ᐃᖃᓗᐃᑦ, ᓄᓇᕗᑦ – ᓯᑉᑎᒻᕙ 19, 2018 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ (ᕿᑭᖅᑕᓂ) ᖁᕕᐊᓱᑉᐳᑦ ᑐᓴᖅᑎᑦᓯᔭᕆᐊᒃᓴᖅ ᐱᐅᓯᒋᐊᖅᑕᐅᓯᒪᔪᓂᒃ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᒃᑯᑦ (QTC) ᐃᑭᐊᖅᑭᕕᖓᓂᒃ www.qtcommission.ca.

ᐊᕐᕌᓂᓂᑦ ᕿᑭᖅᑕᓂᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᐃᖅᑲᓇᐃᔮᕆᔭᐅᓚᐅᖅᑐᖅ ᐱᐅᓯᒋᐊᖅᑎᑦᓯᓂᖅ ᐊᖏᓪᓕᕆᐊᕆᓂᕐᓗ QTC−ᑯᑦ ᐃᑭᐊᖅᑭᕕᖓᓂᒃ ᑭᒃᑯᑐᐃᓐᓇᕐᓄᑦ ᖃᕆᓴᐅᔭᒃᑯᑦ ᑐᓴᐅᒪᒍᑎᒃᓴᑦ ᐱᔭᕆᐊᑭᓐᓂᕐᓴᐅᖁᓪᓗᒋᑦ ᐊᑐᐃᓐᓇᐅᓂᕐᓴᐅᓗᑎᓪᓗ. ᓄᑖᒦᑦᑐᖅ ᐃᑭᐊᖅᑭᕕᒻᒥ ᐃᓚᒋᐊᕈᑏᑦ ᐊᒻᒪᓗ ᓄᑖᑦ ᑐᓴᐅᒪᔾᔪᑎᑦᓴᑦ ᐃᓚᒋᔭᐅᓪᓗᑎᒃ:

• ᐊᑐᖅᑕᐅᓚᑦᑖᕐᓯᒪᔪᓂᒃ ᐊᐅᓚᔫᓕᐅᒐᑦ 2008−ᒥ 2009-ᒥᓗ
  • ᐅᖃᐅᓯᖅᑕᖓᓂᒃ ᐊᒻᒪᓗ ᑭᓱᒨᖓᓂᖓᓂᒃ ᕿᓂᕈᑏᑦ ᐊᐅᓚᔫᓕᐅᒐᕐᓂ.
  • ᓇᑭᓐᖔᕐᓯᒪᓂᖏᓐᓂᒃ ᓄᓇᓐᖑᐊᖅ ᕿᒥᕐᕈᐊᖅᑐᖅ ᕿᓂᖅᑕᖓᓂᒃ ᐊᑐᖅᑕᐅᓯᒪᔪᓂᒃ ᐅᓂᒃᑳᖅᑐᓂᒃ ᓄᓇᓕᓐᓂ ᓇᓐᓂᑎ. ᓄᓇᓐᖑᐊᖅ ᐃᑲᔫᑎᖃᕐᓂᐊᕐᒥᔪᖅ ᓄᓇᓕᒻᒥ ᖃᓄᐃᓕᐅᕐᓂᐅᖃᑦᑕᕐᓯᒪᔪᑦ.
  • ᖃᐅᔨᔭᐅᓪᓗᐊᑕᕐᓯᒪᔪᓂᒃ ᕿᓂᕈᑦ ᑭᓱᒨᖓᓂᖏᑎᒍᑦ ᐅᓂᒃᑳᓂ.
• ᓄᑖᖅ ᐊᔾᔨᓂᒃ ᕿᒥᕐᕈᐊᕐᕖᑦ:
  • ᐊᔾᔩᑦ ᑕᑯᔭᒐᖃᕐᕕᒥᒃ ᓯᒥᑦᑑᓂᐊᓐ ᐱᔭᐅᓯᒪᔪᑦ (ᑲᓇᑕᒥ ᑕᑯᔭᒐᖃᕐᕕᔾᔪᐊᖅ ᒥᐊᓕᒃᑲᑦ ᐊᓪᓚᖏᓐᓂᒃ)
  • ᐊᔾᔩᑦ ᐅᖃᓕᒫᒐᖃᕐᕕᔾᔪᐊᖓᓂᒃ ᑐᖅᑯᐃᕕᖕᒥᒃ ᑲᓇᑕᒥ

“ᑖᒃᑯᐊ ᐱᖕᒪᕆᐅᔪᖅ ᐊᑐᖅᑕᐅᖃᑦᑕᕐᓯᒪᔪᓂᒃ ᐊᐅᓚᔫᓕᐅᒐᑦ ᐃᑲᔫᑎᓖᑦ ᐋᖅᑭᑦᓯᒪᑦᓯᐊᖁᓪᓗᒋᑦ ᑎᑎᕋᖅᑕᐅᓯᒪᔪᑦ ᑖᒃᑯᓇᓐᖓᓚᑦᑖᖅ ᐱᓯᒪᔪᑦ ᐱᕋᔭᑕᐅᖃᑦᑕᕐᓯᒪᓂᖏᓐᓂᒃ ᓄᓇᓕᖁᑎᑦᑕ,” ᐅᖃᓚᐅᖅᑐᖅ ᕿᑭᖅᑕᓂᒃᑯᑦ ᐊᖓᔪᖅᑳᖓ ᐲᔭᐃ ᐊᕿᐊᕈᖅ, “ᐃᓇᒋᐊᕐᐸᒃᑲ ᐃᓕᓴᐃᔩᑦ ᖃᐅᔨᓴᖅᑏᓪᓗ ᐊᑐᖃᑦᑕᖁᓪᓗᒋᑦ ᑖᒃᑯᐊ ᓇᖕᒥᓂᓪᓚᑦᑖᖅ ᐊᑐᕐᓯᒪᔭᖏᓐᓂᒃ ᐅᓂᒃᑳᑎᓪᓗᒋᑦ ᑭᖑᓕᕇᒥᒃ ᐃᓅᓯᖏᓐᓂ ᑲᑉᐱᐊᓱᐊᑎᑕᐅᓪᓗᑎᒃ ᓯᕐᓕᕿᑖᖅᑎᑕᐅᖃᑦᑕᕐᓯᒪᓂᖏᑦ ᐃᓕᖅᑯᓯᖅᑖᖅᑎᑕᐅᓇᓱᐊᖅᑐᑎᒃ ᐃᓕᖅᑯᓯᕆᓐᖏᑕᒥᓂᒃ ᐊᒻᒪᓗ ᓱᖏᐅᔾᔭᕐᓂᕐᒥᒍᑦ ᐃᓄᐃᑦ ᐊᓐᓇᓯᒪᑐᐃᓐᓇᖏᓪᓚᑦ ᑭᓯᐊᓂᓕ ᒪᑭᒪᖃᑦᑕᕐᓯᒪᕗᑦ ᐅᖁᒪᐃᑦᑐᐊᓗᒃᑰᕋᓗᐊᖅᑐᑎᒃ ᐃᓅᓯᕐᒥᓂ.”

ᐅᕙᑦᓯᐊᕉᓗᐊᓐᖏᑦᑐᖅ 2004-ᒥ, ᕿᑭᖅᑕᓂᒃᑯᑦ ᑐᓂᔭᐅᖃᑦᑕᓕᓚᐅᖅᑐᑦ ᐊᒻᒪᓗ ᓂᐱᓕᐅᖃᑦᑕᓕᖅᑐᑎᒃ ᐊᑐᓪᓚᑖᕐᓯᒪᔭᖏᓐᓂᒃ ᓇᖕᒥᓂᖅ ᐅᓂᒃᑳᖅᑐᑎᒃ ᐃᓄᐃᑦ ᕿᒻᒦᔭᖅᑕᐅᓯᒪᓂᕐᒧᑦ. ᒫᑦᓯ 2005-ᒥ ᑲᓇᑕᒥ ᐱᖁᔭᓕᐅᕐᕕᔾᔪᐊᒥ ᑲᑎᒪᔨᕋᓛᕆᑲᐃᓐᓇᖅᑕᖏᑦ ᐃᓄᓕᕆᔨᑐᖃᒃᑯᑦ ᑐᓵᖃᑦᑕᓚᐅᖅᑐᑦ ᐅᓂᒃᑳᖅᑐᓂᒃ ᐊᑐᓪᓚᑖᕐᓯᒪᔭᒥᓂᒃ ᓇᓗᓇᐃᔭᐃᔪᓂᒃ ᕿᒻᒦᔭᖅᑕᐅᖃᑦᑕᕐᓯᒪᓂᕐᒧᑦ ᐊᐅᓪᓚᑎᒥᓂᒃ ᓄᓇᕕᒻᒥ ᐊᒻᒪᓗ ᕿᑭᖅᑖᓗᒻᒥ ᐊᑯᓐᓂᖏᓐᓂᒃ 1950 ᐊᒻᒪᓗ 1970. ᑲᑎᒪᔨᕋᓛᑦ ᐊᐱᕆᓚᐅᖅᑐᑦ ᐸᓖᓯᒃᑯᓐᓂᒃ RCMP ᐱᓕᕆᒡᕕᒻᒥᒍᑦ ᖃᐅᔨᓴᕐᓂᖃᕈᓐᓇᕐᒪᖔᑕ. 2006-ᒥ ᐅᓂᒃᑳᖅ ᐃᓱᓕᒍᑎᖃᓚᐅᖅᑐᖅ ᑖᒃᑯᐊ ᓇᖕᒥᓂᖅ ᐸᓖᓯᒃᑯᑦ RCMP ᐱᕋᔭᓚᐅᕐᓯᒪᓐᖏᓐᓂᕋᖅᑕᐅᓪᓗᑎᒃ.

ᕿᑭᖅᑕᓂᒃᑯᑦ ᓈᖕᒪᒋᓚᐅᓐᖏᑕ ᐸᓖᓯᒃᑯᑦ RCMP ᐅᓂᒃᑳᓕᐊᖓ, ᓴᖅᑮᒍᑕᐅᒋᐊᖃᓕᓚᐅᖅᑐᖅ ᕿᑭᖅᑕᓂ ᓱᓕᔪᒥᒃ ᑭᒡᓕᓯᓂᐊᖅᑎᓂᒃ. ᑭᒡᓕᓯᓂᐊᖅᑏᑦ, ᐊᐅᓚᓂᖃᓚᐅᖅᑐᑦ 2007-ᒥᓂᒃ 2010−ᒧᓄᑦ, ᓯᕗᓪᓕᐹᑦᓯᐊᖑᓪᓗᑎᒃ ᐃᓄᓐᓄᑦ−ᐊᑭᓕᖅᑕᐅᓯᒪᓪᓗᑎᒃ ᐊᒻᒪᓗ ᐃᓄᓐᓄᑦ−ᐊᐅᓚᑕᐅᓪᓗᑎᒃ ᐱᓇᓱᐊᒐᕆᔭᐅᔪᖅ ᑕᒪᑦᓱᒧᖓ ᐊᒻᒪᓗ ᑎᑎᕋᖅᑕᐅᓪᓗᑎᒃ ᐅᓄᖅᑐᑦ ᐱᓂᕐᓗᑦᑕᐅᖃᑦᑕᕐᓯᒪᓂᖏᓐᓂᒃ ᐃᓄᐃᑦ ᑕᐃᑦᓱᒪᓂ. ᑖᓐᓇ ᐊᔾᔨᒋᔭᐅᓐᖏᑦᑐᖅ ᐊᔾᔨᐅᔪᖁᑎ ᐊᑕᖐᔪᖅ ᐃᓅᓯᕐᒥ ᐱᓂᕐᓗᑦᑕᐅᓂᕐᒧᑦ ᖃᐅᔨᓇᓱᐊᕐᓂᐅᔪᖅ ᓯᕗᓕᖅᑕᐅᓪᓗᓂ ᓄᓇᖃᖅᑳᕐᓯᒪᔪᓄᑦ ᑲᑐᔾᔨᖃᑎᒌᓄᑦ.

QTC−ᑯᑦ ᐱᐊᓂᒃᓯᒪᔪᑦ ᐅᓂᒃᑳᖏᑦ, ᑎᑭᐅᑎᓂᖅ ᓴᐃᒻᒪᖃᑎᒌᓐᓂᕐᒧᑦ, ᐊᐅᓚᔾᔭᐃᒋᐊᕆᖁᔨᔾᔪᑎ ᕿᑭᖅᑕᓂᒃᑯᓐᓂᒃ, ᑲᓇᑕ ᒐᕙᒪᖓᓂᒃ ᐊᒻᒪᓗ ᓄᓇᕗᑦ ᒐᕙᒪᖓᓂᒃ ᑲᔪᓯᑎᑕᐅᖁᓪᓗᒋᑦ 25 ᐊᑐᓕᖁᔨᔾᔪᑏᑦ ᐱᔨᑦᓯᖅᑕᐅᑦᓯᐊᓂᕐᓴᐅᖁᓪᓗᒋᑦ ᐃᓄᐃᑦ. ᕿᑭᖅᑕᓂᒃᑯᑦ ᐊᐅᓚᑕᖓ ᐊᒻᒪᓗ ᐃᒃᓯᕙᐅᑕᐅᕕᒋᓪᓗᒍ ᓴᐃᒻᒪᖃᑎᒌᓐᓂᕐᒧᑦ ᐱᔭᕆᐊᑭᓪᓕᑎᕆᔩᑦ ᑲᔪᓯᑎᑕᐅᒍᑎᒃᓴᖏᓐᓄᑦ QTC−ᑯᑦ ᐊᑐᓕᖁᔨᔾᔪᑎᓕᐊᕆᓯᒪᔭᖏᑦ.

ᐊᑐᓕᖁᔨᔾᔪᑎᓃᖃᑕᐅᔪᑦ ᐃᓄᐃᑦ ᐊᑐᐃᓐᓇᖃᖁᓪᓗᒋᑦ QTC−ᑯᑦ ᖃᕆᓴᐅᔭᒧᑦ ᑐᖅᑯᕐᓯᒪᔭᖏᓐᓂᒃ ᓄᐊᑕᐅᓯᒪᔪᓂᒃ ᐃᓗᓕᓕᓐᓂᒃ ᐱᑐᖃᕐᓂᒃ ᑎᑎᕋᕐᓯᒪᔪᓂᒃ ᐊᒻᒪᓗ ᓂᐱᓕᐅᒐᕐᓂᒃ, ᐊᐅᓚᔫᓕᐅᒐᕐᓂᒃ ᐊᒻᒪᓗ ᑎᑎᕋᕐᓯᒪᔪᓂᒃ ᐅᖃᐅᓯᒥᓂᖏᓐᓂᒃ ᐅᓂᒃᑳᓚᐅᖅᑐᑦ ᐊᑐᓪᓚᑖᕐᓯᒪᔪᑦ ᐅᓂᒃᑳᕐᓯᐅᕆᑎᓪᓗᒋᑦ ᑲᒥᓴᒃᑯᑦ. ᑕᑉᕙᓂ ᖃᕆᓴᐅᔭᒃᑯᑦ ᑲᑎᕐᓱᖅᑕᐅᓯᒪᔪᓂ ᑐᖅᑯᐃᕕᖓᓂ ᐃᓕᓐᓂᐊᕈᑎᒃᓴᖅᑕᓕᒃ ᑕᐃᒃᑯᓇᓐᖓᓚᑦᑖᖅ ᐅᓂᒃᑳᖃᑦᑕᓚᐅᖅᑐᓂᒃ ᓇᖕᒥᓂᖅ ᐊᑐᕐᓯᒪᔭᒥᓂᒃ QTC−ᑯᑦ ᐅᓂᒃᑳᕐᓯᐅᕐᓂᕆᖃᑦᑕᓚᐅᖅᑕᖏᓐᓂᒃ ᐊᒻᒪᓗ ᐃᓚᒋᔮ ᕿᑭᖅᑕᓂᒃᑯᑦ ᐊᖏᕈᑎᒋᓯᒪᔭᖓᑕ ᐃᖅᑲᓇᐃᔮᖑᓚᐅᖅᑐᖅ QTC−ᑯᓐᓄᑦ ᐊᑐᐃᓐᓇᐅᓂᕐᓴᐅᖁᓪᓗᒍ ᐊᕙᖕᒧᑦ.

350−ᖏᓐᓃᑦᑐᑦ QTC−ᑯᑦ ᐊᐅᓚᔫᓕᐊᕆᖃᑦᑕᕐᓯᒪᔭᖏᑦ ᐊᐅᓚᔫᓕᐅᒐᑦ ᐊᑐᓪᓚᑖᕐᓯᒪᔭᒥᓂᒃ ᐅᓂᒃᑳᖅᑐᑦ ᑎᑎᕋᖅᑕᐅᓚᐅᖅᑐᖅ ᑲᒥᓴᒃᑯᑦ ᑐᓴᕋᓱᐊᖃᑦᑕᑎᓪᓗᒋᑦ ᐃᓘᓐᓇᖏᓐᓂᒃ 13-ᓂ ᕿᑭᖅᑕᓂ ᓄᓇᓕᖏᓐᓂᒃ. ᐊᑐᓪᓚᑖᕐᓯᒪᔭᒥᓂᒃ ᐅᓂᒃᑳᖅᑐᑦ ᖃᓄᐃᑦᑐᒃᑰᖃᑦᑕᕐᓯᒪᓂᕐᒥᓂᒃ ᐃᓄᐃᑦ ᐃᓄᓐᓃᖔᓐᖏᑐᓪᓗ ᐊᑯᓐᓂᖏᓐᓂ 1950 ᐊᒻᒪᓗ 1975 ᐃᓅᓯᖃᓚᐅᖅᑐᑦ ᐊᑦᓱᕈᕐᓇᑐᒃᑯᑦ ᐊᒻᒪᓗ ᕿᑐᕐᖓᖏᓐᓂᒃ, ᐳᐃᒍᕈᓐᓇᖏᑦᑕᒥᓂᒃ ᐊᑦᑐᕈᓐᓇᑐᒃᑰᖅᑎᑕᐅᕐᔪᐊᖃᑦᑕᓚᐅᕐᓂᖏᑕ ᐊᓈᓇᒃᑯᖏᑦ ᐊᑖᑕᒃᑯᖏᑦ ᐊᒻᒪᓗ ᐃᓚᖏᓐᓂᒃ.

ᑖᒃᑯᐊ ᐊᐅᓚᔫᓕᐅᒐᐃᑦ ᐊᑐᐃᓐᓇᐅᔪᑦ ᑭᒃᑯᑐᐃᓐᓇᕐᓄᑦ ᓄᑖᖑᓕᖅᑐᒥ ᐋᖅᑭᒋᐊᖅᑕᐅᓯᒪᔪᒥ QTC−ᑯᑦ ᐃᑭᐊᖅᑭᕕᖓᓂ.

ᑐᑭᓯᒋᐊᒃᑲᓂᕐᕕᒃᓴᖅ, ᖃᐅᔨᒋᐊᕐᕕᒋᓗᒍ:

ᓰᒪ ᓴᕼᐊ ᔨᕆᕼᐃ

ᑐᑭᒧᐊᒃᑎᑦᑎᔨ ᑐᓴᐅᒪᔾᔪᑎᓕᕆᔨᒃᑯᓐᓂ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ

szerehi@qia.ca

867.975.8413

1.800.667.2742