ᑐᓴᒐᒃᓴᑦ: ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓂᐅᖅᑲᐃᕗᑦ 105−ᓂᑦ ᖃᕋᓴᐅᔭᕋᓛᕐᓂᑦ ᐃᓕᓐᓂᐊᖅᑎᓄᑦ ᕿᑭᖅᑖᓗᒻᒦᑦᑐᓄᑦ
ᐃᖃᓗᐃᑦ, ᓄᓇᕗᑦ – ᓯᑏᕝᕙ 1, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᓂᐅᖅᑲᐃᕗᑦ 105−ᓂᑦ ᒎᒍᓪ ᐱᒃᓱᓪᕗᒃ ᒎ ᖃᕋᓴᐅᔭᕋᓛᕐᓂᑦ 13.3 ᐃᓐᓯᔅ ᐊᖏᑎᒋᓂᓖᑦ ᖃᕋᓴᐅᔭᕋᓛᑦ ᐃᑲᔪᖅᑕᐅᖁᓪᓗᒋᑦ ᐱᔪᓐᓇᖅᑐᑦ ᐃᓕᓐᓂᐊᖅᑏᑦ ᐃᓕᓐᓂᐊᕐᓂᖏᑦ ᐸᕝᕕᓴᒃᑕᐅᓯᒪᔪᑦ ᓄᕙᒡᔪᐊᕐᓇᖅ−19 ᐊᐃᑦᑑᑖᓘᖃᑦᑕᑎᓪᓗᒍ.
“ᐃᑲᔪᕈᒪᓚᐅᕋᑦᑕ ᐃᑲᔪᖅᑕᐅᔭᕆᐊᖃᖅᑎᓪᓗᒋᑦ ᕿᑭᖅᑖᓗᖕᒥᐅᑦ ᒪᒃᑯᒃᑐᖏᑦ ᖃᕋᓴᐅᔭᒃᑯᑦ ᐃᑭᐊᖅᑭᔾᔪᑎᒃᑯᓪᓗ ᐃᓕᓐᓂᐊᕈᓐᓇᓕᖁᓪᓗᒋᑦ ᐊᒥᓱᒻᒪᕇᑦ ᐃᓕᓐᓂᐊᖅᑕᐅᔭᕆᐊᓖᑦ ᖃᕋᓴᐅᔭᕐᒥᒃ ᑭᓯᐊᓂ ᐊᑐᕐᓗᓂᐅᓕᕐᒪᑦ ᐅᓪᓗᒥᐅᔪᖅ,” ᐅᖃᖅᑐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓᑦ, ᐸᐅᓗᓯ ᔫᓯᐱ ᐊᕿᐊᕈᖅ, “ᑕᒪᒃᑯᑎᒎᓇ ᐱᓕᕆᖃᑎᖃᕐᓂᑎᒍᑦ ᐊᔪᕐᓇᕈᓐᓃᕈᑕᐅᓚᐅᖅᐳᖅ ᐊᒥᓲᓂᖅᓴᓂᑦ ᖃᕋᓴᐅᔭᕋᓛᕐᓂᑦ ᐃᓄᐃᑦ ᐃᓕᓐᓂᐊᖅᑎᓄᑦ ᑐᓂᐅᖅᑲᐃᒃᑲᓐᓂᕐᓗᑕ.”
“ᖃᕋᓴᐅᔭᕋᓛᕋ ᐊᑐᖃᑦᑕᕐᓂᐊᖅᑕᕋ ᐃᓕᓴᐅᑎᓐᓄᑦ,” ᐅᖃᖅᑐᓂ ᒥᑦᑎᒪᑕᓕᒻᒥᐅᑕᖅ 14-ᓂᑦ ᐅᑭᐅᓕᒃ ᖁᑦᑎᓐᓂᓕᒻᒦᑦᑐᖅ 10−ᓂᑦ ᐃᓕᓴᕕᒻᒥ ᐃᓕᓐᓂᐊᖅᑎᐅᔪᖅ ᐊᒫᓐᑕ ᑰᓄ. “ᖁᕕᐊᓱᑦᑕᒻᒪᕆᐅᓚᐅᖅᐳᖓ ᖃᐅᔨᒐᒪ ᖃᕋᓴᐅᔭᕋᓛᖅᑖᓛᕋᒪ.”
ᑮᓇᐅᔭᑦ ᐃᑲᔫᑕᐅᒋᐊᙵᖅᓯᒪᔪᑦ ᑕᒪᒃᑯᓄᖓ ᐱᔪᓐᓇᕈᑎᒋᒋᐊᙵᐅᑕᐅᓚᐅᖅᓯᒪᕗᑦ 65−ᓂᑦ ᖃᕋᓴᐅᔭᕋᓛᕐᓂᑦ ᐱᔾᔪᔾᔭᐅᓪᓗᑕ ᑕᐃᑲᙵᑦ ᒫᔅᑐᑳᑦ ᑐᙵᕕᖓᑦ ᐊᒻᒪᓗ ᒐᕙᒪᑐᖃᒃᑯᓐᓂᑦ. ᐅᐊᑦᑎᐊᕈᙳᒃᑲᓐᓂᕐᒪᑦ ᐱᓕᕆᐊᖅ ᐊᖏᓪᓕᒋᐊᖅᑕᐅᓚᐅᖅᐳᖅ ᑐᓂᔭᐅᒃᑲᓐᓂᖅᑐᑕ ᐃᒪᓐᓇᒃᑲᓐᓂᕐᓂᑦ 40−ᓂᑦ ᖃᕋᓴᐅᔭᕋᓛᕐᓂᑦ ᐊᒃᑐᐊ−ᒃᑯᓐᓂᑦ. ᑲᓇᑕᒥ ᐊᖏᓛᖅ ᖃᐅᔨᓴᕐᓂᕐᒧᑦ, ᖃᕋᓴᐅᔭᓕᕆᓂᕐᒧᑦ, ᐊᐅᓚᐅᓯᕆᓂᕐᒧᑦ ᐊᒻᒪᓗ ᓈᓴᐅᓯᕆᓂᕐᒧᑦ ᐱᓕᕆᖃᑎᖃᕆᐊᖅᑏᑦ ᑲᑐᔾᔨᖃᑎᒌᖓᑦ.
ᓇᓕᐊᑐᐃᓐᓇᖅ ᐃᓄᒃ ᐃᓕᓐᓂᐊᖅᑎᐅᔪᖅ ᐅᑭᐅᓕᒃ 8-ᓂᑦ ᐊᒻᒪᓗ ᑎᑭᑦᑐᒍ 18-ᓄᑦ ᐊᑕᐅᓯᕐᒥᒃ ᐊᕐᕌᒍᒥᒃ ᐃᓚᖏᓐᓂ 13-ᓂᑦ ᕿᑭᖅᑖᓗᒻᒥ ᓄᓇᓕᒻᒥᐅᑕᐅᓯᒪᓕᖅᑐᖅ ᐱᓕᕆᐊᕐᒥᒃ ᐊᑐᕈᓐᓇᓚᐅᖅᐳᖅ ᖃᕋᓴᐅᔭᕋᓛᖅᑖᕋᓱᐊᕈᓐᓇᕐᓗᓂ.
ᐊᕕᑦᑐᖅᓯᒪᓂᖏᑦ ᖃᑦᑎᐅᓂᖏᑕ ᖃᕋᓴᐅᔭᕋᓛᑦ ᐊᐅᓪᓚᖅᑎᑕᐅᓯᒪᓕᖅᑐᑦ ᕿᑭᖅᑖᓗᖕᒥ:
- ᐃᒃᐱᐊᕐᔪᒃ 10
- ᑲᖏᖅᑐᒑᐱᒃ 3
- ᐊᐅᓱᐃᑦᑐᖅ 2
- ᐃᖃᓗᐃᑦ 34
- ᐃᒡᓗᓕᒃ 7
- ᑭᒻᒥᕈᑦ 5
- ᑭᙵᐃᑦ 5
- ᐸᖕᓂᖅᑑᖅ 10
- ᒥᑦᑎᒪᑕᓕᒃ 12
- ᕿᑭᖅᑕᕐᔪᐊᖅ 5
- ᖃᐅᓱᐃᑦᑐᖅ 2
- ᓴᓂᑭᓗᐊᖅ 4
- ᓴᓂᕋᔭᒃ 6
ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒃᑲᕐᓗᒍ:
ᓰᒪ ᓴᕼᐊᕐ ᔨᐅᕆᕼᐃ
ᑐᑭᒧᐊᑦᑎᑦᑎᔨ ᑐᓴᐅᒪᖃᑦᑕᐅᑎᔪᓕᕆᓂᕐᒧᑦ,
ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ
867.975.8413
1.800.667.2742
