ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᕿᑭᖅᑕᓃᒃᑯᑦ) ᓂᓪᓕᐊᖃᑕᐅᔪᑦ ᓂᐊᓪᓕᐊᒍᑎᒋᔭᐅᔪᓂᒃ ᐃᓄᖕᓄᑦ ᓄᓇᕗᒥᐅᓄᑦ ᓄᖅᑲᖁᔨᓕᖅᖢᑎᒃ ᑲᔪᓯᓯᒪᐃᓐᓇᖅᑐᒥᒃ ᐋᓐᓂᖅᓱᐃᖃᑦᑕᕐᓂᕆᔭᖏᓐᓂ ᐸᓖᓯᒃᑯᑦ. ᓈᒻᒪᒃᓴᙱᑦᑐᒍᑦ ᐃᓛᓐᓈᖅᓯᐅᕐᓂᕆᔭᖏᓐᓂ ᖃᓄᐃᓕᐅᕐᓂᕆᔭᖏᓐᓂᓗ ᑎᑎᕋᖅᓯᒪᔪᓂᒃ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐅᓂᒃᑳᖏᓐᓂᑦ ᓱᓕ ᑲᔪᓰᓐᓇᖅᑐᒥᒃ ᐊᒃᑐᐃᓯᒪᓂᖏᑦ ᓄᓇᓕᑦᑎᓐᓂ ᐅᓪᓗᒥ.  ᕿᑭᖅᑕᓃᒃᑯᑦ ᐱᖃᑕᐅᓕᖅᑐᑦ ᓄᓇᕗᑦ ᑐᙵᕕᒃᑯᓐᓂ ᓴᖅᑭᑎᑦᑎᖁᔨᓪᓗᑎᒃ ᐃᓛᒃᑰᖓᔪᒥᒃ ᐊᑐᖅᑕᐅᒍᓐᓇᖅᑐᒥᒃ ᐃᓄᑐᐃᓐᓇᐅᓗᑎᒃ ᕿᒥᕐᕈᔨᐅᒐᔭᖅᑐᓂᒃ.  ᐸᓖᓯᒃᑯᑦ ᑎᓕᔭᐅᔭᕆᐊᖃᙱᑦᑐᑦ ᓇᖕᒥᓂᖅ ᖃᐅᔨᓴᕐᓗᑎᒃ.

ᓴᖅᑭᓯᒪᓕᖅᑎᓪᓗᒍ ᑖᓐᓇ ᕿᕐᓂᖅᑕᐃᑦ ᐃᓅᓯᖏᑦ ᐱᒻᒪᕆᐅᖕᒥᔪᑦ ᒥᐊᓕᒐᓂ ᑲᓇᑕᒥᓗ ᑐᖁᑕᐅᑎᓪᓗᒍ ᐸᓖᓯᒃᑯᓐᓄᑦ ᑖᓐᓇ ᐳᐊᑕᑭ ᔪᐊᔾ ᕗᓗᐃᑦ, ᐃᓱᒫᓘᖕᓇᖅᑐᓂᑦᑕᐅᖅ ᑕᑯᓯᒪᔪᒍᑦ ᑲᓇᑕᐅᑉ ᐸᓖᓯᒃᑯᖏᓐᓄᑦ. ᑕᕝᕙᓂ ᐱᓇᓱᐊᕈᓯᕐᒥ ᓇᓪᓕᐅᕐᓂᖅᓯᐅᕐᓂᐅᔪᖅ ᓴᖅᑭᑕᐅᓚᐅᕐᓂᖓᑦ ᑭᖑᓪᓕᖅᐹᖅᓯᐅᑎᒥ ᐊᖏᕐᕋᙲᓐᓇᖅᑐᓂᒃ ᐃᓄᐊᖅᑕᐅᔪᓂᓗ ᓄᓇᖃᖅᑐᑐᖃᐃᑦ ᐊᕐᓇᖏᑦ ᓂᕕᐊᖅᓯᐊᖏᓪᓗ ᐅᓂᒃᑳᖓ.

ᐊᐃᑉᐱᕐᒥ ᔫᓐ 2ᒥ, ᐃᓄᐃᑦ ᖃᕆᓴᐅᔭᒃᑯᑦ ᑎᑎᕋᖅᓯᒪᔪᓂᒃ ᓴᖅᑭᕝᕕᐅᓚᐅᕐᒪᑕ ᕙᐃᔅᐳᒃᑯᑦ ᑕᕐᕆᔭᒐᒃᓴᓕᐅᖅᑕᐅᓯᒪᔪᒥᒃ ᓴᖅᑭᔮᖅᑎᑦᑎᔪᒥᒃ ᑖᒃᑯᐊ ᐸᓖᓯᒃᑯᑦ ᑐᓗᖅᓯᒪᒻᒪᕆᒃᖢᑎᒃ ᑲᒪᒋᔭᖃᓚᐅᕐᒪᑕ ᐊᒃᓱᐋᓗᒃ ᐃᓄᖕᒥ ᐊᖑᑎᒥ ᑭᙵᕐᓂ, ᓄᓇᕗᒥ.  ᐸᓖᓯᒃᑯᑦ ᓄᓇᓯᐅᑎᖓ ᑖᓐᓇ ᐊᖁᖅᑑᑉ ᒪᑐᖓ ᒪᑐᐃᖔᖅᑐᖅ ᑐᓗᖅᓯᓪᓗᓂ ᑖᔅᓱᒥᖓ ᐃᓄᖕᒥ ᐊᖑᑎᒥ ᐊᒻᒪᓗ ᑕᓪᓕᒪᒻᒪᕇᑦ ᐸᓖᓯᑦ ᐊᖑᑎᐅᑉ ᖄᖓᓅᖅᖢᑎᒃ ᓱᕈᓯᖅᑕᖃᖅᑎᓪᓗᒍ ᑕᐅᑐᒃᑐᓂ.  ᑖᓐᓇ ᐊᖑᑎ  ᑎᒍᔭᐅᓯᒪᓕᖅᑎᓪᓗᒍ ᑎᒍᔭᐅᕝᕕᖕᒥ ᐋᓐᓂᖅᓱᖅᑕᐅᓚᐅᕐᒥᔪᖅ ᐸᓖᓯᒃᑯᓐᓄᑦ ᐱᓯᒪᔭᐅᓕᖅᑎᓪᓗᒍ ᐊᒻᒪᓗ ᐋᓐᓂᐊᕐᕕᓕᐊᕈᔾᔭᐅᑲᐅᑎᒋᓚᐅᙱᖦᖢᓂ. ᑖᓐᓇ ᐊᖑᑎ ᑐᐊᕕᕐᓇᖅᑐᒃᑯᑦ ᐊᐅᓪᓚᕆᐊᖃᓚᐅᖅᑐᖅ ᐃᖃᓗᓐᓄᑦ, ᐃᑲᔪᖅᑕᐅᒍᓐᓇᖅᓯᓪᓗᓂ.

ᐸᓖᓯᑦ ᐱᓕᕆᑦᑎᐊᓚᐅᙱᒻᒪᑕ ᐃᓄᖕᒥ ᐊᖑᑎᒥᒃ ᑎᒍᓯᓇᓱᒃᑎᓪᓗᒋᑦ ᐊᒻᒪᓗ ᓱᓕ ᐱᓕᕆᑦᑎᐊᓚᐅᙱᒻᒥᔪᑦ ᓴᐳᔾᔨᔭᐅᓂᖓᓂ ᑎᒍᔭᐅᓯᒪᓕᖅᑎᓪᓗᒍ.

ᐅᓪᓗᒥᒧᑦ, ᐊᑕᐅᓰᓐᓇᖓ ᑕᓪᓕᒪᐅᑎᓪᓗᒋᑦ ᐸᓖᓯᑦ ᑕᑯᒃᓴᐅᔪᓂᒃ ᑕᕐᕆᔭᒐᒃᓴᒥ ᖃᐅᔨᓴᖅᑕᐅᔪᖅ.  ᓱᓕᓗ, ᑖᒃᑯᐊ ᐸᓖᓯᒃᑯᑦ ᖃᐅᔨᓴᑐᐃᓐᓇᕐᓂᐊᖅᑐᒡᒎᖅ ᑕᐃᔅᓱᒥᖓ ᑎᒍᔭᐅᓯᒪᑎᓪᓗᒍᑦ ᐋᓐᓂᖅᓱᐃᓚᐅᖅᑐᒥᑦ, ᐸᓖᓯᐅᙱᑦᑐᒥᒃ ᐱᓕᕆᐊᖃᓚᐅᖅᑐᒧᑦ.

1999ᒥᓂᑦ, 15ᖑᓯᒪᔪᑦ ᐃᓅᔪᓐᓃᖅᓯᒪᔪᑦ ᓄᓇᕗᒥ ᐸᓖᓯᒃᑯᑦ ᖃᓄᐃᓕᐅᖅᑎᓪᓗᒋᑦ.  ᔭᓐᓂᐊᓕ 1, 2020ᒥ, ᐊᑐᕚᒥ ᐸᓖᓯᒃᑯᑦ ᖃᐅᔨᓴᕆᐊᖁᔭᐅᓯᒪᖃᑦᑕᖅᑐᑦ ᑕᓪᓕᒪᓂ ᖃᓄᐃᓕᐅᕈᑕᐅᓯᒪᔪᓂᑦ, ᐱᓪᓗᒋᑦ ᓄᓇᕗᒥ ᐸᓖᓯᑦ.  ᓄᓇᕗᒥ ᖃᓄᐃᓕᐅᖅᑕᐅᔪᑦ ᐸᓖᓯᓄᑦ ᖁᓕᐅᙱᓪᓗᐊᖅᑕᖅᖢᒍ ᐅᓄᕐᓂᖅᓴᐅᔪᖅ ᐋᓐᑎᐊᕆᐆᒥᑦ.

ᑕᒪᒃᑯᐊ ᖃᓄᐃᓕᐅᕐᓂᐅᓯᒪᔪᑦ ᓴᖅᑭᕝᕕᐅᓯᒪᖕᒪᑕ ᐊᐱᖅᑯᑎᒥᒃ, ᑖᒃᑯᐊ ᐸᓖᓯᑦ ᐱᐅᓂᖅᐹᖑᒐᓗᐊᖅᐹᑦ ᖃᐅᔨᒋᐊᖃᑦᑕᕐᓂᖏᓐᓄᑦ ᖃᓄᐃᓕᐅᕈᑕᐅᔪᓂ ᓄᓇᓕᖕᓃᑦ? ᐸᓖᓯᒃᑯᑦ ᐊᑲᐅᓂᖅᐹᖑᒐᓗᐊᖅᑳᑦ ᐱᓕᕆᐊᖃᕐᓂᖏᑦ ᐃᓱᒪᔮᖅᑐᓂᒃ ᐊᒻᒪᓗ/ᐅᕝᕙᓘᓐᓃᑦ ᐊᖓᔮᖅᑐᓂᒃ/ᐊᖓᔮᕐᓇᖅᑐᖅᑐᓯᒪᔪᓂᒃ?

ᓯᕗᓕᖅᑎᕐᔪᐊᖅ ᑐᕉᑐ ᐊᒻᒪᓗ ᓄᓇᕗᑦ ᓯᕗᓕᖅᑎᖓ ᓴᕕᑲᑖᖅ ᖃᐅᔨᒪᔪᑦ ᑲᔪᓯᓯᒪᐃᓐᓇᖅᑐᒥᒃ ᐃᓚᐃᓐᓈᖃᑦᑕᕐᓂᕐᒥᒃ ᑲᓇᑕᒥ. ᖃᓄᐃᓕᐅᕐᓂᐅᔪᑦ ᐸᓖᓯᓄᑦ ᓄᖅᑲᕆᐊᖃᖅᑐᖅ, ᓄᓇᕗᑦ ᖃᓄᐃᓕᐅᕆᐊᕈᑎᖃᕆᐊᖃᖅᑐᖅ ᐊᒻᒪᓗ  ᖃᐅᔨᓴᖅᑎᖃᕐᓗᑎᒃ ᐊᑦᑕᕐᓇᖅᑐᒦᑦᑕᐃᓕᖁᓪᓗᑕ  ᓄᓇᓕᖕᓂ.