ᐃᖃᓗᐃᑦ, ᓄᓇᕗᑦ − ᓯᑏᕝᕙ 1, 2020 – ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᒫᓐᓇ ᐱᔪᓐᓇᓕᕐᒥᔪᑦ ᑮᓇᐅᔭᖅᑎᒍᑦ ᐃᑲᔫᓯᐊᖅᑖᕈᒪᔾᔪᑎᓂᑦ ᑕᒪᐃᓐᓄᑦ 2020-2021 ᓯᓚᑦᑐᓴᕐᕕᕐᔪᐊᕐᒥ ᐃᓕᓐᓂᐊᖅᑎᓄᑦ ᑮᓇᐅᔭᓂᑦ ᐃᑲᔫᓯᐊᖅᑖᕈᑎᓄᑦ. ᐃᓕᓐᓂᐊᖅᑏᑦ ᒫᓐᓇ ᐱᓇᓱᒍᓐᓇᓕᕐᒥᔪᑦ ᐊᑐᕐᓗᑎᑦ ᐊᑕᐅᓯᕈᖅᑎᓯᒪᔭᕗᑦ ᐱᔭᕆᐊᑭᑦᑐᖅ ᐊᑐᕐᓗᒍ ᖃᕋᓴᐅᔭᒃᑯᑦ ᐱᓇᓱᐊᕈᑎᒥᒃ ᓈᑎᕆᐊᓕᒻᒥᒃ ᑕᒪᐃᓐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᓕᓐᓂᐊᖅᑎᓄᑦ ᑮᓇᐅᔭᑦ ᐃᑲᔫᓯᐊᖅᑖᕈᑎᖏᖕᓄᑦ.

ᑖᓐᓇ ᑎᓴᒪᒋᓕᖅᑕᖏᑦ ᐊᕐᕌᒍᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐊᑐᐃᓐᓇᐅᒪᑎᑦᑎᓕᖅᑐᑦ $200,000 ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑎᓄᑦ ᑮᓇᐅᔭᑦ ᐃᑲᔫᑎᖏᖕᓂᑦ ᖄᖓᒍᒃᑲᓐᓂᖅ ᐊᑐᖅᑕᓲᑦ $5,000/ᐊᕐᕌᒍᒧᑦ ᔮᓐ ᐊᒪᕈᐊᓕᒃ ᐃᓕᓐᓂᐊᖅᑎᓄᑦ ᑮᓇᐅᔭᑦ ᐃᑲᔫᓯᐊᖏᑦ. 80-ᐅᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓕᓐᓂᐊᖅᑎᓄᑦ ᑮᓇᐅᔭᑦ ᐃᑲᔫᑏᑦ ᐃᒪᓐᓇᐅᓲᖑᓪᓗᑎᑦ $2,500/ᐊᕐᕌᒍᒧᑦ, ᑐᓂᔭᐅᓲᖑᕗᑦ ᒪᓕᑦᑐᒋᑦ ᐱᓇᓱᐊᖅᑳᖅᑐᑦ ᐃᑲᔫᓯᐊᖅᑖᖅᑎᑕᐅᕙᑦᑐᑎᑦ ᐃᓕᓐᓂᐊᖅᑏᑦ ᕿᑭᖅᑖᓗᖕᒥᐅᑕᐅᔪᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑐᑦ.

ᑖᓐᓇ $5,000 ᔮᓐ ᐊᒪᕈᐊᓕᒃ ᐃᓕᓐᓂᐊᖅᑎᓄᑦ ᑮᓇᐅᔭᑦ ᐃᑲᔫᑏᑦ ᐃᖅᑲᐅᒪᑎᑦᑎᔾᔪᑕᐅᕗᖅ ᐱᓇᓱᐊᒐᖃᖅᓯᒪᓂᖓᑦ ᔮᓐ ᐊᒪᕈᐊᓕᑉ ᐃᓄᐃᑦ ᓄᓇᕗᒻᒥᐅᑦ ᐃᓅᓯᕐᒥᓂᒃ ᐱᐅᓯᑎᑕᐅᓂᖅᓴᐅᖁᓪᓗᒋᑦ. ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓯᕗᓪᓕᖅᐸᐅᑎᑦᑎᓂᐊᖅᐳᑦ ᐱᓇᓱᐊᖅᑐᓂᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑎᓄᑦ ᐊᑐᕐᔫᒥᓕᖅᑎᑦᑎᓇᓱᐊᓲᑦ ᐃᓄᐃᑦ ᐅᖃᐅᓯᖏᖕᓂᑦ ᐃᓕᖅᑯᓯᖏᓐᓂᓪᓗ.

“ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓕᓐᓂᐊᖅᑎᓄᑦ ᑮᓇᐅᔭᑦ ᐃᑲᔫᓯᐊᒃᓴᖏᑦ ᐃᑲᔪᓲᑦ ᐊᒥᓲᓂᖅᓴᓂᑦ ᕿᑭᖅᑖᓗᖕᒥᐅᓂᑦ ᐃᓕᓐᓂᐊᖅᑎᓂᑦ ᓯᓚᑦᑐᓴᕐᕕᒻᒧᑦ ᐃᓕᓐᓂᐊᕈᓐᓇᓕᖁᓪᓗᒋᑦ,” ᐅᖃᖅᑐᓂ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐊᖓᔪᖅᑳᖓᑦ ᐸᐅᓗᓯ ᔫᓯᐱ ᐊᕿᐊᕈᖅ, “ᐃᑲᔪᓲᑦ ᒪᒃᑯᑦᑐᓂᑦ ᐃᓄᖕᓂᑦ ᐃᓕᓐᓂᐊᕐᓂᖏᖕᓄᑦ ᐊᑭᓕᐅᑎᒋᒋᐊᖃᓲᖏᖕᓂᑦ ᓲᕐᓗᒃ ᐅᖃᓕᒫᒐᑦ ᐊᒻᒪᓗ ᐃᓕᓴᕕᒻᒥ ᐊᑐᖅᑕᐅᔭᕆᐊᖃᓲᑦ ᐃᓄᐃᑦ ᐃᓕᓐᓂᐊᖅᑏᑦ ᐃᓕᓐᓂᐊᕈᑎᒥᓂᒃ ᑲᒪᓂᖅᓴᐅᖃᑦᑕᓂᐊᕐᒪᑕ.”

ᐃᓱᓕᕝᕕᖓᑦ ᐱᓇᓱᐊᕐᓗᓂ ᐃᓕᓐᓂᐊᖅᑎᓄᑦ ᑮᓇᐅᔭᓂᑦ ᐃᑲᔫᑎᓂᑦ ᐅᓪᓗᕈᓗᑐᐃᓐᓇᐅᕗᖅ, ᓯᑏᕝᕙ 18, 2020.

ᐊᑐᕐᓗᓂ ᖃᕋᓴᐅᔭᒃᑯᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᓕᓐᓂᐊᖅᑎᓄᑦ ᑮᓇᐅᔭᑦ ᐃᑲᔫᓯᐊᖅᑖᕈᒪᔾᔪᑎᖓᓂᒃ, ᐃᓕᓐᓂᐊᖅᑏᑦ ᐱᓇᓱᐊᕈᓐᓇᕋᔭᖅᑐᑦ ᐊᑕᐅᓯᕐᒥᒃ ᐅᕝᕙᓘᓐᓃᑦ ᑕᒪᒃᑮᓐᓂᒃ ᐃᓕᓐᓂᐊᖅᑎᓄᑦ ᑮᓇᐅᔭᑦ ᐃᑲᔫᓯᐊᒃᓴᓂᑦ. ᖃᐅᔨᒪᒋᐊᕐᔫᒥᒋᓪᓗ, ᑐᓂᔪᓐᓇᕋᔭᕋᖅᑕᑎᑦ ᐃᓕᓐᓂᐊᖅᑏᑦ ᑮᓇᐅᔭᑦ ᐃᑲᔫᓯᐊᖅᑖᕈᒪᔾᔪᑎ ᑕᒪᐃᓐᓂ ᐃᑲᔪᖅᑐᐃᔾᔪᑏᑦ ᑎᑎᖅᑲᑦ ᐃᓚᓕᐅᔾᔭᐅᓯᒪᒍᑎᑦ ᑭᓯᐊᓂ.

ᒪᓕᑦᑕᐅᔭᕆᐊᓖᑦ ᑕᒪᒃᑮᓐᓄᑦ ᐃᓕᓐᓂᐊᖅᑏᑦ ᑮᓇᐅᔭᑦ ᐃᑲᔫᓯᐊᖅᑖᕈᒪᔾᔪᑎᓂᑦ ᐱᓇᓱᐊᕐᓗᓂ:

• ᐱᓇᓱᐊᖅᑐᑦ ᐃᓕᓐᓂᐊᖅᑏᑦ ᑮᓇᐅᔭᓂᑦ ᐃᑲᔫᓯᐊᖅᑖᕈᑎᓂᑦ ᓄᓇᕗᑦ ᑐᙵᕕᒃ ᑎᒥᖓᓄᑦ ᐊᑎᓕᐅᖅᓯᒪᔭᕆᐊᓖᑦ ᓇᓗᓇᐃᒃᑯᑕᖃᕐᓗᑎᑦ ᐊᒻᒪᓗ ᐃᓅᓂᕋᖅᑕᐅᓗᑎᑦ ᒪᓕᑦᑐᒍ ᓄᓇᕗᑦ ᐊᖏᕈᑎᖓᑦ ᕿᑭᖅᑖᓗᖕᒥ
• ᐃᓕᓐᓂᐊᖅᑏᑦ ᓄᓇᕗᒻᒥᐅᑕᐅᖏᓐᓇᖅᑐᒥᓂᐅᔭᕆᐊᓖᑦ ᐃᓚᖓᓂᒃ ᓄᓇᓕᓐᓂᐅᑕᐅᓗᓂ ᑕᒪᐃᓐᓂ 13 ᕿᑭᖅᑖᓘᑉ ᓄᓇᓕᖏᓐᓃᑦᑐᓂᑦ − ᓄᓇᕗᒻᒦᒃᓴᐃᓐᓇᕆᐊᖃᙱᑦᑐᑦ ᑕᐃᒃᑯᐊ ᐃᓕᓐᓂᐊᖅᑏᑦ ᐊᓯᖏᖕᓂ ᓄᓇᖃᐅᖅᑐᑦ ᐊᑎᓕᐅᖅᓯᒪᓂᖏᖕᓄᑦ ᐅᓪᓗᓕᒫᖅ ᐃᓕᓐᓂᐊᖅᑎᐅᒍᑎᑦ ᓯᓚᑦᑐᓴᕐᕕᒻᒧᑦ
• ᓇᓗᓇᐃᒃᑯᑕᖓ ᐊᑎᓕᐅᖅᓯᒪᓂᕐᒧᑦ ᓯᓚᑦᑐᓴᕐᕕᒻᒧᑦ ᓯᓚᑦᑐᓴᕐᕕᕐᔪᐊᕐᒧᓘᓐᓃᑦ
• ᐃᖅᑲᓇᐃᔭᖅᑐᖅᓯᐅᑎᕕᑦ ᓈᓴᐅᑎᖓᑦ

ᒪᓕᑦᑕᐅᒃᑲᓐᓂᕆᐊᓖᑦ ᐱᓇᓱᐊᖅᑐᓄᑦ ᔮᓐ ᐊᒪᕈᐊᓕᒃ ᐃᓕᓐᓂᐊᖅᑏᑦ ᑮᓇᐅᔭᑦ ᐃᑲᔫᓯᐊᖅᑖᕈᑎᒃᓴᖏᖕᓄᑦ:

• ᐃᓕᓐᓂᐊᖅᑏᑦ ᐊᑎᓕᐅᖅᓯᒪᔭᕆᐊᓖᑦ ᐃᓕᓐᓂᐊᕐᓂᕐᒥᓂᒃ ᓯᓚᑦᑐᓴᕐᕕᒻᒥ, ᐅᑯᐊᖑᑉᐸᑕ ᐊᑲᐅᒋᔭᐅᓂᖅᓴᐅᒐᔭᖅᑐᑎᑦ ᐊᑐᕐᔫᒥᓕᖅᑎᑦᑎᓇᓱᐊᓲᑦ ᐃᓄᐃᑦ ᐅᖃᐅᓯᖏᖕᓂᑦ ᐃᓕᖅᑯᓯᖏᓐᓂᓗ ᓯᑏᕝᕙᒥ ᔮᓐᓄᐊᕆᒥᓗ ᐊᑎᓕᐅᖅᓯᒪᓗᑎᑦ
• 500−ᓂᑦ ᐅᖃᐅᓯᖃᖅᑐᒥᒃ ᑎᑎᕋᕆᐊᖃᖅᐳᑎᑦ ᖃᓄᖅ ᐱᓕᕆᐊᖃᕈᒪᔾᔪᑎᒋᓯᒪᓕᖅᑐᒍ ᔮᓐ ᐊᒪᕈᐊᓕᒃ ᖃᓄᐃᓕᐅᕈᑎᒋᓯᒪᔭᖏᑦ ᐃᓱᒪᒋᒋᐊᖅᑳᓚᐅᖅᑐᒋᑦ ᐊᒻᒪᓗ ᓄᓇᕗᒻᒥ ᐊᖏᕈᑎᐅᔪᖅ
• ᐅᓪᓗᒥᓕᓴᐅᓛᖑᔪᖅ ᐃᖅᑲᓇᐃᔮᕆᖃᑦᑕᖅᓯᒪᓂᑎᑦ ᐊᒻᒪᓗ ᐃᓕᓐᓂᐊᖅᓯᒪᔭᑎᑦ ᑎᑎᕋᖅᓯᒪᓂᖏᑦ
• ᐊᔾᔨᖏᑦ ᐃᓕᓐᓂᐊᕈᑎᖕᓄᑦ ᐱᔭᕇᖅᓯᒪᔭᑎᑦ ᓇᓕᖅᑲᖏᑦ
• ᒪᕐᕉᒃ ᑎᑎᖅᑳᒃ ᑮᓇᐅᔭᖅᑎᒍᑦ ᐃᑲᔫᓯᐊᖅᑖᕈᒪᔾᔪᑎᖕᓄᑦ ᐃᑲᔪᖅᑐᐃᓂᕋᕐᓗᑎᑦ ᐃᓕᓴᐃᔨᒦᙶᖁᔭᐅᔫᒐᓗᐊᒃ, ᓯᓚᑦᑐᓴᕐᕕᕐᔪᐊᕐᒥ ᐃᓕᓴᔨᐃᒥᒃ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᒋᓚᐅᖅᓯᒪᔭᕐᓂᑦ ᐃᖅᑲᓇᐃᔭᖃᑎᖃᑦᑎᐊᖅᓯᒪᓂᑰᓪᓗᓂ ᐃᓕᖕᓂᒃ
• ᐃᓕᓐᓂᐊᖅᑏᑦ ᐅᓪᓗᓕᒫᖅ ᐃᓕᓐᓂᐊᕆᐊᖃᖃᑦᑕᕐᓗᑎᑦ ᐊᒻᒪᓗ ᓯᓚᑦᑐᓴᕐᕕᒻᒥ ᐊᓂᒍᐃᓯᒪᓂᕋᐃᒍᑎᖏᑦ ᒪᓕᑦᑐᒋᑦ ᐃᓕᓐᓂᐊᕈᑎᑎᑦ ᐱᔭᕇᖅᓯᒪᑦᑎᐊᕐᓗᒋᑦ ᐃᓕᓐᓂᐊᖅᑏᑦ ᑮᓇᐅᔭᑦ ᐃᑲᔫᓯᐊᒃᓴᖏᖕᓂᑦ ᐱᔪᓐᓇᖁᓪᓗᒋᑦ ᑕᐃᒪᐃᑦᑕᕆᐊᖃᖅᐳᑎᑦ

ᖃᕋᓴᐅᔭᒃᑯᑦ ᐱᓇᓱᐊᕈᑏᑦ ᐅᕙᓂ ᐱᔭᐅᔪᓐᓇᖅᐳᑦ: https://www.qia.ca/scholarship-application/

ᐃᓕᓐᓂᐊᖅᑎᐅᔪᑦ ᐃᑲᔪᖅᑕᐅᔭᕆᐊᖃᕈᑎᑦ ᐱᔭᕇᖅᓯᓗᑎᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑕ ᐃᓕᓐᓂᐊᖅᑎᓄᑦ ᑮᓇᐅᔭᑦ ᐃᑲᔫᑎᒃᓴᐅᔪᓄᑦ ᐱᓇᓱᐊᕈᑎᖏᖕᓂᑦ, ᖃᐅᔨᒃᑲᐃᔪᓐᓇᕐᒥᔪᑦ ᓄᓇᓕᖏᑕ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓄᓇᓕᒻᒥᐅᑦ ᐱᓕᕆᖃᑎᒌᑦᑐᓕᕆᔨᖓᓂᒃ.

ᑐᑭᓯᒋᐊᒃᑲᓐᓂᖁᓪᓗᑎᑦ, ᖃᐅᔨᒃᑲᕐᓗᒍ:

ᓰᒪ ᓴᕼᐊᕐ ᔨᐅᕆᕼᐃ,

ᑐᑭᒧᐊᑦᑎᑦᑎᔨ ᑐᓴᐅᒪᑎᑦᑎᔪᓕᕆᓂᕐᒧᑦ,

ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᑦ

szerehi@qia.ca

867.975.8413 or

1.800.667.2742