ᕿᑭᕐᒃᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓇᐃᑦᑐᓐᓂᒃ ᐅᓂᒃᑳᓕᐅᑲᑕᒃᒪᑕ ᐃᓄᖕᓂᒃ ᐊᔪᖏᓂᖏᓂᒃ ᐊᒻᒪᓗ ᐱᒃᑲᐅᓂᖏᓂᒃ.

ᑕᕝᕙ ᑎᐅᕆ ᓄᐊ, ᓇᖕᒥᓂᓕᒃ ᐊᐅᓚᑦᑎᔨ ᐊᐅᓱᐃᑐᕐᒃ ᖃᓄᐃᓕᐅᕐᑎᑦᑎᓂᕐᒃ ᐊᐅᓱᐃᑐᕐᒃᒥ.

ᑎᐅᕆ ᐱᒋᐊᕐᑎᑦᑎᓚᐅᕐᓯᒪᔪᕐ ᓇᖕᒥᓂᕆᔭᕐᒥᓂᒃ ᐅᔾᔨᕆᓕᕋᒥ ᐊᒥᓱᑦ ᓂᕿᓪᓚᑖᕐᑐᕈᒪᕙᒃᑐᑦ ᓄᓇᕗᑦᒥ ᖃᕋᓴᐅᔭᑎᒍᑦ ᑕᑯᕙᒃᓱᓂᒋᑦ. ᐱᓪᓗᐊᕐᑐᒥᒃ ᓇᖕᒥᓂᕐᒃ ᐊᖑᓇᓱᒍᓐᓇᖏᑐᑦ ᐋᓐᓂᐊᕐᓂᒧᑦ, ᐃᓚᒥᓂᒃᓘᓃᑦ ᐱᔾᔪᑎᖃᕐᓱᑎᒃ ᐅᕙᓘᓃᑦ ᐊᖑᓇᓱᒍᑎᖃᖏᑐᑦ.

ᑎᐅᕆ ᐃᓱᒪᒃᓴᕐᓯᐅᓕᓚᐅᕐᑐᕐᒃ ᖃᓄᕐᒃ ᓂᐅᕕᕐᒃᑕᐅᔪᓇᕐᑐᓂᒃ, ᓴᓗᒪᔪᓂᒃ ᐊᒪᓗ ᐴᖃᕐᒃᑎᐊᕐᓯᒪᔪᓂᒃ ᓂᕿᓚᑖᓂᒃ ᐊᐅᓪᓚᕐᑎᑕᐅᔪᓇᕐᓗᑎᒃ ᖃᖓᑕᓲᑯᑦ ᐃᓄᒃᓄᑦ ᓄᑖᕕᓂᕐᑐᕈᒪᔪᓄᑦ.

ᐆᒪᔪᕐᓂᐊᕐᑎᒃᑯᓐᓄᑦ ᑲᒪᔨᐅᑎᑦᓗᓂ, ᑕᑯᕙᓚᐅᕐᓯᒪᒃᒪᑦ ᐊᒥᓱᓂᒃ ᑐᒃᓯᕋᕐᑐᓂᒃ ᐳᓚᕋᕐᑎᓂᒃ ᐊᐅᓪᓚᕐᑎᑦᑎᔨᒃᓴᒥᒃ ᕿᓂᕐᒃᑐᓂᒃ, ᐊᐅᓪᓚᕆᐊᕐᑐᕈᒪᔪᓂᒃᓗ ᐊᒻᒪᓗ ᖃᐅᔨᓴᕐᑎᓂᒃ. ᑭᓯᐊᓂᓕ ᓄᓇᓕᖓᓐᓂ ᐊᐅᓱᐃᑦᑐᕐᒃᒥ ᐱᑕᖃᓚᐅᖏᒻᒪᑦ  ᐊᐅᓪᓚᕐᑎᑦᑎᔨᐅᔪᓇᕐᑐᓂᒃ.

ᑕᒪᑯᐊ  ᐅᔾᔨᕆᓕᕋᒥᒋᑦ ᓂᕿᓪᓚᑖᕐᑐᕈᒪᕙᒃᑐᑦ ᐊᒪᓗ ᐊᐅᓚᕐᑎᑦᑎᔨᑕᖃᕆᐊᖃᓂᖓᓂᒃ, ᐱᓐᓇᓱᓕᓚᐅᕐᐳᕐᒃ ᐃᖃᓇᐃᔮᒥᓂᒃ ᕿᒪᐃᓪᓗᓂ ᓇᖕᒥᓂᕐᒃᑖᕋᓱᐊᓕᕐᓱᓂᓗ.

ᑎᐅᕆ ᐊᐅᓪᓚᕐᓯᒪᔪᒻᒪᐅᒪᑦ ᐊᒻᒪᓗ ᐊᒡᓚᕕᒃᒦᖏᓇᐅᔮᓗᒍᓇᕋᓂ − ᐊᑲᐅᓈᕈᑎᓕᓚᐅᕐᐳᕐᒃ ᑕᒪᑮᒃᓂ!

ᐊᐅᓱᐃᑐᕐᒃ ᖃᓄᐃᓕᐅᕐᑎᑦᑎᓂᕐᒃ ᐱᒋᐊᕐᑎᓕᓚᐅᕐᑕᖓ 2019ᖑᑎᑦᓗᒍ ᐊᒪ ᑕᐃᒪᖓᓂᑦ ᑲᔪᓰᓇᓕᕐᓱᓂ.

ᐱᒋᐊᓕᓵᕐᑎᑦᓗᓂ, ᐊᒃᓱᕈᓐᓇᕐᓂᕐᐹᕆᓚᐅᕐᑕᖓ ᐱᓕᕇᓇᐅᔭᕆᐊᖃᓕᕐᓂᖓ ᓇᖕᒥᓂᕆᓕᕐᑕᖓ, ᐊᒪᓗ ᑮᓇᐅᔭᕐᓂᕐᒃ ᓇᖕᒥᓂᕐᒥᓂᒃ ᐊᑐᕐᐸᒃᓱᓂ ᓇᒥᓂᖃᕐᒃᐸᓕᐊᓇᓱᓕᕐᑎᓗᒍ ᐊᑲᐅᓐᓂᐊᕐᑐᒥᒃ. ᑮᓇᐅᔭᓕᐅᑦᑎᐊᕋᓂ ᑭᓯᐊᓂ ᓂᕆᐅᖕᓂᖓ ᐊᖏᔫᓚᐅᕐᑐᕐᒃ.

ᐊᒻᒪᓗ ᓄᕙᒃᓇᔪᐊᕐᓇᕐᒃ ᐱᒋᐊᕐᒃᐸᓪᓕᐊᓕᓚᐅᕐᓯᒪᒃᒪᑦ 2019ᖑᑎᑦᓗᒍ, ᑕᒪᓐᓇ ᐊᒃᑐᐃᓂᖃᓚᐅᕐᑐᕐᒃ ᐊᐅᓪᓚᕐᒃᑎᒐᒃᓴᑦ ᐱᑕᖃᕐᒃᓇᑎᒃ ᐅᕙᓘᓃᑦ ᐊᒥᓲᖏᑐᑯᓪᓘᓗᑎᒃ.

ᐅᓪᓗᒥᒧᑦ ᑎᑭᑦᓱᒍ, ᓂᕿᓪᓚᑖᑦ ᓂᐅᕕᕐᒃᑕᐅᕙᓕᕐᒃᑐᑦ ᐊᒪᓗ ᐊᐅᓪᓚᕐᑎᖃᑕᕐᓂᐊᕐᑕᖏᑦ ᐊᕿᒃᓯᒪᕙᒌᓕᕐᑐᑦ ᐊᕐᕌᒍᑦ ᖃᓯᖃᓪᓚᓄᑦ ᓯᕗᓂᑦᑎᓐᓂ! ᐃᒃᐱᒍᓱᒃᑐᕐᒃ ᑕᒪᓐᓇ ᓄᑖᕐᒃ ᐊᑐᓕᕐᑕᖓ ᐱᕕᖃᕐᑎᑦᑎᓯᒪᓕᕐᑐᕐᒃ ᐃᒻᒥᓄᑦ, ᐃᓚᒥᓐᓄᑦᓗ ᐃᓱᒪᕐᓱᕐᒃᓂᕐᓴᐅᓕᕐᒪᑕ ᐊᒪᓗ ᐃᓅᓯᕐᒥᓂᒃ ᐊᐅᓪᓚᑎᑦᑎᓂᕐᓴᐅᓕᕐᓱᓂ ᐊᒻᒪᓗ ᖁᕕᐊᒋᔭᒥᓂᑦ ᐊᑐᖃᑦᑕᓕᕐᓱᑎᒃ. ᐊᐅᓚᕐᓯᒪᓂᕐᓴᐅᕙᓕᕐᓱᑎᒃ ᐊᒪᓗ ᓄᓇᒧᐊᖃᑕᕐᓂᕐᓴᐅᓕᕐᓱᑎᒃ.

ᑎᐅᕆᐅ ᓂᕆᐅᒋᔭᖓ ᓇᖕᒥᓂᖓ ᐊᖏᒃᓕᒋᐊᕐᕈᒪᓪᓗᓂᐅᒃ ᐊᒻᒪᓗ ᓂᕿᓚᑦᑖᓂᒃ ᓂᐅᕕᕐᑕᐅᔪᓇᕐᑐᓂᒃ ᐊᑐᐃᓐᓇᐅᑎᑦᑎᕙᓕᕐᑐᓂ, ᐃᖃᓇᐃᔮᒃᓴᓂᖕᓗ ᓴᕐᑭᑎᑦᑎᔪᓇᓕᕐᓱᓂ ᓄᓇᓕᖓᓐᓂ ᐊᐅᓪᓚᕐᓯᒪᖃᑕᐅᔪᒪᖃᑕᕐᑐᓂᒃ ᐳᓚᕋᑎᓂᒃᓗ ᓇᒥᑐᐃᓇᕐᒃ ᓄᓇᕐᔪᐊᕐᒥ ᖃᐅᔨᑎᑦᑎᔪᓇᕐᓗᓂ ᓄᓇᖓ ᑲᑦᔮᕐᓇᕐᓂᖓᓂᒃ, ᓂᕐᔪᑎᖃᐅᓐᓂᖓᓗ, ᐃᓄᖏᓗ ᑐᖓᓇᕐᓂᖏᓂᒃ ᖁᑎᒃᑐᒥᐅᑕᐃᑦ.

ᑎᐅᕆ ᒪᒥᐊᖏᑐᕐᒃ ᐃᖃᓇᐃᔮᒥᓂᒃ ᕿᒪᐃᓚᐅᕐᓯᒪᓂᕐᒥᓂᒃ ᓇᒥᓂᕐᒃᑖᕋᓱᓕᕐᑐᓂ.

ᑲᔪᓯᑎᐊᕐᓕᕐᒪᑦ ᐊᒪᓗ ᖁᕕᐊᒋᔭᒥᓂᒃ ᐊᑐᓕᕋᒥ.