ᐃᖃᓗᐃᑦ, ᓄᓇᕗᑦ − ᑎᓯᐱᕆ 11, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ (QIA) ᐱᖓᔪᒋᓕᖅᑕᖏᓐᓂ ᑲᒪᒋᔭᖃᓛᓕᕐᒥᒻᒪᑕ ᖃᓂᒪᓇᖅᑐᖅᑕᖃᕐᓂᖓᓄᑦ ᐱᓇᓱᐊᕈᑕᐅᔪᓂᑦ ᐃᑲᔫᑕᐅᓂᐊᖅᑐᓂᑦ ᐃᓄᓐᓄᑦ ᐃᓄᓕᕆᔨᒃᑯᓐᓂᑦ ᐃᑲᔫᓯᐊᖅᑖᐸᑦᑐᓄᑦ, ᐃᓕᓴᔭᖅᑐᐸᑦᑐᓄᑦ ᓱᕈᓯᕐᓄᑦ, ᐊᒻᒪᓗ ᐊᑑᑎᕕᐅᔪᓄᑦ ᓄᓇᓕᓐᓄᑦ ᖃᓂᒪᓇᖅᑐᖅᑕᖃᖅᑎᓪᓗᒍ ᓄᓇᕐᔪᐊᓕᒫᒥ.

“ᑖᒃᑯᐊ ᐱᓇᓱᐊᕈᑕᐅᔪᑦ ᐋᖅᑭᓱᖅᑕᐅᓯᒪᔪᑦ ᐃᑲᔫᑕᐅᓂᐊᕐᖓᑕ ᐃᓄᓐᓄᑦ ᓱᕈᓯᕐᓄᑦ ᐃᓕᓴᔭᖅᑐᐸᑦᑐᓄᑦ ᐊᒻᒪᓗ ᐃᑲᔫᑕᐅᓂᐊᕐᖓᑕ ᐃᓚᒌᓄᑦ ᐃᑲᔪᖅᑕᐅᔭᕆᐊᓕᓐᓂᑦ ᓂᕿᑖᕈᑎᔅᓴᓄᑦ,” ᐅᖃᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓᑦ ᐸᐅᓗᓯ ᐊᕿᐊᕈᖅ, “ᑲᒪᒋᔭᖃᕋᑦᑕ ᖃᐅᔨᒪᑦᑎᐊᕈᒪᓪᓗᑕ ᑭᒃᑯᑐᐃᓐᓇᓕᒫᑦᑎᐊᑦ ᐃᓄᐃᑦ ᑭᑭᑕᐅᓯᒪᖁᓇᒋᑦ ᖃᓂᒪᓇᖅᑐᖅᑕᖃᖅᑎᓪᓗᒍ ᓄᓇᕐᔪᐊᓕᒫᒥ.”

ᐱᖓᔪᒋᓕᖅᑕᖏᓐᓂ ᑲᒪᒋᔭᐅᓂᐊᖅᑐᑦ ᕿᑭᖅᑕᓂᒃᑯᓐᓂ ᖃᓂᒪᓇᖅᑐᖅᑕᖃᖅᑎᓪᓗᒍ ᐱᓇᓱᐊᕈᑎᖏᓐᓂ ᐅᑯᐊ:

• $731,250 ᕿᑭᖅᑕᓂ ᖃᓂᒪᓇᖅᑐᖅᑕᖃᕐᓂᖓ ᐃᓱᒫᓗᓇᕐᓯᓯᒪᑎᓪᓗᒍ ᓂᕿᑖᕈᑎᔅᓴᐃᑦ ᐃᓚᒌᓄᑦ ᐃᓄᓕᕆᔨᒃᑯᓐᓂ ᐃᑲᔫᓯᐊᖅᑖᐸᑦᑐᓄᑦ.
• $663,665 ᖃᓂᒪᓇᖅᑐᖅᑕᖃᕐᓂᖓᓄᑦ ᐊᑑᑎᕕᐅᔪᓄᑦ ᓄᓇᓕᓐᓄᑦ ᐃᑲᔫᑏᑦ − ᓴᓂᑭᓗᐊᕐᒥᐅᓄᑦ
• $311,970 ᕿᑭᖅᑕᓂ ᖃᓂᒪᓇᖅᑐᖅᑕᖃᕐᓂᖓᓄᑦ ᐃᓕᓴᕕᒻᒥ ᓂᕿᓄᑦ ᐃᑲᔫᑕᐅᕙᑦᑐᓄᑦ
• $301,215 ᓂᕆᐅᓇᙱᑦᑐᓄᑦ ᑎᑎᖅᑭᕆᔾᔪᑎᓄᓪᓗ ᐊᑭᓕᕆᐊᓕᓐᓄᑦ

ᕿᑭᖅᑕᓂᒃᑯᑦ ᓄᑖᑦ ᖃᓂᒪᓇᖅᑐᖅᑕᖃᕐᓂᖓᓄᑦ ᐱᓇᓱᐊᕈᑎᒋᓂᐊᖅᑕᖏᑦ ᐊᑐᐃᓐᓇᐅᓯᓛᖅᑐᑦ ᐃᓄᓐᓄᑦ 2021ᖑᓕᖅᑲᑦ. ᓇᓗᓇᐃᕐᓯᒋᐊᒃᑲᓐᓂᖃᑦᑕᓛᖅᑐᑦ ᐊᑐᓂᑦ ᐱᓇᓱᐊᕈᑎᖏᑕ ᒥᔅᓵᓄᑦ ᐃᓄᓕᒫᓄᑦ ᔮᓐᓄᐊᓕᐅᓕᖅᑲᑦ.

ᑮᓇᐅᔭᐃᑦ ᕿᑭᖅᑕᓂᒃᑯᑦ ᖃᓂᒪᓇᖅᑐᖅᑕᖃᖅᑎᓪᓗᒍ ᐃᑲᔫᑎᖏᑦ ᐸᕐᓇᐅᑏᑦ ᐱᖓᔪᒋᓕᖅᑕᖏᓐᓂ ᑖᒃᑯᓇᙶᕐᓯᒪᔪᑦ ᓄᓇᖃᖅᑐᑐᖃᕐᓄᑦ ᓄᓇᓕᓐᓄᑦ ᐃᑲᔫᑏᑦ ᑮᓇᐅᔭᑦ (ICSF) ᓇᓗᓇᐃᖅᑕᐅᔪᔪᑦ ᒐᕙᒪᑐᖃᒃᑯᓐᓂᑦ. ᕿᑭᖅᑕᓂᒃᑯᑦ ᑐᓂᓯᔭᐅᓯᒪᒻᒪᑕ ᑖᒃᑯᓇᙶᖅᑐᓂᑦ ᐃᒪᓐᓇᓂᑦ ᐊᒥᓲᓂᓕᓐᓂᑦ $2,008,101.

ᕿᑭᖅᑕᓂᒃᑯᑦ ᑐᓂᓯᔭᐅᔪᒻᒪᑕ $6,132.544 ᓯᕗᓪᓕᕐᒥ ᑲᒪᒋᔭᐅᔪᓂᑦ ᐊᐅᔭᖅ 2020, ᐊᒻᒪᓗ ᐃᒪᓐᓇᑲᓐᓂᕐᓂᑦ $4,311,793 ᐅᑭᐊᔅᓵᖅ 2020 ᓄᓇᖃᖅᑐᑐᖃᕐᓄᑦ ᓄᓇᓕᓐᓄᑦ ᐃᑲᔫᑏᑦ ᑮᓇᐅᔭᑦ (ICSF). ᑖᒃᑯᐊ ᑮᓇᐅᔭᑦ ᐊᑐᖅᑕᐅᔪᔪᑦ ᐃᑲᔫᑕᐅᓪᓗᑎᒃ: ᐃᓱᒫᓗᓇᕐᓯᓯᒪᑎᓪᓗᒍ ᓂᕿᑖᕈᑎᔅᓴᓄᑦ ᐃᓄᑐᖃᕐᓄᑦ, ᐊᖑᓇᓱᖃᑦᑕᓂᕐᒧᑦ/ᐃᓄᓕᓐᓃᕋᔭᓗᐊᖅᑕᐃᓕᓂᕐᒧᑦ ᐊᐅᓪᓚᕐᓯᒪᒍᑎᔅᓴᑦ ᐃᑲᔫᑏᑦ, ᐊᒻᒪᓗ ᕿᑭᖅᑕᓂ ᐃᓚᒌᓄᑦ ᐃᑲᔫᑏᑦ.

ᑐᑭᓯᒋᐊᒃᑲᓐᓂᕈᒪᒍᔅᓯ, ᑐᑭᓯᒋᐊᕐᕕᐅᖃᑦᑕᕐᓕ:

ᓰᒪ ᓴHᐊ ᔨᐅᕋHᐃ, ᑐᑭᒧᐊᒃᑎᑦᑎᔨ ᑐᓴᐅᒪᖃᑦᑕᐅᑎᑎᑦᑎᓂᕐᒧᑦ, ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂ

szerehi@qia.ca

867.975.8413 or

1.800.667.2742