2018 ᐱᒋᐊᕈᑕᐅᔪᒻᒪᑦ ᓄᓇᓕᓐᓄᑦ ᐳᓚᕋᓐᓂᕐᒥᒃ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ (ᑲᑐᔾᔨᖃᑎᒌᖏᑦ). ᐱᓕᕆᔨᕗᑦ ᑲᑎᖃᑎᖃᖃᑦᑕᔪᔪᑦ ᑕᓪᓕᒪᓂᑦ ᕿᑭᖅᑕᓂ ᓄᓇᓕᓐᓂᑦ ᐱᔾᔪᑎᖃᖅᑐᑎᒃ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑎᓂᑦ (ᐊᖏᕈᑏᑦ) ᐋᖅᑮᒍᑕᐅᓂᐊᖅᑐᒥᒃ ᑕᓪᓗᕈᑎᐅᑉ ᐃᒪᖓᓂ ᑲᓇᑕᒥ ᑕᕆᐅᕐᒥ ᓴᐳᔾᔨᕕᔅᓴᒥᒃ.

ᓵᓐᓄᓚ ᐃᓅᑎᑐᖅ, ᑲᑐᔾᔨᖃᑎᒌᒃᑯᑦ ᐋᔩᕋᖅᑎᓪᓗᐊᑕᖓᑦ ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᐱᔾᔪᑎᒋᓪᓗᒋᑦ, ᓄᓇᓕᓐᓂᑦ ᑲᑎᒪᑎᑦᑎᖃᑦᑕᔪᔪᖅ ᐃᒃᐱᐊᕐᔪᒻᒥ, ᖃᐅᓱᐃᑦᑐᕐᒥ, ᐊᐅᓱᐃᑦᑐᕐᒥ, ᑲᖏᖅᑐᒑᐱᒻᒥ ᐊᒻᒪᓗ ᒥᑦᑎᒪᑕᓕᒻᒥ.

ᒪᑐᐃᖓᑎᑦᑎᖃᑦᑕᑎᓪᓗᒋᑦ ᐱᕕᖃᖃᑦᑕᔪᔪᑦ ᑲᑐᔾᔨᖃᑎᒌᖏᑦ ᑭᐅᔭᐅᖃᑦᑕᓂᕐᒧᑦ ᑕᓪᓗᕈᑎᐅᑉ ᐃᒪᖓᓄᑦ ᐃᓄᐃᑦ ᐊᑦᑐᖅᑕᐅᓂᖏᓐᓄᑦ ᐱᕚᓪᓕᕈᑎᔅᓴᖏᓐᓄᓪᓗ ᐊᖏᕈᑏᑦ ᒥᔅᓵᓄᑦ ᐊᒻᒪᓗ ᓄᐊᑦᑎᕙᓪᓕᐊᓂᕐᒧᑦ ᐃᓱᒪᒋᔭᐅᓯᒪᔪᓂᑦ ᓄᓇᓕᓐᓂᑦ ᑭᓱᑦ ᐃᓚᓕᐅᔾᔭᐅᓯᒪᔭᕆᐊᖃᕐᓂᐊᕐᒪᖔᑕ ᐊᖏᖃᑎᒌᒍᑎᓂᑦ.

ᑲᑐᔾᔨᖃᑎᒌᒃᑯᑦ ᐃᖅᑲᓇᐃᔮᓖᑦ ᐱᕕᖃᓗᐊᙱᓪᓚᕆᑦᑐᑎᒃ ᐱᔭᕇᕐᓯᒪᔭᕆᐊᓕᓐᓂᑦ, ᑕᓪᓗᕈᑎᐅᑉ ᐃᒪᖓᓄᑦ ᐊᖏᕈᑏᑦ ᐋᔩᕋᕈᑕᐅᔭᕆᐊᖃᕐᖓᑕ ᒥᕐᖑᐃᓯᕐᕕᓕᕆᔨᒃᑯᓐᓄᑦ ᑲᓇᑕᒥ ᒫᑦᓯ 2019 ᖃᓂᒋᔭᖓᓂ. ᐃᓄᓕᒫᖅᑎᑎᓪᓗᑎᒃ ᑲᑎᒪᓂᕐᓂᑦ ᐅᓂᒃᑳᖃᑦᑕᔪᔪᑦ ᐊᑯᓂᐅᙱᑦᑐᖅ ᑭᖑᓂᐊᒍᓪᓗ ᓄᓇᓕᓐᓂᑦ ᖁᕕᐊᓱᒍᑎᖃᖅᑐᑎᒃ ᑲᑎᒪᖃᑎᖃᖃᑦᑕᔪᔪᑦ ᑕᑯᕋᓐᓈᑎᑦᑎᕙᑦᑐᑎᓪᓗ ᖃᒡᒋᐊᕗᒃᑯᓃᙶᕐᓯᒪᔫᒃ ᓇᑖᓴ ᐊᓚᒃᑲᕆᐊᓪᓚᒃ ᐊᒻᒪᓗ ᔨᐅᕆ ᓚᐃᓴ. ᖃᒡᒋᐊᕗᒃᑯᓐᓂ ᐃᙱᖅᑏᒃ ᓱᕈᓯᕐᓂᑦ ᐃᓕᓐᓂᐊᑎᑦᑎᖃᑦᑕᔪᒻᒥᔫᒃ ᐊᑐᓂᑦ ᓄᓇᓕᓐᓂᑦ.