ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓄᖕᓂᑦ ᐅᖃᖃᑎᖃᖃᑦᑕᕆᐊᓯᓚᐅᖅᓯᒪᖕᒪᑕ ᐃᖃᓗᖕᓂ ᑐᑭᓯᕚᓪᓕᒃᑲᓐᓂᕈᒪᓪᓗᑎᑦ ᖃᓄᖅ ᐃᓄᐃᑦ ᓄᓇᖁᑎᖏᑦ ᓯᔾᔭ ᐊᐅᓚᑕᐅᔪᓐᓇᕋᔭᕐᒪᖔᖅ. ᒫᓐᓇᕈᓘᓚᐅᖅᑐᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᒃᑯᐃᓚᐅᖅᓯᒪᕗᑦ ᖃᐅᔨᓵᕐᒥᒃ ᑕᒪᓐᓇ ᐱᓪᓗᒍ. ᖁᕕᐊᓱᓚᐅᖅᐳᒍᑦ ᐱᒐᑦᑕ 87−ᖑᔪᓂᑦ ᑭᐅᔾᔪᑎᓂᑦ.

ᖃᐅᔨᓵᖅ ᓈᑎᖅᑕᐅᔪᓐᓇᓚᐅᕐᒪᑦ ᐃᖃᓗᖕᒥᐅᑕᕐᓄᑦ ᐃᓄᖕᓄᑦ ᐱᔭᕇᖅᑕᐅᖁᔭᐅᓪᓗᑎᑦ ᒫᑦᓯ 30−ᒥ ᑎᑭᑦᑐᒍ ᔫᓂ 30, 2021-ᒧᑦ. ᐊᐱᕆᓚᐅᖅᐳᒍᑦ ᑐᓴᕈᒪᓂᕋᖅᑐᑕ ᐃᓄᖕᓂᒃ, ᑐᓴᕈᒪᒻᒪᕆᑦᑐᑕᓗ ᐃᓐᓇᑐᖃᕐᓂᑦ, ᐊᖑᓇᓱᒃᑎᓂᑦ, ᓯᕐᓗᐊᖃᐅᖅᑐᓂᑦ ᐊᒻᒪᓗ ᐊᓯᖏᖕᓂᑦ ᐃᓄᖕᓂᑦ ᐊᑦᑐᖅᑕᐅᓯᒪᓂᖃᕋᔭᖅᑐᓂᑦ.

ᑖᒃᑯᓂᖓ 87−ᖑᔪᓂᑦ ᖃᐅᔨᓵᕐᓂᑦ ᓈᑎᕆᔪᒥᓃᑦ, 76−ᐳᓴᓐᑎᐅᔪᑦ ᐅᖃᓚᐅᖅᑐᑦ ᐊᖑᓇᓱᒋᐊᖅᐸᒻᒪᑕᒎᖅ ᐊᑐᖃᑦᑕᖅᑐᑎᑦ ᓯᔾᔭᒥ ᐃᒪᕐᒨᕈᓐᓇᕆᐊᖃᓲᖑᓪᓗᑎᑦ ᐊᒻᒪᓗ ᓯᑯᒧᑦ ᓯᔾᔭᒃᑰᕐᓗᑎᑦ.

ᓯᕗᓪᓕᐅᔾᔭᐅᖁᔭᐅᓗᐊᙳᐊᓚᐅᖅᑐᖅ ᐃᓄᖕᑦ ᑕᖅᑭᑕᒫᑦ ᓴᙱᖅᑕᐅᖃᑦᑕᕐᓗᓂ ᓯᔾᔭ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐅᓪᓗᒥᐅᔪᖅ ᑕᒪᔅᓱᒥᖓ ᖃᓄᐃᓕᐅᖁᔭᐅᓯᒪᔪᒥᒃ ᐱᓕᕆᐊᖃᕋᓱᐊᖅᑐᑦ ᓴᓗᒻᒪᖅᓴᐃᓗᑎᑦ ᓴᙱᖅᑎᑦᑎᓗᑎᑦ ᓯᔾᔭᒥ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᔭᓐᓇᒦᕈᒪᔪᑦ ᑕᐃᒃᑯᓂᖓ ᖃᐅᔨᓵᕐᒧᑦ ᑭᐅᖃᑦᑕᓚᐅᖅᑐᓂᑦ. ᐱᔭᕇᖅᑕᐅᓚᐅᖅᑎᓪᓗᒍ ᖃᐅᔨᓵᖅ, ᐊᑐᓂ ᑭᐅᔪᒥᓂᐅᔪᑦ ᐊᑎᖏᑦ ᐊᒧᔭᐅᓂᐊᕋᒥᒃ ᓵᓚᒃᓴᕋᓱᐊᖅᑎᑕᐅᓚᐅᖅᑐᑦ. ᐅᕝᕙ ᐅᑯᐊ ᓵᓚᒃᓴᖅᑐᒥᓃᑦ ᐊᑎᖏᑦ ᐊᒧᔭᒥᓂᐅᓪᓗᑎᑦ!

       1st ᓵᓚᒃᓴᖅᑐᖅ: $500 ᓂᐅᕕᕈᓐᓇᐅᑎ ᓇᓕᖅᑲᖅ ᐅᑭᐅᖅᑕᖅᑐᒥ ᓅᒃᑐᖅᓯᐅᑏᑦ ᓂᐅᕕᕐᕕᖓᓂ – ᔮᓂ ᑯᓗᓛᖅ
       2nd ᓵᓚᒃᓴᖅᑐᖅ: $300 ᓂᐅᕕᕈᓐᓇᐅᑎ ᓇᓕᖅᑲᖅ ᒥᖅᓱᖅᑕᖅ ᓂᐅᕕᕐᕕᖓᖕᓂ − ᐋᓂ ᓇᑖᖅ
       3rd ᓵᓚᒃᓴᖅᑐᖅ: ᐅᖅᓱᖃᐅᑎ ᐊᖏᕐᕋᒧᑦ ᐅᖅᓱᐊᓗᒃ ᐅᖅᓱᖅ ᑯᐊᐳᕇᓴᙵᓂᒃ ($200 ᐊᑭᓕᒃ) – ᒪᕇ ᔫ ᐊᒃᐸᓕᐊᓗᒃ

ᑭᐅᔪᒥᓃᑦ ᖃᐅᔨᓵᕐᒧᑦ ᐃᑲᔪᕐᓂᐊᕐᒪᑕ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓂᑦ ᑐᑭᒧᐊᑦᑎᑕᐅᓗᑎᑦ ᖃᓄᖅ ᐊᐅᓚᑕᐅᒐᔭᕐᒪᖔᑕ ᐃᓄᐃᑦ ᓄᓇᖁᑎᖏᑦ ᐊᒻᒪᓗ ᐊᑦᑕᓇᙱᑦᑐᒥᒃ ᐊᑐᕋᒃᓴᐅᑦᑎᐊᖅᑐᒥᓗ ᓯᔾᔭᖃᖁᓪᓗᒍ ᐃᓄᖕᓄᑦ, ᐃᓐᓇᑐᖃᕐᓄᑦ, ᐊᖑᓇᓱᒃᑎᓄᑦ ᐊᒻᒪᓗ ᑭᖑᕚᒃᓴᕆᔭᐅᔪᓄᑦ.