ᒥᑦᑎᒪᑕᓕᐅᑉ ᓄᓇᓕᐊᓃᑦᑐᒥᒃ ᓇᐅᑦᓯᖅᑐᕐᓂᕐᒧᑦ ᐱᓕᕆᐊᖅ
ᒥᑦᑎᒪᑕᓕᐅᑉ ᓄᓇᓕᐊᓃᑦᑐᒥᒃ ᓇᐅᑦᓯᖅᑐᕐᓂᕐᒧᑦ ᐱᓕᕆᐊᖅ ᐱᒋᐊᖅᑎᓚᐅᖅᑕᕗᑦ ᐊᕐᕌᓂ ᐱᕈᖅᐸᓪᓕᐊᔪᖅ ᐊᒻᒪ ᐊᐅᓚᓂᐊᖅᑐᓂ ᐊᕐᕌᒎᖕᓄᑦ ᒪᕐᕉᖕᓄᑦ ᓱᓕ.
ᐊᕐᕌᒍ ᐊᑐᖅᑎᓪᓗᒍ, ᐱᖓᓲᔪᖅᑐᑦ 6 ᓄᓇᓕᖕᓂᑦ ᓇᐅᑦᓯᖅᑐᕐᓂᕐᒧᑦ ᐃᓚᐅᓂᐊᖅᑐᑦ. ᐱᖓᓱᐊᖅᑎᖅᑐᑎᒃ ᐊᕐᕋᒎ ᐃᓗᐊᓂ ᐃᓕᓐᓂᐊᖃᑦᑕᖅᓯᒪᓕᖅᑐᑦ, ᐃᓚᖓᑦ ᐅᐱᕐᖔᒥ ᓯᑯᒥ, ᐃᓚᖓᑦ ᐅᑭᐊᒃᓵᒃᑯᑦ ᐃᒪᐅᓕᖅᑎᓪᓗᒍ ᐊᒻᒪ ᐊᑕᐅᓯᖅ ᐅᑭᐅᒃᑯᑦ ᑖᖃᑦᑕᓕᖅᑎᓪᓗᒍ.
ᐃᓕᓐᓂᐊᕈᑕᐅᔪᑦ ᐃᓚᖃᖅᑐᑦ ᑕᒻᒪᖅᑕᐃᓕᔾᔪᑎᓂᒃ GPS, ᐃᒪᒃᑯᑦ ᑕᒻᒪᕇᒃᑰᑏᑦ ᐊᒻᒪ ᑐᑭᓯᒋᐊᕈᑎᒃᓴᓂᒃ ᑲᑎᖅᓱᐃᓪᓗᑎᒃ ᐊᒻᒪ ᐊᑐᕆᐊᖃᖅᑕᒥᓂᒃ. ᐊᑐᓂ ᐃᓕᓐᓂᐊᕐᓂᐅᔪᑦ ᐃᓚᖃᓚᐅᖅᑐᑦ ᓄᓇᒨᖅᑎᑕᐅᓪᓗᑎᒃ ᐱᓕᒻᒪᒃᓴᖅᑐᑎᒃ ᐃᓚᐅᑎᓪᓗᒋᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᑦ ᐃᖅᑲᓇᐃᔭᖅᑎᖏᑦ ᐊᒻᒪ ᒥᑦᑎᒪᑕᓕᖕᒥ ᓇᐅᑦᑎᖅᑐᖅᑏᑦ. ᐃᓚᖓᓐᓂ, ᑭᓯᐊᓂ ᖃᐃᖁᔭᐅᓐᖏᑦᑐᒥᒃ ᑎᑭᑦᑐᖃᓚᐅᖅᑐᖅ.
“ᑖᒃᑯᐊ ᐱᓕᕆᖃᑎᒌᒃᑐᑦ ᓯᓈᓃᓚᐅᕐᒪᑕ ᐅᑕᖅᑭᓪᓗᑎᒃ ᓇᑦᓯᕐᓂᑦ ᐊᒻᒪ ᑕᑯᓚᐅᖅᑐᒍ ᓇᓄᕐᒥᒃ ᐅᖓᓯᒃᑑᒐᓗᐊᒥᒃ,” “ᐃᖅᑲᓇᐃᔭᖏᑦ ᓯᑏᕙᓐ ᓛᓐᔅᑎᐅᓪ, ᐃᓚᖓᑦ ᕿᑭᖅᑕᓃᒃᑯᑦ ᐃᖅᑲᓇᐃᔭᖅᑎᖓᑦ ᓯᕗᓕᖅᑎᐅᖃᑕᐅᓚᐅᖅᑐᑦ ᑕᒪᑐᒧᖓ ᐱᓕᕆᐊᒧᑦ. “ᓯᐊᕉᓕᖅᑎᓪᓗᒍ ᐃᑲᕐᕋᓪᓗᓕᐊᒥᒃ ᖃᓂᓪᓕᕙᓪᓕᐊᑐᐃᓐᓇᓕᓚᐅᖅᑐ ᐊᒻᒪ ᖃᓂᓪᓕᓗᐊᓕᕐᒪᑦ ᕿᒫᑎᑕᐅᒋᐊᖃᓚᐅᖅᑐᖅ.”
. ᐱᓕᕆᐊᒃᓴᖏᑦᑕ ᐃᓚᒋᓪᓗᓂᐅᒃ ᑕᒪᒃᑯᐊ ᓇᐅᑦᓯᖅᑐᖅᑏᑦ ᐆᒪᔪᕈᓐᓇᖃᑦᑕᖅᑐᑦ ᑎᑎᕋᖅᐸᓪᓕᐊᓪᓗᒋᑦ ᖃᓄᐃᓐᓂᖏᑦ, ᖃᓄᐃᓐᖏᓐᓂᖏᑦ ᖃᐅᔨᓴᖅᑐᒋᑦ ᐅᖅᓱᖏᑦ ᐊᒻᒪ ᓇᓪᓕᐊᑐᐃᓐᓇᖅ ᐋᓐᓂᖅᓯᒪᔪᑦ. ᑖᒃᑯᐊ ᓇᐅᑦᑎᖅᑐᖅᑏᑦ ᑎᑎᕋᖅᐸᓪᓕᐊᖕᒥᔪᑦ ᓄᓇᓂᒃ ᐊᒻᒪ ᑕᕆᐅᒥ ᓯᑯᓂᒃ ᐊᑐᖅᑕᐅᔪᓂᒃ ᐊᖑᓇᓱᐊᕐᕕᐅᕙᒃᑐᑦ ᐊᕐᕌᒎᑉ ᐃᓗᐊᓂ.
ᑲᑎᑦᑐᒋᑦ 199 ᐊᓐᖑᑕᐅᓚᐅᖅᑐᑦ ᐱᖓᓱᓂ ᐊᕐᕌᒎᑉ ᐃᓚᖏᓐᓂ, ᐃᓚᐅᓪᓗᑎᒃ ᐊᑕᐅᓯᖅ ᐊᖏᔪᒻᒪᕆᐅᓚᐅᖅᑐᖅ ᓇᑦᓯᖅ ᐅᔾᔨᕆᔭᐅᔪᖅ.
“ᐊᖏᔪᐊᓗᖕᒥᑦ ᓇᑦᓯᓚᐅᖅᑐᒍ,” ᐃᖅᑲᐅᒪᔪᖅ ᓛᓐᔅᑎᐅᓪ. “ᕿᓚᓗᒐᖅᑎᑐᑦ ᐊᖏᑎᒋᔪᖅ − ᐊᖏᔪᒻᒪᕆᐊᓘᓚᐅᖅᑐᖅ − ᓯᑕᒪᐅᒋᐊᖃᓚᐅᖅᑐᒍᑦ ᐊᒧᓪᓗᒍ ᐅᒥᐊᕐᒧᑦ.”
ᐅᑭᐅᑉ ᑕᖅᑭᖏᓐᓂ ᐊᒃᓱᕈᕐᓇᕐᓂᖅᓴᐅᓚᐅᖅᑐᖅ ᐱᓕᕆᖃᑎᒋᓄᑦ ᐱᔾᔪᑎᒋᓪᓗᒋᑦ ᓯᓚᐅᑉ ᖃᓄᐃᓐᓂᖏᑦ.
“ᐊᖑᓇᓱᐊᕐᓂᖅ 24-ᐃᑲᕐᕋᓂᒃ ᑖᖃᑦᑕᖅᑎᓪᓗᒍ ᐊᒃᓱᕈᕐᓇᖅᑐᖅ,” ᐅᖃᖅᑐᓂ ᓛᓐᔅᑎᐅᓪ. “ᑖᕐᓂᖓᓄᑦ ᓇᓰᑦ ᐊᓪᓗᖏᓐᓂᒃ ᓇᓂᓯᒐᓱᐊᖃᑦᑕᓚᐅᖅᑐᑦ ᓂᐱᓂᒃ ᓈᓚᒃᑐᑎᒃ.”
ᑖᒃᑯᐊ ᐱᓕᕆᖃᑎᒋᓚᐅᖅᑐᑦ ᐱᐊᓂᓚᐅᖅᑐᑦ ᑲᑎᒪᓂᖃᖅᑐᑎᒃ ᐊᒻᒪ ᐅᓂᒃᑳᖅᑐᑎᒃ ᒥᑦᑎᒪᑕᓕᖕᒥ ᐱᖃᑎᒋᓪᓗᒋᑦ ᓇᐅᑦᓯᖅᑐᖅᑏᑦ ᐊᒻᒪ ᓄᓇᓖᑦ ᐊᖑᓇᓱᒃᑎᖏᑦᑕ ᑲᑐᔾᔨᖃᑎᒋᖏᑦ. ᑖᒃᑯᐊ ᐱᓕᕆᖃᑎᒋᒃᑯᑦ ᐃᓕᓐᓂᐊᒃᑲᓐᓂᕐᓂᐊᕈᒪᔪ ᐃᒪᖃᕐᓂᖓᓂ ᑕᒫᓂ ᐊᕐᕌᒍᒥ.
ᑖᓐᓇ ᐱᓕᕆᐊᖑᔪᖅ ᑐᒡᓕᐊᓅᖅᐸᓪᓕᐊᑎᓪᓗᒍ ᐊᕐᕌᒍᒧᑦ, ᑕᐅᑐᒐᖃᕐᓂᐊᖅᑐᒍᑦ ᐊᔪᕈᓐᓃᖅᓴᓂᕐᒥᑦ ᐃᓕᓐᓂᐊᕐᓂᖃᒃᑲᓐᓂᕐᓗᑎᒃ ᓇᐅᑦᓯᖅᑐᖅᑏᑦ. ᑖᒃᑯᐊ ᓇᐅᑦᓯᖅᑐᖅᑏᑦ ᑎᒍᓯᕙᓪᓕᐊᑐᐃᓐᓇᕐᓂᐊᖅᑐᑦ ᐱᓕᕆᐊᒃᓴᒃᑲᓐᓂᕐᓂᑦ ᐱᓕᕆᐊᖃᕐᓗᑎᒃ ᐆᒪᔪᐃᑦ ᑎᒥᖏᑦᑕ ᖃᓄᐃᓐᓂᖏᓐᓂᒃ ᐊᓐᖑᑕᒥᓂᒃ ᓂᕐᔪᑎᓂᒃ, ᑲᑎᖅᓱᐃᓗᑎᒃ ᑐᑭᓯᒋᐊᕈᑎᒃᓴᓂᒃ ᐆᒪᔪᕐᓄᑦ ᐊᒻᒪ ᓅᑦᑕᕐᓂᖏᓐᓄᑦ ᐊᕐᕌᒎᑉ ᐃᓗᐊᓂ, ᐊᒻᒪ ᑲᑎᖅᓱᐃᓗᑎᒃ ᑕᑯᒥᓇᓐᖏᑦᑐᓂᒃ ᐆᒪᔪᕐᓂᖅ ᓲᕐᓗ ᐋᕐᓗᐃᑦ, ᑖᒃᑯᐊ ᓇᐅᑦᓯᖅᑐᖅᑏᑦ ᑲᑎᖅᓱᐃᓂᐊᕐᒥᔪᑦ ᐊᒥᕋᖓᑕ ᐃᓚᖓᓂ ᐲᖅᓯᓗᑎᒃ ᖃᐅᔨᓴᒐᒃᓴᓂᒃ ᐊᒻᒪ ᐊᐅᖓᓂᒃ ᐆᒃᑑᑎᒃᓴᓂᒃ ᐆᒪᔪᕐᓂᒃ ᐊᓐᖑᑕᐅᔪᓂᒃ ᖃᓄᐃᓐᓂᖃᓐᖏᒃᑲᓗᐊᕐᒪᖔᑕ.
ᒥᑦᑎᒪᑕᓕᖕᒦᑦᑐᑦ ᓇᐅᑦᓯᖅᑐᕐᓂᒧᑦ ᐱᓕᕆᐊᖅ ᑮᓇᐅᔭᖃᖅᑎᑕᐅᔪᖅ ᒐᕙᒪᑐᖃᒃᑯᓐᓄᑦ ᐊᑐᖅᑐᒋᑦ ᓄᓇᖃᖅᑳᖅᓯᒪᔪᑦ ᓄᓇᓕᖕᓃᑦᑐᓄᑦ − ᓯᓚᐅᑉ ᖃᓄᐃᓐᓂᖓᓄᑦ ᓇᐅᑦᓯᖅᑐᕐᓂᕐᒧᑦ ᐱᓕᕆᐊᑎᒍᑦ.
