ᐃᑲᔪᕐᒪᑦ ᓴᐃᒻᒪᖅᓴᐅᑎᒋᓪᓗᒍ ᐃᓱᒪᒃᑯᑦ ᑎᒥᒃᑯᓪᓗ.”

ᐋᓕᒃᔅ ᐊᓯᖏᓐᓄᑦ ᐃᓕᓐᓂᐊᖅᑎᑦᑎᒍᒪᔪᑦ ᑭᖑᕚᖑᔪᓂᒃ.

ᐊᐱᕆᔭᐅᖕᒪᑦ ᐋᓕᒃᔅ ᑕᐃᒃᑯᐊ ᑮᓇᐅᔭᖅᑖᕆᓚᐅᖅᑕᖏᑦ ᕿᑭᖅᑕᓃᒃᑯᓐᓂᑦ ᐅᖃᓚᐅᖅᑐᖅ “ᐃᑲᔪᖅᓯᔪᒻᒪᕆᐅᔪᑦ. ᕿᒻᒥᖃᖅᖢᓂ ᐊᑭᑐᔫᖕᒪᑦ, ᐊᒻᒪᓗ ᐱᖁᑎᑦ ᐊᓯᔾᔨᖅᑕᐅᖃᑦᑕᕆᐊᖃᖅᖢᑎᒃ.  ᖁᔭᓕᔪᖓ ᕿᑭᖅᑕᓃᒃᑯᑦ ᑮᓇᐅᔭᑎᒍᑦ ᐃᑲᔪᓚᐅᕐᒪᑕ.”

ᓄᕙᓐᓇᕐᔪᐊᖅ-19 ᐱᔾᔪᑎᒋᓪᓗᒍ, ᓄᓇᕗᒥ ᐸᖓᒍᔾᔨᓂᖅ ᓄᖅᑲᖅᑎᑕᐅᒋᐊᖃᓚᐅᖅᑐᖅ 2020ᒥ 2021ᒥᓗ.  ᑕᕝᕙᓂ ᐊᕐᕌᒍᒥᒃ ᕿᑭᖅᑕᓃᒃᑯᑦ ᑐᓂᓯᓚᐅᖅᑐᑦ $10,000ᓂ ᐸᕐᓇᒃᐸᓪᓕᐊᒍᑎᒃᓴᓄᑦ, ᐊᒻᒪᓗ $20,000ᓂ  ᐃᓚᔭᐅᒃᑲᓐᓂᕐᓂᐊᖅᑐᑦ ᐊᖏᓪᓕᒋᐊᕐᓗᒋᑦ ᕿᑭᖅᑕᓃᒃᑯᑦ ᐃᑲᔫᑎᒋᕙᒃᑕᖏᑦ ᓯᕗᓂᕐᒥᒃ ᐸᖓᒍᔾᔨᓂᐅᓂᐊᖅᑐᓄᑦ.

ᕿᑭᖅᑕᓃᒃᑯᑦ ᖃᐅᔨᒪᖁᔨᕗᑦ ᐸᖓᒍᔾᔨᓂᕐᒧᑦ ᐋᖅᑭᒃᓱᐃᔨᕙᒃᑐᓂᒃ ᐊᕐᕌᒍᒥᒃ ᐱᓕᕆᔪᒻᒪᕆᐅᓚᐅᕐᒪᑦ ᓄᓇᕗᒥ ᐸᖓᒍᔾᔨᓂᐊᖅᑐᓂᒃ.  ᐃᑲᔪᕐᓂᖏᑦ ᕿᒧᒃᓯᖅᑎᑦᑎᓂᕐᒥᒃ ᓄᓇᓕᖕᓂ ᓴᖅᑭᔮᑦᑎᐊᖅᑐᑦ.

ᐋᓕᒃᔅ ᑲᔪᓯᑦᑎᐊᖁᕙᕗᑦ ᐊᒻᒪᓗ ᑕᐃᒃᑯᐊ ᐊᓯᖏᑦ ᕿᒻᒧᒃᓯᕐᔪᐊᖃᑕᐅᕙᒃᑐᑦ, ᑕᐃᒪᑐᖅ ᐊᕐᕌᒎᓂᐊᖅᑐᓂᒃ ᑲᔪᓯᑦᑎᐊᕈᓐᓇᓛᖅᐳᖅ!