ᕼᐊᓘᖅᑕᐃᓐᓇᕆᕙᔅᓯ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓄᑦ ᓄᓇᓕᐅᔪᒥᒃ ᑭᒡᒐᖅᑐᐃᓪᓗᖓ ᑲᑎᒪᔨᐅᖃᑕᐅᕗᖓ/ᓄᓇᓕᖕᒥᐅᑕᓂᑦ ᐱᓕᕆᖃᑎᒌᑦᑐᓕᕆᔨᐅᕗᖓ.

ᑐᓴᖅᓯᒪᓕᕋᔅᓯ ᐊᒥᓲᔪᓯ ᐱᕙᓪᓕᐊᔪᒃᑯᑦ ᑐᓴᖅᑎᑦᑎᓯᒪᓂᖓᓂᒃ ᓄᓇᕗᒻᒥ ᐊᖓᔪᖅᑳᖅ ᐃᓄᓕᒫᑦ ᐋᓐᓂᐊᖅᑕᐃᓕᒪᔪᓕᕆᔭᐅᓂᖏᖕᓄᑦ ᓄᕙᒡᔪᐊᕐᓇᖅ-19ᒨᖓᔪᑦ ᐃᓚᖏᖕᓂᒃ ᖃᓄᐃᓕᐅᕆᐊᖃᙱᒍᑎᖏᑦ ᐱᑐᐃᓐᓇᐅᒍᓐᓃᖅᑎᑦᑎᓯᒪᔪᑦ ᖃᓱᔭᐅᔫᒥᓂᐊᓕᕐᒪᑕ ᔫᓂ 1 ᐱᒋᐊᕐᓗᒍ.

ᓇᒡᒐᔾᔭᐅᒥ, ᔫᓂ 1 ᐱᒋᐊᕐᓗᒍ:

• ᓄᓇᕗᒻᒥ ᐸᐃᕆᕖᑦ ᒪᑐᐃᓛᓕᖅᑐᑦ
• ᓄᓇᕗᒻᒥ ᒥᕐᖑᐃᓯᕐᕖᑦ ᒪᑐᐃᓛᓕᖅᑐᑦ
• ᑭᒃᑯᑐᐃᓐᓇᕐᓄᑦ ᐅᐸᒐᒃᓴᑦ ᓯᓚᒦᑦᑐᑦ ᐱᙳᐊᕐᕖᑦ ᒪᑐᐃᓛᓕᖅᑐᑦ
• ᓯᓚᒦᓪᓗᑎᑦ ᑲᑎᒍᓐᓇᖅᓯᓛᓕᕐᒥᔪᑦ ᖃᑦᑏᓐᓇᒡᒍᑕᐅᓗᑎᑦ ᐃᓄᐃᑦ ᐊᒥᓲᓂᖏᑦ ᑎᑭᓪᓗᒋᑦ 25-ᖑᒍᓐᓇᕐᓗᑎᑦ ᑲᑎᑦᑐᑦ
• ᖃᐅᔨᒪᑦᑎᐊᕆᐊᖃᖅᑐᑎᑦ ᐃᓅᖃᑎᖕᓂ ᖃᓂᒃᓴᓗᐊᕐᔭᐃᖅᓯᒪᒋᐊᖃᕋᕕᑦ ᓱᓕ
• ᐃᒡᓗᑉ ᐃᓗᐊᓂ ᑲᑎᒍᓐᓇᖅᑎᑕᐅᔪᑦ ᓱᓕ ᖃᑦᑏᓐᓇᐅᓂᖅᓴᐅᓗᑎᑦ ᐊᒥᓲᓂᖏᑦ ᑕᓪᓕᒪᑦ (5) ᐃᓄᐃᑦ ᑲᑎᒍᓐᓇᕐᓗᑎᑦ

ᓄᓇᕗᒻᒥ ᐊᖓᔪᖅᑳᖅ ᐃᓄᓕᒫᑦ ᐋᓐᓂᐊᖅᑕᐃᓕᒪᔪᓕᕆᔭᐅᓂᖏᖕᓄᑦ ᓇᓗᓇᐃᖅᓯᓯᒪᓕᕆᕗᖅ ᓄᓇᕗᑉ ᐃᓗᐊᓂ ᐊᐅᓪᓚᖃᑦᑕᖅᑐᑦ ᓄᓇᓕᐅᔪᓄᑦ ᐊᐃᑦᑐᐃᖃᑦᑕᐅᑎᓇᓗᐊᕌᓗᙱᒻᒪᒡᒎᖅ ᓱᓕ.

ᑕᐃᒪᐃᓐᓂᖓᓄᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᓚᐃᖅᑐᓄᑦ ᐊᐅᓪᓚᕈᑎᒃᓴᖏᑕ ᐱᓕᕆᐊᖓ ᐊᑐᕋᒃᓴᐅᒃᑲᓐᓂᓛᓕᕐᒥᔪᖅ ᕿᑭᖅᑖᓗᖕᒥᐅᑦ ᐃᓄᖏᖕᓄᑦ ᐱᒋᐊᕐᓗᒍ ᔫᓂ 1.

ᐱᓕᕆᐊᖅ ᐊᑐᕋᒃᓴᐅᒐᔭᖅᑐᖅ ᐊᐅᓪᓚᖅᑐᖃᕐᓂᐊᕐᓗᓂ ᓄᓇᕗᑉ ᐃᓗᐊᓂ ᑭᓯᐊᓂ ᐃᓚᐃᖅᑐᓄᑦ ᐅᐸᒍᑎᒍᓐᓇᖁᓪᓗᒋᑦ.

ᐊᐅᓪᓚᕐᓗᓂ ᑕᐅᓄᖓ ᐊᒻᒪᓗ ᑕᐅᓇᙵᑦ ᑲᓇᑕᑉ ᓂᒋᐊᓂ ᑮᓇᐅᔭᖃᖅᑎᑕᐅᒐᔭᙱᑦᑐᑦ ᐊᐅᓪᓚᕈᑎᒃᓴᓂᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᓚᐃᖅᑐᓄᑦ ᐱᓕᕆᐊᖓᑎᒍᑦ ᑭᓯᐊᓂ ᐅᐊᑦᑎᐊᕈ ᑐᓴᖅᑎᑦᑎᓚᐅᖅᑎᓪᓗᒋᑦ ᐊᑐᖅᑕᐅᒃᑲᓐᓂᕈᓐᓇᓛᖅᑐᓂ.

ᐊᑐᕈᓐᓇᖅᑕᐃᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᓚᐃᖅᑐᓄᑦ ᐊᐅᓪᓚᕈᑎᒃᓴᖏᑕ ᐱᓕᕆᐊᖓ ᐅᖄᓚᓗᑎᑦ ᐅᕗᖓ 867-222-1992.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓅᖃᑎᒌᖑᔪᓂᑦ ᐅᖓᓯᒃᓴᑎᑦᑎᖃᑦᑕᖅᐳᑦ ᐊᒻᒪᓗ ᐱᓇᓱᐊᕈᑎᐅᔪᓂᑦ ᐃᑲᔫᑎᒃᓴᓂᑦ ᑲᒪᒐᔭᖅᑐᑦ ᐊᑐᕋᓱᐊᖅᑐᑦ ᐃᓚᐃᖅᑐᓄᑦ ᐊᐅᓪᓚᕈᑎᒃᓴᖏᑕ ᐱᓕᕆᐊᖓᓂᒃ ᐅᖄᓚᐅᑎᒃᑯᑎᒍᑦ ᑭᓯᐊᓂ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᑐᐊᕕᕐᓇᑐᒃᑯᑦ ᓄᕙᒡᔪᐊᕐᓇᖅ-19 ᐱᓪᓗᒍ ᐱᓕᕆᐊᖁᑎᖏᑦ ᐃᑲᔪᖅᑐᐃᖏᓐᓇᖅᐳᑦ ᑕᒪᐃᓐᓂ ᕿᑭᖅᑖᓘᑉ ᓄᓇᓕᖏᖕᓂ.

ᕿᑭᖅᑖᓗᖕᒥᐅᑦ ᐃᓄᐃᑦ ᐱᓇᓱᐊᕈᓐᓇᕐᒥᔪᑦ ᑐᐊᕕᕐᓇᖅᑐᒃᑯᑦ ᐊᖑᓇᓱᒃᑎᓄᑦ ᐱᓕᕆᐊᖓᓂᒃ ᓄᓇᑐᐃᓐᓇᕐᒦᒍᓐᓂᕈᑎᑦ ᐃᓅᖃᑎᒥᓂᒃ ᖃᓂᒃᓴᓗᐊᖁᓇᒋᑦ. ᑖᓐᓇ ᐱᓕᕆᐊᖅ ᐊᑐᐃᓐᓇᐅᒪᓂᐊᖅᐳᖅ ᔫᓂ 30−ᕈᕋᓱᐊᕐᓂᖓᓂ.

ᐃᓄᐃᑦ ᐅᑭᐅᓖᑦ 60 ᐅᖓᑖᓂ ᐱᔪᓐᓇᕆᕗᑦ ᐃᓐᓇᑐᖃᐃᑦ ᓂᕿᑖᕈᑎᒃᓴᖏᖕᓂᒃ ᐃᒡᓗᒥᐅᖃᑎᒌᑦ ᓂᐅᕕᖁᓪᓗᒋᑦ ᐱᔭᕆᐊᓕᒻᒥᓂᒃ. ᑕᒪᐃᓐᓂ ᕿᑭᖅᑖᓘᖕᒥᐅᑕᐅᔪᑦ ᐃᓐᓇᑐᖃᐃᑦ ᐊᑎᓕᐅᖅᑕᐅᖃᑕᐅᓯᒪᔪᑦ ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᑎᓕᐅᖅᑕᐅᑲᐅᑎᒋᓲᖑᕗᑦ ᐱᓕᕆᐊᕐᒧᑦ ᐱᑎᑕᐅᓲᖑᓪᓗᑎᑦ. ᑖᒃᑯᐊ ᓂᕿᑖᕈᑎᒃᓴᑦ ᓇᓕᖅᑲᖏᑦ ᑐᓂᐅᖅᑲᖅᑕᐅᓚᐅᖅᐳᑦ ᑕᒫᓂ ᐱᖓᓲᓕᖅᓲᑕᐅᑎᓪᓗᒍ ᐱᓇᓱᐊᕈᓯᕐᒥ.

ᑐᑭᓯᒋᐊᒃᑲᓐᓂᕈᒪᓐᓂᕈᕕᑦ ᐱᓕᕆᐊᑦᑕ ᒥᒃᓵᓅᖑᔪᓂᑦ ᖃᕋᓴᐅᔭᒃᑯᑦ ᐅᕗᖓ ᑎᑎᕋᕐᓗᑎᑦ: COVID-19@qia.ca ᐅᕝᕙᓘᓐᓃᑦ ᐅᖄᓚᓗᑎᑦ ᐅᕗᖓ: 1-867-975-8383.

ᐃᓱᓕᑦᑎᓪᓗᒍ, ᐃᖅᑲᐅᒪᖁᕙᑦᑎᒋᑦ . . . ᐊᐃᑦᑐᐃᑦᑕᐃᓕᒪᑎᑦᑎᓗᑎᑦ ᓄᕙᒡᔪᐊᕐᓇᖅ-19−ᒥᒃ ᐃᒪᓐᓇᐃᓕᐅᖅᐸᓪᓗᑎᑦ:

• ᐊᒡᒐᑎᑦ ᐅᐊᓴᖃᑦᑕᒻᒪᕆᓪᓗᒋᑦ
• ᖁᐃᖅᓱᓕᕋᐃᒍᕕᑦ ᑕᒋᐅᓕᕋᐅᒍᕕᓪᓘᓐᓃᑦ ᐃᑯᓯᖕᓄᑦ ᖁᐃᖅᓱᖃᑦᑕᕐᓗᑎᑦ ᑕᒋᐅᖃᑦᑕᕐᓗᑎᓪᓗ
• ᐃᓅᖃᑎᖕᓂᑦ ᖃᓂᒃᓴᓗᐊᕐᔭᐃᖃᑦᑕᕐᓗᑎᑦ
• ᑭᓱᕈᓘᔭᐃᑦ ᐊᑦᑐᖅᑕᐅᓗᐊᓲᑦ ᐃᒡᓗᑉ ᐃᓗᐊᓂ ᖁᐱᕐᕈᓄᑦ ᓄᖑᓴᐅᑎᖃᖅᑐᒧᑦ ᐲᖅᓴᐅᑎᒥᒃ ᐊᓪᓚᖅᑎᖃᑦᑕᕐᓗᒋᑦ

ᓴᙱᓂᖅᓴᐅᕗᒍᑦ ᐱᓕᕆᖃᑎᒌᑦᑎᓪᓗᑕ:

• ᓇᒡᓕᒍᓱᖃᑦᑕᕐᓗᑎᑦ ᐃᓅᖃᑎᖕᓂᑦ
• ᓴᐳᑎᓗᒋᑦ ᐋᓐᓂᐊᓕᖅᓴᕋᐃᒍᓐᓇᖅᑐᑦ ᐃᓄᐃᑦ
• ᐃᑲᔪᖅᑐᕐᓗᒍ ᓄᓇᓕᒋᔭᐃᑦ

ᑕᐃᒪᐃᒍᓐᓇᕈᕕᑦ, ᖃᐅᔨᒋᐊᖃᑦᑕᕐᓗᒋᑦ ᐃᓐᓇᑐᖃᐃᑦ ᐅᕝᕙᓘᓐᓃᑦ ᐱᖃᑎᑎᑦ ᐋᓐᓂᐊᓕᖅᓴᕋᐃᒍᓐᓇᖅᑐᑦ ᐅᕝᕙᓘᓐᓃᑦ ᐃᓚᑎᑦ ᐃᑲᔪᖅᑕᐅᒋᐊᖃᓲᑦ. ᐅᖄᓚᕕᒋᓗᒋᑦ, ᕿᒪᐃᓗᑎᑦ ᐃᓄᐃᑦ ᓂᕿᖏᖕᓂᒃ ᐊᒻᒪᓗ ᓱᓇᒃᑯᑖᒃᓴᖏᖕᓂᒃ ᒪᑐᖏᑕ ᐹᖓᓄᑦ.

ᑕᑯᓂᐊᕐᓗᒍ ᐃᑭᐊᖅᑭᕕᕗᑦ ᐅᕙᓂ qia.ca ᑐᑭᓯᒋᐊᒃᑲᓐᓂᖁᓪᓗᑎᑦ ᐊᒻᒪᓗ ᖃᐅᑕᒫᑦ ᑐᓴᕆᐊᖅᑎᑦᑎᓂᑦᑎᓐᓂᒃ ᑕᑯᓂᐊᖁᓪᓗᑎᑦ.

ᑕᑯᓂᐊᕈᓐᓇᕆᕙᑎᑦ ᑐᓴᒐᒃᓴᑦ ᐱᕙᓪᓕᐊᔪᑦ ᑐᓴᖅᑎᑕᐅᕋᑖᕐᓂᑯᑦ ᐊᒻᒪᓗ ᑐᓴᕆᐊᖅᑎᑦᑎᒍᑏᑦ ᑖᒃᑯᑎᒎᓇ ᖃᕋᓴᐅᔭᒃᑯᑦ ᕙᐃᔅᕗᒃ, ᑐᐃᑐᕐ ᐊᒻᒪᓗ ᐃᓐᔅᑕᒍᕌᒻ.

ᖁᔭᓐᓇᒦᒻᒪᕆᐊᓗᒃ ᑕᒪᒃᑯᓂᖓ ᐅᖃᓕᒫᙳᐊᑕᖅᓯᓐᓇᕋᕕᑦ. ᐅᓪᓗᖃᑦᑎᐊᕆᑦ ᐊᒻᒪᓗ ᐊᑦᑕᓇᖅᑐᒨᖅᑕᐃᓕᒪᖃᑦᑕᕐᓗᑎᑦ.