ᓇᐃᓈᖅᑐᑦ: ᕿᑭᖅᑕᓂᒃᑯᑦ ᓱᓕ ᐃᑲᔪᖅᑐᑦ ᐊᖑᓇᓱᑦᑐᓕᕆᔨᒃᑯᓐᓂᑦ
ᕿᑭᖅᑕᓂᒃᑯᑦ ᐊᖓᔪᖅᑳᖓᑦ ᐸᐅᓗᓯ ᐊᕿᐊᕈᖅ ᑐᓂᓯᕋᑖᓚᐅᖅᑐᖅ ᐊᑐᓂᑦ ᐊᖑᓇᓱᑦᑐᓕᕆᔨᖏᓐᓄᑦ (ᐆᒪᔪᕐᓂᐊᑎᒃᑯᓐᓄᑦ) ᕿᑭᖅᑕᓂ ᓄᓇᓕᐅᔪᓂᑦ ᐃᑲᔫᑎᓂᑦ $6,577ᓂᑦ ᐃᑲᔫᑎᐅᓂᐊᖅᑐᓂᑦ ᓂᕿᔅᓴᖃᑦᑎᐊᓂᕐᒨᖓᔪᓂᑦ ᓄᓇᓕᖏᓐᓂᑦ.
ᑖᒃᑯᐊ ᑮᓇᐅᔭᐃᑦ ᐃᑲᔫᑎᐅᒍᒫᕐᓂᐊᕐᓯᒪᔪᑦ ᐊᖑᓇᓱᖃᑦᑕᓂᕐᒧᑦ, ᓂᕿᔅᓴᕐᓯᐅᖃᑦᑕᓂᕐᒧᑦ, ᐊᒻᒪᓗ ᓂᕿᑖᖅᑎᑦᑎᖃᑦᑕᓂᕐᒧᑦ ᕿᑭᖅᑕᓂ ᓄᓇᓕᐅᔪᓂᑦ. ᕿᑭᖅᑕᓂᒃᑯᑦ ᐊᖏᖅᑕᐅᔪᒻᒪᑕ ᑐᔅᓯᕋᐅᑎᒋᔪᔭᖓᑦ ᐊᑕᐅᓯᐊᕐᓗᑎᒃ ᑮᓇᐅᔭᖃᖅᑎᑦᑎᒍᑕᐅᓂᐊᖅᑐᓂᑦ ᓄᓇᓕᓐᓄᑦ ᓂᕿᑖᕐᕕᐅᕙᑦᑐᓄᑦ ᑲᓇᑕᒥ ᓂᕿᑦᑎᐊᕙᑦᑖᕈᑎᔅᓴᓂᑦ ᑮᓇᐅᔭᓂᑦ. ᓂᕿᑦᑎᐊᕙᑦᑖᕈᑎᔅᓴᐃᑦ ᑮᓇᐅᔭᑦ ᐋᖅᑭᑦᑕᐅᔪᔪᑦ ᑭᐅᔾᔪᑕᐅᓪᓗᑎᒃ ᐳᕝᕕᕆᓇᖅᑐᒧᑦ ᖃᓂᒪᓇᖅᑐᒧᑦ (ᓄᕙᕐᔪᐊᓇᖅᑐᒧᑦ) ᓄᓇᕐᔪᐊᓕᒫᒥ ᐃᓄᓕᕆᓪᓗᐊᑕᕐᐸᑦᑐᓄᑦ ᑎᒥᐅᔪᓄᑦ ᐃᓱᒫᓗᓇᕐᓯᓯᒪᑎᓪᓗᒍ ᓂᕿᑖᖃᑦᑕᕈᓐᓇᖁᓪᓗᒋᑦ ᓄᓇᓕᐅᔪᑦ.
ᐃᓚᒋᔭᐅᓪᓗᑎᒃ ᑖᒃᑯᓄᖓ ᐃᑲᔫᑎᓄᑦ, ᕿᑭᖅᑕᓂᒃᑯᑦ ᑲᑐᔾᔨᖃᑎᓖᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓐᓂᒃ ᑮᓇᐅᔭᖅᑖᑎᑦᑎᓂᕐᒧᑦ $10,000ᓂᑦ ᐊᑐᓂᑦ ᐊᖑᓇᓱᑦᑐᓕᕆᔨᒃᑯᓐᓄᑦ ᕿᑭᖅᑕᓂ ᓄᓇᓕᐅᔪᓄᑦ ᓄᓇᓕᓐᓂᑦ ᐊᖑᓇᓱᓐᓂᐅᖃᑦᑕᓂᐊᖅᑐᓄᑦ. ᕿᑭᖅᑕᓂᒃᑯᑦ ᑲᒪᒋᔭᖃᕐᓯᒪᒻᒥᔪᑦ ᐳᕝᕕᕆᓇᖅᑐᖅ ᐃᓱᒫᓗᓇᕐᓯᓯᒪᑎᓪᓗᒍ ᐸᕐᓇᐅᑎᓄᑦ ᒫᑦᓯᐅᑉ ᓄᙳᖏᓐᓂ ᑭᐅᔾᔪᑕᐅᓪᓗᓂ ᖃᓂᒪᓇᖅᑐᒧᑦ ᓄᓇᕐᔪᐊᓕᒫᒥ.
ᐅᐱᒍᓱᑦᑐᒍᑦ ᐃᑲᔪᕆᐊᔅᓴᖅ ᐊᖑᓇᓱᑦᑐᓕᕆᔨᒃᑯᓐᓂᑦ ᑲᔪᓯᑎᓪᓗᒋᑦ ᐃᖅᑲᓇᐃᔮᕆᕙᑦᑕᖏᓐᓂᒃ ᐱᐅᔪᐊᓗᓐᓂᑦ ᕿᑭᖅᑕᓂ ᓄᓇᓕᐅᔪᓂᑦ. ᑐᑭᓯᑎᑦᑎᒋᐊᒃᑲᓐᓂᓛᖅᑐᒍᑦ ᐃᓕᔅᓯᓐᓂᒃ ᑖᔅᓱᒪ ᐱᓇᓱᐊᕈᑕᐅᔫᑉ ᒥᔅᓵᓄᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᑎᓐᓂ ᐊᒻᒪᓗ ᐃᓄᓕᒫᓄᑦ ᑐᓴᕋᔅᓴᓕᕆᒍᑎᒋᕙᑦᑕᑦᑎᒍᑦ.
