ᓄᓇᓕᓐᓂᑦ ᑐᓴᐅᒪᑎᑦᑎᔩᑦ ᐃᓕᓐᓂᐊᕐᓂᖓᑦ ᐃᖃᓗᓐᓂ
ᒫᑦᓯᒥ ᓯᕗᓪᓕᕐᐹᖓᓂ ᐱᓇᓱᐊᕈᓯᕐᒥ, ᑲᑎᖃᑎᖃᕈᓐᓇᕐᓯᓚᐅᕋᑦᑕ ᓄᓇᓕᓐᓂᑦ ᑐᓴᐅᒪᑎᑦᑎᔨᒋᕙᑦᑕᑎᓐᓂᒃ ᐃᓘᓐᓇᖏᓐᓂᒃ 13ᓂᑦ ᕿᑭᖅᑕᓂ ᓄᓇᓕᓐᓃᙶᕐᓯᒪᔪᓂᑦ ᐃᖃᓗᓐᓂ ᐃᓕᓐᓂᐊᕆᐊᕐᓯᒪᓪᓗᑎᒃ.
ᑐᓴᐅᒪᑎᑦᑎᔩᑦ ᐅᖃᖃᑎᖃᕈᓐᓇᕐᓯᓚᐅᖅᑐᑦ ᐊᖏᔪᖅᑳᑎᓐᓂᒃ ᑲᑎᒪᔨᓂᑦ, ᑐᓴᐅᒪᖃᑦᑕᐅᑎᓂᕐᒧᑦ ᐃᓕᓐᓂᐊᖃᑕᐅᔪᓐᓇᓚᐅᖅᑐᑎᒃ, ᐊᒻᒪᓗ ᐃᓕᓐᓂᐊᕈᓐᓇᕐᓯᓚᐅᕆᓪᓗᑎᒃ ᓄᓇᕗᒥ ᐃᖅᑲᓇᐃᔭᕐᕕᓐᓂᑦ ᐸᕝᕕᓴᑦᑕᐅᔭᕆᐊᖃᙱᓐᓂᐅᑉ ᒥᔅᓵᓄᑦ ᐊᒻᒪᓗ ᐃᓕᕋᓵᖅᑕᐅᖃᑦᑕᕆᐊᖃᙱᓐᓂᐅᑉ ᒥᔅᓵᓄᑦ ᒪᓕᒐᓕᐊᖑᓯᒪᔫᑉ ᒥᔅᓵᓄᑦ.
ᑖᒃᑯᐊ ᑲᑎᖃᑎᖃᕈᓐᓇᓚᐅᕐᒥᔪᑦ ᑲᑐᔾᔨᖃᑎᒌᒃᑯᑦ ᓄᓇᓕᕆᔨᖏᓐᓂᒃ, ᐱᒻᒪᕆᐊᓗᓐᓂᑦ ᐱᓕᕆᐊᔅᓴᓕᕆᔨᖏᓐᓂᒃ ᐊᒻᒪᓗ ᐃᓅᓯᓕᕆᓂᕐᒧᑦ ᐸᕐᓇᐃᔨᖏᓐᓂᒃ ᐊᒻᒪᓗ ᑐᑭᓯᑎᑕᐅᒋᐊᖃᑦᑕᓚᐅᕆᓪᓗᑎᒃ ᓄᑖᑦ ᐃᑲᔫᑏᑦ ᒥᔅᓵᓄᑦ ᓲᕐᓗ ᕿᑭᖅᑕᓂ−ᑲᑐᔾᔨᖃᑎᒌᒍᑕᐅᔪᖅ (ᕿᑭᖅᑕᓂ ᐱᓕᒻᒪᔅᓴᐃᓂᕐᒧᑦ ᐃᓕᓐᓂᐊᑎᑦᑎᓂᕐᒧᓪᓗ ᐃᖅᑲᓇᐃᔮᔅᓴᓄᑦ ᑲᑐᔾᔨᖃᑎᒌᒍᑕᐅᔪᖅ) ᐊᒻᒪᓗ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ (ᑲᑐᔾᔨᖃᑎᒌᒃᑯᑦ ᕿᑭᖅᑕᓂ ᐃᓕᖅᑯᓯᓕᕆᓂᕐᒧᑦ ᐃᑲᔫᑏᑦ).
ᑐᓴᐅᒪᑎᑦᑎᔩᑦ ᑲᑎᖃᑎᖃᔪᒻᒥᔪᑦ ᑭᒡᒐᑐᖅᑎᖏᓐᓂᒃ ᓄᓇᕗᑦ ᑐᙵᕕᒃᑯᑦ ᐊᒻᒪᓗ ᑲᑭᕙᒃᑯᑦ ᐅᖃᕆᐊᖅᑐᕐᓯᒪᔪᓂᑦ ᐃᖅᑲᓇᐃᔮᕆᕙᑦᑕᖏᑕ ᒥᔅᓵᓄᑦ ᐊᒻᒪᓗ ᓴᖅᑭᐸᓪᓕᐊᓂᐊᖅᑐᓂᑦ ᐸᕐᓇᑕᐅᓯᒪᔪᓂᑦ.
ᕿᓚᓈᓕᕆᕗᒍᓪᓕ ᑲᑎᖃᑎᖃᒃᑲᓐᓂᕈᒫᕐᓂᑎᓐᓂᒃ ᑐᓴᐅᒪᑎᑦᑎᔨᓂᑦ. ᑕᑯᓛᖅᑯᒍᑦ ᒫᓐᓇᕈᓗᒃ ᓄᓇᔅᓯᓐᓂ.
