ᐃᖅᑲᓇᐃᔭᖅᑎᓄᑦ / ᑭᒃᑯᑐᐃᓐᓇᓄᓪᓗ ᐃᖅᑲᓇᐃᔮᔅᓴᖅ

 ᐃᖅᑲᓇᐃᔮᖅ: ᐃᓕᖅᑯᓯᓕᕆᓂᕐᒧᑦ ᐅᖃᐅᔾᔨᔨ, ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᖅ

ᐋᖅᑭᓯᒪᓂᖓ: ᑭᓪᓕᖃᖅᑐᓂ ᒫᑦᓯ 31, 2028ᒧᑦ

ᓇᒥ: ᓄᓇᖓᓐᓂ ᐃᖅᑲᓇᐃᔮᕆᒍᓐᓇᖅᑕᖓ ᐃᖅᑲᓇᐃᔮᖓᓄᑦ ᐊᐅᓪᓚᑲᐃᓐᓇᖃᑦᑕᕋᔭᖅᑐᓂ

ᑐᕌᖓᔪᖅ ᐅᑯᓄᖓ: ᓄᓇᕗᒻᒥᐅᓄᑦ ᐃᓄᓐᓄᑦ ᑭᓯᐊᓂ ᐃᖅᑲᓇᐃᔮᖅᑖᕋᓱᒍᒪᔪᓄᑦ ᑐᕌᖓᔪᖅ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᕿᓂᕐᖓᑕ ᐊᔪᙱᑦᑐᓂᑦ ᐃᓕᖅᑯᓯᓕᕆᓂᕐᒧᑦ ᐅᖃᐅᔾᔨᔨᔅᓴᒥᒃ ᐃᖅᑲᓇᐃᔭᖅᑎᐅᖃᑕᐅᓂᐊᖅᑐᒥᒃ ᕿᑭᖅᑕᓂ ᐱᓕᒻᒪᔅᓴᐃᓂᕐᒧᑦ ᐃᓕᓐᓂᐊᑎᑦᑎᖃᑦᑕᓂᕐᒧᓪᓗ ᐃᖅᑲᓇᐃᔮᔅᓴᓄᑦ ᑲᑐᔾᔨᖃᑎᒌᒍᑕᐅᔪᓂᑦ (Q-STEP) ᐱᓕᕆᐊᕐᒥ.

ᑲᑐᔾᔨᖃᑎᖃᖅᑐᑎᒃ ᐃᖅᑲᓇᐃᔭᖅᑐᓕᕆᓂᕐᒧᑦ ᐃᓅᓯᕐᒨᖓᔪᓂᓪᓗ ᐱᕙᓪᓕᐊᔪᓕᕆᔨᒃᑯᓐᓂᑦ ᑲᓇᑕᒥ (ESDC), ᑐᕌᒐᖃᓪᓗᐊᑕᕋᔭᖅᑐᑦ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᒥ ᐱᓇᓱᐊᕈᑕᐅᔪᒥ ᐊᒥᓱᕈᖅᑎᑦᑎᒋᐊᒃᑲᓂᕐᓂᕐᒥᒃ ᐃᓄᓐᓂᑦ ᐃᖅᑲᓇᐃᔭᖅᑎᐅᔪᓐᓇᖅᑐᓂᑦ ᐃᖅᑲᓇᐃᔮᔅᓴᓯᐅᕐᐸᑦᑐᓂᑦ ᕿᑭᖅᑕᓂ. ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᖅ ᓇᓗᓇᐃᒃᑯᑕᖅᑖᕈᑎᔅᓴᓂᑦ ᐊᒻᒪᓗ ᐊᓯᖏᓐᓄᑦ ᐊᑐᕋᔅᓴᐅᔪᓂᑦ ᐃᓕᓐᓂᐊᑎᑦᑎᖃᑦᑕᓲᑦ ᐃᓕᓐᓂᐊᕈᑕᐅᕙᑦᑐᓂᑦ ᐃᓄᓐᓄᑦ ᓇᒥᑐᐃᓐᓇᖅ ᓄᓇᓕᓐᓂᑦ ᕿᑭᖅᑕᓂ.

ᑖᓐᓇ ᐃᖅᑲᓇᐃᔮᔅᓴᖅ ᐃᓕᖅᑯᓯᓕᕆᓂᕐᒧᑦ ᐅᖃᐅᔾᔨᔨᐅᓂᕐᒥᒃ ᐃᑲᔪᖅᑎᐅᖃᑦᑕᓂᐊᕐᖓᑦ ᐊᒻᒪᓗ ᐊᔪᕆᕐᓯᐅᔾᔨᖃᑦᑕᓂᐊᕐᖓᑦ ᐱᓕᕆᐊᕐᒥ ᐃᖅᑲᓇᐃᔭᖅᑎᐅᔪᓂᑦ, ᐃᓚᒋᔭᐅᕙᑦᑐᓂᑦ ᐊᑑᑎᕕᐅᖃᑕᐅᔪᓂᓪᓗ ᖃᐅᔨᒪᒋᐊᑦᑎᐊᖃᑦᑕᓂᕐᒥᒃ ᐊᖅᑭᓱᖅᑕᐅᓯᒪᓂᖓᓂᒃ ᐱᔨᑦᑎᕋᐅᑕᐅᖃᑦᑕᕐᓂᖓᓂᓪᓗ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᖅ ᑲᒪᔭᐅᖃᑦᑕᕋᓗᐊᕐᒪᖓᖅ ᐃᑉᐱᒍᓱᑦᑎᐊᕐᓗᑎᒃ ᐃᓄᐃᑦ ᐃᓕᖅᑯᓯᖓᓐᓂᒃ ᐊᒻᒪᓗ ᐃᓱᒪᒋᔭᖃᖃᑦᑕᕋᓗᐊᕐᒪᖔᑕ ᐃᓄᐃᑦ ᖃᐅᔨᒪᔭᖏᓐᓂᒃ ᐊᒻᒪᓗ ᐃᓄᐃᑦ ᐱᖅᑯᓯᖅᑎᒍᑦ ᖃᐅᔨᒪᔭᖏᓐᓂᒃ (ᐃᓄᐃᑦ ᖃᐅᔨᒪᔭᑐᖃᖏᑦ).

ᐊᖏᔪᖅᑳᖃᕐᓂᐊᖅᑐᖅ ᐱᓕᕆᐊᔅᓴᓕᕆᔨᒥᒃ, ᐃᓕᖅᑯᓯᓕᕆᓂᕐᒧᑦ ᐅᖃᐅᔾᔨᔨ ᐃᑲᔪᖃᑦᑕᓂᐊᖅᑐᖅ ᐱᓕᕆᐊᕐᒥ ᐃᖅᑲᓇᐃᔭᖅᑎᐅᖃᑎᒌᑦᑐᓂᒃ ᐃᓕᓐᓂᐊᓂᐊᖅᑐᓂᑦ ᓂᕈᐊᖃᑦᑕᓂᕐᒥᒃ, ᐱᓕᕆᐊᕐᒨᖓᔪᓂᑦ ᑎᑎᕋᕈᑎᖃᖃᑦᑕᓂᕐᒥᒃ ᐊᒻᒪᓗ ᑐᓴᐅᒪᖃᑦᑕᐅᑎᖃᑎᖃᖃᑦᑕᓂᕐᒥᒃ ᓲᕐᓗ ᓂᕆᐅᒋᔭᐅᕙᑦᑐᓂᑦ ᐊᒻᒪᓗ ᐱᓕᕆᑦᑎᐊᕆᐊᖃᕐᓂᕐᒧᑦ ᒪᓕᒐᕐᓂᑦ ᐃᓚᒋᔭᐅᓂᐊᖅᑐᓄᑦ, ᐊᒻᒪᓗ ᐱᔭᕇᕐᓯᖃᑦᑕᕐᓗᓂ ᐱᓕᕆᐊᕐᒥ ᑲᒪᒋᔭᐅᔪᔅᓴᓂᑦ ᐸᕐᓇᐅᑎᓂᑦ ᑕᐃᒫᒃ ᖃᐅᔨᒪᑦᑎᐊᖃᑦᑕᓂᐊᕐᖓᑕ ᐃᖅᑲᓇᐃᔮᔅᓴᓄᑦ ᑐᕌᒐᐃᑦ ᐃᓕᖅᑯᓯᖅᑎᒍᑦ ᓈᒻᒪᒃᑲᓗᐊᕐᒪᖔᑕ ᐊᒻᒪᓗ ᐊᑑᑎᖃᕐᓂᐊᕋᓗᐊᕐᒪᖔᑕ ᐊᑐᓂᑦ ᐃᓕᓐᓂᐊᖅᑐᓄᑦ. ᐃᓕᖅᑯᓯᓕᕆᓂᕐᒧᑦ ᐅᖃᐅᔾᔨᔨ ᓯᕗᓕᕐᓯᖃᑦᑕᕆᐊᖃᕐᓂᐊᖅᑐᖅ ᐱᖃᑕᐅᔪᓂᑦ ᖃᕋᓴᐅᔭᒃᑯᑦ ᐊᒻᒪᓗ ᓇᔫᑎᓪᓗᑎᒃ ᐱᓕᕆᖃᑎᒌᑦ ᑲᑎᒪᓂᖏᓐᓂᒃ, ᐱᔭᕆᐊᑭᓪᓕᑎᑦᑎᔨᓂᑦ ᑲᑎᒪᔨᕋᓛᕐᓂᓪᓗ ᑕᐃᒪᐃᒋᐊᖃᕋᐃᑉᐸᑦ. ᑖᓐᓇ ᐃᖅᑲᓇᐃᔮᔅᓴᖅ ᐋᖅᑭᔅᓱᐃᒍᑕᐅᖃᑦᑕᓂᐊᕐᒥᔪᖅ ᐃᓕᖅᑯᓯᖅᑎᒍ ᓈᒻᒪᑦᑐᓂᑦ ᐱᓕᕆᓂᐅᓂᐊᖅᑐᓂᑦ ᐊᒻᒪᓗ ᐃᑲᔪᖅᑎᐅᖃᑦᑕᕐᓗᓂ ᐃᓕᓐᓂᐊᖅᑐᓄᑦ ᐃᓕᓐᓂᐊᖃᑕᐅᓂᖏᓐᓂ ᐃᑲᔪᕐᓗᒋᑦ ᐊᓂᒍᐃᑎᓪᓗᒋᑦ ᐱᔭᕆᐊᑐᓂᖏᓐᓂᒃ ᐊᑑᑎᓯᒪᔪᓂᑦ ᐱᔭᕇᕐᓯᑦᑎᐊᖃᑦᑕᓂᐊᕐᖓᑕ ᐃᓕᓐᓂᐊᖅᑕᖏᓐᓂᒃ. ᐃᖅᑲᓇᐃᔮᖅᑖᖅᑐᖅ ᐃᖅᑲᓇᐃᔮᖓᓄᑦ ᐃᖅᑲᓇᐃᔭᕆᐊᕐᓗᓂ ᐊᐅᓪᓚᖃᑦᑕᕆᐊᖃᕐᓂᐊᕐᒥᔪᖅ ᐱᓇᓱᐊᕈᓯᓕᒫᕐᒧᑦ ᑎᑭᐅᒪᖃᑦᑕᓂᐊᖅᑐᑎᒃ.

ᑕᐃᒫᖑᒐᔪᒻᒪᑦ, ᐱᔭᕇᕐᓯᓯᒪᑉᐸᑦ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᕈᑎᓂᑦ (ᖁᕝᕙᓯᓐᓂᓕᒻᒥᒃ 12ᒥᒃ), ᐅᑯᐊ ᐱᖃᓯᐅᑎᓗᒋᑦ ᖃᕋᓴᐅᔭᓕᕆᒍᓐᓇᑎᐊᕐᓗᓂ, ᐊᒻᒪᓗ ᐊᓪᓚᕝᕕᒻᒥ ᐸᐃᑉᐹᓕᕆᔾᔪᑕᐅᓲᓂᑦ ᑲᒪᖃᑦᑕᕐᓯᒪᔭᕆᐊᓕᒃ. ᐊᑕᐅᓯᕐᒥᒃ ᐊᕐᕌᒍᒥ ᓄᓇᓕᓐᓂᑦ ᑐᓴᐅᒪᑎᑦᑎᔨᐅᓂᕐᒥᒃ/ᓄᓇᓕᓐᓂᑦ ᑐᑭᓯᒋᐊᕐᕕᖃᖃᑦᑕᓂᕐᒥᒃ ᐃᖅᑲᓇᐃᔮᖃᕐᓯᒪᔭᕆᐊᓕᒃ ᐅᕝᕙᓘᓐᓃᑦ ᐃᑲᔪᖅᑕᐅᔭᖅᑐᐸᑦᑐᓂᑦ ᐃᑲᔪᖃᑦᑕᕐᓯᒪᔭᕆᐊᖃᕐᒥᔪᖅ.  ᐃᖅᑲᓇᐃᔮᖃᖃᑦᑕᕐᓯᒪᓂᑰᔭᕆᐊᖃᕐᒥᔪᖅ ᐃᑲᔪᖅᑎᐅᓂᕐᒥᒃ, ᐱᔪᒐᕐᓴᐃᖃᑦᑕᓂᕐᒥᒃ ᐊᒻᒪᓗ ᓯᕗᓕᕐᓯᖃᑦᑕᓂᕐᒥᒃ ᐊᓯᖏᓐᓂᒃ ᑖᔅᓱᒥᖓ ᐃᖅᑲᓇᐃᔮᖃᑦᑎᐊᕈᓐᓇᓂᐊᕐᖓᑦ. ᖃᐅᔨᒪᔭᕆᐊᓕᒃ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᒻᒪᓗ ᐃᓄᐃᑦ ᐃᓕᖅᑯᓯᖓᓐᓂᒃ, ᐊᒻᒪᓗᑦᑕᐅᖅ ᑐᑭᓯᐅᒪᖃᑦᑕᐅᑎᖃᑎᖃᕈᓐᓇᑎᐊᕐᓗᓂ ᐃᓄᒃᑎᑐᑦ ᖃᓪᓗᓈᑎᑐᓪᓗ. ᐱᔭᕇᕐᓯᓯᒪᑉᐸᑦ ᓄᓇᕗᑦ ᓯᕗᓂᒃᓴᕗᑦ ᐃᓕᓐᓂᐊᕈᒻᒥᑦ ᐊᑑᑎᖃᑦᑎᐊᕋᔭᕐᒥᔪᖅ, ᐊᒻᒪᓗᑦᑕᐅᖅ ᑲᑎᒪᔨᐅᖃᑕᐅᖃᑦᑕᕐᓯᒪᑉᐸᑦ. ᓈᒻᒪᑦᑐᒥᒃ ᐱᕋᔭᓚᐅᕐᓯᒪᓂᑰᒻᒪᖔᖅ ᖃᐅᔨᓴᖅᑕᐅᔾᔪᑎᖃᕆᐊᖃᕋᔭᖅᑐᖅ ᐊᒻᒪᓗ ᐃᓱᒫᓗᓇᕋᔭᕐᒪᖔᖅ ᖃᐅᔨᓴᖅᑕᐅᓯᒪᔭᕆᐊᓕᒃ. ᑕᒪᒃᑮᓐᓂᒃ ᑕᒪᑐᒧᖓ ᐃᓕᓐᓂᐊᕐᓯᒪᑉᐸᑦ ᐊᒻᒪᓗ ᑕᒪᑐᒧᖓ ᑐᕌᖓᔪᒥᒃ ᐃᖅᑲᓇᐃᔮᖃᕐᓯᒪᑉᐸᑦ ᓈᒻᒪᒋᔭᐅᔪᓐᓇᕐᒥᔫᒃ ᓇᓕᒧᑦᑎᔭᕆᐊᔅᓴᖏᓐᓂᒃ ᐃᓱᒪᒋᔭᐅᓗᑎᒃ.

ᑮᓇᐅᔾᔭᔅᓵᕆᒐᔭᖅᑕᖏᑦ ᑕᕝᕙᓂ ᐃᖅᑲᓇᐃᔮᕐᒥ $62,813 to $92,126 ᐊᒻᒪᓗ ᕿᑭᖅᑕᓂᒃᑯᓐᓂᑦ ᐱᔪᒥᓇᑦᑎᐊᖅᑐᓂᑦ ᐃᑲᔫᓯᐊᔅᓴᖅᑕᖃᖅᑐᓂ ᓲᕐᓗ ᕿᑲᕆᐊᕈᑎᔅᓴᑦ ᐃᑲᔫᓯᐊᔅᓴᑦ ᐊᒻᒪᓗ ᓄᓇᕗᑦ ᐅᑭᐅᖅᑕᖅᑐᒥᐅᑕᐅᓂᕐᒧᑦ ᐃᑲᔫᓯᐊᖅᑖᕆᖃᑦᑕᕋᔭᖅᑕᖏᑦ $27,600 ᐊᕐᕌᒍᑕᒫᑦ. ᐃᓪᓗᖃᖅᑎᑦᑎᒍᑕᐅᔾᔮᖏᑦᑐᖅ.

ᐃᖅᑲᓇᐃᔭᖅᑖᕋᓲᑏᑦ ᑐᓂᔭᐅᖃᑦᑕᕈᓐᓇᖅᑐᑦ ᓱᒃᑲᔪᒃᑯᑦ, ᐃᕐᖐᓈᖅᑕᐅᑎᒃᑯᑦ, ᓇᒻᒥᓂᖅ ᐋᓪᓗᒋᑦ, ᐅᕝᕙᓘᓐᓃᑦ ᑎᑎᖅᑲᓂᐊᕐᕕᒃᑯᑦ ᓇᔅᓯᐅᑎᓗᒋᑦ ᐅᕗᖓ:

Human Resources               ᐅᖄᓚᐅᑖ: (867) 975-8400

Qikiqtani Inuit Association       ᓱᒃᑲᔪᒃᑰᕈᑖ: (867) 979-3238

Igluvut building, 2^nd floor

P.O. Box 1340                  ᐃᕐᖐᓈᖅᑕᐅᑖ: Resumes@qia.ca ᐅᕝᕙᓘᓐᓃᑦ

Iqaluit, NU X0A 0H0             ᑕᑯᓂᐊᕐᓗᒍ:: Tuttarvik.qia.ca

ᒪᑐᕕᔅᓴᓕᒃ: ᒪᑐᐃᖓᓂᐊᖅᑐᖅ ᐃᓐᓄᒐᓱᓐᓂᖓᓂ

          ᑲᑐᔾᔨᖃᑎᖃᖅᑐᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ