ᐱᒋᐊᕈᑎᖃᕈᒪᕗᖓ ᐃᖅᑲᐅᒪᑲᐃᓐᓇᕈᒪᓪᓗᒍ ᑲᑎᒪᔨᐅᖃᑎᒋᓚᐅᖅᑕᕗᑦ ᔮᓂ ᒪᓚᐃᔭ ᑯᑉᓗ.
ᐃᓚᖏᑦ, ᐱᖃᑎᖏᑦ ᐊᒻᒪᓗ ᐃᒡᓗᓕᖕᒥᐅᑦ ᓇᓪᓕᒋᔭᐅᕗᑦ ᐃᖅᑲᐅᒪᔭᐅᓪᓗᑎᓪᓗ.

ᔮᓂ ᒪᓚᐃᔭ ᑯᑉᓗ ᑐᙵᓇᓚᐅᖅᑐᖅ, ᐃᖕᒥᓂᒡᓗ ᒥᑭᒡᓕᑎᓯᒪᓪᓗᓂ ᐊᒻᒪᓗ ᐅᐱᒋᔭᐅᑦᑎᐊᖅᖢᓂ ᓄᓇᓕᖕᒥ ᓯᕗᓪᓕᖅᑎᐅᓂᕐᒧᑦ. ᖁᕕᐊᒋᔭᖃᓚᐅᖅᑐᖅ ᐃᓕᖅᑯᓯᑦᑎᓐᓂ ᐊᒻᒪᓗ ᐱᓕᕆᑦᑎᐊᓚᐅᖅᖢᓂ ᓄᐊᓴᐃᓪᓗᓂ ᑎᑎᕋᖅᐸᓪᓕᐊᓪᓗᒋᑦ ᐊᒻᒪ ᓴᐳᔾᔨᒍᒪᓪᓗᒋᑦ ᐃᓄᐃᑦ ᐃᓐᓇᖏᑦ ᖃᐅᔨᒪᔭᖏᓐᓂ. ᐊᒃᓱᐊᓗᒃ ᑭᖑᓂᖃᕐᓂᐊᖅᑐᖅ.

ᐳᕝᕕᕆᓐᓇᖅᑐᖅ ᖃᓂᒪᓇᖅ-19ᒧᑦ (ᓄᕙᓐᓇᕐᔪᐊᖅ) ᐱᓕᕆᐊᖑᓯᒪᔪᑦ

ᖃᐅᔨᒪᒐᔅᓯ, ᐱᔾᔪᑎᒋᓪᓗᒍ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ), ᐃᖅᑲᓇᐃᔮᕗᑦ ᐊᐅᓚᓂᕆᔭᕗᓪᓗ ᐊᓯᔾᔨᖅᓯᒪᓕᕐᒪᑦ ᑕᖅᑭᓂ ᐊᓂᒍᖅᓯᒪᔪᓂ. ᐋᖅᑭᒋᐊᖅᓯᒋᐊᖃᓚᐅᖅᑐᑦ ᐃᖅᑲᓇᐃᔭᕐᓂᕆᔭᑦᑎᓐᓂ ᐊᒻᒪᓗ ᖃᓄᖅ ᐃᖅᑲᓇᐃᔭᖅᑎᐅᓪᓗᑎᒃ ᑲᑐᔾᔨᖃᑎᒌᖃᑦᑕᕐᓂᖏᓐᓄᑦ. ᐃᖅᑲᓇᐃᔭᖅᑎᕗᑦ ᐋᖅᑭᒋᐊᖅᓯᒪᔪᑦ ᐱᓕᕆᐊᒃᓴᕆᔭᖏᓐᓂ ᐊᒻᒪᓗ ᓴᖅᑭᑎᑦᑎᓯᒪᓪᓗᑎᒃ ᐅᐸᓗᖓᐃᔭᐅᑎᒋᔭᐅᔪᓂᑦ ᐱᒋᐊᕈᑎᓂ, ᐊᒡᓛᓪᓘᓐᓃᑦ ᑲᑎᒪᓂᕆᖃᑦᑕᖅᑕᕗᑦ ᐊᓯᔾᔨᖅᓯᒪᖃᑕᐅᓕᕐᒪᑦ.

ᑕᒪᒃᑯᐊ ᑭᐅᔾᔪᑎᒋᓪᓗᒋᑦ, ᐱᓕᕆᐊᕆᓯᒪᔭᕗᑦ ᑕᖅᑭᓂᑦ ᖄᖏᖅᓯᒪᔪᓂᑦ ᑐᕌᖓᓂᖅᓴᐅᓕᖅᑲᐅᖕᒪᑕ ᒫᓐᓇ ᐊᑐᓕᖅᑕᑦᑎᓐᓂ ᐊᒻᒪᓗ ᒫᓐᓇ ᐱᔭᐅᔭᕆᐊᓕᖕᓄᑦ ᕿᑭᖅᑕᓂ ᐃᓄᖕᓂ ᐊᑐᖅᑎᓪᓗᒍ ᑕᒪᓐᓇ ᖃᓂᒪᓐᓈᓗᒃ.

ᒫᑦᓯᐅᑉ ᕿᑎᐊᓂ, ᕿᑭᖅᑕᓃᒃᑯᑦ ᐊᑐᓕᖅᑎᑦᑎᒋᐊᖃᓚᐅᕐᒪᑕ ᐱᔾᔪᑎᒋᓪᓗᒍ  ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᐊᒻᒪᓗ ᓄᖅᑲᖅᑎᑕᐅᓪᓗᑎᒃ ᖃᐅᑕᒫᖅᓯᐅᑎᓂ ᐱᓕᕆᐊᖑᕙᒃᑐᓂᒃ ᐊᒻᒪᓗ ᐊᒡᓚᕝᕕᕗᑦ ᒪᑐᓪᓗᒍ ᐃᓄᖕᓄᑦ.  ᐃᖅᑲᓇᐃᔭᖅᑎᕗᑦ ᐃᖅᑲᓇᐃᔭᖅᑎᑕᐅᖔᓕᓚᐅᖅᑐᑦ ᐅᐸᓗᖓᐃᔭᐅᑎᓂᑦ ᐱᒋᐊᕈᑎᓂ.

ᐱᒋᐊᕈᑎᒋᔪᒪᕙᒃᑲ ᐱᓕᕆᐊᖑᓯᒪᔪᓄᑦ ᕿᑭᖅᑕᓃᒃᑯᓐᓄᑦ.

ᕿᑭᖅᑕᓃᒃᑯᑦ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ ) ᐱᒋᐊᕈᑎᒋᓯᒪᔭᖏᑦ

ᒫᑦᓯ 30ᒥ, ᕿᑭᖅᑕᓃᒃᑯᑦ ᓴᖅᑭᑎᑦᑎᓚᐅᕐᒪᑕ ᒪᕐᕉᓂ ᐱᒋᐊᕈᑎᓂ ᐃᑲᔫᑎᐅᓂᐊᖅᑐᓄᑦ ᕿᑭᖅᑕᓂ ᐃᓄᖕᓄᑦ ᐊᑐᖅᑎᓪᓗᒍ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᐱᖃᓯᐅᑎᓪᓗᒋᑦ ᓂᐅᕕᕈᑎᒃᓴᓂ ᐃᓐᓇᕐᓄᑦ ᐊᒻᒪᓗ ᐅᐸᓗᖓᐃᔭᐅᑎᒃᓴᓄᑦ ᑮᓇᐅᔭᓂᒃ ᕿᑭᖅᑕᓂ ᐃᓚᒌᖑᔪᓄᑦ ᖃᓂᒌᑦᑕᐃᓕᓂᖅ ᐱᔾᔪᑎᒋᓪᓗᒍ ᓅᓯᒪᓂᕐᒧᑦ ᐊᖑᓇᓱᒋᐊᕐᓂᒧᓪᓗ. ᑖᒃᑯᐊ ᐱᓕᕆᐊᑦ ᓴᖅᑭᑕᐅᓚᐅᖅᑐᑦ ᐄᐳᓪ 2020ᒥ ᐊᒻᒪᓗ ᑭᒡᓕᖃᕐᓂᐊᖅᖢᓂ ᔫᓐ 2020 ᓄᙳᐊᓄᑦ.

ᑲᑐᔾᔨᖃᑎᖃᖅᖢᑎᒃ ᐅᑭᐅᖅᑕᖅᑐᒥ ᑯᐊᐸᒃᑯᓐᓂ,  ᕿᑭᖅᑕᓃᒃᑯᑦ ᐊᑐᓚᐅᖅᑐᑦ $3 ᒥᓕᔭᓂ ᐃᑯᓪᓚᕈᑎᒋᔭᐅᖁᓪᓗᒋᑦ ᐊᒃᑐᐃᒍᑎᒋᔭᐅᔪᓂᒃ ᕿᑭᖅᑕᓂ ᐃᓐᓇᕐᓄᑦ ᑖᓐᓇ ᖃᓂᒪᓐᓈᓗᒃ ᐱᔾᔪᑎᒋᓪᓗᒍ. ᑖᒃᑯᐊ ᑮᓇᐅᔭᐃᑦ ᐊᑐᖅᑕᐅᔪᑦ ᑐᓂᓯᕙᒃᖢᑎᒃ $250ᓄᑦ ᓂᐅᕕᕈᑎᓂ ᐱᓇᓱᐊᕈᓯᐅᑉ ᐱᖃᑖᓂ. ᑖᒃᑯᐊ ᓂᐅᕕᕈᑎᑦ ᐃᓄᐃᑦ ᐃᓐᓇᖏᓐᓄᐃᓐᓇᖅ ᑐᕌᖓᔪᑦ ᐊᕐᕌᒍᓕᖕᓂ 60ᓂ ᐅᖓᑖᓂᓗ.

ᐃᓐᓇᐃᑦ ᐊᒃᑐᖅᑕᐅᓴᕋᐃᓐᓂᖅᓴᐅᔪᓐᓇᕐᒪᑕ ᐳᕙᒃᑯᑦ ᐋᓐᓂᐊᓄᑦ ᓱᕐᓗ ᐆᒥᖓ   are at higher ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ), ᑖᒃᑯᐊ ᐅᐸᓗᖓᐃᔭᐅᑎᒋᔭᐅᓪᓗᑎᒃ ᑮᓇᐅᔭᑦ ᐃᑲᔪᕐᓂᐊᖅᑐᑦ ᓂᕿᑦᑎᐊᕙᑖᕐᓂᕐᒥᒃ ᐊᒻᒪᓘᓐᓃᑦ ᓴᓗᒻᒪᖅᓴᐅᑎᒃᓴᓂ. ᖃᐅᔨᒪᔪᒍᑦ 1,200ᖑᖕᒪᑕ ᐃᓐᓇᐃᑦ ᐱᔪᓐᓇᖅᑐᑦ ᓂᐅᕕᕈᑎᓂ ᕿᑭᖅᑕᓂ ᓄᓇᓕᖕᓂ. ᒪᐃ 26ᒥ ᓯᑕᒪᒋᔭᖓᓂᑦ ᓂᐅᕕᕈᑎᒥᒃ ᑐᓂᔭᐅᓚᐅᖅᑐᑦ.

ᑖᓐᓇ ᐱᓕᕆᐊᖅ ᐊᑐᖅᖢᒍ ᑐᓂᓯᓯᒪᔪᒍᑦ $900,000ᓂ ᐊᑭᓕᖕᓂᑦ ᓂᐅᕕᕈᑎᓂ ᐃᓐᓇᕐᓄᑦ ᒪᐃ 12, 2020ᒥᓂᑦ.   .

ᐃᑲᔫᑕᐅᓗᑎᒃ ᖃᓂᒌᓗᐊᖅᑕᐃᓂᕐᒥᒃ ᐊᒻᒪᓗ ᐊᖑᓇᓱᒋᐊᕐᓂᕐᒧᑦ ᓂᕿᒃᓴᖅᓯᐅᕈᓐᓇᖁᓪᓗᒋᑦ ᓄᓇᓕᖕᒥᐅᑦ ᓂᕿᑦᑎᐊᕙᖃᕈᓐᓇᖁᓪᖁᓗᒋᑦ, ᕿᑭᖅᑕᓃᒃᑯᑦ ᐊᕙᒃᑯᑎᖃᓚᐅᕐᒪᑕ ᕿᑭᖅᑕᓂ ᐃᓄᖕᓄᑦ, ᑕᒻᒫᕐᕕᖃᖅᑐᓂᒃ ᐃᒡᓗᕋᓛᖃᖅᑐᓂᒡᓘᓐᓃᑦ, ᑮᓇᐅᔭᓂ ᐅᖓᑖᓃᑦᑐᓄᑦ $2 ᒥᓕᔭᓂᒃ ᒫᓐᓇᐅᓂᖓᓂᒃ ᐃᑲᔫᑎᒋᔭᐅᑲᐃᓐᓇᕐᓂᐊᖅᑐᓄᑦ ᓅᓯᒪᒍᓐᓇᕐᓂᕐᒧᑦ.

ᓯᕗᓪᓕᑎᑕᐅᓚᐅᖅᑐᑦ ᐃᓄᐃᑦ ᓅᓯᒪᓂᐊᖅᑐᓂᒃ 14ᓄᑦ ᐅᓪᓗᓄᑦ ᐅᖓᑖᓄᓘᓐᓃᑦ. ᐃᓄᐃᑦ ᓇᖕᒥᓂᖅ ᐱᖁᑎᖃᕆᐊᖃᖅᑐᑦ ᓅᔾᔪᑎᒃᓴᓂ.

ᒪᐃ  20ᒥᑦ ᐱᒋᐊᖅᖢᒍ, 886 ᖃᕆᓴᐅᔭᒃᑯᑦ ᑐᒃᓯᕋᐅᑎᓕᐅᖅᑐᖃᓚᐅᖅᑐᖅ ᐱᔾᔪᑎᒋᓪᓗᒍ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᓅᓐᓂᕐᒧᑦ ᑐᕌᖓᔪᓂᒃ. ᐊᑐᖅᖢᒍ ᑖᓐᓇ ᐱᓕᕆᐊᖅ ᑐᓂᓯᓯᒪᔪᒍᑦ $1,035,000ᓂ.    690ᖑᔪᑦ ᐃᒡᓗᖃᖅᑎᐅᔪᑦ ᐊᖏᖅᑕᐅᓚᐅᖅᑐᑦ ᑮᓇᐅᔭᖅᑖᕈᓐᓇᕐᓂᕐᒥᒃ.

ᕿᑭᖅᑕᓃᒃᑯᑦ ᑐᓴᐅᒪᖃᑦᑕᐅᑎᓕᕆᔨᒃᑯᑦ ᑐᓴᖅᑎᑦᑎᒋᐊᓪᓚᖃᑦᑕᓕᓚᐅᖅᑐᑦ ᐊᒻᒪᓗ ᐃᓄᖕᓂ ᖃᐅᔨᒪᑎᑦᑎᖃᑦᑕᖅᖢᑎᒃ ᐃᓕᓐᓂᐊᖅᑎᑦᑎᖃᑦᑕᖅᖢᑎᒃ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᒥᒃᓵᓄᑦ.

ᐅᓪᓗᒥᒧᑦ ᓴᖅᑭᑎᑦᑎᓯᒪᔪᒍᑦ:

• ᐊᔾᔨᒌᙱᑦᑐᓂᒃ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᒥᒃᓵᓄᑦ ᑐᓴᒐᒃᓴᓂᒃ ᐃᓕᔭᐅᓯᒪᓪᓗᑎᒃ ᐃᑭᐊᖅᑭᕕᑦᑎᓐᓄᑦ ᐊᒻᒪ ᐊᔾᔨᒌᙱᑦᑐᓂᒃ ᖃᕆᓴᐅᔭᒃᑯᑦ ᑐᓴᒐᒃᓴᖃᕐᕕᐅᕙᒃᑐᓂ
• ᐊᔾᔨᒌᙱᑦᑐᓂᒃ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᒥᒃᓵᓄᑦ ᓂᔾᔭᐅᓯᔭᖅᑐᓂᒃ ᑕᕐᕆᔭᒐᒃᓴᓂ ᑲᑐᔾᔨᖃᑎᒋᔭᐅᓪᓗᓂ ᕕᐊᑭ ᕼᐋᓐ ᐃᓕᓐᓂᐊᖅᑎᑦᑎᔪᒪᓪᓗᑎᒃ ᐃᓄᖕᓂ ᐊᒡᒐᖕᒥ ᐅᐊᓴᐃᑦᑎᐊᖃᑦᑕᕐᓂᐅᑉ ᐊᒻᒪᓗ ᖃᓂᒌᓗᐊᖅᑕᐃᓕᖃᑦᑕᕐᓂᕐᒥᓗ ᓴᐳᔾᔭᐅᓯᒪᓂᐊᕐᒪᑕ ᐃᓐᓇᐃᑦ
• ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᒥᒃᓵᓄᑦ ᐱᙳᐊᖅᑐᓂ ᐃᓕᔭᐅᔪᓐᓇᖅᑐᓂᒃ GIFᓂ ᑐᕌᖓᔪᓄᑦ ᐃᓚᒌᓄᑦ ᐃᓕᓐᓂᐊᖅᑎᑦᑎᔪᓐᓇᖁᓪᓗᒋᑦ ᕿᑐᕐᖓᖏᓐᓂ
• ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᐱᔾᔪᑎᒋᓪᓗᒍ ᖃᐅᔨᒋᐊᕐᕕᐅᖃᑦᑕᕈᓐᓇᖅᑐᒥᒃ ᐃᑭᐊᖅᑭᕕᑦᑎᓐᓂ ᐃᑲᔪᕈᑎᓂ ᐊᒻᒪ ᑕᑕᑎᒐᒃᓴᓂᓪᓗ ᐱᔭᐅᔪᓐᓇᖅᑐᓂ ᐃᓄᖕᓄᑦ
• ᐃᓕᓐᓂᐊᒐᒃᓴᓂ ᐃᑲᔪᕈᑎᓂᓗ ᐃᑭᐊᖅᑭᕕᑦᑎᓐᓂ ᐃᓚᒌᓄᑦ ᐊᖏᕐᕋᒥ ᐃᓕᓐᓂᐊᖅᑎᑦᑎᓂᕐᒨᖓᔪᓂ
• ᑎᑎᕋᖅᑕᐅᓯᒪᔪᓂ ᐅᓂᒃᑳᑦ ᑐᓴᖅᑎᑦᑎᔾᔪᑎᐅᔪᓄᑦ ᓄᓇᖅᑲᑎᑦᑎᓐᓄᑦ ᑭᓱᓕᕆᕐᒪᖔᑖᒃ ᐃᓄᐃᑦ ᐊᑐᖅᑎᓪᓗᒍ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ)

ᑖᒃᑯᐊ ᑐᓴᒐᒃᓴᑦ, ᑕᕐᕆᔭᒐᒃᓴᑦ ᐊᒻᒪᓗ ᐅᓂᒃᑳᓕᐅᖅᑕᐅᔪᑦ ᐊᒥᓱᐃᖅᑕ ᐊᔾᔨᒌᙱᑦᑐᓄᑦ ᑕᑯᔭᐅᓯᒪᔪᖅ ᐃᓄᖕᓄᑦ.

ᑖᒃᑯᐊ ᕿᑭᖅᑕᓃᒃᑯᑦ ᑮᓇᐅᔭᖅᑖᕆᔭᓯᒪᔭᖏᑦ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᐱᔾᔪᑎᒋᓪᓗᒍ ᐸᕐᓇᐅᑎᒋᔭᐅᔪᑦ ᐱᔭᐅᓯᒪᔪᑦ ᐃᓄᓕᕆᔨᑐᖃᒃᑯᓐᓂᑦ ᓇᓗᓇᐃᖅᑕᐅᔪᓂᑦ ᒐᕙᒪᑐᖃᒃᑯᓐᓂᑦ ᒫᑦᓯ 25, 2020ᒥ.ᕿᑭᖅᑕᓃᒃᑯᑦ ᑮᓇᐅᔭᖅᑖᕆᔭᖏᑦ $6.1 ᒥᓕᔭᐅᑲᓴᒃᑐᓂ ($6,132,544).

ᐅᓪᓗᒥᒪᑦ, ᑖᒃᑯᐊ ᐱᒋᐊᕈᑎᒋᔭᐅᔪᑦ ᑲᔪᓯᓂᖃᑦᑎᐊᖅᓯᒪᔪᑦ. ᖃᕆᓴᐅᔭᒃᑯᑦ ᑐᒃᓯᕋᐅᑎᓕᐅᕈᑎᑦ ᓅᓐᓂᕐᒧᑦ ᕿᓚᒥ ᐱᔭᕇᑕᐅᖃᑦᑕᖅᑐᑦ – ᖃᐅᑕᒫᓪᓗ ᑕᑕᑎᖅᓯᔪᖃᐃᓐᓇᖅᖢᓂ. ᐃᓚᒌᑦ ᐊᔾᔨᓕᐅᖅᓯᒪᔭᖏᓐᓂᒃ ᑎᑎᕋᖅᓯᒪᔪᓂᓗ ᓇᒃᓯᐅᔾᔨᓯᒪᔪᑦ ᓄᓇᓕᖕᓂᑦ ᕿᑭᖅᑕᓂ. ᐃᓐᓇᐃᑦ ᐅᖃᓚᐅᖅᑐᑦ ᑖᒃᑯᐊᒎᖅ ᓂᐅᕕᕈᑎᑦ ᐊᒃᓱᐋᓗᒎᖅ ᐃᑲᔪᖅᑐᑦ − ᓂᐅᕕᕈᓐᓇᖅᓯᓯᒪᖕᒪᑕ ᐊᑐᕆᐊᓕᖕᒥᓂᒃ ᐃᒡᓗᒥ.

ᐃᑲᔫᑎᑦ ᐅᒪᔪᕐᓂᐊᖅᑏᑦ ᑲᑎᒪᔨᓄᑦ

ᓄᓇᕗᑦ ᑐᙵᕕᒃᑯᑦ ᑐᓂᓯᓯᒪᔪᑦ $5,000ᓂ ᐊᑐᓂ ᓄᓇᓕᖕᓂᑦ ᐅᒪᔪᕐᓂᐊᖅᑎᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᑮᓇᐅᔭᐃᑦ ᑐᓂᔭᐅᔪᑦ ᐊᔾᔨᒋᔭᖏᓐᓂᒃ ᑐᓂᓯᓗᑎᒃ ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᒃᑯᓐᓂᑦ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᓐᓂᑦ, ᐊᒻᒪ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᓐᓂᑦ.

ᑲᑭᕙᒃᑯᑦ ᒥᑭᔪᓄᑦ ᓇᖕᒥᓂᓕᖕᓄᑦ ᐃᑲᔫᑎᑦ

ᐱᖃᓯᐅᑎᓪᓗᒋᑦ ᑕᒪᒃᑯᐊ ᐱᒋᐊᕈᑎᒋᔭᐅᓯᒪᔪᑦ, ᕿᑭᖅᑕᓃᒃᑯᑦ ᐃᑲᔪᓚᐅᕐᒥᔪᑦ ᑲᑭᕙᒃᑯᓐᓂ ᐊᑐᓕᖅᑎᑦᑎᓂᖏᓐᓂ ᒪᕐᕉᓂᒃ ᐱᓕᕆᐊᒃᓴᓂ ᐃᑲᔪᕐᓂᐊᖅᑐᓂᒃ ᐃᓄᐃᑦ ᓇᖕᒥᓂᖏᑦ ᒪᑭᒪᑦᑎᐊᕈᓐᓇᕐᓗᑎᒃ ᐊᑐᖅᑎᓪᓗᒍ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ).

• ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᑖᒃᑯᐊ $1 ᒥᓕᔭᓐ ᑮᓇᐅᔭᐃᑦ ᕿᑭᖅᑕᓂ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ)   ᐃᑲᕐᕋᑎᒍᑦ ᑮᓇᐅᔾᔭᒃᓵᕈᑎᒃᓴᓄᑦ ᐃᑲᔫᑎᑦ ᐃᑲᔪᕐᓂᖃᕐᓂᐊᖅᑐᑦ ᒫᓐᓇᒃᑯᑦ ᐃᑲᕐᕋᑎᒍ ᑮᓇᐅᔾᔭᒃᓴᕈᑎᒃᓴᓄᑦ ᐊᒃᓱᕈᖅᑐᓄᑦ ᓇᖕᒥᓂᕐᓄᑦ ᕿᑭᖅᑕᓂ ᓄᓇᓕᖕᓂ ᓄᖅᑲᖅᑎᑦᑎᖁᓇᒋᑦ ᐃᓄᖕᓂ ᐃᖅᑲᓇᐃᔭᖅᑎᓂ.
• ᑖᒃᑯᐊ $500,000 ᑮᓇᐅᔭᐃᑦ ᕿᑭᖅᑕᓂ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᐱᔾᔪᑎᒋᓪᓗᒍ ᓇᖕᒥᓂᕐᓄᑦ ᐃᑲᔫᖏᑦ ᐱᕕᖃᖅᑎᑦᑎᓂᐊᖅᑐᑦ ᒥᑭᔪᓂᒃ ᐃᓄᖕᓄᑦ ᓇᖕᒥᓂᖁᑎᒋᔭᐅᔪᓂᒃ ᐊᐅᓚᑦᑎᔾᔪᑎᒃᓴᕆᔭᖏᓐᓂᒃ ᑐᕌᖓᓗᑎᒃ ᒪᑭᒪᑦᑎᐊᕈᓐᓇᖁᓪᓗᒋᑦ ᐱᐅᙱᑦᑐᒃᑯᑦ ᐊᒃᑐᖅᑕᐅᓯᒪᑎᓪᓗᒋᑦ ᑕᒪᑐᒧᖓ ᖃᓂᒪᓐᓈᓗᖕᒥᑦ.

ᐱᓕᕆᐊᖅ ᐊᑐᕐᓗᒍ ᑲᑭᕙᒃᑯᑦ ᐊᖏᖅᓯᒪᓕᖅᑐᑦ $100,000ᓂ ᑮᓇᐅᔭᓂᒃ ᒥᑭᔪᓄᑦ ᐃᓄᐃᑦ ᓇᖕᒥᓂᖏᓐᓄᑦ ᒪᐃ 20, 2020ᒥᓂᑦ.

ᐱᓕᕆᐊᖑᓯᒪᔪᑦ ᑐᕌᖓᙱᑦᑐᓂᒃ-ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᕿᑭᖅᑕᓃᒃᑯᓐᓂ

ᑕᓪᓗᕈᑎᐅᑉ ᐃᒪᖓ ᐊᒻᒪ ᑐᕙᐃᔪᐃᑦᑐᖅ

ᑖᒃᑯᐊ ᑕᕆᐅᓕᕆᔨᒃᑯᑦ ᐅᒪᔪᓕᕆᔨᒃᑯᓪᓗ ᑲᔪᓯᓗᑎᒃ ᓴᖅᑭᑎᑦᑏᓐᓇᕐᓂᐊᖅᑐᑦ ᓄᑖᓂ ᐃᑲᔫᓯᐊᒃᓴᓂ ᐃᓄᖕᓄᑦ ᓴᖅᑭᑦᑐᓂᑦ ᑕᓪᓗᕈᑎᐅᑉ ᐃᒪᖓᓂᑦ. ᑖᒃᑯᐊ ᓇᐅᑦᑎᖅᓱᖅᑎᕗᑦ ᐃᖅᑲᓇᐃᔭᐃᓐᓇᖅᑐᑦ ᐱᕈᖅᐸᓪᓕᐊᓪᓗᑎᒃ:  ᐃᒃᐱᐊᕐᔪᖕᒥ, ᓇᐅᑦᑎᖅᓱᖅᑏᑦ ᓂᕿᖃᖅᑎᑦᑏᓐᓇᖅᑐᑦ ᓄᓇᖅᑲᑎᒥᓂᒃ ᐊᑐᖅᑎᓪᓗᒍ ᖃᓂᒪᓐᓈᓗᒃ. ᐃᓕᓐᓂᐊᖅᑎᑦᓯᒪᔪᒍᑦ ᐃᖅᑲᓇᐃᔭᓕᓵᖅᑐᓂ ᓄᓇᓕᖕᓂ ᒥᐊᓂᖅᓯᔨᓂ ᖃᕆᓴᐅᔭᒃᑯᑦ ᐊᐅᓱᐃᑦᑐᕐᒥ ᑲᖏᖅᑐᒑᐱᖕᒥᓗ. ᓱᓕ ᑖᒃᑯᐊ ᓄᓇᓕᖕᓂ ᒥᐊᓂᖅᓯᔨᑦ ᒥᑦᑎᒪᑕᓕᖕᒥ ᖃᐅᓱᐃᑦᑐᕐᒥᓗ ᔫᓐᒥ ᐱᒋᐊᖅᑐᒃᓴᒫᑦ ᐃᖅᑲᓇᐃᔮᖏᓐᓂ.

ᑲᔪᓯᓯᒪᔪᒥᒃ ᓯᕗᒧᐊᕈᑎᖃᐃᓐᓇᕐᒥᔪᒍᑦ ᐱᖁᑎᕐᔪᐊᓕᕆᓂᕐᒥᒃ, ᐱᖃᓯᐅᑎᓗᒍ ᐃᖅᑲᓇᐃᔭᖃᑎᖃᕐᓂᕐᒥᒃ ᕿᑭᖅᑖᓗᖕᒥ ᓇᖕᒥᓂᕐᓂ ᐱᕙᓪᓕᐊᑎᑦᑎᓂᕐᒧᑦ ᑯᐊᐳᕇᓴᒃᑯᓐᓂ ᐱᔭᕇᖅᑕᐅᕙᓪᓕᐊᑎᓪᓗᒋᑦ ᐸᕐᓇᐅᑎᑦ ᐊᒻᒪᓗ ᖃᐅᔨᓴᕈᑎᓂ ᐊᔾᔨᒌᙱᑦᑐᓂᒃ ᐊᑐᖅᑕᐅᔪᓐᓇᖅᑐᓂᒃ ᐃᒡᓗᕐᔪᐊᕐᓂ.    ᐋᔩᕋᕈᑎᖃᖅᑐᒍᑦ ᓄᓇᕗᑦ ᒐᕙᒪᒃᑯᓐᓂ ᐊᒻᒪ ᑲᓇᑕᒥ ᐃᖏᕐᕋᔪᓕᕆᔨᒃᑯᓐᓂ ᑐᑭᓯᐅᒪᖃᑦᑕᐅᑎᓂᕐᒧᑦ ᐊᖏᕈᑎᓕᐅᕋᓱᐊᖅᖢᑕ ᓴᖅᑭᑎᑦᑎᔪᓐᓇᕐᓂᐊᕐᒪᑕ ᓄᓇᓕᖕᓂ ᑐᓚᑦᑕᕐᕕᖕᓂ ᐊᐅᓱᐃᑦᑐᕐᒥ ᖃᐅᓱᐃᑦᑐᕐᒥᓗ. ᓱᓕᓗ, ᐃᑲᔪᖅᑐᐃᓚᐅᖅᑐᒍᑦ ᑲᑐᔾᔭᐅᓯᒪᔪᒥᒃ ᐋᖅᑭᒃᓱᖅᑕᐅᓯᒪᔪᒥᒃ ᑎᑎᖅᑐᒐᖅᓯᒪᔪᒥᒃ ᑐᓚᑦᑕᕐᕕᒃᓴᓂ ᐃᒃᐱᐊᕐᔪᖕᒧᑦ ᑲᖏᖅᑐᒑᐲᖕᒧᓪᓗ ᑲᑐᔾᔨᖃᑎᒋᓪᓗᒋᑦ ᐃᒪᕐᒥᐅᑕᓕᕆᔨᒃᑯᑦ.

ᐊᐅᓚᑦᑎᓂᖅ ᐱᔾᔪᑎᒋᓪᓗᒍ, ᐋᖅᑭᒃᓯᓚᐅᕋᑦᑕ ᐃᓄᐃᑦ ᒐᕙᒪᑐᖃᒃᑯᓪᓗ ᐊᖏᖃᑎᒌᖃᑦᑕᕐᓂᕐᒧᑦ- ᑐᕌᖓᔪᒥᒃ ᐊᐅᓚᑦᑎᖃᑎᒌᑦ ᑲᑎᒪᔨᓂᑦ ᐊᐅᓚᑦᑎᓂᐊᖅᑐᓂᒃ ᑕᓪᓗᕈᑎᐅᑉ ᐃᒪᖓᓂ.  ᓄᓇᓕᖕᓂ ᑐᑭᓯᒋᐊᖅᓯᒪᖕᒥᔪᒍᑦ ᖃᓄᐃᓕᖓᒐᔭᕐᒪᖔᑦ ᐃᒪᖅ, ᐃᓅᓗᑎᒃ ᐅᖃᐅᔾᔨᔨᐅᓗᑎᒃ ᑲᑎᒪᔨᕋᓛᒃᓴᓂ, ᐃᑲᔪᖃᑦᑕᕐᓂᐊᖅᑐᑦ ᐊᐅᓚᑦᑎᔨᓂ ᐊᒻᒪᓗ ᓴᖅᑭᑎᑦᑎᕙᓪᓗᑎᒃ ᐃᑲᔫᓯᐊᒃᓴᓂ.

ᐃᖅᑲᓇᐃᔭᖃᑎᖃᕐᒥᔪᒍᑦ ᐊᓯᖏᓐᓂᑦ ᐱᓕᕆᐊᖑᔪᓂᒃ ᑐᕌᖓᔪᓄᑦ ᐃᓄᐃᑦ ᓇᐅᑦᑎᖅᓱᖅᑎᓂ ᕿᑭᖅᑕᓂ ᓄᓇᓕᖕᓂ.   ᐱᓕᕆᐊᕆᔭᕗᑦ ᖃᐅᔨᓴᕐᓂᕐᒥᒃ ᑕᓪᓗᕈᑎᐅᑉ ᐃᒪᖓᓂ ᖃᓄᐃᓕᖓᓂᐊᕐᓂᖓᓂ.   ᖃᐅᔨᓴᓛᕐᒥᔪᒍᑦ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᐅᓱᐃᑦᑑᑉ ᕿᑭᖅᑖᓗᐊᓂ ᐃᒪᖁᑎᖏᓐᓂ, ᐱᖃᓯᐅᔾᔭᐅᓯᒪᓂᐊᖅᑐᒥᒃ ᐊᑯᓂᐅᓂᐊᖅᑐᒧᑦ ᓴᐳᔾᔨᓂᕐᒧᑦ ᐃᒪᖁᑎᒥᒃ. ᓂᕆᐅᑦᑎᐊᖅᑐᒍᑦ ᐃᓕᒍᓐᓇᕐᓂᐊᕋᑦᑕ ᐃᓄᐃᑦ ᖃᐅᔨᒪᔭᑐᖃᖏᑦᑕ ᑐᕙᐃᔪᐃᑐᕐᒧᑦ ᐊᒻ ᓴᕐᕙᕐᔪᐊᕐᒥ.  2020 ᐱᒋᐊᓕᓵᖅᑎᓪᓗᒍ, ᓂᐅᕐᕈᓚᐅᕋᑦᑕ ᓴᓂᑭᓗᐊᕐᒧᑦ ᐅᖃᐅᓯᖃᕆᐊᖅᑐᖅᖢᑕ ᕿᑭᖅᑕᐃᑦ ᒥᒃᓵᓄᑦ ᐊᒻᒪᓗ ᖃᓄᖅ ᓯᕗᓂᕐᒥᒃ ᑲᑐᔾᔨᖃᑎᒌᒍᓐᓇᕋᔭᕐᓂᖏᑦ.  ᐃᖅᑲᓇᐃᔭᖃᑎᒋᔭᐅᔪᑦ ᐃᒪᕐᒥᐅᑕᓕᕆᔨᒃᑯᑦ, ᑲᓇᑕᒥ ᐃᖏᕐᕋᔪᓕᕆᔨᒃᑯᑦ, ᐊᕙᑎᓕᕆᔨᒃᑯᓐᓂ ᐊᒻᒪ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐋᖅᑭᒃᓱᐃᕙᓪᓕᐊᒍᒪᓪᓗᑕ “ᒐᕙᒪᓕᒫᕐᒧᑦ ᑐᕌᒐᖃᕐᓂᕐᒥᒃ” ᕿᑭᖅᑕᐃᑦ ᐱᓪᓗᒍ.

ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ

ᕿᑭᖅᑕᓃᒃᑯᑦ ᑐᓂᔭᐅᓯᒪᔪᑦ $17.5 ᒥᓕᔭᓂ ᒐᕙᒪᑐᖃᒃᑯᓐᓂᑦ. ᑖᓐᓇ ᑐᓐᓂᖅᑯᓯᐊᖅᑖᕐᓂᕐᒧᑦ ᐊᖏᕈᑎᖓ ᐊᒥᐊᒃᑯᓂ ᑮᓇᐅᔭᓂᒃ $2.5 ᒥᓕᔭᓐ ᐱᔭᕇᕐᓂᐊᓕᖅᑐᖅ ᐱᓇᓱᐊᕈᓯᓂ ᐊᒡᒋᖅᑐᓂ. ᐋᔩᕋᖃᑎᖃᕐᓂᖅ ᐊᖏᓂᖅᓴᒥᒃ ᑮᓇᐅᔭᓂᒃ ᐱᓇᓱᖕᓂᕐᒥᒃ ᑐᕌᒐᕗᑦ ᐊᒃᑐᖅᑕᐅᓯᒪᓕᕐᒪᑦ ᐳᕝᕕᕆᓐᓇᖅᑐᖅ ᖃᓂᒪᓇᖅ-19ᒧᑦ (ᓄᕙᓐᓇᕐᔪᐊᖅ).

ᐃᖅᑲᓇᐃᔭᖅᑎᑖᖅᓯᒪᓕᖅᑐᒍᑦ, ᕿᒻᒦᑦ ᐆᒻᒪᖅᑎᑕᐅᒃᑲᓐᓂᕐᓂᖏᓐᓂᒃ ᑲᒪᔨᒥᒃ, ᐃᖅᑲᓇᐃᔮᖃᕐᓂᐊᖅᑐᒥᒃ ᕿᒻᒥᓕᕆᓂᕐᒧᑦ ᑐᕌᖓᔪᓂᒃ. ᐱᓕᕆᐊᒃᓴᑦ ᐱᕙᓪᓕᐊᖑᔭᕐᒥᔪᑦ ᐃᓄᐃᑦ ᐸᓖᓯᕕᓃᑦ ᐊᒻᒪ ᕿᒻᒦᑦ  ᐃᓕᓴᕆᔭᐅᓂᖏᓐᓄᑦ ᓇᑉᐸᐃᓗᑎᒃ ᐸᓖᓯᒃᑯᑦ ᐊᒡᓚᕝᕕᐊᑕ ᖃᓂᒋᔭᖓᓂ ᐃᖃᓗᓐᓂ.

ᓄᓘᔮᖕᒥ ᐱᓕᕆᐊᖅ

ᓄᓘᔮᖕᒥ ᐱᓕᕆᐊᖅ ᐊᐅᓚᑦᑎᔪᖅ ᒫᓐᓇ 4.2Mtpa−ᓂ; ᑖᒃᑯᐊ ᒥᓂᔅᑕᐃ ᐱᓕᕆᐊᖃᖅᑐᑦ ᐅᐃᒍᒋᐊᖅᓯᓂᕐᒥᒃ ᐅᔭᕋᕐᓂᐊᖅᑕᐅᔪᓐᓇᖅᑐᓂᒃ ᐊᖏᓪᓕᐊᕐᓂᖓ 6.0Mtpa−ᒧᑦ ᖃᖓᑐᐃᓐᓇᖅ ᓂᕆᐅᓇᖅᓯᔪᖅ ᓇᓗᓇᐃᔭᖅᑕᐅᓂᐊᕐᓂᖓ. ᕿᑭᖅᑕᓃᒃᑯᑦ ᑳᓐᓄᐊᒃᑯᑦ ᐅᑭᐅᖅᑕᖅᑐᒥ ᐱᓕᕆᐊᒃᓴᓂ ᐊᐅᓚᑦᑎᕕᖓᓂ ᑕᒪᑐᒪᐅᑉ ᒥᒃᓵᓄᑦ.

ᐱᓕᕆᐊᒃᓴᐃᑦ ᓄᓇᕗᒥ ᐊᕙᑎᓕᕆᔨᒃᑯᑦ ᕿᒥᕐᕈᓂᕆᔭᖓᓂᑦ ᓄᓗᔮᖕᒥ ᑐᒡᓕᐊᓂ ᑐᒃᓯᕋᐅᑎᒥᒃ ᒫᓐᓇ ᓄᖅᑲᖓᑎᑕᐅᑲᐃᓐᓇᖅᑐᑦ.    ᐊᕙᑎᓕᕆᔨᒃᑯᑦ ᐅᖃᖅᓯᒪᔪᑦ ᑲᔪᓯᔾᔮᙱᒻᒪᑕᒎᖅ ᕿᒥᕐᕈᓂᕆᔭᖓᓂᑦ ᑭᓯᐊᓂ ᐳᕝᕕᕆᓐᓇᖅᑐᖅ ᖃᓂᒪᓇᖅ-19ᒧᑦ (ᓄᕙᓐᓇᕐᔪᐊᖅ) ᑭᒡᓕᓕᐅᖅᑕᐅᓯᒪᔪᑦ ᒪᑐᐃᖅᑕᐅᓯᒪᓕᖅᐸᑕ.     ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖏᑦ ᐃᖅᑲᓇᐃᔭᖃᑎᖃᐃᓐᓇᖅᑐᑦ ᐸᕕᓐᓛ5ᓐᑯᓐᓂ ᒫᓐᓇ ᐊᖏᖃᑎᒌᒍᑎᓕᐅᖅᐸᓪᓕᐊᓪᓗᑎᒃ ᐃᓄᖕᓄᑦ ᓇᓗᓇᐃᖅᓯᓯᒪᑦᑎᐊᕐᓂᕐᒧᑦ ᐊᖏᕈᑎᒥᒃ ᓇᓗᓇᐃᖅᓯᔾᔪᑎᐅᓂᐊᕐᒪᑦ ᐃᓄᐃᑦ ᐃᓱᒫᓘᑎᖏᑦ ᐱᓕᕆᐊᖑᑦᑎᐊᕐᓂᖏᓐᓄᑦ ᐃᑲᔪᖅᑐᖅᑕᐅᓚᐅᙱᑎᓪᓗᒍ ᑐᒡᓕᐊᓂ ᑐᒃᓯᕋᐅᑎᖓ.

ᒫᑦᓯ, 2020ᒥᓂᑦ ᓄᓇᕗᒥᐅᑦ ᐃᖅᑲᓇᐃᔭᖅᑐᑦ ᐸᕕᓐᓛ6ᓐᑯᓐᓂ ᓄᓘᔮᒃ ᐱᓕᕆᐊᖓᓅᖁᔭᐅᓯᒪᙱᑦᑐᑦ ᐱᔾᔪᑎᒋᓪᓗᒍ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᑭᒡᓕᓕᐅᖅᑕᐅᓯᒪᔪᑦ. ᐊᖏᕐᕋᖅᓯᒪᔪᑦ, ᑭᓯᐊᓂ ᐊᑭᓕᖅᓱᖅᑕᐅᖏᓐᓇᖅᑐᑦ ᐸᕕᓐᓛᓐᑯᓐᓂᑦ. ᑐᑭᓯᑎᑕᐅᖏᓐᓇᖅᐸᒃᑐᒍᑦ ᐸᕕᓐᓛ6ᓐᑯᓐᓂᑦ ᖃᓄᐃᑉᐸᓪᓕᐊᓂᐅᔪᓂ.

ᓄᓇᕗᒥ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᐱᔾᔪᑎᒋᓪᓗᒍ ᐱᓕᕆᐊᖑᓯᒪᔪᑦ

ᓇᓗᓇᐃᔭᐃᒍᒪᓪᓗᖓᑦᑕᐅᖅ ᐃᓚᖏᓐᓂᒃ ᑐᓴᕈᒥᓇᕐᓂᖏᓐᓂᒃ ᐱᓕᕆᐊᖑᓯᒪᔪᓂᒃ ᓄᓇᕗᒥ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᐱᔾᔪᑎᒋᓪᓗᒍ.

ᓄᓇᕗᑦ ᑐᙵᕕᒃᑯᑦ/ᓄᓇᕗᑦ ᒐᕙᒪᒃᑯᑦ ᐃᑲᔫᑎᖏᑦ ᓄᓇᓕᖕᓄᑦ ᓂᕆᔭᒃᓴᖃᖅᑎᑦᑎᓂᕐᒧᑦ ᐊᑐᖅᑎᓪᓗᒍ  ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ)

ᐄᐳᓪ 3ᒥ, ᓄᓇᕗᑦ ᑐᙵᕕᒃᑯᑦ ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᑐᓴᖅᑎᑦᑎᓚᐅᕐᒪᑎᒃ ᑮᓇᐅᔭᓂᒃ $2 ᒥᓕᔭᓂᒃ ᓄᓇᓕᖕᓂ ᓂᕆᔭᒃᓴᖃᖅᑎᑦᑎᓂᕐᒧᑦ ᐱᓕᕆᐊᒃᓴᓂ ᐊᑐᖅᑎᓪᓗᒍ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ)

ᑕᒃᑯᐊ ᑮᓇᐅᔭᐃᑦ ᑐᓂᐅᖅᑲᖅᑕᐅᓂᐊᖅᑐᑦ ᕼᐊᒻᓚᓄᑦ, ᓴᖅᑭᑎᑦᑎᔪᓐᓇᕐᓂᐊᕐᒪᑕ ᓄᓇᓕᖕᒧᑦ- ᑐᕌᖓᔪᓂᒃ ᖃᓄᐃᓕᐅᕈᑎᓂ. ᑮᓇᐅᔭᐃᑦ ᓄᓇᓖᑦ ᐅᓄᕐᓂᖏᑦ/ᐊᖏᓂᕆᔭᖏᑦ ᒪᓕᓪᓗᒋᑦ ᑐᓂᐅᖅᑲᖅᑕᐅᓂᐊᖅᖢᑎᒃ:

• ᓄᓇᓖᑦ ᐃᓄᓕᖕᓂᑦ 1,000 ᑐᖔᓂ ᑐᓂᔭᐅᓂᐊᖅᑐᑦ  $40,000,
• ᓄᓇᓖᑦ ᐃᓄᓕᖕᓂᑦ 1,000 ᐅᖓᑖᓂ ᑐᓂᔭᐅᓗᑎᒃ $90,000,
• ᐃᖃᓗᐃᑦ ᑐᓂᔭᐅᓗᓂ $200,000.

ᑖᒃᑯᐊ ᑮᓇᐅᔭᐃᑦ ᓂᕿᑦᑎᐊᕙᖃᖅᑎᑦᑎᓂᐊᖅᑐᑦ ᓂᕆᔭᒃᓴᖃᖅᑎᑦᑎᓗᑎᓪᓗ ᓄᓇᕗᒥ ᐊᒃᑐᖅᑕᐅᓴᕋᐃᑦᑐᖁᑎᖏᓐᓂ, ᐊᖅᑯᑕᐅᓗᑎᒃ ᓄᓇᓕᖕᓂᑦ ᖃᐅᔨᒪᔨᑕᓂᒃ ᐊᒻᒪᓗ ᐱᓕᕆᐊᖃᓲᓂᒃ ᐊᑐᖅᑎᓪᓗᒍ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ).

ᓄᓇᕗᑦ ᒐᕙᒪᒃᑯᑦ ᒪᑐᐃᖅᓯᕙᓪᓕᐊᔾᔮᙱᑦᑐᑦ

ᓄᓇᕗᒥ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᒃ, ᓗᑦᑖᖅ ᒪᐃᑯᓪ ᐹᑐᓴᓐ, ᐅᖃᖅᓯᒪᔪᖅ ᒪᑐᐃᖅᓯᕙᓪᓕᐊᓕᓛᖅᑐᑦ ᑭᓯᐊᓂ ᓄᓇᕗᒥ ᐱᑕᖃᙲᓐᓇᖅᐸᑦ ᐳᕝᕕᕆᓐᓇᖅᑐᖅ ᖃᓂᒪᓇᖅ- 19ᒥ (ᓄᕙᓐᓇᕐᔪᐊᖅ) ᐊᒻᒪᓗ ᖃᐅᔨᓴᕈᓐᓇᕐᓂᖅ ᐊᑐᐃᓐᓇᕈᖅᓯᒪᓕᖅᑎᓪᓗᒍ ᓄᓇᕗᒥ.

ᒐᕙᒪᒃᑯᑦ ᐅᖃᖅᓯᒪᔪᑦ ᑖᒃᑯᐊᒎᖅ ᐸᐃᕆᕖᑦ ᓯᕗᓪᓕᐅᓗᑎᒃ ᒪᑐᐃᖅᑕᐅᓛᕐᒪᑕ. ᐊᒡᓛᓪᓘᓐᓃᑦ ᐃᓚᖏᓐᓂᒃ ᒪᑐᐃᖅᓯᕙᓪᓕᐊᓗᑎᒃ ᔫᓐ 1ᒥ ᓄᓇᕗᒥ, ᐊᒻᒪᓗ ᐃᖅᑲᓇᐃᔭᕐᕕᑦ ᒪᑐᐃᕐᓗᑎᑦᑕᐅᖅ ᔫᓐ ᐱᒋᐊᓕᓵᖅᑎᓪᓗᒍ.

ᕿᑭᖅᑕᓃᒃᑯᑦ ᐊᑐᓕᖅᑎᑦᑎᕙᓪᓕᐊᓗᑎᒃ ᑐᕌᒐᖃᕐᓗᑎᒃ ᐊᖏᔪᖅᑲᐅᑎᑦ ᓯᕗᓪᓕᐅᓗᑎᒃ ᐃᖅᑲᓇᐃᔭᕆᐊᕐᓗᑎᒃ, ᐃᖅᑲᓇᐃᔭᖅᑎᑐᐃᓐᓇᐃᓪᓗ ᑭᖑᓂᑦᑎᐊᖓᒍᑦ ᐃᖅᑲᓇᐃᔭᕆᐊᓕᕐᓗᑎ.

ᒐᕙᒪᑐᖃᒃᑯᑦ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) ᐱᔾᔪᑎᒋᓪᓗᒍ ᐱᓕᕆᐊᕆᓯᒪᔭᖏᑦ

ᒐᕙᒪᑐᖃᒃᑯᑦ ᓴᖅᑭᑎᑦᑎᓚᐅᕐᒪᑕ ᐃᑲᔫᑎᓂᒃ ᐃᑲᔫᑕᐅᓂᐊᖅᑐᓄᑦ ᑲᓇᑕᒥᐅᓄᑦ ᐊᑐᖅᑎᓪᓗᒍ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ).

ᓇᓗᓇᐃᔭᐃᓯᒪᔪᖓ ᑐᑭᓯᔾᔪᑎᐅᔪᓂᒃ ᐃᓚᖏᓐᓂᒃ ᐱᒻᒪᕆᐅᔪᓂᒃ ᑮᓇᐅᔭᖅᑐᕐᕕᐅᔪᓂ.

ᐊᕕᒃᑐᖅᓯᒪᔪᑎᒍᑦ ᐃᑯᓪᓚᕈᑎᒃᓴᑦ ᐊᒻᒪ ᐃᑲᔪᕈᑎᒃᓴᑦ ᑮᓇᐅᔭᐃᑦ:: ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ)

ᒪᐃ 13ᒥ ᒐᕙᒪᑐᖃᒃᑯᑦ ᑐᓴᖅᑎᑦᑎᓚᐅᕐᒪᑕ ᐊᕕᒃᑐᖅᓯᒪᔪᓂ ᐃᑯᓪᓚᕈᑎᒃᓴᑦ ᐊᒻᒪ ᐃᑲᔪᕈᑎᒃᓴᑦ  ᑮᓇᐅᔭᐃᑦ: ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ. ᑖᒃᑯᐊ ᑮᓇᐅᔭᐃᑦ ᐃᑲᔪᕐᓂᐊᖅᑐᑦ ᓇᖕᒥᓂᕐᓂ ᑎᒥᐅᔪᓂᓪᓗ ᑮᓇᐅᔭᑎᒍᑦ ᐊᒃᓱᕈᖅᑐᓂ, ᑲᔪᓯᑎᑦᑎᔪ7ᓇᕐᓂᐊᕐᒪᑕ ᐊᐅᓚᑦᑎᓂᕆᔭᖏᓐᓂᒃ, ᐱᖃᓯᐅᑎᓗᒋᑦ ᑮᓇᐅᔾᔭᒃᓴᕈᑎᑦ ᐃᖅᑲᓇᐃᔭᖅᑎᓂ; ᐊᒻᒪᓄ, ᐃᑲᔫᑎᓂᒃ ᐱᓕᕆᐊᖑᔪᓄᑦ ᓇᖕᒥᓂᕐᓄᑦ, ᑎᒥᐅᔪᓄᑦ ᐊᒻᒪᓗ ᓄᓇᓕᖕᓄᑦ ᐸᕐᓇᒃᐸᓪᓕᐊᒍᓐᓇᖁᓪᓗᒋᑦ ᒫᓐᓇ ᒪᑭᑕᓕᑦᑎᐊᒃᑲᓐᓂᓕᕈᓐᓇᖁᓪᓗᒋᑦ.    ᑖᓐᓇ ᐱᒋᐊᕈᑎᒋᔭᐅᔪᖅ ᐊᑐᓕᖅᑎᑕᐅᓯᒪᔪᖅ ᐱᖓᓲᔪᖅᑑᔪᓂᒃ ᐊᕕᒃᑐᖅᓯᒪᔪᓂ ᐱᕙᓪᓕᐊᔪᓕᕆᓂᕐᒧᑦ ᑎᒥᐅᔪᓄᑦ ᐊᒻᒪᓗ ᒪᕐᕈᐃᓕᖓᓪᓗᓂ:

• $675 ᒥᓕᔭᓂ ᐃᑲᔪᕈᑎᐅᓗᑎᒃ ᐊᕕᒃᑐᖅᓯᒪᔪᓂ ᐱᕙᓪᓕᐊᓂᐅᔪᓂᒃ, ᓇᖕᒥᓂᕐᓂ, ᑎᒥᐅᔪᓂᒃ ᐊᒻᒪᓗ ᓄᓇᓕᖕᓂ ᑲᓇᑕᒥ; ᐊᒻᒪᓗ,
• $287 ᒥᓕᔭᓂ ᐃᑲᔪᕈᑎᒋᔭᐅᓗᑎᒃ ᑲᓇᑕᒥ ᐊᒥᓲᔪᓂᒃ ᓄᓇᓕᖕᓂ ᐱᕙᓪᓕᐊᔪᓕᕆᓂᕐᒧᑦ ᑯᐊᐳᕇᓴᓂ, ᑐᕌᖓᓂᖅᓴᐅᓂᐊᖅᖢᑎᒃ ᒥᑭᔪᓂ ᓇᖕᒥᓂᕐᓂ ᐊᒻᒪᓗ ᒥᑭᔪᓂ ᓄᓇᓕᖕᓂ ᑲᓇᑕᒥ.

ᒐᕙᒪᑐᖃᒃᑯᑦ ᐱᕙᓪᓕᐊᔪᓕᕆᔨᖏᑦ (ᑳᓐᓄᐊᒃᑯᑦ) ᐃᑲᔫᑎᖏᑦ ᓄᓇᕗᒧᑦ/ᓄᓇᑦᓯᐊᕐᒧᑦ/ᔫᑳᓐᒧᓪᓗ ᓇᖕᒥᓂᕐᓄᑦ ᐊᒃᑐᖅᑕᐅᔪᓄᑦ ᐳᕝᕕᕆᓐᓇᖅᑐᖅ ᖃᓂᒪᓇᖅ-19ᒧᑦ (ᓄᕙᓐᓇᕐᔪᐊᖅ)

ᐄᐳᓪ 17ᒥ, ᒐᕙᒪᑐᖃᒃᑯᑦ ᐱᕙᓪᓕᐊᔪᓕᕆᔨᖏᑦ (ᑳᓐᓄᐊᒃᑯᑦ) ᑐᓴᖅᑎᑦᓯᓚᐅᕐᒪᑕ ᐅᑭᐅᖅᑕᖅᑐᒥ ᓇᖕᒥᓂᕐᓄᑦ ᐃᑲᔫᑎᐅᓂᐊᖅᑐᓂᒃ.  ᑖᒃᑯᐊ ᑮᓇᐅᔭᐃᑦ ᐊᑯᓂᐅᙱᑦᑐᓄᑦ ᐊᑐᖅᑐᒃᓴᒫᖑᓯᒪᔪᑦ ᐊᐅᓚᑦᑎᔾᔪᑎᓄᑦ ᒥᑭᔪᓄᑦ ᐊᖏᓗᐊᙱᑦᑐᓄᓪᓗ ᓇᖕᒥᓂᕐᓂ ᓄᓇᕗᒥ/ᓄᓇᑦᓯᐊᕐᒥ/ᔫᑳᓐᒥᓗ ᐊᒃᑐᖅᑕᐅᓯᒪᔪᓂ ᐳᕝᕕᕆᓐᓇᖅᑐᖅ ᖃᓂᒪᓇᖅ-19ᒧᑦ (ᓄᕙᓐᓇᕐᔪᐊᖅ).

ᓇᖕᒥᓂᓖᑦ ᐊᕙᑎᑦ ᑐᖔᓂ ᐃᖅᑲᓇᐃᔭᖅᑎᖃᖅᑐᓂᒃ ᓯᕗᓪᓕᐅᔾᔭᐅᓯᒪᓂᐊᖅᑐᑦ ᑖᒃᑯᓐᓂᖓ ᑮᓇᐅᔭᓂ. ᑮᓇᐃᔭᑦ ᐊᑐᕐᓂᐊᖅᑐᑦ ᐊᐅᓚᑦᑎᔾᔪᑎᓄᑦ ᐊᒻᒪᓗ ᑮᓇᐅᔭᐃᑦ ᑐᓂᔭᐅᔪᑦ ᐅᑎᖅᑎᑕᐅᒋᐊᑐᙱᖦᖢᑎᒃ ᐱᒋᐊᕐᓗᒋᑦ     $2,500ᓂ ᐊᖏᓂᖅᐹᖑᔪᒧᑦ $100,000ᓂ.

ᑮᓇᐅᔭᐃᑦ ᐊᑐᕐᓂᐊᒻᑐᑦ ᓯᑕᒪᓄᑦ ᑕᖅᑭᓄᑦ, ᐱᒋᐊᖅᓯᒪᓗᑎ ᐄᐳᓪ 1, 2020ᒥᑦ. ᑖᒃᑯᐊ ᑮᓇᐅᔭᐃᑦ ᐋᖅᑭᒃᓯᒪᔪᑦ ᐃᑲᔫᑎᒋᔭᐅᒃᑲᓐᓂᕐᓗᑎᒃ ᐊᓯᖏᓐᓂᑦ ᒐᕙᒪᑐᖃᒃᑯᓐᓂᑦ ᖃᓄᐃᓕᐅᕈᑎᒋᓯᒪᔭᖏᓐᓂᑦ ᑐᓴᒐᒃᓴᐅᓯᒪᔪᓂ ᐅᓪᓗᒥᒧᑦ.

ᒐᕙᒪᑐᖃᒃᑯᓐᓂᑦ ᐃᑲᔫᑎᑦ ᓄᓇᕘᒧᑦ/ᓄᓇᑦᓯᐊᕐᒧᑦ/ᔫᑳᓐᒧᓪᓗ

ᐄᐳᓪ 14ᒥ, ᒐᕙᒪᑐᖃᒃᑯᑦ ᑐᓂᓯᓂᐊᖅᑐᑦ $129.9 ᒥᓕᔭᓂ ᓄᓇᕘᒧᑦ/ᓄᓇᑦᓯᐊᕐᒧᑦ/ᔫᑳᓐᒧᓪᓗ, ᐃᑲᔫᑎᑐᐃᓐᓇᙱᑦᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔾᔪᑎᒋᓪᓗᒍ ᐳᕝᕕᕆᓐᓇᖅᑐᖅ ᖃᓂᒪᓇᖅ-19 (ᓄᕙᓐᓇᕐᔪᐊᖅ) , ᑭᓯᐊᓂᑦᑕᐅᖅ ᑮᓇᐅᔭᖃᖅᑎᑦᑎᓂᐊᖅᑐᑦ ᐅᑭᐅᖅᑕᖅᑐᒥ ᖃᖓᑕᓲᓕᕆᔨᓄᑦ ᐊᒻᒪᓗ ᓇᖕᒥᓂᕐᓂ.

$72.6ᒥᓕᔭᓂ ᑐᕌᕐᓂᐊᖅᑐᑦ ᐸᕐᓇᐃᓂᕐᒧᑦ ᐊᑐᖅᑕᐅᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᐃᓄᓕᕆᓂᕐᒧᓪᓗ ᐱᓕᕆᕕᖕᓄᑦ ᓄᓇᕗᒥ/ᓄᓇᑦᓯᐊᕐᒥ/ᔫᑳᓐᒥᓗ, ᑮᓇᐅᔭᐃᑦ:

• $30.8 ᒥᓕᔭᓐ ᓄᓇᕗᒧᑦ

ᒐᕙᒪᑐᖃᒃᑯᑦ ᓱᓕ ᑐᓂᓯᒃᑲᓐᓂᕐᓂᐊᖅᑐᑦ ᑎᑭᓪᓗᒍ $17.3 ᒥᓕᔭᓂᒃ ᐅᑭᐅᖅᑕᖅᑐᒥ ᖃᖓᑕᓲᓕᕆᔨᓄᑦ ᑖᒃᑯᐊ ᑲᒻᐸᓂᐅᔪᑦ ᖃᖓᑕᓱᓕᕆᓂᖅ ᑲᔪᓯᖁᓪᓗᒋᑦ ᒪᑯᓄᖓ ᐱᓗᐊᖅᑐᒥᒃ ᓂᕿᓂᒃ ᐊᒻᒪ ᐋᓐᓂᐊᕐᕕᖕᓄᑦ ᐊᑐᕆᐊᓕᖕᓂ ᒥᑭᓐᓂᖅᓴᓄᑦ ᓄᓇᓕᖕᓄᑦ

• ᓄᓇᕗᑦ ᑐᓂᔭᐅᓂᐊᖅᑐᖅ ᑭᓪᓕᒋᓗᒍ $5 ᒥᓕᔭᓂ

ᒐᕙᒪᑐᖃᒃᑯᑦ ᐅᖃᖅᓯᒪᔪᑦ ᑖᒃᑯᐊ ᒐᕙᒪᒃᑯᑦ ᐱᕙᓪᓕᐊᔪᓕᕆᔨᖏᑦ (ᑳᓐᓄᐊ) ᑐᓂᓯᖃᑕᐅᓂᐊᖅᑐᑦ $15 ᒥᓕᔭᓂᒃ “ᐅᑎᖅᑎᑕᐅᒋᐊᖃᙱᑦᑐᓂᒃ ᐃᑲᔫᑎᓂᒃ” ᓇᖕᒥᓂᕐᓄᑦ ᓄᓇᕗᒥ/ᓄᓇᑦᓯᐊᕐᒥ/ᔫᑳᓐᒥᓗ ᐊᒃᑐᖅᑕᐅᓯᒪᔪᓂᒃ ᐳᕝᕕᕆᓐᓇᖅᑐᖅ ᖃᓂᒪᓇᖅ-19ᒧᑦ (ᓄᕙᓐᓇᕐᔪᐊᖅ), ᑭᓯᐊᓂ ᐃᑲᔫᑎᑖᕈᓐᓇᙱᖦᖢᑎᒃ ᒐᕙᒪᑐᖃᒃᑯᑦ ᐊᑐᐃᓐᓇᕈᖅᓯᒪᔭᖏᓐᓂ.

ᒐᕙᒪᑐᖃᒃᑯᑦ ᐸᕐᓇᒃᓯᒪᖕᒥᔪᑦ ᐃᓚᓯᓂᐊᖅᖢᑎᒃ   ᖄᒃᑲᓐᓂᐊᒍᑦ $25 ᒥᓕᔭᓂᒃ ᓂᕿᑦᑎᐊᓂᒃ ᖃᖓᑕᓲᒃᑯᑦ ᐅᓱᔾᔪᑎᖏᓐᓂ ᐊᑭᑭᓪᓕᒋᐊᕈᑎᓕᕆᓂᖅ (Nutrition North) ᑲᓇᑕᒥ.

ᐅᓪᓗᒥ ᐊᑐᖅᑕᕗᑦ ᐊᔾᔨᐅᙱᑦᑑᖕᒪᑦ ᐊᒻᒪᓗ ᕿᑭᖅᑕᓃᒃᑯᑦ ᐱᓕᕆᐊᒥᓂᒃ ᑲᔪᓯᑎᑦᑎᒐᓱᐊᖏᓐᓇᖅᑐᑦ ᐊᒻᒪᓗ ᐃᑲᔪᖅᑐᐃᓪᓗᑎᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᓯᕗᓕᖅᑎᐅᔪᓂᒃ ᓄᓇᕗᒥᐅᑦ ᐊᑦᑕᕐᓇᖅᑐᒦᖁᓇᒋᑦ

ᓴᐳᔾᔨᓚᕗᑦ ᐃᓐᓇᕗᑦ, ᓄᓇᖅᑲᑎᕗᑦ, ᐃᖕᒥᓂᓗ.