ᐅᓪᓗᖅ ᓴᖅᑭᖅᑕᐅᕕᖓ: ᒪᐃ 5, 2021
ᐱᔾᔪᑕᐅᔪᖅ: ᕿᑭᖅᑕᓂᒃᑯᓐᓂᑦ ᐃᓱᒫᓗᓇᕐᓯᓯᒪᑎᓪᓗᒍ ᓂᕿᑖᕈᑎᔅᓴᐃᑦ ᐃᓄᑐᖃᕐᓄᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐱᓇᓱᐊᕈᑎᖏᑦ ᐃᑲᔪᕈᒪᓪᓗᑎᒃ ᐃᓄᑐᖃᕐᓂᑦ ᐊᑑᑎᕕᐅᔪᓂᑦ ᓄᕙᕐᔪᐊᓇᖅᑐᒧᑦ ᖃᓂᒪᓇᖅᑐᒧᑦ ᓄᓇᕐᔪᐊᓕᒫᒥ ᐃᑲᔫᑕᐅᒃᑲᓂᕐᓂᐊᓕᕐᒥᒻᒪᑕ ᖁᔭᓐᓇᒦᖅᑲᕗᑦ ᑮᓇᐅᔭᐃᑦ ᑐᓂᔭᐅᒃᑲᓂᕐᓯᒪᓕᕐᒥᔪᑦ ᑖᒃᑯᓇᙵᑦ ᓄᓇᖃᖅᑐᑐᖃᐃᑦ ᓄᓇᓕᖏᓐᓄᑦ ᐃᑲᔫᑎᓂᑦ ᑮᓇᐅᔭᓂᑦ.

ᐃᓱᒫᓗᓇᕐᓯᓯᒪᑎᓪᓗᒍ ᓂᕿᑖᕈᑎᔅᓴᐃᑦ ᐃᓄᑐᖃᕐᓄᑦ ᒫᓐᓇ ᐱᔭᔅᓴᐅᓂᐊᓕᕐᒥᔪᑦ ᐱᒋᐊᕐᓗᑎᒃ ᒪᐃ 11ᒥ ᔫᓂ 22ᒧᑦ. ᑖᒃᑯᐊ ᐱᓇᓱᐊᕈᑕᐅᔪᑦ ᐃᑲᔫᑕᐅᖃᑦᑕᕐᒥᔪᑦ ᕿᑭᖅᑕᓂᒥᐅᑕᔅᓴᔭᓄᑦ ᐃᓄᓐᓄᑦ ᐅᑭᐅᓕᓐᓄᑦ 60ᓂᑦ ᐅᖓᑖᓂᓗ ᓄᓇᕗᑦ ᓯᓚᑖᓂᒥᐅᓄᑦ.

ᑖᒃᑯᐊ ᐱᓇᓱᐊᕈᑏᑦ ᐋᖅᑭᓱᖅᑕᐅᓯᒪᔪᑦ ᕿᓚᒻᒥᐅᔪᒥᒃ ᑮᓇᐅᔭᓂᑦ ᐃᑲᔫᑎᖃᖁᓪᓗᒋᑦ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᐃᓄᑐᖃᕐᓄᑦ ᓄᕙᕐᔪᐊᓇᖅᑐᖅᑕᖃᕐᓂᖓᓂ ᓄᓇᕐᔪᐊᓕᒫᒥ.

ᕿᑭᖅᑕᓂᒃᑯᑦ ᐃᑲᔫᑎᓖᑦ ᑖᒃᑯᓂᖓ ᐃᑲᔫᑎᓂᑦ ᐊᖅᑯᑎᒋᓪᓗᒋᑦ ᐅᑭᐅᖅᑕᖅᑐᒥ ᐃᓚᒌᔅᓴᒃᑯᑦ ᑯᐊᐸᒃᑯᖏᑦ ᓄᓇᔅᓯᓐᓂ. ᐃᖃᓗᓐᓂ, ᑖᒃᑯᐊ ᐃᑲᔫᑏᑦ ᐃᑲᔫᑕᐅᕙᑦᑐᑦ ᐊᖅᑯᑎᒋᓪᓗᒍ ᐅᑭᐅᖅᑕᖅᑐᒥ ᓂᐅᕕᕋᓚᒡᕕᒃ. ᑲᖏᖅᑐᒑᐱᒻᒥ, ᑖᒃᑯᐊ ᐃᑲᔫᑏᑦ ᑲᒪᒋᔭᐅᕙᑦᑐᑦ ᐃᓕᓴᖅᓯᕕᒃᑯᑎᒍᑦ ᐊᒻᒪᓗ ᐸᔪᑦᑎᕆᖃᑦᑕᓂᐊᖅᑐᑎᒃ ᓂᕿᓂᑦ ᑲᑎᑕᐅᓯᒪᔪᓂᑦ ᐃᑲᔫᓯᐊᖅᑖᕈᓐᓇᖅᑐᓄᑦ ᐃᓄᑐᖃᕐᓄᑦ.

ᐃᒫᒃ ᐋᖅᑭᓯᒪᔪᑦ ᑖᒃᑯᐊ:

• ᑖᒃᑯᐊ ᐃᑲᔫᑏᑦ ᐊᑐᖅᑐᒋᑦ, ᕿᑭᖅᑕᓂ ᓄᓇᓖᑦ ᐃᓄᐃᑦ ᐃᓄᑐᖃᐃᑦ ᐃᓅᓪᓗᑎᒃ 60ᓂᑦ ᐅᑭᐅᓖᑦ ᐅᖓᑖᓂᓗ, ᕿᑭᖅᑕᓂ ᓄᓇᓕᓐᓃᑦᑐᑦ, ᐊᒻᒪᓗ ᐊᑎᓕᐅᖅᑕᐅᓯᒪᔪᑦ ᓄᓇᕗᑦ ᑐᙵᕕᒃᑯᑦ ᑎᒥᖓᑎᒍᑦ
• ᐊᑐᓂᑦ ᓂᐅᕕᐅᑎᔅᓴᐃᑦ ᐊᑭᓖᑦ $250
• ᓂᐅᕕᐅᑎᔅᓴᖅᑖᖃᑦᑕᓂᐊᖅᑐᓯ ᓂᕿᑖᕈᑎᔅᓴᓂᑦ
• ᐊᑐᓂᑦ ᕿᑭᖅᑕᓂᒥᐅᑕᐃᑦ ᐃᓄᑐᖃᐃᑦ ᐃᑲᔫᓯᐊᖅᑖᖃᑦᑕᕈᓐᓇᓂᐊᖅᑐᑦ ᑎᓴᒪᓂᑦ ᓂᐅᕕᐅᑎᔅᓂᑦ ᑲᑎᓕᒫᕐᓗᒋᑦ ᐊᒥᓲᓂᓖᑦ $1,000
• ᑯᐊᐸᒃᑯᑦ ᓂᐅᕕᕐᕕᖓᓅᕈᓐᓇᖅᑐᓯ ᓄᓇᔅᓯᓐᓂ ᐊᐃᔅᓯᖃᑦᑕᕐᓗᓯ ᓂᕿᑖᕈᑎᔅᓴᓂᑦ
• ᓂᐅᕕᐅᑎᔅᓴᐃᑦ ᐊᐃᔭᐅᖃᑦᑕᕈᓐᓇᓂᐊᖅᑐᑦ ᐅᑯᓇᓂ ᐅᓪᓗᓂᑦ:
• ᒪᐃ 11
• ᒪᐃ 25
• ᔫᓂ 8
• ᔫᓂ 22

ᓄᓇᓕᓐᓂᑦ ᖃᓂᒪᓇᖅᑐᒧᑦ ᖃᓂᒪᔪᖅᑕᓕᓐᓂᑦ (ᐃᖃᓗᓐᓂ ᑭᙵᕐᓂᓗ)

ᕿᑭᖅᑕᓂᒃᑯᑦ ᐱᓕᕆᖃᑎᖃᖃᑦᑕᓂᐊᖅᑐᑦ ᓂᐅᕕᕐᕕᓐᓂᑦ ᖃᐅᔨᒪᒋᐊᑦᑎᐊᕐᓗᑎᒃ ᑐᓂᓯᐅᖅᑲᐃᖃᑦᑕᕋᓗᐊᕐᒪᖔᑕ ᓂᕿᑖᕈᑎᔅᓴᓂᑦ ᓴᐳᔾᔨᓗᑎᒃ ᑕᒪᒃᑮᓐᓂᒃ ᐃᓄᑐᖃᕐᓂᑦ ᐃᖅᑲᓇᐃᔭᖅᑎᓂᓪᓗ ᐊᒻᒪᓗ ᒪᓕᒃᑲᓗᐊᕐᒪᖔᑕ ᒪᓕᑦᑕᐅᖁᓯᒪᔭᖏᓐᓂᒃ ᐊᖏᔪᖅᑳᖓᑕ ᐃᓄᓕᒫᓄᑦ ᐋᓐᓂᐊᖅᑐᓕᕆᔨᒃᑯᑦ. ᖃᓄᐃᓕᖓᓂᐊᕐᒪᖔᑕ ᑐᓴᖅᑎᑦᑎᒍᑕᐅᓛᕐᒥᔪᑦ ᐃᓄᓕᒫᓄᑦ ᑐᓴᕋᔅᓴᑎᒍᑦ ᑕᒫᓂ ᐱᓇᓱᐊᕈᓯᕐᒥ.

ᐊᒻᒪᓗᑦᑕᐅᖅ, ᕿᑭᖅᑕᓂᒃᑯᑦ ᐃᑲᔫᓯᐊᔅᓴᖃᖅᑎᑎᒃᑲᓐᓂᓛᕐᒥᔪᑦ ᐃᓱᒫᓗᓇᕐᓯᓯᒪᑎᓪᓗᒍ ᐊᐅᓪᓚᕐᓯᒪᓂᕐᒧᑦ ᐃᑲᔫᑎᓂᑦ ᐃᑲᔪᕈᒪᓪᓗᒋᑦ ᕿᑭᖅᑕᓂ ᓄᓇᓖᑦ ᐃᓄᐃᑦ ᐊᑑᑎᕕᐅᔪᓂᑦ ᓄᓇᓕᓐᓂᑦ ᐃᓄᓕᓐᓃᕋᔭᙱᑲᐃᓐᓇᓂᐊᕐᖓᑕ ᐃᓚᖏᓐᓂᒃ ᐊᐅᓪᓚᕐᓯᒪᖃᑎᖃᕐᓗᑎᒃ. ᖃᓄᐃᓕᖓᓂᐊᕐᒪᖔᑕ ᑖᒃᑯᐊ ᐃᑲᔫᑏᑦ ᑐᓴᖅᑎᑦᑎᒍᒫᕐᓂᐊᖅᑐᑦ ᒫᓐᓇᑦᑎᐊᕈᓗᒃ.

ᕿᑭᖅᑕᓂ ᓄᓇᓖᑦ ᐃᓄᐃᑦ ᐅᑭᐅᓖᑦ 60ᓂᑦ ᐅᖓᑖᓂᓗ ᓄᓇᓖᑦ ᓄᓇᕗᑦ ᓯᓚᑖᓂ ᐃᑲᔫᓯᐊᖅᑖᖃᑦᑕᓛᖅᑐᑦ ᐊᑕᐅᓯᐊᕐᓗᑎᒃ ᐊᑭᓕᖅᑕᐅᓗᑎᒃ $500ᓂᑦ ᓯᒃᑭᐅᓗᒍ ᑎᑎᖅᑲᓂᐊᕐᕕᒃᑯᑦ ᐊᐅᓪᓚᖅᑎᑕᐅᓛᖅᑐᑦ ᒪᐃ−ᕿᑎᖏᓐᓂ.

ᐃᓘᓐᓇᑎᒃ ᕿᑭᖅᑕᓂ ᓄᓇᓖᑦ ᐃᓄᑐᖃᐃᑦ, ᐊᑎᓕᐅᖅᑕᐅᓯᒪᔪᑦ ᓄᓇᕗᑦ ᑐᙵᕕᒃᑯᑎᒍᑦ, ᐃᑲᔫᓯᐊᖅᑖᖃᑦᑕᕈᓐᓇᓂᐊᖅᑐᑦ ᐊᑎᓕᐅᖅᑕᐅᓯᒪᒌᕐᖓᑕ.

ᑖᒃᑯᐊ ᐃᓱᒫᓗᓇᕐᓯᓯᒪᑎᓪᓗᒍ ᐃᑲᔫᑏᑦ ᑐᕌᖓᔪᖅ ᕿᑭᖅᑕᓂ ᓄᓇᓕᓐᓄᑦ ᐃᓄᓐᓄᑦ ᐅᑭᐅᓕᓐᓄᑦ 60ᓂᑦ ᐅᖓᑖᓂᓗ 60ᓂᑦ ᐅᑭᐅᖃᓕᕐᓯᒪᔪᓄᑦ ᔫᓂ 30, 2021ᒥ.

ᕿᑭᖅᑕᓂᒃᑯᑦ ᐅᖃᐅᔾᔨᓯᒪᔪᑦ ᓂᐅᕕᕐᕕᓐᓂᑦ ᐊᒻᒪᓗ ᐃᓕᓴᖅᓯᕕᒃᑯᓐᓂᑦ ᑐᓂᓯᐅᖅᑲᐃᖃᑦᑕᖁᔨᒐᑎᒃ ᓂᕿᑖᕈᑎᔅᓴᓂᑦ ᐅᕝᕙᓘᓐᓂᑦ ᓂᕿᓂᑦ ᐸᔪᑦᑎᕆᒍᑕᐅᓛᖅᑐᓂᑦ ᐊᑎᓕᐅᖅᑕᐅᓯᒪᙱᑦᑐᓄᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ ᑖᒃᑯᐊ ᐃᑲᔫᑏᑦ ᒥᔅᓵᓄᑦ, ᑎᑎᕋᕈᓐᓇᖅᑐᓯ ᐃᕐᖐᓈᖅᑕᐅᑎᒃᑯᑦ ᐅᕗᖓ: COVID-19@qia.ca ᐅᖄᓚᓗᓯᓘᓐᓃᑦ ᐅᕗᖓ: 1-867-975-8383.

ᑐᑭᓯᒋᐊᖃᑦᑕᕈᓐᓇᖅᑐᓯ ᕿᑭᖅᑕᓂᒃᑯᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖓᓐᓄᑦ ᐅᕗᖓ qia.ca ᑐᑭᓯᑦᑎᐊᕐᓂᐊᕋᔅᓯ ᐊᒻᒪᓗ ᖃᐅᑕᒫᑦ ᓴᖅᑭᖅᑕᐅᕙᑦᑐᑦ ᒥᔅᓵᓅᖓᔪᓂᑦ.

ᒫᓐᓇᓕᓴᐅᓂᕐᐹᓂᑦ ᑐᓴᕋᔅᓴᓂᑦ ᐊᒻᒪᓗ ᑐᑭᓯᑎᑦᑎᒋᐊᕈᑎᓂᑦ ᖃᐅᔨᒋᐊᖃᑦᑕᕈᓐᓇᕐᒥᔪᓯ ᐅᕙᙵᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᖏᓐᓂᑦ ᕿᑭᖅᑕᓂᒃᑯᑦ Facebook, Twitter ᐊᒻᒪᓗ Instagram.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ ᑖᓐᓇ:

ᐅᐃᓪ Hᐊᑉᑭᓐᔅ, ᑭᖑᕝᕕᐅᑎᓯᒪᑲᐃᓐᓇᖅᑐᖅ ᑐᑭᒧᐊᑦᑎᑦᑎᔨᒧᑦ ᑐᓴᐅᒪᖃᑦᑕᐅᑎᓂᕐᒧᑦ
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ
whopkins@qia.ca
867.975.8413 ᐅᕝᕙᓘᓐᓃᑦ
1.800.667.2742