ᓄᕖᕝᕙ  22 ᑲᓇᑕᒥ ᐃᒡᓗᓕᕆᓂᕐᒧᑦ ᐅᓪᓗᕆᔭᐅᖕᒪᑦ, ᑖᓐᓇ ᐅᓪᓗᖅ ᓴᖅᑭᑕᐅᓯᒪᔪᖅ ᐱᓕᕆᐊᖑᒃᑲᓐᓂᖁᔨᓪᓗᑎᒃ ᐃᒡᓗᑭᒃᓴᕐᓂᐅᔪᖅ ᑲᓇᑕᒥ.  ᓄᓇᕗᒥ, ᐱᓗᐊᖅᑐᒥᒃ ᒫᓐᓇ ᐊᑐᖅᑎᓪᓗᒍ ᓄᕙᓐᓇᕐᔪᐊᖅ-19 ᐊᒻᒪᓗ ᑐᓴᕋᑖᓚᐅᖅᑕᕗᑦ ᓄᕙᓐᓇᕐᔪᐊᖅ ᓯᐊᒻᒪᓚᐅᕐᓂᖓᓂᒃ, ᐃᒡᓗᖃᑦᑎᐊᕆᐊᖃᕐᓂᖅ ᐱᒻᒪᕆᐅᕗᖅ ᐊᒻᒪᓗ ᓴᖅᑭᑎᑕᐅᓯᒪᒃᑲᓐᓂᓕᕐᒥᔪᖅ ᖃᓄᖅᑑᕈᑕᐅᖁᓪᓗᒍ..

56 ᐳᓴᓐᑎ ᐅᖓᑖᓂ ᓄᓇᕗᒥ ᐃᓄᐃᑦ ᓇᔪᖅᑐᑦ ᓂᓐᓂᐅᖅᑐᓂᒃ ᐊᖏᕐᕋᕆᔭᐅᔪᓂᒃ − ᐃᓚᒌᑦ ᑭᖑᕚᕇᑦ ᐊᑕᐅᓯᕐᒦᖦᖢᑎᒃ ᒥᑭᔪᒥᒃ ᐃᒡᓗᒥᒃ.  ᑕᒪᒃᑯᐊ ᐱᒻᒪᕆᐋᓗᒃᑯᑦ ᐊᒃᑐᐃᒍᑕᐅᔪᓐᓇᕐᒪᑦ ᓄᕙᓐᓇᕐᔪᐊᖅ-19ᒧᑦ, ᐊᔪᕐᓇᕋᔭᖅᖢᓂ ᖃᓂᒌᓗᐊᖅᑕᐃᓕᓂᕐᒥᒃ ᐃᒡᓗᒥᒃ ᐊᒻᒪᓗ ᑕᐃᒪᐃᓕᖓᑎᓪᓗᒍ ᖃᓂᒻᒪᒃᑖᖅᑐᖃᖅᐸᑦ ᕿᓚᒥᐊᓗᒃ ᓯᐊᒻᒪᒃᑐᖃᕈᓐᓇᕋᔭᖅᖢᓂ.

ᒫᓐᓇ, ᐱᓗᐊᖅᑐᒥᒃ ᐃᓱᒫᓘᖕᓇᖅᑐᒻᒪᕆᐅᓕᕐᒪᑦ , ᐊᑭᑐᓗᐊᙱᑦᑐᓂᒃ ᐃᒡᓗᖃᕆᐊᖃᖅᑐᒍᑦ ᓄᓇᕗᒥ.  ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑕᑯᔪᒪᔪᑦ ᐊᒻᒪ ᑐᑭᑖᕈᑎᒋᔭᐅᑲᐅᑎᒋᓗᑎᒃ ᐊᑭᑐᙱᑦᑐᓂᒃ ᐃᒡᓗᓕᐅᖅᑐᖃᕈᓐᓇᖁᓪᓗᒍ ᓄᓇᕗᒥ ᐃᓄᖕᓂᑦ ᐊᑦᑕᕐᓇᖅᑐᒦᒍᓐᓃᕈᑎᒋᔪᓐᓇᖅᑕᖏᓐᓂᒃ ᐊᒻᒪᓗ ᓇᖕᒥᓂᖅᓱᓕᕈᓐᓇᕐᓗᑎᒃ.

ᐊᒃᑐᐊᖓᓂᒃ ᓂᓐᓂᐅᕐᕕᐅᔪᑦ ᐊᒻᒪᓗ ᐃᒡᓗᒃᓴᖃᑦᑎᐊᙱᓐᓂᖅ ᐊᒻᒪᓗ ᒪᑯᐊ ᐳᕙᒃᑯᑦ ᐋᓐᓂᐊᖑᕙᒃᑐᑦ ᓱᕐᓗ ᐳᕙᒡᓗᖕᓂᖅ ᐃᓄᐃᑦ ᓄᓇᖏᓐᓂᒃ ᑎᑎᕋᐅᓯᕆᔭᐅᓯᒪᑦᑎᐊᖅᑐᑦ ᖃᐅᔨᒪᔭᐅᑦᑎᐊᖅᖢᑎᒃ.  ᐃᓄᐃᑦ ᐳᕙᓪᓗᓕᖃᑦᑕᕐᓂᖏᑦ 300ᓗᐊᓂᒃ ᐳᕙᓪᓗᓕᕈᓐᓇᖅᑐᑦ ᓴᓂᐊᓂᑦ ᐊᓯᖏᓐᓂᑦ ᑲᓇᑕᒥᐅᑕᐅᔪᓄᑦ.  ᐳᕙᒡᓗᖕᓂᖅᑎᑐᑦ, ᑖᓐᓇ ᐅᓗᕆᐊᓇᕐᓂᕆᔭᖓ ᓄᕙᓐᓇᕐᔪᐊᖅ-19 ᐱᒋᐊᓪᓚᒃᓯᒪᒍᓐᓇᖅᑐᖅ ᐱᔾᔪᑎᒋᓪᓗᒋᑦ ᓂᓐᓂᐅᕐᕕᐅᔪᓂᒃ.

ᓇᔪᕐᓗᓂ ᐃᓄᒋᐊᒃᑐᓂᒃ ᐃᒡᓗᓂᒃ ᐱᐅᙱᑦᑐᒥᒃᑕᐅᖅ ᐊᒃᑐᐃᓂᖃᕈᓐᓇᕐᒪᑦ ᓱᕐᓗ ᐃᓕᓐᓂᐊᕐᓂᕐᒧᑦ, ᐃᖅᑲᓇᐃᔭᕐᕐᒧᑦ ᐊᒻᒪ ᐃᓱᒪᒃᑯᑦ.  ᐃᒡᓗᓕᐅᒃᑲᓐᓂᕐᓂᖅ, ᓇᓗᓇᐃᔭᕈᑎᒋᔭᐅᔪᓐᓇᖅᑐᖅ ᕿᑐᕐᖓᕆᔭᐅᔪᑦ ᐃᓄᖕᓄᑦ ᐱᕕᒃᓴᖃᑦᑎᐊᕈᓐᓇᕐᓂᐊᕐᓂᖏᓐᓄᑦ ᐊᖏᕐᕋᒥᒃ ᐃᓕᓐᓂᐊᕈᓐᓇᕐᓂᕐᒧᑦ.  ᐃᒡᓗᒃᓴᖃᑦᑎᐊᕐᓂᖅ ᐃᑲᔪᕈᓐᓇᕐᒥᔪᖅ  ᐃᓄᖕᓂᑦ ᐃᖅᑲᓇᐃᔭᖏᓐᓂᒃ ᐃᖅᑲᓇᐃᔭᐃᓐᓇᕈᓐᓇᕐᓗᑎᒃ ᐊᖏᕐᕋᒥᒃ.

ᐃᒡᓗᒃᓴᖃᑦᑎᐊᙱᓐᓂᖅ ᐊᖏᓪᓕᒋᐊᖅᑎᑦᑎᓯᒪᔪᓐᓇᕐᒥᔪᖅ ᐊᖏᕐᕋᒥᒃ ᐱᑦᑎᐊᖃᑦᑕᐅᑎᙱᓐᓂᕐᒧᑦ, ᐃᓱᒪᒃᑯᑦ ᐊᒃᓱᕈᓕᕈᓐᓇᕐᓂᕐᒥᒃ.  ᐃᒡᓗᒃᓴᖃᑦᑎᐊᕐᓂᖅ ᑕᒪᒃᑯᐊ ᕿᒫᓯᒪᔪᑦ ᐱᑦᑎᐊᖅᑕᐅᖃᑦᑕᙱᓐᓂᕐᒧᑦ ᓇᖕᒥᓂᖅᑕᐅᖅ ᐱᒋᐊᕈᑎᒃᓴᖃᕈᓐᓇᕋᔭᖅᑐᑦ ᐃᒡᓗᒃᓴᖃᑦᑎᐊᖅᐸᑦ.  ᐃᒡᓗᒃᓴᖃᕐᓂᖅ ᒥᒃᖠᑎᑦᑎᔪᓐᓇᕐᒪᑦ ᐃᓱᒪᔮᕐᓂᕐᒥᒃ ᐊᒻᒪᓗ ᐃᑲᔪᕈᓐᓇᖅᖢᓂ ᐃᓱᒪᒃᑯᑦ ᐋᓐᓂᐊᕈᑎᖃᖅᑐᓄᑦ ᓱᕐᓗ ᑐᙵᓱᖕᓂᖅᓴᐅᓕᕈᓐᓇᖅᖢᑎᒃ ᓇᖕᒥᓂᖅ ᐃᒡᓗᖃᕈᓐᓇᖅᓯᒐᔭᖅᐸᑕ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐱᕕᒃᓴᓂᒃ ᕿᓂᖃᑦᑕᐃᓐᓇᖅᑐᑦ ᐃᖅᑲᓇᐃᔭᖃᑎᒋᔪᓐᓇᖅᑕᖏᓐᓂᒃ ᓄᓇᕗᒥ ᒐᕙᒪᒃᑯᓐᓂ ᐊᒻᒪᓗ ᒐᕙᒪᑐᖃᒃᑯᓐᓂ ᐃᒡᓗᓕᕆᓂᖅ ᐱᔾᔪᑎᒋᓪᓗᒍ ᓄᓇᕗᒥ ᑖᒃᑯᐊ ᕿᑭᖅᑕᓂᒥᐅᑕᐃᑦ  ᐃᓚᒌᑦ ᐊᑦᑕᕐᓇᙱᑦᑐᒥᒃ ᐊᖏᕐᕋᖃᕈᓐᓇᖅᓯᓂᐊᕐᒪᑕ.