ᓇᐅᑦᑎᖅᓱᖅᑎᒃᑯᑦ ᐃᓕᓐᓂᐊᖅᑎᓪᓗᒋᑦ, ᒥᒃ ᐊᒻᒪ ᑖᒪᓯᓗ ᓴᓂᑭᓗᐊᕐᒥᐅᑖᒃ ᐃᓄᐃᑦ ᐱᐅᓯᕆᕙᒃᑕᖏᑕ ᒥᒃᓵᓄᑦ ᐃᓕᓐᓂᐊᖅᑎᑦᑎᓚᐅᖅᑐᑦ. ᓇᐅᑦᑎᖅᓱᖅᑎᒃᑯᓐᓂ ᐊᒻᒪᓗ ᖃᐅᓱᐃᑦᑐᕐᒥᐅᓂᒃ ᐃᓕᓐᓂᐊᖅᑎᑦᑎᓚᐅᖅᑐᑦ ᖃᓄᖅ ᐃᓯᖅᑎᖅᓯᒪᔪᓂᒃ ᐅᓲᔭᓕᐅᕈᓐᓇᕐᒪᖔᑖᒃ ᓴᓂᑭᓗᐊᕐᒥ ᑖᒃᑯᐊᓗ ᐊᒃᓱᐊᓗ ᒪᒪᕆᔭᐅᓪᓗᑎᒃ − ᒪᒃᑖᖅ ᐃᓗᐊᓅᕐᓗᒋᑦ ᕿᓚᓗᒐᐅᑉ ᐃᓇᓗᖏᓐᓄᑦ, ᐆᔪᓕᐅᖅᑕᐅᓪᓗᑎᒃ ᐃᑲᕐᕋᓪᓗᐊᒥᒃ, ᐊᒻᒪᓗ ᐃᓯᖅᑎᖅᑕᐅᓪᓗᑎᒃ ᐃᓯᖅᑎᕈᑎᒃᑯᑦ ᐅᕝᕙᓘᓐᓃᑦ ᐃᓯᖅᑎᑕᐅᔪᓐᓇᖅᖢᑎᒃ ᕿᔪᑐᖃᕐᓂᒃ ᐊᑐᕐᓗᑎᑦ.  ᓂᕆᔭᐅᔪᓐᓇᖅᑐᑦ ᒪᙳᖅᓯᒪᓗᑎᒃ ᖁᐊᓯᒪᓗᑎᓪᓘᓐᓃᑦ − ᐊᔾᔨᒌᙱᑦᑐᓂᒃ ᐱᑕᖃᕐᒪᑦ ᓴᓇᔭᐅᔪᓐᓇᕐᓂᖏᓐᓄᑦ. ᐃᓇᓪᓗᑦ ᒪᒃᑖᑐᐃᓐᓇᕐᓂ ᐃᓗᓪᓕᕐᓗᒋᑦ ᐅᕝᕙᓘᓐᓃᑦ ᐅᖅᓱᒐᓛᖕᒥ ᐃᓚᓯᓗᑎᑦ.  ᓴᓇᓗᒋᑦ ᐃᕝᕕᑦ ᒪᒪᕆᔭᖓᓂᑦ.

ᐃᓯᖅᑎᖅᓯᒪᔪᓂᒃ ᐃᓇᓪᓗᓕᐅᕐᓂᖅ ᓴᓂᑭᓗᐊᕐᒥᐅᓄᑦ ᓴᓇᔭᐅᒐᔪᑦᑐᖅ, ᑕᒫᓂᓕ ᕿᑭᖅᑖᓗᖕᒥ ᖃᓄᖅ ᓴᓇᔭᐅᕙᖕᓂᖏᑦ ᖃᐅᔨᒪᙱᑐᐃᓐᓇᕆᐊᓖᑦ.  ᓴᓂᑭᓗᐊᖅ ᓄᓇᓕᖕᒪᑦ ᐅᖓᓯᒃᑑᓪᓗᓂ ᐊᓯᖏᓐᓂᑦ ᓄᓇᓕᖕᓂᑦ ᓄᓇᕗᒥ.  ᑭᓯᐊᓂ ᑖᒃᑯᐊ ᑲᑎᖃᑦᑕᖅᑎᓪᓗᒋᑦ  ᐊᒻᒪᓗ ᓇᐅᑦᑎᖅᓱᖅᑎᖃᓕᖅᑎᓪᓗᒍ ᐃᑲᔪᖅᑐᒻᒪᕆᐅᕗᑦ ᐱᑕᖃᙱᑦᑐᒥᒃ, ᐅᔾᔨᖅᓱᓕᖅᑎᑦᑎᓪᓗᑎᒃ ᐊᒻᒪᓗ ᐃᓅᖃᑎᒋᔭᒥᓂᓗ ᐃᓅᖃᑎᖃᑦᑎᐊᖅᖢᑎᒃ..

ᐊᒃᓱᐊᓗᒃ ᑕᐅᑐᒍᒥᓇᓚᐅᖅᑐᖅ ᐱᐅᓯᐅᔪᒥᒃ ᑐᓂᓯᓯᓂᕐᒥᒃ ᖃᐅᔨᒪᔭᑐᖃᐅᔪᒥᒃ ᐊᔾᔨᒌᙱᑦᑐᓄᑦ ᐃᓄᖕᓄᑦ ᕿᑭᖅᑖᓗᖕᒥ.  ᐊᒥᓲᑎᓪᓗᒋᑦ ᑲᑎᒪᖃᑕᐅᔪᑦ ᓄᓇᓕᖕᓂᙶᖅᑐᓂᑦ ᕿᑭᖅᑖᓗᖕᒥ, ᑕᒪᓐᓇ ᐃᓇᓪᓗᐅᖃᑦᑕᕐᓂᖅ  ᓴᓇᖃᑦᑕᕐᓂᐊᖅᑐᒃᓴᐅᓕᖅᑐᑦ.  ᖁᔭᓐᓇᒦᒃ ᐃᓕᓐᓂᐊᖅᑎᑦᑎᓚᐅᕋᔅᓯ ᒥᒃ ᑖᒪᓯᓗ “ᑖᒧ”.  ᖁᔭᓐᓇᒦᒡᓗ ᖃᐅᓱᐃᑦᑐᕐᒥᐅᑦ ᑐᙵᓴᐃᓚᐅᕐᓂᖏᓐᓄ!

ᓴᓂᑭᓗᐊᑉ ᒥᒃᓵᓄᑦ ᖃᐅᔨᒪᔾᔪᑎᑦ:

– ᓴᓂᑭᓗᐊᖅ ᐊᖏᕐᕋᕆᔭᐅᔪᖅ ᐳᑭᓕᖕᓂᑦ ᑎᑭᑕᐅᓯᒪᔪᓂᑦ ᑐᒃᑑᔮᖅᑐᕐᒥᑦ, ᑕᐃᑯᙵᖅᑕᐅᓪᓗᑎᒃ ᓴᓂᑭᓗᐊᑉ ᕿᑭᖅᑕᖏᓐᓄᑦ 1978ᒥ.

– ᓴᓂᑭᓗᐊᖅ ᐃᓘᓐᓇᑲᓴᖓ ᐃᓄᐃᑦ ᓄᓇᖁᑎᖓᓃᑦᑐᖅ, ᓄᓇᐅᑉᓗ ᐃᑭᐊᖓᓂ ᐱᔪᓐᓇᐅᑎᖃᖅᑐᑦ.  ᐃᓄᐃᑦ ᓄᓇᖁᑎᖏᓐᓂᒃ ᑐᑭᓯᒋᐊᓚᐅᖅᓯᒪᔪᑦ ᐊᒻᒪᓗ ᑖᒃᑯᐊ ᓯᕗᓪᓕᖅᐹᒃᑯᑦ ᓄᓇᓂᒃ ᓂᕈᐊᖅᖠᖅᐸᓪᓕᐊᑎᓪᓗᒋᑦ ᓂᕈᐊᖅᑎᐅᓚᐅᖅᑐᑦ ᓇᓗᓇᐃᖅᓯᒪᔪᖅ ᑖᒃᑯᐊ ᓄᓇᑦ ᓂᕈᐊᖅᑕᐅᓯᒪᔪᑦ ᐱᔾᔪᑎᒋᔭᐅᓪᓗᐊᑕᖅᖢᓂ ᓴᐳᔾᔨᓂᕐᒧᑦ.

-ᓴᓂᑭᓗᐊᖅ ᖃᐅᔨᒪᔭᐅᑦᑎᐊᖅᑐᖅ ᒥᑦᑎᖃᕐᓂᖏᓐᓂᒃ ᐊᒻᒪᓗ ᖁᓂᒍᓂᒃ ᐊᓐᓄᕌᓕᐅᖃᑦᑕᕐᓂᖏᓐᓄᑦ.  ᑖᒃᑯᐊ ᒥᑦᑏᑦ ᐊᕐᕌᒍᓕᒫᑦ ᓴᓂᑭᓗᐊᕐᒦᖃᑦᑕᖅᑐᑦ.