ᐊᓲᔪᓯ ᐃᓘᓐᓇᓯ,

ᑐᓴᐅᒪᑎᑦᑎᔨᒋᔭᐅᔪᖓ ᓄᓇᑦᑎᓐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ.

ᑐᑭᓯᑎᑦᑎᒋᐊᕈᒪᓪᓗᖓ ᐃᓱᒫᓗᓇᕐᓯᓯᒪᑎᓪᓗᒍ ᒫᓐᓇ ᓂᐅᕕᐅᑎᔅᓴᐃᑦ ᐃᓄᑐᖃᕐᓄᑦ ᑐᕌᖓᔪᑦ. ᑖᓐᓇ ᐃᓚᒋᔭᐅᒻᒪᑦ ᕿᑭᖅᑕᓂᒃᑯᑦ ᐳᕝᕕᕆᓇᖅᑐᒧᑦ (ᓄᕙᕐᔪᐊᕐᓇᖅ−19) ᖃᓄᖅᑑᕈᑎᒋᓪᓗᒍ ᐃᑲᔫᑎᔅᓴᓕᐊᕆᓯᒪᔭᖏᑦ ᐸᕐᓇᑕᐅᓯᒪᔪᑦ.

ᐃᑲᔫᑎᔅᓴᐃᑦ ᐸᕐᓇᑕᐅᓯᒪᔪᑦ ᐋᖅᑭᓱᖅᑕᐅᓯᒪᔪᑦ ᕿᓚᒻᒥᐅᔪᒥᒃ ᑮᓇᐅᔭᓂᑦ ᐃᑲᔫᑎᖃᑲᐃᓐᓇᓂᐊᕐᖓᑕ ᕿᑭᖅᑕᓂᒥᐅᓄᑦ ᐃᓄᓐᓄᑦ ᐃᓄᑐᖃᕐᓄᑦ ᐳᕝᕕᕆᓇᖅᑐᒥᒃ ᖃᓂᒪᓇᖅᑐᖅᑕᖃᖅᑎᓪᓗᒍ ᓄᓇᕐᔪᐊᓕᒫᒥ.

ᕿᑭᖅᑕᓂᒃᑯᑦ ᑖᔅᓱᒥᖓ ᐃᑲᔫᑎᖃᕐᓂᐊᖅᑐᑦ ᐅᑭᐅᖅᑕᖅᑐᒥ ᑯᐊᐸᒃᑯᑦ ᓂᐅᕕᕐᕕᖏᑎᒍᑦ ᓄᓇᔅᓯᓐᓂ. ᐃᓱᒫᓗᓇᕐᓯᓯᒪᑎᓪᓗᒍ ᐃᑲᔫᑏᑦ ᐋᖅᑭᑦᑕᐅᓯᒪᔪᒐᓗᐊᕐᖓᑕ 12ᓄᑦ ᐱᓇᓱᐊᕈᓯᕐᓄᑦ ᐊᑐᕈᒫᕐᓂᐊᖅᑐᑎᒃ ᐊᒻᒪᓗ ᐅᖓᕙᕆᐊᖅᑕᐅᓪᓗᓂ ᐊᐅᔭᖅ ᐊᑐᖅᑕᐅᓂᐊᕐᖓᑕ.

ᐃᒫᒃ ᐋᖅᑭᓯᒪᓂᐊᖅᑐᖅ:

• ᑖᓐᓇ ᐃᑲᔫᑎ ᐊᑐᕐᓗᒍ, ᕿᑭᖅᑕᓂᒥᐅᑕᖅ ᐃᓄᒃ ᐃᓄᑐᖃᖅ ᐅᑭᐅᓕᒃ 60-ᓂᑦ ᐅᖓᑖᓂᓘᓐᓃᑦ ᐊᒻᒪᓗ ᓄᓇᖃᕐᓗᓂ ᓄᓇᕗᒥ, ᐊᑎᓕᐅᖅᑕᐅᓯᒪᓗᓂᓗ ᕿᑭᖅᑕᓂᒥᐅᑕᐅᓗᓂ.
• ᐊᑐᓂᑦ ᓂᐅᕕᐅᑎᔅᓴᑦ ᐱᔭᔅᓴᐅᕗᑦ ᑯᐊᐸᒃᑯᓐᓂ ᓂᐅᕕᐅᑎᔅᓴᑦ ᐊᐅᑦᑕᔫᑦ ᐊᒥᓲᓂᓖᑦ $250
• ᐱᓕᕆᐊᖅ ᐅᖓᕙᕆᐊᖅᑕᐅᒻᒪᑦ, ᒫᓐᓇ ᑎᓴᒪᒃᑲᓂᕐᓂᒃ ᐃᓚᓯᒪᓕᖅᑐᑐᑦ ᓂᐅᕕᐅᑎᔅᓴᐃᑦ ᐊᐅᑦᑕᔫᑦ.
• ᑯᐊᐸᒃᑯᓯᓐᓅᖃᑦᑕᓂᐊᖅᑯᓯ ᓄᓇᔅᓯᓐᓂ ᐊᐃᔅᓯᕐᓗᓯ ᓂᐅᕕᐅᑎᔅᓴᓂᑦ ᐊᐅᑦᑕᔫᓂᑦ
• ᐊᐅᑦᑕᔫᑦ ᐊᐃᔭᐅᖃᑦᑕᕈᓐᓇᓂᐊᖅᑐᑦ ᐅᑯᓇᓂ ᐅᓪᓗᓂᑦ:
  • ᔪᓚᐃ 21
  • ᐋᒡᒌᓯ 4      ᐋᒡᒌᓯ 18

ᐊᑎᓕᐅᕆᐊᑐᙱᑦᑐᓯ ᑖᒃᑯᓄᖓ ᐃᑲᔫᑎᓄᑦ.

ᐃᓘᓐᓇᑎᒃ ᕿᑭᖅᑕᓂᒥᐅᑦ ᐃᓄᑐᖃᐃᑦ, ᐊᑎᓕᐅᖅᑕᐅᓯᒪᔪᑦ ᓄᓇᕗᑦ ᑐᙵᕕᒃᑯᑎᒍᑦ, ᐊᑎᓕᐅᖅᑕᐅᑦᑕᐅᑎᒋᖃᑦᑕᖅᑐᑦ.

ᓂᐅᕕᐅᑎᔅᓴᐃᑦ ᐊᑐᖅᑕᐅᖃᑦᑕᕈᓐᓇᖅᑐᑦ ᓂᐅᕕᐅᑕᐅᓗᑎᒃ ᓂᕿᓂᑦ ᓂᐅᕕᐊᖑᔭᕆᐊᓕᓐᓂᓪᓗ ᑯᐊᐸᒃᑯᑦ ᓂᐅᕕᕐᕕᖏᓐᓂ.

ᑭᓱᑐᐃᓐᓇᑦᑎᐊᓂᑦ ᓂᐅᕕᖃᑦᑕᕈᓐᓇᖅᑐᓯ ᐊᐅᑦᑕᔫᓯ ᐊᑐᕐᓗᒋᑦ.

ᑖᒃᑯᐊ ᐃᓱᒫᓗᓇᕐᓯᓯᒪᑎᓪᓗᒍ ᐃᑲᔫᑎᐅᒻᒪᑕ ᐃᓄᑐᖃᕐᓄᑦ.

ᕿᑭᖅᑕᓂᒃᑯᑦ ᐅᖃᐅᔾᔨᓯᒪᔪᑦ ᓂᐅᕕᕐᕕᓐᓂᑦ ᑐᓂᓯᐅᖅᑲᐃᖃᑦᑕᖁᔨᒐᑎᒃ ᐊᐅᑦᑕᔫᓂᑦ ᐊᑎᓕᐅᖅᑕᐅᓯᒪᙱᑦᑐᓄᑦ.

ᐃᓄᑐᖃᓕᒫᑦᑎᐊᑦ ᐃᑲᔫᓯᐊᖅᑖᕈᓐᓇᖅᑐᑦ ᐱᖃᑦᑕᖁᒐᓗᐊᕋᑦᑎᒍ.

ᐃᓄᑐᖃᕐᒥᒃ ᑯᐊᐸᒃᑯᓕᐊᖅᑐᖃᕈᓐᓇᖏᑉᐸᑦ ᐅᖃᕐᕕᖃᕈᓐᓇᖅᑐᑦ ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᖏᓐᓂᒃ ᐊᒻᒪᓗ ᑎᓕᓯᓗᑎᒃ ᐊᐃᔅᓯᖁᒐᔭᖅᑕᖓᓂᒃ ᐊᐅᑦᑕᔫᕐᒥᒃ ᐊᐃᔅᓯᐅᔾᔭᐅᓗᑎᒃ.

ᑐᑭᓯᒋᐊᒃᑲᓐᓂᕈᒪᒍᔅᓯ ᑖᒃᑯᐊ ᐃᑲᔫᑏᑦ ᒥᔅᓵᓄᑦ ᑎᑎᕋᖃᑦᑕᕈᓐᓇᖅᑐᓯ ᐃᕐᖐᓈᖅᑕᐅᑎᒃᑯᑦ: COVID-19@qia.ca ᐅᖄᓚᖃᑦᑕᓗᕐᓯᓘᓐᓃᑦ: 1-867-975-8383.

ᕿᑭᖅᑕᓂᒃᑯᑦ ᐃᓚᒋᔭᐅᒻᒪᑕ ᐋᓐᓂᐊᖅᑐᓕᕆᔨᓄᑦ ᑎᓕᐅᕆᓪᓗᑎᒃ ᕿᑭᖅᑕᓂᒥᐅᓂᑦ ᐃᓄᓐᓂᑦ ᓴᐳᔾᔨᓯᒪᖁᓪᓗᓯ ᓇᒻᒥᓂᖅ ᓄᓇᖅᑲᑎᔅᓯᓐᓂᓗ.

 ᐱᐅᓂᕐᐹᖑᓂᐊᕐᖓᑦ ᓯᐊᒻᒪᖁᓇᒍ ᐳᕝᕕᕆᓇᖅᑐᖅ (ᓄᕙᕐᔪᐊᓇᖅᑐᖅ−19) ᒪᑯᓂᖓ ᐊᑐᖃᑦᑕᕈᔅᓯ:

• ᐅᐊᓴᖃᑦᑕᕐᓗᒋᑦ ᐊᒡᒐᓯ ᐅᐊᓴᕐᔫᒥᔭᒐᐃᓐᓇᕐᓗᓯ
• ᖁᐃᕐᓱᖃᑦᑕᕐᓗᓯ ᑕᒋᐅᖃᑦᑕᕐᓗᓯᓗ ᐊᐃᕐᓯᓐᓄᑦ/ᑕᓕᕐᓄᑦ ᐃᑯᓯᑉᐱᑦ ᓇᓛᓄᑦ
• ᐊᑦᑐᐊᑲᑕᑦᑕᐃᓕᓗᓯᐅᒃ ᑮᓇᓯ, ᐱᓗᐊᖅᑐᒥᒃ ᐃᔨᓯ, ᓱᕐᓗᓯ ᖃᓂᓯᓗ
• ᐃᓄᓕᓐᓃᕋᔭᓗᐊᖅᑕᐃᓕᓗᓯᓗ
  • ᐃᒫᒃ ᑐᑭᓕᒃ ᐊᖏᕐᓯᒪᓗᓯ
  • ᑲᑎᒪᖃᑎᒌᑦᑕᐃᓕᓗᓯ
  • ᐃᖅᑲᓇᐃᔭᕐᓗᓯ ᐊᖏᕐᕋᓯᓐᓂ ᐊᔪᕐᓇᖏᑉᐸᑦ

ᐳᐃᒍᖅᑕᐃᓕᒋᔅᓯ ᓇᒻᒥᓂᖅ ᐃᓂᖅᑎᕐᓯᒪᓗᓂ ᐊᓂᑦᑕᐃᓕᖃᑦᑕᕐᓗᓯ ᖃᓄᐃᒍᑎᖃᖅᑑᔮᕈᔅᓯ ᖃᓂᒪᒍᑕᐅᕙᑦᑐᓂᑦ ᐳᕝᕕᕆᓇᖅᑐᒧᑦ (ᓄᕙᕐᔪᐊᓇᖅᑐᒧᑦ).

ᑖᒃᑯᐊ ᖃᓄᐃᒍᑕᐅᕙᑦᑐᑦ ᐃᒪᐃᑦᑑᒻᒪᑕ ᐆᓇᕐᓂᖅ ᐆᓐᓂᐊᓇᕐᓗᓂ, ᖁᐃᕐᓱᑲᑕᓐᓂᖅ ᐅᕝᕙᓘᓐᓃᑦ ᐃᐱᓂᐊᖃᑦᑕᕐᓂᖅ.

ᐱᓕᐅᒥᒍᔅᓯ ᐅᖄᓚᒐᔭᖅᑯᓯ ᓄᓇᔅᓯᓐᓂ ᐋᓐᓂᐊᕕᔅᓯᓐᓄᑦ. ᐋᓐᓂᐊᕕᓕᐊᖅᑕᐃᓕᒋᔅᓯ ᐅᖄᓚᖅᑳᓚᐅᙱᓗᓯ.

ᖃᐅᔨᒪᔪᖓ ᑕᒪᓐᓇ ᐱᔭᕆᐊᑐᔪᐊᓗᒻᒪᑦ ᒫᓐᓇ, ᑭᓯᐊᓂ ᐱᓕᕆᖃᑎᒌᑦᑐᐃᓐᓇᐅᒍᑦᑕ; ᓴᐳᔾᔨᒍᓐᓇᕋᑦᑕ ᓄᓇᖅᑲᑎᑦᑎᓐᓂᒃ.

ᐊᑏ ᖃᐅᔨᒋᐊᖃᑦᑕᕆᔅᓯ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᑎᓐᓂᒃ ᐅᕗᖓ qia.ca ᑐᑭᓯᒋᐊᒃᑲᓐᓂᖃᑦᑕᕐᓗᓯ ᐊᒻᒪᓗ ᖃᐅᑕᒫᑦ ᑐᑭᓯᑎᑦᑎᒋᐊᕈᑕᐅᕙᑦᑐᓂᑦ.

ᒫᓐᓇᓕᓴᐅᓂᕐᐹᓂᑦ ᑐᓴᕋᔅᓴᓂᑦ ᐊᒻᒪᓗ ᑐᑭᓯᑎᑦᑎᒋᐊᕈᑎᐅᓯᒪᔪᓂᑦ ᑕᑯᖃᑦᑕᕈᓐᓇᕐᒥᔪᓯ ᖃᕋᓴᐅᔭᒃᑯᑦ ᐃᑭᐊᖅᑭᕕᖏᓐᓂ ᐅᕙᒍᑦ ᐅᑯᓇᓂ Facebook, Twitter ᐊᒻᒪᓗ Instagram.

ᖁᔭᓐᓇᒦᒃ ᐱᕕᖃᖅᑎᑦᑎᑲᐃᓐᓇᕋᔅᓯ. ᐅᓪᓗᖃᑦᑎᐊᕐᓂᐊᕆᕗᓯ ᖃᓄᐃᙱᑦᑎᐊᖁᓇᖅᑯᓯᓗ.