ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᖁᕕᐊᓱᒃᑐᑦ ᕿᒥᕐᕈᓂᕐᒥᒃ ᐱᓕᕆᐊᖑᓚᐅᖅᑐᓂᒃ ᐊᒻᒪᓗ ᖃᓄᐃᓕᐅᕈᑕᐅᓚᐅᖅᑐᓂᓪᓗ ᓴᖅᑭᑕᐅᔪᓄᑦ ᐸᕕᓐᓛᓐ ᓴᕕᕋᔭᒃᓴᓂ ᐅᔭᕋᕐᓂᐊᕐᕕᓕᕆᔨᒃᑯᑦ ᑐᒃᓯᕋᐅᑎᒋᔭᖓᑕ ᒥᒃᓵᓄᑦ ᓄᓇᕗᒥ ᐊᕙᑎᓕᕆᔨᒃᑯᓐᓄᑦ ᐲᔭᖅᑕᖏᓐᓂᒃ ᐊᖏᓪᓕᒋᐊᕆᔪᒪᑎᓪᓗᒋᑦ ᓄᓘᔮᓂ ᐱᓕᕆᐊᕐᒥ.  ᑭᓯᐊᓂ, ᕿᑭᖅᑕᓃᒃᑯᑦ ᐃᑲᔪᖅᑐᕐᓂᕆᔭᖓᑦ ᐊᖏᓪᓕᒋᐊᕈᑎᒋᔭᐅᔪᒪᔪᒥᒃ ᑲᔪᓯᐊᒍᓐᓇᕐᓂᐊᖅᑐᖅ ᐅᔭᕋᕐᓂᐊᕐᕕᓕᕆᔨᒃᑯᑦ ᐋᖅᑭᒃᓱᐃᑦᑎᐊᒃᑲᓐᓂᖅᐸᑕ ᐃᓂᓪᓚᒃᑎᕆᑦᑎᐊᕐᓂᕐᒥᒃ ᐱᐅᓯᒋᐊᒃᑲᓐᓂᕐᓗᒋᑦ ᓄᓘᔭᑦ ᐱᓕᕆᐊᖓᓂ ᐊᒻᒪᓗ ᓴᖅᑭᑎᑦᑎᓗᑎᒃ ᓇᓗᓇᐃᔭᖅᓯᒪᔭᖏᓐᓂᑦ ᐃᓄᖕᓄᑦ ᕿᑭᖅᑖᓗᖕᒥ.

2018 ᐱᒋᐊᕐᓂᖓᓂ, ᕿᑭᖅᑕᓃᒃᑯᑦ ᐱᔭᕇᕈᑎᖃᓚᐅᖅᑐᑦ ᓯᕕᑐᔪᒃᑯᑦ ᓄᓇᓕᖕᓂᑦ ᑐᑭᓯᒋᐊᕆᐊᕐᓂᕐᒥᒃ ᐳᓚᕋᖅᖢᑎᒃ ᑐᓴᖅᑎᑦᑎᔭᖅᑐᖅᖢᑎᒃ ᐱᓕᕆᐊᑉ ᒥᒃᓵᓄᑦ ᖃᓄᐃᓕᖓᓕᕐᓂᖓᓂᒃ ᐊᒻᒪᓗ ᓄᐊᓴᐃᔭᖅᑐᖅᖢᑎᒃ ᐅᖃᐅᓯᒃᓴᕆᔭᐅᔪᓂᒃ ᐊᖏᖅᑕᐅᓚᐅᓐᖏᑎᓪᓗᒍ ᐸᕐᓇᐅᑎ ᐋᔩᖃᑎᖃᒃᑲᓐᓂᕐᓂᕐᒧᑦ ᓄᓘᔮᓄᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᒃᓴᖏᓐᓂᒃ ᐊᖏᕈᑎᒥ.

ᒪᓕᓪᓗᒋᑦ ᑐᓴᖅᑕᐅᓚᐅᖅᑐᑦ ᐃᓄᖕᓂᑦ, ᕿᑭᖅᑕᓃᒃᑯᑦ ᐱᕙᓪᓕᐊᑎᑦᑎᓚᐅᖅᑐᑦ ᐊᒻᒪᓗ ᑐᓂᓯᓪᓗᑎᒃ ᐅᓂᒃᑳᓂ ᐸᕕᓐᓛᓐᑯᓐᓄᑦ ᑕᐃᔭᐅᔪᒥᒃ “ᐋᖅᑭᒋᐊᕆᓂᖅ ᐸᕕᓐᓛᓐᑯᑦ ᑐᕌᒐᕆᔭᖓᓄᑦ: ᐃᓄᖕᓄᑦ ᐃᑲᔪᖅᑐᖅᑕᐅᓂᖓ ᐊᑐᕐᓗᒋᑦ ᓯᕗᓪᓕᐅᑎᑕᐅᔪᒪᔪᓂᒃ ᐃᓄᖕᓄᑦ ᐱᔪᒪᔭᖏᓐᓂᑦ”.

ᑖᒃᑯᐊ ᐅᓂᒃᑳᓕᐊᑦ ᑐᓂᔭᐅᓚᐅᖅᑐᑦ ᑖᒃᑯᐊ ᐸᕕᓐᓛᑯᓐᑯᑦ ᕿᑭᖅᑕᓃᒃᑯᓪᓗ ᐃᖅᑲᓇᐃᔭᖃᑎᒌᑦᑎᐊᕈᓐᓇᐃᓕᑎᓪᓗᒋᑦ ᓄᓘᔮᑦ ᐱᓕᕆᐊᖓ ᐱᓪᓗᒍ. ᑖᒃᑯᐊ ᐊᑎᓕᐅᖅᑎᐅᔪᑦ ᐱᔭᕇᕈᑎᖃᓚᐅᕐᒥᔪᑦ ᐊᖏᖃᑎᒌᒍᓐᓇᐃᓕᓂᕐᒧᑦ ᓈᓚᒃᑎᒃᑰᕆᐊᖃᕐᓂᕐᒥᒃ.  ᐸᕕᓐᓛᓐᑯᑦ ᑐᓂᓯᓯᒪᒃᑲᓐᓂᕐᒥᔪᑦ ᐱᓕᕆᐊᕐᒥ ᐋᖅᑭᒋᐊᕆᔪᒪᓂᕐᒥᒃ ᑐᒃᓯᕋᐅᑎᒥᒃ ᑕᐃᔭᐅᔪᒥᒃ “2018ᒥ ᑮᓇᐅᔭᓕᐅᕐᓂᕐᒧᑦ ᐲᔭᐃᒃᑲᓐᓂᕈᒪᓂᕐᒥᒃ ᑐᒃᓯᕋᐅᑎ”

ᕿᑭᖅᑕᓃᒃᑯᑦ ᑐᓂᓯᕋᑕᓚᐅᕐᒥᔪᑦ ᑐᓴᒃᑲᐃᒍᑎᒥᒃ ᒪᓕᓐᖏᓐᓂᕐᒧᑦ ᑲᔪᓯᑎᑦᑎᓯᒪᓐᖏᓐᓂᖏᓐᓄᑦ ᐃᓄᖕᓂᑦ ᐃᖅᑲᓇᐃᔭᖅᑎᖃᕆᐊᖃᕐᓂᕐᒧᑦ ᐱᔾᔪᑎᖃᖅᑐᒥᒃ 2017ᒥ ᒥᑭᓐᓂᖅᐹᕆᔪᓐᓇᖅᑕᖏᓐᓂᒃ ᐃᓄᖕᓂᑦ ᐃᖅᑲᓇᐃᔭᖅᑎᖃᕐᓂᕐᒧᑦ ᑐᕌᒐᖓᓂ, ᐱᕙᓪᓕᐊᓂᖏᑦ ᐱᓕᕆᐊᖃᕐᓂᖏᓐᓄᑦ ᐊᑭᖃᖅᑐᒥᒃ $20 ᒥᓕᔭᓐᓂᒃ ᑮᓇᐅᔭᑐᖅᑐᒥᒃ ᐱᓕᒻᒪᒃᓴᐃᓂᕐᒧᑦ ᐃᓕᓐᓂᐊᖅᑎᑦᑎᓂᕐᒧᓪᓗ ᐊᒻᒪᓗ ᑲᑐᔾᔨᖃᑎᖃᕐᓂᕐᒧᑦ ᑮᓇᐅᔭᖏᓐᓂᑦ.  ᑕᐃᒪᐃᒻᒪᑦ ᑖᒃᑯᐊ ᕿᑭᖅᑕᓃᒃᑯᑦ ᐅᓂᒃᑳᕐᓂᕆᔭᖏᑦ ᐸᕕᓐᓛᑯᓐᓄᑦ ᐊᖏᕈᑎᒋᔭᐅᓚᐅᕐᖓᑦ ᐱᓕᕆᐊᖃᕐᓂᐊᖅᖢᑎᒃ “ᐱᓕᕆᐊᕐᒥ ᐃᓂᓪᓚᒃᑎᕆᓂᕐᒧᑦ ᑐᕌᖃᕐᓂᕐᒥᒃ.”

ᑖᓐᓇ “ᐱᓕᕆᐊᕐᒥ ᐃᓂᓪᓚᒃᑎᕆᓂᕐᒧᑦ ᑐᕌᖃᕐᓂᕐᒥᒃ” ᐋᖅᑭᒃᑕᐅᓯᒪᔪᖅ ᐃᓄᐃᑦ ᐱᔪᒪᔭᖏᑦ ᓯᕗᓪᓕᐅᑎᑕᐅᖁᓪᓗᒋᑦ ᑖᓐᓇ ᑲᒻᐸᓂᐅᔪᖅ ᐱᔪᒪᔭᖏᑦ ᑲᔪᓯᑎᑕᐅᓚᐅᓐᖏᑎᓪᓗᒋᑦ.   ᐊᑐᖅᑕᐅᖃᑕᐅᓗᓂ ᐃᖅᑲᓇᐃᔭᖃᑎᒋᔭᐅᑦᑎᐊᒃᑲᓐᓂᖁᓪᓗᒋᑦ ᓄᓇᓖᑦ.

ᕿᑭᖅᑕᓃᒃᑯᑦ ᐅᖃᓚᐅᖅᑐᑦ ᐃᑲᔪᕈᓐᓇᕐᓂᐊᖅᑐᑦ ᑖᔅᓱᒥᖓ 2018ᒥ ᐲᔭᐃᓂᕐᒥ ᐊᖏᓪᓕᒋᐊᕆᔪᒪᓂᕐᒥᒃ ᑐᒃᓯᕋᐅᑎᖓᓂᒃ ᑭᓯᐊᓂ ᐃᓗᓕᖃᕐᓂᐊᑐᐊᖅᑲᑦ ᐱᓕᕆᐊᖑᓂᐊᖅᑐᓄᑦ ᐱᐅᓯᒋᐊᕈᑕᐅᓂᐊᖅᑐᓂᒃ ᐃᓄᐃᑦ ᐃᓅᓯᖏᓐᓂᑦ ᐱᓕᕆᐊᕐᒥᓐᖔᖅᑐᓂᑦ.  ᕿᑭᖅᑕᓃᒃᑯᑦ ᐊᖏᑐᐃᓐᓇᕐᓂᐊᕈᓐᓃᖅᑐᑦ ᐃᑲᔫᓯᐊᒃᓴᐅᔪᑦ ᑲᔪᓯᑎᑕᐅᓐᖏᑉᐸᑕ ᓱᕐᓗ ᐅᑯᓂᖓ ᐃᓄᐃᑦ ᐃᓕᓐᓂᐊᖅᑎᑕᐅᓂᖏᓐᓄᑦ, ᐃᖅᑲᓇᐃᔭᖃᖅᑎᑕᐅᓂᖏᑦ, ᑲᓐᑐᕌᓕᕆᓂᕐᒥᒃ ᐊᒻᒪᓗ ᐱᓕᕆᐊᕐᒥ ᓇᐅᑦᓯᖅᑐᕐᓂᕐᒥᒃ ᐊᒻᒪᓗ ᐋᖅᑭᒋᐊᕈᑎᒃᓴᐅᓂᐊᖅᑐᓂᒃ.

ᐊᑐᕐᓗᒍ ᑖᓐᓇ ᐱᓕᕆᐊᕐᒥ ᐃᓂᓪᓚᒃᑎᕆᓂᕐᒥᒃ ᑐᕌᖃᕐᓂᕐᒧᑦ ᑖᒃᑯᐊ ᐊᑎᓕᐅᖅᑎᐅᔪᑦ ᑲᔪᓯᑎᑦᑎᔪᓐᓇᓚᐅᖅᑐᑦ ᐅᑯᓂᖓ ᐱᓕᕆᐊᒃᓴᓂ;

• ᐱᔭᕇᖅᑕᐅᓂᖓ ᐊᑐᖅᑕᐅᓚᐅᖅᓯᒪᓐᖏᑦᑐᒥᒃ ᐊᖏᖃᑎᖃᕐᓂᕐᒥᒃ ᐊᒻᒪᓗ ᐊᑭᓖᓂᕐᒥᒃ ᐱᖁᑎᓂᒃ ᐊᑐᖅᑕᐅᓚᐅᖅᑐᓄᑦ ᓴᓇᔭᐅᓂᖓᓂᒃ ᐊᑐᖅᑕᐅᔪᓄᑦ ᐊᑐᕆᐊᕐᒧᑦ.
  • ᑕᒪᒃᑯᐊ ᐱᓕᕆᐊᖑᓂᐊᖅᑐᑦ ᐱᖃᓯᐅᑎᓪᓗᒋᑦ ᐸᑯᓐᓛᓐᑯᑦ ᐊᑭᓕᖅᓱᐃᓂᖏᑦ ᕿᑭᖅᑕᓃᒃᑯᓐᓄᑦ, ᐊᒻᒪᓗ, ᐊᖏᖅᖢᑎᒃ ᖃᓄᖅᑑᕈᑎᒋᓂᐊᖅᑕᖏᓐᓂᒃ ᐊᐅᓚᑦᑎᓂᕐᒧᑦ ᖃᐅᔨᓴᖅᑕᐅᓂᖏᓐᓄᑦ ᐱᖁᑎᓂᒃ ᐊᑐᖅᑕᐅᔪᓄᑦ ᐊᑐᕆᐊᒃᓴᓄᑦ ᓯᕗᓂᕐᒥᒃ.
• ᐊᖏᕐᓂᐊᖅᑐᑦ ᑭᓯᐊᓂ ᐊᖏᕈᑎᒥ  ᐋᔩᕋᕈᑎᖃᒃᑲᓐᓂᕐᓂᕐᒧᑦ ᐱᓕᕆᐊᖑᓂᐊᖅᑐᓂᒃ ᖃᓄᖅᑑᕈᑎᒋᔭᐅᓂᐊᖅᑐᓂᓗ ᐊᒻᒪᓗ ᐋᖅᑭᒃᓱᖅᑕᐅᓗᑎᒃ ᓯᕗᓪᓕᐅᑎᑕᐅᔪᒪᓂᐊᖅᑐᑦ ᐱᓕᕆᐊᖑᔪᒪᔪᓂᒃ ᑲᔪᓯᒐᓗᐊᖅᑎᓪᓗᒍ ᒪᓕᒐᑎᒍᑦ ᕿᒥᕐᕈᔭᐅᓂᖓᓄᑦ ᑐᒃᓯᕋᐅᑎᐅᑉ.
• ᑲᔪᓯᔪᒥᒃ ᐋᔩᕋᕈᑎᖃᒃᑲᓐᓂᕐᓂᕐᒥᒃ ᓄᓘᔮᑦ ᐱᓕᕆᐊᖓᓄᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᒃᓴᖏᓐᓂᒃ ᐊᖏᕈᑎᒥᒃ
• ᐊᖏᕐᓂᖅ ᐱᔭᕇᖅᓯᒪᓕᖅᑎᓪᓗᒋᑦ ᓄᓇᓕᖕᓄᑦ ᑐᑭᓯᒋᐊᕆᐊᕐᓂᕐᒥᒃ
  • ᑖᒃᑯᐊ ᓄᓇᓖᑦ ᐊᐅᓚᑦᑎᓂᖅᓴᐅᔪᓐᓇᕐᓗᑎᒃ ᐊᒻᒪᓗ ᖃᐅᔨᒪᓂᖅᓴᐅᓕᕐᓗᑎᒃ ᐸᕐᓇᒃᑕᐅᓯᒪᔪᓂᒃ ᑐᑭᓯᒋᐊᕆᐊᕐᓂᕐᒧᑦ ᐱᓕᕆᐊᖑᓂᐊᖅᑐᓂᒃ.
• ᐱᒻᒪᕆᐅᔪᒃᑯᑦ ᓯᕗᒧᐊᕈᑎᖃᖅᓯᒪᔪᖅ ᐱᓪᓗᒋᑦ ᐃᓄᐃᑦ ᐃᓕᓐᓂᐊᖅᑎᑕᐅᓂᖏᓐᓄᑦ ᐊᑐᖅᖢᒍ ᐱᓕᒻᒪᒃᓴᓕᕆᓂᕐᒧᑦ ᑲᑐᔾᔨᒍᑕᐅᔪᓐᓇᖅᑐᓂᒃ ᑮᓇᐅᔭᖏᑦ.
• ᑲᔪᓯᑎᑦᑎᓂᕐᒥᒃ ᐊᒻᒪᓗ ᓇᓗᓇᐃᖅᓯᓂᕐᒧᑦ ᐊᑐᓕᖅᑎᑕᐅᓗᓂ ᐃᒪᓂᒃ ᐊᑐᕐᓂᕐᒧᑦ ᐊᖏᕈᑎᖓᑦ.
• ᐱᓕᕆᔪᖃᖅᖢᓂ ᐱᔭᕆᐊᑭᓪᓕᓕᕆᔨᓂᑦ ᑐᕌᖓᔪᓂᒃ ᐳᔪᕐᓗᐃᑦ ᒥᒃᓵᓄᑦ, ᐃᒪᕐᒥᐅᑕᐃᑦ ᐊᒻᒪ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓂᐅᑉ ᒥᒃᓵᓄᓗ
• ᐋᖅᑭᒋᐊᕆᓂᕐᒥ ᓂᖏᖅᑕᐅᔪᓂᒃ ᐊᖏᕈᑎᒥᒃ ᓯᕗᓂᕐᒥᒃ ᐊᖏᖃᑎᒌᒍᓐᓇᐃᓕᖁᓇᒋᑦ
• ᐋᖅᑭᒋᐊᖅᓯᓂᕐᒥᒃ ᑮᓇᐅᔭᓂᒃ ᓴᐳᒻᒥᔾᔪᑎᒃᓴᓄᑦ ᐋᖅᑭᐅᒪᓂᖅᓴᐅᓂᐊᕐᒪᑦ ᐱᓕᕆᐊᑉ ᖃᓄᐃᓕᖓᓂᕆᔭᖓᓂ
• ᓯᕗᒧᐊᕈᑎᒋᔭᐅᓂᖏᑦ ᓄᓇᓂᒃ ᐊᐅᓚᑦᑎᓂᕐᒧᑦ ᑐᕋᖓᔪᑦ ᓱᕐᓗ ᐸᕕᓐᓛᓐᑯᑦ ᐱᔭᕇᕐᓗᓂᐅᒃ ᒪᑐᓯᑲᐃᓐᓇᕆᐊᖃᕐᓂᕐᒥᒃ ᐊᒻᒪᓗ ᓴᓗᒻᒪᖅᓴᖅᑕᐅᒋᐊᖃᕐᓂᖓᓂᒃ ᐸᕐᓇᐅᑎᓂ ᐊᒻᒪᓗ ᐊᓯᖏᑦ ᐊᕙᑎᒥ ᖃᐅᔨᓴᕐᓂᕐᒧᑦ ᐊᒻᒪᓗ ᖃᐅᔨᓴᕐᓂᕐᒧᑦ ᐱᔾᔪᑎᒋᔭᐅᔪᓂᒃ

ᒫᓐᓇᓵᖅ ᒥᓂᔅᑕᐅᑉ ᑐᑭᑖᕈᑎᒋᓚᐅᖅᑕᖓᑦ ᐊᖏᖅᑕᖁᓪᓗᒍ 2018ᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐲᔭᐃᓂᕐᒧᑦ ᐊᖏᓪᓕᒋᐊᕆᔪᒪᓂᕐᒥᒃ ᑐᒃᓯᕋᐅᑎᖓ ᐃᓚᒋᔭᐅᖃᑕᐅᕗᖅ ᐱᓕᕆᐊᖑᓯᒪᔪᓄᑦ ᕿᑭᖅᑕᓃᒃᑯᓐᓄᑦ ᐸᕕᓐᓛᓐᑯᓐᓄᓗ ᐱᓕᕆᐊᖑᖁᓪᓗᒋᑦ ᐊᒻᒪᓗ ᓯᕗᒧᐊᕈᑎᒋᔭᐅᓗᑎᒃ ᐃᓄᐃᑦ ᐱᔪᒪᔭᖏᓐᓂᒃ ᓄᓘᔮᑦ ᐱᓕᕆᐊᖓᓂ.

ᕿᑭᖅᑕᓃᒃᑯᑦ ᐃᑲᔪᖅᑐᕐᓂᕆᔭᖓᑦ 2018ᒥ ᐲᔭᐃᒃᑲᓐᓂᕈᒪᓂᕐᒧᑦ ᐊᖏᓪᓕᒋᐊᕆᓂᕐᒥᒃ ᑲᔪᓯᒍᓐᓇᕋᔭᓚᐅᓐᖏᑦᑐᖅ ᐱᑕᖃᓚᐅᓐᖏᑉᐸᑦ ᑐᑭᓯᓇᑦᑎᐊᖅᑐᓂᒃ ᓇᓗᓇᐃᔭᐅᑎᓂᒃ ᓈᒻᒪᒋᔭᐅᓂᐊᖅᑐᓂᒃ ᐊᒻᒪᓗ ᐃᑲᔪᖅᑕᐅᓯᒪᓗᑎᒃ ᓄᓇᓕᖕᒥᐅᓄᑦ, ᐱᓗᐊᖅᑐᒥ ᒥᑦᑎᒪᑕᓕᖕᒥᐅᓂᑦ, ᐊᒻᒪᓗ ᑖᒃᑯᐊ ᐸᕕᓐᓛᓐᑯᑦ ᓴᖅᑭᑎᑦᑎᐊᕐᓗᑎᒃ ᐃᓄᖕᓄᑦ ᐱᔪᒪᔭᐅᔪᓄᑦ ᓄᓘᔮᑦ ᐱᓕᕆᐊᖓᓂᑦ.

ᑕᒪᒃᑯᐊᒍᑦ ᑐᕌᖓᓗᓂ, ᕿᑭᖅᑕᓃᒃᑯᑦ ᐅᒃᐱᕆᔭᖃᖅᑐᑦ ᑖᓐᓇ ᐱᓕᕆᐊᖅ ᐃᓂᓪᓚᒃᑎᖅᑕᐅᓂᖓᓄᑦ ᑐᕌᒐᖓ ᐱᐅᓯᒋᐊᕈᑕᐅᓯᒪᖕᒥᔪᖅ ᐃᑲᔫᓯᐊᒃᓴᓂ ᐃᓄᖕᓄᑦ ᕿᑭᖅᑕᓃᒃᑯᑦ ᐅᒃᐱᕆᔭᖃᖅᑐᑦ ᐱᑕᖃᒃᑲᓐᓂᕐᓂᖓᓂᒃ ᓇᓗᓇᐃᖅᑕᐅᓯᒪᔪᓂᒃ ᐱᕕᖃᖅᑎᑦᑎᓂᐊᖅᑐᓂᒃ ᐃᓄᖕᓂ ᓴᓐᖏᓂᖅᓴᒥᒃ ᐃᓂᖃᕈᓐᓇᕐᓂᕐᒥᒃ ᐃᓱᒪᒋᔭᖏᑦ ᐅᖃᐅᓯᕆᔭᐅᔪᓐᓇᕐᓗᑎᒃ ᐊᒻᒪᓗ ᑐᕌᖅᑐᒥᒃ ᖃᓄᐃᓕᐅᕆᐊᖅᑕᐅᑲᐅᑎᒋᔪᓐᓇᕐᓗᑎᒃ ᓯᕗᒧᐊᕈᑎᒋᔭᐅᓂᐊᖅᑎᓪᓗᒋᑦ ᐱᔪᒪᔭᐅᔪᓂᒃ.  ᕿᑭᖅᑕᓃᒃᑯᑦ ᐅᒃᐱᕆᔭᖃᕐᒥᔪᖅ ᑕᒪᒃᑯᐊ ᐱᓕᕆᐊᖑᔪᑦ ᓇᓗᓇᐃᔭᐅᑎᓪᓚᕆᐅᕗᑦ ᐱᔾᔪᑎᒋᔭᖓᓂᑦ ᓄᓇᕗᒥ ᐊᖏᕈᑎᖓ ᐊᒻᒪᓗ ᑕᑯᓐᓇᖑᐊᖅᑕᐅᓯᒪᔪᓂᒃ ᐱᐅᓯᒋᐊᖅᑎᑦᑎᔪᒪᓂᕐᒥᒃ ᐃᓅᓯᕆᔭᐅᔪᓄᑦ ᐃᓄᖕᓄᑦ.

2018ᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐲᔭᖅᑕᐅᔪᓄᑦ ᐊᖏᓪᓕᒋᐊᕆᓂᖅ

ᐸᕕᓐᓛᓐᑯᑦ ᐊᖏᓪᓕᒋᐊᕆᒐᓱᐃᓐᓇᕐᒪᑕ ᑮᓇᐅᔭᓕᐅᕐᓂᕐᒧᑦ ᐲᔭᐃᓂᖏᓐᓄᑦ ᓄᓘᔮᑦ ᐅᔭᕋᕐᓂᐊᕐᕕᐊ ᑮᓇᐅᔭᓕᐅᕐᕕᐅᑦᑎᐊᕈᓐᓇᕐᓂᐊᖅᑲᑦ.  ᑖᓐᓇ ᐅᔭᕋᕐᓂᐊᕐᕕᒃ ᐅᖃᖅᓯᒪᔪᑦ ᑖᓐᓇ ᐱᓕᕆᐊᖅ ᑮᓇᐅᔭᓕᐅᕐᕕᐅᑦᑎᐊᓐᖏᓐᓂᖓᓂᑦ.

 

ᑖᓐᓇ ᑐᒃᓯᕋᐅᑎᒋᔭᐅᔪᖅ ᐱᖓᓱᓂ ᐃᓗᓕᖃᖅᑐᖅ:

• ᓄᑖᒥ 380ᓂ-ᐃᓄᖃᕐᓂᐊᖅᑐᒥᒃ ᑕᒻᒫᕐᕕᒃᓴᒥ ᕿᓐᖑᐊᓂ ᑐᓚᑦᑕᕐᕕᐊᓂ;;
• 15 ᒥᓕᔭᓂ ᓖᑕᓂ ᐅᖅᓱᐊᓗᖃᐅᑎᒥᒃ ᕿᓐᖑᐊᓂ ᑐᓚᑦᑕᕐᕕᐊᓂ;
• ᐊᒻᒪᓗ ᐊᖏᓪᓕᒋᐊᕈᑎᒥᒃ ᐊᕐᕌᒍᑕᒫᕐᒥ ᓴᕕᕋᔭᒃᓴᑦ ᐲᔭᖅᑕᐅᔪᓂᑦ2 Mtᓂᑦ/ 6.0 Mt/a.ᓄᑦ

 

ᕿᑭᖅᑕᓃᒃᑯᑦ ᕿᒥᕐᕈᓂᖃᖅᑎᓪᓗᒋᑦ 2018ᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐲᔭᖅᑕᐅᔪᓂᒃ ᐊᖏᓪᓕᒋᐊᕆᓂᕐᒧᑦ  ᑲᑎᒪᖃᖃᑦᑕᓚᐅᖅᑐᑦ ᒥᑦᑎᒪᑕᓕᖕᒥᐅᓂ. ᕿᑭᖅᑕᓃᒃᑯᑦ ᑲᑎᒪᑎᑦᑎᓯᓐᓈᖅᖢᑎᒃ ᐃᓕᓐᓂᐊᕐᓂᖃᓚᐅᕐᒥᔪᑦ ᒪᔾᔨᒥ, ᐄᐳᒥ, ᔫᓐᒥ ᐊᒻᒪᓗ ᔪᓚᐃᒥ ᐃᓚᐅᖁᔨᑦᑎᐊᖅᖢᑎᒃ ᕿᒥᕐᕈᔭᐅᕙᓪᓕᐊᑎᓪᓗᒍ ᐊᒻᒪᓗ ᐃᓱᒪᓕᐅᕐᓗᑎᒃ ᖃᓄᖅ ᑕᒪᒃᑯᐊ ᐃᓱᒫᓘᑎᑦ ᓴᖅᑭᑕᐅᔪᓄᑦ ᐃᓄᖕᓄᑦ ᐱᓕᕆᐊᖑᑦᑎᐊᕋᔭᕐᓂᖏᓐᓄᑦ.

ᕿᑭᖅᑕᓃᒃᑯᑦ ᓇᓗᓇᐃᖅᓯᓚᐅᖅᑐᑦ ᑕᒪᒃᑯᐊ ᐱᓕᕆᐊᕆᓂᐊᖅᖢᒋᑦ.  ᑖᒃᑯᐊ ᓄᓇᕗᒥ ᐊᕙᑎᓕᕆᔨᒃᑯᑦ ᓯᕗᒃᑲᐃᑎᓪᓗᒋᑦ ᕿᒥᕐᕈᑎᑦᑎᓂᕐᒥᒃ ᕿᑭᖅᑕᓃᒃᑯᑦ ᖃᐅᔨᒋᐊᖏᓐᓇᖃᑦᑕᓚᐅᖅᑐᑦ ᓄᓇᕗᒥ ᐊᕙᑎᓕᕆᔨᒃᑯᓐᓄᑦ ᐅᖃᐅᔾᔪᐃᓪᓗᑎᒃ ᓄᓇᓕᖕᓂᑦ ᐃᓚᐅᑎᑦᑎᓗᑎᒃ ᐱᓕᕆᖁᔭᐅᓯᒪᓪᓗᑎᒃ ᐊᒻᒪᓗ ᕿᑭᖅᑕᓃᒃᑯᑦ ᐱᖓᓱᓂᒃ ᑐᓂᓯᓪᓗᑎᒃ ᓄᓇᕗᒥ ᐊᕙᑎᓕᕆᔨᒃᑯᓐᓄᑦ.

ᐊᒡᒌᓯ 31, 2018ᒥ ᓄᓇᕗᒥ ᐊᕙᑎᓕᕆᔨᒃᑯᑦ ᐊᑐᓕᖁᔨᓚᐅᖅᑐᑦ ᒥᓂᔅᑕᒥᑦ ᑖᓐᓇ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᖏᓪᓕᒋᐊᕆᔪᒪᓂᕐᒥᒃ ᑐᒃᓯᕋᐅᑎᓂ ᐋᒡᒑᖅᑕᐅᖁᓪᓗᒍ.  ᓄᓇᕗᒥ ᐊᕙᑎᓕᕆᔨᒃᑯᑦ ᐊᑐᓕᖁᔨᓪᓗᑎᒃ ᑖᓐᓇ ᑕᒻᒪᕐᕕᖕᒥ ᐊᖏᓪᓕᒋᐊᕆᔪᒪᓂᖅ ᐊᒻᒪᓗ ᐅᖅᓱᐊᓗᖃᐅᑎᒃᓴᒥ ᐊᖏᓪᓕᒋᐊᕆᓂᖅ ᐊᖏᖅᑕᐅᖁᓪᓗᒋᑦ.

ᕿᒥᕐᕈᔭᐅᓯᒪᓕᖅᑎᓪᓗᒋᑦ ᓄᓇᕗᒥ ᐊᕙᑎᓕᕆᔨᒃᑯᑦ ᐅᒃᐱᕆᔭᖃᓚᐅᖅᑐᑦ ᐃᓗᓕᖃᕐᓂᖓᓂᒃ ᐊᒻᒪᓗ ᑭᐅᔾᔪᑎᒋᔭᐅᓯᒪᔪᓂᒃ ᑐᓂᔭᐅᔪᓄᑦ ᑐᕌᖓᔪᓄᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᖏᓪᓕᒋᐊᕆᔪᒪᓂᕐᒥᒃ ᑐᒃᓯᕋᐅᑎᒥ ᐱᓕᕆᐊᖑᑦᑎᐊᖁᓪᓗᒍ ᓄᓇᕗᒥ ᐊᕙᑎᓕᕆᔨᒃᑯᓐᓄᑦ, ᐱᓗᐊᖅᑐᒃᑯᑦ ᓇᐅᑦᓯᖅᑐᕐᓂᕐᒥ ᐊᒻᒪᓗ ᐋᖅᑭᒋᐊᖅᓯᓂᕐᒥᒃ ᐊᖏᕈᑎᒥᒃ ᕿᑭᖅᑕᓃᒃᑯᓐᓄᑦ ᐊᒻᒪᓗ ᒥᑦᑎᒪᑕᓕᖕᒥᐅᓂᑦ ᐊᒻᒪᓗ ᐸᕕᓐᓛᓐᑯᓐᓂᑦ.

ᓱᓕᓗ, ᕿᑭᖅᑕᓃᒃᑯᑦ ᖃᐅᔨᒪᓚᐅᖅᑐᑦ ᐱᒻᒪᕆᐅᔪᓂᒃ ᐃᑲᔫᓯᐊᒃᓴᖃᓚᐅᕐᓂᖓᓂᒃ ᐋᔩᕋᕈᑎᒋᔭᐅᓯᒪᔪᓂᑦ ᑐᕌᖓᔪᓄᑦ 2018ᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᖏᓪᓕᒋᐊᕆᔪᒪᓂᕐᒥᒃ ᑐᒃᓯᕋᐅᑎᒥᒃ ᑖᒃᑯᐊ ᓄᓇᕗᒥ ᐊᕙᑎᓕᕆᔨᒃᑯᑦ ᐱᓚᐅᓐᖏᑕᖓᓂᑦ ᐱᔾᔪᑎᒋᓪᓗᒍ ᑖᓐᓇ ᕿᒥᕐᕈᓂᐅᓚᐅᖅᑐᖅ.

ᐊᖏᖃᑎᒋᔭᐅᓚᐅᖅᑎᓪᓗᒋᑦ ᕼᐊᒻᓚᒃᑯᑦ ᒥᑦᑎᒪᑕᓕᖕᒥ ᐊᒻᒪᓗ ᒥᑦᑎᒪᑕᓕᖕᒥ ᐅᒪᔪᕐᓂᐊᖅᑎᒃᑯᑦ ᑲᑎᒪᔨᖏᑦ, ᕿᑭᖅᑕᓃᒃᑯᑦ ᑐᓂᓯᓚᐅᖅᑐᑦ ᑎᑎᖅᑲᒥᒃ ᒥᓂᔅᑕ ᓚᐸᓚᓐᒃᒥ ᓯᑎᐱᕆᒥ ᑐᒃᓯᕋᖅᓯᒪᔪᒥᒃ ᑖᓐᓇ ᒥᓂᔅᑕ ᕿᒥᕐᕈᖁᔭᐅᓪᓗᓂ ᑐᓂᔭᐅᓚᐅᖅᑐᓂᒃ ᕿᒥᕐᕈᔭᐅᓚᐅᖅᑐᓄᑦ ᓇᓗᓇᐃᔭᐃᓗᒋᑦ ᓇᓕᒨᕆᓂᕐᒥᒃ ᐊᒃᑐᐃᒍᑕᐅᑐᐃᓐᓇᕆᐊᖃᖅᑐᓂᒃ ᐋᖅᑭᕝᕕᐅᓗᑎᒃ ᓇᐅᑦᓯᖅᑐᕈᑎᒃᓴᓂ ᐊᒻᒪᓗ ᐋᖅᑭᒋᐊᖅᓯᓂᕐᒥᒃ ᖃᓄᐃᓕᐅᕈᑎᐅᓂᐊᖅᑐᓂᒃ.  ᑖᓐᓇ ᑎᑎᖅᑲᐅᑉ ᑭᖑᓂᐊᖑᑦ ᑲᑐᔾᔭᐅᓯᒪᔪᒥᒃ ᑎᑎᖅᑲᕐᒥ ᕿᑭᖅᑕᓃᒃᑯᓐᓂᑦ ᕼᐊᒻᓚᒃᑯᓐᓂᑦ ᐊᒻᒪ ᒥᑦᑎᒪᑕᓕᖕᒥ ᐅᒪᔪᕐᓂᐊᖅᑎᒃᑯᓐᓂᑦ ᓄᓇᕗᒥ ᐊᕙᑎᓕᕆᔨᒃᑯᓐᓄᑦ ᔪᓚᐃ 2018ᒥ.

ᕿᑭᖅᑕᓃᒃᑯᑦ ᐃᑲᔪᖅᑐᕐᓂᕆᔭᖓᑦ ᐸᕕᓛᓐᑯᑦ ᑐᒃᓯᕋᐅᑎᖓᓂᒃ ᑲᔪᓯᒍᓐᓇᕐᓂᐊᖅᑐᑦ ᑭᓯᐊᓂ ᑖᓐᓇ ᑲᒻᐸᓂᐅᔪᖅ ᐅᔭᕋᕐᓂᐊᕐᕕᓕᕆᔨᒃᑯᑦ ᓴᖅᑭᑎᑦᑎᑦᑎᐊᑐᐊᖅᑲᑦ ᓇᓗᓇᐃᖅᓯᒪᔭᖏᓐᓂᑦ ᐃᓄᖕᓄᑦ ᐱᖃᓯᐅᑎᓗᒋᑦ ᐊᖏᓪᓕᒋᐊᕐᓂᖏᑦ ᐃᑲᔫᓯᐊᒃᓴᑦ ᐃᓄᖕᓄᑦ ᐊᒃᑐᖅᑕᐅᓯᒪᔪᓄᑦ ᓄᓇᓕᖕᓄᑦ.

ᓯᑎᐱᕆ 30ᒥ ᒥᓂᔅᑕ ᓚᐸᓚᓐᒃ ᓇᓗᓇᐃᖅᓯᓚᐅᖅᑐᖅ ᐋᒡᒑᖅᖢᓂᐅᒃ ᓄᓇᕗᒥ ᐊᕙᑎᓕᕆᔨᒃᑯᑦ ᐊᑐᓕᖁᔭᖓᓂᑦ ᐊᒻᒪᓗ ᐊᖏᖅᖢᒍ ᐸᕕᓐᓛᓐᑯᑦ ᑐᒃᓯᕋᐅᑎᖓᓂᒃ ᑭᓯᐊᓂ ᒪᓕᓚᐅᕐᓗᑎᒃ ᐊᔾᔨᒌᓐᖏᑦᑐᓂᒃ ᑎᑎᕋᖅᑕᐅᓯᒪᔪᓂ ᐊᑖᓂ.

ᕿᑭᖅᑕᓃᒃᑯᑦ ᐅᒃᐱᕆᔭᖃᑦᑎᐊᖅᑐᑦ ᓄᓇᕗᒥ ᐊᕙᑎᓕᕆᔨᒃᑯᓐᓂᑦ

ᓄᓇᕗᒥ ᐊᕙᑎᓕᕆᔨᒃᑯᑦ ᖃᓄᐃᓕᐅᕐᓂᖓ ᑕᑯᑎᑦᑎᓯᒪᖕᒪᑕ ᕿᑭᖅᑕᓃᒃᑯᓐᓂᑦ ᑕᒃᑯᐊ ᑎᒥᐅᔪᑦ ᐃᓄᖕᓄᑦ ᒐᕙᒪᐅᔪᓂᑦ ᓴᖅᑭᑕᐅᓯᒪᔪᓄᑦ ᓄᓇᕗᒥ ᐊᖏᕈᑎᐊᒍᑦ, ᐱᒻᒪᕆᐅᔪᒃᑯᑦ ᐱᓕᕆᐊᒃᓴᖃᕐᒪᑕ ᖃᐅᔨᓴᖃᑦᑕᕆᐊᖃᖅᖢᑎᒃ ᐊᒃᑐᐃᒍᑕᐅᓂᐊᖅᑐᓂᒃ ᐱᕙᓪᓕᐊᒍᑎᒋᔭᐅᔪᓂᑦ ᐊᒻᒪᓗ ᐅᔭᕋᒃᓴᓂ ᐲᔭᐃᓂᕐᒥᒃ ᓄᓇᕗᒥ.  ᕿᑭᖅᑕᓃᒃᑯᑦ ᖁᕕᐊᓱᒃᑐᑦ ᐃᓚᒋᔭᐅᖃᑕᐅᓯᒪᖕᒪᑕ ᑭᒡᒐᖅᑐᖅᖢᒋᑦ ᐃᓄᐃᑦ ᓂᐱᖏᓐᓂᑦ   ᕿᑭᖅᑖᓗᖕᒥ, ᐱᓗᐊᖅᑐᒥᒃ ᑖᒃᑯᓇᓂ ᓄᓇᓕᖕᓂᑦ ᒥᑦᑎᒪᑕᓕᖕᒥᐅᓂ, ᑲᖏᖅᑐᒑᐱᖕᒥᐅᓂ, ᐃᒃᐱᐊᕐᔪᖕᒥᐅᓂ, ᓴᓂᕋᔭᖕᒥᐅᓂ ᐊᒻᒪᓗ ᐃᒡᓗᓕᖕᒥᐅᓂ.

 

ᕿᑭᖅᑕᓃᒃᑯᑦ ᓴᓐᖏᔪᒃᑯᑦ ᐊᔭᐅᖅᑐᐃᔨᐅᓂᐊᖅᑐᑦ ᓄᓇᕗᒥ ᐊᕙᑎᓕᕆᔨᒃᑯᓐᓂ.  ᑖᒃᑯᐊ ᓄᓇᕗᒥ ᐊᕙᑎᓕᕆᔨᒃᑯᖏᑦ ᕿᒥᕐᕈᓂᕆᓯᒪᔭᖓᑦ 2018ᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᖏᓪᓕᒋᐊᕆᔪᒪᓂᕐᒥᒃ ᐅᔭᕋᕐᓂᐊᖅᑕᐅᔪᓂᑦ ᖁᔭᓕᓇᓚᐅᖅᑐᖅ ᐃᓱᒪᒋᔭᖃᓚᐅᕐᒪᑕ ᐱᕕᒃᓴᕆᔭᐅᓂᐊᖅᑐᑦ ᐱᓕᕆᐊᖅ ᕿᒥᕐᕆᔭᐅᓂᖓᓂ.  ᕿᑭᖅᑕᓃᒃᑯᑦ ᖁᔭᓕᔾᔪᑎᖃᒃᑲᓐᓂᖅᑐᑦ ᓄᓇᓕᖕᒥᐅᑦ ᐃᓚᒋᔭᐅᖃᑕᐅᖃᑦᑕᓚᐅᕐᓂᖏᓐᓂ ᕿᒥᕐᕈᑎᓪᓗᒋᑦ.  ᓄᓇᕗᒥ ᐊᕙᑎᓕᕆᔨᒃᑯᑦ ᓄᓇᓕᖕᓄᑦ ᑐᑭᓯᒋᐊᕆᐊᖃᑦᑕᓚᐅᕐᒪᑕ ᑕᓪᓕᒪᓄᑦ ᐊᒃᑐᖅᑕᐅᓯᒪᔪᓄᑦ ᓄᓘᔮᑦ ᐱᓕᕆᐊᖓᓂᑦ

ᕿᑭᖅᑕᓃᒃᑯᑦ ᐅᒃᐱᕆᔭᖃᖅᑐᑦ ᑖᒃᑯᐊ ᓄᓇᕗᒥ ᐊᕙᑎᓕᕆᔨᒃᑯᑦ ᓴᖅᑭᑎᑦᑎᓚᐅᕐᓂᖏᓐᓂ ᐱᒻᒪᕆᐅᔪᓂᒃ ᐃᓱᒫᓘᑎᓂ ᐱᓕᕆᐊᖑᒋᐊᖃᖅᑐᓂᒃ ᖃᓄᖅᑑᕆᐊᖅᑕᐅᒋᐊᖃᖅᖢᑎᓪᓗ.  ᒪᑯᐊ ᐳᔪᕐᓗᐃᑦ ᐊᒻᒪ ᐃᒪᕐᒥᐅᑕᐃᑦ  ᓇᐅᑦᓯᖅᑐᖅᑕᐅᑦᑎᐊᕐᓂᖅᓴᐅᓂᐊᓕᖅᑐᑦ ᐊᒻᒪ ᐋᖅᑭᒋᐊᕐᕕᖃᖅᑎᑕᐅᓪᓗᑎᓪᓗ ᑖᓐᓇ ᑲᒻᐸᓂ ᓇᓗᓇᐃᓚᐅᓐᖏᑕᖏᓐᓂᑦ ᑐᒃᓯᕋᖅᑕᐅᓯᒪᒐᓗᐊᖅᑎᓪᓗᒋᑦ ᐊᒥᓱᓄᑦ ᐊᕐᕌᒍᓂ.  ᕿᑭᖅᑕᓃᒃᑯᑦ ᓇᓗᓇᐃᖅᓯᓯᒪᔪᑦ ᐱᓕᕆᐊᖑᓂᐊᕐᓗᑎᒃ ᑖᒃᑯᐊ ᐱᒻᒪᕆᐅᔪᑦ ᐃᓚᐅᖏᓐᓇᖃᑦᑕᕐᓗᑎᒃ ᓄᓇᕗᒥ ᐊᕙᑎᓕᕆᔨᒃᑯᑦ ᓇᐅᑦᓯᖅᑐᕐᓂᕆᔭᖓᓂᒃ ᓄᓘᔮᑦ ᐱᓕᕆᐊᖓᓂ.

ᐊᕐᕌᒍᒥ ᑕᒪᑐᒪᓂᑦ, ᕿᑭᖅᑕᓃᒃᑦ ᑐᕌᖅᑐᒃᑯᑦ ᐃᖅᑲᓇᐃᔭᖃᑎᖃᓚᐅᖅᑐᑦ ᒥᑦᑎᒪᑕᓕᖕᒥᐅᓂ ᐃᒃᐱᐊᕐᔪᖕᒥᐅᓂ, ᑲᖏᖅᑐᒑᐱᖕᒥᐅᓂ, ᓴᓂᕋᔭᖕᒥᐅᓂ ᐊᒻᒪᓗ ᐃᒡᓗᓕᖕᒥᐅᓂ, ᐱᐅᓯᒋᐊᖅᑕᐅᓇᓱᐊᖅᖢᓂ ᐊᐅᓚᑦᑎᓂᐅᔪᖅ ᐋᖅᑭᒋᐊᕈᑎᒃᓴᑦ ᐊᒻᒪᓗ ᓴᖅᑭᑎᑕᐅᓂᖏᑦ ᐃᑲᔪᓯᐊᒃᓴᑦ ᐃᓄᖕᓄᑦ ᓄᓘᔮᑦ ᐱᓕᕆᐊᖓ ᐱᓪᓗᒍ.  ᑕᒪᒃᑯᐊ ᐱᖃᓯᐅᑎᓪᓗᒋᑦ ᓴᖅᑭᑎᑦᑎᖃᑎᖐᖕᓂᕐᒥᒃ ᐊᕐᕌᒍᑕᒫᕐᒥ ᐱᓕᕆᐊᕐᒥ ᕿᒥᕐᕈᓂᕐᒧᑦ ᑲᑎᒪᓂᕐᒥᒃ ᑖᓐᓇᓗto ᖃᐅᔨᓴᓲᖑᔪᑦ ᕿᒥᕐᕈᓪᓗᑎᒃ ᐱᓕᕆᐊᑉ ᑲᔪᓯᑎᓯᒪᔭᖏᓐᓂᑦ ᐊᒻᒪᓗ ᐊᑐᓕᖁᔨᕙᒃᖢᑎᒃ ᖃᓄᖅ ᐊᖅᑭᒋᐊᖅᑕᐅᒍᑎᒃᓴᓂ ᐱᐅᓯᒋᐊᕈᑎᒃᓴᓂ ᐱᒻᒪᕆᐅᑎᑕᐅᔪᓄᑦ ᐃᓄᖕᓄᑦ.

ᕿᑭᖅᑕᓃᒃᑯᑦ ᐅᖃᖅᓯᒪᔪᑦ ᑖᒃᑯᐊ ᐸᕕᓐᓛᓐᑯᑦ ᐱᓕᕆᐊᖓᑦ ᓯᕗᔪᐊᕐᓂᐊᕈᓂ, ᐃᑲᔫᓯᐊᒃᓴᑦ ᐊᒻᒪᓗ ᐃᔪᒪᔭᐅᔪᑦ ᐃᓄᖕᓄᑦ ᓯᕗᔪᐊᖃᑕᐅᒋᐊᓖᑦᑕᐅᖅ.

ᒥᓂᔅᑕ ᓚᐸᓛᓐᒃ ᑐᑭᑖᕆᔭᖓᑦ ᐊᖏᖅᑕᐅᖁᓪᓗᒍ ᑮᓇᐅᔭᓕᐅᖃᓱᖕᓂᕐᒧᑦ ᐊᖏᓪᓕᒋᐊᕆᓂᕐᒥᒃ ᐅᔭᕋᕐᓂᐊᖅᑕᐅᔪᓂ

ᕿᑭᖅᑕᓃᒃᑯᑦ ᑐᓴᖅᓯᒪᓕᖅᑐᑦ ᒥᓂᔅᑕ ᓚᐸᓚᓐᒃ ᑐᑭᑖᕆᔭᖓᓂᑦ ᐊᖏᖅᑕᐅᖁᓪᓗᒍ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᖏᓪᓕᒋᐊᕆᓂᕐᒥᒃ ᐅᔭᕋᕐᓂᐊᖅᑕᐅᔪᓂ ᑐᒃᓯᕋᐅᑎᖓᓂ ᐊᒻᒪᓗ ᐅᒃᐱᕆᔭᖃᖅᖢᑎᒃ ᑖᓐᓇ ᑐᑭᑖᕆᔭᐅᔪᖅ, ᑕᒪᒃᑭᐊᒍᑦ ᑕᑯᓪᓗᒍ, ᐱᒻᒪᕆᐅᔪᒃᑯᑦ ᐊᓯᔾᔨᕈᑎᒋᔭᐅᓂᐊᕐᒪᑦ ᓄᓘᔮᑦ ᐱᓕᕆᐊᖓᓂ. ᐱᓗᐊᖅᑐᒥᒃ, ᕿᑭᖅᑕᓃᒃᑯᑦ ᓇᓗᓇᐃᔭᕈᒪᕗᑦ ᐅᖃᐅᓯᐅᓚᐅᖅᑐᓂᒃ ᒥᓂᔅᑕ ᓚᐸᓚᓐᒃᒧᑦ ᐊᖏᖅᑎᓪᓗᒍ ᑭᓇᐅᔭᓕᐅᕋᓱᐊᕐᓂᕐᒧᑦ ᐊᖏᓪᓕᒋᐊᕆᓂᕐᒥᒃ ᐅᔭᕋᕐᓂᐊᖅᑕᐅᔪᓂ:

• ᐊᖏᓪᓕᒋᐊᕆᓂᕐᒥᒃ 6MT/ᐊᕐᕌᒍᑕᒫᖅ ᐊᖏᖅᑕᐅᔪᑦ ᒪᕐᕉᖏᓐᓇᕐᓄᑦ ᐊᕐᕌᒍᓄᑦ,  , 2018 ᐊᒻᒪᓗ 2019 ᐅᒥᐊᕐᔪᐊᖃᕐᓇᖅᓯᑎᓪᓗᒍ
  • ᐋᖅᑭᐅᒪᑎᑕᐅᓗᓂ 6MT/ᐊᕐᕌᒍᑕᒫᑦ 2019 ᐅᖓᑖᓂᓄᑦ ᑐᒃᓯᕋᐅᑎᓕᐅᕆᐊᖃᕋᔭᖅᑐᑦ ᕿᒥᕐᕈᔭᐅᓂᖃᕐᓗᓂ.
  • ᐊᖏᓪᓕᒋᐊᕆᓂᖅ ᐅᔭᕋᕐᓂᐊᖅᑕᐅᔪᓂᑦ ᐅᖓᑖᓄᑦ 6MT/ᐊᕐᕌᒍᑕᒫᑦ, ᓄᑖᓂᒃ ᑐᒃᓯᕋᐅᑎᓕᐅᖅᑕᐅᔭᕆᐊᓖᑦ ᐊᒻᒪ ᕿᒥᕐᕈᔭᐅᒋᐊᖃᕋᔭᖅᖢᓂ.
• ᐸᕕᓐᓛᓐᑯᑦ ᐊᑐᓕᖅᑎᑦᑎᓂᐊᖅᑐᑦ ᐅᐃᒍᒋᐊᖅᑕᐅᓯᒪᔪᒥᒃ ᐳᔪᕐᓗᖕᓂ ᐊᐅᓚᑦᑎᓂᕐᒥᒃ ᐊᒻᒪᓗ ᓇᐅᑦᓯᖅᑕᐅᓂᖏᓐᓄᑦ ᐸᕐᓇᐅᑎᓂ
• ᐸᕕᓐᓛᑯᑦ ᐊᑐᓕᖅᑎᑦᑎᓂᐊᖅᑐᑦ ᑎᓕᐅᖅᑕᐅᔪᓄᑦ ᐃᒪᕐᒥᐅᑕᓕᕆᔨᒃᑯᓐᓂᑦ ᑐᕌᖓᔪᓂᒃ ᓴᐳᑎᔭᐅᓂᖓ ᐃᒪᖅ, ᐃᓚᒋᓗᒍ ᓄᖅᑲᖅᑎᑦᑎᓂᕐᒥᒃ ᐱᓕᕆᐊᕐᒥ
• ᐊᑐᓕᖅᑎᑕᐅᓂᖓ ᐊᖏᕈᑎ, ᐊᒻᒪᓗ, ᐊᕙᑎᒥ ᐊᐅᓚᑦᑎᓂᕐᒥᒃ ᐊᑐᕆᐊᕐᒥ ᐊᒻᒪᓗ ᐅᒥᐊᕐᔪᐊᒃᑯᑦ ᐅᓯᑲᖅᑕᕐᓂᐅᔪᓂ ᐃᒪᐃᓕᖓᔭᐅᖃᑦᑕᕐᓂᐊᓕᖅᑐᑦ ᒪᕐᕈᐃᕐᓗᑎ ᐊᕐᕌᒍᒥ ᐱᓕᕆᐊᖑᔪᓂᒃ ᕿᒥᕐᕈᓂᕐᒧᑦ.
• ᓄᓇᕗᒥ ᐊᕙᑎᓕᕆᔨᒃᑯᑦ ᑲᖏᔪᖅᓴᖅᑕᐅᓯᒪᔪᑦ ᓴᖅᑭᑎᑦᑎᖁᔭᐅᓯᒪᓪᓗᑎᒃ ᐊᕐᕌᒍᑕᒫᒃᑯᑦ ᐃᒪᐅᑉ ᒥᒃᓵᓄᑦ ᖃᐅᔨᓴᕐᓂᕐᒥᒃ ᒥᑦᑎᒪᑕᓕᖕᒥ, ᑕᒃᑯᐊ ᖃᐅᔨᔭᐅᓯᒪᔪᑦ ᐊᑐᖅᑕᐅᓗᑎᒃ ᐊᕙᑎᓕᕆᔨᒃᑯᑦ ᐊᕐᕌᒍᑕᒫᒃᑯᑦ ᓇᐅᑦᓯᖅᑐᕐᓂᕆᔭᖓᓂᑦ ᐱᓕᕆᐊᕐᒧᑦ ᓇᓗᓇᐃᒃᑯᑕᐅᔪᒥᒃ.

ᐊᑕᐅᖁᑕᐅᓗᒋᑦ ᐊᓯᖓᓐᓂᓐᖔᖅᑐᓂᑦ ᖃᐅᔨᓴᖅᑕᐅᓃᑦ ᐊᒻᒪᓗ ᓄᓇᓕᖕᓂᑦ ᓇᐅᑦᓯᖅᑐᕐᓂᕐᒥᒃ ᐱᓕᒻᒪᒃᓴᐃᓂᖅ ᐋᖅᑭᒃᓱᐃᔾᔪᑎᒋᔭᐅᓇᔭᕐᒪᑦ ᓄᑖᓂ ᒪᓕᒐᒃᓴᓂ ᖃᐅᔨᓴᕈᑎᒃᓴᐅᓂᐊᖅᑐᓄᑦ ᓄᓇᕗᒥ.  ᑕᒪᒃᑯᐊ ᑲᔪᓯᓯᔪᑦ ᐃᑲᖅᑐᐃᓕᒫᖅᑐᑦ ᐊᑎᓕᐅᖅᑎᐅᔪᑦ ᐱᔪᒪᔭᖏᓐᓂᑦ.

 

ᕿᑭᖅᑕᓃᒃᑯᑦ ᐋᔩᕋᕐᓂᕐᒧᑦ ᐃᑲᔫᓯᐊᒃᓴᓂ ᐃᓄᖕᓄᑦ ᐱᓪᓗᒍ 2018ᒥ ᐊᖏᓪᓕᒋᐊᕈᑎᒋᔭᐅᔪᒪᔪᒧᑦ ᑐᒃᓯᕋᐅᑎᖓ

 

ᑐᕌᖓᔪᖅ 2018ᒧᑦ ᐊᖏᓪᓕᒋᐊᕆᔪᒪᓂᕐᒧᑦ ᑐᒃᓯᕋᐅᑎᒥᒃ, ᕿᑭᖅᑕᓃᒃᑯᑦ ᐸᕕᓐᓛᓐᑯᓪᓗ ᐋᔩᕋᕈᑎᖃᖅᓯᒪᔪᑦ ᐅᐃᒍᒋᐊᖅᑕᐅᓯᒪᒧᒥᒃ ᐅᒪᔪᐃᑦ ᐱᔭᐅᓂᖏᓐᓄᑦ ᐊᑭᓕᐅᓯᐊᒃᓴᓂ ᐊᖏᕈᑎᐅᑉ ᐃᓗᓕᖏᓐᓂᑦ.  ᑖᒃᑯᐊ ᐃᓗᓕᖏᑦ ᐃᒪᐃᓕᖓᔪᑦ:

1. ᐅᒪᔪᐃᑦ ᐱᔭᐅᓂᖏᓐᓄᑦ ᐊᑭᓕᐅᓯᐊᒃᓴᓄᑦ ᑮᓇᐅᔭᐃᑦ (ᐊᑭᖓ $750,000)
   1. ᐅᔭᕋᕐᓂᐊᕐᕕᐅᑉ ᐃᖏᕐᕋᓂᓕᒫᖓᓂᑦ ᑖᒃᑯᐊᓪᓗ ᑐᕌᖅᑐᒥᒃ ᐊᑭᓕᐅᓯᐊᖑᓂᐊᖅᑐᑦ ᖃᓄᐃᑦᑑᓯᒪᔪᓂᒃ ᔭᒐᐃᓂᕐᒧᑦ ᐅᕝᕙᓘᓐᓃᑦ ᓯᖁᒥᓂᖏᓐᓂᒃ ᐱᖁᑏᑦ ᐊᖑᓇᓱᒃᑎᓄᑦ
2. ᐱᕕᖃᖅᑎᑦᑎᓂᕐᒧᑦ ᑮᓇᐅᔭᐃᑦ (ᐊᑭᖓ $400,000/ᐊᕐᕌᒍᑕᒫᑦ 10ᓄᑦ ᐊᕐᕌᒍᓄᑦ ᐊᒻᒪ ᕿᒥᕐᕈᔭᐅᒃᑲᓐᓂᓛᖅᖢᓂ ᑭᖑᓂᐊᒍᑦ)
   1. ᓇᓗᓇᐃᕈᑎᓂᒃ ᐃᑲᔫᑎᖃᖅᑎᑦᑎᓂᖅ ᐊᖑᓇᓱᒋᐊᓲᓄᑦ ᐊᒻᒪᓗ ᐃᓄᖕᓄᑦ ᑲᔾᔭᐅᓴᕈᑎᖏᓐᓄᑦ ᐱᓕᕆᐊᕐᒥᑦ ᓴᖅᑭᑎᑦᑎᓂᒃᑯᑦ ᒑᓯᑖᖅᑎᑦᑎᖃᑦᑕᕐᓂᕐᒥᒃ. ᑕᒪᒃᑯᐊ ᐃᑲᔪᕐᓂᐊᖅᑐᑦ ᐃᓄᖕᓂ ᐃᖏᕐᕋᖃᑦᑕᕐᓂᖏᓐᓄᑦ.
3. ᐱᓕᕆᐊᕐᒥ ᓇᐅᑦᓯᖅᑐᕐᓂᕐᒧᑦ ᑮᓇᐅᔭᐃᑦ (ᐊᑭᖓ $200,000/ᐊᕐᕌᒍᑕᒫᑦ 10ᓄᑦ ᐊᕐᕌᒍᓄᑦ, ᑭᖑᓂᐊᒍᓪᓕ ᕿᒥᕐᕈᔭᐅᓛᕐᓗᓂ)
   1. ᐃᑲᔫᑎᒃᓴᓂ ᐃᓛᒃᑰᖓᔪᒃᑯᑦ ᓄᓇᓕᖕᓂ ᓇᐅᑦᓯᖅᑐᕐᓂᕐᒥᒃ ᐱᓕᕆᐊᑉ ᐊᒃᑐᐃᒍᑎᒋᔭᖏᓐᓂᑦ, ᐱᖁᑎᑖᖅᑎᑦᑎᓂᕐᒥᒃ ᓄᓇᓕᖕᓂ ᓇᐅᑦᓯᖅᑐᕈᓐᓇᕐᓗᑎᒃ ᐊᒻᒪᓗ ᑲᔾᔭᐅᓴᕈᑎᖃᕐᓗᑎᒃ ᐃᒪᕐᒥ.
   2. ᐱᓕᕆᐊᑦ ᐱᕙᓪᓕᐊᑎᑕᐅᖃᑦᑕᕐᓂᐊᖅᑐᑦ ᐊᒻᒪᓗ ᐊᐅᓚᑕᐅᓗᑎᒃ ᓄᓇᓕᖕᓄᑦ.
4. ᐅᒥᐊᖅᑖᕈᑎᑦ (ᐊᑭᖓ $300,000 ᐊᑕᐅᓯᕐᒥ ᐅᒥᐊᕐᒥ)
   1. ᐱᓕᕆᐊᒃᓴᒥᒃ ᓱᕐᓗ ᐱᖓᓱᓂ ᐊᕐᕌᒍᑦ ᖄᖏᕋᐃᒻᒪᑕ ᑖᓐᓇ ᑐᒃᓯᕋᐅᑎᓕᒃ ᓂᐅᕕᖃᑦᑕᕐᓗᓂ ᐊᒻᒪᓗ ᑐᓂᓗᒍ ᓄᓇᓕᖕᒧᑦ ᓈᒪᔪᒥᒃ ᐱᖁᑎᖃᖅᑐᒥᒃ ᐅᒥᐊᕐᒥᒃ. .
   2. ᐅᒥᐊᓂ ᑐᓂᓯᓂᐊᖅᑐᑦ ᒥᑦᑎᒪᑕᓕᖕᒧᑦ, ᐃᒃᐱᐊᕐᔪᖕᒧᑦ, ᑲᖏᖅᑐᒑᐱᖕᒧᑦ, ᐃᒡᓗᓕᖕᒧᑦ ᓴᓂᕋᔭᖕᒥᓗ.

ᑖᒃᑯᐊ ᐃᑲᔫᓯᐊᒃᓴᑦ ᓄᑖᖑᔪᑦ ᐃᓄᖕᓄᑦ ᐃᑲᔫᓯᐊᒃᓴᐅᓪᓗᑎᒃ ᐱᔾᔪᑎᒋᔭᐅᓪᓗᓂ ᑐᕌᖅᑐᒃᑯᑦ ᐊᒃᑐᖅᑕᐅᓂᕐᒧᑦ ᓄᓘᔮᓂ ᐱᓕᕆᐊᕐᒥᑦ. ᑖᒃᑯᐊ ᐃᑲᔫᓯᐊᒃᓴᑦ ᑐᕌᖓᓂᖅᓴᐅᔪᑦ ᐊᖑᓇᓱᒃᑎᓄᑦ, ᐊᒃᑐᖅᑕᐅᓂᖅᓴᐅᖃᑦᑕᖅᑎᓪᒋᑦ ᐊᓯᔾᔨᖅᑐᖃᖅᑎᓪᓗᒍ ᐃᖏᕐᕋᕕᐅᓲᓂᒃ ᐅᒪᔪᐃᓂᓗ ᐱᓕᕆᐊᑉ ᐱᓕᕆᐊᖏᓐᓂᑦ.  ᑖᒃᑯᐊ ᐃᑲᔫᓯᐊᒃᓴᑦ ᐃᖏᕐᕋᓂᐊᖅᑐᑦ ᓄᓇᓕᖕᓄᑦ, ᐱᓗᐊᖅᑐᒥᒃ ᒥᑦᑎᒪᑕᓕᖕᒧᑦ.

Ministers Approval Re Production Increase-IA2E

NIRB Ltr to Dist Re Ministers Decision-OEDE

QIA-REG-QIALettertoLeBlanc-FINAL-SIGNED

QIA letter NIRB Intervention – CoverLetter-ENG-FINALsigned