ᐃᓄᓕᒫᓄᑦ ᓇᓗᓇᐃᕐᓯᒍᑕᐅᔪᖅ

 ᐅᓪᓗᖅ ᓇᓗᓇᐃᕐᓯᒍᑕᐅᔫᑉ: ᒫᑦᓯ 19, 2020

ᐱᔾᔪᑕᐅᔪᖅ: ᕿᑭᖅᑕᓂᒃᑯᑦ ᓄᖅᑲᑎᑦᑎᔪᑦ ᐃᓚᓕᐊᕆᐊᓕᓐᓄᑦ ᐃᓚᐃᖅᑐᓄᓪᓗ ᐃᑲᔫᑎᖓᓐᓂᒃ ᐱᔾᔪᑎᒋᓪᓗᒍ ᐳᕝᕕᕆᓂᕐᒧᑦ ᖃᓂᒪᓐᓇᖅ COVID-19

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓂᒃᑯᑦ) ᓄᖅᑲᑎᑦᑎᑲᐃᓐᓇᖅᑐᑦ ᐃᓚᓕᐊᕆᐊᓕᓐᓄᑦ ᐃᓚᐃᖅᑐᓄᓪᓗ ᐃᑲᔫᑎᖓᓐᓂᒃ ᑐᑭᓯᑎᑕᐅᓇᓱᓐᓂᖏᓐᓂ ᖃᓄᐃᓕᖓᓂᐊᕐᒪᖔᑕ. ᑖᓐᓇ ᑐᑭᑖᕈᑕᐅᔪᖅ ᑭᐅᔾᔪᑎᖃᖅᑐᑎᒃ ᐊᑐᖅᑕᐅᖁᔭᐅᓯᒪᔪᓂᑦ ᐃᓄᓕᒫᓄᑦ ᐋᓐᓂᐊᖅᑐᓕᕆᔨᒃᑯᓐᓂᑦ ᓄᖅᑲᖅᑎᑕᐅᖁᓪᓗᒋᑦ ᐃᓘᓐᓇᑎᒃ ᐊᐅᓪᓚᕈᑕᐅᔭᕆᐊᖃᓗᐊᙱᑦᑐᑦ ᓯᐊᒻᒪᖁᓇᒍ ᐳᕝᕕᕆᓂᕐᒧᑦ ᖃᓂᒪᓇᖅᑐᖅ COVID-19 ᓄᓇᕗᒥᐅᓕᒫᓄᑦ.

ᕿᑭᖅᑕᓂᒃᑯᑦ ᐱᓕᕆᖃᑎᓖᑦ ᐃᓚᒌᓂᑦ ᒫᓐᓇ ᐊᐅᓪᓚᕐᓯᒪᔪᓂᑦ ᐃᓚᐃᖅᑐᓄᑦ ᐃᑲᔫᑎᑎᒍᑦ ᖃᐅᔨᒪᑦᑎᐊᕈᒪᓪᓗᑎᒃ ᐃᑲᔪᖅᑕᐅᑦᑎᐊᕋᓗᐊᕐᒪᖔᑕ. ᓈᒻᒪᑉᐸᑦ ᕿᑭᖅᑕᓂᒃᑯᑦ ᐃᑲᔪᕐᓂᐊᖅᑐᑦ ᐃᓄᓐᓂᑦ ᐊᖏᕐᕋᐅᑦᑎᐊᖁᓪᓗᒋᑦ ᐊᑦᑕᓇᙱᑐᒃᑰᕐᓗᑎᒃ.

ᑭᓇᑐᐃᓐᓇᖅ ᐅᑎᖅᑐᖅ ᓄᓇᕗᒻᒧᑦ ᑎᓕᐅᖅᑕᐅᕗᖅ ᐃᓄᓕᒫᓄᑦ ᐋᓐᓂᐊᖅᑐᓕᕆᔨᒃᑯᓐᓂᑦ ᐊᓂᑦᑕᐃᓕᑲᐃᓐᓇᖁᓪᓗᒋᑦ ᐅᓪᓗᓂᑦ 14ᓂᑦ ᐊᒻᒪᓗ ᓇᒻᒥᓂᖅ−ᐅᔾᔨᓱᑦᑎᐊᕐᓗᑎᒃ ᖃᓄᐃᒍᑕᐅᕙᑦᑐᓂᑦ ᐊᑐᓯᕙᓪᓕᐊᖏᒃᑲᓗᐊᕐᒪᖔᑕ ᐳᕝᕕᕆᓂᕐᒧᑦ ᖃᓂᒪᓇᖅᑐᒧᑦ COVID-19 ᐱᐅᓯᕆᔭᐅᕙᑦᑐᓂᑦ ᓲᕐᓗ ᐆᓇᖅᑐᐊᓘᓂᕐᒥᒃ, ᖁᐃᕐᓱᑲᑕᓂᕐᒥᒃ ᐅᕝᕙᓘᓐᓃᑦ ᐃᐱᓂᐊᕐᓂᕐᒥᒃ ᐊᓂᖅᑎᕆᑦᑎᐊᖏᓐᓂᕐᒥᒃ.

ᐃᓚᒌᑦ ᐊᒻᒪᓗ ᑕᐃᒃᑯᐊ ᐃᓪᓗᒥᐅᖃᑎᒋᔭᐅᔪᑦ ᐊᓂᑦᑕᐃᓕᔪᓄᑦ, ᑭᓯᐊᓂ ᐊᐅᓪᓚᖃᑕᐅᓯᒪᙱᑦᑐᓄᑦ ᓇᒻᒥᓂᖅ−ᐅᔾᔨᓱᑦᑎᐊᕆᐊᖃᕐᒥᔪᑦ, ᓇᒧᙵᕆᐊᖃᓪᓚᕆᙱᑐᐊᖅᑲᑕ ᐊᓂᖃᑦᑕᖁᔭᐅᒐᑎᒃ ᐊᒻᒪᓗ ᖃᓂᔅᓴᓗᐊᖁᔭᐅᒐᑎᒃ ᐃᓅᖃᑎᖏᓐᓂᒃ. ᐃᒫᒃ ᑐᑭᓕᒃ ᐅᖓᓯᒌᓐᓂᖃᖃᑦᑕᕐᓗᑎᒃ 2 ᒦᑕᓂᒃ ᐆᑦᑑᑎᑎᒍᑦ ᑕᐃᒫᒃ ᐅᖓᓯᑦᑎᒋᔪᒥᒃ ᐃᓅᖃᑎᖏᓐᓂᒃ, ᐊᑦᑐᖃᑦᑕᐅᑎᑦᑕᐃᓕᓗᑎᒃ ᐊᒻᒪᓗ ᐅᐊᓴᕐᔫᒥᔭᒐᓪᓗᒋᑦ ᐊᒡᒐᓯ.

ᐅᓪᓗᒥᒧᑦ ᑎᑭᑦᑐᒍ, ᑐᓴᕐᓯᒪᙱᒃᑲᓗᐊᖅᑐᒍᑦ ᐳᕝᕕᕆᓂᕐᒧᑦ ᖃᓂᒪᓇᖅᑐᒥᒃ COVID-19 ᑕᐃᒫᒃ ᖃᓂᒪᔪᖃᕐᒪᖔᖅ ᓄᓇᑦᑎᓐᓂ, ᑭᓯᐊᓂᓕ ᓄᓇᕗᒥ ᐋᓐᓂᐊᖅᑐᓕᕆᔩᑦ ᖃᐅᔨᒪᑦᑎᐊᖁᔨᔪᑦ ᖃᓂᒪᓇᖅᑐᖅ ᑎᑭᐅᑎᑉᐸᑦ ᓄᓇᑦᑎᓐᓄᑦ ᐱᔭᕆᐊᑐᔪᐊᓘᙳᓱᒻᒪᑦ ᐊᑑᑎᓂᖓ ᓄᓇᓕᓐᓄᑦ ᐊᒻᒪᓗ ᐅᖁᒪᐃᓪᓕᐅᕈᑕᐅᓪᓚᕆᓪᓗᓂ ᐋᓐᓂᐊᖅᑐᓕᕆᕙᑦᑐᓄᑦ, ᒫᓐᓇ ᐊᒥᒐᕐᓯᓪᓚᕆᖃᑦᑕᑎᓪᓗᒋᑦ.

ᐊᐅᓪᓚᕆᐊᖃᖅᑎᑎᙱᑲᐃᓐᓇᕐᓂᖅ ᐊᑑᑎᖃᓪᓚᕆᙳᓱᒻᒪᑦ ᐊᓐᓇᐅᒪᑎᑦᑎᓂᕐᒥᒃ ᐃᓄᐃᑦ ᐃᓅᓯᖏᓐᓂᒃ ᐊᒻᒪᓗ ᓴᐳᔾᔨᓂᕐᒥᒃ ᕿᑭᖅᑕᓂ ᓄᓇᓕᖏᓐᓂᒃ.

ᖃᓄᐃᓐᓂᐅᔪᑦ ᓱᒃᑲᓕᔪᐊᓗᒻᒥᒃ ᐊᓯᔾᔨᐸᓪᓕᐊᓂᖏᓐᓄᑦ, ᕿᑭᖅᑕᓂᒃᑯᑦ ᑕᒪᑐᒥᖓ ᑲᒪᒋᔭᖃᒃᑲᓐᓂᖃᑦᑕᓂᐊᕐᖓᑕ ᐊᒻᒪᓗ ᖃᐅᔨᓴᒃᑲᓐᓂᖃᑦᑕᕐᓗᑎᒃ ᑐᑭᑖᕈᑕᐅᔪᓂᑦ ᐱᔾᔪᑎᒋᓪᓗᒋᑦ ᐊᐅᓚᓃᑦ ᐊᒻᒪᓗ ᐱᓕᕆᐊᕐᒥ ᐱᔨᑦᑎᕋᐅᑕᐅᕙᑦᑐᑦ ᖃᐅᔨᓴᕐᔫᒥᔭᒐᐃᓐᓇᕐᓗᑎᒃ ᐃᑲᔪᕈᒪᓪᓗᑎᒃ ᐃᑲᔪᖅᑕᐅᔾᔪᑎᒋᒋᐊᓕᖏᓐᓂᒃ ᕿᑭᖅᑕᓂ ᓄᓇᓖᑦ ᐃᓄᐃᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᓯᐅᕋHᐃ

ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᓂᕐᒧᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

867.975.8413

1.800.667.2742