2020 ᐱᒋᐊᕈᑎᖃᓚᐅᖅᑐᖅ ᐊᑐᖅᑕᐅᓚᐅᖅᓯᒪᙱᑦᑐᓂᒃ ᐊᓯᔾᔨᖅᓯᔪᒻᒪᕆᐅᓯᒪᔪᓂᒃ.  ᓄᓇᕗᒥ, ᐅᓗᕆᐊᓇᕐᓂᕆᔭᖏᑦ ᓄᕙᓐᓇᕐᔪᐊᖅ-19 ᐃᖅᑲᐃᓇᖅᑎᑦᑎᓚᐅᕐᒪᑦ ᐊᑐᖅᑕᐅᓚᐅᖅᓯᒪᔪᓂᒃ ᐅᐊᑦᑎᐊᕈ ᐳᕙᓪᓗᒡᔪᐊᖅᑎᓪᓗᒋᑦ ᐊᒻᒪᓗ ᐃᑲᔫᑎᖃᑦᑎᐊᙱᓐᓂᖏᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥᒃ ᐊᒻᒪᓗ ᐃᒡᓗᑭᒃᓴᕐᓂᖅ ᓄᓇᕗᒥ.  .

 

ᑕᒪᒃᑯᐊᖑᒐᓗᐊᖅᑎᓪᓗᒋᑦ ᐊᒃᓱᕈᓐᓇᖅᑐᑦ ᑕᖅᑭᓂ ᖄᖏᖅᓯᒪᔪᓂᒃ, ᐊᒻᒪᓗ ᑕᑯᓯᒪᓪᓗᖓ ᐃᓄᐃᑦ ᒪᑭᒋᐊᕆᐊᕐᓂᖏᓐᓂ.  ᑕᑯᓚᐅᖅᑐᖓ ᑐᙵᓱᒃᑎᑦᑎᔪᑦ ᑐᓂᓯᖃᑦᑕᖅᑐᓂᒃ, ᓄᓇᖅᑲᑎᒌᓪᓗ ᐊᒥᖅᑳᖃᑎᖃᖅᖢᑎᒃ ᓂᕿᓂᒃ ᐊᒻᒪᓗ ᐃᑲᔪᖅᑐᐃᑦᑎᐊᖅᖢᑎᒃ ᐃᓐᓇᕐᓂ ᐊᒻᒪᓗ ᑕᐃᒃᑯᓂᖓ ᐃᑲᔪᖅᑕᐅᔭᕆᐊᖃᖅᑐᓄᑦ.  ᐅᐱᒍᓱᒃᑐᖓ ᐃᓄᐃᑦ ᕿᑭᖅᑕᓂ ᒪᑭᒋᐊᕆᐊᖅᓯᒪᓂᖏᑦ ᓄᕙᓐᓇᕐᔪᐊᖅ-19 ᐊᑐᖅᑎᓪᓗᒍ ᐊᒻᒪᓗ ᑕᒪᒃᑯᐊ ᐊᑐᖅᑕᐅᓚᐅᖅᑐᑦ ᕿᒪᒡᓗᒋᑦ ᓯᕗᒧᐊᕋᓱᒋᐊᖃᕐᓂᐊᕋᑦᑕ.

ᓄᕙᓐᓇᕐᔪᐊᖅ-19ᒥᑦ ᐱᔾᔪᑎᖃᖅᖢᑎᒃ ᐱᓕᕆᐊᖑᓚᐅᖅᑐᑦ

ᐱᔾᔪᑎᒋᓪᓗᒍ ᓄᕙᓐᓇᕐᔪᐊᖅ-19, ᐱᓕᕆᐊᕗᑦ ᐊᐅᓚᓂᕆᔭᕗᓪᓗ ᐊᓯᔾᔨᓚᐅᕐᒪᑦ 2020 ᐱᒋᐊᓕᓵᐸᓗᒃᑎᓪᓗᒍ.  ᐋᖅᑭᒋᐊᕆᐊᖃᓚᐅᖅᑐᒍᑦ ᖃᓄᖅ ᐃᖅᑲᓇᐃᔭᖃᑦᑕᕐᓂᑦᑎᓐᓂ.  ᐃᖅᑲᓇᐃᔭᖅᑎᑦ ᐋᖅᑭᒋᐊᖅᓯᕙᒃᖢᑎᐅᓚᐅᕐᒪᑕ ᐱᓕᕆᐊᖑᔪᓂᒃ ᐊᒻᒪᓗ ᐅᐸᓗᖕᓇᖅᑐᓂᒃ ᐱᓕᕆᓂᖅᓴᐅᖔᓕᖅᖢᑎᒃ.

 

ᒫᑦᓯᐅᑉ ᕿᑎᕈᔪᖓᓂ, ᕿᑭᖅᑕᓃᒃᑯᑦ ᓄᖅᑲᖅᑎᑦᑎᓚᐅᕐᒪᑦ ᐊᕐᕌᒍᓕᒫᕐᒧᑦ ᑐᕌᖓᔪᓂᒃ ᐱᓕᕆᐊᒃᓴᕆᕙᒃᑕᖏᓐᓂᒃ ᐊᒻᒪᓗ ᐊᒡᓚᕝᕕᖕᒥ ᒪᑐᓯᒪᓪᓗᑎᒃ ᐃᓄᖕᓄᑦ.  ᐃᖅᑲᓇᐃᔭᖅᑏᑦ ᐱᔭᒃᓴᕆᕙᒃᑕᖏᑦ ᐊᓯᔾᔨᖅᖢᑎᒃ ᐱᓕᕆᓂᖅᓴᐅᓕᖅᖢᑎᒃ ᑖᒃᑯᓂᖓ ᓴᖅᑭᑕᐅᓯᒪᔪᓂᒃ ᐅᐸᓗᖕᓇᖅᑐᓂᒃ ᐱᒋᐊᕈᑎᓂᒃ.  ᑐᓴᐅᒪᖃᑦᑕᐅᑎᓂᕆᔭᕗᓪᓗ ᐱᓕᕆᒋᐊᓪᓚᒃᖢᑎ ᑐᓴᐅᒪᑎᑦᑎᓂᕐᒥᒃ ᐃᓕᓐᓂᐊᖅᑎᑦᑎᓂᕐᒥᓗ ᐃᓄᖕᓂᑦ ᕿᑭᖅᑕᓂ ᖃᓄᖅ ᓄᖅᑲᖓᑎᑦᑎᔪᓐᓇᕐᒪᖔᑖᒃ ᓯᐊᒻᒪᒃᑎᑦᑎᑕᐃᓕᓗᑎᓪᓗᒍ ᓄᕙᓐᓇᕐᔪᐊᖅ -19ᒥ ᐊᒻᒪᓗ ᖃᓄᐃᓕᐅᖅᑐᖃᕆᐊᖃᕐᒪᖔᑦ ᐋᓐᓂᐊᖅᑖᖅᑕᐃᓕᓂᕐᒧᑦ.

ᐄᐳᓪᒥ, ᕿᑭᖅᑕᓃᒃᑯᑦ ᓴᖅᑭᑎᑦᑎᓚᐅᖅᑐᑦ ᒪᕐᕉᓂᒃ ᐱᒋᐊᕈᑎᓂᒃ: ᓂᐅᕕᖃᖅᑎᑦᑎᓪᓗᑎᒃ ᐃᓐᓇᕐᓄᑦ ᐊᒻᒪᓗ ᐅᐸᓗᖕᓇᖅᑐᓂᒃ ᑮᓇᐅᔭᓂᒃ ᕿᑭᖅᑕᓂ ᐃᓚᒌᓄᑦ ᑐᒃᓯᕋᕐᕕᐅᔪᓐᓇᖅᑐᓂᒃ ᓅᓯᒪᖁᓪᓗᒋᑦ ᓄᓇᒧᑦ ᐊᐅᓪᓛᖅᓯᒪᑲᐃᓐᓇᖁᓪᓗᒋᑦ ᐅᒪᔪᖅᓯᐅᕐᓗᑎᒃ.

 

ᑮᓇᐅᔭᐃᑦ ᐊᑐᕐᓂᐊᖅᑐᑦ ᓄᕙᓐᓇᕐᔪᐊᖅ-19ᒧᑦ ᐃᓄᓕᕆᔨᑐᖃᒃᑯᓐᓂᙶᓚᐅᖅᑐᑦ ᒐᕙᒪᑐᖃᒃᑯᑦ ᐅᖃᐅᓯᕆᓚᐅᖅᑕᖏᓐᓂᑦ ᒫᑦᓯ 25, 2020ᒥ.  ᕿᑭᖅᑕᓃᒃᑯᓐᓄᑦ ᑐᓂᔭᐅᔪᑦ ᑮᓇᐅᔭᐃᑦ $6.1 ᒥᓕᔭᓂᒃ ($6,132,544).

 

ᔫᓐ, ᕿᑭᖅᑕᓃᒃᑯᑦ ᑐᓂᓯᓚᐅᖅᑐᑦ ᖃᕆᓴᐅᔭᕋᓛᓂᒃ ᐃᓕᓐᓂᐊᖅᑎᓄᑦ ᐃᑲᔫᑎᒋᔭᐅᔪᒪᓪᓗᑎᒃ ᐃᓕᓐᓂᐊᕈᓐᓃᖅᑎᑕᐅᑎᓪᓗᒋᑦ ᐃᓕᓐᓂᐊᖅᑏᑦ ᓄᕙᓐᓇᕐᔪᐊᖅ-19 ᐱᔾᔪᑎᒋᓪᓗᒍ.

ᑖᒃᑯᐊ ᑮᓇᐅᔭᐃᑦ 65ᓄᑦ ᖃᕆᓴᐅᔭᕋᓛᓄᑦ ᐅᕙᙶᓚᐅᖅᑐᑦ ᒫᔅᑐ ᑳᑦ ᑎᒥᖁᑖᓂᑦ ᐊᒻᒪᓗ ᒐᕙᒪᑐᖃᒃᑯᓐᓂᑦ.  ᑭᖑᓂᐊᒍᑦ ᐅᐃᒍᒋᐊᖅᑕᐅᓚᐅᖅᑐᖅ ᐱᓕᕆᐊᖅ ᑐᓂᔭᐅᓪᓗᑎᒃ ᐋᒃᓱᐊᒃᑯᓐᓂᑦ (ACTUA), ᑲᓇᑕᒥ ᐊᖏᓂᖅᐹᖑᓪᓗᑎᒃ ᖃᐅᔨᓴᕐᓂᕐᒧᑦ, ᓄᑖᙳᖅᐸᓪᓕᐊᔪᓕᕆᔨᖏᑦ, ᓈᓴᐅᓯᕆᔨᖏᓐᓂᑦ ᑲᓇᑕᒥ (STEM)ᑯᓐᓂᑦ.

 

ᑎᑎᕋᖅᓯᒪᔪᑦ ᓈᓴᐅᑎᐅᔪᑦ ᐊᑐᖅᑕᐅᓚᐅᖅᑐᓂᒃ ᕿᑭᖅᑕᓃᒃᑯᓐᓄᑦ ᓄᕙᓐᓇᕐᔪᐊᖅ-19ᒧᑦ ᐱᓕᕆᐊᖑᓯᒪᔪᓂᑦ ᐱᔾᔪᑎᒋᓪᓗᒍ:  

• $3 ᒥᓕᔭᓐ ᐊᑐᖅᑕᐅᔪᑦ ᓂᐅᕕᕈᑎᓄᑦ ᐃᓐᓇᕐᓄᑦ ᕿᑭᖅᑕᓂ
  • ᐅᖓᑖᓂ 1,200 ᐃᓐᓇᐃᑦ ᕿᑭᖅᑕᓂ ᑐᓂᔭᐅᓚᐅᖅᑐᑦ ᓂᕿᑖᖃᑦᑕᕈᓐᓇᖁᓪᓗᒋᑦ ᓴᓗᒻᒪᖅᓴᐅᑎᑖᖃᑦᑕᖁᓪᓗᒋᓪᓗ
• $2.1 ᒥᓕᔭᓐ ᑲᑎᓪᓗᒋᑦ ᑐᓐᓂᖅᑯᓯᐊᖑᓚᐅᖅᑐᑦ ᖃᓂᒌᓗᐊᖅᑕᐃᓕᓂᕐᒧᑦ ᑐᕌᖓᔪᓂᒃ ᓅᒍᓐᓇᖅᑐᑦ ᑲᔪᖏᖅᓴᖅᑕᐅᓪᓗᑎᒃ ᓅᓯᒪᖁᔭᐅᓪᓗᑎᒃ ᓄᓇᒥ
  • 1, 408 ᑐᓂᔭᐅᓚᐅᖅᑐᑦ ᓅᓯᒪᓂᐊᖅᑐᓄᑦ ᐃᓚᒌᓄᑦ ᕿᑭᖅᑕᓂ
  • 4,490 ᐃᓄᐃᑦ ᐃᑲᔪᖅᑕᐅᓚᐅᖅᑐᑦ
• 105 ᖃᕆᓴᐅᔭᖅᑖᖅᑎᑦᑎᓚᐅᖅᑐᑦ ᕿᑭᖅᑕᓂ ᐃᓕᓐᓂᐊᖅᑎᓄᑦ ᐃᓕᓐᓂᐊᕐᓂᖏᑦ ᓄᖅᑲᖅᑎᑕᐅᑲᓪᓚᓚᐅᕐᓂᖏᓐᓄᑦ ᐃᓕᓐᓂᐊᖏᓐᓇᕈᓐᓇᖁᓪᓗᒋᑦ

 

ᓂᕿᒃᓴᖃᑦᑎᐊᖁᓪᓗᒋᑦ ᐃᓚᕗᑦ ᓄᓇᓕᕗᓪᓗ ᓄᕙᓐᓇᕐᔪᐊᖅ-19 ᐊᑐᖅᑎᓪᓗᒍ, ᕿᑭᖅᑕᓃᒃᑯᑦ ᑮᓇᐅᔭᖃᖅᑎᑦᑎᔪᓐᓇᓚᐅᕐᒥᔪᑦ ᐅᒪᔪᕐᓂᐊᖅᑎᒃᑯᑦ ᑲᑎᒪᔨᖏᓐᓂ.  ᒫᑦᓯᒥ ᕿᑭᖅᑕᓃᒃᑯᑦ ᑐᓂᓯᓚᐅᖅᑐᑦ ᑮᓇᐅᔭᓂᒃ ᐊᔾᔨᖏᓐᓂᒃ ᓄᓇᕗᑦ ᑐᙵᕕᒃᑯᑦ ᑐᓂᓚᐅᖅᑕᖏᓐᓄᑦ $5,000ᓂ ᕿᑭᖅᑕᓂ ᐅᒪᔪᕐᓂᐊᖅᑎᒃᑯᓐᓄᑦ ᑲᑎᓪᓗᒋᑦ ᑮᓇᐅᔭᐃᑦ $10,000ᓂ ᐊᑐᓂ ᐅᒪᔪᕐᓂᐊᖅᑎᒃᑯᑦ ᓄᓇᓕᖕᓂᑦ ᑐᓂᔭᐅᓪᓗᑎᒃ.

 

ᔪᓚᐃᒥ, ᕿᑭᖅᑕᓃᒃᑯᑦ ᖃᐅᔨᓴᓚᐅᖅᑐᑦ ᓄᓇᓕᖕᓂᑦ ᓂᖃᖅᑎᑦᑎᕙᒃᑐᓂ ᐱᔨᑦᓯᕋᓲᓄᑦ ᑮᓇᐅᔭᖅᑖᕐᕕᐅᓪᓗᑎᒃ ᑐᓂᓯᓪᓗᑎᒃ ᖄᖓᒍᑦ ᐅᒪᔪᕐᓂᐊᖅᑎᒃᑯᓐᓂ ᕿᑭᖅᑕᓂ ᑮᓇᐅᔭᓂ $6,577ᓂ.

 

ᐃᑲᔪᖃᑕᐅᒍᒪᓪᓗᒋᑦ ᐃᓄᖕᓄᑦ-ᓇᖕᒥᓂᖁᑎᒋᔭᐅᔪᑦ ᒪᑭᑕᑦᑎᐊᕈᓐᓇᖁᓪᓗᒋᑦ ᓄᕙᓐᓇᕐᔪᐊᖅ-19 ᐊᑐᖅᑎᓪᓗᒍ, ᕿᑭᖅᑕᓃᒃᑯᑦ ᐃᑲᔪᓚᐅᖅᑐᑦ ᑲᑭᕙᒃᑯᓐᓂ ᐊᑐᓕᖅᑎᑦᑎᓂᖏᓐᓄᑦ ᒪᕐᕉᓂᒃ ᐱᓕᕆᐊᒃᓴᓂ.  ᑖᓐᓇ 1 ᒥᓕᔭᓐ ᐃᑲᕐᕋᑎᒍᑦ ᑮᓇᐅᔾᔭᒃᓴᖅᑐᓄᑦ  ᐊᒻᒪᓗ $500,000ᓂ ᓇᖕᒥᓂᕐᓄᑦ ᐃᑲᔫᑎᐅᔪᓂᒃ.

 

ᑕᒪᒃᑯᐊ ᐱᒋᐊᕈᑎᒋᔭᐅᓯᒪᔪᑦ ᑲᔪᓯᑦᑎᐊᓚᐅᖅᑐᑦ.  ᑖᒃᑯᐊ ᖃᕆᓴᐅᔭᒃᑯᑦ ᑐᒃᓯᕋᐅᑎᓕᐅᕐᓂᖅ ᓅᓯᒪᓂᕐᒧᑦ ᑮᓇᐅᔭᖅᑖᕋᓱᒃᑐᓂᒃ ᐊᒻᒪᓗ ᖃᕆᓴᐅᔭᕋᓛᖅᑖᕋᓱᒃᑐᓪᓗ ᐱᔭᕇᖅᑕᐅᓵᓕᓚᐅᖅᑐᑦ ᑐᓂᔭᐅᓵᓪᓕᓪᓗᑎᒃ.  ᐃᓚᒌᑦ ᓇᒃᓯᐅᔾᔨᕙᒃᖢᑎᒃ ᓅᓯᒪᓂᕆᔭᖏᓐᓂᒃ ᑎᑎᕋᖅᖢᑎᒡᓗ ᐊᑐᓚᐅᖅᑕᒥᓂᒃ ᖁᔭᓕᓪᓗᑎᓪᓗ.  ᐃᓐᓇᐃᑦ ᐅᖃᖅᓯᒪᖕᒥᔪᑦ ᐊᒃᓱᐊᓗᒎᖅ ᐃᑲᔪᓚᐅᕐᒪᑕ ᓂᐅᕕᕈᑎᑦ.

 

ᐊᒃᓱᕈᓐᓇᖅᑐᓂᒃ ᐊᑐᓕᖅᑎᓪᓗᑕ ᓄᕙᓐᓇᕐᔪᐊᖅ-19 ᐱᓪᓗᒍ ᐃᖅᑲᓇᐃᔭᖅᑎᕗᑦ ᐱᓕᕆᐊᒃᓴᓂᒃ ᓯᕗᒧᐊᖅᑎᑦᑎᑎᐊᓚᐅᖅᑐᑦ.

 

ᑕᓪᓗᕈᑎᐅᑉ ᐃᒪᖓ

ᑖᒃᑯᐊ ᐱᓕᕆᕕᕗᑦ ᑕᕆᐅᓕᕆᔨᒃᑯᑦ ᐅᒪᔪᓕᕆᔨᒃᑯᓪᓗ ᐃᑲᔫᓯᐊᒃᓴᓂ ᓴᖅᑭᑎᑦᑏᓐᓇᖅᑐᑦ ᑕᓪᓗᕈᑎᐅᑉ ᐃᒪᖓᒍᑦ.  ᔪᓚᐃ 2020ᒥ, ᕿᑭᖅᑕᓃᒃᑯᑦ ᑐᓂᓯᓚᐅᖅᑐᑦ ᑕᓪᓕᒪᓄᑦ ᐅᒪᔪᕐᓂᐊᖅᑎᒃᑯᑦ ᑲᑎᒪᔨᖏᓐᓄᑦ ᐃᒃᐱᐊᕐᔪᖕᒥ, ᑲᖏᖅᑐᒑᐱᖕᒥ, ᐊᐅᓱᐃᑦᑐᕐᒥ, ᒥᑦᑎᒪᑕᓕᖕᒥ ᖃᐅᓱᐃᑦᑐᕐᒧᓪᓗ  $100,00ᓂ ᐊᑐᓂ

 

ᓇᐅᑦᑎᖅᓱᖅᑏᑦ ᐅᓄᖅᓯᕙᓪᓕᐊᔪᑦ ᐃᖅᑲᓇᐃᔭᓕᖅᑐᓂᒃ ᐊᑐᓂ ᐊᒃᑐᖅᑕᐅᓯᒪᔪᒥᒃ ᓄᓇᓕᖕᒥ.  ᐃᒃᐱᐊᕐᔪᖕᒥ, ᓇᐅᑦᑎᖅᓱᖅᑏᑦ ᓂᕿᖃᖅᑎᑦᑎᕙᒃᑐᑦ ᓄᓇᖅᑲᑎᖏᓐᓄᑦ ᓄᕙᓐᓇᕐᔪᐊᖅ-19 ᐊᑐᖅᑎᓪᓗᒍ.

 

ᓯᕗᒧᐊᕈᑎᒋᕙᓪᓕᐊᔭᕗᑦ ᐱᖁᑎᕐᔪᐊᒃᓴᓂᒃ ᑕᓪᓗᕈᑎᐅᑉ ᐃᒪᖓᓄᑦ ᓄᓇᓕᖕᓂ.  ᐱᓕᕆᐊᒃᓴᑦ ᐱᔭᕇᖅᑕᐅᓯᒪᓕᖅᑐᑦ ᖃᐅᔨᓴᕐᓂᕐᒥᒃ ᐊᔾᔨᒌᙱᑦᑐᓄᑦ ᐊᑐᖅᑕᐅᔪᓐᓇᖅᑐᓂᒃ ᐃᒡᓗᒃᓴᒧᑦ ᐊᑐᓂ ᑕᓪᓕᒪᓄᑦ ᓄᓇᓕᖕᓄᑦ, ᑐᑭᓯᐅᒪᖃᑦᑕᐅᑎᓂᕐᒥᒃ ᐊᖏᕈᑎᒥᒃ ᓄᓇᓕᖕᓂ ᑐᓚᑦᑕᕐᕕᒃᓴᓄᑦ ᐊᐅᓱᐃᑦᑐᕐᒥ ᖃᐅᓱᐃᑦᑐᕐᒥᓗ, ᐊᒻᒪᓗ ᑐᑭᓯᒋᐊᕐᕕᖃᖅᖢᑎᒃ ᑐᓚᑦᑕᕐᕕᒃᓴᓂ ᐃᒃᐱᐊᕐᔪᖕᒥ ᑲᖏᖅᑐᒑᐱᖕᒥᓗ.

 

ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ

ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑏᑦ ᐱᓕᕆᐊᖑᓂᖓ ᓯᕗᓪᓕᐅᑎᑕᐅᖏᓐᓇᖅᑐᖅ ᐊᒻᒪᓗ ᐊᓪᓗᖅᓯᒪᓕᖅᖢᑕ ᐱᓕᕆᐊᒃᓴᓂ ᐋᖅᑭᒃᓱᐃᕙᓪᓕᐊᓪᓗᑎᒃ.  ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᑖᖅᓯᒪᓕᖅᑐᑦ ᕿᒻᒦᑦ ᐊᑐᓕᖅᑎᑕᐅᒃᑲᓐᓂᕐᓂᖏᓐᓄᑦ ᑲᒪᔨᒥᒃ ᐱᓕᕆᐊᖃᕐᓂᐊᖅᑐᒥᒃ ᕿᒻᒦᑦ ᒥᒃᓵᓄᑦ ᐱᓕᕆᐊᒃᓴᓂ.

 

ᐊᑐᖅᖢᒍ ᕿᑭᖅᑕᓂ ᓱᓕᔪᒥᒃ ᑭᓪᓕᓯᓂᐊᖅᑎᒃᑯᑦ ᐊᖏᖃᑎᒌᒍᑎᖓ, ᕿᑭᖅᑕᓃᒃᑯᑦ ᑐᓂᔭᐅᓚᐅᖅᑐᖅ ᑮᓇᐅᔭᓂᒃ ᐱᒋᐊᕈᑎᓂᒃ $17.5 ᒥᓕᔭᓂᒃ ᒐᕙᒪᑐᖃᒃᑯᓐᓂᑦ.  ᑐᓐᓂᖅᑯᓯᐊᖅᑖᕐᓂᕐᒥᒃ ᐊᖏᖃᑎᒌᒍᑎᑦ ᑮᓇᐅᔭᓄᑦ $2.5 ᒥᓕᔭᓂᒃ ᐱᓕᕆᐊᖑᕙᓪᓕᐊᔪᑦ ᐋᔩᕋᕈᑎᒋᔭᐅᓪᓗᑎᒃ ᐅᓄᕐᓂᖅᓴᓂ ᑮᓇᐅᔭᖅᑖᕋᓱᒃᖢᑎᒃ.  ᑭᓯᐊᓂ ᓄᕙᓐᓇᕐᔪᐊᖅ-19 ᐊᑐᓕᖅᑎᓪᓗᒍ ᐱᓕᕆᐊᖑᓂᖓ ᐊᒃᑐᖅᑕᐅᓯᒪᓕᓚᐅᕐᒪᑦ.

 

ᓄᓘᔮᒃ ᐱᓕᕆᐊᖓ

ᔭᓐᓄᐊᓕ 2020ᒥ, ᐸᕕᓐᓛᓐᑯᑦ ᕿᑭᖅᑕᓃᒃᑯᓐᓄᑦ ᐅᐸᓚᐅᕐᒪᑕ ᑐᑭᓯᑎᑦᑎᓪᓗᑎᒃ ᒫᓐᓇᒃᑯᒡᒎᖅ ᐱᓕᕆᐊᖓ ᖃᓄᐃᓕᖓᓂᕆᔭᖓᑦ ᒪᑭᑖᓂᔾᔮᙱᓐᓂᕋᖅᖢᑎᒃ.  ᑭᖑᓂᐊᓂᑦ ᓄᖅᑲᖅᑎᑕᐅᓚᐅᖅᑎᓪᓗᒍ ᓄᓇᕗᒥ ᐊᕙᑎᓕᕆᔨᒃᑯᑦ ᓈᓚᖕᓂᕆᔭᖓᑦ ᒫᑦᓯ 2020ᒥ, ᐸᕕᓐᓛᓐᑯᑦ ᐅᐸᒃᓯᒃᑲᓐᓂᓚᐅᖅᑐᑦ ᕿᑭᖅᑕᓃᒃᑯᓐᓄᑦ ᐅᖃᖅᖢᑎᒃ ᐅᔭᕋᕐᓂᐊᕐᕕᒎᖅ ᒪᑐᐃᔭᐅᑐᐃᓐᓇᕆᐊᖃᕐᒪᑦ ᑐᒡᓕᐊ ᐱᓕᕆᐊᒃᓴᖅ ᑲᔪᓯᒐᔭᙱᑉᐸᑦ.

 

ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᑦᑎᓚᐅᖅᑐᑦ ᐳᕋᐱᔅ ᕚᑐ ᑰᐸᒃᑯᓐᓂ ᖃᐅᔨᓴᖁᔨᓪᓗᑎᒃ ᐸᕕᓐᓛᓐᑯᑦ ᓇᓗᓇᐃᓚᐅᖅᑕᖓ ᑮᓇᐅᔭᑎᒍᑦ ᐊᒃᓱᕈᕐᓂᐊᕐᓂᕋᖅᖢᑎᒃ ᓱᓕᒐᓗᐊᕐᒪᖔᑖᒃ.

 

ᑖᒃᑯᐊ ᑐᑭᓯᔾᔪᑎᐅᔪᑦ ᑐᑭᓯᔭᐅᖕᒪᑕ ᓴᖅᑭᑎᑦᑎᔪᓐᓇᓚᐅᖅᑐᑦ ᒪᕐᕉᓂ ᓇᓖᕌᕈᑎᒃᓴᓂ;

• ᕿᑭᖅᑕᓃᒃᑯᑦ ᖁᔭᓈᕐᓗᓂᐅᒃ ᑮᓇᐅᔭᓄᑦ ᐃᓱᒫᓗᑎᒋᔭᐅᔪᖅ ᓇᓗᓇᐃᖅᔭᖅᑕᐅᓚᐅᖅᑐᒧᑦ ᕿᒥᕐᕈᑎᑦᑎᑎᓪᓗᑕ, ᐊᒻᒪᓗ ᐅᑕᖅᑭᓗᑕ ᐊᕙᑎᓕᕆᔨᒃᑯᑦ ᕿᒥᕐᕈᓂᕐᒥᒃ ᐱᒋᐊᒃᑲᓐᓂᓕᖅᐸᒧᑦ..
• ᑕᐃᒪ, ᕿᑭᖅᑕᓃᒃᑯᑦ ᑭᐅᔪᓐᓇᖅᑐᑦ ᐸᕕᓐᓛᓐᑯᑦ ᑐᒃᓯᕋᐅᑎᖓᓂᒃ ᐊᒻᒪᓗ ᐋᔩᕋᕈᑎᖃᕐᓗᑎᓪᓘᓐᓃᑦ ᐊᖏᕈᑎᒥᒃ ᑲᒻᐸᓂᓗ ᐃᑲᔪᕐᓂᐊᖅᑐᒥᒃ ᑮᓇᐅᔭᑎᒍᑦ ᐊᑲᐅᙱᓕᐅᕈᑎᒋᔭᖏᓐᓂᒃ ᐊᑕᐅᑦᑎᒃᑯᓪᓗ ᑲᔪᓯᑎᑕᐅᓗᓂ ᐊᕙᑎᒥᒃ ᖃᐅᔨᓴᕐᓂᕐᒥᒃ ᐱᕕᖃᕈᓐᓇᕐᓂᐊᕐᒪᑦ ᐃᓚᒋᔭᐅᔪᑦ ᐃᑲᔪᖅᑐᕐᓂᐊᕐᒪᖔᑖᒃ ᐃᑲᔪᖅᑐᕐᓂᐊᙱᒻᒪᖔᑖᓘᓐᓃᑦ ᑐᒡᓕᐊᓂ ᐱᓕᕆᐊᒃᓴᒥ.

 

ᐊᑐᖅᑕᐅᓚᐅᖅᓯᒪᙱᑦᑐᒥᒃ ᐊᑐᕋᑦᑕ ᐋᔩᕋᕐᓂᐅᑉ ᒥᒃᓵᓄᑦ, ᕿᑭᖅᑕᓃᒃᑯᑦ ᐋᔩᕋᖃᑎᖃᕈᒪᔪᑦ ᐸᕕᓐᓛᓐᑯᓐᓂ.  ᕿᑭᖅᑕᓃᒃᑯᑦ ᐱᔾᔪᑎᖓ ᐋᔩᕋᖃᑎᖃᕐᓂᕐᒥᒃ ᐸᕕᓐᓛᓐᑯᓐᓂ ᐱᔪᓐᓇᖅᓯᒐᓱᒍᒪᓪᓗᑎᒃ ᓇᓗᓇᐃᖅᓯᕕᐅᓂᕐᒥᒃ ᐊᒻᒪᓗ ᐃᑲᔫᓯᐊᖅᑖᒃᑲᓐᓂᕋᓱᐊᕐᓗᑕ ᐸᕕᓐᓛᓐᑯᓐᓂᑦ, ᐊᒻᒪᓗ ᐃᓄᐃᑦ ᐊᒻᒪ ᓄᓇᓖᑦ ᐱᕕᖃᕈᓐᓇᖁᓪᓗᒋᑦ ᑭᖑᓪᓕᖅᐹᒃᑯᑦ ᐊᑐᓕᖁᔾᔪᑎᓕᐅᕈᓐᓇᕐᓗᑎᒃ ᐊᖏᕐᓂᐊᕐᒪᖔᑖᒃ ᑖᒃᑯᓂᖓ ᐃᑲᔫᓯᐊᒃᓴᓂ ᐊᒻᒪᓗ ᐱᕕᒃᓴᕆᔭᐅᔪᓐᓇᖅᑐᓂᓗ ᑐᒡᓕᐊᓂ ᐱᓕᕆᐊᕐᒥ − ᐃᓄᐃᑦ ᑭᖑᓪᓕᖅᐹᒃᑯᑦ ᑐᑭᑖᖅᑎᑦᑎᖁᓪᓗᒋᑦ ᐱᓕᕆᐊᖅ ᑲᔪᓯᓂᐊᕐᒪᖔᑦ, ᒪᑐᔭᐅᖏᖔᕐᓗᓂ ᓄᓘᔮᒃ ᐱᓕᕆᐊᖓ ᐃᓄᐃᑦ ᐃᓚᐅᙱᑎᓪᓗᒋᑦ.

 

ᔪᓚᐃ  2020, ᕿᑭᖅᑕᓃᒃᑯᑦ ᑐᓴᖅᑎᑦᑎᓚᐅᕐᒪᑕ ᐊᑎᓕᐅᖅᑕᐅᓂᖓᓂ ᓄᓘᔮᒃ ᐱᓕᕆᐊᖓᓄᑦ ᐃᓄᖕᓄᑦ ᓇᓗᓇᐃᖅᓯᓯᒪᑦᑎᐊᕐᓂᕐᒧᑦ ᐊᖏᕈᑎᒥᒃ ᐸᕕᓐᓛᓐᑯᓪᓗ.

 

ᓯᕗᓂᕐᒥ ᖃᓄᐃᓕᖓᒐᔭᕐᒪᖔᑦ ᐱᓕᕆᐊᒃᓴᐅᓗᑎᒃ ᐅᓂᒃᑳᖅᑕᐅᓂᐊᖅᑐᑦ ᐃᓕᔅᓯᓐᓄᑦ ᐃᖅᑲᓇᐃᔭᖅᑎᑦᑎᓐᓄᑦ.

 

2020-2021 ᕿᑭᖅᑕᓃᒃᑯᑦ ᐃᓕᓐᓂᐊᕐᓂᕐᒧᑦ ᐃᑲᔫᓯᐊᒃᓴᑦ

2016-17ᒥᑦ ᐊᕐᕌᒍᑕᒫᑦ ᕿᑭᖅᑕᓃᒃᑯᑦ ᑐᓂᓯᕙᒃᑐᑦ ᑮᓇᐅᔭᓂᒃ ᐊᑐᓂ $2500.00ᓂ ᐊᒻᒪ $5,000ᓂ

ᔮᓐ ᐊᒪᕈᐊᓕᒃ ᐃᓕᓐᓂᐊᕐᓂᕐᒧᑦ ᐃᑲᔫᑎᖓ ᓯᓚᑦᑐᖅᓴᕐᕕᖕᓄᑦ ᐃᓕᓐᓂᐊᖅᑐᓄᑦ ᕿᑭᖅᑕᓂᖔᖅᑐᓂᒃ.  ᑕᒪᑐᒪᓂᑦ ᐱᓇᓱᐊᕈᓯᕐᒥ, ᑐᓂᓯᓂᐊᖅᑐᒍᑦ  2020-2021ᒧᑦ ᐃᑲᔪᓯᐊᓂ ᕿᑭᖅᑕᓂᙶᖅᑐᓂ ᐃᓕᓐᓂᐊᖅᑎᓂ − ᖁᕕᐊᒋᕙᒃᑕᒃᑲ ᐃᓕᓐᓂᐊᖅᑏᑦ ᑐᓴᖅᑎᑦᑎᒐᐃᒻᒪᑕ ᑐᓂᔭᐅᑎᓪᓗᒋᑦ ᐃᑲᔫᓯᐊᓂ.  ᐊᕐᕌᒍᑕᒫᑦ, ᐃᓕᓐᓂᐊᖅᑎᑦ ᖃᐅᔨᒪᑎᑦᑎᖃᑦᑕᖅᑐᑦ ᖁᔭᓕᓂᕋᖅᖢᑎᒃ ᐃᑲᔫᑎᑖᕐᓂᖏᓐᓄᑦ ᐃᑲᔪᕐᒪᑕᒎᖅ ᐃᓕᓐᓂᐊᕐᓂᕐᒧᑦ ᐱᖁᑎᑖᕐᓂᕐᒥᒃ ᐅᖃᓕᒫᖅᑖᕐᓂᕐᒥᓗ.

 

ᓯᕗᓕᖅᐹᕆᔭᐅᔪᒥᒃ ᕿᑭᖅᑕᓃᒃᑯᑦ ᐃᓄᒃᑐᑦ ᐅᖃᐅᓯᖓᓄᑦ ᐃᓕᑕᕆᔭᐅᔾᔪᒻᒥᒃ  

ᔫᓐᒥ, ᓯᕗᓪᓕᖅᐹᖑᔪᒥᒃ ᑐᓂᓯᓚᐅᖅᑐᖅ ᐃᓄᒃᑎᑐᑦ ᐅᖃᐅᓯᓕᕆᓂᕐᒧᑦ ᐃᓕᑕᕆᔭᐅᔾᔪᑎᒥᒃ ᖁᕝᕙᐅᒪᓂᖅᓴᒥᒃ ᐃᓕᓐᓂᐊᖅᑎᐅᔪᒧᑦ ᑮᑎ ᑲᓪᓗᖕᒧᑦ, ᐃᓕᓐᓂᐊᖅᑏᑦ ᐃᓕᓐᓂᐊᕌᓂᒃᑎᓪᓗᒋᑦ ᐃᖃᓗᓐᓂ.

 

 

ᑖᓐᓇ $1,000ᑖᓚᓂ ᐃᓕᑕᕆᔭᐅᔾᔪᑎ ᓴᖅᑭᑕᐅᓚᐅᖅᑐᖅ ᖁᕕᐊᓲᑎᖃᕈᒪᓪᓗᑎᒃ ᐃᓕᓐᓂᐊᖅᑎᓂᒃ ᓴᐳᔾᔨᒍᒪᔪᓂᒃ ᐅᖃᐅᓯᕐᒥᒃ ᐃᓕᓐᓂᐊᖅᑎᓪᓗᒋᑦ.  ᑖᓐᓇ ᐱᓕᕆᐊᖑᔪᖅ ᕿᑭᖅᑕᓃᒃᑯᓐᓄᑦ ᑲᑐᔾᔨᖃᑎᖃᖅᖢᑎᒃ ᐃᓄᒃᓱᒃ ᐃᓕᓐᓂᐊᕐᕕᖕᒥ.  ᑖᓐᓇ ᓯᕗᓪᓕᖅᐹᖑᓪᓗᓂ ᐃᓕᑕᕆᔭᐅᔾᔪᑎ ᑐᓂᔭᐅᒋᐅᖅᑐᒥᒃ.

 

ᑲᓪᓗᒃ ᖃᐅᓱᐃᑦᑐᕐᒥᐅᑦᓴᔭᐅᔪᖅ, ᐃᓕᓐᓂᐊᕆᐊᓛᖅᖢᓂ ᓄᓇᕗᑦ ᓯᕗᓂᒃᓴᕗᒻᒧᑦ ᐅᑭᐊᒃᓵᒃᑯᑦ 2021ᒥ ᐃᓕᓐᓂᐊᕐᓂᕆᔭᖓᑦ ᐱᔭᕇᒍᒪᓪᓗᓂᐅᒃ.

 

ᓴᖅᑭᑕᐅᓯᒪᔪᑦ ᑐᓴᒐᒃᓴᒐᓚᐃᑦ/ᐅᖃᓕᒫᒐᒐᓚᐃᑦ

ᖁᕕᐊᓱᒻᒪᕆᒃᐳᖓ ᓴᖅᑭᑎᑦᑎᒋᐊᒃᓴᖅ ᐅᓂᒃᑳᓕᐊᑦᑎᓐᓂ ᐅᖃᓕᒪᒐᓕᐊᖑᔪᓂᓗ.

 

ᓯᕗᓪᓕᖅᐹᖓ, ᑖᓐᓇ 2019-2020ᒧᑦ ᐊᕐᕌᒍᑕᒫᖅᓯᐅᑎᖓ ᐅᓂᒃᑳᖏᑦ ᐃᓗᓕᖃᖅᖢᓂ ᐅᓂᒃᑳᖑᓯᒪᔪᓂ ᖃᓄᖅ ᐋᖅᑭᒋᐊᕆᐊᖃᓚᐅᕐᒪᖔᑦᑕ ᐱᓕᕆᐊᑦᑎᓐᓂ ᐱᔾᔪᑎᒋᓪᓗᒍ ᓄᕙᓐᓇᕐᔪᐊᖅ-19.

 

ᓱᓕᑦᑕᐅᖅ ᓴᖅᑭᑎᑦᑎᖕᒥᔪᒍᑦ 2019/2020ᒧᑦ ᐃᑲᔫᓯᐊᒃᓴᓄᑦ ᐊᒻᒪᓗ ᑐᖅᓯᒪᔪᓂᒃ ᑮᓇᐅᔭᖏᓐᓄᑦ ᐅᓂᒃᑳᓂᒃ ᐃᓗᓕᖃᖅᑐᓂᒃ ᑲᔪᓯᑎᑕᐅᓯᒪᔪᓂᒃ ᐊᑐᕋᓗᐊᖅᖢᑕ ᓄᕙᓐᓇᕐᔪᐊᖅ-19ᒥ ᒪᑐᔭᐅᑎᓪᓗᒋᑦ ᐸᐃᕆᕕᖕᓄᑦ ᐃᑲᔫᑎᖏᑦ, ᕿᑭᖅᑕᓂ ᐃᓕᖅᑯᓯᓕᕆᓂᕐᒥᒃ ᐃᑲᔫᓯᐊᒃᓴᖏᑦ ᐊᒻᒪᓗ ᐱᕕᒃᓴᓄᑦ ᑮᓇᐅᔭᖏᑦ.

ᑐᓴᖅᑎᑦᑎᒍᒪᓪᓗᖓ ᑖᓐᓇ 2020ᒧᑦ ᑐᓴᒐᒃᓴᑦ ᒪᒃᐱᒐᖃᖅᑐᒥᒃ ᐅᓄᕐᓂᖅᓴᒐᓛᓂ ᐱᓕᕆᐊᖑᓯᒪᔪᓂᒃ ᐅᑭᐅᕐᒥ ᐊᐅᔭᒧᑦ ᐅᓂᒃᑳᖅᓯᒪᓂᖃᖅᑐᑦ.

 

ᑭᖑᓪᓕᖅᐹᒥ, ᓴᖅᑭᑎᑦᑎᒍᒪᓪᓗᒍ ᑖᓐᓇ ᐃᒫᓂ ᐱᕙᓪᓕᐊᔾᔪᑎᒃᓴᓕᐅᕐᓂᕐᒧᑦ ᖃᕆᓴᐅᔭᒃᑰᖅᑐᒥᒃ ᐃᑭᐊᖅᑭᕕᖕᒦᑦᑐᒥᒃ, ᐃᓗᓕᖃᖅᖢᓂ ᐸᕐᓇᐅᑎᒋᔭᑦᑎᓐᓂ ᐊᑐᖅᑕᐅᓂᐊᕐᓂᖓ ᓴᖅᑭᑕᐅᓯᒪᔪᓄᑦ ᑕᓪᓗᕈᑎᐅᑉ ᐃᒪᖓᓂ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᒃᓴᖏᓐᓄᑦ ᐊᖏᕈᑎᒥᒃ ᓴᐳᔾᔨᔾᔪᑎᒋᔭᐅᓂᐊᖅᑐᒥᒃ ᒪᕐᕉᒃᑲᓐᓂᕐᓂ ᓄᓇᖃᕐᕕᐅᔪᓂᒃ ᐃᒪᖃᕐᕕᐅᔪᓂᓪᓘᓐᓃᑦ ᕿᑭᖅᑕᓂ ᓄᓇᓕᖕᓂᑦ: ᓴᕐᕙᕐᔪᐊᖅ ᐊᒻᒪ ᕿᑭᖅᑕᐃᓪᓗ.

 

ᓴᕐᕙᕐᔪᐊᖅ, ᖁᑦᑎᒃᑐᒥ, ᐊᑭᐊᓂᑦ ᑕᓪᓗᕈᑎᐅᑉ ᐃᒪᖓᓂᑦ ᓯᕕᑐᔪᒥᒃ ᑲᔪᓯᓯᒪᔪᒥᒃ ᓴᐳᔾᔨᓯᒪᓂᖃᕋᔭᖅᖢᑎᒃ.

 

ᕿᑭᖅᑕᐃᑦ, ᓴᓂᑭᓗᐊᑉ ᐊᑭᐊᓃᑦᑐᖅ, 1500ᓂ ᕿᑭᖅᑕᖃᖅᑐᖅ, ᓯᐊᒻᒪᒃᓯᒪᔪᓂᒃ 3 ᒥᓕᔭᓂᒃ ᐊᖏᓂᖃᖅᑐᒥᒃ.

 

ᑕᒪᒃᑯᐊ ᐱᓕᕆᐊᒃᓴᐃᑦ ᐱᖃᓯᐅᑎᓯᒪᒐᔭᖅᑐᑦ ᓇᐅᑦᑎᖅᓱᖅᑎᓂᒃ − ᐃᖅᑲᓇᐃᔮᒃᓴᓂ ᓴᖅᑭᑦᑐᖃᕐᓂᐊᖅᖢᑎᒃ ᐃᓄᖕᓄᑦ.  ᐃᑲᔪᕐᓂᐊᖅᖢᓂ ᐱᓕᕆᐊᖃᕈᒪᔪᓕᒃ ᐃᖃᓗᓕᕆᓂᕐᒥᒃ ᐊᒻᒪᓗ ᓴᑐᖅᑕᐅᔪᓐᓇᕐᓗᑎᒃ ᑰᑕᒋᔭᐅᔪᑦ ᐃᒪᓂᑦ ᐊᑭᒋᔭᐅᔪᓄᑦ ᓄᓇᓕᖁᑎᑦᑎᓐᓂ.  ᓱᓕᓗ, ᕿᓄᔾᔪᑎᖃᕐᒥᔪᒍᑦ ᐃᒫᓂ ᐱᕙᓪᓕᐊᔾᔪᑎᒃᓴᓕᐅᕐᓂᕐᒧᑦ ᐱᖁᑎᕐᔪᐊᒃᓴᓂ ᓱᕐᓗ ᖃᐅᔨᓴᕐᓂᕐᒧᑦ ᓇᐅᑦᑎᖅᓱᕐᓂᕐᒧᑦ ᐃᒡᓗᒋᔭᐅᒐᔭᖅᑐᒥᒃ ᐊᐅᓱᐃᑦᑐᒥ, ᐊᔾᔨᒌᙱᑦᑐᓄᑦ ᐊᑐᖅᑕᐅᔪᓐᓇᖅᑐᒥᒃ ᐃᒡᓗᒥᒃ ᕿᑭᖅᑕᕐᔪᐊᕐᒥ ᓴᓂᑭᓗᐊᕐᒥᓗ ᐊᒻᒪᓗ ᐃᒪᕐᒥ ᐃᑎᔪᒥᒃ ᑐᓚᑦᑕᕐᕕᒃᓴᒥ ᕿᑭᖅᑕᕐᔪᐊᕐᒥ.

 

ᐃᓱᐊ

ᑕᒪᒃᑯᐊ ᕿᑭᖅᑕᓃᒃᑯᑦ ᐊᑐᖅᑕᖏᑦ ᐊᑐᖅᑕᐅᓚᐅᖅᓯᒪᙱᒻᒪᑕ ᐊᒻᒪᓗ ᐱᓕᕆᑦᑎᐊᕋᓱᒃᑐᒍᑦ ᐃᑲᔪᖅᑐᐃᓗᒍ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᓇᕗᒥ ᐊᑦᑕᕐᓇᖅᑐᒦᑎᑕᐅᑦᑕᐃᓕᖁᓪᓗᒋᑦ.

 

ᑕᒪᒃᑯᐊᖑᒐᓗᐊᖅᑎᓪᓗᒋᑦ ᐊᒃᓱᕈᓐᓇᖅᑐᑦ, ᐅᐱᒋᑦᑎᐊᖅᑕᒃᑲ ᐃᖅᑲᓇᐃᔭᖅᑎᕗᑦ ᐊᒻᒪᓗ ᖃᓄᖅ ᐊᖅᑭᒋᐊᖅᓯᒪᓂᑦᑎᓐᓂᒃ ᐱᓕᕆᐊᖑᑦᑎᐊᖁᓪᓗᒋᑦ ᐊᓯᔾᔨᖅᐸᓪᓕᐊᔪᑦ.  ᐃᓅᓯᕗᑦ ᓱᖏᐅᒃᓴᕙᓪᓕᐊᔪᖅ ᐅᓪᓗᒥ ᐊᑐᓕᖅᑕᑦᑎᓐᓂ ᐊᒻᒪᓗ ᐱᓕᕆᓐᓇᕐᓂᐊᖅᖢᑕ ᑭᒡᒐᖅᑐᕐᓗᒋᑦ ᕿ