ᓴᖅᑭᑕᖅ: ᔪᓚᐃ 6, 2020

ᐱᔾᔪᑦ: ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᑐᐊᕕᕐᓇᖅᑐᒃᑯᑦ ᓂᕿᑖᕈᑎᒃᓴᖏᑦ ᐃᓐᓇᑐᖃᐃᑦ ᐊᑯᓂᐅᓂᖅᓴᖅ ᐊᑐᕋᒃᓴᐅᑎᑕᐅᓕᖅᑐᖅ ᐊᒻᒪᓗ ᓄᓇᕗᑦ ᓯᓚᑖᓂᕐᒥᐅᑕᓄᑦ ᐊᑐᖅᑕᐅᔪᓐᓇᖅᓯᓪᓗᑎᑦ

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐱᓕᕆᐊᖓᑦ ᐃᑲᔪᕋᓱᐊᕈᑎᒋᔭᐅᔪᖅ ᐃᓐᓇᑐᖃᕐᓄᑦ ᐊᑦᑐᖅᑕᐅᓂᖃᖅᓯᒪᔪᑦ ᓄᕙᒡᔪᐊᕐᓇᖅ-19−ᒥᒃ ᐊᐃᑦᑑᑎᔪᐊᓘᖃᑦᑕᑎᓪᓗᒋᑦ ᐊᑯᓂᐅᓂᖅᓴᖅ ᐊᑐᕋᒃᓴᐅᓕᕐᒥᔪᖅ ᐊᒻᒪᓗ ᓄᓇᕗᑦ ᓯᓚᑖᓂᕐᒥᐅᑕᓄᑦ ᐊᑐᖅᑕᐅᔪᓐᓇᖅᓯᓪᓗᑎᑦ ᐱᓕᕆᐊᖅ.

ᑐᐊᕕᕐᓇᖅᑐᒃᑯᑦ ᓂᕿᑖᕈᑎᒃᓴᐅᑎᖏᑦ ᐃᓐᓇᑐᖃᕐᓄᑦ ᒫᓐᓇ ᐊᑐᐃᓐᓇᐅᒪᓕᕐᒥᔪᑦ ᐋᒡᒌᓯ 18−ᕈᕋᓱᐊᕐᓂᖓᓂᒃ. ᒫᓐᓇᐅᔪᖅ ᐱᓕᕆᐊᖅ ᐊᑐᖅᑕᐅᔪᓐᓇᖅᑐᖅ ᑕᐃᒃᑯᓄᖓ ᕿᑭᑦᑖᓗᖕᒥᐅᑕᓄᑦ ᐃᓄᖕᓄᑦ ᐅᑭᐅᓖᑦ 60-ᓂᑦ ᐅᖓᑖᓄᓪᓗ ᓄᓇᕗᑦ ᓯᓚᑖᓂᕐᒥᐅᑕᓄᑦ.

ᑖᓐᓇ ᐱᓕᕆᐊᖅ ᐋᖅᑭᒃᓱᖅᑕᐅᓯᒪᕗᖅ ᕿᓚᒥᐅᔪᒃᑰᒐᓗᐊᖅ ᑮᓇᐅᔭᖅᑎᒍᑦ ᐃᑲᔪᖅᑐᖅᑕᐅᖁᓪᓗᒋᑦ ᕿᑭᑖᓗᖕᒥᐅᑦ ᐃᓄᐃᑦ ᐃᓐᓇᑐᖃᖏᑦ ᓄᕙᒡᔪᐊᕐᓇᖅ-19 ᐊᐃᑦᑑᑕᐅᖃᑦᑕᑎᓪᓗᒍ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᐅᓚᑦᑎᒻᒪᑕ ᑕᒪᔅᓱᒥᖓ ᐱᓕᕆᐊᕐᒥᒃ ᑯᐊᐸᒃᑯᑎᒍᑦ ᓂᐅᕕᕐᕕᖏᖕᓂ ᓄᓇᓕᔅᓯᖕᓂ. ᐃᖃᓗᓐᓂᓕ, ᐱᓕᕆᐊᖅ ᐊᐅᓚᑕᐅᕗᖅ ᓴᓪᓗᒥᓂᑉ ᓂᐅᕕᕐᕕᖓᓂ ᐊᑐᖅᑕᐅᔪᓐᓇᖅᑐᑎᑦ ᓂᕿᑖᕈᓐᓇᐅᑏᑦ.

ᖃᓄᖅ ᑕᒪᓐᓇ ᐊᑐᖅᑕᐅᔪᓐᓇᕐᒪᖔᖅ:

• ᒪᓕᑦᑐᒍ ᑖᓐᓇ ᐱᓕᕆᐊᖅ, ᕿᑭᖅᑖᓗᒻᒥᐅᖅ ᐃᓄᒃ ᐃᓐᓇᑐᖃᐅᓂᕋᖅᑕᐅᕗᖅ 60−ᓂᒃ ᐅᑭᐅᖃᕐᓗᓂ ᐅᖓᑖᓄᓪᓗ, ᕿᑭᖅᑖᓗᒻᒥᐅᑕᐅᓗᓂ, ᐊᑎᓕᐅᖅᓯᒪᖃᑕᐅᓗᓂᓗ ᓄᓇᕗᑦ ᑐᙵᕕᒃ ᑎᒥᖓᓄᑦ.
• ᐊᑐᓂ ᓂᕿᑖᕈᓐᓇᐅᑎ ᐊᑭᓕᒃ $250
  • ᓂᕿᑖᕈᓐᓇᐅᑎᒥᒃ ᐱᒐᔭᖅᑐᑎᑦ ᐊᐅᒃᑕᔫᖑᓗᓂ
• ᐊᑐᓂ ᕿᑭᖅᑖᓗᒻᒥᐅᖅ ᐃᓐᓇᑐᖃᖅ ᑎᓴᒪᓂᑦ ᓂᕿᑖᕈᓐᓇᐅᑎᒃᑲᓐᓂᕐᓂᒃ ᐱᔪᓐᓇᐅᖅᑐᖅ ᑲᑎᓕᒫᖅᑐᒋᑦ ᑕᒪᒃᑯᐊ $1,000−ᖑᓪᓗᑎᑦ
• ᑯᐊᐸᒃᑯᑦ ᓂᐅᕕᕐᕕᖓᓅᕈᓐᓇᖅᑐᑎᑦ ᓄᓇᓕᒋᔭᕐᓂᒃ ᐊᐃᒃᓯᕐᓗᑎᑦ ᓂᕿᑖᕈᓐᓇᐅᑎᒥᒃ ᐊᐅᒃᑕᔫᒥᒃ
• ᐊᐅᒃᑕᔫᑦ ᓂᕿᑖᕈᓐᓇᐅᑏᑦ ᐊᐃᔭᐅᔪᓐᓇᖅᑐᑦ ᐅᑯᐊᖑᑎᓪᓗᒋᑦ ᐅᓪᓗᖏᑦ:
  • ᔪᓚᐃ 7              ᔪᓚᐃ 21
  • ᐋᒡᒌᓯ 4              ᐋᒡᒌᓯ 18

ᕿᑭᖅᑖᓗᒻᒥᐅᑦ ᐃᓄᐃᑦ ᐅᑭᐅᓖᑦ 60−ᓂᑦ ᐅᖓᑖᓂᓗ ᓄᓇᕗᑦ ᓯᓚᑖᓂᒥᐅᑕᐅᓪᓗᑎᑦ ᐱᒐᔭᖅᑐᑦ ᑕᒪᔅᓱᒥᖓ ᐱᓕᕆᐊᖅᑎᒍᑦ ᐊᑕᐅᓯᐊᖅ ᐊᑭᓕᖅᑕᐅᓗᑎᑦ $750−ᓂᑦ ᓯᒃᑭᒃᓴᔭᐅᓗᓂ ᑎᑎᖅᑲᓂᐊᕐᕕᒃᑯᑎᒍᑦ ᐊᐅᓪᓚᖅᑎᑕᐅᒐᔭᖅᑐᑦ ᔪᓚᐃ ᑕᖅᑭᖓᑕ ᕿᑎᐊᓂ.

ᑲᖏᖅᑐᒑᐱᖕᒥ ᐃᓐᓇᑐᖃᐃᑦ ᐱᔪᓐᓇᒃᑲᓐᓂᕐᒥᔪᑦ ᑎᓴᒪᒃᑲᓐᓂᕐᓂᒃ ᓂᕿᓂᒃ ᑲᑎᖅᓱᖅᑕᐅᓯᒪᔪᓂᑦ ᓂᕿᑖᕈᓐᓇᐅᑎᒥᒃ ᐊᐅᒃᑕᔫᕐᒥᒃ ᐱᙱᖔᕐᓗᑎᑦ.

ᐃᓕᓴᖅᓯᕕᒃ ᑲᑐᔾᔨᖃᑎᒌᖏᑦ ᐸᔪᒃᑲᔭᖅᑐᑦ ᓂᕿᓂᒃ ᑲᑎᖅᓱᖅᑕᐅᓯᒪᔪᓂᑦ ᑖᒃᑯᓄᖓ ᐃᓐᓇᑐᖃᕐᓄᑦ ᑲᖏᖅᑐᒑᐱᖕᒥ.

ᐊᑎᓕᐅᕆᐊᑐᙱᑦᑐᑎᑦ ᑖᔅᓱᒧᖓ ᐱᓕᕆᐊᕐᒧᑦ.

ᑕᒪᐃᓐᓂ ᕿᑭᖅᑖᓗᖕᒥᐅᑦ ᐃᓐᓇᑐᖃᖏᑦ, ᐊᑎᓕᐅᖅᑕᐅᖃᑕᐅᓯᒪᔪᑦ ᓄᓇᕗᑦ ᑐᙵᕕᒃᑯᓐᓄᑦ, ᐊᑎᓕᐅᖅᑕᐅᑲᐅᑎᒋᓲᑦ ᐱᓕᕆᐊᕐᒧᑦ.

ᑖᓐᓇ ᑐᐊᕕᕐᓇᖅᑐᖅᑎᒍᑦ ᐃᑲᔫᑎᒃᓴᐅᕗᖅ ᐃᓐᓇᑐᖃᕐᓄᑦ.

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᐱᕆᓯᒪᕗᑦ ᑯᐊᐸᒃᑯᓐᓂᑦ ᐊᒻᒪᓗ ᐃᓕᓴᖅᓯᕕᒃ ᑲᑐᔾᔨᖃᑎᒌᓂᒃ ᑐᓂᐅᖅᑲᐃᖁᔭᐅᒐᑎᑦ ᐊᐅᒃᑕᔫᓂᒃ ᓂᕿᑖᕈᓐᓇᐅᑎᓂᒃ ᐅᕝᕙᓘᓐᓃᑦ ᓂᕿᓂᒃ ᑲᑎᖅᓱᖅᑕᐅᓯᒪᔪᓂᑦ ᐃᓄᓐᓄᑦ ᐊᑎᓕᐅᖅᑕᐅᖃᑕᐅᓯᒪᙱᑦᑐᓄᑦ.

ᐃᓐᓇᑐᖃᐃᑦ ᐊᒥᓲᓂᖅᐹᑦ ᐃᑲᔪᖅᑕᐅᔪᓐᓇᕐᓂᓕᒫᖏᖕᓂ ᐃᑲᔪᖅᑕᐅᖁᒐᑦᑎᒍᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᑕᒪᔅᓱᒪᑉ ᐱᓕᕆᐊᑉ ᒥᒃᓵᓄᑦ ᖃᕋᓴᐅᔭᒃᑯᑦ ᑎᑎᕋᕈᓐᓇᖅᑐᑎᑦ ᐅᕗᖓ: COVID-19@qia.ca ᐅᕝᕙᓘᓐᓃᑦ ᐅᖄᓚᓗᑎᑦ: 1-867-975-8383.

ᑕᑯᓂᐊᕐᓗᒍ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᑭᐊᖅᑭᕕᖓᓂᒃ ᐅᕙᓄ qia.ca ᑐᑭᓯᒋᐊᕈᑎᒃᑲᓐᓂᕐᓂᒃ ᐅᖃᓕᒫᖁᓪᓗᑎᑦ ᐊᒻᒪᓗ ᖃᐅᑕᒫᑦ ᑐᓴᕆᐊᖅᑎᑦᑎᒍᑎᒃᓴᖏᖕᓂᒃ ᐅᖃᓕᒫᖁᑎᓪᓗᑎᑦ.

ᐅᓪᓗᒥᓕᓴᐅᓛᖑᔪᓂᓪᓗ ᐱᕙᓪᓕᐊᔪᓂᒃ ᐊᒻᒪᓗ ᑐᓴᕆᐊᖅᑎᑦᑎᓂᖏᖕᓂᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᕙᐃᔅᕗᒃ−ᖓᒍᑦ ᐅᖃᓕᒫᕈᓐᓇᕐᒥᔪᑎᑦ ᐊᒻᒪᓗ ᑐᐃᑐᕐ ᐊᒻᒪᓗ ᐃᓐᔅᑎᒍᕌᒻ−ᖓᓂᒃ.

 

ᑐᑭᓯᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒃᓴᖅ:

ᓰᒪ ᓴᕼᐊᕐ ᓯᐊᕋᕼᐃ,

ᑐᑭᒧᐊᒃᑎᑦᓯᔨ, ᑐᓴᐅᒪᖃᑦᑕᐅᑎᓄᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

867.975.8413

1.800.667.2742