ᐊᓲᔪᓯ ᐃᓘᓐᓇᓯ,

ᐅᕙᖓ ᑐᓴᐅᒪᑎᑦᑎᔨᒋᔭᐅᔪᖓ ᓄᓇᑦᑎᓐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ.

ᑐᑭᓯᑎᑦᑎᒋᐊᕈᒪᓪᓗᖓ ᐃᓱᒫᓗᓇᕐᓯᓯᒪᑎᓪᓗᒍ ᒫᓐᓇ ᓂᕿᓂᑦ ᓂᐅᕕᐅᑎᔅᓴᐃᑦ ᐃᓄᑐᖃᕐᓄᑦ ᑐᕌᖓᔪᑦ. ᑖᓐᓇ ᐃᓚᒋᔭᐅᒻᒪᑦ ᕿᑭᖅᑕᓂᒃᑯᑦ ᐳᕝᕕᕆᓇᖅᑐᒧᑦ (ᓄᕙᕐᔪᐊᕐᓇᖅ−19) ᖃᓄᖅᑑᕈᑎᒋᓪᓗᒍ ᐃᑲᔫᑎᔅᓴᓕᐊᕆᓯᒪᔭᖏᑦ ᐸᕐᓇᑕᐅᓯᒪᔪᑦ.

ᐃᑲᔫᑎᔅᓴᐃᑦ ᐸᕐᓇᑕᐅᓯᒪᔪᑦ ᐋᖅᑭᓱᖅᑕᐅᓯᒪᔪᑦ ᕿᓚᒻᒥᐅᔪᒥᒃ ᑮᓇᐅᔭᓂᑦ ᐃᑲᔫᑎᖃᑲᐃᓐᓇᓂᐊᕐᖓᑕ ᕿᑭᖅᑕᓂᒥᐅᓄᑦ ᐃᓄᓐᓄᑦ ᐃᓄᑐᖃᕐᓄᑦ ᐳᕝᕕᕆᓇᖅᑐᒥᒃ ᖃᓂᒪᓇᖅᑐᖅᑕᖃᖅᑎᓪᓗᒍ ᓄᓇᕐᔪᐊᓕᒫᒥ.

ᐃᓱᒫᓗᓇᕐᓯᓯᒪᑎᓪᓗᒍ ᐃᑲᔫᑏᑦ ᐋᖅᑭᓯᒪᓂᐊᖅᑐᑦ 12ᓄᑦ ᐱᓇᓱᐊᕈᓯᕐᓄᑦ. ᕿᑭᖅᑕᓂᒃᑯᑦ ᑖᔅᓱᒥᖓ ᐃᑲᔫᑎᖃᕐᓂᐊᖅᑐᑦ ᐅᑭᐅᖅᑕᖅᑐᒥ ᑯᐊᐸᒃᑯᑦ ᓂᐅᕕᕐᕕᖏᑎᒍᑦ ᓄᓇᔅᓯᓐᓂ.

ᐃᒫᒃ ᐋᖅᑭᓯᒪᓂᐊᖅᑐᖅ:

• ᑖᓐᓇ ᐃᑲᔫᑎ ᐊᑐᕐᓗᒍ, ᕿᑭᖅᑕᓂᒥᐅᑕᖅ ᐃᓄᒃ ᐃᓄᑐᖃᖅ ᐅᑭᐅᓕᒃ 60-ᓂᑦ ᐅᖓᑖᓂᓘᓐᓃᑦ ᐊᒻᒪᓗ ᐊᒻᒪᓗ ᑲᖏᖅᑐᒑᐱᒻᒥᐅᑕᐅᓪᓗᓂ
• ᐊᑐᓂᑦ ᓂᐅᕕᐅᑎᔅᓴᑦ ᐊᒥᓲᓂᓖᑦ $250
  • ᐱᖃᑦᑕᓂᐊᖅᑕᑎᑦ ᓂᖀᑦ ᑲᑎᑕᐅᓯᒪᔪᑦ
• ᐊᑐᓂᑦ ᑲᖏᖅᑐᒑᐱᒻᒥᐅᑕᐃᑦ ᐃᓄᑐᖃᐃᑦ ᐱᖓᓲᔪᖅᑐᐃᕋᕐᓗᑎᒃ ᓂᕿᓂᑦ ᑲᑎᑕᐅᓯᒪᔪᓂᑦ ᐱᖃᑦᑕᓂᐊᖅᑐᑦ ᐃᓘᓐᓇᑎᒃ ᑲᑎᓪᓗᒋᑦ ᐊᑭᖏᑦ ᐊᒥᓲᓂᓖᑦ $1,500
• ᐃᓕᓴᖅᓯᕕᒃ ᑲᑐᔾᔨᖃᑎᒌᖏᓐᓃᙶᕐᓯᒪᔪᒥᒃ ᐋᑦᑎᔪᖃᕋᔭᖅᑐᖅ ᓂᕿᓂᑦ ᑲᑎᑕᐅᓯᒪᔪᓂᑦ ᐃᓄᑐᖃᕐᓄᑦ
• ᓂᖀᑦ ᑲᑎᑕᐅᓯᒪᔪᑦ ᑐᓂᔭᐅᖃᑦᑕᓂᐊᖅᑐᑦ ᒪᕐᕉᒃ ᐱᓇᓱᐊᕈᓰᒃ ᓈᔭᕋᐃᑉᐸᑎᒃ, ᐅᑯᓇᓂ ᐅᓪᓗᓂᑦ:
  • ᐄᐳᓗ 14      ᐊᒻᒪᓗ ᐄᐳᓗ 28
  • ᒪᐃ 12      ᐊᒻᒪᓗ ᒪᐃ 26
  • ᔫᓂ 9      ᐊᒻᒪᓗ ᔫᓂ 23

ᐊᑎᓕᐅᕆᐊᑐᙱᑦᑐᓯ ᑖᒃᑯᓄᖓ ᐃᑲᔫᑎᓄᑦ.

ᐃᓘᓐᓇᑎᒃ ᕿᑭᖅᑕᓂᒥᐅᑦ ᐃᓄᑐᖃᐃᑦ, ᐊᑎᓕᐅᖅᑕᐅᓯᒪᔪᑦ ᓄᓇᕗᑦ ᑐᙵᕕᒃᑯᑎᒍᑦ, ᐊᑎᓕᐅᖅᑕᐅᑦᑕᐅᑎᒋᖃᑦᑕᖅᑐᑦ.

ᑖᒃᑯᐊ ᐃᓱᒫᓗᓇᕐᓯᓯᒪᑎᓪᓗᒍ ᐃᑲᔫᑎᐅᒻᒪᑕ ᐃᓄᑐᖃᕐᓄᑦ.

ᕿᑭᖅᑕᓂᒃᑯᑦ ᐊᐱᕆᓯᒪᔪᑦ ᐃᓕᓴᖅᓯᕕᒃ ᑲᑐᔾᔨᖃᑎᒌᖏᓐᓂ ᑐᓂᓯᖃᑦᑕᖁᔨᒐᑎᒃ ᓂᕿᓂᑦ ᑲᑎᑕᐅᓯᒪᔪᓂᑦ ᐊᑎᓕᐅᖅᑕᐅᓯᒪᙱᑦᑐᓄᑦ.

ᐃᓄᑐᖃᓕᒫᑦᑎᐊᑦ ᐃᑲᔫᓯᐊᖅᑖᕈᓐᓇᖅᑐᑦ ᐱᖃᑦᑕᖁᒐᓗᐊᕋᑦᑎᒍ.

ᑐᑭᓯᒋᐊᒃᑲᓐᓂᕈᒪᒍᔅᓯ ᑖᒃᑯᐊ ᐃᑲᔫᑏᑦ ᒥᔅᓵᓄᑦ ᑎᑎᕋᖃᑦᑕᕈᓐᓇᖅᑐᓯ ᐃᕐᖐᓈᖅᑕᐅᑎᒃᑯᑦ:COVID-19@qia.ca ᐅᖄᓚᖃᑦᑕᕐᓗᓯᓘᓐᓃᑦ: 1-867-975-8383ᒧᑦ.

ᐱᐅᓂᕐᐹᖑᓂᐊᕐᖓᑦ ᓯᐊᒻᒪᖁᓇᒍ ᐳᕝᕕᕆᓇᖅᑐᖅ (ᓄᕙᕐᔪᐊᓇᖅᑐᖅ−19) ᒪᑯᓂᖓ ᐊᑐᖃᑦᑕᕈᔅᓯ:

• ᐅᐊᓴᖃᑦᑕᕐᓗᒋᑦ ᐊᒡᒐᓯ ᐅᐊᓴᕐᔫᒥᔭᒐᐃᓐᓇᕐᓗᓯ
• ᖁᐃᕐᓱᖃᑦᑕᕐᓗᓯ ᑕᒋᐅᖃᑦᑕᕐᓗᓯᓗ ᐊᐃᕐᓯᓐᓄᑦ
• ᐊᑦᑐᐊᑲᑕᑦᑕᐃᓕᓗᓯᐅᒃ ᑮᓇᓯ, ᐱᓗᐊᖅᑐᒥᒃ ᐃᔨᓯ, ᓱᕐᓗᓯ ᖃᓂᓯᓗ
• ᐃᓄᓕᓐᓃᕋᔭᓗᐊᖅᑕᐃᓕᓗᓯᓗ
  • ᐃᒫᒃ ᑐᑭᓕᒃ ᐊᖏᕐᓯᒪᓗᓯ
  • ᑲᑎᒪᖃᑎᒌᑦᑕᐃᓕᓗᓯ
  • ᐃᖅᑲᓇᐃᔭᕐᓗᓯ ᐊᖏᕐᕋᓯᓐᓂ ᐊᔪᕐᓇᖏᑉᐸᑦ

ᐳᐃᒍᖅᑕᐃᓕᒋᔅᓯ ᓇᒻᒥᓂᖅ ᐃᓂᖅᑎᕐᓯᒪᓗᓂ ᐊᓂᑦᑕᐃᓕᖃᑦᑕᕐᓗᓯ  ᖃᓄᐃᒍᑎᖃᖅᑑᔮᕈᔅᓯ ᖃᓂᒪᒍᑕᐅᕙᑦᑐᓂᑦ ᐳᕝᕕᕆᓇᖅᑐᒧᑦ (ᓄᕙᕐᔪᐊᓇᖅᑐᒧᑦ).

ᑖᒃᑯᐊ ᖃᓄᐃᒍᑕᐅᕙᑦᑐᑦ ᐃᒪᐃᑦᑑᒻᒪᑕ ᐆᓇᕐᓂᖅ ᐆᓐᓂᐊᓇᕐᓗᓂ, ᖁᐃᕐᓱᑲᑕᓐᓂᖅ ᐅᕝᕙᓘᓐᓃᑦ ᐃᐱᓂᐊᖃᑦᑕᕐᓂᖅ.

ᐱᓕᐅᒥᒍᔅᓯ ᐅᖄᓚᒐᔭᖅᑯᓯ ᓄᓇᔅᓯᓐᓂ ᐋᓐᓂᐊᕕᔅᓯᓐᓄᑦ. ᐋᓐᓂᐊᕕᓕᐊᖅᑕᐃᓕᒋᔅᓯ ᐅᖄᓚᖅᑳᓚᐅᙱᓗᓯ.

ᖃᐅᔨᒪᔪᖓ ᑕᒪᓐᓇ ᐱᔭᕆᐊᑐᔪᐊᓗᒻᒪᑦ ᒫᓐᓇ, ᑭᓯᐊᓂ ᐱᓕᕆᖃᑎᒌᑦᑐᐃᓐᓇᐅᒍᑦᑕ; ᓴᐳᔾᔨᒍᓐᓇᕋᑦᑕ ᓄᓇᖅᑲᑎᑦᑎᓐᓂᒃ.

ᐊᑏ ᖃᐅᔨᒋᐊᖃᑦᑕᕆᔅᓯ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᑎᓐᓂᒃ ᐅᕗᖓ qia.ca ᑐᑭᓯᒋᐊᒃᑲᓐᓂᖃᑦᑕᕐᓗᓯ ᐊᒻᒪᓗ ᖃᐅᑕᒫᑦ ᑐᑭᓯᑎᑦᑎᒋᐊᕈᑕᐅᕙᑦᑐᓂᑦ.

ᒫᓐᓇᓕᓴᐅᓂᕐᐹᓂᑦ ᑐᓴᕋᔅᓴᓂᑦ ᐊᒻᒪᓗ ᑐᑭᓯᑎᑦᑎᒋᐊᕈᑎᐅᓯᒪᔪᓂᑦ ᑕᑯᖃᑦᑕᕈᓐᓇᕐᒥᔪᓯ ᖃᕋᓴᐅᔭᒃᑯᑦ ᐃᑭᐊᖅᑭᕕᖏᓐᓂ ᐅᕙᒍᑦ ᐅᑯᓇᓂ Facebook, Twitter ᐊᒻᒪᓗ Instagram.

ᖁᔭᓐᓇᒦᒃ ᐱᕕᖃᖅᑎᑦᑎᑲᐃᓐᓇᕋᔅᓯ. ᐅᓪᓗᖃᑦᑎᐊᕐᓂᐊᕆᕗᓯ ᖃᓄᐃᙱᑦᑎᐊᖁᓇᖅᑯᓯᓗ.